༡༥. ཨུ་ཏྟ་རཱ་ཝི་མཱ་ན་ཝ་ཏྠུ
༡༢༤. ‘‘ཨ་བྷི་ཀྐ་ནྟེ་ན ཝ་ཎྞེ་ན, ཡཱ ཏྭཾ ཏི་ཊྛ་སི དེ་ཝ་ཏེ;
ཨོ་བྷཱ་སེ་ནྟཱི དི་སཱ ས་བྦཱ, ཨོ་ས་དྷཱི ཝི་ཡ ཏཱ་ར་ཀཱ.
༡༢༥. ‘‘ཀེ་ན ཏེ་ཏཱ་དི་སོ ཝ་ཎྞོ, ཀེ་ན ཏེ ཨི་དྷ མི་ཛ྄ཛྷ་ཏི;
ཨུ་པྤ་ཛྫ་ནྟི ཙ ཏེ བྷོ་གཱ, ཡེ ཀེ་ཙི མ་ན་སོ པི་ཡཱ.
༡༢༦. ‘‘པུ་ཙྪཱ་མི ཏཾ དེ་ཝི མ་ཧཱ་ནུ་བྷཱ་ཝེ, མ་ནུ་སྶ་བྷཱུ་ཏཱ ཀི་མ་ཀཱ་སི པུ་ཉྙཾ;
ཀེ་ནཱ་སི ཨེ་ཝཾ ཛ་ལི་ཏཱ་ནུ་བྷཱ་ཝཱ, ཝ་ཎྞོ ཙ ཏེ ས་བྦ་དི་སཱ པ་བྷཱ་ས་ཏཱི’’ཏི.
༡༢༧. སཱ དེ་ཝ་ཏཱ ཨ་ཏྟ་མ་ནཱ, མོ་གྒ་ལླཱ་ནེ་ན པུ་ཙྪི་ཏཱ;
པ་ཉྷཾ པུ་ཊྛཱ ཝི་ཡཱ་ཀཱ་སི, ཡ་སྶ ཀ་མྨ་སྶི་དཾ ཕ་ལཾ.
༡༢༨. ‘‘ཨི་སྶཱ ཙ མ་ཙྪེ་ར་མ་ཐོ [མ་ཙྪ་རི་ཡ་མ་ཐོ ཙ (ཀ.)] པ་ལཱ༹་སོ, ནཱ་ཧོ་སི མ་ཡ྄ཧཾ གྷ་ར་མཱ་ཝ་ས་ནྟི་ཡཱ;
ཨ་ཀྐོ་དྷ་ནཱ བྷ་ཏྟུ་ཝ་སཱ་ནུ་ཝ་ཏྟི་ནཱི, ཨུ་པོ་ས་ཐེ ནི་ཙྩ་ཧ་མ་པྤ་མ་ཏྟཱ.
༡༢༩. ‘‘ཙཱ་ཏུ་དྡ་སིཾ པ་ཉྩ་ད་སིཾ, ཡཱ ཙ [ཡཱ་ཝ (སཱི. ཨ་ཊྛ., ཀ. ཨ་ཊྛ.) ཐེ་རཱི་གཱ་ཐཱ་ཨ་ཊྛ་ཀ་ཐཱ པ་སྶི་ཏ་བྦཱ] པ་ཀྑ་སྶ ཨ་ཊྛ་མཱི;
པཱ་ཊི་ཧཱ་རི་ཡ་པ་ཀྑ་ཉྩ, ཨ་ཊྛ་ངྒ་སུ་ས་མཱ་ག་ཏཾ.
༡༣༠. ‘‘ཨུ་པོ་ས་ཐཾ ཨུ་པ་ཝ་སི་སྶཾ, ས་དཱ སཱི་ལེ་སུ སཾ་ཝུ་ཏཱ;
ས་ཉྙ་མཱ སཾ་ཝི་བྷཱ་གཱ ཙ, ཝི་མཱ་ནཾ ཨཱ་ཝ་སཱ་མ་ཧཾ [ཨཱ་ཝ་སཱ་མི་མཾ (སཱི. ཨ་ཊྛ., ཀ.) པ་ར་ཏོ པ་ན ས་བྦ་ཏྠ་པི ‘‘ཨཱ་ཝ་སཱ་མ་ཧཾ’’ ཨི་ཙྩེ་ཝ དི་སྶ་ཏི].
