༦. ཝི་ཧཱ་ར་ཝི་མཱ་ན་ཝ་ཏྠུ
༧༢༩. ‘‘ཨ་བྷི་ཀྐ་ནྟེ་ན ཝ་ཎྞེ་ན…པེ… ཨོ་ས་དྷཱི ཝི་ཡ ཏཱ་ར་ཀཱ.
༧༣༠. ‘‘ཏ་སྶཱ ཏེ ན་ཙྩ་མཱ་ནཱ་ཡ, ཨ་ངྒ་མ་ངྒེ་ཧི ས་བྦ་སོ;
དི་བྦཱ ས་དྡཱ ནི་ཙྪ་ར་ནྟི, ས་ཝ་ནཱི་ཡཱ མ་ནོ་ར་མཱ.
༧༣༡. ‘‘ཏ་སྶཱ ཏེ ན་ཙྩ་མཱ་ནཱ་ཡ, ཨ་ངྒ་མ་ངྒེ་ཧི ས་བྦ་སོ;
དི་བྦཱ ག་ནྡྷཱ པ་ཝཱ་ཡ་ནྟི, སུ་ཙི་ག་ནྡྷཱ མ་ནོ་ར་མཱ.
༧༣༢. ‘‘ཝི་ཝ་ཏྟ་མཱ་ནཱ ཀཱ་ཡེ་ན, ཡཱ ཝེ་ཎཱི་སུ པི་ལ༹་ནྡྷ་ནཱ;
ཏེ་སཾ སུ་ཡྻ་ཏི ནི་གྒྷོ་སོ, ཏུ་རི་ཡེ པ་ཉྩ་ངྒི་ཀེ ཡ་ཐཱ.
༧༣༣. ‘‘ཝ་ཊཾ་ས་ཀཱ ཝཱ་ཏ་དྷུ་ཏཱ, ཝཱ་ཏེ་ན ས་མྤ་ཀ་མྤི་ཏཱ;
ཏེ་སཾ སུ་ཡྻ་ཏི ནི་གྒྷོ་སོ, ཏུ་རི་ཡེ པ་ཉྩ་ངྒི་ཀེ ཡ་ཐཱ.
༧༣༤. ‘‘ཡཱ་པི ཏེ སི་ར་སྨིཾ མཱ་ལཱ, སུ་ཙི་ག་ནྡྷཱ མ་ནོ་ར་མཱ;
ཝཱ་ཏི ག་ནྡྷོ དི་སཱ ས་བྦཱ, རུ་ཀྑོ མ་ཉྫཱུ་ས་ཀོ ཡ་ཐཱ.
༧༣༥. ‘‘གྷཱ་ཡ་སེ ཏཾ སུ་ཙི་ག་ནྡྷཾ, རཱུ་པཾ པ་སྶ་སི ཨ་མཱ་ནུ་སཾ;
དེ་ཝ་ཏེ པུ་ཙྪི་ཏཱ་ཙི་ཀྑ, ཀི་སྶ ཀ་མྨ་སྶི་དཾ ཕ་ལ’’ནྟི.
༧༣༦. ‘‘སཱ་ཝ་ཏྠི་ཡཾ མ་ཡ྄ཧཾ ས་ཁཱི བྷ་ད་ནྟེ, ས་ངྒྷ་སྶ ཀཱ་རེ་སི མ་ཧཱ་ཝི་ཧཱ་རཾ;
ཏ་ཏྠ་པྤ་ས་ནྣཱ ཨ་ཧ་མཱ་ནུ་མོ་དིཾ, དི་སྭཱ ཨ་གཱ་ར་ཉྩ པི་ཡ་ཉྩ མེ་ཏཾ.
༧༣༧. ‘‘ཏཱ་ཡེ་ཝ མེ སུ་དྡྷ་ནུ་མོ་ད་ནཱ་ཡ, ལ་དྡྷཾ ཝི་མཱ་ན་བྦྷུ་ཏ་ད་སྶ་ནེ་ཡྻཾ;
ས་མ་ནྟ་ཏོ སོ་ལ༹་ས་ཡོ་ཛ་ནཱ་ནི, ཝེ་ཧཱ་ཡ་སཾ ག་ཙྪ་ཏི ཨི་དྡྷི་ཡཱ མ་མ.
༧༣༨. ‘‘ཀཱུ་ཊཱ་གཱ་རཱ ནི་ཝེ་སཱ མེ, ཝི་བྷ་ཏྟཱ བྷཱ་ག་སོ མི་ཏཱ;
ད་དྡ་ལླ་མཱ་ནཱ ཨཱ་བྷ་ནྟི, ས་མ་ནྟཱ ས་ཏ་ཡོ་ཛ་ནཾ.
