༡༠. མ་ཎྜ་པེ་ཡྻ་ཀ་ཐཱ
༢༣༨. ‘‘མ་ཎྜ་པེ་ཡྻ་མི་དཾ, བྷི་ཀྑ་ཝེ, བྲ་ཧྨ་ཙ་རི་ཡཾ. ས་ཏྠཱ ས་མྨུ་ཁཱི་བྷཱུ་ཏོ ཏི་དྷ་ཏྟ་མ་ཎྜོ [ཏི་ཝི་དྷོ མ་ཎྜོ (བ་ཧཱུ་སུ) ཨ་ཊྛ་ཀ་ཐཱ ཨོ་ལོ་ཀེ་ཏ་བྦཱ]. ས་ཏྠ་རི ས་མྨུ་ཁཱི་བྷཱུ་ཏེ དེ་ས་ནཱ་མ་ཎྜོ, པ་ཊི་གྒ་ཧ་མ་ཎྜོ, བྲ་ཧྨ་ཙ་རི་ཡ་མ་ཎྜོ’’.
ཀ་ཏ་མོ དེ་ས་ནཱ་མ་ཎྜོ? ཙ་ཏུ་ནྣཾ ཨ་རི་ཡ་ས་ཙྩཱ་ནཾ ཨཱ་ཙི་ཀྑ་ནཱ དེ་ས་ནཱ པ་ཉྙཱ་པ་ནཱ པ་ཊྛ་པ་ནཱ ཝི་ཝ་ར་ཎཱ ཝི་བྷ་ཛ་ནཱ ཨུ་ཏྟཱ་ནཱི་ཀ་མྨཾ [ཨུ་ཏྟཱ་ནི་ཀ་མྨཾ (ཀ.)], ཙ་ཏུ་ནྣཾ ས་ཏི་པ་ཊྛཱ་ནཱ་ནཾ…པེ… ཙ་ཏུ་ནྣཾ ས་མྨ་པྤ་དྷཱ་ནཱ་ནཾ… ཙ་ཏུ་ནྣཾ ཨི་དྡྷི་པཱ་དཱ་ནཾ… པ་ཉྩ་ནྣཾ ཨི་ནྡྲི་ཡཱ་ནཾ… པ་ཉྩ་ནྣཾ བ་ལཱ་ནཾ… ས་ཏྟ་ནྣཾ བོ་ཛ྄ཛྷ་ངྒཱ་ནཾ… ཨ་རི་ཡ་སྶ ཨ་ཊྛ་ངྒི་ཀ་སྶ མ་གྒ་སྶ ཨཱ་ཙི་ཀྑ་ནཱ དེ་ས་ནཱ པ་ཉྙཱ་པ་ནཱ པ་ཊྛ་པ་ནཱ ཝི་ཝ་ར་ཎཱ ཝི་བྷ་ཛ་ནཱ ཨུ་ཏྟཱ་ནཱི་ཀ་མྨཾ – ཨ་ཡཾ དེ་ས་ནཱ་མ་ཎྜོ.
ཀ་ཏ་མོ པ་ཊི་གྒ་ཧ་མ་ཎྜོ? བྷི་ཀྑཱུ བྷི་ཀྑུ་ནི་ཡོ ཨུ་པཱ་ས་ཀཱ ཨུ་པཱ་སི་ཀཱ་ཡོ དེ་ཝཱ མ་ནུ་སྶཱ ཡེ ཝཱ པ་ན་ཉྙེ་པི ཀེ་ཙི ཝི་ཉྙཱ་ཏཱ་རོ – ཨ་ཡཾ པ་ཊི་གྒ་ཧ་མ་ཎྜོ.
ཀ་ཏ་མོ བྲ་ཧྨ་ཙ་རི་ཡ་མ་ཎྜོ? ཨ་ཡ་མེ་ཝ ཨ་རི་ཡོ ཨ་ཊྛ་ངྒི་ཀོ མ་གྒོ, སེ་ཡྻ་ཐི་དཾ – ས་མྨཱ་དི་ཊྛི, ས་མྨཱ་ས་ངྐ་པྤོ, ས་མྨཱ་ཝཱ་ཙཱ, ས་མྨཱ་ཀ་མྨ་ནྟོ, ས་མྨཱ་ཨཱ་ཛཱི་ཝོ, ས་མྨཱ་ཝཱ་ཡཱ་མོ, ས་མྨཱ་ས་ཏི, ས་མྨཱ་ས་མཱ་དྷི – ཨ་ཡཾ བྲ་ཧྨ་ཙ་རི་ཡ་མ་ཎྜོ.
