༨. ཝི་པ་ལླཱ་ས་ཀ་ཐཱ
༢༣༦. པུ་རི་མ་ནི་དཱ་ནཾ. ‘‘ཙ་ཏྟཱ་རོ་མེ, བྷི་ཀྑ་ཝེ [ཨ. ནི. ༤.༤༩ པ་སྶི་ཏ་བྦཱ], ས་ཉྙཱ་ཝི་པ་ལླཱ་སཱ ཙི་ཏྟ་ཝི་པ་ལླཱ་སཱ དི་ཊྛི་ཝི་པ་ལླཱ་སཱ. ཀ་ཏ་མེ ཙ་ཏྟཱ་རོ? ཨ་ནི་ཙྩེ, བྷི་ཀྑ་ཝེ, ནི་ཙྩ་ནྟི ས་ཉྙཱ་ཝི་པ་ལླཱ་སོ ཙི་ཏྟ་ཝི་པ་ལླཱ་སོ དི་ཊྛི་ཝི་པ་ལླཱ་སོ. དུ་ཀྑེ, བྷི་ཀྑ་ཝེ, སུ་ཁ་ནྟི ས་ཉྙཱ་ཝི་པ་ལླཱ་སོ ཙི་ཏྟ་ཝི་པ་ལླཱ་སོ དི་ཊྛི་ཝི་པ་ལླཱ་སོ. ཨ་ན་ཏྟ་ནི, བྷི་ཀྑ་ཝེ, ཨ་ཏྟཱ་ཏི ས་ཉྙཱ་ཝི་པ་ལླཱ་སོ ཙི་ཏྟ་ཝི་པ་ལླཱ་སོ དི་ཊྛི་ཝི་པ་ལླཱ་སོ. ཨ་སུ་བྷེ, བྷི་ཀྑ་ཝེ, སུ་བྷ་ནྟི ས་ཉྙཱ་ཝི་པ་ལླཱ་སོ ཙི་ཏྟ་ཝི་པ་ལླཱ་སོ དི་ཊྛི་ཝི་པ་ལླཱ་སོ. ཨི་མེ ཁོ, བྷི་ཀྑ་ཝེ, ཙ་ཏྟཱ་རོ ས་ཉྙཱ་ཝི་པ་ལླཱ་སཱ ཙི་ཏྟ་ཝི་པ་ལླཱ་སཱ དི་ཊྛི་ཝི་པ་ལླཱ་སཱ.
‘‘ཙ་ཏྟཱ་རོ་མེ, བྷི་ཀྑ་ཝེ, ན་ས་ཉྙཱ་ཝི་པ་ལླཱ་སཱ ན་ཙི་ཏྟ་ཝི་པ་ལླཱ་སཱ ན་དི་ཊྛི་ཝི་པ་ལླཱ་སཱ. ཀ་ཏ་མེ ཙ་ཏྟཱ་རོ? ཨ་ནི་ཙྩེ, བྷི་ཀྑ་ཝེ, ཨ་ནི་ཙྩ་ནྟི ན་ས་ཉྙཱ་ཝི་པ་ལླཱ་སོ ན་ཙི་ཏྟ་ཝི་པ་ལླཱ་སོ ན་དི་ཊྛི་ཝི་པ་ལླཱ་སོ. དུ་ཀྑེ, བྷི་ཀྑ་ཝེ, དུ་ཀྑ་ནྟི ན་ས་ཉྙཱ་ཝི་པ་ལླཱ་སོ ན་ཙི་ཏྟ་ཝི་པ་ལླཱ་སོ ན་དི་ཊྛི་ཝི་པ་ལླཱ་སོ. ཨ་ན་ཏྟ་ནི, བྷི་ཀྑ་ཝེ, ཨ་ན་ཏྟཱ་ཏི ན་ས་ཉྙཱ་ཝི་པ་ལླཱ་སོ ན་ཙི་ཏྟ་ཝི་པ་ལླཱ་སོ ན་དི་ཊྛི་ཝི་པ་ལླཱ་སོ. ཨ་སུ་བྷེ, བྷི་ཀྑ་ཝེ, ཨ་སུ་བྷ་ནྟི ན་ས་ཉྙཱ་ཝི་པ་ལླཱ་སོ ན་ཙི་ཏྟ་ཝི་པ་ལླཱ་སོ ན་དི་ཊྛི་ཝི་པ་ལླཱ་སོ. ཨི་མེ ཁོ, བྷི་ཀྑ་ཝེ, ཙ་ཏྟཱ་རོ ན་ས་ཉྙཱ་ཝི་པ་ལླཱ་སཱ ན་ཙི་ཏྟ་ཝི་པ་ལླཱ་སཱ ན་དི་ཊྛི་ཝི་པ་ལླཱ་སཱ’’ཏི.
‘‘ཨ་ནི་ཙྩེ ནི་ཙྩ་ས་ཉྙི་ནོ, དུ་ཀྑེ ཙ སུ་ཁ་ས་ཉྙི་ནོ;
ཨ་ན་ཏྟ་ནི ཙ ཨ་ཏྟཱ་ཏི [ཨ་ཏྟ་ས་ཉྙི་ནོ (སྱཱ.) ཨ. ནི. ༤.༤༩ པ་སྶི་ཏ་བྦཱ], ཨ་སུ་བྷེ སུ་བྷ་ས་ཉྙི་ནོ;
མི་ཙྪཱ་དི་ཊྛི་ཧ་ཏཱ ས་ཏྟཱ, ཁི་ཏྟ་ཙི་ཏྟཱ ཝི་ས་ཉྙི་ནོ.
