༡༠. སུ་ཉྙ་ཀ་ཐཱ

༤༦. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཨ་ཐ ཁོ ཨཱ་ཡ་སྨཱ ཨཱ་ན་ནྡོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཨཱ་ཡ་སྨཱ ཨཱ་ན་ནྡོ བྷ་ག་ཝ་ནྟཾ ཨེ་ཏ་ད་ཝོ་ཙ –

‘‘‘སུ་ཉྙོ ལོ་ཀོ, སུ་ཉྙོ ལོ་ཀོ’ཏི, བྷ་ནྟེ, ཝུ་ཙྩ་ཏི. ཀི་ཏྟཱ་ཝ་ཏཱ ནུ ཁོ, བྷ་ནྟེ, ‘སུ་ཉྙོ ལོ་ཀོ’ཏི ཝུ་ཙྩ་ཏཱི’’ཏི? ‘‘ཡ་སྨཱ ཁོ, ཨཱ་ན་ནྡ, སུ་ཉྙཾ ཨ་ཏྟེ་ན ཝཱ ཨ་ཏྟ་ནི་ཡེ་ན ཝཱ, ཏ་སྨཱ ‘སུ་ཉྙོ ལོ་ཀོ’ཏི ཝུ་ཙྩ་ཏི. ཀི་ཉྩཱ་ན་ནྡ [ཀི་ཉྩ ཨཱ་ན་ནྡ སཾ. ནི. ༤.༨༥], སུ་ཉྙཾ ཨ་ཏྟེ་ན ཝཱ ཨ་ཏྟ་ནི་ཡེ་ན ཝཱ? ཙ་ཀྑུ ཁོ, ཨཱ་ན་ནྡ, སུ་ཉྙཾ ཨ་ཏྟེ་ན ཝཱ ཨ་ཏྟ་ནི་ཡེ་ན ཝཱ. རཱུ་པཱ སུ་ཉྙཱ ཨ་ཏྟེ་ན ཝཱ ཨ་ཏྟ་ནི་ཡེ་ན ཝཱ. ཙ་ཀྑུ་ཝི་ཉྙཱ་ཎཾ སུ་ཉྙཾ ཨ་ཏྟེ་ན ཝཱ ཨ་ཏྟ་ནི་ཡེ་ན ཝཱ. ཙ་ཀྑུ་ས་མྥ་སྶོ སུ་ཉྙོ ཨ་ཏྟེ་ན ཝཱ ཨ་ཏྟ་ནི་ཡེ་ན ཝཱ. ཡ་མྤི་དཾ [ཡ་དི་དཾ (ཀ.) སཾ. ནི. ༤.༨༥ པ་སྶི་ཏ་བྦཱ] ཙ་ཀྑུ་ས་མྥ་སྶ་པ་ཙྩ་ཡཱ ཨུ་པྤ་ཛྫ་ཏི ཝེ་ད་ཡི་ཏཾ སུ་ཁཾ ཝཱ དུ་ཀྑཾ ཝཱ ཨ་དུ་ཀྑ་མ་སུ་ཁཾ ཝཱ, ཏ་མྤི སུ་ཉྙཾ ཨ་ཏྟེ་ན ཝཱ ཨ་ཏྟ་ནི་ཡེ་ན ཝཱ.

‘‘སོ་ཏཾ སུ་ཉྙཾ…པེ… ས་དྡཱ སུ་ཉྙཱ… གྷཱ་ནཾ སུ་ཉྙཾ… ག་ནྡྷཱ སུ་ཉྙཱ… ཛི་ཝ྄ཧཱ སུ་ཉྙཱ… ར་སཱ སུ་ཉྙཱ… ཀཱ་ཡོ སུ་ཉྙོ… ཕོ་ཊྛ་བྦཱ སུ་ཉྙཱ… མ་ནོ སུ་ཉྙོ ཨ་ཏྟེ་ན ཝཱ ཨ་ཏྟ་ནི་ཡེ་ན ཝཱ. དྷ་མྨཱ སུ་ཉྙཱ ཨ་ཏྟེ་ན ཝཱ ཨ་ཏྟ་ནི་ཡེ་ན ཝཱ. མ་ནོ་ཝི་ཉྙཱ་ཎཾ སུ་ཉྙཾ ཨ་ཏྟེ་ན ཝཱ ཨ་ཏྟ་ནི་ཡེ་ན ཝཱ. མ་ནོ་ས་མྥ་སྶོ སུ་ཉྙོ ཨ་ཏྟེ་ན ཝཱ ཨ་ཏྟ་ནི་ཡེ་ན ཝཱ. ཡ་མྤི་དཾ མ་ནོ་ས་མྥ་སྶ་པ་ཙྩ་ཡཱ ཨུ་པྤ་ཛྫ་ཏི ཝེ་ད་ཡི་ཏཾ སུ་ཁཾ ཝཱ དུ་ཀྑཾ ཝཱ ཨ་དུ་ཀྑ་མ་སུ་ཁཾ ཝཱ, ཏ་མྤི སུ་ཉྙཾ ཨ་ཏྟེ་ན ཝཱ ཨ་ཏྟ་ནི་ཡེ་ན ཝཱ. ཡ་སྨཱ ཁོ, ཨཱ་ན་ནྡ, སུ་ཉྙཾ ཨ་ཏྟེ་ན ཝཱ ཨ་ཏྟ་ནི་ཡེ་ན ཝཱ ཏ་སྨཱ ‘སུ་ཉྙོ ལོ་ཀོ’ཏི ཝུ་ཙྩ་ཏཱི’’ཏི.

༡. མཱ་ཏི་ཀཱ

༤༧. སུ་ཉྙ་སུ་ཉྙཾ [སུ་ཉྙཾ སུ་ཉྙཾ (སྱཱ.)], ས་ངྑཱ་ར་སུ་ཉྙཾ, ཝི་པ་རི་ཎཱ་མ་སུ་ཉྙཾ, ཨ་གྒ་སུ་ཉྙཾ, ལ་ཀྑ་ཎ་སུ་ཉྙཾ, ཝི་ཀྑ་མྦྷ་ན་སུ་ཉྙཾ, ཏ་ད་ངྒ་སུ་ཉྙཾ, ས་མུ་ཙྪེ་ད་སུ་ཉྙཾ, པ་ཊི་པྤ་སྶ་དྡྷི་སུ་ཉྙཾ, ནི་སྶ་ར་ཎ་སུ་ཉྙཾ, ཨ་ཛ྄ཛྷ་ཏྟ་སུ་ཉྙཾ, བ་ཧི་དྡྷཱ་སུ་ཉྙཾ, དུ་བྷ་ཏོ་སུ་ཉྙཾ, ས་བྷཱ་ག་སུ་ཉྙཾ, ཝི་ས་བྷཱ་ག་སུ་ཉྙཾ, ཨེ་ས་ནཱ་སུ་ཉྙཾ, པ་རི་གྒ་ཧ་སུ་ཉྙཾ, པ་ཊི་ལཱ་བྷ་སུ་ཉྙཾ, པ་ཊི་ཝེ་དྷ་སུ་ཉྙཾ, ཨེ་ཀ་ཏྟ་སུ་ཉྙཾ, ནཱ་ན་ཏྟ་སུ་ཉྙཾ, ཁ་ནྟི་སུ་ཉྙཾ, ཨ་དྷི་ཊྛཱ་ན་སུ་ཉྙཾ, པ་རི་ཡོ་གཱ་ཧ་ཎ་སུ་ཉྙཾ [པ་རི་ཡོ་གཱ་ཧ་ན་སུ་ཉྙཾ (སྱཱ.)], ས་མྤ་ཛཱ་ན་སྶ པ་ཝ་ཏྟ་པ་རི་ཡཱ་དཱ་ནཾ ས་བྦ་སུ་ཉྙ་ཏཱ་ནཾ པ་ར་མ་ཏྠ་སུ་ཉྙཾ.