༢༣༩. ཨ་དྷི་མོ་ཀྑ་མ་ཎྜོ ས་དྡྷི་ནྡྲི་ཡཾ, ཨ་སྶ་དྡྷི་ཡཾ ཀ་ས་ཊོ; ཨ་སྶ་དྡྷི་ཡཾ ཀ་ས་ཊཾ ཚ་ཌྜེ་ཏྭཱ ས་དྡྷི་ནྡྲི་ཡ་སྶ ཨ་དྷི་མོ་ཀྑ་མ་ཎྜཾ པི་ཝ་ཏཱི་ཏི – མ་ཎྜ་པེ་ཡྻཾ. པ་གྒ་ཧ་མ་ཎྜོ ཝཱི་རི་ཡི་ནྡྲི་ཡཾ, ཀོ་ས་ཛྫཾ ཀ་ས་ཊོ; ཀོ་ས་ཛྫཾ ཀ་ས་ཊཾ ཚ་ཌྜེ་ཏྭཱ ཝཱི་རི་ཡི་ནྡྲི་ཡ་སྶ པ་གྒ་ཧ་མ་ཎྜཾ པི་ཝ་ཏཱི་ཏི – མ་ཎྜ་པེ་ཡྻཾ. ཨུ་པ་ཊྛཱ་ན་མ་ཎྜོ ས་ཏི་ནྡྲི་ཡཾ, པ་མཱ་དོ ཀ་ས་ཊོ; པ་མཱ་དཾ ཀ་ས་ཊཾ ཚ་ཌྜེ་ཏྭཱ ས་ཏི་ནྡྲི་ཡ་སྶ ཨུ་པ་ཊྛཱ་ན་མ་ཎྜཾ པི་ཝ་ཏཱི་ཏི – མ་ཎྜ་པེ་ཡྻཾ. ཨ་ཝི་ཀྑེ་པ་མ་ཎྜོ ས་མཱ་དྷི་ནྡྲི་ཡཾ, ཨུ་དྡྷ་ཙྩཾ ཀ་ས་ཊོ; ཨུ་དྡྷ་ཙྩཾ ཀ་ས་ཊཾ ཚ་ཌྜེ་ཏྭཱ ས་མཱ་དྷི་ནྡྲི་ཡ་སྶ ཨ་ཝི་ཀྑེ་པ་མ་ཎྜཾ པི་ཝ་ཏཱི་ཏི – མ་ཎྜ་པེ་ཡྻཾ. ད་སྶ་ན་མ་ཎྜོ པ་ཉྙི་ནྡྲི་ཡཾ, ཨ་ཝི་ཛྫཾ ཀ་ས་ཊོ; ཨ་ཝི་ཛྫཾ ཀ་ས་ཊཾ ཚ་ཌྜེ་ཏྭཱ པ་ཉྙི་ནྡྲི་ཡ་སྶ ད་སྶ་ན་མ་ཎྜཾ པི་ཝ་ཏཱི་ཏི – མ་ཎྜ་པེ་ཡྻཾ.
ཨ་སྶ་དྡྷི་ཡེ ཨ་ཀ་མྤི་ཡ་མ་ཎྜོ ས་དྡྷཱ་བ་ལཾ, ཨ་སྶ་དྡྷི་ཡཾ ཀ་ས་ཊོ; ཨ་སྶ་དྡྷི་ཡཾ ཀ་ས་ཊཾ ཚ་ཌྜེ་ཏྭཱ ས་དྡྷཱ་བ་ལ་སྶ ཨ་སྶ་དྡྷི་ཡེ ཨ་ཀ་མྤི་ཡ་མ་ཎྜཾ པི་ཝ་ཏཱི་ཏི – མ་ཎྜ་པེ་ཡྻཾ. ཀོ་ས་ཛྫེ ཨ་ཀ་མྤི་ཡ་མ་ཎྜོ ཝཱི་རི་ཡ་བ་ལཾ, ཀོ་ས་ཛྫཾ ཀ་ས་ཊོ; ཀོ་ས་ཛྫཾ ཀ་ས་ཊཾ ཚ་ཌྜེ་ཏྭཱ ཝཱི་རི་ཡ་བ་ལ་སྶ ཀོ་ས་ཛྫེ ཨ་ཀ་མྤི་ཡ་མ་ཎྜཾ པི་ཝ་ཏཱི་ཏི – མ་ཎྜ་པེ་ཡྻཾ. པ་མཱ་དེ ཨ་ཀ་མྤི་ཡ་མ་ཎྜོ ས་ཏི་བ་ལཾ, པ་མཱ་དོ ཀ་ས་ཊོ; པ་མཱ་དཾ ཀ་ས་ཊཾ ཚ་ཌྜེ་ཏྭཱ ས་ཏི་བ་ལ་སྶ པ་མཱ་དེ ཨ་ཀ་མྤི་ཡ་མ་ཎྜཾ པི་ཝ་ཏཱི་ཏི – མ་ཎྜ་པེ་ཡྻཾ. ཨུ་དྡྷ་ཙྩེ ཨ་ཀ་མྤི་ཡ་མ་ཎྜོ ས་མཱ་དྷི་བ་ལཾ, ཨུ་དྡྷ་ཙྩཾ ཀ་ས་ཊོ; ཨུ་དྡྷ་ཙྩཾ ཀ་ས་ཊཾ ཚ་ཌྜེ་ཏྭཱ ས་མཱ་དྷི་བ་ལ་སྶ ཨུ་དྡྷ་ཙྩེ ཨ་ཀ་མྤི་ཡ་མ་ཎྜཾ པི་ཝ་ཏཱི་ཏི – མ་ཎྜ་པེ་ཡྻཾ. ཨ་ཝི་ཛྫཱ་ཡ ཨ་ཀ་མྤི་ཡ་མ་ཎྜོ པ་ཉྙཱ་བ་ལཾ, ཨ་ཝི་ཛྫཱ ཀ་ས་ཊོ; ཨ་ཝི་ཛྫཾ ཀ་ས་ཊཾ ཚ་ཌྜེ་ཏྭཱ པ་ཉྙཱ་བ་ལ་སྶ ཨ་ཝི་ཛྫཱ་ཡ ཨ་ཀ་མྤི་ཡ་མ་ཎྜཾ པི་ཝ་ཏཱི་ཏི – མ་ཎྜ་པེ་ཡྻཾ.