‘‘ཏེ ཡོ་ག་ཡུ་ཏྟཱ མཱ་ར་སྶ, ཨ་ཡོ་ག་ཀྑེ་མི་ནོ ཛ་ནཱ;
ས་ཏྟཱ ག་ཙྪ་ནྟི སཾ་སཱ་རཾ, ཛཱ་ཏི་མ་ར་ཎ་གཱ་མི་ནོ.
‘‘ཡ་དཱ ཙ བུ་དྡྷཱ ལོ་ཀ་སྨིཾ, ཨུ་པྤ་ཛྫ་ནྟི པ་བྷ་ངྐ་རཱ;
ཏེ ཨི་མཾ དྷ་མྨཾ པ་ཀཱ་སེ་ནྟི, དུ་ཀྑཱུ་པ་ས་མ་གཱ་མི་ནཾ.
‘‘ཏེ་སཾ སུ་ཏྭཱ་ན ས་པྤ་ཉྙཱ, ས་ཙི་ཏྟཾ པ་ཙྩ་ལ་དྡྷུ [པ་ཙྩ་ལ་དྡྷུཾ (སྱཱ.), པ་ཙྩ་ལ་དྡྷཱ ཨ. ནི. ༤.༤༩] ཏེ;
ཨ་ནི་ཙྩཾ ཨ་ནི་ཙྩ་ཏོ ད་ཀྑུཾ, དུ་ཀྑ་མ་དྡ་ཀྑུ དུ་ཀྑ་ཏོ.
‘‘ཨ་ན་ཏྟ་ནི ཨ་ན་ཏྟཱ་ཏི, ཨ་སུ་བྷཾ ཨ་སུ་བྷ་ཏ་དྡ་སུཾ;
ས་མྨཱ་དི་ཊྛི་ས་མཱ་དཱ་ནཱ, ས་བྦཾ དུ་ཀྑཾ ཨུ་པ་ཙྩ་གུ’’ནྟི.
ཨི་མེ ཙ་ཏྟཱ་རོ ཝི་པ་ལླཱ་སཱ དི་ཊྛི་ས་མྤ་ནྣ་སྶ པུ་གྒ་ལ་སྶ པ་ཧཱི་ནཱ, ཨ་པྤ་ཧཱི་ནཱ་ཏི. ཀེ་ཙི པ་ཧཱི་ནཱ, ཀེ་ཙི ཨ་པྤ་ཧཱི་ནཱ? ཨ་ནི་ཙྩེ ནི་ཙྩ་ནྟི ས་ཉྙཱ་ཝི་པ་ལླཱ་སོ ཙི་ཏྟ་ཝི་པ་ལླཱ་སོ དི་ཊྛི་ཝི་པ་ལླཱ་སོ པ་ཧཱི་ནོ. དུ་ཀྑེ སུ་ཁ་ནྟི ས་ཉྙཱ ཨུ་པྤ་ཛྫ་ཏི, ཙི་ཏྟཾ ཨུ་པྤ་ཛྫ་ཏི, དི་ཊྛི་ཝི་པ་ལླཱ་སོ པ་ཧཱི་ནོ. ཨ་ན་ཏྟ་ནི ཨ་ཏྟཱ་ཏི ས་ཉྙཱ་ཝི་པ་ལླཱ་སོ ཙི་ཏྟ་ཝི་པ་ལླཱ་སོ དི་ཊྛི་ཝི་པ་ལླཱ་སོ པ་ཧཱི་ནོ. ཨ་སུ་བྷེ སུ་བྷ་ནྟི ས་ཉྙཱ ཨུ་པྤ་ཛྫ་ཏི, ཙི་ཏྟཾ ཨུ་པྤ་ཛྫ་ཏི, དི་ཊྛི་ཝི་པ་ལླཱ་སོ པ་ཧཱི་ནོ. དྭཱི་སུ ཝ་ཏྠཱུ་སུ ཚ ཝི་པ་ལླཱ་སཱ པ་ཧཱི་ནཱ. དྭཱི་སུ ཝ་ཏྠཱུ་སུ དྭེ ཝི་པ་ལླཱ་སཱ པ་ཧཱི་ནཱ, ཙ་ཏྟཱ་རོ ཝི་པ་ལླཱ་སཱ ཨ་པྤ་ཧཱི་ནཱ. ཙ་ཏཱུ་སུ ཝ་ཏྠཱུ་སུ ཨ་ཊྛ ཝི་པ་ལླཱ་སཱ པ་ཧཱི་ནཱ, ཙ་ཏྟཱ་རོ ཝི་པ་ལླཱ་སཱ ཨ་པྤ་ཧཱི་ནཱ་ཏི.
ཝི་པ་ལླཱ་ས་ཀ་ཐཱ ནི་ཊྛི་ཏཱ.