༢. ནི་དྡེ་སོ

༤༨. ཀ་ཏ་མཾ སུ་ཉྙ་སུ་ཉྙཾ? ཙ་ཀྑུ སུ་ཉྙཾ ཨ་ཏྟེ་ན ཝཱ ཨ་ཏྟ་ནི་ཡེ་ན ཝཱ ནི་ཙྩེ་ན ཝཱ དྷུ་ཝེ་ན ཝཱ ས་སྶ་ཏེ་ན ཝཱ ཨ་ཝི་པ་རི་ཎཱ་མ་དྷ་མྨེ་ན ཝཱ. སོ་ཏཾ སུ་ཉྙཾ…པེ… གྷཱ་ནཾ སུ་ཉྙཾ… ཛི་ཝ྄ཧཱ སུ་ཉྙཱ… ཀཱ་ཡོ སུ་ཉྙོ… མ་ནོ སུ་ཉྙོ ཨ་ཏྟེ་ན ཝཱ ཨ་ཏྟ་ནི་ཡེ་ན ཝཱ ནི་ཙྩེ་ན ཝཱ དྷུ་ཝེ་ན ཝཱ ས་སྶ་ཏེ་ན ཝཱ ཨ་ཝི་པ་རི་ཎཱ་མ་དྷ་མྨེ་ན ཝཱ. ཨི་དཾ སུ་ཉྙ་སུ་ཉྙཾ.

ཀ་ཏ་མཾ ས་ངྑཱ་ར་སུ་ཉྙཾ? ཏ་ཡོ ས་ངྑཱ་རཱ – པུ་ཉྙཱ་བྷི་ས་ངྑཱ་རོ, ཨ་པུ་ཉྙཱ་བྷི་ས་ངྑཱ་རོ, ཨཱ་ནེ་ཉྫཱ་བྷི་ས་ངྑཱ་རོ. པུ་ཉྙཱ་བྷི་ས་ངྑཱ་རོ ཨ་པུ་ཉྙཱ་བྷི་ས་ངྑཱ་རེ་ན ཙ ཨཱ་ནེ་ཉྫཱ་བྷི་ས་ངྑཱ་རེ་ན ཙ སུ་ཉྙོ. ཨ་པུ་ཉྙཱ་བྷི་ས་ངྑཱ་རོ པུ་ཉྙཱ་བྷི་ས་ངྑཱ་རེ་ན ཙ ཨཱ་ནེ་ཉྫཱ་བྷི་ས་ངྑཱ་རེ་ན ཙ སུ་ཉྙོ. ཨཱ་ནེ་ཉྫཱ་བྷི་ས་ངྑཱ་རོ པུ་ཉྙཱ་བྷི་ས་ངྑཱ་རེ་ན ཙ ཨ་པུ་ཉྙཱ་བྷི་ས་ངྑཱ་རེ་ན ཙ སུ་ཉྙོ. ཨི་མེ ཏ་ཡོ ས་ངྑཱ་རཱ.

ཨ་པ་རེ་པི ཏ་ཡོ ས་ངྑཱ་རཱ – ཀཱ་ཡ་ས་ངྑཱ་རོ, ཝ་ཙཱི་ས་ངྑཱ་རོ, ཙི་ཏྟ་ས་ངྑཱ་རོ. ཀཱ་ཡ་ས་ངྑཱ་རོ ཝ་ཙཱི་ས་ངྑཱ་རེ་ན ཙ ཙི་ཏྟ་ས་ངྑཱ་རེ་ན ཙ སུ་ཉྙོ. ཝ་ཙཱི་ས་ངྑཱ་རོ ཀཱ་ཡ་ས་ངྑཱ་རེ་ན ཙ ཙི་ཏྟ་ས་ངྑཱ་རེ་ན ཙ སུ་ཉྙོ. ཙི་ཏྟ་ས་ངྑཱ་རོ ཀཱ་ཡ་ས་ངྑཱ་རེ་ན ཙ ཝ་ཙཱི་ས་ངྑཱ་རེ་ན ཙ སུ་ཉྙོ. ཨི་མེ ཏ་ཡོ ས་ངྑཱ་རཱ.

ཨ་པ་རེ་པི ཏ་ཡོ ས་ངྑཱ་རཱ – ཨ་ཏཱི་ཏཱ ས་ངྑཱ་རཱ, ཨ་ནཱ་ག་ཏཱ ས་ངྑཱ་རཱ, པ་ཙྩུ་པྤ་ནྣཱ ས་ངྑཱ་རཱ. ཨ་ཏཱི་ཏཱ ས་ངྑཱ་རཱ ཨ་ནཱ་ག་ཏེ་ཧི ཙ པ་ཙྩུ་པྤ་ནྣེ་ཧི ཙ ས་ངྑཱ་རེ་ཧི སུ་ཉྙཱ. ཨ་ནཱ་ག་ཏཱ ས་ངྑཱ་རཱ ཨ་ཏཱི་ཏེ་ཧི ཙ པ་ཙྩུ་པྤ་ནྣེ་ཧི ཙ ས་ངྑཱ་རེ་ཧི སུ་ཉྙཱ པ་ཙྩུ་པྤ་ནྣཱ ས་ངྑཱ་རཱ ཨ་ཏཱི་ཏེ་ཧི ཙ ཨ་ནཱ་ག་ཏེ་ཧི ཙ ས་ངྑཱ་རེ་ཧི སུ་ཉྙཱ. ཨི་མེ ཏ་ཡོ ས་ངྑཱ་རཱ; ཨི་དཾ ས་ངྑཱ་ར་སུ་ཉྙཾ.

ཀ་ཏ་མཾ ཝི་པ་རི་ཎཱ་མ་སུ་ཉྙཾ? ཛཱ་ཏཾ རཱུ་པཾ ས་བྷཱ་ཝེ་ན སུ་ཉྙཾ. ཝི་ག་ཏཾ རཱུ་པཾ ཝི་པ་རི་ཎ་ཏ་ཉྩེ་ཝ སུ་ཉྙ་ཉྩ. ཛཱ་ཏཱ ཝེ་ད་ནཱ ས་བྷཱ་ཝེ་ན སུ་ཉྙཱ. ཝི་ག་ཏཱ ཝེ་ད་ནཱ ཝི་པ་རི་ཎ་ཏཱ ཙེ་ཝ སུ་ཉྙཱ ཙ …པེ… ཛཱ་ཏཱ ས་ཉྙཱ… ཛཱ་ཏཱ ས་ངྑཱ་རཱ… ཛཱ་ཏཾ ཝི་ཉྙཱ་ཎཾ… ཛཱ་ཏཾ ཙ་ཀྑུ…པེ… ཛཱ་ཏོ བྷ་ཝོ ས་བྷཱ་ཝེ་ན སུ་ཉྙོ. ཝི་ག་ཏོ བྷ་ཝོ ཝི་པ་རི་ཎ་ཏོ ཙེ་ཝ སུ་ཉྙོ ཙ. ཨི་དཾ ཝི་པ་རི་ཎཱ་མ་སུ་ཉྙཾ.

ཀ་ཏ་མཾ ཨ་གྒ་སུ་ཉྙཾ? ཨ་གྒ་མེ་ཏཾ པ་དཾ སེ་ཊྛ་མེ་ཏཾ པ་དཾ ཝི་སི་ཊྛ་མེ་ཏཾ [ཝི་སེ་ཊྛ་མེ་ཏཾ (ཀ.)] པ་དཾ ཡ་དི་དཾ ས་བྦ་ས་ངྑཱ་ར་ས་མ་ཐོ ས་བྦཱུ་པ་དྷི་པ་ཊི་ནི་སྶ་གྒོ ཏ་ཎྷ་ཀྑ་ཡོ ཝི་རཱ་གོ ནི་རོ་དྷོ ནི་བྦཱ་ནཾ. ཨི་དཾ ཨ་གྒ་སུ་ཉྙཾ.