ཨུ་པ་ཊྛཱ་ན་མ་ཎྜོ ས་ཏི་ས་མྦོ་ཛ྄ཛྷ་ངྒཱ, པ་མཱ་དོ ཀ་ས་ཊོ; པ་མཱ་དཾ ཀ་ས་ཊཾ ཚ་ཌྜེ་ཏྭཱ ས་ཏི་ས་མྦོ་ཛ྄ཛྷ་ངྒ་སྶ ཨུ་པ་ཊྛཱ་ན་མ་ཎྜཾ པི་ཝ་ཏཱི་ཏི – མ་ཎྜ་པེ་ཡྻཾ. པ་ཝི་ཙ་ཡ་མ་ཎྜོ དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒོ, ཨ་ཝི་ཛྫཱ ཀ་ས་ཊོ; ཨ་ཝི་ཛྫཾ ཀ་ས་ཊཾ ཚ་ཌྜེ་ཏྭཱ དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒ་སྶ པ་ཝི་ཙ་ཡ་མ་ཎྜཾ པི་ཝ་ཏཱི་ཏི – མ་ཎྜ་པེ་ཡྻཾ. པ་གྒ་ཧ་མ་ཎྜོ ཝཱི་རི་ཡ་ས་མྦོ་ཛ྄ཛྷ་ངྒོ, ཀོ་ས་ཛྫཾ ཀ་ས་ཊོ; ཀོ་ས་ཛྫཾ ཀ་ས་ཊཾ ཚ་ཌྜེ་ཏྭཱ ཝཱི་རི་ཡ་ས་མྦོ་ཛ྄ཛྷ་ངྒ་སྶ པ་གྒ་ཧ་མ་ཎྜཾ པི་ཝ་ཏཱི་ཏི – མ་ཎྜ་པེ་ཡྻཾ. ཕ་ར་ཎ་མ་ཎྜོ པཱི་ཏི་ས་མྦོ་ཛ྄ཛྷ་ངྒོ, པ་རི་ལཱ༹་ཧོ ཀ་ས་ཊོ; པ་རི་ལཱ༹་ཧཾ ཀ་ས་ཊཾ ཚ་ཌྜེ་ཏྭཱ པཱི་ཏི་ས་མྦོ་ཛ྄ཛྷ་ངྒ་སྶ ཕ་ར་ཎ་མ་ཎྜཾ པི་ཝ་ཏཱི་ཏི – མ་ཎྜ་པེ་ཡྻཾ. ཨུ་པ་ས་མ་མ་ཎྜོ པ་སྶ་དྡྷི་ས་མྦོ་ཛ྄ཛྷ་ངྒོ, དུ་ཊྛུ་ལླཾ ཀ་ས་ཊོ; དུ་ཊྛུ་ལླཾ ཀ་ས་ཊཾ ཚ་ཌྜེ་ཏྭཱ པ་སྶ་དྡྷི་ས་མྦོ་ཛ྄ཛྷ་ངྒ་སྶ ཨུ་པ་ས་མ་མ་ཎྜཾ པི་ཝ་ཏཱི་ཏི – མ་ཎྜ་པེ་ཡྻཾ. ཨ་ཝི་ཀྑེ་པ་མ་ཎྜོ ས་མཱ་དྷི་ས་མྦོ་ཛ྄ཛྷ་ངྒོ, ཨུ་དྡྷ་ཙྩཾ ཀ་ས་ཊོ; ཨུ་དྡྷ་ཙྩཾ ཀ་ས་ཊཾ ཚ་ཌྜེ་ཏྭཱ ས་མཱ་དྷི་ས་མྦོ་ཛ྄ཛྷ་ངྒ་སྶ ཨ་ཝི་ཀྑེ་པ་མ་ཎྜཾ པི་ཝ་ཏཱི་ཏི – མ་ཎྜ་པེ་ཡྻཾ. པ་ཊི་ས་ངྑཱ་ན་མ་ཎྜོ ཨུ་པེ་ཀྑཱ་ས་མྦོ་ཛ྄ཛྷ་ངྒོ, ཨ་པྤ་ཊི་ས་ངྑཱ ཀ་ས་ཊོ; ཨ་པྤ་ཊི་ས་ངྑཾ ཀ་ས་ཊཾ ཚ་ཌྜེ་ཏྭཱ ཨུ་པེ་ཀྑཱ་ས་མྦོ་ཛ྄ཛྷ་ངྒ་སྶ པ་ཊི་ས་ངྑཱ་ན་མ་ཎྜཾ པི་ཝ་ཏཱི་ཏི – མ་ཎྜ་པེ་ཡྻཾ.
