༥. ས་ཏོ་ཀཱ་རི་ཉཱ་ཎ་ནི་དྡེ་སོ
༡༦༣. ཀ་ཏ་མཱ་ནི བཱ་ཏྟིཾ་ས ས་ཏོ་ཀཱ་རི་སྶ ཉཱ་ཎཱ་ནི? ཨི་དྷ བྷི་ཀྑུ ཨ་ར་ཉྙ་ག་ཏོ ཝཱ རུ་ཀྑ་མཱུ་ལ་ག་ཏོ ཝཱ སུ་ཉྙཱ་གཱ་ར་ག་ཏོ ཝཱ ནི་སཱི་ད་ཏི པ་ལླ་ངྐཾ ཨཱ་བྷུ་ཛི་ཏྭཱ ཨུ་ཛུཾ ཀཱ་ཡཾ པ་ཎི་དྷཱ་ཡ པ་རི་མུ་ཁཾ ས་ཏིཾ ཨུ་པ་ཊྛ་པེ་ཏྭཱ. སོ ས་ཏོ་ཝ ཨ་སྶ་ས་ཏི ས་ཏོ པ་སྶ་ས་ཏི. དཱི་གྷཾ ཝཱ ཨ་སྶ་ས་ནྟོ ‘‘དཱི་གྷཾ ཨ་སྶ་སཱ་མཱི’’ཏི པ་ཛཱ་ནཱ་ཏི. དཱི་གྷཾ ཝཱ པ་སྶ་ས་ནྟོ ‘‘དཱི་གྷཾ པ་སྶ་སཱ་མཱི’’ཏི པ་ཛཱ་ནཱ་ཏི. ར་སྶཾ ཝཱ ཨ་སྶ་ས་ནྟོ ‘‘ར་སྶཾ ཨ་སྶ་སཱ་མཱི’’ཏི པ་ཛཱ་ནཱ་ཏི. ར་སྶཾ ཝཱ པ་སྶ་ས་ནྟོ ‘‘ར་སྶཾ པ་སྶ་སཱ་མཱི’’ཏི པ་ཛཱ་ནཱ་ཏི. ‘‘ས་བྦ་ཀཱ་ཡ་པ་ཊི་སཾ་ཝེ་དཱི ཨ་སྶ་སི་སྶཱ་མཱི’’ཏི སི་ཀྑ་ཏི. ‘‘ས་བྦ་ཀཱ་ཡ་པ་ཊི་སཾ་ཝེ་དཱི པ་སྶ་སི་སྶཱ་མཱི’’ཏི སི་ཀྑ་ཏི. ‘‘པ་སྶ་མྦྷ་ཡཾ ཀཱ་ཡ་ས་ངྑཱ་རཾ ཨ་སྶ་སི་སྶཱ་མཱི’’ཏི སི་ཀྑ་ཏི. ‘‘པ་སྶ་མྦྷ་ཡཾ ཀཱ་ཡ་ས་ངྑཱ་རཾ པ་སྶ་སི་སྶཱ་མཱི’’ཏི སི་ཀྑ་ཏི. པཱི་ཏི་པ་ཊི་སཾ་ཝེ་དཱི…པེ… སུ་ཁ་པ་ཊི་སཾ་ཝེ་དཱི… ཙི་ཏྟ་ས་ངྑཱ་ར་པ་ཊི་སཾ་ཝེ་དཱི … པ་སྶ་མྦྷ་ཡཾ ཙི་ཏྟ་ས་ངྑཱ་རཾ… ཙི་ཏྟ་པ་ཊི་སཾ་ཝེ་དཱི… ཨ་བྷི་པྤ་མོ་ད་ཡཾ ཙི་ཏྟཾ… ས་མཱ་ད་ཧཾ ཙི་ཏྟཾ… ཝི་མོ་ཙ་ཡཾ ཙི་ཏྟཾ… ཨ་ནི་ཙྩཱ་ནུ་པ་སྶཱི… ཝི་རཱ་གཱ་ནུ་པ་སྶཱི… ནི་རོ་དྷཱ་ནུ་པ་སྶཱི… ‘‘པ་ཊི་ནི་སྶ་གྒཱ་ནུ་པ་སྶཱི ཨ་སྶ་སི་སྶཱ་མཱི’’ཏི སི་ཀྑ་ཏི. ‘‘པ་ཊི་ནི་སྶ་གྒཱ་ནུ་པ་སྶཱི པ་སྶ་སི་སྶཱ་མཱི’’ཏི སི་ཀྑ་ཏི.
༡༦༤. ཨི་དྷཱཏི ཨི་མི་སྶཱ དི་ཊྛི་ཡཱ, ཨི་མི་སྶཱ ཁ་ནྟི་ཡཱ, ཨི་མི་སྶཱ རུ་ཙི་ཡཱ, ཨི་མ་སྨིཾ ཨཱ་དཱ་ཡེ, ཨི་མ་སྨིཾ དྷ་མྨེ, ཨི་མ་སྨིཾ ཝི་ན་ཡེ, ཨི་མ་སྨིཾ དྷ་མྨ་ཝི་ན་ཡེ, ཨི་མ་སྨིཾ པཱ་ཝ་ཙ་ནེ, ཨི་མ་སྨིཾ བྲ་ཧྨ་ཙ་རི་ཡེ, ཨི་མ་སྨིཾ ས་ཏྠུ་སཱ་ས་ནེ. ཏེ་ན ཝུ་ཙྩ་ཏི – ‘‘ཨི་དྷཱ’’ཏི. བྷི་ཀྑཱུཏི པུ་ཐུ་ཛྫ་ན་ཀ་ལྱཱ་ཎ་ཀོ ཝཱ ཧོ་ཏི བྷི་ཀྑུ སེ་ཀྑོ ཝཱ ཨ་ར་ཧཱ ཝཱ ཨ་ཀུ་པྤ་དྷ་མྨོ. ཨ་ར་ཉྙནྟི ནི་ཀྑ་མི་ཏྭཱ བ་ཧི ཨི་ནྡ་ཁཱི་ལཱ ས་བྦ་མེ་ཏཾ ཨ་ར་ཉྙཾ. རུ་ཀྑ་མཱུ་ལནྟི ཡ་ཏྠ བྷི་ཀྑུ་ནོ ཨཱ་ས་ནཾ པ་ཉྙ་ཏྟཾ ཧོ་ཏི མ་ཉྩོ ཝཱ པཱི་ཋཾ ཝཱ བྷི་སི ཝཱ ཏ་ཊྚི་ཀཱ ཝཱ ཙ་མྨ་ཁ་ཎྜོ ཝཱ ཏི་ཎ་ས་ནྠ་རོ [ཏི་ཎ་ས་ཎྛ་རོ (སྱཱ.)] ཝཱ པ་ཎྞ་ས་ནྠ་རོ ཝཱ པ་ལཱ་ལ་ས་ནྠ་རོ [པ་ལཱ་ས་ས་ཎྛ་རོ (སྱཱ.)] ཝཱ, ཏ་ཏྠ བྷི་ཀྑུ ཙ་ངྐ་མ་ཏི ཝཱ ཏི་ཊྛ་ཏི ཝཱ ནི་སཱི་ད་ཏི ཝཱ སེ་ཡྻཾ ཝཱ ཀ་པྤེ་ཏི. སུ་ཉྙནྟི ཀེ་ན་ཙི ཨ་ནཱ་ཀི་ཎྞཾ ཧོ་ཏི ག་ཧ་ཊྛེ་ཧི ཝཱ པ་བྦ་ཛི་ཏེ་ཧི ཝཱ. ཨ་གཱ་རནྟི [ཨཱ་གཱ་ར་ནྟི (སྱཱ.)] ཝི་ཧཱ་རོ ཨ་ཌྜྷ་ཡོ་གོ པཱ་སཱ་དོ ཧ་མྨི་ཡཾ གུ་ཧཱ. ནི་སཱི་ད་ཏི པ་ལླ་ངྐཾ ཨཱ་བྷུ་ཛི་ཏྭཱཏི ནི་སི་ནྣོ ཧོ་ཏི པ་ལླ་ངྐཾ ཨཱ་བྷུ་ཛི་ཏྭཱ. ཨུ་ཛུཾ ཀཱ་ཡཾ པ་ཎི་དྷཱ་ཡཱཏི ཨུ་ཛུ་ཀོ ཧོ་ཏི ཀཱ་ཡོ ཋི་ཏོ [པ་ནི་དྷི་ཏོ (སྱཱ.)] སུ་པ་ཎི་ཧི་ཏོ. པ་རི་མུ་ཁཾ ས་ཏིཾ ཨུ་པ་ཊྛ་པེ་ཏྭཱཏི. པ་རཱིཏི པ་རི་གྒ་ཧ་ཊྛོ. མུ་ཁནྟི ནི་ཡྻཱ་ན་ཊྛོ. ས་ཏཱིཏི ཨུ་པ་ཊྛཱ་ན་ཊྛོ. ཏེ་ན ཝུ་ཙྩ་ཏི – ‘‘པ་རི་མུ་ཁཾ ས་ཏིཾ ཨུ་པ་ཊྛ་པེ་ཏྭཱ’’ཏི.
༡༦༥. ས་ཏོ་ཝ ཨ་སྶ་ས་ཏི, ས་ཏོ པ་སྶ་ས་ཏཱིཏི བཱ་ཏྟིཾ་སཱ་ཡ ཨཱ་ཀཱ་རེ་ཧི ས་ཏོ ཀཱ་རཱི ཧོ་ཏི. དཱི་གྷཾ ཨ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ ས་ཏི ཨུ་པ་ཊྛི་ཏཱ ཧོ་ཏི. ཏཱ་ཡ ས་ཏི་ཡཱ ཏེ་ན ཉཱ་ཎེ་ན ས་ཏོ ཀཱ་རཱི ཧོ་ཏི. དཱི་གྷཾ པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ ས་ཏི ཨུ་པ་ཊྛི་ཏཱ ཧོ་ཏི. ཏཱ་ཡ ས་ཏི་ཡཱ ཏེ་ན ཉཱ་ཎེ་ན ས་ཏོ ཀཱ་རཱི ཧོ་ཏི. ར་སྶཾ ཨ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ ས་ཏི ཨུ་པ་ཊྛི་ཏཱ ཧོ་ཏི. ཏཱ་ཡ ས་ཏི་ཡཱ ཏེ་ན ཉཱ་ཎེ་ན ས་ཏོ ཀཱ་རཱི ཧོ་ཏི. ར་སྶཾ པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ ས་ཏི ཨུ་པ་ཊྛི་ཏཱ ཧོ་ཏི. ཏཱ་ཡ ས་ཏི་ཡཱ ཏེ་ན ཉཱ་ཎེ་ན ས་ཏོ ཀཱ་རཱི ཧོ་ཏི…པེ… པ་ཊི་ནི་སྶ་གྒཱ་ནུ་པ་སྶཱི ཨ་སྶཱ་ས་ཝ་སེ་ན པ་ཊི་ནི་སྶ་གྒཱ་ནུ་པ་སྶཱི པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ ས་ཏི ཨུ་པ་ཊྛི་ཏཱ ཧོ་ཏི. ཏཱ་ཡ ས་ཏི་ཡཱ ཏེ་ན ཉཱ་ཎེ་ན ས་ཏོ ཀཱ་རཱི ཧོ་ཏི.
པ་ཋ་མ་ཙ་ཏུ་ཀྐ་ནི་དྡེ་སོ
༡༦༦. ཀ་ཐཾ དཱི་གྷཾ ཨ་སྶ་ས་ནྟོ ‘‘དཱི་གྷཾ ཨ་སྶ་སཱ་མཱི’’ཏི པ་ཛཱ་ནཱ་ཏི, དཱི་གྷཾ པ་སྶ་ས་ནྟོ ‘‘དཱི་གྷཾ པ་སྶ་སཱ་མཱི’’ཏི པ་ཛཱ་ནཱ་ཏི? དཱི་གྷཾ ཨ་སྶཱ་སཾ ཨ་དྡྷཱ་ན་ས་ངྑཱ་ཏེ ཨ་སྶ་ས་ཏི, དཱི་གྷཾ པ་སྶཱ་སཾ ཨ་དྡྷཱ་ན་ས་ངྑཱ་ཏེ པ་སྶ་ས་ཏི, དཱི་གྷཾ ཨ་སྶཱ་ས་པ་སྶཱ་སཾ ཨ་དྡྷཱ་ན་ས་ངྑཱ་ཏེ ཨ་སྶ་ས་ཏི་པི པ་སྶ་ས་ཏི་པི. དཱི་གྷཾ ཨ་སྶཱ་ས་པ་སྶཱ་སཾ ཨ་དྡྷཱ་ན་ས་ངྑཱ་ཏེ ཨ་སྶ་ས་ཏོ་པི པ་སྶ་ས་ཏོ་པི ཚ་ནྡོ ཨུ་པྤ་ཛྫ་ཏི. ཚ་ནྡ་ཝ་སེ་ན ཏ་ཏོ སུ་ཁུ་མ་ཏ་རཾ དཱི་གྷཾ ཨ་སྶཱ་སཾ ཨ་དྡྷཱ་ན་ས་ངྑཱ་ཏེ ཨ་སྶ་ས་ཏི, ཚ་ནྡ་ཝ་སེ་ན ཏ་ཏོ སུ་ཁུ་མ་ཏ་རཾ དཱི་གྷཾ པ་སྶཱ་སཾ ཨ་དྡྷཱ་ན་ས་ངྑཱ་ཏེ པ་སྶ་ས་ཏི, ཚ་ནྡ་ཝ་སེ་ན ཏ་ཏོ སུ་ཁུ་མ་ཏ་རཾ དཱི་གྷཾ ཨ་སྶཱ་ས་པ་སྶཱ་སཾ ཨ་དྡྷཱ་ན་ས་ངྑཱ་ཏེ ཨ་སྶ་ས་ཏི་པི པ་སྶ་ས་ཏི་པི. ཚ་ནྡ་ཝ་སེ་ན ཏ་ཏོ སུ་ཁུ་མ་ཏ་རཾ དཱི་གྷཾ ཨ་སྶཱ་ས་པ་སྶཱ་སཾ ཨ་དྡྷཱ་ན་ས་ངྑཱ་ཏེ ཨ་སྶ་ས་ཏོ་པི པ་སྶ་ས་ཏོ་པི པཱ་མོ་ཛྫཾ ཨུ་པྤ་ཛྫ་ཏི. པཱ་མོ་ཛྫ་ཝ་སེ་ན ཏ་ཏོ སུ་ཁུ་མ་ཏ་རཾ དཱི་གྷཾ ཨ་སྶཱ་སཾ ཨ་དྡྷཱ་ན་ས་ངྑཱ་ཏེ ཨ་སྶ་ས་ཏི, པཱ་མོ་ཛྫ་ཝ་སེ་ན ཏ་ཏོ སུ་ཁུ་མ་ཏ་རཾ དཱི་གྷཾ པ་སྶཱ་སཾ ཨ་དྡྷཱ་ན་ས་ངྑཱ་ཏེ པ་སྶ་ས་ཏི, པཱ་མོ་ཛྫ་ཝ་སེ་ན ཏ་ཏོ སུ་ཁུ་མ་ཏ་རཾ དཱི་གྷཾ ཨ་སྶཱ་ས་པ་སྶཱ་སཾ ཨ་དྡྷཱ་ན་ས་ངྑཱ་ཏེ ཨ་སྶ་ས་ཏི་པི པ་སྶ་ས་ཏི་པི. པཱ་མོ་ཛྫ་ཝ་སེ་ན ཏ་ཏོ སུ་ཁུ་མ་ཏ་རཾ དཱི་གྷཾ ཨ་སྶཱ་ས་པ་སྶཱ་སཾ ཨ་དྡྷཱ་ན་ས་ངྑཱ་ཏེ ཨ་སྶ་ས་ཏོ་པི པ་སྶ་ས་ཏོ་པི དཱི་གྷཾ ཨ་སྶཱ་ས་པ་སྶཱ་སཱ་པི ཙི་ཏྟཾ ཝི་ཝ་ཏྟ་ཏི, ཨུ་པེ་ཀྑཱ ས་ཎྛཱ་ཏི. ཨི་མེ་ཧི ན་ཝ་ཧཱ་ཀཱ་རེ་ཧི དཱི་གྷཾ ཨ་སྶཱ་ས་པ་སྶཱ་སཱ ཀཱ་ཡོ. ཨུ་པ་ཊྛཱ་ནཾ ས་ཏི. ཨ་ནུ་པ་སྶ་ནཱ ཉཱ་ཎཾ. ཀཱ་ཡོ ཨུ་པ་ཊྛཱ་ནཾ, ནོ ས་ཏི; ས་ཏི ཨུ་པ་ཊྛཱ་ན་ཉྩེ་ཝ ས་ཏི ཙ. ཏཱ་ཡ ས་ཏི་ཡཱ ཏེ་ན ཉཱ་ཎེ་ན ཏཾ ཀཱ་ཡཾ ཨ་ནུ་པ་སྶ་ཏི. ཏེ་ན ཝུ་ཙྩ་ཏི – ‘‘ཀཱ་ཡེ ཀཱ་ཡཱ་ནུ་པ་སྶ་ནཱ་ས་ཏི་པ་ཊྛཱ་ན་བྷཱ་ཝ་ནཱ’’ཏི.
༡༦༧. ཨ་ནུ་པ་སྶ་ཏཱིཏི ཀ་ཐཾ ཏཾ ཀཱ་ཡཾ ཨ་ནུ་པ་སྶ་ཏི? ཨ་ནི་ཙྩ་ཏོ ཨ་ནུ་པ་སྶ་ཏི, ནོ ནི་ཙྩ་ཏོ. དུ་ཀྑ་ཏོ ཨ་ནུ་པ་སྶ་ཏི, ནོ སུ་ཁ་ཏོ. ཨ་ན་ཏྟ་ཏོ ཨ་ནུ་པ་སྶ་ཏི, ནོ ཨ་ཏྟ་ཏོ. ནི་བྦི་ནྡ་ཏི, ནོ ན་ནྡ་ཏི. ཝི་ར་ཛྫ་ཏི, ནོ ར་ཛྫ་ཏི. ནི་རོ་དྷེ་ཏི, ནོ ས་མུ་དེ་ཏི. པ་ཊི་ནི་སྶ་ཛྫ་ཏི, ནོ ཨཱ་དི་ཡ་ཏི. ཨ་ནི་ཙྩ་ཏོ ཨ་ནུ་པ་སྶ་ནྟོ ནི་ཙྩ་ས་ཉྙཾ པ་ཛ་ཧ་ཏི. དུ་ཀྑ་ཏོ ཨ་ནུ་པ་སྶ་ནྟོ སུ་ཁ་ས་ཉྙཾ པ་ཛ་ཧ་ཏི. ཨ་ན་ཏྟ་ཏོ ཨ་ནུ་པ་སྶ་ནྟོ ཨ་ཏྟ་ས་ཉྙཾ པ་ཛ་ཧ་ཏི. ནི་བྦི་ནྡ་ནྟོ ན་ནྡིཾ པ་ཛ་ཧ་ཏི. ཝི་ར་ཛྫ་ནྟོ རཱ་གཾ པ་ཛ་ཧ་ཏི. ནི་རོ་དྷེ་ནྟོ ས་མུ་ད་ཡཾ པ་ཛ་ཧ་ཏི. པ་ཊི་ནི་སྶ་ཛྫ་ནྟོ ཨཱ་དཱ་ནཾ པ་ཛ་ཧ་ཏི. ཨེ་ཝཾ ཏཾ ཀཱ་ཡཾ ཨ་ནུ་པ་སྶ་ཏི.
བྷཱ་ཝ་ནཱཏི ཙ་ཏ་སྶོ བྷཱ་ཝ་ནཱ – ཏ་ཏྠ ཛཱ་ཏཱ་ནཾ དྷ་མྨཱ་ནཾ ཨ་ན་ཏི་ཝ་ཏྟ་ན་ཊྛེ་ན བྷཱ་ཝ་ནཱ, ཨི་ནྡྲི་ཡཱ་ནཾ ཨེ་ཀ་ར་ས་ཊྛེ་ན བྷཱ་ཝ་ནཱ, ཏ་དུ་པ་ག་ཝཱི་རི་ཡ་ཝཱ་ཧ་ན་ཊྛེ་ན བྷཱ་ཝ་ནཱ, ཨཱ་སེ་ཝ་ན་ཊྛེ་ན བྷཱ་ཝ་ནཱ. དཱི་གྷཾ ཨ་སྶཱ་ས་པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ ཝི་དི་ཏཱ ཝེ་ད་ནཱ ཨུ་པྤ་ཛྫ་ནྟི, ཝི་དི་ཏཱ ཨུ་པ་ཊྛ་ཧ་ནྟི, ཝི་དི་ཏཱ ཨ་བྦྷ་ཏྠཾ ག་ཙྪ་ནྟི. ཝི་དི་ཏཱ ས་ཉྙཱ ཨུ་པྤ་ཛྫ་ནྟི, ཝི་དི་ཏཱ ཨུ་པ་ཊྛ་ཧ་ནྟི, ཝི་དི་ཏཱ ཨ་བྦྷ་ཏྠཾ ག་ཙྪ་ནྟི. ཝི་དི་ཏཱ ཝི་ཏ་ཀྐཱ ཨུ་པྤ་ཛྫ་ནྟི, ཝི་དི་ཏཱ ཨུ་པ་ཊྛ་ཧ་ནྟི, ཝི་དི་ཏཱ ཨ་བྦྷ་ཏྠཾ ག་ཙྪ་ནྟི.
ཀ་ཐཾ ཝི་དི་ཏཱ ཝེ་ད་ནཱ ཨུ་པྤ་ཛྫ་ནྟི, ཝི་དི་ཏཱ ཨུ་པ་ཊྛ་ཧ་ནྟི, ཝི་དི་ཏཱ ཨ་བྦྷ་ཏྠཾ ག་ཙྪ་ནྟི? ཀ་ཐཾ ཝེ་ད་ནཱ་ཡ ཨུ་པྤཱ་དོ ཝི་དི་ཏོ ཧོ་ཏི? ཨ་ཝི་ཛྫཱ་ས་མུ་ད་ཡཱ ཝེ་ད་ནཱ་ས་མུ་ད་ཡོ་ཏི – པ་ཙྩ་ཡ་ས་མུ་ད་ཡ་ཊྛེ་ན ཝེ་ད་ནཱ་ཡ ཨུ་པྤཱ་དོ ཝི་དི་ཏོ ཧོ་ཏི. ཏ་ཎྷཱ་ས་མུ་ད་ཡཱ ཝེ་ད་ནཱ་ས་མུ་ད་ཡོ་ཏི… ཀ་མྨ་ས་མུ་ད་ཡཱ ཝེ་ད་ནཱ་ས་མུ་ད་ཡོ་ཏི… ཕ་སྶ་ས་མུ་ད་ཡཱ ཝེ་ད་ནཱ་ས་མུ་ད་ཡོ་ཏི པ་ཙྩ་ཡ་ས་མུ་ད་ཡ་ཊྛེ་ན ཝེ་ད་ནཱ་ཡ ཨུ་པྤཱ་དོ ཝི་དི་ཏོ ཧོ་ཏི. ནི་བྦ་ཏྟི་ལ་ཀྑ་ཎཾ པ་སྶ་ཏོ་པི ཝེ་ད་ནཱ་ཡ ཨུ་པྤཱ་དོ ཝི་དི་ཏོ ཧོ་ཏི. ཨེ་ཝཾ ཝེ་ད་ནཱ་ཡ ཨུ་པྤཱ་དོ ཝི་དི་ཏོ ཧོ་ཏི.
