༡༢. དྭཱ་ད་ས་མ་ཝ་གྒོ

༡༡༡. ‘‘དུ་པྤ་བྦ་ཛྫཾ ཝེ དུ་ར་དྷི་ཝཱ་སཱ གེ་ཧཱ, དྷ་མྨོ ག་མྦྷཱི་རོ དུ་ར་དྷི་ག་མཱ བྷོ་གཱ;

ཀི་ཙྪཱ ཝུ་ཏྟི ནོ ཨི་ཏ་རཱི་ཏ་རེ་ནེ་ཝ, ཡུ་ཏྟཾ ཙི་ནྟེ་ཏུཾ ས་ཏ་ཏ་མ་ནི་ཙྩ་ཏ’’ནྟི.

… ཛེ་ནྟོ ཐེ་རོ….

༡༡༢. ‘‘ཏེ་ཝི་ཛྫོ་ཧཾ མ་ཧཱ་ཛྷཱ་ཡཱི, ཙེ་ཏོ་ས་མ་ཐ་ཀོ་ཝི་དོ;

ས་ད་ཏྠོ མེ ཨ་ནུ་པྤ་ཏྟོ, ཀ་ཏཾ བུ་དྡྷ་སྶ སཱ་ས་ན’’ནྟི.

… ཝ་ཙྪ་གོ་ཏྟོ ཐེ་རོ….

༡༡༣. ‘‘ཨ་ཙྪོ་དི་ཀཱ པུ་ཐུ་སི་ལཱ,གོ་ན་ངྒུ་ལ་མི་གཱ་ཡུ་ཏཱ;

ཨ་མྦུ་སེ་ཝཱ་ལ་ས་ཉྪ་ནྣཱ, ཏེ སེ་ལཱ ར་མ་ཡ་ནྟི མ’’ནྟི.

… ཝ་ན་ཝ་ཙྪོ ཐེ་རོ….

༡༡༤. ‘‘ཀཱ་ཡ་དུ་ཊྛུ་ལླ་ག་རུ་ནོ, ཧི་ཡྻ་མཱ་ན་མྷི [ཧཱི་ཡ་མཱ་ན་མྷི (སཱི.)] ཛཱི་ཝི་ཏེ;

ས་རཱི་ར་སུ་ཁ་གི་དྡྷ་སྶ, ཀུ་ཏོ ས་མ་ཎ་སཱ་དྷུ་ཏཱ’’ཏི.

… ཨ་དྷི་མུ་ཏྟོ ཐེ་རོ….

༡༡༥. ‘‘ཨེ་སཱ་ཝ་ཧི་ཡྻ་སེ པ་བྦ་ཏེ་ན, བ་ཧུ་ཀུ་ཊ་ཛ་ས་ལླ་ཀི་ཀེ་ན [ས་ལླ་ཀི་ཏེ་ན (སཱི.), ས་ལླ་རི་ཀེ་ན (སྱཱ.)];

ནེ་སཱ་ད་ཀེ་ན གི་རི་ནཱ, ཡ་ས་སྶི་ནཱ པ་རི་ཙྪ་དེ་ནཱ’’ཏི.

… མ་ཧཱ་ནཱ་མོ ཐེ་རོ….

༡༡༦. ‘‘ཚ་ཕ་སྶཱ་ཡ་ཏ་ནེ ཧི་ཏྭཱ, གུ་ཏྟ་དྭཱ་རོ སུ་སཾ་ཝུ་ཏོ;

ཨ་གྷ་མཱུ་ལཾ ཝ་མི་ཏྭཱ་ན, པ་ཏྟོ མེ ཨཱ་ས་ཝ་ཀྑ་ཡོ’’ཏི.

… པཱ་རཱ་པ་རི་ཡོ [པཱ་རཱ་ས་རི་ཡོ (སཱི.), པཱ་རཾ་པ་རི་ཡོ (ཀ.)] ཐེ་རོ ….

༡༡༧. ‘‘སུ་ཝི་ལི་ཏྟོ སུ་ཝ་ས་ནོ,ས་བྦཱ་བྷ་ར་ཎ་བྷཱུ་སི་ཏོ;

ཏི་སྶོ ཝི་ཛྫཱ ཨ་ཛ྄ཛྷ་ག་མིཾ, ཀ་ཏཾ བུ་དྡྷ་སྶ སཱ་ས་ན’’ནྟི.

… ཡ་སོ ཐེ་རོ….

༡༡༨. ‘‘ཨ་བྷི་ས་ཏྟོ་ཝ ནི་པ་ཏ་ཏི, ཝ་ཡོ རཱུ་པཾ ཨ་ཉྙ་མི་ཝ ཏ་ཐེ་ཝ ས་ནྟཾ;

ཏ་སྶེ་ཝ ས་ཏོ ཨ་ཝི་པྤ་ཝ་ས་ཏོ, ཨ་ཉྙ་སྶེ་ཝ ས་རཱ་མི ཨ་ཏྟཱ་ན’’ནྟི.

… ཀི་མི་ལོ [ཀི་མྦི་ལོ (སཱི. སྱཱ.)] ཐེ་རོ….

༡༡༩. ‘‘རུ་ཀྑ་མཱུ་ལ་ག་ཧ་ནཾ པ་ས་ཀྐི་ཡ, ནི་བྦཱ་ནཾ ཧ་ད་ཡ་སྨིཾ ཨོ་པི་ཡ;

ཛྷཱ་ཡ གོ་ཏ་མ མཱ ཙ པ་མཱ་དོ, ཀིཾ ཏེ བི་ལི༹་བི་ལི༹་ཀཱ ཀ་རི་སྶ་ཏཱི’’ཏི.

… ཝ་ཛྫི་པུ་ཏྟོ ཐེ་རོ….

༡༢༠. ‘‘པ་ཉྩ་ཀྑ་ནྡྷཱ པ་རི་ཉྙཱ་ཏཱ, ཏི་ཊྛ་ནྟི ཚི་ནྣ་མཱུ་ལ་ཀཱ;

དུ་ཀྑ་ཀྑ་ཡོ ཨ་ནུ་པྤ་ཏྟོ,པ་ཏྟོ མེ ཨཱ་ས་ཝ་ཀྑ་ཡོ’’ཏི.

… ཨི་སི་ད་ཏྟོ ཐེ་རོ….

ཝ་གྒོ དྭཱ་ད་ས་མོ ནི་ཊྛི་ཏོ.

ཏ་སྶུ་དྡཱ་ནཾ –

ཛེ་ནྟོ ཙ ཝ་ཙྪ་གོ་ཏྟོ ཙ, ཝ་ཙྪོ ཙ ཝ་ན་ས་ཝ྄ཧ་ཡོ;

ཨ་དྷི་མུ་ཏྟོ མ་ཧཱ་ནཱ་མོ, པཱ་རཱ་པ་རི་ཡོ ཡ་སོ་པི ཙ;

ཀི་མི་ལོ ཝ་ཛྫི་པུ་ཏྟོ ཙ, ཨི་སི་ད་ཏྟོ མ་ཧཱ་ཡ་སོ་ཏི.

ཨེ་ཀ་ཀ་ནི་པཱ་ཏོ ནི་ཊྛི་ཏོ.