ད་སྶ་ན་མ་ཎྜོ ས་མྨཱ་དི་ཊྛི, མི་ཙྪཱ་དི་ཊྛི ཀ་ས་ཊོ; མི་ཙྪཱ་དི་ཊྛིཾ ཀ་ས་ཊཾ ཚ་ཌྜེ་ཏྭཱ ས་མྨཱ་དི་ཊྛི་ཡཱ ད་སྶ་ན་མ་ཎྜཾ པི་ཝ་ཏཱི་ཏི – མ་ཎྜ་པེ་ཡྻཾ. ཨ་བྷི་ནི་རོ་པ་ན་མ་ཎྜོ ས་མྨཱ་ས་ངྐ་པྤོ, མི་ཙྪཱ་ས་ངྐ་པྤོ ཀ་ས་ཊོ; མི་ཙྪཱ་ས་ངྐ་པྤཾ ཀ་ས་ཊཾ ཚ་ཌྜེ་ཏྭཱ ས་མྨཱ་ས་ངྐ་པྤ་སྶ ཨ་བྷི་ནི་རོ་པ་ན་མ་ཎྜཾ པི་ཝ་ཏཱི་ཏི – མ་ཎྜ་པེ་ཡྻཾ. པ་རི་གྒ་ཧ་མ་ཎྜོ ས་མྨཱ་ཝཱ་ཙཱ, མི་ཙྪཱ་ཝཱ་ཙཱ ཀ་ས་ཊོ; མི་ཙྪཱ་ཝཱ་ཙཾ ཀ་ས་ཊཾ ཚ་ཌྜེ་ཏྭཱ ས་མྨཱ་ཝཱ་ཙཱ་ཡ པ་རི་གྒ་ཧ་མ་ཎྜཾ པི་ཝ་ཏཱི་ཏི – མ་ཎྜ་པེ་ཡྻཾ. ས་མུ་ཊྛཱ་ན་མ་ཎྜོ ས་མྨཱ་ཀ་མྨ་ནྟོ, མི་ཙྪཱ་ཀ་མྨ་ནྟོ ཀ་ས་ཊོ; མི་ཙྪཱ་ཀ་མྨ་ནྟཾ ཀ་ས་ཊཾ ཚ་ཌྜེ་ཏྭཱ ས་མྨཱ་ཀ་མྨ་ནྟ་སྶ ས་མུ་ཊྛཱ་ན་མ་ཎྜཾ པི་ཝ་ཏཱི་ཏི – མ་ཎྜ་པེ་ཡྻཾ. ཝོ་དཱ་ན་མ་ཎྜོ ས་མྨཱ་ཨཱ་ཛཱི་ཝོ, མི་ཙྪཱ་ཨཱ་ཛཱི་ཝོ ཀ་ས་ཊོ; མི་ཙྪཱ་ཨཱ་ཛཱི་ཝཾ ཀ་ས་ཊཾ ཚ་ཌྜེ་ཏྭཱ ས་མྨཱ་ཨཱ་ཛཱི་ཝ་སྶ ཝོ་དཱ་ན་མ་ཎྜཾ པི་ཝ་ཏཱི་ཏི – མ་ཎྜ་པེ་ཡྻཾ. པ་གྒ་ཧ་མ་ཎྜོ ས་མྨཱ་ཝཱ་ཡཱ་མོ, མི་ཙྪཱ་ཝཱ་ཡཱ་མོ ཀ་ས་ཊོ; མི་ཙྪཱ་ཝཱ་ཡཱ་མཾ ཀ་ས་ཊཾ ཚ་ཌྜེ་ཏྭཱ ས་མྨཱ་ཝཱ་ཡཱ་མ་སྶ པ་གྒ་ཧ་མ་ཎྜཾ པི་ཝ་ཏཱི་ཏི – མ་ཎྜ་པེ་ཡྻཾ. ཨུ་པ་ཊྛཱ་ན་མ་ཎྜོ ས་མྨཱ་ས་ཏི, མི་ཙྪཱ་ས་ཏི ཀ་ས་ཊོ; མི་ཙྪཱ་ས་ཏིཾ ཀ་ས་ཊཾ ཚ་ཌྜེ་ཏྭཱ ས་མྨཱ་ས་ཏི་ཡཱ ཨུ་པ་ཊྛཱ་ན་མ་ཎྜཾ པི་ཝ་ཏཱི་ཏི – མ་ཎྜ་པེ་ཡྻཾ. ཨ་ཝི་ཀྑེ་པ་མ་ཎྜོ ས་མྨཱ་ས་མཱ་དྷི, མི་ཙྪཱ་ས་མཱ་དྷི ཀ་ས་ཊོ; མི་ཙྪཱ་ས་མཱ་དྷིཾ ཀ་ས་ཊཾ ཚ་ཌྜེ་ཏྭཱ ས་མྨཱ་ས་མཱ་དྷི་སྶ ཨ་ཝི་ཀྑེ་པ་མ་ཎྜཾ པི་ཝ་ཏཱི་ཏི – མ་ཎྜ་པེ་ཡྻཾ.