ཀ་ཐཾ ཝེ་ད་ནཱ་ཡ ཨུ་པ་ཊྛཱ་ནཾ ཝི་དི་ཏཾ ཧོ་ཏི? ཨ་ནི་ཙྩ་ཏོ མ་ན་སི་ཀ་རོ་ཏོ ཁ་ཡ་ཏུ་པ་ཊྛཱ་ནཾ ཝི་དི་ཏཾ ཧོ་ཏི. དུ་ཀྑ་ཏོ མ་ན་སི་ཀ་རོ་ཏོ བྷ་ཡ་ཏུ་པ་ཊྛཱ་ནཾ ཝི་དི་ཏཾ ཧོ་ཏི. ཨ་ན་ཏྟ་ཏོ མ་ན་སི་ཀ་རོ་ཏོ སུ་ཉྙ་ཏུ་པ་ཊྛཱ་ནཾ ཝི་དི་ཏཾ ཧོ་ཏི. ཨེ་ཝཾ ཝེ་ད་ནཱ་ཡ ཨུ་པ་ཊྛཱ་ནཾ ཝི་དི་ཏཾ ཧོ་ཏི.
ཀ་ཐཾ ཝེ་ད་ནཱ་ཡ ཨ་ཏྠ་ངྒ་མོ ཝི་དི་ཏོ ཧོ་ཏི? ཨ་ཝི་ཛྫཱ་ནི་རོ་དྷཱ ཝེ་ད་ནཱ་ནི་རོ་དྷོ་ཏི – པ་ཙྩ་ཡ་ནི་རོ་དྷ་ཊྛེ་ན ཝེ་ད་ནཱ་ཡ ཨ་ཏྠ་ངྒ་མོ ཝི་དི་ཏོ ཧོ་ཏི. ཏ་ཎྷཱ་ནི་རོ་དྷཱ ཝེ་ད་ནཱ་ནི་རོ་དྷོ་ཏི …པེ… ཀ་མྨ་ནི་རོ་དྷཱ ཝེ་ད་ནཱ་ནི་རོ་དྷོ་ཏི…པེ… ཕ་སྶ་ནི་རོ་དྷཱ ཝེ་ད་ནཱ་ནི་རོ་དྷོ་ཏི པ་ཙྩ་ཡ་ནི་རོ་དྷ་ཊྛེ་ན ཝེ་ད་ནཱ་ཡ ཨ་ཏྠ་ངྒ་མོ ཝི་དི་ཏོ ཧོ་ཏི. ཝི་པ་རི་ཎཱ་མ་ལ་ཀྑ་ཎཾ པ་སྶ་ཏོ་པི ཝེ་ད་ནཱ་ཡ ཨ་ཏྠ་ངྒ་མོ ཝི་དི་ཏོ ཧོ་ཏི. ཨེ་ཝཾ ཝེ་ད་ནཱ་ཡ ཨ་ཏྠ་ངྒ་མོ ཝི་དི་ཏོ ཧོ་ཏི. ཨེ་ཝཾ ཝི་དི་ཏཱ ཝེ་ད་ནཱ ཨུ་པྤ་ཛྫ་ནྟི, ཝི་དི་ཏཱ ཨུ་པ་ཊྛ་ཧ་ནྟི, ཝི་དི་ཏཱ ཨ་བྦྷ་ཏྠཾ ག་ཙྪ་ནྟི.
ཀ་ཐཾ ཝི་དི་ཏཱ ས་ཉྙཱ ཨུ་པྤ་ཛྫ་ནྟི, ཝི་དི་ཏཱ ཨུ་པ་ཊྛ་ཧ་ནྟི, ཝི་དི་ཏཱ ཨ་བྦྷ་ཏྠཾ ག་ཙྪ་ནྟི? ཀ་ཐཾ ས་ཉྙཱ་ཡ ཨུ་པྤཱ་དོ ཝི་དི་ཏོ ཧོ་ཏི? ཨ་ཝི་ཛྫཱ་ས་མུ་ད་ཡཱ ས་ཉྙཱ་ས་མུ་ད་ཡོ་ཏི – པ་ཙྩ་ཡ་ས་མུ་ད་ཡ་ཊྛེ་ན ས་ཉྙཱ་ཡ ཨུ་པྤཱ་དོ ཝི་དི་ཏོ ཧོ་ཏི. ཏ་ཎྷཱ་ས་མུ་ད་ཡཱ ས་ཉྙཱ་ས་མུ་ད་ཡོ་ཏི…པེ… ཀ་མྨ་ས་མུ་ད་ཡཱ ས་ཉྙཱ་ས་མུ་ད་ཡོ་ཏི…པེ… ཕ་སྶ་ས་མུ་ད་ཡཱ ས་ཉྙཱ་ས་མུ་ད་ཡོ་ཏི – པ་ཙྩ་ཡ་ས་མུ་ད་ཡ་ཊྛེ་ན ས་ཉྙཱ་ཡ ཨུ་པྤཱ་དོ ཝི་དི་ཏོ ཧོ་ཏི. ནི་བྦ་ཏྟི་ལ་ཀྑ་ཎཾ པ་སྶ་ཏོ་པི ས་ཉྙཱ་ཡ ཨུ་པྤཱ་དོ ཝི་དི་ཏོ ཧོ་ཏི. ཨེ་ཝཾ ས་ཉྙཱ་ཡ ཨུ་པྤཱ་དོ ཝི་དི་ཏོ ཧོ་ཏི.
ཀ་ཐཾ ས་ཉྙཱ་ཡ ཨུ་པ་ཊྛཱ་ནཾ ཝི་དི་ཏཾ ཧོ་ཏི? ཨ་ནི་ཙྩ་ཏོ མ་ན་སི་ཀ་རོ་ཏོ ཁ་ཡ་ཏུ་པ་ཊྛཱ་ནཾ ཝི་དི་ཏཾ ཧོ་ཏི. དུ་ཀྑ་ཏོ མ་ན་སི་ཀ་རོ་ཏོ བྷ་ཡ་ཏུ་པ་ཊྛཱ་ནཾ ཝི་དི་ཏཾ ཧོ་ཏི. ཨ་ན་ཏྟ་ཏོ མ་ན་སི་ཀ་རོ་ཏོ སུ་ཉྙ་ཏུ་པ་ཊྛཱ་ནཾ ཝི་དི་ཏཾ ཧོ་ཏི. ཨེ་ཝཾ ས་ཉྙཱ་ཡ ཨུ་པ་ཊྛཱ་ནཾ ཝི་དི་ཏཾ ཧོ་ཏི.
ཀ་ཐཾ ས་ཉྙཱ་ཡ ཨ་ཏྠ་ངྒ་མོ ཝི་དི་ཏོ ཧོ་ཏི? ཨ་ཝི་ཛྫཱ་ནི་རོ་དྷཱ ས་ཉྙཱ་ནི་རོ་དྷོ་ཏི – པ་ཙྩ་ཡ་ནི་རོ་དྷ་ཊྛེ་ན ས་ཉྙཱ་ཡ ཨ་ཏྠ་ངྒ་མོ ཝི་དི་ཏོ ཧོ་ཏི. ཏ་ཎྷཱ་ནི་རོ་དྷཱ ས་ཉྙཱ་ནི་རོ་དྷོ་ཏི…པེ… ཀ་མྨ་ནི་རོ་དྷཱ ས་ཉྙཱ་ནི་རོ་དྷོ་ཏི…པེ… ཕ་སྶ་ནི་རོ་དྷཱ ས་ཉྙཱ་ནི་རོ་དྷོ་ཏི – པ་ཙྩ་ཡ་ནི་རོ་དྷ་ཊྛེ་ན ས་ཉྙཱ་ཡ ཨ་ཏྠ་ངྒ་མོ ཝི་དི་ཏོ ཧོ་ཏི. ཝི་པ་རི་ཎཱ་མ་ལ་ཀྑ་ཎཾ པ་སྶ་ཏོ་པི ས་ཉྙཱ་ཡ ཨ་ཏྠ་ངྒ་མོ ཝི་དི་ཏོ ཧོ་ཏི. ཨེ་ཝཾ ས་ཉྙཱ་ཡ ཨ་ཏྠ་ངྒ་མོ ཝི་དི་ཏོ ཧོ་ཏི. ཨེ་ཝཾ ཝི་དི་ཏཱ ས་ཉྙཱ ཨུ་པྤ་ཛྫ་ནྟི, ཝི་དི་ཏཱ ཨུ་པ་ཊྛ་ཧ་ནྟི, ཝི་དི་ཏཱ ཨ་བྦྷ་ཏྠཾ ག་ཙྪ་ནྟི.
ཀ་ཐཾ ཝི་དི་ཏཱ ཝི་ཏ་ཀྐཱ ཨུ་པྤ་ཛྫ་ནྟི, ཝི་དི་ཏཱ ཨུ་པ་ཊྛ་ཧ་ནྟི, ཝི་དི་ཏཱ ཨ་བྦྷ་ཏྠཾ ག་ཙྪ་ནྟི? ཀ་ཐཾ ཝི་ཏ་ཀྐཱ་ནཾ ཨུ་པྤཱ་དོ ཝི་དི་ཏོ ཧོ་ཏི? ཨ་ཝི་ཛྫཱ་ས་མུ་ད་ཡཱ ཝི་ཏ་ཀྐ་ས་མུ་ད་ཡོ་ཏི – པ་ཙྩ་ཡ་ས་མུ་ད་ཡ་ཊྛེ་ན ཝི་ཏ་ཀྐཱ་ནཾ ཨུ་པྤཱ་དོ ཝི་དི་ཏོ ཧོ་ཏི. ཏ་ཎྷཱ་ས་མུ་ད་ཡཱ ཝི་ཏ་ཀྐ་ས་མུ་ད་ཡོ་ཏི…པེ… ཀ་མྨ་ས་མུ་ད་ཡཱ ཝི་ཏ་ཀྐ་ས་མུ་ད་ཡོ་ཏི…པེ… ས་ཉྙཱ་ས་མུ་ད་ཡཱ ཝི་ཏ་ཀྐ་ས་མུ་ད་ཡོ་ཏི – པ་ཙྩ་ཡ་ས་མུ་ད་ཡ་ཊྛེ་ན ཝི་ཏ་ཀྐཱ་ནཾ ཨུ་པྤཱ་དོ ཝི་དི་ཏོ ཧོ་ཏི. ནི་བྦ་ཏྟི་ལ་ཀྑ་ཎཾ པ་སྶ་ཏོ་པི ཝི་ཏ་ཀྐཱ་ནཾ ཨུ་པྤཱ་དོ ཝི་དི་ཏོ ཧོ་ཏི. ཨེ་ཝཾ ཝི་ཏ་ཀྐཱ་ནཾ ཨུ་པྤཱ་དོ ཝི་དི་ཏོ ཧོ་ཏི.
ཀ་ཐཾ ཝི་ཏ་ཀྐཱ་ནཾ ཨུ་པ་ཊྛཱ་ནཾ ཝི་དི་ཏཾ ཧོ་ཏི? ཨ་ནི་ཙྩ་ཏོ མ་ན་སི་ཀ་རོ་ཏོ ཁ་ཡ་ཏུ་པ་ཊྛཱ་ནཾ ཝི་དི་ཏཾ ཧོ་ཏི. དུ་ཀྑ་ཏོ མ་ན་སི་ཀ་རོ་ཏོ བྷ་ཡ་ཏུ་པ་ཊྛཱ་ནཾ ཝི་དི་ཏཾ ཧོ་ཏི. ཨ་ན་ཏྟ་ཏོ མ་ན་སི་ཀ་རོ་ཏོ སུ་ཉྙ་ཏུ་པ་ཊྛཱ་ནཾ ཝི་དི་ཏཾ ཧོ་ཏི. ཨེ་ཝཾ ཝི་ཏ་ཀྐཱ་ནཾ ཨུ་པ་ཊྛཱ་ནཾ ཝི་དི་ཏཾ ཧོ་ཏི.
ཀ་ཐཾ ཝི་ཏ་ཀྐཱ་ནཾ ཨ་ཏྠ་ངྒ་མོ ཝི་དི་ཏོ ཧོ་ཏི? ཨ་ཝི་ཛྫཱ་ནི་རོ་དྷཱ ཝི་ཏ་ཀྐ་ནི་རོ་དྷོ་ཏི – པ་ཙྩ་ཡ་ནི་རོ་དྷ་ཊྛེ་ན ཝི་ཏ་ཀྐཱ་ནཾ ཨ་ཏྠ་ངྒ་མོ ཝི་དི་ཏོ ཧོ་ཏི. ཏ་ཎྷཱ་ནི་རོ་དྷཱ ཝི་ཏ་ཀྐ་ནི་རོ་དྷོ་ཏི…པེ… ཀ་མྨ་ནི་རོ་དྷཱ ཝི་ཏ་ཀྐ་ནི་རོ་དྷོ་ཏི…པེ… ས་ཉྙཱ་ནི་རོ་དྷཱ ཝི་ཏ་ཀྐ་ནི་རོ་དྷོ་ཏི – པ་ཙྩ་ཡ་ནི་རོ་དྷ་ཊྛེ་ན ཝི་ཏ་ཀྐཱ་ནཾ ཨ་ཏྠ་ངྒ་མོ ཝི་དི་ཏོ ཧོ་ཏི. ཝི་པ་རི་ཎཱ་མ་ལ་ཀྑ་ཎཾ པ་སྶ་ཏོ་པི ཝི་ཏ་ཀྐཱ་ནཾ ཨ་ཏྠ་ངྒ་མོ ཝི་དི་ཏོ ཧོ་ཏི. ཨེ་ཝཾ ཝི་ཏ་ཀྐཱ་ནཾ ཨ་ཏྠ་ངྒ་མོ ཝི་དི་ཏོ ཧོ་ཏི. ཨེ་ཝཾ ཝི་དི་ཏཱ ཝི་ཏ་ཀྐཱ ཨུ་པྤ་ཛྫ་ནྟི, ཝི་དི་ཏཱ ཨུ་པ་ཊྛ་ཧ་ནྟི, ཝི་དི་ཏཱ ཨ་བྦྷ་ཏྠཾ ག་ཙྪ་ནྟི.
༡༦༨. དཱི་གྷཾ ཨ་སྶཱ་ས་པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ནྟོ ཨི་ནྡྲི་ཡཱ་ནི ས་མོ་དྷཱ་ནེ་ཏི, གོ་ཙ་ར་ཉྩ པ་ཛཱ་ནཱ་ཏི, ས་མ་ཏྠ་ཉྩ པ་ཊི་ཝི་ཛ྄ཛྷ་ཏི…པེ… མ་གྒཾ ས་མོ་དྷཱ་ནེ་ཏི, དྷ་མྨེ ས་མོ་དྷཱ་ནེ་ཏི, གོ་ཙ་ར་ཉྩ པ་ཛཱ་ནཱ་ཏི, ས་མ་ཏྠ་ཉྩ པ་ཊི་ཝི་ཛ྄ཛྷ་ཏི.
ཨི་ནྡྲི་ཡཱ་ནི ས་མོ་དྷཱ་ནེ་ཏཱིཏི ཀ་ཐཾ ཨི་ནྡྲི་ཡཱ་ནི ས་མོ་དྷཱ་ནེ་ཏི? ཨ་དྷི་མོ་ཀྑ་ཊྛེ་ན ས་དྡྷི་ནྡྲི་ཡཾ ས་མོ་དྷཱ་ནེ་ཏི, པ་གྒ་ཧ་ཊྛེ་ན ཝཱི་རི་ཡི་ནྡྲི་ཡཾ ས་མོ་དྷཱ་ནེ་ཏི, ཨུ་པ་ཊྛཱ་ན་ཊྛེ་ན ས་ཏི་ནྡྲི་ཡཾ ས་མོ་དྷཱ་ནེ་ཏི, ཨ་ཝི་ཀྑེ་པ་ཊྛེ་ན ས་མཱ་དྷི་ནྡྲི་ཡཾ ས་མོ་དྷཱ་ནེ་ཏི, ད་སྶ་ན་ཊྛེ་ན པ་ཉྙི་ནྡྲི་ཡཾ ས་མོ་དྷཱ་ནེ་ཏི. ཨ་ཡཾ པུ་གྒ་ལོ ཨི་མཱ་ནི ཨི་ནྡྲི་ཡཱ་ནི ཨི་མ་སྨིཾ ཨཱ་ར་མྨ་ཎེ ས་མོ་དྷཱ་ནེ་ཏི. ཏེ་ན ཝུ་ཙྩ་ཏི – ‘‘ཨི་ནྡྲི་ཡཱ་ནི ས་མོ་དྷཱ་ནེ་ཏཱི’’ཏི.
གོ་ཙ་ར་ཉྩ པ་ཛཱ་ནཱ་ཏཱིཏི ཡཾ ཏ་སྶ ཨཱ་ར་མྨ་ཎཾ, ཏཾ ཏ་སྶ གོ་ཙ་རཾ. ཡཾ ཏ་སྶ གོ་ཙ་རཾ, ཏཾ ཏ་སྶ ཨཱ་ར་མྨ་ཎཾ. པ་ཛཱ་ནཱ་ཏཱིཏི པུ་གྒ་ལོ. པ་ཛཱ་ན་ནཱ པ་ཉྙཱ.
ས་མནྟི ཨཱ་ར་མྨ་ཎ་སྶ ཨུ་པ་ཊྛཱ་ནཾ ས་མཾ, ཙི་ཏྟ་སྶ ཨ་ཝི་ཀྑེ་པོ ས་མཾ, ཙི་ཏྟ་སྶ ཨ་དྷི་ཊྛཱ་ནཾ ས་མཾ, ཙི་ཏྟ་སྶ ཝོ་དཱ་ནཾ ས་མཾ. ཨ་ཏྠོཏི ཨ་ན་ཝ་ཛྫ་ཊྛོ ནི་ཀྐི་ལེ་ས་ཊྛོ ཝོ་དཱ་ན་ཊྛོ པ་ར་མ་ཊྛོ. པ་ཊི་ཝི་ཛ྄ཛྷ་ཏཱིཏི ཨཱ་ར་མྨ་ཎ་སྶ ཨུ་པ་ཊྛཱ་ན་ཊྛཾ པ་ཊི་ཝི་ཛ྄ཛྷ་ཏི, ཙི་ཏྟ་སྶ ཨ་ཝི་ཀྑེ་པ་ཊྛཾ པ་ཊི་ཝི་ཛ྄ཛྷ་ཏི, ཙི་ཏྟ་སྶ ཨ་དྷི་ཊྛཱ་ན་ཊྛཾ པ་ཊི་ཝི་ཛ྄ཛྷ་ཏི, ཙི་ཏྟ་སྶ ཝོ་དཱ་ན་ཊྛཾ པ་ཊི་ཝི་ཛ྄ཛྷ་ཏི. ཏེ་ན ཝུ་ཙྩ་ཏི – ‘‘ས་མ་ཏྠ་ཉྩ པ་ཊི་ཝི་ཛ྄ཛྷ་ཏཱི’’ཏི.
བ་ལཱ་ནི ས་མོ་དྷཱ་ནེ་ཏཱིཏི ཀ་ཐཾ བ་ལཱ་ནི ས་མོ་དྷཱ་ནེ་ཏི? ཨ་སྶ་དྡྷི་ཡེ ཨ་ཀ་མྤི་ཡ་ཊྛེ་ན ས་དྡྷཱ་བ་ལཾ ས་མོ་དྷཱ་ནེ་ཏི, ཀོ་ས་ཛྫེ ཨ་ཀ་མྤི་ཡ་ཊྛེ་ན ཝཱི་རི་ཡ་བ་ལཾ ས་མོ་དྷཱ་ནེ་ཏི, པ་མཱ་དེ ཨ་ཀ་མྤི་ཡ་ཊྛེ་ན ས་ཏི་བ་ལཾ ས་མོ་དྷཱ་ནེ་ཏི, ཨུ་དྡྷ་ཙྩེ ཨ་ཀ་མྤི་ཡ་ཊྛེ་ན ས་མཱ་དྷི་བ་ལཾ ས་མོ་དྷཱ་ནེ་ཏི, ཨ་ཝི་ཛྫཱ་ཡ ཨ་ཀ་མྤི་ཡ་ཊྛེ་ན པ་ཉྙཱ་བ་ལཾ ས་མོ་དྷཱ་ནེ་ཏི. ཨ་ཡཾ པུ་གྒ་ལོ ཨི་མཱ་ནི བ་ལཱ་ནི ཨི་མ་སྨིཾ ཨཱ་ར་མྨ་ཎེ ས་མོ་དྷཱ་ནེ་ཏི. ཏེ་ན ཝུ་ཙྩ་ཏི – བ་ལཱ་ནི ས་མོ་དྷཱ་ནེ་ཏཱི་ཏི. གོ་ཙ་ར་ཉྩ པ་ཛཱ་ནཱ་ཏཱི་ཏི…པེ… ཏེ་ན ཝུ་ཙྩ་ཏི – ‘‘ས་མ་ཏྠ་ཉྩ པ་ཊི་ཝི་ཛ྄ཛྷ་ཏཱི’’ཏི.
བོ་ཛ྄ཛྷ་ངྒེ ས་མོ་དྷཱ་ནེ་ཏཱིཏི ཀ་ཐཾ བོ་ཛ྄ཛྷ་ངྒེ ས་མོ་དྷཱ་ནེ་ཏི? ཨུ་པ་ཊྛཱ་ན་ཊྛེ་ན ས་ཏི་ས་མྦོ་ཛ྄ཛྷ་ངྒཾ ས་མོ་དྷཱ་ནེ་ཏི, པ་ཝི་ཙ་ཡ་ཊྛེ་ན དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒཾ ས་མོ་དྷཱ་ནེ་ཏི, པ་གྒ་ཧ་ཊྛེ་ན ཝཱི་རི་ཡ་ས་མྦོ་ཛ྄ཛྷ་ངྒཾ ས་མོ་དྷཱ་ནེ་ཏི, ཕ་ར་ཎ་ཊྛེ་ན པཱི་ཏི་ས་མྦོ་ཛ྄ཛྷ་ངྒཾ ས་མོ་དྷཱ་ནེ་ཏི, ཨུ་པ་ས་མ་ཊྛེ་ན པ་སྶ་དྡྷི་ས་མྦོ་ཛ྄ཛྷ་ངྒཾ ས་མོ་དྷཱ་ནེ་ཏི, ཨ་ཝི་ཀྑེ་པ་ཊྛེ་ན ས་མཱ་དྷི་ས་མྦོ་ཛ྄ཛྷ་ངྒཾ ས་མོ་དྷཱ་ནེ་ཏི, པ་ཊི་ས་ངྑཱ་ན་ཊྛེ་ན ཨུ་པེ་ཀྑཱ་ས་མྦོ་ཛ྄ཛྷ་ངྒཾ ས་མོ་དྷཱ་ནེ་ཏི. ཨ་ཡཾ པུ་གྒ་ལོ ཨི་མེ བོ་ཛ྄ཛྷ་ངྒེ ཨི་མ་སྨིཾ ཨཱ་ར་མྨ་ཎེ ས་མོ་དྷཱ་ནེ་ཏི. ཏེ་ན ཝུ་ཙྩ་ཏི – ‘‘བོ་ཛ྄ཛྷ་ངྒེ ས་མོ་དྷཱ་ནེ་ཏཱི’’ཏི. གོ་ཙ་ར་ཉྩ པ་ཛཱ་ནཱ་ཏཱི་ཏི…པེ… ཏེ་ན ཝུ་ཙྩ་ཏི – ‘‘ས་མ་ཏྠ་ཉྩ པ་ཊི་ཝི་ཛ྄ཛྷ་ཏཱི’’ཏི.
མ་གྒཾ ས་མོ་དྷཱ་ནེ་ཏཱིཏི ཀ་ཐཾ མ་གྒཾ ས་མོ་དྷཱ་ནེ་ཏི? ད་སྶ་ན་ཊྛེ་ན ས་མྨཱ་དི་ཊྛིཾ ས་མོ་དྷཱ་ནེ་ཏི, ཨ་བྷི་ནི་རོ་པ་ན་ཊྛེ་ན ས་མྨཱ་ས་ངྐ་པྤཾ ས་མོ་དྷཱ་ནེ་ཏི, པ་རི་གྒ་ཧ་ཊྛེ་ན ས་མྨཱ་ཝཱ་ཙཾ ས་མོ་དྷཱ་ནེ་ཏི, ས་མུ་ཊྛཱ་ན་ཊྛེ་ན ས་མྨཱ་ཀ་མྨ་ནྟཾ ས་མོ་དྷཱ་ནེ་ཏི, ཝོ་དཱ་ན་ཊྛེ་ན ས་མྨཱ་ཨཱ་ཛཱི་ཝཾ ས་མོ་དྷཱ་ནེ་ཏི, པ་གྒ་ཧ་ཊྛེ་ན ས་མྨཱ་ཝཱ་ཡཱ་མཾ ས་མོ་དྷཱ་ནེ་ཏི, ཨུ་པ་ཊྛཱ་ན་ཊྛེ་ན ས་མྨཱ་ས་ཏིཾ ས་མོ་དྷཱ་ནེ་ཏི, ཨ་ཝི་ཀྑེ་པ་ཊྛེ་ན ས་མྨཱ་ས་མཱ་དྷིཾ ས་མོ་དྷཱ་ནེ་ཏི. ཨ་ཡཾ པུ་གྒ་ལོ ཨི་མཾ མ་གྒཾ ཨི་མ་སྨིཾ ཨཱ་ར་མྨ་ཎེ ས་མོ་དྷཱ་ནེ་ཏི. ཏེ་ན ཝུ་ཙྩ་ཏི – ‘‘མ་གྒཾ ས་མོ་དྷཱ་ནེ་ཏཱི’’ཏི. གོ་ཙ་ར་ཉྩ པ་ཛཱ་ནཱ་ཏཱི་ཏི…པེ… ཏེ་ན ཝུ་ཙྩ་ཏི – ‘‘ས་མ་ཏྠ་ཉྩ པ་ཊི་ཝི་ཛ྄ཛྷ་ཏཱི’’ཏི.
དྷ་མྨེ ས་མོ་དྷཱ་ནེ་ཏཱིཏི ཀ་ཐཾ དྷ་མྨེ ས་མོ་དྷཱ་ནེ་ཏི? ཨཱ་དྷི་པ་ཏེ་ཡྻ་ཊྛེ་ན ཨི་ནྡྲི་ཡཱ་ནི ས་མོ་དྷཱ་ནེ་ཏི, ཨ་ཀ་མྤི་ཡ་ཊྛེ་ན བ་ལཱ་ནི ས་མོ་དྷཱ་ནེ་ཏི, ནི་ཡྻཱ་ན་ཊྛེ་ན བོ་ཛ྄ཛྷ་ངྒེ ས་མོ་དྷཱ་ནེ་ཏི, ཧེ་ཏུ་ཊྛེ་ན མ་གྒཾ ས་མོ་དྷཱ་ནེ་ཏི, ཨུ་པ་ཊྛཱ་ན་ཊྛེ་ན ས་ཏི་པ་ཊྛཱ་ནཾ ས་མོ་དྷཱ་ནེ་ཏི, པ་ད་ཧ་ན་ཊྛེ་ན ས་མྨ་པྤ་དྷཱ་ནཾ ས་མོ་དྷཱ་ནེ་ཏི, ཨི་ཛ྄ཛྷ་ན་ཊྛེ་ན ཨི་དྡྷི་པཱ་དཾ ས་མོ་དྷཱ་ནེ་ཏི ཏ་ཐ་ཊྛེ་ན ས་ཙྩཾ ས་མོ་དྷཱ་ནེ་ཏི, ཨ་ཝི་ཀྑེ་པ་ཊྛེ་ན ས་མ་ཐཾ ས་མོ་དྷཱ་ནེ་ཏི, ཨ་ནུ་པ་སྶ་ན་ཊྛེ་ན ཝི་པ་སྶ་ནཾ ས་མོ་དྷཱ་ནེ་ཏི, ཨེ་ཀ་ར་ས་ཊྛེ་ན ས་མ་ཐ་ཝི་པ་སྶ་ནཾ ས་མོ་དྷཱ་ནེ་ཏི, ཨ་ན་ཏི་ཝ་ཏྟ་ན་ཊྛེ་ན ཡུ་ག་ན་དྡྷཾ ས་མོ་དྷཱ་ནེ་ཏི, སཾ་ཝ་ར་ཊྛེ་ན སཱི་ལ་ཝི་སུ་དྡྷིཾ ས་མོ་དྷཱ་ནེ་ཏི, ཨ་ཝི་ཀྑེ་པ་ཊྛེ་ན ཙི་ཏྟ་ཝི་སུ་དྡྷིཾ ས་མོ་དྷཱ་ནེ་ཏི, ད་སྶ་ན་ཊྛེ་ན དི་ཊྛི་ཝི་སུ་དྡྷིཾ ས་མོ་དྷཱ་ནེ་ཏི, ཝི་མུ་ཏྟ་ཊྛེ་ན ཝི་མོ་ཀྑཾ ས་མོ་དྷཱ་ནེ་ཏི, པ་ཊི་ཝེ་དྷ་ཊྛེ་ན ཝི་ཛྫཾ ས་མོ་དྷཱ་ནེ་ཏི, པ་རི་ཙྩཱ་ག་ཊྛེ་ན ཝི་མུ་ཏྟིཾ ས་མོ་དྷཱ་ནེ་ཏི, ས་མུ་ཙྪེ་ད་ཊྛེ་ན ཁ་ཡེ ཉཱ་ཎཾ ས་མོ་དྷཱ་ནེ་ཏི, པ་ཊི་པྤ་སྶ་དྡྷ་ཊྛེ་ན ཨ་ནུ་པྤཱ་དེ ཉཱ་ཎཾ ས་མོ་དྷཱ་ནེ་ཏི, ཚ་ནྡཾ མཱུ་ལ་ཊྛེ་ན ས་མོ་དྷཱ་ནེ་ཏི, མ་ན་སི་ཀཱ་རཾ ས་མུ་ཊྛཱ་ན་ཊྛེ་ན ས་མོ་དྷཱ་ནེ་ཏི, ཕ་སྶཾ ས་མོ་དྷཱ་ན་ཊྛེ་ན ས་མོ་དྷཱ་ནེ་ཏི, ཝེ་ད་ནཾ ས་མོ་ས་ར་ཎ་ཊྛེ་ན ས་མོ་དྷཱ་ནེ་ཏི, ས་མཱ་དྷིཾ པ་མུ་ཁ་ཊྛེ་ན ས་མོ་དྷཱ་ནེ་ཏི, ས་ཏིཾ ཨཱ་དྷི་པ་ཏེ་ཡྻ་ཊྛེ་ན ས་མོ་དྷཱ་ནེ་ཏི, པ་ཉྙཾ ཏ་ཏུ་ཏྟ་ར་ཊྛེ་ན ས་མོ་དྷཱ་ནེ་ཏི, ཝི་མུ་ཏྟིཾ སཱ་ར་ཊྛེ་ན ས་མོ་དྷཱ་ནེ་ཏི, ཨ་མ་ཏོ་ག་དྷཾ ནི་བྦཱ་ནཾ པ་རི་ཡོ་སཱ་ན་ཊྛེ་ན ས་མོ་དྷཱ་ནེ་ཏི. ཨ་ཡཾ པུ་གྒ་ལོ ཨི་མེ དྷ་མྨེ ཨི་མ་སྨིཾ ཨཱ་ར་མྨ་ཎེ ས་མོ་དྷཱ་ནེ་ཏི. ཏེ་ན ཝུ་ཙྩ་ཏི – ‘‘དྷ་མྨེ ས་མོ་དྷཱ་ནེ་ཏཱི’’ཏི.
གོ་ཙ་ར་ཉྩ པ་ཛཱ་ནཱ་ཏཱིཏི ཡཾ ཏ་སྶ ཨཱ་ར་མྨ་ཎཾ, ཏཾ ཏ་སྶ གོ་ཙ་རཾ. ཡཾ ཏ་སྶ གོ་ཙ་རཾ, ཏཾ ཏ་སྶ ཨཱ་ར་མྨ་ཎཾ པ་ཛཱ་ནཱ་ཏཱིཏི པུ་གྒ་ལོ. པ་ཛཱ་ན་ནཱ པ་ཉྙཱ. ས་མནྟི ཨཱ་ར་མྨ་ཎ་སྶ ཨུ་པ་ཊྛཱ་ནཾ ས་མཾ, ཙི་ཏྟ་སྶ ཨ་ཝི་ཀྑེ་པོ ས་མཾ, ཙི་ཏྟ་སྶ ཨ་དྷི་ཊྛཱ་ནཾ ས་མཾ, ཙི་ཏྟ་སྶ ཝོ་དཱ་ནཾ ས་མཾ. ཨ་ཏྠོཏི ཨ་ན་ཝ་ཛྫ་ཊྛོ ནི་ཀྐི་ལེ་ས་ཊྛོ ཝོ་དཱ་ན་ཊྛོ པ་ར་མ་ཊྛོ. པ་ཊི་ཝི་ཛ྄ཛྷ་ཏཱིཏི ཨཱ་ར་མྨ་ཎ་སྶ ཨུ་པ་ཊྛཱ་ན་ཊྛཾ པ་ཊི་ཝི་ཛ྄ཛྷ་ཏི, ཙི་ཏྟ་སྶ ཨ་ཝི་ཀྑེ་པ་ཊྛཾ པ་ཊི་ཝི་ཛ྄ཛྷ་ཏི, ཙི་ཏྟ་སྶ ཨ་དྷི་ཊྛཱ་ན་ཊྛཾ པ་ཊི་ཝི་ཛ྄ཛྷ་ཏི, ཙི་ཏྟ་སྶ ཝོ་དཱ་ན་ཊྛཾ པ་ཊི་ཝི་ཛ྄ཛྷ་ཏི. ཏེ་ན ཝུ་ཙྩ་ཏི – ‘‘ས་མ་ཏྠ་ཉྩ པ་ཊི་ཝི་ཛ྄ཛྷ་ཏཱི’’ཏི.
༡༦༩. ཀ་ཐཾ ར་སྶཾ ཨ་སྶ་ས་ནྟོ ‘‘ར་སྶཾ ཨ་སྶ་སཱ་མཱི’’ཏི པ་ཛཱ་ནཱ་ཏི, ར་སྶཾ པ་སྶ་ས་ནྟོ ‘‘ར་སྶཾ པ་སྶ་སཱ་མཱི’’ཏི པ་ཛཱ་ནཱ་ཏི? ར་སྶཾ ཨ་སྶཱ་སཾ ཨི་ཏྟ་ར་ས་ངྑཱ་ཏེ ཨ་སྶ་ས་ཏི, ར་སྶཾ པ་སྶཱ་སཾ ཨི་ཏྟ་ར་ས་ངྑཱ་ཏེ པ་སྶ་ས་ཏི, ར་སྶཾ ཨ་སྶཱ་ས་པ་སྶཱ་སཾ ཨི་ཏྟ་ར་ས་ངྑཱ་ཏེ ཨ་སྶ་ས་ཏི་པི པ་སྶ་ས་ཏི་པི. ར་སྶཾ ཨ་སྶཱ་ས་པ་སྶཱ་སཾ ཨི་ཏྟ་ར་ས་ངྑཱ་ཏེ ཨ་སྶ་ས་ཏོ་པི པ་སྶ་ས་ཏོ་པི ཚ་ནྡོ ཨུ་པྤ་ཛྫ་ཏི. ཚ་ནྡ་ཝ་སེ་ན ཏ་ཏོ སུ་ཁུ་མ་ཏ་རཾ ར་སྶཾ ཨ་སྶཱ་སཾ ཨི་ཏྟ་ར་ས་ངྑཱ་ཏེ ཨ་སྶ་ས་ཏི. ཚ་ནྡ་ཝ་སེ་ན ཏ་ཏོ སུ་ཁུ་མ་ཏ་རཾ ར་སྶཾ པ་སྶཱ་སཾ ཨི་ཏྟ་ར་ས་ངྑཱ་ཏེ པ་སྶ་ས་ཏི. ཚ་ནྡ་ཝ་སེ་ན ཏ་ཏོ སུ་ཁུ་མ་ཏ་རཾ ར་སྶཾ ཨ་སྶཱ་ས་པ་སྶཱ་སཾ ཨི་ཏྟ་ར་ས་ངྑཱ་ཏེ ཨ་སྶ་ས་ཏི་པི པ་སྶ་ས་ཏི་པི. ཚ་ནྡ་ཝ་སེ་ན ཏ་ཏོ སུ་ཁུ་མ་ཏ་རཾ ར་སྶཾ ཨ་སྶཱ་ས་པ་སྶཱ་སཾ ཨི་ཏྟ་ར་ས་ངྑཱ་ཏེ ཨ་སྶ་ས་ཏོ་པི པ་སྶ་ས་ཏོ་པི པཱ་མོ་ཛྫཾ ཨུ་པྤ་ཛྫ་ཏི. པཱ་མོ་ཛྫ་ཝ་སེ་ན ཏ་ཏོ སུ་ཁུ་མ་ཏ་རཾ ར་སྶཾ ཨ་སྶཱ་སཾ ཨི་ཏྟ་ར་ས་ངྑཱ་ཏེ ཨ་སྶ་ས་ཏི, པཱ་མོ་ཛྫ་ཝ་སེ་ན ཏ་ཏོ སུ་ཁུ་མ་ཏ་རཾ ར་སྶཾ པ་སྶཱ་སཾ ཨི་ཏྟ་ར་ས་ངྑཱ་ཏེ པ་སྶ་ས་ཏི, པཱ་མོ་ཛྫ་ཝ་སེ་ན ཏ་ཏོ སུ་ཁུ་མ་ཏ་རཾ ར་སྶཾ ཨ་སྶཱ་ས་པ་སྶཱ་སཾ ཨི་ཏྟ་ར་ས་ངྑཱ་ཏེ ཨ་སྶ་ས་ཏི་པི པ་སྶ་ས་ཏི་པི. པཱ་མོ་ཛྫ་ཝ་སེ་ན ཏ་ཏོ སུ་ཁུ་མ་ཏ་རཾ ར་སྶཾ ཨ་སྶཱ་ས་པ་སྶཱ་སཾ ཨི་ཏྟ་ར་ས་ངྑཱ་ཏེ ཨ་སྶ་ས་ཏོ་པི པ་སྶ་ས་ཏོ་པི ར་སྶཱ ཨ་སྶཱ་ས་པ་སྶཱ་སཱ ཙི་ཏྟཾ ཝི་ཝ་ཏྟ་ཏི, ཨུ་པེ་ཀྑཱ ས་ཎྛཱ་ཏི. ཨི་མེ་ཧི ན་ཝ་ཧཱ་ཀཱ་རེ་ཧི ར་སྶཱ ཨ་སྶཱ་ས་པ་སྶཱ་སཱ ཀཱ་ཡོ ཨུ་པ་ཊྛཱ་ནཾ ས་ཏི ཨ་ནུ་པ་སྶ་ནཱ ཉཱ་ཎཾ. ཀཱ་ཡོ ཨུ་པ་ཊྛཱ་ནཾ, ནོ ས་ཏི; ས་ཏི ཨུ་པ་ཊྛཱ་ན་ཉྩེ་ཝ ས་ཏི ཙ. ཏཱ་ཡ ས་ཏི་ཡཱ ཏེ་ན ཉཱ་ཎེ་ན ཏཾ ཀཱ་ཡཾ ཨ་ནུ་པ་སྶ་ཏི. ཏེ་ན ཝུ་ཙྩ་ཏི – ‘‘ཀཱ་ཡེ ཀཱ་ཡཱ་ནུ་པ་སྶ་ནཱ་ས་ཏི་པ་ཊྛཱ་ན་བྷཱ་ཝ་ནཱ’’ཏི.
ཨ་ནུ་པ་སྶ་ཏཱིཏི ཀ་ཐཾ ཏཾ ཀཱ་ཡཾ ཨ་ནུ་པ་སྶ་ཏི…པེ… ཨེ་ཝཾ ཏཾ ཀཱ་ཡཾ ཨ་ནུ་པ་སྶ་ཏི. བྷཱ་ཝ་ནཱཏི ཙ་ཏ་སྶོ བྷཱ་ཝ་ནཱ…པེ… ཨཱ་སེ་ཝ་ན་ཊྛེ་ན བྷཱ་ཝ་ནཱ. ར་སྶཾ ཨ་སྶཱ་ས་པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ ཝི་དི་ཏཱ ཝེ་ད་ནཱ ཨུ་པྤ་ཛྫ་ནྟི…པེ… ར་སྶཾ ཨ་སྶཱ་ས་པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ནྟོ ཨི་ནྡྲི་ཡཱ་ནི ས་མོ་དྷཱ་ནེ་ཏི…པེ… ཏེ་ན ཝུ་ཙྩ་ཏི – ‘‘ས་མ་ཏྠ་ཉྩ པ་ཊི་ཝི་ཛ྄ཛྷ་ཏཱི’’ཏི.
༡༧༠. ཀ་ཐཾ ‘‘ས་བྦ་ཀཱ་ཡ་པ་ཊི་སཾ་ཝེ་དཱི ཨ་སྶ་སི་སྶཱ་མཱི’’ཏི སི་ཀྑ་ཏི, ‘‘ས་བྦ་ཀཱ་ཡ་པ་ཊི་སཾ་ཝེ་དཱི པ་སྶ་སི་སྶཱ་མཱི’’ཏི སི་ཀྑ་ཏི? ཀཱ་ཡོཏི དྭེ ཀཱ་ཡཱ – ནཱ་མ་ཀཱ་ཡོ ཙ རཱུ་པ་ཀཱ་ཡོ ཙ. ཀ་ཏ་མོ ནཱ་མ་ཀཱ་ཡོ? ཝེ་ད་ནཱ, ས་ཉྙཱ, ཙེ་ཏ་ནཱ, ཕ་སྶོ, མ་ན་སི་ཀཱ་རོ, ནཱ་མ་ཉྩ ནཱ་མ་ཀཱ་ཡོ ཙ, ཡེ ཙ ཝུ་ཙྩ་ནྟི ཙི་ཏྟ་ས་ངྑཱ་རཱ – ཨ་ཡཾ ནཱ་མ་ཀཱ་ཡོ. ཀ་ཏ་མོ རཱུ་པ་ཀཱ་ཡོ? ཙ་ཏྟཱ་རོ ཙ མ་ཧཱ་བྷཱུ་ཏཱ, ཙ་ཏུ་ནྣ་ཉྩ མ་ཧཱ་བྷཱུ་ཏཱ་ནཾ ཨུ་པཱ་དཱ་ཡ་རཱུ་པཾ, ཨ་སྶཱ་སོ ཙ པ་སྶཱ་སོ ཙ, ནི་མི་ཏྟ་ཉྩ ཨུ་པ་ནི་བ་ནྡྷ་ནཱ, ཡེ ཙ ཝུ་ཙྩ་ནྟི ཀཱ་ཡ་ས་ངྑཱ་རཱ – ཨ་ཡཾ རཱུ་པ་ཀཱ་ཡོ.
ཀ་ཐཾ ཏེ ཀཱ་ཡཱ པ་ཊི་ཝི་དི་ཏཱ ཧོ་ནྟི? དཱི་གྷཾ ཨ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ ས་ཏི ཨུ་པ་ཊྛི་ཏཱ ཧོ་ཏི. ཏཱ་ཡ ས་ཏི་ཡཱ ཏེ་ན ཉཱ་ཎེ་ན ཏེ ཀཱ་ཡཱ པ་ཊི་ཝི་དི་ཏཱ ཧོ་ནྟི. དཱི་གྷཾ པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ ས་ཏི ཨུ་པ་ཊྛི་ཏཱ ཧོ་ཏི. ཏཱ་ཡ ས་ཏི་ཡཱ ཏེ་ན ཉཱ་ཎེ་ན ཏེ ཀཱ་ཡཱ པ་ཊི་ཝི་དི་ཏཱ ཧོ་ནྟི. ར་སྶཾ ཨ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ ས་ཏི ཨུ་པ་ཊྛི་ཏཱ ཧོ་ཏི. ཏཱ་ཡ ས་ཏི་ཡཱ ཏེ་ན ཉཱ་ཎེ་ན ཏེ ཀཱ་ཡཱ པ་ཊི་ཝི་དི་ཏཱ ཧོ་ནྟི. ར་སྶཾ པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ ས་ཏི ཨུ་པ་ཊྛི་ཏཱ ཧོ་ཏི. ཏཱ་ཡ ས་ཏི་ཡཱ ཏེ་ན ཉཱ་ཎེ་ན ཏེ ཀཱ་ཡཱ པ་ཊི་ཝི་དི་ཏཱ ཧོ་ནྟི.