༧༣༩. ‘‘པོ་ཀྑ་ར་ཉྙོ ཙ མེ ཨེ་ཏྠ, པུ་ཐུ་ལོ་མ་ནི་སེ་ཝི་ཏཱ;
ཨ་ཙྪོ་ད་ཀཱ [ཨ་ཙྪོ་དི་ཀཱ (སཱི.)] ཝི་པྤ་ས་ནྣཱ, སོ་ཎྞ་ཝཱ་ལུ་ཀ་ས་ནྠ་ཏཱ.
༧༤༠. ‘‘ནཱ་ནཱ་པ་དུ་མ་ས་ཉྪ་ནྣཱ, པུ་ཎྜ་རཱི་ཀ་ས་མོ་ཏ་ཏཱ [པ་ཎྜ་རཱི་ཀ་ས་མོ་ན་ཏཱ (སཱི.)];
སུ་ར་བྷཱི ས་མྤ་ཝཱ་ཡ་ནྟི, མ་ནུ་ཉྙཱ མཱ་ལུ་ཏེ་རི་ཏཱ.
༧༤༡. ‘‘ཛ་མྦུ་ཡོ པ་ན་སཱ ཏཱ་ལཱ, ནཱ་ལི༹་ཀེ་ར་ཝ་ནཱ་ནི ཙ;
ཨ་ནྟོ་ནི་ཝེ་ས་ནེ ཛཱ་ཏཱ, ནཱ་ནཱ་རུ་ཀྑཱ ཨ་རོ་པི་མཱ.
༧༤༢. ‘‘ནཱ་ནཱ་ཏཱུ་རི་ཡ་ས་ངྒྷུ་ཊྛཾ, ཨ་ཙྪ་རཱ་ག་ཎ་གྷོ་སི་ཏཾ;
ཡོ་པི མཾ སུ་པི་ནེ པ་སྶེ, སོ་པི ཝི་ཏྟོ སི་ཡཱ ན་རོ.
༧༤༣. ‘‘ཨེ་ཏཱ་དི་སཾ ཨ་བྦྷུ་ཏ་ད་སྶ་ནེ་ཡྻཾ, ཝི་མཱ་ནཾ ས་བྦ་སོ་པ་བྷཾ;
མ་མ ཀ་མྨེ་ཧི ནི་བྦ་ཏྟཾ, ཨ་ལཾ པུ་ཉྙཱ་ནི ཀཱ་ཏ་ཝེ’’ཏི.
༧༤༤. ‘‘ཏཱ་ཡེ་ཝ ཏེ སུ་དྡྷ་ནུ་མོ་ད་ནཱ་ཡ, ལ་དྡྷཾ ཝི་མཱ་ན་བྦྷུ་ཏ་ད་སྶ་ནེ་ཡྻཾ;
ཡཱ ཙེ་ཝ སཱ དཱ་ན་མ་དཱ་སི ནཱ་རཱི, ཏ་སྶཱ ག་ཏིཾ བྲཱུ་ཧི ཀུ་ཧིཾ ཨུ་པྤ་ནྣཱ [ཨུ་པ་པ་ནྣཱ (ཀ.)] སཱ’’ཏི.
༧༤༥. ‘‘ཡཱ སཱ ཨ་ཧུ མ་ཡ྄ཧཾ ས་ཁཱི བྷ་ད་ནྟེ, ས་ངྒྷ་སྶ ཀཱ་རེ་སི མ་ཧཱ་ཝི་ཧཱ་རཾ;
ཝི་ཉྙཱ་ཏ་དྷ་མྨཱ སཱ ཨ་དཱ་སི དཱ་ནཾ, ཨུ་པྤ་ནྣཱ ནི་མྨཱ་ན་ར་ཏཱི་སུ དེ་ཝེ་སུ.
༧༤༦. ‘‘པ་ཛཱ་པ་ཏཱི ཏ་སྶ སུ་ནི་མྨི་ཏ་སྶ, ཨ་ཙི་ནྟི་ཡཱ ཀ་མྨ་ཝི་པཱ་ཀཱ ཏ་སྶ;
ཡ་མེ་ཏཾ པུ་ཙྪ་སི ཀུ་ཧིཾ ཨུ་པྤ་ནྣཱ [ཨུ་པ་པ་ནྣཱ (ཀ.)] སཱ་ཏི, ཏཾ ཏེ ཝི་ཡཱ་ཀཱ་སིཾ ཨ་ན་ཉྙ་ཐཱ ཨ་ཧཾ.
༧༤༧. ‘‘ཏེ་ན་ཧ་ཉྙེ་པི ས་མཱ་ད་པེ་ཐ, ས་ངྒྷ་སྶ དཱ་ནཱ་ནི ད་དཱ་ཐ ཝི་ཏྟཱ;
དྷ་མྨ་ཉྩ སུ་ཎཱ་ཐ པ་ས་ནྣ་མཱ་ན་སཱ, སུ་དུ་ལླ་བྷོ ལ་དྡྷོ མ་ནུ་སྶ་ལཱ་བྷོ.