༢༤༠. ཨ་ཏྠི མ་ཎྜོ, ཨ་ཏྠི པེ་ཡྻཾ, ཨ་ཏྠི ཀ་ས་ཊོ. ཨ་དྷི་མོ་ཀྑ་མ་ཎྜོ ས་དྡྷི་ནྡྲི་ཡཾ, ཨ་སྶ་དྡྷི་ཡཾ ཀ་ས་ཊོ; ཡོ ཏ་ཏྠ ཨ་ཏྠ་ར་སོ དྷ་མྨ་ར་སོ ཝི་མུ་ཏྟི་ར་སོ – ཨི་དཾ པེ་ཡྻཾ. པ་གྒ་ཧ་མ་ཎྜོ ཝཱི་རི་ཡི་ནྡྲི་ཡཾ, ཀོ་ས་ཛྫཾ ཀ་ས་ཊོ; ཡོ ཏ་ཏྠ ཨ་ཏྠ་ར་སོ དྷ་མྨ་ར་སོ ཝི་མུ་ཏྟི་ར་སོ – ཨི་དཾ པེ་ཡྻཾ. ཨུ་པ་ཊྛཱ་ན་མ་ཎྜོ ས་ཏི་ནྡྲི་ཡཾ, པ་མཱ་དོ ཀ་ས་ཊོ; ཡོ ཏ་ཏྠ ཨ་ཏྠ་ར་སོ དྷ་མྨ་ར་སོ ཝི་མུ་ཏྟི་ར་སོ – ཨི་དཾ པེ་ཡྻཾ. ཨ་ཝི་ཀྑེ་པ་མ་ཎྜོ ས་མཱ་དྷི་ནྡྲི་ཡཾ, ཨུ་དྡྷ་ཙྩཾ ཀ་ས་ཊོ; ཡོ ཏ་ཏྠ ཨ་ཏྠ་ར་སོ དྷ་མྨ་ར་སོ ཝི་མུ་ཏྟི་ར་སོ – ཨི་དཾ པེ་ཡྻཾ. ད་སྶ་ན་མ་ཎྜོ པ་ཉྙི་ནྡྲི་ཡཾ, ཨ་ཝི་ཛྫཱ ཀ་ས་ཊོ; ཡོ ཏ་ཏྠ ཨ་ཏྠ་ར་སོ དྷ་མྨ་ར་སོ ཝི་མུ་ཏྟི་ར་སོ – ཨི་དཾ པེ་ཡྻཾ.
ཨ་སྶ་དྡྷི་ཡེ ཨ་ཀ་མྤི་ཡ་མ་ཎྜོ ས་དྡྷཱ་བ་ལཾ, ཨ་སྶ་དྡྷི་ཡཾ ཀ་ས་ཊོ; ཡོ ཏ་ཏྠ ཨ་ཏྠ་ར་སོ དྷ་མྨ་ར་སོ ཝི་མུ་ཏྟི་ར་སོ – ཨི་དཾ པེ་ཡྻཾ. ཀོ་ས་ཛྫེ ཨ་ཀ་མྤི་ཡ་མ་ཎྜོ ཝཱི་རི་ཡ་བ་ལཾ, ཀོ་ས་ཛྫཾ ཀ་ས་ཊོ; ཡོ ཏ་ཏྠ ཨ་ཏྠ་ར་སོ དྷ་མྨ་ར་སོ ཝི་མུ་ཏྟི་ར་སོ – ཨི་དཾ པེ་ཡྻཾ. པ་མཱ་དེ ཨ་ཀ་མྤི་ཡ་མ་ཎྜོ ས་ཏི་བ་ལཾ, པ་མཱ་དོ ཀ་ས་ཊོ; ཡོ ཏ་ཏྠ ཨ་ཏྠ་ར་སོ དྷ་མྨ་ར་སོ ཝི་མུ་ཏྟི་ར་སོ – ཨི་དཾ པེ་ཡྻཾ. ཨུ་དྡྷ་ཙྩེ ཨ་ཀ་མྤི་ཡ་མ་ཎྜོ ས་མཱ་དྷི་བ་ལཾ, ཨུ་དྡྷ་ཙྩཾ ཀ་ས་ཊོ; ཡོ ཏ་ཏྠ ཨ་ཏྠ་ར་སོ དྷ་མྨ་ར་སོ ཝི་མུ་ཏྟི་ར་སོ – ཨི་དཾ པེ་ཡྻཾ. ཨ་ཝི་ཛྫཱ་ཡ ཨ་ཀ་མྤི་ཡ་མ་ཎྜོ པ་ཉྙཱ་བ་ལཾ, ཨ་ཝི་ཛྫཱ ཀ་ས་ཊོ; ཡོ ཏ་ཏྠ ཨ་ཏྠ་ར་སོ དྷ་མྨ་ར་སོ ཝི་མུ་ཏྟི་ར་སོ – ཨི་དཾ པེ་ཡྻཾ.