ཨཱ་ཝ་ཛྫ་ཏོ ཏེ ཀཱ་ཡཱ པ་ཊི་ཝི་དི་ཏཱ ཧོ་ནྟི, པ་ཛཱ་ན་ཏོ ཏེ ཀཱ་ཡཱ པ་ཊི་ཝི་དི་ཏཱ ཧོ་ནྟི, པ་སྶ་ཏོ ཏེ ཀཱ་ཡཱ པ་ཊི་ཝི་དི་ཏཱ ཧོ་ནྟི, པ་ཙྩ་ཝེ་ཀྑ་ཏོ ཏེ ཀཱ་ཡཱ པ་ཊི་ཝི་དི་ཏཱ ཧོ་ནྟི, ཙི་ཏྟཾ ཨ་དྷི་ཊྛ་ཧ་ཏོ ཏེ ཀཱ་ཡཱ པ་ཊི་ཝི་དི་ཏཱ ཧོ་ནྟི, ས་དྡྷཱ་ཡ ཨ་དྷི་མུ་ཙྩ་ཏོ ཏེ ཀཱ་ཡཱ པ་ཊི་ཝི་དི་ཏཱ ཧོ་ནྟི, ཝཱི་རི་ཡཾ པ་གྒ་ཎྷ་ཏོ ཏེ ཀཱ་ཡཱ པ་ཊི་ཝི་དི་ཏཱ ཧོ་ནྟི, ས་ཏིཾ ཨུ་པ་ཊྛཱ་པ་ཡ་ཏོ ཏེ ཀཱ་ཡཱ པ་ཊི་ཝི་དི་ཏཱ ཧོ་ནྟི, ཙི་ཏྟཾ ས་མཱ་ད་ཧ་ཏོ ཏེ ཀཱ་ཡཱ པ་ཊི་ཝི་དི་ཏཱ ཧོ་ནྟི, པ་ཉྙཱ་ཡ པ་ཛཱ་ན་ཏོ ཏེ ཀཱ་ཡཱ པ་ཊི་ཝི་དི་ཏཱ ཧོ་ནྟི, ཨ་བྷི་ཉྙེ་ཡྻཾ ཨ་བྷི་ཛཱ་ན་ཏོ ཏེ ཀཱ་ཡཱ པ་ཊི་ཝི་དི་ཏཱ ཧོ་ནྟི, པ་རི་ཉྙེ་ཡྻཾ པ་རི་ཛཱ་ན་ཏོ ཏེ ཀཱ་ཡཱ པ་ཊི་ཝི་དི་ཏཱ ཧོ་ནྟི, པ་ཧཱ་ཏ་བྦཾ པ་ཛ་ཧ་ཏོ ཏེ ཀཱ་ཡཱ པ་ཊི་ཝི་དི་ཏཱ ཧོ་ནྟི, བྷཱ་ཝེ་ཏ་བྦཾ བྷཱ་ཝ་ཡ་ཏོ ཏེ ཀཱ་ཡཱ པ་ཊི་ཝི་དི་ཏཱ ཧོ་ནྟི, ས་ཙྪི་ཀཱ་ཏ་བྦཾ ས་ཙྪི་ཀ་རོ་ཏོ ཏེ ཀཱ་ཡཱ པ་ཊི་ཝི་དི་ཏཱ ཧོ་ནྟི. ཨེ་ཝཾ ཏེ ཀཱ་ཡཱ པ་ཊི་ཝི་དི་ཏཱ ཧོ་ནྟི. ས་བྦ་ཀཱ་ཡ་པ་ཊི་སཾ་ཝེ་དཱི ཨ་སྶཱ་ས་པ་སྶཱ་སཱ ཀཱ་ཡོ ཨུ་པ་ཊྛཱ་ནཾ ས་ཏི ཨ་ནུ་པ་སྶ་ནཱ ཉཱ་ཎཾ. ཀཱ་ཡོ ཨུ་པ་ཊྛཱ་ནཾ, ནོ ས་ཏི. ས་ཏི ཨུ་པ་ཊྛཱ་ན་ཉྩེ་ཝ ས་ཏི ཙ. ཏཱ་ཡ ས་ཏི་ཡཱ ཏེ་ན ཉཱ་ཎེ་ན ཏཾ ཀཱ་ཡཾ ཨ་ནུ་པ་སྶ་ཏི. ཏེ་ན ཝུ་ཙྩ་ཏི – ‘‘ཀཱ་ཡེ ཀཱ་ཡཱ་ནུ་པ་སྶ་ནཱ་ས་ཏི་པ་ཊྛཱ་ན་བྷཱ་ཝ་ནཱ’’ཏི.
ཨ་ནུ་པ་སྶ་ཏཱིཏི ཀ་ཐཾ ཏཾ ཀཱ་ཡཾ ཨ་ནུ་པ་སྶ་ཏི…པེ… ཨེ་ཝཾ ཏཾ ཀཱ་ཡཾ ཨ་ནུ་པ་སྶ་ཏི. བྷཱ་ཝ་ནཱཏི ཙ་ཏ་སྶོ བྷཱ་ཝ་ནཱ…པེ… ཨཱ་སེ་ཝ་ན་ཊྛེ་ན བྷཱ་ཝ་ནཱ.
ས་བྦ་ཀཱ་ཡ་པ་ཊི་སཾ་ཝེ་དཱི ཨ་སྶཱ་ས་པ་སྶཱ་སཱ་ནཾ [ཨ་སྶཱ་ས་པ་སྶཱ་སཱ (སྱཱ.)] སཾ་ཝ་ར་ཊྛེ་ན སཱི་ལ་ཝི་སུ་དྡྷི, ཨ་ཝི་ཀྑེ་པ་ཊྛེ་ན ཙི་ཏྟ་ཝི་སུ་དྡྷི, ད་སྶ་ན་ཊྛེ་ན དི་ཊྛི་ཝི་སུ་དྡྷི. ཡོ ཏ་ཏྠ སཾ་ཝ་ར་ཊྛོ, ཨ་ཡཾ ཨ་དྷི་སཱི་ལ་སི་ཀྑཱ. ཡོ ཏ་ཏྠ ཨ་ཝི་ཀྑེ་པ་ཊྛོ, ཨ་ཡཾ ཨ་དྷི་ཙི་ཏྟ་སི་ཀྑཱ. ཡོ ཏ་ཏྠ ད་སྶ་ན་ཊྛོ, ཨ་ཡཾ ཨ་དྷི་པ་ཉྙཱ་སི་ཀྑཱ. ཨི་མཱ ཏི་སྶོ སི་ཀྑཱ་ཡོ ཨཱ་ཝ་ཛྫ་ནྟོ སི་ཀྑ་ཏི, ཛཱ་ན་ནྟོ སི་ཀྑ་ཏི, པ་སྶ་ནྟོ སི་ཀྑ་ཏི, པ་ཙྩ་ཝེ་ཀྑ་ནྟོ སི་ཀྑ་ཏི, ཙི་ཏྟཾ ཨ་དྷི་ཊྛ་ཧ་ནྟོ སི་ཀྑ་ཏི, ས་དྡྷཱ་ཡ ཨ་དྷི་མུ་ཙྩ་ནྟོ སི་ཀྑ་ཏི, ཝཱི་རི་ཡཾ པ་གྒ་ཎྷ་ནྟོ སི་ཀྑ་ཏི, ས་ཏིཾ ཨུ་པ་ཊྛ་པེ་ནྟོ སི་ཀྑ་ཏི, ཙི་ཏྟཾ ས་མཱ་ད་ཧ་ནྟོ སི་ཀྑ་ཏི, པ་ཉྙཱ་ཡ པ་ཛཱ་ན་ནྟོ སི་ཀྑ་ཏི, ཨ་བྷི་ཉྙེ་ཡྻཾ ཨ་བྷི་ཛཱ་ན་ནྟོ སི་ཀྑ་ཏི, པ་རི་ཉྙེ་ཡྻཾ པ་རི་ཛཱ་ན་ནྟོ སི་ཀྑ་ཏི, པ་ཧཱ་ཏ་བྦཾ པ་ཛ་ཧ་ནྟོ སི་ཀྑ་ཏི, བྷཱ་ཝེ་ཏ་བྦཾ བྷཱ་ཝེ་ནྟོ སི་ཀྑ་ཏི, ས་ཙྪི་ཀཱ་ཏ་བྦཾ ས་ཙྪི་ཀ་རོ་ནྟོ སི་ཀྑ་ཏི.
ས་བྦ་ཀཱ་ཡ་པ་ཊི་སཾ་ཝེ་དཱི ཨ་སྶཱ་ས་པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ ཝི་དི་ཏཱ ཝེ་ད་ནཱ ཨུ་པྤ་ཛྫ་ནྟི…པེ… ས་བྦ་ཀཱ་ཡ་པ་ཊི་སཾ་ཝེ་དཱི ཨ་སྶཱ་ས་པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ནྟོ ཨི་ནྡྲི་ཡཱ་ནི ས་མོ་དྷཱ་ནེ་ཏི…པེ… ཏེ་ན ཝུ་ཙྩ་ཏི – ‘‘ས་མ་ཏྠ་ཉྩ པ་ཊི་ཝི་ཛ྄ཛྷ་ཏཱི’’ཏི.
༡༧༡. ཀ་ཐཾ ‘‘པ་སྶ་མྦྷ་ཡཾ ཀཱ་ཡ་ས་ངྑཱ་རཾ ཨ་སྶ་སི་སྶཱ་མཱི’’ཏི སི་ཀྑ་ཏི, ‘‘པ་སྶ་མྦྷ་ཡཾ ཀཱ་ཡ་ས་ངྑཱ་རཾ པ་སྶ་སི་སྶཱ་མཱི’’ཏི སི་ཀྑ་ཏི? ཀ་ཏ་མོ ཀཱ་ཡ་ས་ངྑཱ་རོ? དཱི་གྷཾ ཨ་སྶཱ་སཱ ཀཱ་ཡི་ཀཱ. ཨེ་ཏེ དྷ་མྨཱ ཀཱ་ཡ་པ་ཊི་བ་དྡྷཱ ཀཱ་ཡ་ས་ངྑཱ་རཱ. ཏེ ཀཱ་ཡ་ས་ངྑཱ་རེ པ་སྶ་མྦྷེ་ནྟོ ནི་རོ་དྷེ་ནྟོ ཝཱུ་པ་ས་མེ་ནྟོ སི་ཀྑ་ཏི. དཱི་གྷཾ པ་སྶཱ་སཱ ཀཱ་ཡི་ཀཱ. ཨེ་ཏེ དྷ་མྨཱ ཀཱ་ཡ་པ་ཊི་བ་དྡྷཱ ཀཱ་ཡ་ས་ངྑཱ་རཱ. ཏེ ཀཱ་ཡ་ས་ངྑཱ་རེ པ་སྶ་མྦྷེ་ནྟོ ནི་རོ་དྷེ་ནྟོ ཝཱུ་པ་ས་མེ་ནྟོ སི་ཀྑ་ཏི. ར་སྶཾ ཨ་སྶཱ་སཱ ར་སྶཾ པ་སྶཱ་སཱ. ས་བྦ་ཀཱ་ཡ་པ་ཊི་སཾ་ཝེ་དཱི ཨ་སྶཱ་སཱ ས་བྦ་ཀཱ་ཡ་པ་ཊི་སཾ་ཝེ་དཱི པ་སྶཱ་སཱ ཀཱ་ཡི་ཀཱ. ཨེ་ཏེ དྷ་མྨཱ ཀཱ་ཡ་པ་ཊི་བ་དྡྷཱ ཀཱ་ཡ་ས་ངྑཱ་རཱ. ཏེ ཀཱ་ཡ་ས་ངྑཱ་རེ པ་སྶ་མྦྷེ་ནྟོ ནི་རོ་དྷེ་ནྟོ ཝཱུ་པ་ས་མེ་ནྟོ སི་ཀྑ་ཏི.
ཡ་ཐཱ་རཱུ་པེ་ཧི ཀཱ་ཡ་ས་ངྑཱ་རེ་ཧི ཡཱ ཀཱ་ཡ་སྶ ཨཱ་ན་མ་ནཱ ཝི་ན་མ་ནཱ ས་ནྣ་མ་ནཱ པ་ཎ་མ་ནཱ ཨི་ཉྫ་ནཱ ཕ་ནྡ་ནཱ ཙ་ལ་ནཱ པ་ཀ་མྤ་ནཱ – པ་སྶ་མྦྷ་ཡཾ ཀཱ་ཡ་ས་ངྑཱ་རཾ ཨ་སྶ་སི་སྶཱ་མཱི་ཏི སི་ཀྑ་ཏི, པ་སྶ་མྦྷ་ཡཾ ཀཱ་ཡ་ས་ངྑཱ་རཾ པ་སྶ་སི་སྶཱ་མཱི་ཏི སི་ཀྑ་ཏི. ཡ་ཐཱ་རཱུ་པེ་ཧི ཀཱ་ཡ་ས་ངྑཱ་རེ་ཧི ཡཱ ཀཱ་ཡ་སྶ ན ཨཱ་ན་མ་ནཱ ན ཝི་ན་མ་ནཱ ན ས་ནྣ་མ་ནཱ ན པ་ཎ་མ་ནཱ ཨ་ནི་ཉྫ་ནཱ ཨ་ཕ་ནྡ་ནཱ ཨ་ཙ་ལ་ནཱ ཨ་ཀ་མྤ་ནཱ ས་ནྟཾ སུ་ཁུ་མཾ པ་སྶ་མྦྷ་ཡཾ ཀཱ་ཡ་ས་ངྑཱ་རཾ ཨ་སྶ་སི་སྶཱ་མཱི་ཏི སི་ཀྑ་ཏི, པ་སྶ་མྦྷ་ཡཾ ཀཱ་ཡ་ས་ངྑཱ་རཾ པ་སྶ་སི་སྶཱ་མཱི་ཏི སི་ཀྑ་ཏི.
ཨི་ཏི ཀི་ར ‘‘པ་སྶ་མྦྷ་ཡཾ ཀཱ་ཡ་ས་ངྑཱ་རཾ ཨ་སྶ་སི་སྶཱ་མཱི’’ཏི སི་ཀྑ་ཏི, ‘‘པ་སྶ་མྦྷ་ཡཾ ཀཱ་ཡ་ས་ངྑཱ་རཾ པ་སྶ་སི་སྶཱ་མཱི’’ཏི སི་ཀྑ་ཏི. ཨེ་ཝཾ ས་ནྟེ ཝཱ་ཏཱུ་པ་ལ་དྡྷི་ཡཱ ཙ པ་བྷཱ་ཝ་ནཱ ན ཧོ་ཏི, ཨ་སྶཱ་ས་པ་སྶཱ་སཱ་ན་ཉྩ པ་བྷཱ་ཝ་ནཱ ན ཧོ་ཏི, ཨཱ་ནཱ་པཱ་ན་སྶ་ཏི་ཡཱ ཙ པ་བྷཱ་ཝ་ནཱ ན ཧོ་ཏི, ཨཱ་ནཱ་པཱ་ན་སྶ་ཏི་ས་མཱ་དྷི་སྶ ཙ པ་བྷཱ་ཝ་ནཱ ན ཧོ་ཏི; ན ཙ ནཾ ཏཾ ས་མཱ་པ་ཏྟིཾ པ་ཎྜི་ཏཱ ས་མཱ་པ་ཛྫ་ནྟི་པི ཝུ་ཊྛ་ཧ་ནྟི་པི.
ཨི་ཏི ཀི་ར ‘‘པ་སྶ་མྦྷ་ཡཾ ཀཱ་ཡ་ས་ངྑཱ་རཾ ཨ་སྶ་སི་སྶཱ་མཱི’’ཏི སི་ཀྑ་ཏི, ‘‘པ་སྶ་མྦྷ་ཡཾ ཀཱ་ཡ་ས་ངྑཱ་རཾ པ་སྶ་སི་སྶཱ་མཱི’’ཏི སི་ཀྑ་ཏི. ཨེ་ཝཾ ས་ནྟེ ཝཱ་ཏཱུ་པ་ལ་དྡྷི་ཡཱ ཙ པ་བྷཱ་ཝ་ནཱ ཧོ་ཏི, ཨ་སྶཱ་ས་པ་སྶཱ་སཱ་ན་ཉྩ པ་བྷཱ་ཝ་ནཱ ཧོ་ཏི, ཨཱ་ནཱ་པཱ་ན་སྶ་ཏི་ཡཱ ཙ པ་བྷཱ་ཝ་ནཱ ཧོ་ཏི. ཨཱ་ནཱ་པཱ་ན་སྶ་ཏི་ས་མཱ་དྷི་སྶ ཙ པ་བྷཱ་ཝ་ནཱ ཧོ་ཏི; ཏ་ཉྩ ནཾ ས་མཱ་པ་ཏྟིཾ པ་ཎྜི་ཏཱ ས་མཱ་པ་ཛྫ་ནྟི་པི ཝུ་ཊྛ་ཧ་ནྟི་པི. ཡ་ཐཱ ཀ་ཐཾ ཝི་ཡ? སེ་ཡྻ་ཐཱ་པི ཀཾ་སེ ཨཱ་ཀོ་ཊི་ཏེ པ་ཋ་མཾ ཨོ་ལཱ༹་རི་ཀཱ ས་དྡཱ པ་ཝ་ཏྟ་ནྟི. ཨོ་ལཱ༹་རི་ཀཱ་ནཾ ས་དྡཱ་ནཾ ནི་མི་ཏྟཾ སུ་གྒ་ཧི་ཏ་ཏྟཱ སུ་མ་ན་སི་ཀ་ཏ་ཏྟཱ སཱུ་པ་དྷཱ་རི་ཏ་ཏྟཱ ནི་རུ་དྡྷེ་པི ཨོ་ལཱ༹་རི་ཀེ ས་དྡེ, ཨ་ཐ པ་ཙྪཱ སུ་ཁུ་མ་ཀཱ ས་དྡཱ པ་ཝ་ཏྟ་ནྟི. སུ་ཁུ་མ་ཀཱ་ནཾ ས་དྡཱ་ནཾ ནི་མི་ཏྟཾ སུ་གྒ་ཧི་ཏ་ཏྟཱ སུ་མ་ན་སི་ཀ་ཏ་ཏྟཱ སཱུ་པ་དྷཱ་རི་ཏ་ཏྟཱ ནི་རུ་དྡྷེ་པི སུ་ཁུ་མ་ཀེ ས་དྡེ, ཨ་ཐ པ་ཙྪཱ སུ་ཁུ་མ་ས་དྡ་ནི་མི་ཏྟཱ་ར་མྨ་ཎ་ཏཱ་པི ཙི་ཏྟཾ པ་ཝ་ཏྟ་ཏི. ཨེ་ཝ་མེ་ཝཾ པ་ཋ་མཾ ཨོ་ལཱ༹་རི་ཀཱ ཨ་སྶཱ་ས་པ་སྶཱ་སཱ པ་ཝ་ཏྟ་ནྟི; ཨོ་ལཱ༹་རི་ཀཱ་ནཾ ཨ་སྶཱ་ས་པ་སྶཱ་སཱ་ནཾ ནི་མི་ཏྟཾ སུ་གྒ་ཧི་ཏ་ཏྟཱ སུ་མ་ན་སི་ཀ་ཏ་ཏྟཱ སཱུ་པ་དྷཱ་རི་ཏ་ཏྟཱ ནི་རུ་དྡྷེ་པི ཨོ་ལཱ༹་རི་ཀེ ཨ་སྶཱ་ས་པ་སྶཱ་སེ, ཨ་ཐ པ་ཙྪཱ སུ་ཁུ་མ་ཀཱ ཨ་སྶཱ་ས་པ་སྶཱ་སཱ པ་ཝ་ཏྟ་ནྟི. སུ་ཁུ་མ་ཀཱ་ནཾ ཨ་སྶཱ་ས་པ་སྶཱ་སཱ་ནཾ ནི་མི་ཏྟཾ སུ་གྒ་ཧི་ཏ་ཏྟཱ སུ་མ་ན་སི་ཀ་ཏ་ཏྟཱ སཱུ་པ་དྷཱ་རི་ཏ་ཏྟཱ ནི་རུ་དྡྷེ་པི སུ་ཁུ་མ་ཀེ ཨ་སྶཱ་ས་པ་སྶཱ་སེ, ཨ་ཐ པ་ཙྪཱ སུ་ཁུ་མ་ཀ་ཨ་སྶཱ་ས་པ་སྶཱ་སཱ་ནཾ ནི་མི་ཏྟཱ་ར་མྨ་ཎ་ཏཱ་པི ཙི་ཏྟཾ ན ཝི་ཀྑེ་པཾ ག་ཙྪ་ཏི.
ཨེ་ཝཾ ས་ནྟེ ཝཱ་ཏཱུ་པ་ལ་དྡྷི་ཡཱ ཙ པ་བྷཱ་ཝ་ནཱ ཧོ་ཏི, ཨ་སྶཱ་ས་པ་སྶཱ་སཱ་ན་ཉྩ པ་བྷཱ་ཝ་ནཱ ཧོ་ཏི, ཨཱ་ནཱ་པཱ་ན་སྶ་ཏི་ཡཱ ཙ པ་བྷཱ་ཝ་ནཱ ཧོ་ཏི, ཨཱ་ནཱ་པཱ་ན་སྶ་ཏི་ས་མཱ་དྷི་སྶ ཙ པ་བྷཱ་ཝ་ནཱ ཧོ་ཏི; ཏ་ཉྩ ནཾ ས་མཱ་པ་ཏྟིཾ པ་ཎྜི་ཏཱ ས་མཱ་པ་ཛྫ་ནྟི་པི ཝུ་ཊྛ་ཧ་ནྟི་པི. པ་སྶ་མྦྷ་ཡཾ ཀཱ་ཡ་ས་ངྑཱ་རཾ ཨ་སྶཱ་ས་པ་སྶཱ་སཱ ཀཱ་ཡོ ཨུ་པ་ཊྛཱ་ནཾ ས་ཏི ཨ་ནུ་པ་སྶ་ནཱ ཉཱ་ཎཾ. ཀཱ་ཡོ ཨུ་པ་ཊྛཱ་ནཾ, ནོ ས་ཏི; ས་ཏི ཨུ་པ་ཊྛཱ་ན་ཉྩེ་ཝ ས་ཏི ཙ. ཏཱ་ཡ ས་ཏི་ཡཱ ཏེ་ན ཉཱ་ཎེ་ན ཏཾ ཀཱ་ཡཾ ཨ་ནུ་པ་སྶ་ཏི. ཏེ་ན ཝུ་ཙྩ་ཏི – ‘‘ཀཱ་ཡེ ཀཱ་ཡཱ་ནུ་པ་སྶ་ནཱ་ས་ཏི་པ་ཊྛཱ་ན་བྷཱ་ཝ་ནཱ’’ཏི.