༧༤༨. ‘‘ཡཾ མ་གྒཾ མ་གྒཱ་དྷི་པ་ཏཱི ཨ་དེ་ས་ཡི [མ་གྒཱ་དྷི་པ་ཏྱ་དེ་ས་ཡི (སཱི.)], བྲ་ཧྨ་སྶ་རོ ཀ་ཉྩ་ན་ས་ནྣི་བྷ་ཏྟ་ཙོ;
ས་ངྒྷ་སྶ དཱ་ནཱ་ནི ད་དཱ་ཐ ཝི་ཏྟཱ, མ་ཧ་པྥ་ལཱ ཡ་ཏྠ བྷ་ཝ་ནྟི ད་ཀྑི་ཎཱ.
༧༤༩. [ཁུ. པཱ. ༦.༦; སུ. ནི. ༢༢༩] ‘‘ཡེ པུ་གྒ་ལཱ ཨ་ཊྛ ས་ཏཾ པ་ས་ཏྠཱ, ཙ་ཏྟཱ་རི ཨེ་ཏཱ་ནི ཡུ་གཱ་ནི ཧོ་ནྟི;
ཏེ ད་ཀྑི་ཎེ་ཡྻཱ སུ་ག་ཏ་སྶ སཱ་ཝ་ཀཱ, ཨེ་ཏེ་སུ དི་ནྣཱ་ནི མ་ཧ་པྥ་ལཱ་ནི.
༧༥༠. [ཝི. ཝ. ༦༤༡] ‘‘ཙ་ཏྟཱ་རོ ཙ པ་ཊི་པ་ནྣཱ, ཙ་ཏྟཱ་རོ ཙ ཕ་ལེ ཋི་ཏཱ;
ཨེ་ས ས་ངྒྷོ ཨུ་ཛུ་བྷཱུ་ཏོ, པ་ཉྙཱ་སཱི་ལ་ས་མཱ་ཧི་ཏོ.
༧༥༡. [ཝི. ཝ. ༦༤༢] ‘‘ཡ་ཛ་མཱ་ནཱ་ནཾ མ་ནུ་སྶཱ་ནཾ, པུ་ཉྙ་པེ་ཀྑཱ་ན པཱ་ཎི་ནཾ;
ཀ་རོ་ཏཾ ཨོ་པ་དྷི་ཀཾ པུ་ཉྙཾ, ས་ངྒྷེ དི་ནྣཾ མ་ཧ་པྥ་ལཾ.
༧༥༢. [ཝི. ཝ. ༦༤༣] ‘‘ཨེ་སོ ཧི ས་ངྒྷོ ཝི་པུ་ལོ མ་ཧ་གྒ་ཏོ, ཨེ་ས་པྤ་མེ་ཡྻོ ཨུ་ད་དྷཱི་ཝ སཱ་ག་རོ;
ཨེ་ཏེ་ཧི སེ་ཊྛཱ ན་ར་ཝཱི་ར་སཱ་ཝ་ཀཱ, པ་བྷ་ངྐ་རཱ དྷ་མྨ་མུ་དཱི་ར་ཡ་ནྟི [ན་ཏྠེ་ཏྠ པཱ་ཋ་བྷེ་དོ].
༧༥༣. [ཝི. ཝ. ༦༤༤] ‘‘ཏེ་སཾ སུ་དི་ནྣཾ སུ་ཧུ་ཏཾ སུ་ཡི་ཊྛཾ, ཡེ ས་ངྒྷ་མུ་དྡི་སྶ ད་ད་ནྟི དཱ་ནཾ;
སཱ ད་ཀྑི་ཎཱ ས་ངྒྷ་ག་ཏཱ པ་ཏི་ཊྛི་ཏཱ, མ་ཧ་པྥ་ལཱ ལོ་ཀ་ཝི་དཱུ་ན [ལོ་ཀ་ཝི་དཱུ་ཧི (ཀ.)] ཝ་ཎྞི་ཏཱ.
༧༥༤. ‘‘ཨེ་ཏཱ་དི་སཾ ཡ་ཉྙ་མ་ནུ་སྶ་ར་ནྟཱ, ཡེ ཝེ་ད་ཛཱ་ཏཱ ཝི་ཙ་ར་ནྟི ལོ་ཀེ;
ཝི་ནེ་ཡྻ མ་ཙྪེ་ར་མ་ལཾ ས་མཱུ་ལཾ, ཨ་ནི་ནྡི་ཏཱ ས་གྒ་མུ་པེ་ནྟི ཋཱ་ན’’ནྟི.
ཝི་ཧཱ་ར་ཝི་མཱ་ནཾ ཚ་ཊྛཾ.
བྷཱ་ཎ་ཝཱ་རཾ དུ་ཏི་ཡཾ ནི་ཊྛི་ཏཾ.