༡༡. ཨེ་ཀཱ་ད་ས་ནི་པཱ་ཏོ
༡. སཾ་ཀི་ཙྩ་ཏྠེ་ར་གཱ་ཐཱ
༥༩༧. ‘‘ཀིཾ ཏ་ཝ་ཏྠོ ཝ་ནེ ཏཱ་ཏ, ཨུ་ཛྫུ་ཧཱ་ནོ་ཝ པཱ་ཝུ་སེ;
ཝེ་ར་མྦྷཱ ར་མ་ཎཱི་ཡཱ ཏེ, པ་ཝི་ཝེ་ཀོ ཧི ཛྷཱ་ཡི་ནཾ.
༥༩༨. ‘‘ཡ་ཐཱ ཨ་བྦྷཱ་ནི ཝེ་ར་མྦྷོ, ཝཱ་ཏོ ནུ་ད་ཏི པཱ་ཝུ་སེ;
ས་ཉྙཱ མེ ཨ་བྷི་ཀི་ར་ནྟི, ཝི་ཝེ་ཀ་པ་ཊི་ས་ཉྙུ་ཏཱ.
༥༩༩. ‘‘ཨ་པ་ཎྜ་རོ ཨ་ཎྜ་ས་མྦྷ་ཝོ, སཱི་ཝ་ཐི་ཀཱ་ཡ ནི་ཀེ་ཏ་ཙཱ་རི་ཀོ;
ཨུ་པྤཱ་ད་ཡ་ཏེ་ཝ མེ ས་ཏིཾ, ས་ནྡེ་ཧ་སྨིཾ ཝི་རཱ་ག་ནི་སྶི་ཏཾ.
༦༠༠. ‘‘ཡ་ཉྩ ཨ་ཉྙེ ན ར་ཀྑ་ནྟི, ཡོ ཙ ཨ་ཉྙེ ན ར་ཀྑ་ཏི;
ས ཝེ བྷི་ཀྑུ སུ་ཁཾ སེ་ཏི, ཀཱ་མེ་སུ ཨ་ན་པེ་ཀྑ་ཝཱ.
༦༠༡. ‘‘ཨ་ཙྪོ་དི་ཀཱ པུ་ཐུ་སི་ལཱ, གོ་ན་ངྒུ་ལ་མི་གཱ་ཡུ་ཏཱ;
ཨ་མྦུ་སེ་ཝཱ་ལ་ས་ཉྪ་ནྣཱ, ཏེ སེ་ལཱ ར་མ་ཡ་ནྟི མཾ.
༦༠༢. ‘‘ཝ་སི་ཏཾ མེ ཨ་ར་ཉྙེ་སུ, ཀ་ནྡ་རཱ་སུ གུ་ཧཱ་སུ ཙ;
སེ་ནཱ་ས་ནེ་སུ པ་ནྟེ་སུ, ཝཱ་ལ༹་མི་ག་ནི་སེ་ཝི་ཏེ.
༦༠༣. ‘‘‘ཨི་མེ ཧ་ཉྙ་ནྟུ ཝ་ཛ྄ཛྷ་ནྟུ, དུ་ཀྑཾ པ་པྤོ་ནྟུ པཱ་ཎི་ནོ’;
ས་ངྐ་པྤཾ ནཱ་བྷི་ཛཱ་ནཱ་མི, ཨ་ན་རི་ཡཾ དོ་ས་སཾ་ཧི་ཏཾ.
༦༠༤. ‘‘པ་རི་ཙི་ཎྞོ མ་ཡཱ ས་ཏྠཱ, ཀ་ཏཾ བུ་དྡྷ་སྶ སཱ་ས་ནཾ;
ཨོ་ཧི་ཏོ ག་རུ་ཀོ བྷཱ་རོ, བྷ་ཝ་ནེ་ཏྟི ས་མཱུ་ཧ་ཏཱ.
༦༠༥. ‘‘ཡ་སྶ ཙ་ཏྠཱ་ཡ [ཡ་སྶ་ཏྠཱ་ཡ (སཱི.)] པ་བྦ་ཛི་ཏོ, ཨ་གཱ་ར་སྨཱ་ན་གཱ་རི་ཡཾ;
སོ མེ ཨ་ཏྠོ ཨ་ནུ་པྤ་ཏྟོ, ས་བྦ་སཾ་ཡོ་ཛ་ན་ཀྑ་ཡོ.
༦༠༦. ‘‘ནཱ་བྷི་ན་ནྡཱ་མི མ་ར་ཎཾ, ནཱ་བྷི་ན་ནྡཱ་མི ཛཱི་ཝི་ཏཾ;
ཀཱ་ལ་ཉྩ པ་ཊི་ཀ་ངྑཱ་མི, ནི་བྦི་སཾ བྷ་ཏ་ཀོ ཡ་ཐཱ.
༦༠༧. ‘‘ནཱ་བྷི་ན་ནྡཱ་མི མ་ར་ཎཾ, ནཱ་བྷི་ན་ནྡཱ་མི ཛཱི་ཝི་ཏཾ;
ཀཱ་ལ་ཉྩ པ་ཊི་ཀ་ངྑཱ་མི, ས་མྤ་ཛཱ་ནོ པ་ཏི་སྶ་ཏོ’’ཏི.
… སཾ་ཀི་ཙྩོ ཐེ་རོ….
ཨེ་ཀཱ་ད་ས་ནི་པཱ་ཏོ ནི་ཊྛི་ཏོ.