ཨ་ནུ་པ་སྶ་ཏཱིཏི ཀ་ཐཾ ཏཾ ཀཱ་ཡཾ ཨ་ནུ་པ་སྶ་ཏི…པེ… ཨེ་ཝཾ ཏཾ ཀཱ་ཡཾ ཨ་ནུ་པ་སྶ་ཏི. བྷཱ་ཝ་ནཱཏི ཙ་ཏ་སྶོ བྷཱ་ཝ་ནཱ…པེ… ཨཱ་སེ་ཝ་ན་ཊྛེ་ན བྷཱ་ཝ་ནཱ. པ་སྶ་མྦྷ་ཡཾ ཀཱ་ཡ་ས་ངྑཱ་རཾ, ཨ་སྶཱ་ས་པ་སྶཱ་སཱ་ནཾ སཾ་ཝ་ར་ཊྛེ་ན སཱི་ལ་ཝི་སུ་དྡྷི, ཨ་ཝི་ཀྑེ་པ་ཊྛེ་ན ཙི་ཏྟ་ཝི་སུ་དྡྷི, ད་སྶ་ན་ཊྛེ་ན དི་ཊྛི་ཝི་སུ་དྡྷི. ཡོ ཏ་ཏྠ སཾ་ཝ་ར་ཊྛོ, ཨ་ཡཾ ཨ་དྷི་སཱི་ལ་སི་ཀྑཱ; ཡོ ཏ་ཏྠ ཨ་ཝི་ཀྑེ་པ་ཊྛོ, ཨ་ཡཾ ཨ་དྷི་ཙི་ཏྟ་སི་ཀྑཱ; ཡོ ཏ་ཏྠ ད་སྶ་ན་ཊྛོ ཨ་ཡཾ ཨ་དྷི་པ་ཉྙཱ་སི་ཀྑཱ. ཨི་མཱ ཏི་སྶོ སི་ཀྑཱ་ཡོ ཨཱ་ཝ་ཛྫ་ནྟོ སི་ཀྑ་ཏི…པེ… ས་ཙྪི་ཀཱ་ཏ་བྦཾ ས་ཙྪི་ཀ་རོ་ནྟོ སི་ཀྑ་ཏི, པ་སྶ་མྦྷ་ཡཾ ཀཱ་ཡ་ས་ངྑཱ་རཾ ཨ་སྶཱ་ས་པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ ཝི་དི་ཏཱ ཝེ་ད་ནཱ ཨུ་པྤ་ཛྫ་ནྟི…པེ… པ་སྶ་མྦྷ་ཡཾ ཀཱ་ཡ་ས་ངྑཱ་རཾ ཨ་སྶཱ་ས་པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ནྟོ ཨི་ནྡྲི་ཡཱ་ནི ས་མོ་དྷཱ་ནེ་ཏི…པེ… ཏེ་ན ཝུ་ཙྩ་ཏི – ‘‘ས་མ་ཏྠ་ཉྩ པ་ཊི་ཝི་ཛ྄ཛྷ་ཏཱི’’ཏི.
ཨ་ཊྛ ཨ་ནུ་པ་སྶ་ནཱ་ཉཱ་ཎཱ་ནི, ཨ་ཊྛ ཙ ཨུ་པ་ཊྛཱ་ནཱ་ནུ་སྶ་ཏི་ཡོ, ཙ་ཏྟཱ་རི སུ་ཏྟ་ནྟི་ཀ་ཝ་ཏྠཱུ་ནི ཀཱ་ཡེ ཀཱ་ཡཱ་ནུ་པ་སྶ་ནཱ་ཡ.
བྷཱ་ཎ་ཝཱ་རོ.
དུ་ཏི་ཡ་ཙ་ཏུ་ཀྐ་ནི་དྡེ་སོ
༡༧༢. ཀ་ཐཾ ‘‘པཱི་ཏི་པ་ཊི་སཾ་ཝེ་དཱི ཨ་སྶ་སི་སྶཱ་མཱི’’ཏི སི་ཀྑ་ཏི ‘‘པཱི་ཏི་པ་ཊི་སཾ་ཝེ་དཱི པ་སྶ་སི་སྶཱ་མཱི’’ཏི སི་ཀྑ་ཏི? ཀ་ཏ་མཱ པཱི་ཏི? དཱི་གྷཾ ཨ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ ཨུ་པྤ་ཛྫ་ཏི པཱི་ཏི པཱ་མོ་ཛྫཾ. ཡཱ པཱི་ཏི པཱ་མོ་ཛྫཾ ཨཱ་མོ་ད་ནཱ པ་མོ་ད་ནཱ ཧཱ་སོ པ་ཧཱ་སོ ཝི་ཏྟི ཨོ་ད་གྱཾ ཨ་ཏྟ་མ་ན་ཏཱ. ཙི་ཏྟ་སྶ དཱི་གྷཾ པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ ཨུ་པྤ་ཛྫ་ཏི པཱི་ཏི པཱ་མོ་ཛྫཾ…པེ… ར་སྶཾ ཨ་སྶཱ་ས་ཝ་སེ་ན, ར་སྶཾ པ་སྶཱ་ས་ཝ་སེ་ན, ས་བྦ་ཀཱ་ཡ་པ་ཊི་སཾ་ཝེ་དཱི ཨ་སྶཱ་ས་ཝ་སེ་ན, ས་བྦ་ཀཱ་ཡ་པ་ཊི་སཾ་ཝེ་དཱི པ་སྶཱ་ས་ཝ་སེ་ན, པ་སྶ་མྦྷ་ཡཾ ཀཱ་ཡ་ས་ངྑཱ་རཾ ཨ་སྶཱ་ས་ཝ་སེ་ན, པ་སྶ་མྦྷ་ཡཾ ཀཱ་ཡ་ས་ངྑཱ་རཾ པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ ཨུ་པྤ་ཛྫ་ཏི པཱི་ཏི པཱ་མོ་ཛྫཾ. ཡཱ པཱི་ཏི པཱ་མོ་ཛྫཾ ཨཱ་མོ་ད་ནཱ པ་མོ་ད་ནཱ ཧཱ་སོ པ་ཧཱ་སོ ཝི་ཏྟི ཨོ་ད་གྱཾ ཨ་ཏྟ་མ་ན་ཏཱ ཙི་ཏྟ་སྶ – ཨ་ཡཾ པཱི་ཏི.
ཀ་ཐཾ སཱ པཱི་ཏི པ་ཊི་ཝི་དི་ཏཱ ཧོ་ཏི? དཱི་གྷཾ ཨ་སྶཱ་ས་པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ ས་ཏི ཨུ་པ་ཊྛི་ཏཱ ཧོ་ཏི. ཏཱ་ཡ ས་ཏི་ཡཱ ཏེ་ན ཉཱ་ཎེ་ན སཱ པཱི་ཏི པ་ཊི་ཝི་དི་ཏཱ ཧོ་ཏི. དཱི་གྷཾ པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ ས་ཏི ཨུ་པ་ཊྛི་ཏཱ ཧོ་ཏི. ཏཱ་ཡ ས་ཏི་ཡཱ ཏེ་ན ཉཱ་ཎེ་ན སཱ པཱི་ཏི པ་ཊི་ཝི་དི་ཏཱ ཧོ་ཏི. ར་སྶཾ ཨ་སྶཱ་ས་ཝ་སེ་ན…པེ… ར་སྶཾ པ་སྶཱ་ས་ཝ་སེ་ན… ས་བྦ་ཀཱ་ཡ་པ་ཊི་སཾ་ཝེ་དཱི ཨ་སྶཱ་ས་ཝ་སེ་ན… ས་བྦ་ཀཱ་ཡ་པ་ཊི་སཾ་ཝེ་དཱི པ་སྶཱ་ས་ཝ་སེ་ན… པ་སྶ་མྦྷ་ཡཾ ཀཱ་ཡ་ས་ངྑཱ་རཾ ཨ་སྶཱ་ས་ཝ་སེ་ན… པ་སྶ་མྦྷ་ཡཾ ཀཱ་ཡ་ས་ངྑཱ་རཾ པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ ས་ཏི ཨུ་པ་ཊྛི་ཏཱ ཧོ་ཏི. ཏཱ་ཡ ས་ཏི་ཡཱ ཏེ་ན ཉཱ་ཎེ་ན སཱ པཱི་ཏི པ་ཊི་ཝི་དི་ཏཱ ཧོ་ཏི. ཨཱ་ཝ་ཛྫ་ཏོ སཱ པཱི་ཏི པ་ཊི་ཝི་དི་ཏཱ ཧོ་ཏི, ཛཱ་ན་ཏོ…པེ… པ་སྶ་ཏོ… པ་ཙྩ་ཝེ་ཀྑ་ཏོ… ཙི་ཏྟཾ ཨ་དྷི་ཊྛ་ཧ་ཏོ… ས་དྡྷཱ་ཡ ཨ་དྷི་མུ་ཙྩ་ཏོ… ཝཱི་རི་ཡཾ པ་གྒ་ཎྷ་ཏོ… ས་ཏིཾ ཨུ་པ་ཊྛཱ་པ་ཡ་ཏོ… ཙི་ཏྟཾ ས་མཱ་ད་ཧ་ཏོ… པ་ཉྙཱ་ཡ པ་ཛཱ་ན་ཏོ… ཨ་བྷི་ཉྙེ་ཡྻཾ ཨ་བྷི་ཛཱ་ན་ཏོ… པ་རི་ཉྙེ་ཡྻཾ པ་རི་ཛཱ་ན་ཏོ… པ་ཧཱ་ཏ་བྦཾ པ་ཛ་ཧ་ཏོ… བྷཱ་ཝེ་ཏ་བྦཾ བྷཱ་ཝ་ཡ་ཏོ… ས་ཙྪི་ཀཱ་ཏ་བྦཾ ས་ཙྪི་ཀ་རོ་ཏོ སཱ པཱི་ཏི པ་ཊི་ཝི་དི་ཏཱ ཧོ་ཏི. ཨེ་ཝཾ སཱ པཱི་ཏི པ་ཊི་ཝི་དི་ཏཱ ཧོ་ཏི.
པཱི་ཏི་པ་ཊི་སཾ་ཝེ་དཱི ཨ་སྶཱ་ས་པ་སྶཱ་ས་ཝ་སེ་ན ཝེ་ད་ནཱ ཨུ་པ་ཊྛཱ་ནཾ ས་ཏི ཨ་ནུ་པ་སྶ་ནཱ ཉཱ་ཎཾ. ཝེ་ད་ནཱ ཨུ་པ་ཊྛཱ་ནཾ, ནོ ས་ཏི; ས་ཏི ཨུ་པ་ཊྛཱ་ན་ཉྩེ་ཝ ས་ཏི ཙ. ཏཱ་ཡ ས་ཏི་ཡཱ ཏེ་ན ཉཱ་ཎེ་ན ཏཾ ཝེ་ད་ནཾ ཨ་ནུ་པ་སྶ་ཏི. ཏེ་ན ཝུ་ཙྩ་ཏི – ‘‘ཝེ་ད་ནཱ་སུ ཝེ་ད་ནཱ་ནུ་པ་སྶ་ནཱ་ས་ཏི་པ་ཊྛཱ་ན་བྷཱ་ཝ་ནཱ’’ཏི.
ཨ་ནུ་པ་སྶ་ཏཱིཏི ཀ་ཐཾ ཏཾ ཝེ་ད་ནཾ ཨ་ནུ་པ་སྶ་ཏི? ཨ་ནི་ཙྩ་ཏོ ཨ་ནུ་པ་སྶ་ཏི…པེ… ཨེ་ཝཾ ཏཾ ཝེ་ད་ནཾ ཨ་ནུ་པ་སྶ་ཏི. བྷཱ་ཝ་ནཱཏི ཙ་ཏ་སྶོ བྷཱ་ཝ་ནཱ…པེ… ཨཱ་སེ་ཝ་ན་ཊྛེ་ན བྷཱ་ཝ་ནཱ. པཱི་ཏི་པ་ཊི་སཾ་ཝེ་དཱི ཨ་སྶཱ་ས་པ་སྶཱ་སཱ་ནཾ སཾ་ཝ་ར་ཊྛེ་ན སཱི་ལ་ཝི་སུ་དྡྷི…པེ… པཱི་ཏི་པ་ཊི་སཾ་ཝེ་དཱི ཨ་སྶཱ་ས་པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ…པེ… པ་ཛཱ་ན་ནྟོ ཨི་ནྡྲི་ཡཱ་ནི ས་མོ་དྷཱ་ནེ་ཏི. ཏེ་ན ཝུ་ཙྩ་ཏི – ‘‘ས་མ་ཏྠ་ཉྩ པ་ཊི་ཝི་ཛ྄ཛྷ་ཏཱི’’ཏི.
༡༧༣. ཀ་ཐཾ ‘‘སུ་ཁ་པ་ཊི་སཾ་ཝེ་དཱི ཨ་སྶ་སི་སྶཱ་མཱི’’ཏི སི་ཀྑ་ཏི, ‘‘སུ་ཁ་པ་ཊི་སཾ་ཝེ་དཱི པ་སྶ་སི་སྶཱ་མཱི’’ཏི སི་ཀྑ་ཏི? སུ་ཁནྟི དྭེ སུ་ཁཱ་ནི – ཀཱ་ཡི་ཀ་ཉྩ སུ་ཁཾ, ཙེ་ཏ་སི་ཀ་ཉྩ སུ་ཁཾ. ཀ་ཏ་མཾ ཀཱ་ཡི་ཀཾ སུ་ཁཾ? ཡཾ ཀཱ་ཡི་ཀཾ སཱ་ཏཾ ཀཱ་ཡི་ཀཾ སུ་ཁཾ, ཀཱ་ཡ་ས་མྥ་སྶ་ཛཾ སཱ་ཏཾ སུ་ཁཾ ཝེ་ད་ཡི་ཏཾ, ཀཱ་ཡ་ས་མྥ་སྶ་ཛཱ སཱ་ཏཱ སུ་ཁཱ ཝེ་ད་ནཱ – ཨི་དཾ ཀཱ་ཡི་ཀཾ སུ་ཁཾ. ཀ་ཏ་མཾ ཙེ་ཏ་སི་ཀཾ སུ་ཁཾ? ཡཾ ཙེ་ཏ་སི་ཀཾ སཱ་ཏཾ ཙེ་ཏ་སི་ཀཾ སུ་ཁཾ, ཙེ་ཏོ་ས་མྥ་སྶ་ཛཾ སཱ་ཏཾ སུ་ཁཾ ཝེ་ད་ཡི་ཏཾ, ཙེ་ཏོ་ས་མྥ་སྶ་ཛཱ སཱ་ཏཱ སུ་ཁཱ ཝེ་ད་ནཱ – ཨི་དཾ ཙེ་ཏ་སི་ཀཾ སུ་ཁཾ.
ཀ་ཐཾ ཏེ སུ་ཁཱ པ་ཊི་ཝི་དི་ཏཱ ཧོ་ནྟི? དཱི་གྷཾ ཨ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ ས་ཏི ཨུ་པ་ཊྛི་ཏཱ ཧོ་ཏི. ཏཱ་ཡ ས་ཏི་ཡཱ ཏེ་ན ཉཱ་ཎེ་ན ཏེ སུ་ཁཱ པ་ཊི་ཝི་དི་ཏཱ ཧོ་ནྟི. དཱི་གྷཾ པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ ས་ཏི ཨུ་པ་ཊྛི་ཏཱ ཧོ་ཏི. ཏཱ་ཡ ས་ཏི་ཡཱ ཏེ་ན ཉཱ་ཎེ་ན ཏེ སུ་ཁཱ པ་ཊི་ཝི་དི་ཏཱ ཧོ་ནྟི…པེ… ས་ཙྪི་ཀཱ་ཏ་བྦཾ ས་ཙྪི་ཀ་རོ་ཏོ ཏེ སུ་ཁཱ པ་ཊི་ཝི་དི་ཏཱ ཧོ་ནྟི. ཨེ་ཝཾ ཏེ སུ་ཁཱ པ་ཊི་ཝི་དི་ཏཱ ཧོ་ནྟི. སུ་ཁ་པ་ཊི་སཾ་ཝེ་དཱི ཨ་སྶཱ་ས་པ་སྶཱ་ས་ཝ་སེ་ན ཝེ་ད་ནཱ ཨུ་པ་ཊྛཱ་ནཾ ས་ཏི ཨ་ནུ་པ་སྶ་ནཱ ཉཱ་ཎཾ. ཝེ་ད་ནཱ ཨུ་པ་ཊྛཱ་ནཾ, ནོ ས་ཏི; ས་ཏི ཨུ་པ་ཊྛཱ་ན་ཉྩེ་ཝ ས་ཏི ཙ. ཏཱ་ཡ ས་ཏི་ཡཱ ཏེ་ན ཉཱ་ཎེ་ན ཏཾ ཝེ་ད་ནཾ ཨ་ནུ་པ་སྶ་ཏི. ཏེ་ན ཝུ་ཙྩ་ཏི – ‘‘ཝེ་ད་ནཱ་སུ ཝེ་ད་ནཱ་ནུ་པ་སྶ་ནཱ་ས་ཏི་པ་ཊྛཱ་ན་བྷཱ་ཝ་ནཱ’’ཏི.
ཨ་ནུ་པ་སྶ་ཏཱིཏི ཀ་ཐཾ ཏཾ ཝེ་ད་ནཾ ཨ་ནུ་པ་སྶ་ཏི. ཨ་ནི་ཙྩ་ཏོ ཨ་ནུ་པ་སྶ་ཏི…པེ… ཨེ་ཝཾ ཏཾ ཝེ་ད་ནཾ ཨ་ནུ་པ་སྶ་ཏི. བྷཱ་ཝ་ནཱཏི ཙ་ཏ་སྶོ བྷཱ་ཝ་ནཱ…པེ… ཨཱ་སེ་ཝ་ན་ཊྛེ་ན བྷཱ་ཝ་ནཱ. སུ་ཁ་པ་ཊི་སཾ་ཝེ་དཱི ཨ་སྶཱ་ས་པ་སྶཱ་སཱ་ནཾ སཾ་ཝ་ར་ཊྛེ་ན སཱི་ལ་ཝི་སུ་དྡྷི…པེ… སུ་ཁ་པ་ཊི་སཾ་ཝེ་དཱི ཨ་སྶཱ་ས་པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ…པེ… པ་ཛཱ་ན་ནྟོ ཨི་ནྡྲི་ཡཱ་ནི ས་མོ་དྷཱ་ནེ་ཏི. ཏེ་ན ཝུ་ཙྩ་ཏི – ‘‘ས་མ་ཏྠ་ཉྩ པ་ཊི་ཝི་ཛ྄ཛྷ་ཏཱི’’ཏི.
༡༧༤. ཀ་ཐཾ ‘‘ཙི་ཏྟ་ས་ངྑཱ་ར་པ་ཊི་སཾ་ཝེ་དཱི ཨ་སྶ་སི་སྶཱ་མཱི’’ཏི སི་ཀྑ་ཏི, ‘‘ཙི་ཏྟ་ས་ངྑཱ་ར་པ་ཊི་སཾ་ཝེ་དཱི པ་སྶ་སི་སྶཱ་མཱི’’ཏི སི་ཀྑ་ཏི? ཀ་ཏ་མོ ཙི་ཏྟ་ས་ངྑཱ་རོ? དཱི་གྷཾ ཨ་སྶཱ་ས་ཝ་སེ་ན ས་ཉྙཱ ཙ ཝེ་ད་ནཱ ཙ ཙེ་ཏ་སི་ཀཱ – ཨེ་ཏེ དྷ་མྨཱ ཙི་ཏྟ་པ་ཊི་བ་དྡྷཱ ཙི་ཏྟ་ས་ངྑཱ་རཱ. དཱི་གྷཾ པ་སྶཱ་ས་ཝ་སེ་ན ས་ཉྙཱ ཙ ཝེ་ད་ནཱ ཙ ཙེ་ཏ་སི་ཀཱ – ཨེ་ཏེ དྷ་མྨཱ ཙི་ཏྟ་པ་ཊི་བ་དྡྷཱ ཙི་ཏྟ་ས་ངྑཱ་རཱ…པེ… སུ་ཁ་པ་ཊི་སཾ་ཝེ་དཱི ཨ་སྶཱ་ས་ཝ་སེ་ན… སུ་ཁ་པ་ཊི་སཾ་ཝེ་དཱི པ་སྶཱ་ས་ཝ་སེ་ན ས་ཉྙཱ ཙ ཝེ་ད་ནཱ ཙ ཙེ་ཏ་སི་ཀཱ – ཨེ་ཏེ དྷ་མྨཱ ཙི་ཏྟ་པ་ཊི་བ་དྡྷཱ ཙི་ཏྟ་ས་ངྑཱ་རཱ – ཨ་ཡཾ ཙི་ཏྟ་ས་ངྑཱ་རོ.
ཀ་ཐཾ ཏེ ཙི་ཏྟ་ས་ངྑཱ་རཱ པ་ཊི་ཝི་དི་ཏཱ ཧོ་ནྟི? དཱི་གྷཾ ཨ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ ས་ཏི ཨུ་པ་ཊྛི་ཏཱ ཧོ་ཏི. ཏཱ་ཡ ས་ཏི་ཡཱ ཏེ་ན ཉཱ་ཎེ་ན ཏེ ཙི་ཏྟ་ས་ངྑཱ་རཱ པ་ཊི་ཝི་དི་ཏཱ ཧོ་ནྟི. དཱི་གྷཾ པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ ས་ཏི ཨུ་པ་ཊྛི་ཏཱ ཧོ་ཏི. ཏཱ་ཡ ས་ཏི་ཡཱ ཏེ་ན ཉཱ་ཎེ་ན ཏེ ཙི་ཏྟ་ས་ངྑཱ་རཱ པ་ཊི་ཝི་དི་ཏཱ ཧོ་ནྟི…པེ… ས་ཙྪི་ཀཱ་ཏ་བྦཾ ས་ཙྪི་ཀ་རོ་ཏོ ཏེ ཙི་ཏྟ་ས་ངྑཱ་རཱ པ་ཊི་ཝི་དི་ཏཱ ཧོ་ནྟི. ཨེ་ཝཾ ཏེ ཙི་ཏྟ་ས་ངྑཱ་རཱ པ་ཊི་ཝི་དི་ཏཱ ཧོ་ནྟི. ཙི་ཏྟ་ས་ངྑཱ་ར་པ་ཊི་སཾ་ཝེ་དཱི ཨ་སྶཱ་ས་པ་སྶཱ་ས་ཝ་སེ་ན ཝེ་ད་ནཱ ཨུ་པ་ཊྛཱ་ནཾ ས་ཏི ཨ་ནུ་པ་སྶ་ནཱ ཉཱ་ཎཾ ཝེ་ད་ནཱ ཨུ་པ་ཊྛཱ་ནཾ, ནོ ས་ཏི; ས་ཏི ཨུ་པ་ཊྛཱ་ན་ཉྩེ་ཝ ས་ཏི ཙ. ཏཱ་ཡ ས་ཏི་ཡཱ ཏེ ཉཱ་ཎེ་ན ཏཾ ཝེ་ད་ནཾ ཨ་ནུ་པ་སྶ་ཏི. ཏེ་ན ཝུ་ཙྩ་ཏི – ‘‘ཝེ་ད་ནཱ་སུ ཝེ་ད་ནཱ་ནུ་པ་སྶ་ནཱ་ས་ཏི་པ་ཊྛཱ་ན་བྷཱ་ཝ་ནཱ’’ཏི.