ཨུ་པ་ཊྛཱ་ན་མ་ཎྜོ ས་ཏི་ས་མྦོ་ཛ྄ཛྷ་ངྒོ, པ་མཱ་དོ ཀ་ས་ཊོ; ཡོ ཏ་ཏྠ ཨ་ཏྠ་ར་སོ དྷ་མྨ་ར་སོ ཝི་མུ་ཏྟི་ར་སོ – ཨི་དཾ པེ་ཡྻཾ. པ་ཝི་ཙ་ཡ་མ་ཎྜོ དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒོ, ཨ་ཝི་ཛྫཱ ཀ་ས་ཊོ; ཡོ ཏ་ཏྠ ཨ་ཏྠ་ར་སོ དྷ་མྨ་ར་སོ ཝི་མུ་ཏྟི་ར་སོ – ཨི་དཾ པེ་ཡྻཾ. པ་གྒ་ཧ་མ་ཎྜོ ཝཱི་རི་ཡ་ས་མྦོ་ཛ྄ཛྷ་ངྒོ, ཀོ་ས་ཛྫཾ ཀ་ས་ཊོ; ཡོ ཏ་ཏྠ ཨ་ཏྠ་ར་སོ དྷ་མྨ་ར་སོ ཝི་མུ་ཏྟི་ར་སོ – ཨི་དཾ པེ་ཡྻཾ. ཕ་ར་ཎ་མ་ཎྜོ པཱི་ཏི་ས་མྦོ་ཛ྄ཛྷ་ངྒོ, པ་རི་ལཱ༹་ཧོ ཀ་ས་ཊོ; ཡོ ཏ་ཏྠ ཨ་ཏྠ་ར་སོ དྷ་མྨ་ར་སོ ཝི་མུ་ཏྟི་ར་སོ – ཨི་དཾ པེ་ཡྻཾ. ཨུ་པ་ས་མ་མ་ཎྜོ པ་སྶ་དྡྷི་ས་མྦོ་ཛ྄ཛྷ་ངྒོ, དུ་ཊྛུ་ལླཾ ཀ་ས་ཊོ; ཡོ ཏ་ཏྠ ཨ་ཏྠ་ར་སོ དྷ་མྨ་ར་སོ ཝི་མུ་ཏྟི་ར་སོ – ཨི་དཾ པེ་ཡྻཾ. ཨ་ཝི་ཀྑེ་པ་མ་ཎྜོ ས་མཱ་དྷི་ས་མྦོ་ཛ྄ཛྷ་ངྒོ, ཨུ་དྡྷ་ཙྩཾ ཀ་ས་ཊོ; ཡོ ཏ་ཏྠ ཨ་ཏྠ་ར་སོ དྷ་མྨ་ར་སོ ཝི་མུ་ཏྟི་ར་སོ – ཨི་དཾ པེ་ཡྻཾ. པ་ཊི་ས་ངྑཱ་ན་མ་ཎྜོ ཨུ་པེ་ཀྑཱ་ས་མྦོ་ཛ྄ཛྷ་ངྒོ, ཨ་པ་ཊི་ས་ངྑཱ ཀ་ས་ཊོ; ཡོ ཏ་ཏྠ ཨ་ཏྠ་ར་སོ དྷ་མྨ་ར་སོ ཝི་མུ་ཏྟི་ར་སོ – ཨི་དཾ པེ་ཡྻཾ.
ད་སྶ་ན་མ་ཎྜོ ས་མྨཱ་དི་ཊྛི, མི་ཙྪཱ་དི་ཊྛི ཀ་ས་ཊོ; ཡོ ཏ་ཏྠ ཨ་ཏྠ་ར་སོ དྷ་མྨ་ར་སོ ཝི་མུ་ཏྟི་ར་སོ – ཨི་དཾ པེ་ཡྻཾ. ཨ་བྷི་ནི་རོ་པ་ན་མ་ཎྜོ ས་མྨཱ་ས་ངྐ་པྤོ, མི་ཙྪཱ་ས་ངྐ་པྤོ ཀ་ས་ཊོ; ཡོ ཏ་ཏྠ ཨ་ཏྠ་ར་སོ དྷ་མྨ་ར་སོ ཝི་མུ་ཏྟི་ར་སོ – ཨི་དཾ པེ་ཡྻཾ. པ་རི་གྒ་ཧ་མ་ཎྜོ ས་མྨཱ་ཝཱ་ཙཱ, མི་ཙྪཱ་ཝཱ་ཙཱ ཀ་ས་ཊོ; ཡོ ཏ་ཏྠ ཨ་ཏྠ་ར་སོ དྷ་མྨ་ར་སོ ཝི་མུ་ཏྟི་ར་སོ – ཨི་དཾ པེ་ཡྻཾ. ས་མུ་ཊྛཱ་ན་མ་ཎྜོ ས་མྨཱ་ཀ་མྨ་ནྟོ, མི་ཙྪཱ་ཀ་མྨ་ནྟོ ཀ་ས་ཊོ; ཡོ ཏ་ཏྠ ཨ་ཏྠ་ར་སོ དྷ་མྨ་ར་སོ ཝི་མུ་ཏྟི་ར་སོ – ཨི་དཾ པེ་ཡྻཾ. ཝོ་དཱ་ན་མ་ཎྜོ ས་མྨཱ་ཨཱ་ཛཱི་ཝོ, མི་ཙྪཱ་ཨཱ་ཛཱི་ཝོ ཀ་ས་ཊོ; ཡོ ཏ་ཏྠ ཨ་ཏྠ་ར་སོ དྷ་མྨ་ར་སོ ཝི་མུ་ཏྟི་ར་སོ – ཨི་དཾ པེ་ཡྻཾ. པ་གྒ་ཧ་མ་ཎྜོ ས་མྨཱ་ཝཱ་ཡཱ་མོ, མི་ཙྪཱ་ཝཱ་ཡཱ་མོ ཀ་ས་ཊོ; ཡོ ཏ་ཏྠ ཨ་ཏྠ་ར་སོ དྷ་མྨ་ར་སོ ཝི་མུ་ཏྟི་ར་སོ – ཨི་དཾ པེ་ཡྻཾ. ཨུ་པ་ཊྛཱ་ན་མ་ཎྜོ ས་མྨཱ་ས་ཏི, མི་ཙྪཱ་ས་ཏི ཀ་ས་ཊོ; ཡོ ཏ་ཏྠ ཨ་ཏྠ་ར་སོ དྷ་མྨ་ར་སོ ཝི་མུ་ཏྟི་ར་སོ – ཨི་དཾ པེ་ཡྻཾ. ཨ་ཝི་ཀྑེ་པ་མ་ཎྜོ ས་མྨཱ་ས་མཱ་དྷི, མི་ཙྪཱ་ས་མཱ་དྷི ཀ་ས་ཊོ; ཡོ ཏ་ཏྠ ཨ་ཏྠ་ར་སོ དྷ་མྨ་ར་སོ ཝི་མུ་ཏྟི་ར་སོ – ཨི་དཾ པེ་ཡྻཾ.
ད་སྶ་ན་མ་ཎྜོ ས་མྨཱ་དི་ཊྛི… ཨ་བྷི་ནི་རོ་པ་ན་མ་ཎྜོ ས་མྨཱ་ས་ངྐ་པྤོ… པ་རི་གྒ་ཧ་མ་ཎྜོ ས་མྨཱ་ཝཱ་ཙཱ… ས་མུ་ཊྛཱ་ན་མ་ཎྜོ ས་མྨཱ་ཀ་མྨ་ནྟོ… ཝོ་དཱ་ན་མ་ཎྜོ ས་མྨཱ་ཨཱ་ཛཱི་ཝོ… པ་གྒ་ཧ་མ་ཎྜོ ས་མྨཱ་ཝཱ་ཡཱ་མོ… ཨུ་པ་ཊྛཱ་ན་མ་ཎྜོ ས་མྨཱ་ས་ཏི… ཨ་ཝི་ཀྑེ་པ་མ་ཎྜོ ས་མྨཱ་ས་མཱ་དྷི.
ཨུ་པ་ཊྛཱ་ན་མ་ཎྜོ ས་ཏི་ས་མྦོ་ཛ྄ཛྷ་ངྒོ… པ་ཝི་ཙ་ཡ་མ་ཎྜོ དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒོ… པ་གྒ་ཧ་མ་ཎྜོ ཝཱི་རི་ཡ་ས་མྦོ་ཛ྄ཛྷ་ངྒོ… ཕ་ར་ཎ་མ་ཎྜོ པཱི་ཏི་ས་མྦོ་ཛ྄ཛྷ་ངྒོ… ཨུ་པ་ས་མ་མ་ཎྜོ པ་སྶ་དྡྷི་ས་མྦོ་ཛ྄ཛྷ་ངྒོ… ཨ་ཝི་ཀྑེ་པ་མ་ཎྜོ ས་མཱ་དྷི་ས་མྦོ་ཛ྄ཛྷ་ངྒོ… པ་ཊི་ས་ངྑཱ་ན་མ་ཎྜོ ཨུ་པེ་ཀྑཱ་ས་མྦོ་ཛ྄ཛྷ་ངྒོ.
ཨ་སྶ་དྡྷི་ཡེ ཨ་ཀ་མྤི་ཡ་མ་ཎྜོ ས་དྡྷཱ་བ་ལཾ… ཀོ་ས་ཛྫེ ཨ་ཀ་མྤི་ཡ་མ་ཎྜོ ཝཱི་རི་ཡ་བ་ལཾ… པ་མཱ་དེ ཨ་ཀ་མྤི་ཡ་མ་ཎྜོ ས་ཏི་བ་ལཾ… ཨུ་དྡྷ་ཙྩེ ཨ་ཀ་མྤི་ཡ་མ་ཎྜོ ས་མཱ་དྷི་བ་ལཾ… ཨ་ཝི་ཛྫཱ་ཡ ཨ་ཀ་མྤི་ཡ་མ་ཎྜོ པ་ཉྙཱ་བ་ལཾ.