ཀ་ཏ་མཾ ལ་ཀྑ་ཎ་སུ་ཉྙཾ? དྭེ ལ་ཀྑ་ཎཱ་ནི – བཱ་ལ་ལ་ཀྑ་ཎ་ཉྩ པ་ཎྜི་ཏ་ལ་ཀྑ་ཎ་ཉྩ. བཱ་ལ་ལ་ཀྑ་ཎཾ པ་ཎྜི་ཏ་ལ་ཀྑ་ཎེ་ན སུ་ཉྙཾ. པ་ཎྜི་ཏ་ལ་ཀྑ་ཎཾ བཱ་ལ་ལ་ཀྑ་ཎེ་ན སུ་ཉྙཾ. ཏཱི་ཎི ལ་ཀྑ་ཎཱ་ནི – ཨུ་པྤཱ་ད་ལ་ཀྑ་ཎཾ, ཝ་ཡ་ལ་ཀྑ་ཎཾ, ཋི་ཏ་ཉྙ་ཐ་ཏྟ་ལ་ཀྑ་ཎཾ. ཨུ་པྤཱ་ད་ལ་ཀྑ་ཎཾ ཝ་ཡ་ལ་ཀྑ་ཎེ་ན ཙ ཋི་ཏ་ཉྙ་ཐ་ཏྟ་ལ་ཀྑ་ཎེ་ན ཙ སུ་ཉྙཾ. ཝ་ཡ་ལ་ཀྑ་ཎཾ ཨུ་པྤཱ་ད་ལ་ཀྑ་ཎེ་ན ཙ ཋི་ཏ་ཉྙ་ཐ་ཏྟ་ལ་ཀྑ་ཎེ་ན ཙ སུ་ཉྙཾ, ཋི་ཏ་ཉྙ་ཐ་ཏྟ་ལ་ཀྑ་ཎཾ ཨུ་པྤཱ་ད་ལ་ཀྑ་ཎེ་ན ཙ ཝ་ཡ་ལ་ཀྑ་ཎེ་ན ཙ སུ་ཉྙཾ.

རཱུ་པ་སྶ ཨུ་པྤཱ་ད་ལ་ཀྑ་ཎཾ ཝ་ཡ་ལ་ཀྑ་ཎེ་ན ཙ ཋི་ཏ་ཉྙ་ཐ་ཏྟ་ལ་ཀྑ་ཎེ་ན ཙ སུ་ཉྙཾ. རཱུ་པ་སྶ ཝ་ཡ་ལ་ཀྑ་ཎཾ ཨུ་པྤཱ་ད་ལ་ཀྑ་ཎེ་ན ཙ ཋི་ཏ་ཉྙ་ཐ་ཏྟ་ལ་ཀྑ་ཎེ་ན ཙ སུ་ཉྙཾ. རཱུ་པ་སྶ ཋི་ཏ་ཉྙ་ཐ་ཏྟ་ལ་ཀྑ་ཎཾ ཨུ་པྤཱ་ད་ལ་ཀྑ་ཎེ་ན ཙ ཝ་ཡ་ལ་ཀྑ་ཎེ་ན ཙ སུ་ཉྙཾ. ཝེ་ད་ནཱ་ཡ…པེ… ས་ཉྙཱ་ཡ… ས་ངྑཱ་རཱ་ནཾ… ཝི་ཉྙཱ་ཎ་སྶ… ཙ་ཀྑུ་སྶ… ཛ་རཱ་མ་ར་ཎ་སྶ ཨུ་པྤཱ་ད་ལ་ཀྑ་ཎཾ ཝ་ཡ་ལ་ཀྑ་ཎེ་ན ཙ ཋི་ཏ་ཉྙ་ཐ་ཏྟ་ལ་ཀྑ་ཎེ་ན ཙ སུ་ཉྙཾ. ཛ་རཱ་མ་ར་ཎ་སྶ ཝ་ཡ་ལ་ཀྑ་ཎཾ ཨུ་པྤཱ་ད་ལ་ཀྑ་ཎེ་ན ཙ ཋི་ཏ་ཉྙ་ཐ་ཏྟ་ལ་ཀྑ་ཎེ་ན ཙ སུ་ཉྙཾ. ཛ་རཱ་མ་ར་ཎ་སྶ ཋི་ཏ་ཉྙ་ཐ་ཏྟ་ལ་ཀྑ་ཎཾ ཨུ་པྤཱ་ད་ལ་ཀྑ་ཎེ་ན ཙ ཝ་ཡ་ལ་ཀྑ་ཎེ་ན ཙ སུ་ཉྙཾ. ཨི་དཾ ལ་ཀྑ་ཎ་སུ་ཉྙཾ.

ཀ་ཏ་མཾ ཝི་ཀྑ་མྦྷ་ན་སུ་ཉྙཾ? ནེ་ཀྑ་མྨེ་ན ཀཱ་མ་ཙྪ་ནྡོ ཝི་ཀྑ་མྦྷི་ཏོ ཙེ་ཝ སུ་ཉྙོ ཙ. ཨ་བྱཱ་པཱ་དེ་ན བྱཱ་པཱ་དོ ཝི་ཀྑ་མྦྷི་ཏོ ཙེ་ཝ སུ་ཉྙོ ཙ. ཨཱ་ལོ་ཀ་ས་ཉྙཱ་ཡ ཐི་ན་མི་དྡྷཾ ཝི་ཀྑ་མྦྷི་ཏ་ཉྩེ་ཝ སུ་ཉྙ་ཉྩ. ཨ་ཝི་ཀྑེ་པེ་ན ཨུ་དྡྷ་ཙྩཾ ཝི་ཀྑ་མྦྷི་ཏ་ཉྩེ་ཝ སུ་ཉྙ་ཉྩ. དྷ་མྨ་ཝ་ཝ་ཏྠཱ་ནེ་ན ཝི་ཙི་ཀི་ཙྪཱ ཝི་ཀྑ་མྦྷི་ཏཱ ཙེ་ཝ སུ་ཉྙཱ ཙ. ཉཱ་ཎེ་ན ཨ་ཝི་ཛྫཱ ཝི་ཀྑ་མྦྷི་ཏཱ ཙེ་ཝ སུ་ཉྙཱ ཙ. པཱ་མོ་ཛྫེ་ན ཨ་ར་ཏི ཝི་ཀྑ་མྦྷི་ཏཱ ཙེ་ཝ སུ་ཉྙཱ ཙ. པ་ཋ་མེ་ན ཛྷཱ་ནེ་ན ནཱི་ཝ་ར་ཎཱ ཝི་ཀྑ་མྦྷི་ཏཱ ཙེ་ཝ སུ་ཉྙཱ ཙ…པེ… ཨ་ར་ཧ་ཏྟ་མ་གྒེ་ན ས་བྦ་ཀི་ལེ་སཱ ཝི་ཀྑ་མྦྷི་ཏཱ ཙེ་ཝ སུ་ཉྙཱ ཙ. ཨི་དཾ ཝི་ཀྑ་མྦྷ་ན་སུ་ཉྙཾ.