ཨ་ནུ་པ་སྶ་ཏཱིཏི ཀ་ཐཾ ཏཾ ཝེ་ད་ནཾ ཨ་ནུ་པ་སྶ་ཏི? ཨ་ནི་ཙྩ་ཏོ ཨ་ནུ་པ་སྶ་ཏི…པེ… ཨེ་ཝཾ ཏཾ ཝེ་ད་ནཾ ཨ་ནུ་པ་སྶ་ཏི. བྷཱ་ཝ་ནཱཏི ཙ་ཏ་སྶོ བྷཱ་ཝ་ནཱ…པེ… ཨཱ་སེ་ཝ་ན་ཊྛེ་ན བྷཱ་ཝ་ནཱ. ཙི་ཏྟ་ས་ངྑཱ་ར་པ་ཊི་སཾ་ཝེ་དཱི ཨ་སྶཱ་ས་པ་སྶཱ་སཱ་ནཾ སཾ་ཝ་ར་ཊྛེ་ན སཱི་ལ་ཝི་སུ་དྡྷི…པེ… ཙི་ཏྟ་ས་ངྑཱ་ར་པ་ཊི་སཾ་ཝེ་དཱི ཨ་སྶཱ་ས་པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ…པེ… པ་ཛཱ་ན་ནྟོ ཨི་ནྡྲི་ཡཱ་ནི ས་མོ་དྷཱ་ནེ་ཏི. ཏེ་ན ཝུ་ཙྩ་ཏི – ‘‘ས་མ་ཏྠ་ཉྩ པ་ཊི་ཝི་ཛ྄ཛྷ་ཏཱི’’ཏི.
༡༧༥. ཀ་ཐཾ ‘‘པ་སྶ་མྦྷ་ཡཾ ཙི་ཏྟ་ས་ངྑཱ་རཾ ཨ་སྶ་སི་སྶཱ་མཱི’’ཏི སི་ཀྑ་ཏི, ‘‘པ་སྶ་མྦྷ་ཡཾ ཙི་ཏྟ་ས་ངྑཱ་རཾ པ་སྶ་སི་སྶཱ་མཱི’’ཏི སི་ཀྑ་ཏི? ཀ་ཏ་མོ ཙི་ཏྟ་ས་ངྑཱ་རོ? དཱི་གྷཾ ཨ་སྶཱ་ས་ཝ་སེ་ན ས་ཉྙཱ ཙ ཝེ་ད་ནཱ ཙ ཙེ་ཏ་སི་ཀཱ – ཨེ་ཏེ དྷ་མྨཱ ཙི་ཏྟ་པ་ཊི་བ་དྡྷཱ ཙི་ཏྟ་ས་ངྑཱ་རཱ. ཏེ ཙི་ཏྟ་ས་ངྑཱ་རེ པ་སྶ་མྦྷེ་ནྟོ ནི་རོ་དྷེ་ནྟོ ཝཱུ་པ་ས་མེ་ནྟོ སི་ཀྑ་ཏི. དཱི་གྷཾ པ་སྶཱ་ས་ཝ་སེ་ན ས་ཉྙཱ ཙ ཝེ་ད་ནཱ ཙ ཙེ་ཏ་སི་ཀཱ – ཨེ་ཏེ དྷ་མྨཱ ཙི་ཏྟ་པ་ཊི་བ་དྡྷཱ ཙི་ཏྟ་ས་ངྑཱ་རཱ. ཏེ ཙི་ཏྟ་ས་ངྑཱ་རེ པ་སྶ་མྦྷེ་ནྟོ ནི་རོ་དྷེ་ནྟོ ཝཱུ་པ་ས་མེ་ནྟོ སི་ཀྑ་ཏི. ཙི་ཏྟ་ས་ངྑཱ་ར་པ་ཊི་སཾ་ཝེ་དཱི ཨ་སྶཱ་ས་ཝ་སེ་ན… ཙི་ཏྟ་ས་ངྑཱ་ར་པ་ཊི་སཾ་ཝེ་དཱི པ་སྶཱ་ས་ཝ་སེ་ན ས་ཉྙཱ ཙ ཝེ་ད་ནཱ ཙ ཙེ་ཏ་སི་ཀཱ – ཨེ་ཏེ དྷ་མྨཱ ཙི་ཏྟ་པ་ཊི་བ་དྡྷཱ ཙི་ཏྟ་ས་ངྑཱ་རཱ. ཏེ ཙི་ཏྟ་ས་ངྑཱ་རེ པ་སྶ་མྦྷེ་ནྟོ ནི་རོ་དྷེ་ནྟོ ཝཱུ་པ་ས་མེ་ནྟོ སི་ཀྑ་ཏི. པ་སྶ་མྦྷ་ཡཾ ཙི་ཏྟ་ས་ངྑཱ་རཾ ཨ་སྶཱ་ས་པ་སྶཱ་ས་ཝ་སེ་ན ཝེ་ད་ནཱ ཨུ་པ་ཊྛཱ་ནཾ ས་ཏི ཨ་ནུ་པ་སྶ་ནཱ ཉཱ་ཎཾ. ཝེ་ད་ནཱ ཨུ་པ་ཊྛཱ་ནཾ, ནོ ས་ཏི; ས་ཏི ཨུ་པ་ཊྛཱ་ན་ཉྩེ་ཝ ས་ཏི ཙ. ཏཱ་ཡ ས་ཏི་ཡཱ ཏེ་ན ཉཱ་ཎེ་ན ཏཾ ཝེ་ད་ནཾ ཨ་ནུ་པ་སྶ་ཏི. ཏེ་ན ཝུ་ཙྩ་ཏི – ‘‘ཝེ་ད་ནཱ་སུ ཝེ་ད་ནཱ་ནུ་པ་སྶ་ནཱ་ས་ཏི་པ་ཊྛཱ་ན་བྷཱ་ཝ་ནཱ’’ཏི.
ཨ་ནུ་པ་སྶ་ཏཱིཏི ཀ་ཐཾ ཏཾ ཝེ་ད་ནཾ ཨ་ནུ་པ་སྶ་ཏི…པེ… ཨེ་ཝཾ ཏཾ ཝེ་ད་ནཾ ཨ་ནུ་པ་སྶ་ཏི. བྷཱ་ཝ་ནཱཏི ཙ་ཏ་སྶོ བྷཱ་ཝ་ནཱ…པེ… ཨཱ་སེ་ཝ་ན་ཊྛེ་ན བྷཱ་ཝ་ནཱ. པ་སྶ་མྦྷ་ཡཾ ཙི་ཏྟ་ས་ངྑཱ་རཾ ཨ་སྶཱ་ས་པ་སྶཱ་སཱ་ནཾ སཾ་ཝ་ར་ཊྛེ་ན སཱི་ལ་ཝི་སུ་དྡྷི…པེ… པ་སྶ་མྦྷ་ཡཾ ཙི་ཏྟ་ས་ངྑཱ་རཾ ཨ་སྶཱ་ས་པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ…པེ… པ་ཛཱ་ན་ནྟོ ཨི་ནྡྲི་ཡཱ་ནི ས་མོ་དྷཱ་ནེ་ཏི. ཏེ་ན ཝུ་ཙྩ་ཏི – ‘‘ས་མ་ཏྠ་ཉྩ པ་ཊི་ཝི་ཛ྄ཛྷ་ཏཱི’’ཏི.
ཨ་ཊྛ ཨ་ནུ་པ་སྶ་ནཱ་ཉཱ་ཎཱ་ནི ཨ་ཊྛ ཙ ཨུ་པ་ཊྛཱ་ནཱ་ནུ་སྶ་ཏི་ཡོ ཙ་ཏྟཱ་རི སུ་ཏྟ་ནྟི་ཀ་ཝ་ཏྠཱུ་ནི ཝེ་ད་ནཱ་སུ ཝེ་ད་ནཱ་ནུ་པ་སྶ་ནཱ་ཡ.
ཏ་ཏི་ཡ་ཙ་ཏུ་ཀྐ་ནི་དྡེ་སོ
༡༧༦. ཀ་ཐཾ ‘‘ཙི་ཏྟ་པ་ཊི་སཾ་ཝེ་དཱི ཨ་སྶ་སི་སྶཱ་མཱི’’ཏི སི་ཀྑ་ཏི, ‘‘ཙི་ཏྟ་པ་ཊི་སཾ་ཝེ་དཱི པ་སྶ་སི་སྶཱ་མཱི’’ཏི སི་ཀྑ་ཏི? ཀ་ཏ་མཾ ཏཾ ཙི་ཏྟཾ? དཱི་གྷཾ ཨ་སྶཱ་ས་ཝ་སེ་ན ཝི་ཉྙཱ་ཎཾ ཙི་ཏྟཾ. ཡཾ ཙི་ཏྟཾ མ་ནོ མཱ་ན་སཾ ཧ་ད་ཡཾ པ་ཎྜ་རཾ མ་ནོ མ་ནཱ་ཡ་ཏ་ནཾ མ་ནི་ནྡྲི་ཡཾ ཝི་ཉྙཱ་ཎཾ ཝི་ཉྙཱ་ཎ་ཀྑ་ནྡྷོ ཏ་ཛྫཱ མ་ནོ་ཝི་ཉྙཱ་ཎ་དྷཱ་ཏུ. དཱི་གྷཾ པ་སྶཱ་ས་ཝ་སེ་ན …པེ… པ་སྶ་མྦྷ་ཡཾ ཙི་ཏྟ་ས་ངྑཱ་རཾ ཨ་སྶཱ་ས་ཝ་སེ་ན… པ་སྶ་མྦྷ་ཡཾ ཙི་ཏྟ་ས་ངྑཱ་རཾ པ་སྶཱ་ས་ཝ་སེ་ན ཝི་ཉྙཱ་ཎཾ ཙི་ཏྟཾ. ཡཾ ཙི་ཏྟཾ མ་ནོ མཱ་ན་སཾ ཧ་ད་ཡཾ པ་ཎྜ་རཾ མ་ནོ མཱ་ན་ཡ་ཏ་ནཾ མ་ནི་ནྡྲི་ཡཾ ཝི་ཉྙཱ་ཎཾ ཝི་ཉྙཱ་ཎ་ཀྑ་ནྡྷོ ཏ་ཛྫཱ མ་ནོ་ཝི་ཉྙཱ་ཎ་དྷཱ་ཏུ – ཨི་དཾ ཙི་ཏྟཾ.
ཀ་ཐཾ ཏཾ ཙི་ཏྟཾ པ་ཊི་ཝི་དི་ཏཾ ཧོ་ཏི? དཱི་གྷཾ ཨ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ ས་ཏི ཨུ་པ་ཊྛི་ཏཱ ཧོ་ཏི. ཏཱ་ཡ ས་ཏི་ཡཱ ཏེ་ན ཉཱ་ཎེ་ན ཏཾ ཙི་ཏྟཾ པ་ཊི་ཝི་དི་ཏཾ ཧོ་ཏི. དཱི་གྷཾ པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ ས་ཏི ཨུ་པ་ཊྛི་ཏཱ ཧོ་ཏི. ཏཱ་ཡ ས་ཏི་ཡཱ ཏེ་ན ཉཱ་ཎེ་ན ཏཾ ཙི་ཏྟཾ པ་ཊི་ཝི་དི་ཏཾ ཧོ་ཏི…པེ… ས་ཙྪི་ཀཱ་ཏ་བྦཾ ས་ཙྪི་ཀ་རོ་ཏོ ཏཾ ཙི་ཏྟཾ པ་ཊི་ཝི་དི་ཏཾ ཧོ་ཏི. ཨེ་ཝཾ ཏཾ ཙི་ཏྟཾ པ་ཊི་ཝི་དི་ཏཾ ཧོ་ཏི. ཙི་ཏྟ་པ་ཊི་སཾ་ཝེ་དཱི ཨ་སྶཱ་ས་པ་སྶཱ་ས་ཝ་སེ་ན ཝི་ཉྙཱ་ཎཾ ཙི་ཏྟཾ ཨུ་པ་ཊྛཱ་ནཾ ས་ཏི ཨ་ནུ་པ་སྶ་ནཱ ཉཱ་ཎཾ. ཙི་ཏྟཾ ཨུ་པ་ཊྛཱ་ནཾ, ནོ ས་ཏི; ས་ཏི ཨུ་པ་ཊྛཱ་ན་ཉྩེ་ཝ ས་ཏི ཙ. ཏཱ་ཡ ས་ཏི་ཡཱ ཏེ་ན ཉཱ་ཎེ་ན ཏཾ ཙི་ཏྟཾ ཨ་ནུ་པ་སྶ་ཏི. ཏེ་ན ཝུ་ཙྩ་ཏི – ‘‘ཙི་ཏྟེ ཙི་ཏྟཱ་ནུ་པ་སྶ་ནཱ་ས་ཏི་པ་ཊྛཱ་ན་བྷཱ་ཝ་ནཱ’’ཏི.
ཨ་ནུ་པ་སྶ་ཏཱིཏི ཀ་ཐཾ ཏཾ ཙི་ཏྟཾ ཨ་ནུ་པ་སྶ་ཏི…པེ… ཨེ་ཝཾ ཏཾ ཙི་ཏྟཾ ཨ་ནུ་པ་སྶ་ཏི. བྷཱ་ཝ་ནཱཏི ཙ་ཏ་སྶོ བྷཱ་ཝ་ནཱ…པེ… ཨཱ་སེ་ཝ་ན་ཊྛེ་ན བྷཱ་ཝ་ནཱ. ཙི་ཏྟ་པ་ཊི་སཾ་ཝེ་དཱི ཨ་སྶཱ་ས་པ་སྶཱ་སཱ་ནཾ སཾ་ཝ་ར་ཊྛེ་ན སཱི་ལ་ཝི་སུ་དྡྷི…པེ… ཙི་ཏྟ་པ་ཊི་སཾ་ཝེ་དཱི ཨ་སྶཱ་ས་པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ…པེ… པ་ཛཱ་ན་ནྟོ ཨི་ནྡྲི་ཡཱ་ནི ས་མོ་དྷཱ་ནེ་ཏི. ཏེ་ན ཝུ་ཙྩ་ཏི – ‘‘ས་མ་ཏྠ་ཉྩ པ་ཊི་ཝི་ཛ྄ཛྷ་ཏཱི’’ཏི.
༡༧༧. ཀ་ཐཾ ‘‘ཨ་བྷི་པྤ་མོ་ད་ཡཾ ཙི་ཏྟཾ ཨ་སྶ་སི་སྶཱ་མཱི’’ཏི, ‘‘ཨ་བྷི་པྤ་མོ་ད་ཡཾ ཙི་ཏྟཾ པ་སྶ་སི་སྶཱ་མཱི’’ཏི སི་ཀྑ་ཏི? ཀ་ཏ་མོ ཙི་ཏྟ་སྶ ཨ་བྷི་པྤ་མོ་དོ? དཱི་གྷཾ ཨ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ ཨུ་པྤ་ཛྫ་ཏི ཙི་ཏྟ་སྶ ཨ་བྷི་པྤ་མོ་དོ. ཡཱ ཙི་ཏྟ་སྶ ཨཱ་མོ་ད་ནཱ པ་མོ་ད་ནཱ ཧཱ་སོ པ་ཧཱ་སོ ཝི་ཏྟི ཨོ་ད་གྱཾ ཨ་ཏྟ་མ་ན་ཏཱ. ཙི་ཏྟ་སྶ དཱི་གྷཾ ཨ་སྶཱ་ས་པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ ཨུ་པྤ་ཛྫ་ཏི ཙི་ཏྟ་སྶ ཨ་བྷི་པྤ་མོ་དོ. ཡཱ ཙི་ཏྟ་སྶ ཨཱ་མོ་ད་ནཱ པ་མོ་ད་ནཱ ཧཱ་སོ པ་ཧཱ་སོ ཝི་ཏྟི ཨོ་ད་གྱཾ ཨ་ཏྟ་མ་ན་ཏཱ ཙི་ཏྟ་སྶ…པེ… ཙི་ཏྟ་པ་ཊི་སཾ་ཝེ་དཱི ཨ་སྶཱ་ས་ཝ་སེ་ན… ཙི་ཏྟ་པ་ཊི་སཾ་ཝེ་དཱི པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ ཨུ་པྤ་ཛྫ་ཏི ཙི་ཏྟ་སྶ ཨ་བྷི་པྤ་མོ་དོ. ཡཱ ཙི་ཏྟ་སྶ ཨཱ་མོ་ད་ནཱ པ་མོ་ད་ནཱ ཧཱ་སོ པ་ཧཱ་སོ ཝི་ཏྟི ཨོ་ད་གྱཾ ཨ་ཏྟ་མ་ན་ཏཱ ཙི་ཏྟ་སྶ – ཨ་ཡཾ ཙི་ཏྟ་སྶ ཨ་བྷི་པྤ་མོ་དོ. ཨ་བྷི་པྤ་མོ་ད་ཡཾ ཙི་ཏྟཾ ཨ་སྶཱ་ས་པ་སྶཱ་ས་ཝ་སེ་ན ཝི་ཉྙཱ་ཎཾ ཙི་ཏྟཾ ཨུ་པ་ཊྛཱ་ནཾ ས་ཏི ཨ་ནུ་པ་སྶ་ནཱ ཉཱ་ཎཾ. ཙི་ཏྟཾ ཨུ་པ་ཊྛཱ་ནཾ, ནོ ས་ཏི; ས་ཏི ཨུ་པ་ཊྛཱ་ན་ཉྩེ་ཝ ས་ཏི ཙ. ཏཱ་ཡ ས་ཏི་ཡཱ ཏེ་ན ཉཱ་ཎེ་ན ཏཾ ཙི་ཏྟཾ ཨ་ནུ་པ་སྶ་ཏི. ཏེ་ན ཝུ་ཙྩ་ཏི – ‘‘ཙི་ཏྟེ ཙི་ཏྟཱ་ནུ་པ་སྶ་ནཱ་ས་ཏི་པ་ཊྛཱ་ན་བྷཱ་ཝ་ནཱ’’ཏི.
ཨ་ནུ་པ་སྶ་ཏཱི་ཏི ཀ་ཐཾ ཏཾ ཙི་ཏྟཾ ཨ་ནུ་པ་སྶ་ཏི…པེ… ཨེ་ཝཾ ཏཾ ཙི་ཏྟཾ ཨ་ནུ་པ་སྶ་ཏཱི་ཏི. བྷཱ་ཝ་ནཱཏི ཙ་ཏ་སྶོ བྷཱ་ཝ་ནཱ…པེ… ཨཱ་སེ་ཝ་ན་ཊྛེ་ན བྷཱ་ཝ་ནཱ. ཨ་བྷི་པྤ་མོ་ད་ཡཾ ཙི་ཏྟཾ ཨ་སྶཱ་ས་པ་སྶཱ་སཱ་ནཾ སཾ་ཝ་ར་ཊྛེ་ན སཱི་ལ་ཝི་སུ་དྡྷི…པེ… ཨ་བྷི་པྤ་མོ་ད་ཡཾ ཙི་ཏྟཾ ཨ་སྶཱ་ས་པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ…པེ… པ་ཛཱ་ན་ནྟོ ཨི་ནྡྲི་ཡཱ་ནི ས་མོ་དྷཱ་ནེ་ཏི. ཏེ་ན ཝུ་ཙྩ་ཏི – ‘‘ས་མ་ཏྠ་ཉྩ པ་ཊི་ཝི་ཛ྄ཛྷ་ཏཱི’’ཏི.
༡༧༨. ཀ་ཐཾ ‘‘ས་མཱ་ད་ཧཾ ཙི་ཏྟཾ ཨ་སྶ་སི་སྶཱ་མཱི’’ཏི སི་ཀྑ་ཏི, ‘‘ས་མཱ་ད་ཧཾ ཙི་ཏྟཾ པ་སྶ་སི་སྶཱ་མཱི’’ཏི སི་ཀྑ་ཏི? ཀ་ཏ་མོ ས་མཱ་དྷི [ཀ་ཏ་མ་ཉྩ ས་མཱ་དྷི་ནྡི་ཡཾ (སྱཱ.)]? དཱི་གྷཾ ཨ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཱ ཨ་ཝི་ཀྑེ་པོ ས་མཱ་དྷི, ཡཱ ཙི་ཏྟ་སྶ ཋི་ཏི ས་ཎྛི་ཏི ཨ་ཝ་ཊྛི་ཏི [ཨ་དྷི་ཊྚི་ཏི (སྱཱ.)] ཨ་ཝི་སཱ་ཧཱ་རོ ཨ་ཝི་ཀྑེ་པོ ཨ་ཝི་སཱ་ཧ་ཊ་མཱ་ན་ས་ཏཱ [ཨ་ཝི་སཱ་ཧ་ཏ་མཱ་ན་ས་ཏཱ (སྱཱ. ཀ.)] ས་མ་ཐོ ས་མཱ་དྷི་ནྡྲི་ཡཾ ས་མཱ་དྷི་བ་ལཾ ས་མྨཱ་ས་མཱ་དྷི. དཱི་གྷཾ པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཱ ཨ་ཝི་ཀྑེ་པོ ས་མཱ་དྷི…པེ… ས་མཱ་ད་ཧཾ ཙི་ཏྟཾ ཨ་སྶཱ་ས་ཝ་སེ་ན…པེ… ས་མཱ་ད་ཧཾ ཙི་ཏྟཾ པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཱ ཨ་ཝི་ཀྑེ་པོ ས་མཱ་དྷི. ཡཱ ཙི་ཏྟ་སྶ ཋི་ཏི ས་ཎྛི་ཏི ཨ་ཝ་ཊྛི་ཏི ཨ་ཝི་སཱ་ཧཱ་རོ ཨ་ཝི་ཀྑེ་པོ ཨ་ཝི་སཱ་ཧ་ཊ་མཱ་ན་ས་ཏཱ ས་མ་ཐོ ས་མཱ་དྷི་ནྡྲི་ཡཾ ས་མཱ་དྷི་བ་ལཾ ས་མྨཱ་ས་མཱ་དྷི – ཨ་ཡཾ ས་མཱ་དྷི. ས་མཱ་ད་ཧཾ ཙི་ཏྟཾ ཨ་སྶཱ་ས་པ་སྶཱ་ས་ཝ་སེ་ན ཝི་ཉྙཱ་ཎཾ ཙི་ཏྟཾ ཨུ་པ་ཊྛཱ་ནཾ ས་ཏི ཨ་ནུ་པ་སྶ་ནཱ ཉཱ་ཎཾ. ཙི་ཏྟཾ ཨུ་པ་ཊྛཱ་ནཾ, ནོ ས་ཏི; ས་ཏི ཨུ་པ་ཊྛཱ་ན་ཉྩེ་ཝ ས་ཏི ཙ. ཏཱ་ཡ ས་ཏི་ཡཱ ཏེ་ན ཉཱ་ཎེ་ན ཏཾ ཙི་ཏྟཾ ཨ་ནུ་པ་སྶ་ཏི. ཏེ་ན ཝུ་ཙྩ་ཏི – ‘‘ཙི་ཏྟེ ཙི་ཏྟཱ་ནུ་པ་སྶ་ནཱ་ས་ཏི་པ་ཊྛཱ་ན་བྷཱ་ཝ་ནཱ’’ཏི.