ཨ་དྷི་མོ་ཀྑ་མ་ཎྜོ ས་དྡྷི་ནྡྲི་ཡཾ… པ་གྒ་ཧ་མ་ཎྜོ ཝཱི་རི་ཡི་ནྡྲི་ཡཾ… ཨུ་པ་ཊྛཱ་ན་མ་ཎྜོ ས་ཏི་ནྡྲི་ཡཾ… ཨ་ཝི་ཀྑེ་པ་མ་ཎྜོ ས་མཱ་དྷི་ནྡྲི་ཡཾ… ད་སྶ་ན་མ་ཎྜོ པ་ཉྙི་ནྡྲི་ཡཾ.
ཨཱ་དྷི་པ་ཏེ་ཡྻ་ཊྛེ་ན ཨི་ནྡྲི་ཡཱ མ་ཎྜོ, ཨ་ཀ་མྤི་ཡ་ཊྛེ་ན བ་ལཱ མ་ཎྜོ, ནི་ཡྻཱ་ན་ཊྛེ་ན བོ་ཛ྄ཛྷ་ངྒཱ མ་ཎྜོ, ཧེ་ཏུ་ཊྛེ་ན མ་གྒོ མ་ཎྜོ, ཨུ་པ་ཊྛཱ་ན་ཊྛེ་ན ས་ཏི་པ་ཊྛཱ་ནཱ མ་ཎྜོ, པ་ད་ཧ་ན་ཊྛེ་ན ས་མྨ་པྤ་དྷཱ་ནཱ མ་ཎྜོ, ཨི་ཛ྄ཛྷ་ན་ཊྛེ་ན ཨི་དྡྷི་པཱ་དཱ མ་ཎྜོ, ཏ་ཐ་ཊྛེ་ན ས་ཙྩཱ མ་ཎྜོ, ཨ་ཝི་ཀྑེ་པ་ཊྛེ་ན ས་མ་ཐོ མ་ཎྜོ, ཨ་ནུ་པ་སྶ་ན་ཊྛེ་ན ཝི་པ་སྶ་ནཱ མ་ཎྜོ, ཨེ་ཀ་ར་ས་ཊྛེ་ན ས་མ་ཐ་ཝི་པ་སྶ་ནཱ མ་ཎྜོ, ཨ་ན་ཏི་ཝ་ཏྟ་ན་ཊྛེ་ན ཡུ་ག་ན་དྡྷཱ མ་ཎྜོ, སཾ་ཝ་ར་ཊྛེ་ན སཱི་ལ་ཝི་སུ་དྡྷི མ་ཎྜོ, ཨ་ཝི་ཀྑེ་པ་ཊྛེ་ན ཙི་ཏྟ་ཝི་སུ་དྡྷི མ་ཎྜོ, ད་སྶ་ན་ཊྛེ་ན དི་ཊྛི་ཝི་སུ་དྡྷི མ་ཎྜོ, མུ་ཏྟ་ཊྛེ་ན ཝི་མོ་ཀྑོ མ་ཎྜོ, པ་ཊི་ཝེ་དྷ་ཊྛེ་ན ཝི་ཛྫཱ མ་ཎྜོ, པ་རི་ཙྩཱ་ག་ཊྛེ་ན ཝི་མུ་ཏྟི མ་ཎྜོ, ས་མུ་ཙྪེ་ད་ཊྛེ་ན ཁ་ཡེ ཉཱ་ཎཾ མ་ཎྜོ, པ་ཊི་པྤ་སྶ་དྡྷ་ཊྛེ་ན ཨ་ནུ་པྤཱ་དེ ཉཱ་ཎཾ མ་ཎྜོ, ཚ་ནྡོ མཱུ་ལ་ཊྛེ་ན མ་ཎྜོ, མ་ན་སི་ཀཱ་རོ ས་མུ་ཊྛཱ་ན་ཊྛེ་ན མ་ཎྜོ, ཕ་སྶོ ས་མོ་དྷཱ་ན་ཊྛེ་ན མ་ཎྜོ, ཝེ་ད་ནཱ ས་མོ་ས་ར་ཎ་ཊྛེ་ན མ་ཎྜོ, ས་མཱ་དྷི པ་མུ་ཁ་ཊྛེ་ན མ་ཎྜོ, ས་ཏི ཨཱ་དྷི་པ་ཏེ་ཡྻ་ཊྛེ་ན མ་ཎྜོ, པ་ཉྙཱ ཏ་ཏུ་ཏྟ་ར་ཊྛེ་ན མ་ཎྜོ, ཝི་མུ་ཏྟི སཱ་ར་ཊྛེ་ན མ་ཎྜོ, ཨ་མ་ཏོ་ག་དྷཾ ནི་བྦཱ་ནཾ པ་རི་ཡོ་སཱ་ན་ཊྛེ་ན མ་ཎྜོ་ཏི.
ཙ་ཏུ་ཏྠ་བྷཱ་ཎ་ཝཱ་རོ.
མ་ཎྜ་པེ་ཡྻ་ཀ་ཐཱ ནི་ཊྛི་ཏཱ.
མ་ཧཱ་ཝ་གྒོ པ་ཋ་མོ.