ཀ་ཏ་མཾ ཏ་ད་ངྒ་སུ་ཉྙཾ? ནེ་ཀྑ་མྨེ་ན ཀཱ་མ་ཙྪ་ནྡོ ཏ་ད་ངྒ་སུ་ཉྙོ. ཨ་བྱཱ་པཱ་དེ་ན བྱཱ་པཱ་དོ ཏ་ད་ངྒ་སུ་ཉྙོ. ཨཱ་ལོ་ཀ་ས་ཉྙཱ་ཡ ཐི་ན་མི་དྡྷཾ ཏ་ད་ངྒ་སུ་ཉྙཾ. ཨ་ཝི་ཀྑེ་པེ་ན ཨུ་དྡྷ་ཙྩཾ ཏ་ད་ངྒ་སུ་ཉྙཾ. དྷ་མྨ་ཝ་ཝ་ཏྠཱ་ནེ་ན ཝི་ཙི་ཀི་ཙྪཱ ཏ་ད་ངྒ་སུ་ཉྙཱ. ཉཱ་ཎེ་ན ཨ་ཝི་ཛྫཱ ཏ་ད་ངྒ་སུ་ཉྙཱ. པཱ་མོ་ཛྫེ་ན ཨ་ར་ཏི ཏ་ད་ངྒ་སུ་ཉྙཱ. པ་ཋ་མེ་ན ཛྷཱ་ནེ་ན ནཱི་ཝ་ར་ཎཱ ཏ་ད་ངྒ་སུ་ཉྙཱ…པེ… ཝི་ཝ་ཊྚ་ནཱ་ནུ་པ་སྶ་ནཱ་ཡ ས་ཉྙོ་གཱ་བྷི་ནི་ཝེ་སོ ཏ་ད་ངྒ་སུ་ཉྙོ. ཨི་དཾ ཏ་ད་ངྒ་སུ་ཉྙཾ.

ཀ་ཏ་མཾ ས་མུ་ཙྪེ་ད་སུ་ཉྙཾ? ནེ་ཀྑ་མྨེ་ན ཀཱ་མ་ཙྪ་ནྡོ ས་མུ་ཙྪི་ནྣོ ཙེ་ཝ སུ་ཉྙོ ཙ. ཨ་བྱཱ་པཱ་དེ་ན བྱཱ་པཱ་དོ ས་མུ་ཙྪི་ནྣོ ཙེ་ཝ སུ་ཉྙོ ཙ. ཨཱ་ལོ་ཀ་ས་ཉྙཱ་ཡ ཐི་ན་མི་དྡྷཾ ས་མུ་ཙྪི་ནྣ་ཉྩེ་ཝ སུ་ཉྙ་ཉྩ. ཨ་ཝི་ཀྑེ་པེ་ན ཨུ་དྡྷ་ཙྩཾ ས་མུ་ཙྪི་ནྣ་ཉྩེ་ཝ སུ་ཉྙ་ཉྩ. དྷ་མྨ་ཝ་ཝ་ཏྠཱ་ནེ་ན ཝི་ཙི་ཀི་ཙྪཱ ས་མུ་ཙྪི་ནྣཱ ཙེ་ཝ སུ་ཉྙཱ ཙ. ཉཱ་ཎེ་ན ཨ་ཝི་ཛྫཱ ས་མུ་ཙྪི་ནྣཱ ཙེ་ཝ སུ་ཉྙཱ ཙ. པཱ་མོ་ཛྫེ་ན ཨ་ར་ཏི ས་མུ་ཙྪི་ནྣཱ ཙེ་ཝ སུ་ཉྙཱ ཙ. པ་ཋ་མེ་ན ཛྷཱ་ནེ་ན ནཱི་ཝ་ར་ཎཱ ས་མུ་ཙྪི་ནྣཱ ཙེ་ཝ སུ་ཉྙཱ ཙ…པེ… ཨ་ར་ཧ་ཏྟ་མ་གྒེ་ན ས་བྦ་ཀི་ལེ་སཱ ས་མུ་ཙྪི་ནྣཱ ཙེ་ཝ སུ་ཉྙཱ ཙ. ཨི་དཾ ས་མུ་ཙྪེ་ད་སུ་ཉྙཾ.

ཀ་ཏ་མཾ པ་ཊི་པྤ་སྶ་དྡྷི་སུ་ཉྙཾ? ནེ་ཀྑ་མྨེ་ན ཀཱ་མ་ཙྪ་ནྡོ པ་ཊི་པྤ་སྶ་དྡྷོ ཙེ་ཝ སུ་ཉྙོ ཙ. ཨ་བྱཱ་པཱ་དེ་ན བྱཱ་པཱ་དོ པ་ཊི་པྤ་སྶ་དྡྷོ ཙེ་ཝ སུ་ཉྙོ ཙ. ཨཱ་ལོ་ཀ་ས་ཉྙཱ་ཡ ཐི་ན་མི་དྡྷཾ པ་ཊི་པྤ་སྶ་དྡྷ་ཉྩེ་ཝ སུ་ཉྙ་ཉྩ. ཨ་ཝི་ཀྑེ་པེ་ན ཨུ་དྡྷ་ཙྩཾ པ་ཊི་པྤ་སྶ་དྡྷ་ཉྩེ་ཝ སུ་ཉྙ་ཉྩ. དྷ་མྨ་ཝ་ཝ་ཏྠཱ་ནེ་ན ཝི་ཙི་ཀི་ཙྪཱ པ་ཊི་པྤ་སྶ་དྡྷཱ ཙེ་ཝ སུ་ཉྙཱ ཙ. ཉཱ་ཎེ་ན ཨ་ཝི་ཛྫཱ པ་ཊི་པྤ་སྶ་དྡྷཱ ཙེ་ཝ སུ་ཉྙཱ ཙ. པཱ་མོ་ཛྫེ་ན ཨ་ར་ཏི པ་ཊི་པྤ་སྶ་དྡྷཱ ཙེ་ཝ སུ་ཉྙཱ ཙ. པ་ཋ་མེ་ན ཛྷཱ་ནེ་ན ནཱི་ཝ་ར་ཎཱ པ་ཊི་པྤ་སྶ་དྡྷཱ ཙེ་ཝ སུ་ཉྙཱ ཙ…པེ… ཨ་ར་ཧ་ཏྟ་མ་གྒེ་ན ས་བྦ་ཀི་ལེ་སཱ པ་ཊི་པྤ་སྶ་དྡྷཱ ཙེ་ཝ སུ་ཉྙཱ ཙ. ཨི་དཾ པ་ཊི་པྤ་སྶ་དྡྷི་སུ་ཉྙཾ.

ཀ་ཏ་མཾ ནི་སྶ་ར་ཎ་སུ་ཉྙཾ? ནེ་ཀྑ་མྨེ་ན ཀཱ་མ་ཙྪ་ནྡོ ནི་སྶ་ཊོ ཙེ་ཝ སུ་ཉྙོ ཙ. ཨ་བྱཱ་པཱ་དེ་ན བྱཱ་པཱ་དོ ནི་སྶ་ཊོ ཙེ་ཝ སུ་ཉྙོ ཙ. ཨཱ་ལོ་ཀ་ས་ཉྙཱ་ཡ ཐི་ན་མི་དྡྷཾ ནི་སྶ་ཊ་ཉྩེ་ཝ སུ་ཉྙ་ཉྩ. ཨ་ཝི་ཀྑེ་པེ་ན ཨུ་དྡྷ་ཙྩཾ ནི་སྶ་ཊ་ཉྩེ་ཝ སུ་ཉྙ་ཉྩ. དྷ་མྨ་ཝ་ཝ་ཏྠཱ་ནེ་ན ཝི་ཙི་ཀི་ཙྪཱ ནི་སྶ་ཊཱ ཙེ་ཝ སུ་ཉྙཱ ཙ. ཉཱ་ཎེ་ན ཨ་ཝི་ཛྫཱ ནི་སྶ་ཊཱ ཙེ་ཝ སུ་ཉྙཱ ཙ. པཱ་མོ་ཛྫེ་ན ཨ་ར་ཏི ནི་སྶ་ཊཱ ཙེ་ཝ སུ་ཉྙཱ ཙ. པ་ཋ་མེ་ན ཛྷཱ་ནེ་ན ནཱི་ཝ་ར་ཎཱ ནི་སྶ་ཊཱ ཙེ་ཝ སུ་ཉྙཱ ཙ …པེ… ཨ་ར་ཧ་ཏྟ་མ་གྒེ་ན ས་བྦ་ཀི་ལེ་སཱ ནི་སྶ་ཊཱ ཙེ་ཝ སུ་ཉྙཱ ཙ. ཨི་དཾ ནི་སྶ་ར་ཎ་སུ་ཉྙཾ.

ཀ་ཏ་མཾ ཨ་ཛ྄ཛྷ་ཏྟ་སུ་ཉྙཾ? ཨ་ཛ྄ཛྷ་ཏྟཾ ཙ་ཀྑུཾ སུ་ཉྙཾ ཨ་ཏྟེ་ན ཝཱ ཨ་ཏྟ་ནི་ཡེ་ན ཝཱ ནི་ཙྩེ་ན ཝཱ དྷུ་ཝེ་ན ཝཱ ས་སྶ་ཏེ་ན ཝཱ ཨ་ཝི་པ་རི་ཎཱ་མ་དྷ་མྨེ་ན ཝཱ. ཨ་ཛ྄ཛྷ་ཏྟཾ སོ་ཏཾ སུ་ཉྙཾ… ཨ་ཛ྄ཛྷ་ཏྟཾ གྷཱ་ནཾ སུ་ཉྙཾ… ཨ་ཛ྄ཛྷ་ཏྟཾ ཛི་ཝ྄ཧཱ སུ་ཉྙཱ… ཨ་ཛ྄ཛྷ་ཏྟཾ ཀཱ་ཡོ སུ་ཉྙོ… ཨ་ཛ྄ཛྷ་ཏྟཾ མ་ནོ སུ་ཉྙོ ཨ་ཏྟེ་ན ཝཱ ཨ་ཏྟ་ནི་ཡེ་ན ཝཱ ནི་ཙྩེ་ན ཝཱ དྷུ་ཝེ་ན ཝཱ ས་སྶ་ཏེ་ན ཝཱ ཨ་ཝི་པ་རི་ཎཱ་མ་དྷ་མྨེ་ན ཝཱ. ཨི་དཾ ཨ་ཛ྄ཛྷ་ཏྟ་སུ་ཉྙཾ.

ཀ་ཏ་མཾ བ་ཧི་དྡྷཱ་སུ་ཉྙཾ? བ་ཧི་དྡྷཱ རཱུ་པཱ སུ་ཉྙཱ…པེ… བ་ཧི་དྡྷཱ དྷ་མྨཱ སུ་ཉྙཱ ཨ་ཏྟེ་ན ཝཱ ཨ་ཏྟ་ནི་ཡེ་ན ཝཱ ནི་ཙྩེ་ན ཝཱ དྷུ་ཝེ་ན ཝཱ ས་སྶ་ཏེ་ན ཝཱ ཨ་ཝི་པ་རི་ཎཱ་མ་དྷ་མྨེ་ན ཝཱ. ཨི་དཾ བ་ཧི་དྡྷཱ་སུ་ཉྙཾ.

ཀ་ཏ་མཾ དུ་བྷ་ཏོ་སུ་ཉྙཾ? ཡ་ཉྩ ཨ་ཛ྄ཛྷ་ཏྟཾ ཙ་ཀྑུ ཡེ ཙ བ་ཧི་དྡྷཱ རཱུ་པཱ ཨུ་བྷ་ཡ་མེ་ཏཾ སུ་ཉྙཾ [ཨུ་བྷ་ཡ་ཏོ ཏཾ སུ་ཉྙཱ (སྱཱ.)] ཨ་ཏྟེ་ན ཝཱ ཨ་ཏྟ་ནི་ཡེ་ན ཝཱ ནི་ཙྩེ་ན ཝཱ དྷུ་ཝེ་ན ཝཱ ས་སྶ་ཏེ་ན ཝཱ ཨ་ཝི་པ་རི་ཎཱ་མ་དྷ་མྨེ་ན ཝཱ. ཡ་ཉྩ ཨ་ཛ྄ཛྷ་ཏྟཾ སོ་ཏཾ ཡེ ཙ བ་ཧི་དྡྷཱ ས་དྡཱ…པེ… ཡ་ཉྩ ཨ་ཛ྄ཛྷ་ཏྟཾ གྷཱ་ནཾ ཡེ ཙ བ་ཧི་དྡྷཱ ག་ནྡྷཱ… ཡཱ ཙ ཨ་ཛ྄ཛྷ་ཏྟཾ ཛི་ཝ྄ཧཱ ཡེ ཙ བ་ཧི་དྡྷཱ ར་སཱ… ཡོ ཙ ཨ་ཛ྄ཛྷ་ཏྟཾ ཀཱ་ཡོ ཡེ ཙ བ་ཧི་དྡྷཱ ཕོ་ཊྛ་བྦཱ… ཡོ ཙ ཨ་ཛ྄ཛྷ་ཏྟཾ མ་ནོ ཡེ ཙ བ་ཧི་དྡྷཱ དྷ་མྨཱ ཨུ་བྷ་ཡ་མེ་ཏཾ སུ་ཉྙཾ ཨ་ཏྟེ་ན ཝཱ ཨ་ཏྟ་ནི་ཡེ་ན ཝཱ ནི་ཙྩེ་ན ཝཱ དྷུ་ཝེ་ན ཝཱ ས་སྶ་ཏེ་ན ཝཱ ཨ་ཝི་པ་རི་ཎཱ་མ་དྷ་མྨེ་ན ཝཱ. ཨི་དཾ དུ་བྷ་ཏོ་སུ་ཉྙཾ.

ཀ་ཏ་མཾ ས་བྷཱ་ག་སུ་ཉྙཾ? ཚ ཨ་ཛ྄ཛྷ་ཏྟི་ཀཱ་ནི ཨཱ་ཡ་ཏ་ནཱ་ནི ས་བྷཱ་གཱ་ནི ཙེ་ཝ སུ་ཉྙཱ་ནི ཙ. ཚ བཱ་ཧི་རཱ་ནི ཨཱ་ཡ་ཏ་ནཱ་ནི ས་བྷཱ་གཱ་ནི ཙེ་ཝ སུ་ཉྙཱ་ནི ཙ. ཚ ཝི་ཉྙཱ་ཎ་ཀཱ་ཡཱ ས་བྷཱ་གཱ ཙེ་ཝ སུ་ཉྙཱ ཙ. ཚ ཕ་སྶ་ཀཱ་ཡཱ ས་བྷཱ་གཱ ཙེ་ཝ སུ་ཉྙཱ ཙ. ཚ ཝེ་ད་ནཱ་ཀཱ་ཡཱ ས་བྷཱ་གཱ ཙེ་ཝ སུ་ཉྙཱ ཙ. ཚ ས་ཉྙཱ་ཀཱ་ཡཱ ས་བྷཱ་གཱ ཙེ་ཝ སུ་ཉྙཱ ཙ. ཚ ཙེ་ཏ་ནཱ་ཀཱ་ཡཱ ས་བྷཱ་གཱ ཙེ་ཝ སུ་ཉྙཱ ཙ. ཨི་དཾ ས་བྷཱ་ག་སུ་ཉྙཾ.