ཨ་ནུ་པ་སྶ་ཏཱི་ཏི ཀ་ཐཾ ཏཾ ཙི་ཏྟཾ ཨ་ནུ་པ་སྶ་ཏི…པེ… ཨེ་ཝཾ ཏཾ ཙི་ཏྟཾ ཨ་ནུ་པ་སྶ་ཏི. བྷཱ་ཝ་ནཱཏི ཙ་ཏ་སྶོ བྷཱ་ཝ་ནཱ…པེ… ཨཱ་སེ་ཝ་ན་ཊྛེ་ན བྷཱ་ཝ་ནཱ. ས་མཱ་ད་ཧཾ ཙི་ཏྟཾ ཨ་སྶཱ་ས་པ་སྶཱ་སཱ་ནཾ སཾ་ཝ་ར་ཊྛེ་ན སཱི་ལ་ཝི་སུ་དྡྷི…པེ… ས་མཱ་ད་ཧཾ ཙི་ཏྟཾ ཨ་སྶཱ་ས་པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ…པེ… པ་ཛཱ་ན་ནྟོ ཨི་ནྡྲི་ཡཱ་ནི ས་མོ་དྷཱ་ནེ་ཏི. ཏེ་ན ཝུ་ཙྩ་ཏི – ‘‘ས་མ་ཏྠ་ཉྩ པ་ཊི་ཝི་ཛ྄ཛྷ་ཏཱི’’ཏི.
༡༧༩. ཀ་ཐཾ ‘‘ཝི་མོ་ཙ་ཡཾ ཙི་ཏྟཾ ཨ་སྶ་སི་སྶཱ་མཱི’’ཏི སི་ཀྑ་ཏི, ‘‘ཝི་མོ་ཙ་ཡཾ ཙི་ཏྟཾ པ་སྶ་སི་སྶཱ་མཱི’’ཏི སི་ཀྑ་ཏི? ‘‘རཱ་ག་ཏོ ཝི་མོ་ཙ་ཡཾ ཙི་ཏྟཾ ཨ་སྶ་སི་སྶཱ་མཱི’’ཏི སི་ཀྑ་ཏི, ‘‘རཱ་ག་ཏོ ཝི་མོ་ཙ་ཡཾ ཙི་ཏྟཾ པ་སྶ་སི་སྶཱ་མཱི’’ཏི སི་ཀྑ་ཏི. ‘‘དོ་ས་ཏོ ཝི་མོ་ཙ་ཡཾ ཙི་ཏྟཾ ཨ་སྶ་སི་སྶཱ་མཱི’’ཏི སི་ཀྑ་ཏི, ‘‘དོ་ས་ཏོ ཝི་མོ་ཙ་ཡཾ ཙི་ཏྟཾ པ་སྶ་སི་སྶཱ་མཱི’’ཏི སི་ཀྑ་ཏི. ‘‘མོ་ཧ་ཏོ ཝི་མོ་ཙ་ཡཾ ཙི་ཏྟཾ ཨ་སྶ་སི་སྶཱ་མཱི’’ཏི སི་ཀྑ་ཏི…པེ… མཱ་ན་ཏོ ཝི་མོ་ཙ་ཡཾ ཙི་ཏྟཾ… དི་ཊྛི་ཡཱ ཝི་མོ་ཙ་ཡཾ ཙི་ཏྟཾ… ཝི་ཙི་ཀི་ཙྪཱ་ཡ ཝི་མོ་ཙ་ཡཾ ཙི་ཏྟཾ… ཐི་ན་ཏོ ཝི་མོ་ཙ་ཡཾ ཙི་ཏྟཾ… ཨུ་དྡྷ་ཙྩ་ཏོ ཝི་མོ་ཙ་ཡཾ ཙི་ཏྟཾ… ཨ་ཧི་རི་ཀ་ཏོ ཝི་མོ་ཙ་ཡཾ ཙི་ཏྟཾ… ‘‘ཨ་ནོ་ཏྟ་པྤ་ཏོ ཝི་མོ་ཙ་ཡཾ ཙི་ཏྟཾ ཨ་སྶ་སི་སྶཱ་མཱི’’ཏི སི་ཀྑ་ཏི, ‘‘ཨ་ནོ་ཏྟ་པྤ་ཏོ ཝི་མོ་ཙ་ཡཾ ཙི་ཏྟཾ པ་སྶ་སི་སྶཱ་མཱི’’ཏི སི་ཀྑ་ཏི. ཝི་མོ་ཙ་ཡཾ ཙི་ཏྟཾ ཨ་སྶཱ་ས་པ་སྶཱ་ས་ཝ་སེ་ན ཝི་ཉྙཱ་ཎཾ ཙི་ཏྟཾ ཨུ་པ་ཊྛཱ་ནཾ ས་ཏི…པེ….
ཨ་ནུ་པ་སྶ་ཏཱིཏི ཀ་ཐཾ ཏཾ ཙི་ཏྟཾ ཨ་ནུ་པ་སྶ་ཏི…པེ… ཨེ་ཝཾ ཏཾ ཙི་ཏྟཾ ཨ་ནུ་པ་སྶ་ཏི. བྷཱ་ཝ་ནཱཏི ཙ་ཏ་སྶོ བྷཱ་ཝ་ནཱ…པེ… ཨཱ་སེ་ཝ་ན་ཊྛེ་ན བྷཱ་ཝ་ནཱ. ཝི་མོ་ཙ་ཡཾ ཙི་ཏྟཾ ཨ་སྶཱ་ས་པ་སྶཱ་སཱ་ནཾ སཾ་ཝ་ར་ཊྛེ་ན སཱི་ལ་ཝི་སུ་དྡྷི…པེ… ཝི་མོ་ཙ་ཡཾ ཙི་ཏྟཾ ཨ་སྶཱ་ས་པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ …པེ… པ་ཛཱ་ན་ནྟོ ཨི་ནྡྲི་ཡཱ་ནི ས་མོ་དྷཱ་ནེ་ཏི. ཏེ་ན ཝུ་ཙྩ་ཏི – ‘‘ས་མ་ཏྠ་ཉྩ པ་ཊི་ཝི་ཛ྄ཛྷ་ཏཱི’’ཏི.
ཨ་ཊྛ ཨ་ནུ་པ་སྶ་ནཱ་ཉཱ་ཎཱ་ནི ཨ་ཊྛ ཙ ཨུ་པ་ཊྛཱ་ནཱ་ནུ་སྶ་ཏི་ཡོ ཙ་ཏྟཱ་རི སུ་ཏྟ་ནྟི་ཀ་ཝ་ཏྠཱུ་ནི ཙི་ཏྟེ ཙི་ཏྟཱ་ནུ་པ་སྶ་ནཱ་ཡ.
ཙ་ཏུ་ཏྠ་ཙ་ཏུ་ཀྐ་ནི་དྡེ་སོ
༡༨༠. ཀ་ཐཾ ‘‘ཨ་ནི་ཙྩཱ་ནུ་པ་སྶཱི ཨ་སྶ་སི་སྶཱ་མཱི’’ཏི སི་ཀྑ་ཏི, ‘‘ཨ་ནི་ཙྩཱ་ནུ་པ་སྶཱི པ་སྶ་སི་སྶཱ་མཱི’’ཏི སི་ཀྑ་ཏི? ཨ་ནི་ཙྩནྟི ཀིཾ ཨ་ནི་ཙྩཾ? པ་ཉྩ་ཀྑ་ནྡྷཱ ཨ་ནི་ཙྩཱ. ཀེ་ན་ཊྛེ་ན ཨ་ནི་ཙྩཱ? ཨུ་པྤཱ་ད་ཝ་ཡ་ཊྛེ་ན ཨ་ནི་ཙྩཱ. པ་ཉྩ་ནྣཾ ཁ་ནྡྷཱ་ནཾ ཨུ་ད་ཡཾ པ་སྶ་ནྟོ ཀ་ཏི ལ་ཀྑ་ཎཱ་ནི པ་སྶ་ཏི, ཝ་ཡཾ པ་སྶ་ནྟོ ཀ་ཏི ལ་ཀྑ་ཎཱ་ནི པ་སྶ་ཏི, ཨུ་ད་ཡ་བྦ་ཡཾ པ་སྶ་ནྟོ ཀ་ཏི ལ་ཀྑ་ཎཱ་ནི པ་སྶ་ཏི? པ་ཉྩ་ནྣཾ ཁ་ནྡྷཱ་ནཾ ཨུ་ད་ཡཾ པ་སྶ་ནྟོ པ་ཉྩ་ཝཱི་ས་ཏི ལ་ཀྑ་ཎཱ་ནི པ་སྶ་ཏི, ཝ་ཡཾ པ་སྶ་ནྟོ པ་ཉྩ་ཝཱི་ས་ཏི ལ་ཀྑ་ཎཱ་ནི པ་སྶ་ཏི. པ་ཉྩ་ནྣཾ ཁ་ནྡྷཱ་ནཾ ཨུ་ད་ཡ་བྦ་ཡཾ པ་སྶ་ནྟོ ཨི་མཱ་ནི པ་ཉྙཱ་ས ལ་ཀྑ་ཎཱ་ནི པ་སྶ་ཏི.
‘‘རཱུ་པེ ཨ་ནི་ཙྩཱ་ནུ་པ་སྶཱི ཨ་སྶ་སི་སྶཱ་མཱི’’ཏི སི་ཀྑ་ཏི, ‘‘རཱུ་པེ ཨ་ནི་ཙྩཱ་ནུ་པ་སྶཱི པ་སྶ་སི་སྶཱ་མཱི’’ཏི སི་ཀྑ་ཏི. ‘‘ཝེ་ད་ནཱ་ཡ…པེ… ས་ཉྙཱ་ཡ… ས་ངྑཱ་རེ་སུ… ཝི་ཉྙཱ་ཎེ… ཙ་ཀྑུ་སྨིཾ…པེ… ཛ་རཱ་མ་ར་ཎེ ཨ་ནི་ཙྩཱ་ནུ་པ་སྶཱི ཨ་སྶ་སི་སྶཱ་མཱི’’ཏི སི་ཀྑ་ཏི, ‘‘ཛ་རཱ་མ་ར་ཎེ ཨ་ནི་ཙྩཱ་ནུ་པ་སྶཱི པ་སྶ་སི་སྶཱ་མཱི’’ཏི སི་ཀྑ་ཏི. ཨ་ནི་ཙྩཱ་ནུ་པ་སྶཱི ཨ་སྶཱ་ས་པ་སྶཱ་ས་ཝ་སེ་ན དྷ་མྨཱ ཨུ་པ་ཊྛཱ་ནཾ ས་ཏི ཨ་ནུ་པ་སྶ་ནཱ ཉཱ་ཎཾ. དྷ་མྨཱ ཨུ་པ་ཊྛཱ་ནཾ, ནོ ས་ཏི; ས་ཏི ཨུ་པ་ཊྛཱ་ན་ཉྩེ་ཝ ས་ཏི ཙ. ཏཱ་ཡ ས་ཏི་ཡཱ ཏེ་ན ཉཱ་ཎེ་ན ཏེ དྷ་མྨེ ཨ་ནུ་པ་སྶ་ཏི. ཏེ་ན ཝུ་ཙྩ་ཏི – ‘‘དྷ་མྨེ་སུ དྷ་མྨཱ་ནུ་པ་སྶ་ནཱ་ས་ཏི་པ་ཊྛཱ་ན་བྷཱ་ཝ་ནཱ’’ཏི.
ཨ་ནུ་པ་སྶ་ཏཱི་ཏི ཀ་ཐཾ ཏེ དྷ་མྨེ ཨ་ནུ་པ་སྶ་ཏི…པེ… ཨེ་ཝཾ ཏེ དྷ་མྨེ ཨ་ནུ་པ་སྶ་ཏི. བྷཱ་ཝ་ནཱཏི ཙ་ཏ་སྶོ བྷཱ་ཝ་ནཱ…པེ… ཨཱ་སེ་ཝ་ན་ཊྛེ་ན བྷཱ་ཝ་ནཱ. ཨ་ནི་ཙྩཱ་ནུ་པ་སྶཱི ཨ་སྶཱ་ས་པ་སྶཱ་སཱ་ནཾ སཾ་ཝ་ར་ཊྛེ་ན སཱི་ལ་ཝི་སུ་དྡྷི…པེ… ཨ་ནི་ཙྩཱ་ནུ་པ་སྶཱི ཨ་སྶཱ་ས་པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ…པེ… པ་ཛཱ་ན་ནྟོ ཨི་ནྡྲི་ཡཱ་ནི ས་མོ་དྷཱ་ནེ་ཏི. ཏེ་ན ཝུ་ཙྩ་ཏི – ‘‘ས་མ་ཏྠ་ཉྩ པ་ཊི་ཝི་ཛ྄ཛྷ་ཏཱི’’ཏི.
ཀ་ཐཾ ‘‘ཝི་རཱ་གཱ་ནུ་པ་སྶཱི ཨ་སྶ་སི་སྶཱ་མཱི’’ཏི སི་ཀྑ་ཏི, ‘‘ཝི་རཱ་གཱ་ནུ་པ་སྶཱི པ་སྶ་སི་སྶཱ་མཱི’’ཏི སི་ཀྑ་ཏི? རཱུ་པེ ཨཱ་དཱི་ན་ཝཾ དི་སྭཱ རཱུ་པ་ཝི་རཱ་གེ ཚ་ནྡ་ཛཱ་ཏོ ཧོ་ཏི ས་དྡྷཱ་དྷི་མུ་ཏྟོ, ཙི་ཏྟ་ཉྩ་སྶ སྭཱ་དྷི་ཊྛི་ཏཾ. ‘‘རཱུ་པེ ཝི་རཱ་གཱ་ནུ་པ་སྶཱི ཨ་སྶ་སི་སྶཱ་མཱི’’ཏི སི་ཀྑ་ཏི, ‘‘རཱུ་པེ ཝི་རཱ་གཱ་ནུ་པ་སྶཱི པ་སྶ་སི་སྶཱ་མཱི’’ཏི སི་ཀྑ་ཏི. ཝེ་ད་ནཱ་ཡ…པེ… ས་ཉྙཱ་ཡ… ས་ངྑཱ་རེ་སུ… ཝི་ཉྙཱ་ཎེ… ཙ་ཀྑུ་སྨིཾ…པེ… ཛ་རཱ་མ་ར་ཎེ ཨཱ་དཱི་ན་ཝཾ དི་སྭཱ ཛ་རཱ་མ་ར་ཎ་ཝི་རཱ་གེ ཚ་ནྡ་ཛཱ་ཏོ ཧོ་ཏི ས་དྡྷཱ་དྷི་མུ་ཏྟོ, ཙི་ཏྟ་ཉྩ་སྶ སྭཱ་དྷི་ཊྛི་ཏཾ. ‘‘ཛ་རཱ་མ་ར་ཎེ ཝི་རཱ་གཱ་ནུ་པ་སྶཱི ཨ་སྶ་སི་སྶཱ་མཱི’’ཏི སི་ཀྑ་ཏི, ‘‘ཛ་རཱ་མ་ར་ཎེ ཝི་རཱ་གཱ་ནུ་པ་སྶཱི པ་སྶ་སི་སྶཱ་མཱི’’ཏི སི་ཀྑ་ཏི. ཝི་རཱ་གཱ་ནུ་པ་སྶཱི ཨ་སྶཱ་ས་པ་སྶཱ་ས་ཝ་སེ་ན དྷ་མྨཱ ཨུ་པ་ཊྛཱ་ནཾ ས་ཏི ཨ་ནུ་པ་སྶ་ནཱ ཉཱ་ཎཾ. དྷ་མྨཱ ཨུ་པ་ཊྛཱ་ནཾ, ནོ ས་ཏི; ས་ཏི ཨུ་པ་ཊྛཱ་ན་ཉྩེ་ཝ ས་ཏི ཙ. ཏཱ་ཡ ས་ཏི་ཡཱ ཏེ་ན ཉཱ་ཎེ་ན ཏེ དྷ་མྨེ ཨ་ནུ་པ་སྶ་ཏི. ཏེ་ན ཝུ་ཙྩ་ཏི – ‘‘དྷ་མྨེ་སུ དྷ་མྨཱ་ནུ་པ་སྶ་ནཱ་ས་ཏི་པ་ཊྛཱ་ན་བྷཱ་ཝ་ནཱ’’ཏི.
ཨ་ནུ་པ་སྶ་ཏཱིཏི ཀ་ཐཾ ཏེ དྷ་མྨེ ཨ་ནུ་པ་སྶ་ཏི…པེ… ཨེ་ཝཾ ཏེ དྷ་མྨེ ཨ་ནུ་པ་སྶ་ཏི. བྷཱ་ཝ་ནཱཏི ཙ་ཏ་སྶོ བྷཱ་ཝ་ནཱ…པེ… ཨཱ་སེ་ཝ་ན་ཊྛེ་ན བྷཱ་ཝ་ནཱ. ཝི་རཱ་གཱ་ནུ་པ་སྶཱི ཨ་སྶཱ་ས་པ་སྶཱ་སཱ་ནཾ སཾ་ཝ་ར་ཊྛེ་ན སཱི་ལ་ཝི་སུ་དྡྷི…པེ… ཝི་རཱ་གཱ་ནུ་པ་སྶཱི ཨ་སྶཱ་ས་པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ…པེ… པ་ཛཱ་ན་ནྟོ ཨི་ནྡྲི་ཡཱ་ནི ས་མོ་དྷཱ་ནེ་ཏི. ཏེ་ན ཝུ་ཙྩ་ཏི – ‘‘ས་མ་ཏྠ་ཉྩ པ་ཊི་ཝི་ཛ྄ཛྷ་ཏཱི’’ཏི.
ཀ་ཐཾ ‘‘ནི་རོ་དྷཱ་ནུ་པ་སྶཱི ཨ་སྶ་སི་སྶཱ་མཱི’’ཏི སི་ཀྑ་ཏི, ‘‘ནི་རོ་དྷཱ་ནུ་པ་སྶཱི པ་སྶ་སི་སྶཱ་མཱི’’ཏི སི་ཀྑ་ཏི? རཱུ་པེ ཨཱ་དཱི་ན་ཝཾ དི་སྭཱ རཱུ་པ་ནི་རོ་དྷེ ཚ་ནྡ་ཛཱ་ཏོ ཧོ་ཏི ས་དྡྷཱ་དྷི་མུ་ཏྟོ, ཙི་ཏྟ་ཉྩ་སྶ སྭཱ་དྷི་ཊྛི་ཏཾ. ‘‘རཱུ་པེ ནི་རོ་དྷཱ་ནུ་པ་སྶཱི ཨ་སྶ་སི་སྶཱ་མཱི’’ཏི སི་ཀྑ་ཏི, ‘‘རཱུ་པེ ནི་རོ་དྷཱ་ནུ་པ་སྶཱི པ་སྶ་སི་སྶཱ་མཱི’’ཏི སི་ཀྑ་ཏི. ཝེ་ད་ནཱ་ཡ…པེ… ས་ཉྙཱ་ཡ… ས་ངྑཱ་རེ་སུ… ཝི་ཉྙཱ་ཎེ… ཙ་ཀྑུ་སྨིཾ…པེ… ཛ་རཱ་མ་ར་ཎེ ཨཱ་དཱི་ན་ཝཾ དི་སྭཱ ཛ་རཱ་མ་ར་ཎ་ནི་རོ་དྷེ ཚ་ནྡ་ཛཱ་ཏོ ཧོ་ཏི ས་དྡྷཱ་དྷི་མུ་ཏྟོ, ཙི་ཏྟ་ཉྩ་སྶ སྭཱ་དྷི་ཊྛི་ཏཾ. ‘‘ཛ་རཱ་མ་ར་ཎེ ནི་རོ་དྷཱ་ནུ་པ་སྶཱི ཨ་སྶ་སི་སྶཱ་མཱི’’ཏི སི་ཀྑ་ཏི, ‘‘ཛ་རཱ་མ་ར་ཎེ ནི་རོ་དྷཱ་ནུ་པ་སྶཱི པ་སྶ་སི་སྶཱ་མཱི’’ཏི སི་ཀྑ་ཏི.
༡༨༡. ཀ་ཏི་ཧཱ་ཀཱ་རེ་ཧི ཨ་ཝི་ཛྫཱ་ཡ ཨཱ་དཱི་ན་ཝོ ཧོ་ཏི? ཀ་ཏི་ཧཱ་ཀཱ་རེ་ཧི ཨ་ཝི་ཛྫཱ ནི་རུ་ཛ྄ཛྷ་ཏི? པ་ཉྩ་ཧཱ་ཀཱ་རེ་ཧི ཨ་ཝི་ཛྫཱ་ཡ ཨཱ་དཱི་ན་ཝོ ཧོ་ཏི. ཨ་ཊྛ་ཧཱ་ཀཱ་རེ་ཧི ཨ་ཝི་ཛྫཱ ནི་རུ་ཛ྄ཛྷ་ཏི.
ཀ་ཏ་མེ་ཧི པ་ཉྩ་ཧཱ་ཀཱ་རེ་ཧི ཨ་ཝི་ཛྫཱ་ཡ ཨཱ་དཱི་ན་ཝོ ཧོ་ཏི? ཨ་ནི་ཙྩ་ཊྛེ་ན ཨ་ཝི་ཛྫཱ་ཡ ཨཱ་དཱི་ན་ཝོ ཧོ་ཏི, དུ་ཀྑ་ཊྛེ་ན ཨ་ཝི་ཛྫཱ་ཡ ཨཱ་དཱི་ན་ཝོ ཧོ་ཏི, ཨ་ན་ཏྟ་ཊྛེ་ན ཨ་ཝི་ཛྫཱ་ཡ ཨཱ་དཱི་ན་ཝོ ཧོ་ཏི, ས་ནྟཱ་པ་ཊྛེ་ན ཨ་ཝི་ཛྫཱ་ཡ ཨཱ་དཱི་ན་ཝོ ཧོ་ཏི, ཝི་པ་རི་ཎཱ་མ་ཊྛེ་ན ཨ་ཝི་ཛྫཱ་ཡ ཨཱ་དཱི་ན་ཝོ ཧོ་ཏི – ཨི་མེ་ཧི པ་ཉྩ་ཧཱ་ཀཱ་རེ་ཧི ཨ་ཝི་ཛྫཱ་ཡ ཨཱ་དཱི་ན་ཝོ ཧོ་ཏི.
