༡. སཱི་ལ་ཝ་ཏྠེ་ར་གཱ་ཐཱ
༦༠༨. ‘‘སཱི་ལ་མེ་ཝི་དྷ སི་ཀྑེ་ཐ, ཨ་སྨིཾ ལོ་ཀེ སུ་སི་ཀྑི་ཏཾ;
སཱི་ལཾ ཧི ས་བྦ་ས་མྤ་ཏྟིཾ, ཨུ་པ་ནཱ་མེ་ཏི སེ་ཝི་ཏཾ.
༦༠༩. ‘‘སཱི་ལཾ ར་ཀྑེ་ཡྻ མེ་དྷཱ་ཝཱི, པ་ཏྠ་ཡཱ་ནོ ཏ་ཡོ སུ་ཁེ;
པ་སཾ་སཾ ཝི་ཏྟི་ལཱ་བྷ་ཉྩ, པེ་ཙྩ ས་གྒེ པ་མོ་ད་ནཾ [པེ་ཙྩ ས་གྒེ ཙ མོ་ད་ནཾ (སཱི. པཱི.)].
༦༡༠. ‘‘སཱི་ལ་ཝཱ ཧི བ་ཧཱུ མི་ཏྟེ, ས་ཉྙ་མེ་ནཱ་དྷི་ག་ཙྪ་ཏི;
དུ་སྶཱི་ལོ པ་ན མི་ཏྟེ་ཧི, དྷཾ་ས་ཏེ པཱ་པ་མཱ་ཙ་རཾ.
༦༡༡. ‘‘ཨ་ཝ་ཎྞ་ཉྩ ཨ་ཀི་ཏྟི་ཉྩ, དུ་སྶཱི་ལོ ལ་བྷ་ཏེ ན་རོ;
ཝ་ཎྞཾ ཀི་ཏྟིཾ པ་སཾ་ས་ཉྩ, ས་དཱ ལ་བྷ་ཏི སཱི་ལ་ཝཱ.
༦༡༢. ‘‘ཨཱ་དི སཱི་ལཾ པ་ཏི་ཊྛཱ ཙ, ཀ་ལྱཱ་ཎཱ་ན་ཉྩ མཱ་ཏུ་ཀཾ;
པ་མུ་ཁཾ ས་བྦ་དྷ་མྨཱ་ནཾ, ཏ་སྨཱ སཱི་ལཾ ཝི་སོ་དྷ་ཡེ.
༦༡༣. ‘‘ཝེ་ལཱ ཙ སཾ་ཝ་རཾ སཱི་ལཾ [སཾ་ཝ་རོ སཱི་ལཾ (སཱི.), སཾ་ཝ་ར་སཱི་ལཾ (སཱི. ཨ་ཊྛ.)], ཙི་ཏྟ་སྶ ཨ་བྷི་ཧཱ་ས་ནཾ;
ཏི་ཏྠ་ཉྩ ས་བྦ་བུ་དྡྷཱ་ནཾ, ཏ་སྨཱ སཱི་ལཾ ཝི་སོ་དྷ་ཡེ.
༦༡༤. ‘‘སཱི་ལཾ བ་ལཾ ཨ་པྤ་ཊི་མཾ, སཱི་ལཾ ཨཱ་ཝུ་དྷ་མུ་ཏྟ་མཾ;
སཱི་ལ་མཱ་བྷ་ར་ཎཾ སེ་ཊྛཾ, སཱི་ལཾ ཀ་ཝ་ཙ་མ་བྦྷུ་ཏཾ.
༦༡༥. ‘‘སཱི་ལཾ སེ་ཏུ མ་ཧེ་ས་ཀྑོ, སཱི་ལཾ ག་ནྡྷོ ཨ་ནུ་ཏྟ་རོ;
སཱི་ལཾ ཝི་ལེ་པ་ནཾ སེ་ཊྛཾ, ཡེ་ན ཝཱ་ཏི དི་སོ་དི་སཾ.
༦༡༦. ‘‘སཱི་ལཾ ས་མྦ་ལ་མེ་ཝ་གྒཾ, སཱི་ལཾ པཱ་ཐེ་ཡྻ་མུ་ཏྟ་མཾ;
སཱི་ལཾ སེ་ཊྛོ ཨ་ཏི་ཝཱ་ཧོ, ཡེ་ན ཡཱ་ཏི དི་སོ་དི་སཾ.
༦༡༧. ‘‘ཨི་དྷེ་ཝ ནི་ནྡཾ ལ་བྷ་ཏི, པེ་ཙྩཱ་པཱ་ཡེ ཙ དུ་མྨ་ནོ;
ས་བྦ་ཏྠ དུ་མྨ་ནོ བཱ་ལོ, སཱི་ལེ་སུ ཨ་ས་མཱ་ཧི་ཏོ.
༦༡༨. ‘‘ཨི་དྷེ་ཝ ཀི་ཏྟིཾ ལ་བྷ་ཏི, པེ་ཙྩ ས་གྒེ ཙ སུ་མྨ་ནོ;
ས་བྦ་ཏྠ སུ་མ་ནོ དྷཱི་རོ, སཱི་ལེ་སུ སུ་ས་མཱ་ཧི་ཏོ.
༦༡༩. ‘‘སཱི་ལ་མེ་ཝ ཨི་དྷ ཨ་གྒཾ, པ་ཉྙ་ཝཱ པ་ན ཨུ་ཏྟ་མོ;
མ་ནུ་སྶེ་སུ ཙ དེ་ཝེ་སུ, སཱི་ལ་པ་ཉྙཱ་ཎ་ཏོ ཛ་ཡ’’ནྟི.
… སཱི་ལ་ཝོ ཐེ་རོ….