ཀ་ཏ་མཾ ཝི་ས་བྷཱ་ག་སུ་ཉྙཾ? ཚ ཨ་ཛ྄ཛྷ་ཏྟི་ཀཱ་ནི ཨཱ་ཡ་ཏ་ནཱ་ནི ཚ་ཧི བཱ་ཧི་རེ་ཧི ཨཱ་ཡ་ཏ་ནེ་ཧི ཝི་ས་བྷཱ་གཱ་ནི ཙེ་ཝ སུ་ཉྙཱ་ནི ཙ. ཚ བཱ་ཧི་རཱ་ནི ཨཱ་ཡ་ཏ་ནཱ་ནི ཚ་ཧི ཝི་ཉྙཱ་ཎ་ཀཱ་ཡེ་ཧི ཝི་ས་བྷཱ་གཱ་ནི ཙེ་ཝ སུ་ཉྙཱ་ནི ཙ. ཚ ཝི་ཉྙཱ་ཎ་ཀཱ་ཡཱ ཚ་ཧི ཕ་སྶ་ཀཱ་ཡེ་ཧི ཝི་ས་བྷཱ་གཱ ཙེ་ཝ སུ་ཉྙཱ ཙ. ཚ ཕ་སྶ་ཀཱ་ཡཱ ཚ་ཧི ཝེ་ད་ནཱ་ཀཱ་ཡེ་ཧི ཝི་ས་བྷཱ་གཱ ཙེ་ཝ སུ་ཉྙཱ ཙ. ཚ ཝེ་ད་ནཱ་ཀཱ་ཡཱ ཚ་ཧི ས་ཉྙཱ་ཀཱ་ཡེ་ཧི ཝི་ས་བྷཱ་གཱ ཙེ་ཝ སུ་ཉྙཱ ཙ. ཚ ས་ཉྙཱ་ཀཱ་ཡཱ ཚ་ཧི ཙེ་ཏ་ནཱ་ཀཱ་ཡེ་ཧི ཝི་ས་བྷཱ་གཱ ཙེ་ཝ སུ་ཉྙཱ ཙ. ཨི་དཾ ཝི་ས་བྷཱ་ག་སུ་ཉྙཾ.

ཀ་ཏ་མཾ ཨེ་ས་ནཱ་སུ་ཉྙཾ? ནེ་ཀྑ་མྨེ་ས་ནཱ ཀཱ་མ་ཙྪ་ནྡེ་ན སུ་ཉྙཱ. ཨ་བྱཱ་པཱ་དེ་ས་ནཱ བྱཱ་པཱ་དེ་ན སུ་ཉྙཱ. ཨཱ་ལོ་ཀ་ས་ཉྙེ་ས་ནཱ ཐི་ན་མི་དྡྷེ་ན སུ་ཉྙཱ. ཨ་ཝི་ཀྑེ་པེ་ས་ནཱ ཨུ་དྡྷ་ཙྩེ་ན སུ་ཉྙཱ. དྷ་མྨ་ཝ་ཝ་ཏྠཱ་ནེ་ས་ནཱ ཝི་ཙི་ཀི་ཙྪཱ་ཡ སུ་ཉྙཱ. ཉཱ་ཎེ་ས་ནཱ ཨ་ཝི་ཛྫཱ་ཡ སུ་ཉྙཱ. པཱ་མོ་ཛྫེ་ས་ནཱ ཨ་ར་ཏི་ཡཱ སུ་ཉྙཱ. པ་ཋ་མ་ཛ྄ཛྷཱ་ནེ་ས་ནཱ ནཱི་ཝ་ར་ཎེ་ཧི སུ་ཉྙཱ…པེ… ཨ་ར་ཧ་ཏྟ་མ་གྒེ་ས་ནཱ ས་བྦ་ཀི་ལེ་སེ་ཧི སུ་ཉྙཱ. ཨི་དཾ ཨེ་ས་ནཱ་སུ་ཉྙཾ.

ཀ་ཏ་མཾ པ་རི་གྒ་ཧ་སུ་ཉྙཾ? ནེ་ཀྑ་མྨ་པ་རི་གྒ་ཧོ ཀཱ་མ་ཙྪ་ནྡེ་ན སུ་ཉྙོ. ཨ་བྱཱ་པཱ་ད་པ་རི་གྒ་ཧོ བྱཱ་པཱ་དེ་ན སུ་ཉྙོ. ཨཱ་ལོ་ཀ་ས་ཉྙཱ་པ་རི་གྒ་ཧོ ཐི་ན་མི་དྡྷེ་ན སུ་ཉྙོ. ཨ་ཝི་ཀྑེ་པ་པ་རི་གྒ་ཧོ ཨུ་དྡྷ་ཙྩེ་ན སུ་ཉྙོ. དྷ་མྨ་ཝ་ཝ་ཏྠཱ་ན་པ་རི་གྒ་ཧོ ཝི་ཙི་ཀི་ཙྪཱ་ཡ སུ་ཉྙོ. ཉཱ་ཎ་པ་རི་གྒ་ཧོ ཨ་ཝི་ཛྫཱ་ཡ སུ་ཉྙོ. པཱ་མོ་ཛྫ་པ་རི་གྒ་ཧོ ཨ་ར་ཏི་ཡཱ སུ་ཉྙོ. པ་ཋ་མ་ཛ྄ཛྷཱ་ན་པ་རི་གྒ་ཧོ ནཱི་ཝ་ར་ཎེ་ཧི སུ་ཉྙོ…པེ… ཨ་ར་ཧ་ཏྟ་མ་གྒ་པ་རི་གྒ་ཧོ ས་བྦ་ཀི་ལེ་སེ་ཧི སུ་ཉྙོ. ཨི་དཾ པ་རི་གྒ་ཧ་སུ་ཉྙཾ.

ཀ་ཏ་མཾ པ་ཊི་ལཱ་བྷ་སུ་ཉྙཾ? ནེ་ཀྑ་མྨ་པ་ཊི་ལཱ་བྷོ ཀཱ་མ་ཙྪ་ནྡེ་ན སུ་ཉྙོ. ཨ་བྱཱ་པཱ་ད་པ་ཊི་ལཱ་བྷོ བྱཱ་པཱ་དེ་ན སུ་ཉྙོ. ཨཱ་ལོ་ཀ་ས་ཉྙཱ་པ་ཊི་ལཱ་བྷོ ཐི་ན་མི་དྡྷེ་ན སུ་ཉྙོ. ཨ་ཝི་ཀྑེ་པ་པ་ཊི་ལཱ་བྷོ ཨུ་དྡྷ་ཙྩེ་ན སུ་ཉྙོ. དྷ་མྨ་ཝ་ཝ་ཏྠཱ་ན་པ་ཊི་ལཱ་བྷོ ཝི་ཙི་ཀི་ཙྪཱ་ཡ སུ་ཉྙོ. ཉཱ་ཎ་པ་ཊི་ལཱ་བྷོ ཨ་ཝི་ཛྫཱ་ཡ སུ་ཉྙོ. པཱ་མོ་ཛྫ་པ་ཊི་ལཱ་བྷོ ཨ་ར་ཏི་ཡཱ སུ་ཉྙོ. པ་ཋ་མ་ཛ྄ཛྷཱ་ན་པ་ཊི་ལཱ་བྷོ ནཱི་ཝ་ར་ཎེ་ཧི སུ་ཉྙོ…པེ… ཨ་ར་ཧ་ཏྟ་མ་གྒ་པ་ཊི་ལཱ་བྷོ ས་བྦ་ཀི་ལེ་སེ་ཧི སུ་ཉྙོ. ཨི་དཾ པ་ཊི་ལཱ་བྷ་སུ་ཉྙཾ.