ཀ་ཏ་མེ་ཧི ཨ་ཊྛ་ཧཱ་ཀཱ་རེ་ཧི ཨ་ཝི་ཛྫཱ ནི་རུ་ཛ྄ཛྷ་ཏི? ནི་དཱ་ན་ནི་རོ་དྷེ་ན ཨ་ཝི་ཛྫཱ ནི་རུ་ཛ྄ཛྷ་ཏི, ས་མུ་ད་ཡ་ནི་རོ་དྷེ་ན ཨ་ཝི་ཛྫཱ ནི་རུ་ཛ྄ཛྷ་ཏི, ཛཱ་ཏི་ནི་རོ་དྷེ་ན ཨ་ཝི་ཛྫཱ ནི་རུ་ཛ྄ཛྷ་ཏི, པ་བྷ་ཝ་ནི་རོ་དྷེ་ན [ཨཱ་ཧཱ་ར་ནི་རོ་དྷེ་ན (སྱཱ.)] ཨ་ཝི་ཛྫཱ ནི་རུ་ཛ྄ཛྷ་ཏི, ཧེ་ཏུ་ནི་རོ་དྷེ་ན ཨ་ཝི་ཛྫཱ ནི་རུ་ཛ྄ཛྷ་ཏི, པ་ཙྩ་ཡ་ནི་རོ་དྷེ་ན ཨ་ཝི་ཛྫཱ ནི་རུ་ཛ྄ཛྷ་ཏི, ཉཱ་ཎུ་པྤཱ་དེ་ན ཨ་ཝི་ཛྫཱ ནི་རུ་ཛ྄ཛྷ་ཏི, ནི་རོ་དྷུ་པ་ཊྛཱ་ནེ་ན ཨ་ཝི་ཛྫཱ ནི་རུ་ཛ྄ཛྷ་ཏི – ཨི་མེ་ཧི ཨ་ཊྛ་ཧཱ་ཀཱ་རེ་ཧི ཨ་ཝི་ཛྫཱ ནི་རུ་ཛ྄ཛྷ་ཏི. ཨི་མེ་ཧི པ་ཉྩ་ཧཱ་ཀཱ་རེ་ཧི ཨ་ཝི་ཛྫཱ་ཡ ཨཱ་དཱི་ན་ཝཾ དི་སྭཱ – ཨི་མེ་ཧི ཨ་ཊྛ་ཧཱ་ཀཱ་རེ་ཧི ཨ་ཝི་ཛྫཱ་ནི་རོ་དྷེ ཚ་ནྡ་ཛཱ་ཏོ ཧོ་ཏི ས་དྡྷཱ་དྷི་མུ་ཏྟོ, ཙི་ཏྟ་ཉྩ་སྶ སྭཱ་དྷི་ཊྛི་ཏཾ. ‘‘ཨ་ཝི་ཛྫཱ་ཡ ནི་རོ་དྷཱ་ནུ་པ་སྶཱི ཨ་སྶ་སི་སྶཱ་མཱི’’ཏི སི་ཀྑ་ཏི, ‘‘ཨ་ཝི་ཛྫཱ་ཡ ནི་རོ་དྷཱ་ནུ་པ་སྶཱི པ་སྶ་སི་སྶཱ་མཱི’’ཏི སི་ཀྑ་ཏི.
ཀ་ཏི་ཧཱ་ཀཱ་རེ་ཧི ས་ངྑཱ་རེ་སུ ཨཱ་དཱི་ན་ཝོ ཧོ་ཏི, ཀ་ཏི་ཧཱ་ཀཱ་རེ་ཧི ས་ངྑཱ་རཱ ནི་རུ་ཛ྄ཛྷ་ནྟི…པེ… ཀ་ཏི་ཧཱ་ཀཱ་རེ་ཧི ཝི་ཉྙཱ་ཎེ ཨཱ་དཱི་ན་ཝོ ཧོ་ཏི, ཀ་ཏི་ཧཱ་ཀཱ་རེ་ཧི ཝི་ཉྙཱ་ཎཾ ནི་རུ་ཛ྄ཛྷ་ཏི… ཀ་ཏི་ཧཱ་ཀཱ་རེ་ཧི ནཱ་མ་རཱུ་པེ ཨཱ་དཱི་ན་ཝོ ཧོ་ཏི, ཀ་ཏི་ཧཱ་ཀཱ་རེ་ཧི ནཱ་མ་རཱུ་པཾ ནི་རུ་ཛ྄ཛྷ་ཏི… ཀ་ཏི་ཧཱ་ཀཱ་རེ་ཧི ས་ལཱ༹་ཡ་ཏ་ནེ ཨཱ་དཱི་ན་ཝོ ཧོ་ཏི, ཀ་ཏི་ཧཱ་ཀཱ་རེ་ཧི ས་ལཱ༹་ཡ་ཏ་ནཾ ནི་རུ་ཛ྄ཛྷ་ཏི… ཀ་ཏི་ཧཱ་ཀཱ་རེ་ཧི ཕ་སྶེ ཨཱ་དཱི་ན་ཝོ ཧོ་ཏི, ཀ་ཏི་ཧཱ་ཀཱ་རེ་ཧི ཕ་སྶོ ནི་རུ་ཛ྄ཛྷ་ཏི… ཀ་ཏི་ཧཱ་ཀཱ་རེ་ཧི ཝེ་ད་ནཱ་ཡ ཨཱ་དཱི་ན་ཝོ ཧོ་ཏི, ཀ་ཏི་ཧཱ་ཀཱ་རེ་ཧི ཝེ་ད་ནཱ ནི་རུ་ཛ྄ཛྷ་ཏི… ཀ་ཏི་ཧཱ་ཀཱ་རེ་ཧི ཏ་ཎྷཱ་ཡ ཨཱ་དཱི་ན་ཝོ ཧོ་ཏི, ཀ་ཏི་ཧཱ་ཀཱ་རེ་ཧི ཏ་ཎྷཱ ནི་རུ་ཛ྄ཛྷ་ཏི… ཀ་ཏི་ཧཱ་ཀཱ་རེ་ཧི ཨུ་པཱ་དཱ་ནེ ཨཱ་དཱི་ན་ཝོ ཧོ་ཏི, ཀ་ཏི་ཧཱ་ཀཱ་རེ་ཧི ཨུ་པཱ་དཱ་ནཾ ནི་རུ་ཛ྄ཛྷ་ཏི… ཀ་ཏི་ཧཱ་ཀཱ་རེ་ཧི བྷ་ཝེ ཨཱ་དཱི་ན་ཝོ ཧོ་ཏི, ཀ་ཏི་ཧཱ་ཀཱ་རེ་ཧི བྷ་ཝོ ནི་རུ་ཛ྄ཛྷ་ཏི… ཀ་ཏི་ཧཱ་ཀཱ་རེ་ཧི ཛཱ་ཏི་ཡཱ ཨཱ་དཱི་ན་ཝོ ཧོ་ཏི, ཀ་ཏི་ཧཱ་ཀཱ་རེ་ཧི ཛཱ་ཏི ནི་རུ་ཛ྄ཛྷ་ཏི… ཀ་ཏི་ཧཱ་ཀཱ་རེ་ཧི ཛ་རཱ་མ་ར་ཎེ ཨཱ་དཱི་ན་ཝོ ཧོ་ཏི, ཀ་ཏི་ཧཱ་ཀཱ་རེ་ཧི ཛ་རཱ་མ་ར་ཎཾ ནི་རུ་ཛ྄ཛྷ་ཏི? པ་ཉྩ་ཧཱ་ཀཱ་རེ་ཧི ཛ་རཱ་མ་ར་ཎེ ཨཱ་དཱི་ན་ཝོ ཧོ་ཏི, ཨ་ཊྛ་ཧཱ་ཀཱ་རེ་ཧི ཛ་རཱ་མ་ར་ཎཾ ནི་རུ་ཛ྄ཛྷ་ཏི.
ཀ་ཏ་མེ་ཧི པ་ཉྩ་ཧཱ་ཀཱ་རེ་ཧི ཛ་རཱ་མ་ར་ཎེ ཨཱ་དཱི་ན་ཝོ ཧོ་ཏི? ཨ་ནི་ཙྩ་ཊྛེ་ན ཛ་རཱ་མ་ར་ཎེ ཨཱ་དཱི་ན་ཝོ ཧོ་ཏི, དུ་ཀྑ་ཊྛེ་ན…པེ… ཨ་ན་ཏྟ་ཊྛེ་ན…པེ… ས་ནྟཱ་པ་ཊྛེ་ན…པེ… ཝི་པ་རི་ཎཱ་མ་ཊྛེ་ན ཛ་རཱ་མ་ར་ཎེ ཨཱ་དཱི་ན་ཝོ ཧོ་ཏི – ཨི་མེ་ཧི པ་ཉྩ་ཧཱ་ཀཱ་རེ་ཧི ཛ་རཱ་མ་ར་ཎེ ཨཱ་དཱི་ན་ཝོ ཧོ་ཏི.
ཀ་ཏ་མེ་ཧི ཨ་ཊྛ་ཧཱ་ཀཱ་རེ་ཧི ཛ་རཱ་མ་ར་ཎཾ ནི་རུ་ཛ྄ཛྷ་ཏི? ནི་དཱ་ན་ནི་རོ་དྷེ་ན ཛ་རཱ་མ་ར་ཎཾ ནི་རུ་ཛ྄ཛྷ་ཏི, ས་མུ་ད་ཡ་ནི་རོ་དྷེ་ན…པེ… ཛཱ་ཏི་ནི་རོ་དྷེ་ན…པེ… པ་བྷ་ཝ་ནི་རོ་དྷེ་ན [བྷ་ཝ་ནི་རོ་དྷེ་ན (སྱཱ.)] … ཧེ་ཏུ་ནི་རོ་དྷེ་ན… པ་ཙྩ་ཡ་ནི་རོ་དྷེ་ན… ཉཱ་ཎུ་པྤཱ་དེ་ན…པེ… ནི་རོ་དྷུ་པ་ཊྛཱ་ནེ་ན ཛ་རཱ་མ་ར་ཎཾ ནི་རུ་ཛ྄ཛྷ་ཏི – ཨི་མེ་ཧི ཨ་ཊྛ་ཧཱ་ཀཱ་རེ་ཧི ཛ་རཱ་མ་ར་ཎཾ ནི་རུ་ཛ྄ཛྷ་ཏི. ཨི་མེ་ཧི པ་ཉྩ་ཧཱ་ཀཱ་རེ་ཧི ཛ་རཱ་མ་ར་ཎེ ཨཱ་དཱི་ན་ཝཾ དི་སྭཱ ཨི་མེ་ཧི ཨ་ཊྛ་ཧཱ་ཀཱ་རེ་ཧི ཛ་རཱ་མ་ར་ཎ་ནི་རོ་དྷེ ཚ་ནྡ་ཛཱ་ཏོ ཧོ་ཏི ས་དྡྷཱ་དྷི་མུ་ཏྟོ, ཙི་ཏྟ་ཉྩ་སྶ སྭཱ་དྷི་ཊྛི་ཏཾ. ‘‘ཛ་རཱ་མ་ར་ཎེ ནི་རོ་དྷཱ་ནུ་པ་སྶཱི ཨ་སྶ་སི་སྶཱ་མཱི’’ཏི སི་ཀྑ་ཏི, ‘‘ཛ་རཱ་མ་ར་ཎེ ནི་རོ་དྷཱ་ནུ་པ་སྶཱི པ་སྶ་སི་སྶཱ་མཱི’’ཏི སི་ཀྑ་ཏི. ནི་རོ་དྷཱ་ནུ་པ་སྶཱི ཨ་སྶཱ་ས་པ་སྶཱ་ས་ཝ་སེ་ན དྷ་མྨཱ ཨུ་པ་ཊྛཱ་ནཾ ས་ཏི ཨ་ནུ་པ་སྶ་ནཱ ཉཱ་ཎཾ. དྷ་མྨཱ ཨུ་པ་ཊྛཱ་ནཾ, ནོ ས་ཏི; ས་ཏི ཨུ་པ་ཊྛཱ་ན་ཉྩེ་ཝ ས་ཏི ཙ. ཏཱ་ཡ ས་ཏི་ཡཱ ཏེ་ན ཉཱ་ཎེ་ན ཏེ དྷ་མྨེ ཨ་ནུ་པ་སྶ་ཏི. ཏེ་ན ཝུ་ཙྩ་ཏི – ‘‘དྷ་མྨེ་སུ དྷ་མྨཱ་ནུ་པ་སྶ་ནཱ་ས་ཏི་པ་ཊྛཱ་ན་བྷཱ་ཝ་ནཱ’’ཏི.
ཨ་ནུ་པ་སྶ་ཏཱིཏི ཀ་ཐཾ ཏེ དྷ་མྨེ ཨ་ནུ་པ་སྶ་ཏི…པེ… ཨེ་ཝཾ ཏེ དྷ་མྨེ ཨ་ནུ་པ་སྶ་ཏི. བྷཱ་ཝ་ནཱཏི ཙ་ཏ་སྶོ བྷཱ་ཝ་ནཱ…པེ… ཨཱ་སེ་ཝ་ན་ཊྛེ་ན བྷཱ་ཝ་ནཱ. ནི་རོ་དྷཱ་ནུ་པ་སྶཱི ཨ་སྶཱ་ས་པ་སྶཱ་སཱ་ནཾ སཾ་ཝ་ར་ཊྛེ་ན སཱི་ལ་ཝི་སུ་དྡྷི…པེ… ནི་རོ་དྷཱ་ནུ་པ་སྶཱི ཨ་སྶཱ་ས་པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ…པེ… པ་ཛཱ་ན་ནྟོ ཨི་ནྡྲི་ཡཱ་ནི ས་མོ་དྷཱ་ནེ་ཏི. ཏེ་ན ཝུ་ཙྩ་ཏི – ‘‘ས་མ་ཏྠ་ཉྩ པ་ཊི་ཝི་ཛ྄ཛྷ་ཏཱི’’ཏི.
༡༨༢. ཀ་ཐཾ ‘‘པ་ཊི་ནི་སྶ་གྒཱ་ནུ་པ་སྶཱི ཨ་སྶ་སི་སྶཱ་མཱི’’ཏི སི་ཀྑ་ཏི, ‘‘པ་ཊི་ནི་སྶ་གྒཱ་ནུ་པ་སྶཱི པ་སྶ་སི་སྶཱ་མཱི’’ཏི སི་ཀྑ་ཏི? པ་ཊི་ནི་སྶ་གྒཱཏི དྭེ པ་ཊི་ནི་སྶ་གྒཱ – པ་རི་ཙྩཱ་ག་པ་ཊི་ནི་སྶ་གྒོ ཙ པ་ཀྑ་ནྡ་ན་པ་ཊི་ནི་སྶ་གྒོ ཙ. རཱུ་པཾ པ་རི་ཙྩ་ཛ་ཏཱི་ཏི – པ་རི་ཙྩཱ་ག་པ་ཊི་ནི་སྶ་གྒོ. རཱུ་པ་ནི་རོ་དྷེ ནི་བྦཱ་ནེ ཙི་ཏྟཾ པ་ཀྑ་ནྡ་ཏཱི་ཏི – པ་ཀྑ་ནྡ་ན་པ་ཊི་ནི་སྶ་གྒོ. ‘‘རཱུ་པེ པ་ཊི་ནི་སྶ་གྒཱ་ནུ་པ་སྶཱི ཨ་སྶ་སི་སྶཱ་མཱི’’ཏི སི་ཀྑ་ཏི, ‘‘རཱུ་པེ པ་ཊི་ནི་སྶ་གྒཱ་ནུ་པ་སྶཱི པ་སྶ་སི་སྶཱ་མཱི’’ཏི སི་ཀྑ་ཏི. ཝེ་ད་ནཾ…པེ… ས་ཉྙཾ… ས་ངྑཱ་རེ… ཝི་ཉྙཱ་ཎཾ… ཙ་ཀྑུཾ…པེ… ཛ་རཱ་མ་ར་ཎཾ པ་རི་ཙྩ་ཛ་ཏཱི་ཏི – པ་རི་ཙྩཱ་ག་པ་ཊི་ནི་སྶ་གྒོ. ཛ་རཱ་མ་ར་ཎ་ནི་རོ་དྷེ ནི་བྦཱ་ནེ ཙི་ཏྟཾ པ་ཀྑ་ནྡ་ཏཱི་ཏི – པ་ཀྑ་ནྡ་ན་པ་ཊི་ནི་སྶ་གྒོ. ‘‘ཛ་རཱ་མ་ར་ཎེ པ་ཊི་ནི་སྶ་གྒཱ་ནུ་པ་སྶཱི ཨ་སྶ་སི་སྶཱ་མཱི’’ཏི སི་ཀྑ་ཏི, ‘‘ཛ་རཱ་མ་ར་ཎེ པ་ཊི་ནི་སྶ་གྒཱ་ནུ་པ་སྶཱི པ་སྶ་སི་སྶཱ་མཱི’’ཏི སི་ཀྑ་ཏི. པ་ཊི་ནི་སྶ་གྒཱ་ནུ་པ་སྶཱི ཨ་སྶཱ་ས་པ་སྶཱ་ས་ཝ་སེ་ན དྷ་མྨཱ ཨུ་པ་ཊྛཱ་ནཾ ས་ཏི ཨ་ནུ་པ་སྶ་ནཱ ཉཱ་ཎཾ. དྷ་མྨཱ ཨུ་པ་ཊྛཱ་ནཾ, ནོ ས་ཏི; ས་ཏི ཨུ་པ་ཊྛཱ་ན་ཉྩེ་ཝ ས་ཏི ཙ. ཏཱ་ཡ ས་ཏི་ཡཱ ཏེ་ན ཉཱ་ཎེ་ན ཏེ དྷ་མྨེ ཨ་ནུ་པ་སྶ་ཏི. ཏེ་ན ཝུ་ཙྩ་ཏི – ‘‘དྷ་མྨེ་སུ དྷ་མྨཱ་ནུ་པ་སྶ་ནཱ་ས་ཏི་པ་ཊྛཱ་ན་བྷཱ་ཝ་ནཱ’’ཏི.
ཨ་ནུ་པ་སྶ་ཏཱིཏི ཀ་ཐཾ ཏེ དྷ་མྨེ ཨ་ནུ་པ་སྶ་ཏི? ཨ་ནི་ཙྩ་ཏོ ཨ་ནུ་པ་སྶ་ཏི, ནོ ནི་ཙྩ་ཏོ…པེ… པ་ཊི་ནི་སྶ་ཛྫ་ཏི, ནོ ཨཱ་དི་ཡ་ཏི. ཨ་ནི་ཙྩ་ཏོ ཨ་ནུ་པ་སྶ་ནྟོ ནི་ཙྩ་ས་ཉྙཾ པ་ཛ་ཧ་ཏི…པེ… པ་ཊི་ནི་སྶ་ཛྫ་ནྟོ ཨཱ་དཱ་ནཾ པ་ཛ་ཧ་ཏི. ཨེ་ཝཾ ཏེ དྷ་མྨེ ཨ་ནུ་པ་སྶ་ཏི. བྷཱ་ཝ་ནཱཏི ཙ་ཏ་སྶོ བྷཱ་ཝ་ནཱ. ཏ་ཏྠ ཛཱ་ཏཱ་ནཾ དྷ་མྨཱ་ནཾ ཨ་ན་ཏི་ཝ་ཏྟ་ན་ཊྛེ་ན བྷཱ་ཝ་ནཱ…པེ… ཨཱ་སེ་ཝ་ན་ཊྛེ་ན བྷཱ་ཝ་ནཱ. པ་ཊི་ནི་སྶ་གྒཱ་ནུ་པ་སྶཱི ཨ་སྶཱ་ས་པ་སྶཱ་སཱ་ནཾ སཾ་ཝ་ར་ཊྛེ་ན སཱི་ལ་ཝི་སུ་དྡྷི, ཨ་ཝི་ཀྑེ་པ་ཊྛེ་ན ཙི་ཏྟ་ཝི་སུ་དྡྷི, ད་སྶ་ན་ཊྛེ་ན དི་ཊྛི་ཝི་སུ་དྡྷི. ཡོ ཏ་ཏྠ སཾ་ཝ་ར་ཊྛོ, ཨ་ཡཾ ཨ་དྷི་སཱི་ལ་སི་ཀྑཱ; ཡོ ཏ་ཏྠ ཨ་ཝི་ཀྑེ་པ་ཊྛོ, ཨ་ཡཾ ཨ་དྷི་ཙི་ཏྟ་སི་ཀྑཱ; ཡོ ཏ་ཏྠ ད་སྶ་ན་ཊྛོ, ཨ་ཡཾ ཨ་དྷི་པ་ཉྙཱ་སི་ཀྑཱ – ཨི་མཱ ཏི་སྶོ སི་ཀྑཱ་ཡོ ཨཱ་ཝ་ཛྫ་ནྟོ སི་ཀྑ་ཏི ཛཱ་ན་ནྟོ སི་ཀྑ་ཏི…པེ… ས་ཙྪི་ཀཱ་ཏ་བྦཾ ས་ཙྪི་ཀ་རོ་ནྟོ སི་ཀྑ་ཏི.
པ་ཊི་ནི་སྶ་གྒཱ་ནུ་པ་སྶཱི ཨ་སྶཱ་ས་པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ཏོ ཝི་དི་ཏཱ ཝེ་ད་ནཱ ཨུ་པྤ་ཛྫ་ནྟི, ཝི་དི་ཏཱ ཨུ་པ་ཊྛ་ཧ་ནྟི, ཝི་དི་ཏཱ ཨ་བྦྷ་ཏྠཾ ག་ཙྪ་ནྟི …པེ… པ་ཊི་ནི་སྶ་གྒཱ་ནུ་པ་སྶཱི ཨ་སྶཱ་ས་པ་སྶཱ་ས་ཝ་སེ་ན ཙི་ཏྟ་སྶ ཨེ་ཀ་གྒ་ཏཾ ཨ་ཝི་ཀྑེ་པཾ པ་ཛཱ་ན་ནྟོ ཨི་ནྡྲི་ཡཱ་ནི ས་མོ་དྷཱ་ནེ་ཏི གོ་ཙ་ར་ཉྩ པ་ཛཱ་ནཱ་ཏི ས་མ་ཏྠ་ཉྩ པ་ཊི་ཝི་ཛ྄ཛྷ་ཏི; བ་ལཱ་ནི ས་མོ་དྷཱ་ནེ་ཏི… བོ་ཛ྄ཛྷ་ངྒེ ས་མོ་དྷཱ་ནེ་ཏི… མ་གྒཾ ས་མོ་དྷཱ་ནེ་ཏི… དྷ་མྨེ ས་མོ་དྷཱ་ནེ་ཏི གོ་ཙ་ར་ཉྩ པ་ཛཱ་ནཱ་ཏི ས་མ་ཏྠ་ཉྩ པ་ཊི་ཝི་ཛ྄ཛྷ་ཏི.
ཨི་ནྡྲི་ཡཱ་ནི ས་མོ་དྷཱ་ནེ་ཏཱིཏི ཀ་ཐཾ ཨི་ནྡྲི་ཡཱ་ནི ས་མོ་དྷཱ་ནེ་ཏི? ཨ་དྷི་མོ་ཀྑ་ཊྛེ་ན ས་དྡྷི་ནྡྲི་ཡཾ ས་མོ་དྷཱ་ནེ་ཏི…པེ… ཏེ་ན ཝུ་ཙྩ་ཏི – ‘‘ས་མ་ཏྠ་ཉྩ པ་ཊི་ཝི་ཛ྄ཛྷ་ཏཱི’’ཏི.
ཨ་ཊྛ ཨ་ནུ་པ་སྶ་ནེ ཉཱ་ཎཱ་ནི ཨ་ཊྛ ཙ ཨུ་པ་ཊྛཱ་ནཱ་ནུ་སྶ་ཏི་ཡོ ཙ་ཏྟཱ་རི སུ་ཏྟ་ནྟི་ཀ་ཝ་ཏྠཱུ་ནི དྷ་མྨེ་སུ དྷ་མྨཱ་ནུ་པ་སྶ་ནཱ་ཡ. ཨི་མཱ་ནི བཱ་ཏྟིཾ་ས ས་ཏོ་ཀཱ་རི་སྶ ཉཱ་ཎཱ་ནི.
ས་ཏོ་ཀཱ་རི་ཉཱ་ཎ་ནི་དྡེ་སོ པ་ཉྩ་མོ.