༩. དཱི་པ་ཝི་མཱ་ན་ཝ་ཏྠུ
༧༥. ‘‘ཨ་བྷི་ཀྐ་ནྟེ་ན ཝ་ཎྞེ་ན, ཡཱ ཏྭཾ ཏི་ཊྛ་སི དེ་ཝ་ཏེ;
ཨོ་བྷཱ་སེ་ནྟཱི དི་སཱ ས་བྦཱ, ཨོ་ས་དྷཱི ཝི་ཡ ཏཱ་ར་ཀཱ.
༧༦. ‘‘ཀེ་ན ཏེ་ཏཱ་དི་སོ ཝ་ཎྞོ, ཀེ་ན ཏེ ཨི་དྷ མི་ཛ྄ཛྷ་ཏི;
ཨུ་པྤ་ཛྫ་ནྟི ཙ ཏེ བྷོ་གཱ, ཡེ ཀེ་ཙི མ་ན་སོ པི་ཡཱ.
༧༧. ‘‘ཀེ་ན ཏྭཾ ཝི་མ་ལོ་བྷཱ་སཱ, ཨ་ཏི་རོ་ཙ་སི དེ་ཝ་ཏཱ [དེ་ཝ་ཏེ (བ་ཧཱུ་སུ) ༨༣ ཝི་སྶ་ཛྫ་ན་གཱ་ཐཱ་ཡ སཾ་ས་ནྡེ་ཏ་བྦཾ];
ཀེ་ན ཏེ ས་བྦ་ག་ཏྟེ་ཧི, ས་བྦཱ ཨོ་བྷཱ་ས་ཏེ དི་སཱ.
༧༨. ‘‘པུ་ཙྪཱ་མི ཏཾ དེ་ཝི མ་ཧཱ་ནུ་བྷཱ་ཝེ, མ་ནུ་སྶ་བྷཱུ་ཏཱ ཀི་མ་ཀཱ་སི པུ་ཉྙཾ;
ཀེ་ནཱ་སི ཨེ་ཝཾ ཛ་ལི་ཏཱ་ནུ་བྷཱ་ཝཱ, ཝ་ཎྞོ ཙ ཏེ ས་བྦ་དི་སཱ པ་བྷཱ་ས་ཏཱི’’ཏི.
༧༩. སཱ དེ་ཝ་ཏཱ ཨ་ཏྟ་མ་ནཱ, མོ་གྒ་ལླཱ་ནེ་ན པུ་ཙྪི་ཏཱ;
པ་ཉྷཾ པུ་ཊྛཱ ཝི་ཡཱ་ཀཱ་སི, ཡ་སྶ ཀ་མྨ་སྶི་དཾ ཕ་ལཾ.
༨༠. ‘‘ཨ་ཧཾ མ་ནུ་སྶེ་སུ མ་ནུ་སྶ་བྷཱུ་ཏཱ, པུ་རི་མཱ་ཡ ཛཱ་ཏི་ཡཱ མ་ནུ་སྶ་ལོ་ཀེ;
ཏ་མ་ནྡྷ་ཀཱ་ར་མྷི ཏི་མཱི་སི་ཀཱ་ཡཾ, པ་དཱི་པ་ཀཱ་ལ་མྷི ཨ་དཱ་སི དཱི་པཾ [ཨ་དཾ པ་དཱི་པཾ (སཱི. སྱཱ. པཱི.)].
༨༡. ‘‘ཡོ ཨ་ནྡྷ་ཀཱ་ར་མྷི ཏི་མཱི་སི་ཀཱ་ཡཾ, པ་དཱི་པ་ཀཱ་ལ་མྷི ད་དཱ་ཏི དཱི་པཾ;
ཨུ་པྤ་ཛྫ་ཏི ཛོ་ཏི་ར་སཾ ཝི་མཱ་ནཾ, པ་ཧཱུ་ཏ་མ་ལྱཾ བ་ཧུ་པུ་ཎྜ་རཱི་ཀཾ.
༨༢. ‘‘ཏེ་ན མེ་ཏཱ་དི་སོ ཝ་ཎྞོ, ཏེ་ན མེ ཨི་དྷ མི་ཛ྄ཛྷ་ཏི;
ཨུ་པྤ་ཛྫ་ནྟི ཙ མེ བྷོ་གཱ, ཡེ ཀེ་ཙི མ་ན་སོ པི་ཡཱ.
༨༣. ‘‘ཏེ་ནཱ་ཧཾ ཝི་མ་ལོ་བྷཱ་སཱ, ཨ་ཏི་རོ་ཙཱ་མི དེ་ཝ་ཏཱ;
ཏེ་ན མེ ས་བྦ་ག་ཏྟེ་ཧི, ས་བྦཱ ཨོ་བྷཱ་ས་ཏེ དི་སཱ.
༨༤. ‘‘ཨ་ཀྑཱ་མི ཏེ བྷི་ཀྑུ མ་ཧཱ་ནུ་བྷཱ་ཝ, མ་ནུ་སྶ་བྷཱུ་ཏཱ ཡ་མ་ཀཱ་སི པུ་ཉྙཾ;
ཏེ་ན་མྷི ཨེ་ཝཾ ཛ་ལི་ཏཱ་ནུ་བྷཱ་ཝཱ, ཝ་ཎྞོ ཙ མེ ས་བྦ་དི་སཱ པ་བྷཱ་ས་ཏཱི’’ཏི.
དཱི་པ་ཝི་མཱ་ནཾ ན་ཝ་མཾ.