ཀ་ཏ་མཾ པ་ཊི་ཝེ་དྷ་སུ་ཉྙཾ? ནེ་ཀྑ་མྨ་པྤ་ཊི་ཝེ་དྷོ ཀཱ་མ་ཙྪ་ནྡེ་ན སུ་ཉྙོ. ཨ་བྱཱ་པཱ་ད་པྤ་ཊི་ཝེ་དྷོ བྱཱ་པཱ་དེ་ན སུ་ཉྙོ. ཨཱ་ལོ་ཀ་ས་ཉྙཱ་པྤ་ཊི་ཝེ་དྷོ ཐི་ན་མི་དྡྷེ་ན སུ་ཉྙོ. ཨ་ཝི་ཀྑེ་པ་པྤ་ཊི་ཝེ་དྷོ ཨུ་དྡྷ་ཙྩེ་ན སུ་ཉྙོ. དྷ་མྨ་ཝ་ཝ་ཏྠཱ་ན་པྤ་ཊི་ཝེ་དྷོ ཝི་ཙི་ཀི་ཙྪཱ་ཡ སུ་ཉྙོ. ཉཱ་ཎ་པྤ་ཊི་ཝེ་དྷོ ཨ་ཝི་ཛྫཱ་ཡ སུ་ཉྙོ. པཱ་མོ་ཛྫ་པྤ་ཊི་ཝེ་དྷོ ཨ་ར་ཏི་ཡཱ སུ་ཉྙོ. པ་ཋ་མ་ཛ྄ཛྷཱ་ན་པྤ་ཊི་ཝེ་དྷོ ནཱི་ཝ་ར་ཎེ་ཧི སུ་ཉྙོ…པེ… ཨ་ར་ཧ་ཏྟ་མ་གྒ་པྤ་ཊི་ཝེ་དྷོ ས་བྦ་ཀི་ལེ་སེ་ཧི སུ་ཉྙོ. ཨི་དཾ པ་ཊི་ཝེ་དྷ་སུ་ཉྙཾ.

ཀ་ཏ་མཾ ཨེ་ཀ་ཏྟ་སུ་ཉྙཾ, ནཱ་ན་ཏྟ་སུ་ཉྙཾ? ཀཱ་མ་ཙྪ་ནྡོ ནཱ་ན་ཏྟཾ, ནེ་ཀྑ་མྨཾ ཨེ་ཀ་ཏྟཾ. ནེ་ཀྑ་མྨེ་ཀ་ཏྟཾ ཙེ་ཏ་ཡ་ཏོ ཀཱ་མ་ཙྪ་ནྡེ་ན སུ་ཉྙཾ. བྱཱ་པཱ་དོ ནཱ་ན་ཏྟཾ, ཨ་བྱཱ་པཱ་དོ ཨེ་ཀ་ཏྟཾ. ཨ་བྱཱ་པཱ་དེ་ཀ་ཏྟཾ ཙེ་ཏ་ཡ་ཏོ བྱཱ་པཱ་དེ་ན སུ་ཉྙཾ. ཐི་ན་མི་དྡྷཾ ནཱ་ན་ཏྟཾ, ཨཱ་ལོ་ཀ་ས་ཉྙཱ ཨེ་ཀ་ཏྟཾ. ཨཱ་ལོ་ཀ་ས་ཉྙེ་ཀ་ཏྟཾ ཙེ་ཏ་ཡ་ཏོ ཐི་ན་མི་དྡྷེ་ན སུ་ཉྙཾ. ཨུ་དྡྷ་ཙྩཾ ནཱ་ན་ཏྟཾ, ཨ་ཝི་ཀྑེ་པོ ཨེ་ཀ་ཏྟཾ. ཨ་ཝི་ཀྑེ་པེ་ཀ་ཏྟཾ ཙེ་ཏ་ཡ་ཏོ ཨུ་དྡྷ་ཙྩེ་ན སུ་ཉྙཾ. ཝི་ཙི་ཀི་ཙྪཱ ནཱ་ན་ཏྟཾ, དྷ་མྨ་ཝ་ཝ་ཏྠཱ་ནཾ ཨེ་ཀ་ཏྟཾ. དྷ་མྨ་ཝ་ཝ་ཏྠཱ་ནེ་ཀ་ཏྟཾ ཙེ་ཏ་ཡ་ཏོ ཝི་ཙི་ཀི་ཙྪཱ་ཡ སུ་ཉྙཾ. ཨ་ཝི་ཛྫཱ ནཱ་ན་ཏྟཾ, ཉཱ་ཎཾ ཨེ་ཀ་ཏྟཾ. ཉཱ་ཎེ་ཀ་ཏྟཾ ཙེ་ཏ་ཡ་ཏོ ཨ་ཝི་ཛྫཱ་ཡ སུ་ཉྙཾ. ཨ་ར་ཏི ནཱ་ན་ཏྟཾ, པཱ་མོ་ཛྫཾ ཨེ་ཀ་ཏྟཾ. པཱ་མོ་ཛྫེ་ཀ་ཏྟཾ ཙེ་ཏ་ཡ་ཏོ ཨ་ར་ཏི་ཡཱ སུ་ཉྙཾ. ནཱི་ཝ་ར་ཎཱ ནཱ་ན་ཏྟཾ, པ་ཋ་མ་ཛ྄ཛྷཱ་ནཾ ཨེ་ཀ་ཏྟཾ. པ་ཋ་མ་ཛ྄ཛྷཱ་ནེ་ཀ་ཏྟཾ ཙེ་ཏ་ཡ་ཏོ ནཱི་ཝ་ར་ཎེ་ཧི སུ་ཉྙཾ…པེ… ས་བྦ་ཀི་ལེ་སཱ ནཱ་ན་ཏྟཾ, ཨ་ར་ཧ་ཏྟ་མ་གྒོ ཨེ་ཀ་ཏྟཾ. ཨ་ར་ཧ་ཏྟ་མ་གྒེ་ཀ་ཏྟཾ ཙེ་ཏ་ཡ་ཏོ ས་བྦ་ཀི་ལེ་སེ་ཧི སུ་ཉྙཾ. ཨི་དཾ ཨེ་ཀ་ཏྟ་སུ་ཉྙཾ ནཱ་ན་ཏྟ་སུ་ཉྙཾ.

ཀ་ཏ་མཾ ཁ་ནྟི་སུ་ཉྙཾ? ནེ་ཀྑ་མྨ་ཁ་ནྟི ཀཱ་མ་ཙྪ་ནྡེ་ན སུ་ཉྙཱ. ཨ་བྱཱ་པཱ་ད་ཁ་ནྟི བྱཱ་པཱ་དེ་ན སུ་ཉྙཱ. ཨཱ་ལོ་ཀ་ས་ཉྙཱ་ཁ་ནྟི ཐི་ན་མི་དྡྷེ་ན སུ་ཉྙཱ. ཨ་ཝི་ཀྑེ་པ་ཁ་ནྟི ཨུ་དྡྷ་ཙྩེ་ན སུ་ཉྙཱ. དྷ་མྨ་ཝ་ཝ་ཏྠཱ་ན་ཁ་ནྟི ཝི་ཙི་ཀི་ཙྪཱ་ཡ སུ་ཉྙཱ. ཉཱ་ཎ་ཁ་ནྟི ཨ་ཝི་ཛྫཱ་ཡ སུ་ཉྙཱ. པཱ་མོ་ཛྫ་ཁ་ནྟི ཨ་ར་ཏི་ཡཱ སུ་ཉྙཱ. པ་ཋ་མ་ཛ྄ཛྷཱ་ན་ཁ་ནྟི ནཱི་ཝ་ར་ཎེ་ཧི སུ་ཉྙཱ…པེ… ཨ་ར་ཧ་ཏྟ་མ་གྒ་ཁ་ནྟི ས་བྦ་ཀི་ལེ་སེ་ཧི སུ་ཉྙཱ. ཨི་དཾ ཁ་ནྟི་སུ་ཉྙཾ.