༡༣༡. ‘‘པཱ་ཎཱ་ཏི་པཱ་ཏཱ ཝི་ར་ཏཱ, མུ་སཱ་ཝཱ་དཱ ཙ ས་ཉྙ་ཏཱ;
ཐེ་ཡྻཱ ཙ ཨ་ཏི་ཙཱ་རཱ ཙ, མ་ཛྫ་པཱ་ནཱ ཙ ཨཱ་ར་ཀཱ [ཨཱ་ར་ཏཱ (?)].
༡༣༢. ‘‘པ་ཉྩ་སི་ཀྑཱ་པ་དེ ར་ཏཱ, ཨ་རི་ཡ་ས་ཙྩཱ་ན ཀོ་ཝི་དཱ;
ཨུ་པཱ་སི་ཀཱ ཙ་ཀྑུ་མ་ཏོ, གོ་ཏ་མ་སྶ ཡ་ས་སྶི་ནོ.
༡༣༣. ‘‘སཱ་ཧཾ ས་ཀེ་ན སཱི་ལེ་ན, ཡ་ས་སཱ ཙ ཡ་ས་སྶི་ནཱི;
ཨ་ནུ་བྷོ་མི ས་ཀཾ པུ་ཉྙཾ, སུ་ཁི་ཏཱ ཙ་མྷི་ནཱ་མ་ཡཱ.
༡༣༤. ‘‘ཏེ་ན མེ་ཏཱ་དི་སོ ཝ་ཎྞོ, ཏེ་ན མེ ཨི་དྷ མི་ཛ྄ཛྷ་ཏི;
ཨུ་པྤ་ཛྫ་ནྟི ཙ མེ བྷོ་གཱ, ཡེ ཀེ་ཙི མ་ན་སོ པི་ཡཱ.
༡༣༥. ‘‘ཨ་ཀྑཱ་མི ཏེ བྷི་ཀྑུ མ་ཧཱ་ནུ་བྷཱ་ཝ, མ་ནུ་སྶ་བྷཱུ་ཏཱ ཡ་མ་ཧཾ ཨ་ཀཱ་སིཾ;
ཏེ་ན་མྷི ཨེ་ཝཾ ཛ་ལི་ཏཱ་ནུ་བྷཱ་ཝཱ, ཝ་ཎྞོ ཙ མེ ས་བྦ་དི་སཱ པ་བྷཱ་ས་ཏཱི་ཏི.
༡༣༦. ‘‘མ་མ ཙ, བྷ་ནྟེ, ཝ་ཙ་ནེ་ན བྷ་ག་ཝ་ཏོ པཱ་དེ སི་ར་སཱ ཝ་ནྡེ་ཡྻཱ་སི – ‘ཨུ་ཏྟ་རཱ ནཱ་མ, བྷ་ནྟེ, ཨུ་པཱ་སི་ཀཱ བྷ་ག་ཝ་ཏོ པཱ་དེ སི་ར་སཱ ཝ་ནྡ་ཏཱི’ཏི. ཨ་ན་ཙྪ་རི་ཡཾ ཁོ པ་ནེ་ཏཾ, བྷ་ནྟེ, ཡཾ མཾ བྷ་ག་ཝཱ ཨ་ཉྙ་ཏ་ར་སྨིཾ སཱ་མ་ཉྙ་ཕ་ལེ བྱཱ་ཀ་རེ་ཡྻ [བྱཱ་ཀ་རེ་ཡྻཱ་ཏི (?)], ཏཾ བྷ་ག་ཝཱ ས་ཀ་དཱ་གཱ་མི་ཕ་ལེ བྱཱ་ཀཱ་སཱི’’ཏི.
ཨུ་ཏྟ་རཱ་ཝི་མཱ་ནཾ པ་ནྣ་ར་ས་མཾ.