ཀ་ཏ་མཾ ཨ་དྷི་ཊྛཱ་ན་སུ་ཉྙཾ? ནེ་ཀྑ་མྨཱ་དྷི་ཊྛཱ་ནཾ ཀཱ་མ་ཙྪ་ནྡེ་ན སུ་ཉྙཾ. ཨ་བྱཱ་པཱ་དཱ་དྷི་ཊྛཱ་ནཾ བྱཱ་པཱ་དེ་ན སུ་ཉྙཾ. ཨཱ་ལོ་ཀ་ས་ཉྙཱ་དྷི་ཊྛཱ་ནཾ ཐི་ན་མི་དྡྷེ་ན སུ་ཉྙཾ. ཨ་ཝི་ཀྑེ་པཱ་དྷི་ཊྛཱ་ནཾ ཨུ་དྡྷ་ཙྩེ་ན སུ་ཉྙཾ. དྷ་མྨ་ཝ་ཝ་ཏྠཱ་ནཱ་དྷི་ཊྛཱ་ནཾ ཝི་ཙི་ཀི་ཙྪཱ་ཡ སུ་ཉྙཾ. ཉཱ་ཎཱ་དྷི་ཊྛཱ་ནཾ ཨ་ཝི་ཛྫཱ་ཡ སུ་ཉྙཾ. པཱ་མོ་ཛྫཱ་དྷི་ཊྛཱ་ནཾ ཨ་ར་ཏི་ཡཱ སུ་ཉྙཾ. པ་ཋ་མ་ཛ྄ཛྷཱ་ནཱ་དྷི་ཊྛཱ་ནཾ ནཱི་ཝ་ར་ཎེ་ཧི སུ་ཉྙཾ…པེ… ཨ་ར་ཧ་ཏྟ་མ་གྒཱ་དྷི་ཊྛཱ་ནཾ ས་བྦ་ཀི་ལེ་སེ་ཧི སུ་ཉྙཾ. ཨི་དཾ ཨ་དྷི་ཊྛཱ་ན་སུ་ཉྙཾ.

ཀ་ཏ་མཾ པ་རི་ཡོ་གཱ་ཧ་ཎ་སུ་ཉྙཾ? ནེ་ཀྑ་མྨ་པ་རི་ཡོ་གཱ་ཧ་ཎཾ ཀཱ་མ་ཙྪ་ནྡེ་ན སུ་ཉྙཾ. ཨ་བྱཱ་པཱ་ད་པ་རི་ཡོ་གཱ་ཧ་ཎཾ བྱཱ་པཱ་དེ་ན སུ་ཉྙཾ. ཨཱ་ལོ་ཀ་ས་ཉྙཱ་པ་རི་ཡོ་གཱ་ཧ་ཎཾ ཐི་ན་མི་དྡྷེ་ན སུ་ཉྙཾ. ཨ་ཝི་ཀྑེ་པ་པ་རི་ཡོ་གཱ་ཧ་ཎཾ ཨུ་དྡྷ་ཙྩེ་ན སུ་ཉྙཾ. དྷ་མྨ་ཝ་ཝ་ཏྠཱ་ན་པ་རི་ཡོ་གཱ་ཧ་ཎཾ ཝི་ཙི་ཀི་ཙྪཱ་ཡ སུ་ཉྙཾ. ཉཱ་ཎ་པ་རི་ཡོ་གཱ་ཧ་ཎཾ ཨ་ཝི་ཛྫཱ་ཡ སུ་ཉྙཾ. པཱ་མོ་ཛྫ་པ་རི་ཡོ་གཱ་ཧ་ཎཾ ཨ་ར་ཏི་ཡཱ སུ་ཉྙཾ. པ་ཋ་མ་ཛ྄ཛྷཱ་ན་པ་རི་ཡོ་གཱ་ཧ་ཎཾ ནཱི་ཝ་ར་ཎེ་ཧི སུ་ཉྙཾ…པེ… ཨ་ར་ཧ་ཏྟ་མ་གྒ་པ་རི་ཡོ་གཱ་ཧ་ཎཾ ས་བྦ་ཀི་ལེ་སེ་ཧི སུ་ཉྙཾ. ཨི་དཾ པ་རི་ཡོ་གཱ་ཧ་ཎ་སུ་ཉྙཾ.

ཀ་ཏ་མཾ ས་མྤ་ཛཱ་ན་སྶ པ་ཝ་ཏྟ་པ་རི་ཡཱ་དཱ་ནཾ ས་བྦ་སུ་ཉྙ་ཏཱ་ནཾ པ་ར་མ་ཏྠ་སུ་ཉྙཾ? ཨི་དྷ ས་མྤ་ཛཱ་ནོ ནེ་ཀྑ་མྨེ་ན ཀཱ་མ་ཙྪ་ནྡ་སྶ པ་ཝ་ཏྟཾ པ་རི་ཡཱ་དི་ཡ་ཏི, ཨ་བྱཱ་པཱ་དེ་ན བྱཱ་པཱ་ད་སྶ པ་ཝ་ཏྟཾ པ་རི་ཡཱ་དི་ཡ་ཏི, ཨཱ་ལོ་ཀ་ས་ཉྙཱ་ཡ ཐི་ན་མི་དྡྷ་སྶ པ་ཝ་ཏྟཾ པ་རི་ཡཱ་དི་ཡ་ཏི, ཨ་ཝི་ཀྑེ་པེ་ན ཨུ་དྡྷ་ཙྩ་སྶ པ་ཝ་ཏྟཾ པ་རི་ཡཱ་དི་ཡ་ཏི, དྷ་མྨ་ཝ་ཝ་ཏྠཱ་ནེ་ན ཝི་ཙི་ཀི་ཙྪཱ་ཡ པ་ཝ་ཏྟཾ པ་རི་ཡཱ་དི་ཡ་ཏི, ཉཱ་ཎེ་ན ཨ་ཝི་ཛྫཱ་ཡ པ་ཝ་ཏྟཾ པ་རི་ཡཱ་དི་ཡ་ཏི, པཱ་མོ་ཛྫེ་ན ཨ་ར་ཏི་ཡཱ པ་ཝ་ཏྟཾ པ་རི་ཡཱ་དི་ཡ་ཏི, པ་ཋ་མེ་ན ཛྷཱ་ནེ་ན ནཱི་ཝ་ར་ཎཱ་ནཾ པ་ཝ་ཏྟཾ པ་རི་ཡཱ་དི་ཡ་ཏི…པེ… ཨ་ར་ཧ་ཏྟ་མ་གྒེ་ན ས་བྦ་ཀི་ལེ་སཱ་ནཾ པ་ཝ་ཏྟཾ པ་རི་ཡཱ་དི་ཡ་ཏི. ཨ་ཐ ཝཱ པ་ན ས་མྤ་ཛཱ་ན་སྶ ཨ་ནུ་པཱ་དི་སེ་སཱ་ཡ ནི་བྦཱ་ན་དྷཱ་ཏུ་ཡཱ པ་རི་ནི་བྦཱ་ཡ་ནྟ་སྶ ཨི་དཾ ཙེ་ཝ ཙ་ཀྑུ་པ་ཝ་ཏྟཾ པ་རི་ཡཱ་དི་ཡ་ཏི, ཨ་ཉྙ་ཉྩ ཙ་ཀྑུ་པ་ཝ་ཏྟཾ ན ཨུ་པྤ་ཛྫ་ཏི. ཨི་ད་ཉྩེ་ཝ སོ་ཏ་པ་ཝ་ཏྟཾ…པེ… གྷཱ་ན་པ་ཝ་ཏྟཾ… ཛི་ཝ྄ཧཱ་པ་ཝ་ཏྟཾ… ཀཱ་ཡ་པ་ཝ་ཏྟཾ… མ་ནོ་པ་ཝ་ཏྟཾ པ་རི་ཡཱ་དི་ཡ་ཏི, ཨ་ཉྙ་ཉྩ མ་ནོ་པ་ཝ་ཏྟཾ ན ཨུ་པྤ་ཛྫ་ཏི. ཨི་དཾ ས་མྤ་ཛཱ་ན་སྶ པ་ཝ་ཏྟ་པ་རི་ཡཱ་དཱ་ནཾ ས་བྦ་སུ་ཉྙ་ཏཱ་ནཾ པ་ར་མ་ཏྠ་སུ་ཉྙ་ནྟི.

སུ་ཉྙ་ཀ་ཐཱ ནི་ཊྛི་ཏཱ.

ཡུ་ག་ན་དྡྷ་ཝ་གྒོ དུ་ཏི་ཡོ.