༧༠. ཡ་མ་ཀ་པཱ་ཊི་ཧཱི་ར་ཉཱ་ཎ་ནི་དྡེ་སོ
༡༡༦. ཀ་ཏ་མཾ ཏ་ཐཱ་ག་ཏ་སྶ ཡ་མ་ཀ་པཱ་ཊི་ཧཱི་རེ ཉཱ་ཎཾ? ཨི་དྷ ཏ་ཐཱ་ག་ཏོ ཡ་མ་ཀ་པཱ་ཊི་ཧཱི་རཾ ཀ་རོ་ཏི ཨ་སཱ་དྷཱ་ར་ཎཾ སཱ་ཝ་ཀེ་ཧི. ཨུ་པ་རི་མ་ཀཱ་ཡ་ཏོ ཨ་གྒི་ཀྑ་ནྡྷོ པ་ཝ་ཏྟ་ཏི, ཧེ་ཊྛི་མ་ཀཱ་ཡ་ཏོ ཨུ་ད་ཀ་དྷཱ་རཱ པ་ཝ་ཏྟ་ཏི; ཧེ་ཊྛི་མ་ཀཱ་ཡ་ཏོ ཨ་གྒི་ཀྑ་ནྡྷོ པ་ཝ་ཏྟ་ཏི, ཨུ་པ་རི་མ་ཀཱ་ཡ་ཏོ ཨུ་ད་ཀ་དྷཱ་རཱ པ་ཝ་ཏྟ་ཏི; པུ་ར་ཏྠི་མ་ཀཱ་ཡ་ཏོ ཨ་གྒི་ཀྑ་ནྡྷོ པ་ཝ་ཏྟ་ཏི, པ་ཙྪི་མ་ཀཱ་ཡ་ཏོ ཨུ་ད་ཀ་དྷཱ་རཱ པ་ཝ་ཏྟ་ཏི; པ་ཙྪི་མ་ཀཱ་ཡ་ཏོ ཨ་གྒི་ཀྑ་ནྡྷོ པ་ཝ་ཏྟ་ཏི, པུ་ར་ཏྠི་མ་ཀཱ་ཡ་ཏོ ཨུ་ད་ཀ་དྷཱ་རཱ པ་ཝ་ཏྟ་ཏི; ད་ཀྑི་ཎ་ཨ་ཀྑི་ཏོ ཨ་གྒི་ཀྑ་ནྡྷོ པ་ཝ་ཏྟ་ཏི, ཝཱ་མ་ཨ་ཀྑི་ཏོ ཨུ་ད་ཀ་དྷཱ་རཱ པ་ཝ་ཏྟ་ཏི; ཝཱ་མ་ཨ་ཀྑི་ཏོ ཨ་གྒི་ཀྑ་ནྡྷོ པ་ཝ་ཏྟ་ཏི, ད་ཀྑི་ཎ་ཨ་ཀྑི་ཏོ ཨུ་ད་ཀ་དྷཱ་རཱ པ་ཝ་ཏྟ་ཏི; ད་ཀྑི་ཎ་ཀ་ཎྞ་སོ་ཏ་ཏོ ཨ་གྒི་ཀྑ་ནྡྷོ པ་ཝ་ཏྟ་ཏི, ཝཱ་མ་ཀ་ཎྞ་སོ་ཏ་ཏོ ཨུ་ད་ཀ་དྷཱ་རཱ པ་ཝ་ཏྟ་ཏི; ཝཱ་མ་ཀ་ཎྞ་སོ་ཏ་ཏོ ཨ་གྒི་ཀྑ་ནྡྷོ པ་ཝ་ཏྟ་ཏི, ད་ཀྑི་ཎ་ཀ་ཎྞ་སོ་ཏ་ཏོ ཨུ་ད་ཀ་དྷཱ་རཱ པ་ཝ་ཏྟ་ཏི; ད་ཀྑི་ཎ་ནཱ་སི་ཀཱ་སོ་ཏ་ཏོ ཨ་གྒི་ཀྑ་ནྡྷོ པ་ཝ་ཏྟ་ཏི, ཝཱ་མ་ནཱ་སི་ཀཱ་སོ་ཏ་ཏོ ཨུ་ད་ཀ་དྷཱ་རཱ པ་ཝ་ཏྟ་ཏི; ཝཱ་མ་ནཱ་སི་ཀཱ་སོ་ཏ་ཏོ ཨ་གྒི་ཀྑ་ནྡྷོ པ་ཝ་ཏྟ་ཏི, ད་ཀྑི་ཎ་ནཱ་སི་ཀཱ་སོ་ཏ་ཏོ ཨུ་ད་ཀ་དྷཱ་རཱ པ་ཝ་ཏྟ་ཏི; ད་ཀྑི་ཎ་ཨཾ་ས་ཀཱུ་ཊ་ཏོ ཨ་གྒི་ཀྑ་ནྡྷོ པ་ཝ་ཏྟ་ཏི, ཝཱ་མ་ཨཾ་ས་ཀཱུ་ཊ་ཏོ ཨུ་ད་ཀ་དྷཱ་རཱ པ་ཝ་ཏྟ་ཏི; ཝཱ་མ་ཨཾ་ས་ཀཱུ་ཊ་ཏོ ཨ་གྒི་ཀྑ་ནྡྷོ པ་ཝ་ཏྟ་ཏི, ད་ཀྑི་ཎ་ཨཾ་ས་ཀཱུ་ཊ་ཏོ ཨུ་ད་ཀ་དྷཱ་རཱ པ་ཝ་ཏྟ་ཏི; ད་ཀྑི་ཎ་ཧ་ཏྠ་ཏོ ཨ་གྒི་ཀྑ་ནྡྷོ པ་ཝ་ཏྟ་ཏི, ཝཱ་མ་ཧ་ཏྠ་ཏོ ཨུ་ད་ཀ་དྷཱ་རཱ པ་ཝ་ཏྟ་ཏི; ཝཱ་མ་ཧ་ཏྠ་ཏོ ཨ་གྒི་ཀྑ་ནྡྷོ པ་ཝ་ཏྟ་ཏི, ད་ཀྑི་ཎ་ཧ་ཏྠ་ཏོ ཨུ་ད་ཀ་དྷཱ་རཱ པ་ཝ་ཏྟ་ཏི; ད་ཀྑི་ཎ་པ་སྶ་ཏོ ཨ་གྒི་ཀྑ་ནྡྷོ པ་ཝ་ཏྟ་ཏི, ཝཱ་མ་པ་སྶ་ཏོ ཨུ་ད་ཀ་དྷཱ་རཱ པ་ཝ་ཏྟ་ཏི; ཝཱ་མ་པ་སྶ་ཏོ ཨ་གྒི་ཀྑ་ནྡྷོ པ་ཝ་ཏྟ་ཏི, ད་ཀྑི་ཎ་པ་སྶ་ཏོ ཨུ་ད་ཀ་དྷཱ་རཱ པ་ཝ་ཏྟ་ཏི; ད་ཀྑི་ཎ་པཱ་ད་ཏོ ཨ་གྒི་ཀྑ་ནྡྷོ པ་ཝ་ཏྟ་ཏི, ཝཱ་མ་པཱ་ད་ཏོ ཨུ་ད་ཀ་དྷཱ་རཱ པ་ཝ་ཏྟ་ཏི; ཝཱ་མ་པཱ་ད་ཏོ ཨ་གྒི་ཀྑ་ནྡྷོ པ་ཝ་ཏྟ་ཏི, ད་ཀྑི་ཎ་པཱ་ད་ཏོ ཨུ་ད་ཀ་དྷཱ་རཱ པ་ཝ་ཏྟ་ཏི; ཨ་ངྒུ་ལ་ངྒུ་ལེ་ཧི ཨ་གྒི་ཀྑ་ནྡྷོ པ་ཝ་ཏྟ་ཏི, ཨ་ངྒུ་ལ་ནྟ་རི་ཀཱ་ཧི ཨུ་ད་ཀ་དྷཱ་རཱ པ་ཝ་ཏྟ་ཏི; ཨ་ངྒུ་ལ་ནྟ་རི་ཀཱ་ཧི ཨ་གྒི་ཀྑ་ནྡྷོ པ་ཝ་ཏྟ་ཏི, ཨ་ངྒུ་ལ་ངྒུ་ལེ་ཧི ཨུ་ད་ཀ་དྷཱ་རཱ པ་ཝ་ཏྟ་ཏི; ཨེ་ཀེ་ཀ་ལོ་མ་ཏོ ཨ་གྒི་ཀྑ་ནྡྷོ པ་ཝ་ཏྟ་ཏི, ཨེ་ཀེ་ཀ་ལོ་མ་ཏོ ཨུ་ད་ཀ་དྷཱ་རཱ པ་ཝ་ཏྟ་ཏི; ལོ་མ་ཀཱུ་པ་ཏོ ལོ་མ་ཀཱུ་པ་ཏོ ཨ་གྒི་ཀྑ་ནྡྷོ པ་ཝ་ཏྟ་ཏི, ལོ་མ་ཀཱུ་པ་ཏོ ལོ་མ་ཀཱུ་པ་ཏོ ཨུ་ད་ཀ་དྷཱ་རཱ པ་ཝ་ཏྟ་ཏི.
ཚ་ནྣཾ ཝ་ཎྞཱ་ནཾ – ནཱི་ལཱ་ནཾ, པཱི་ཏ་ཀཱ་ནཾ, ལོ་ཧི་ཏ་ཀཱ་ནཾ, ཨོ་དཱ་ཏཱ་ནཾ, མ་ཉྫི་ཊྛཱ་ནཾ [མ་ཉྫེ་ཊྛཱ་ནཾ (སྱཱ. ཀ.)], པ་བྷ་སྶ་རཱ་ནཾ བྷ་ག་ཝཱ ཙ་ངྐ་མ་ཏི, ནི་མྨི་ཏོ ཏི་ཊྛ་ཏི ཝཱ ནི་སཱི་ད་ཏི ཝཱ སེ་ཡྻཾ ཝཱ ཀ་པྤེ་ཏི. བྷ་ག་ཝཱ ཏི་ཊྛ་ཏི, ནི་མྨི་ཏོ ཙ་ངྐ་མ་ཏི ཝཱ ནི་སཱི་ད་ཏི ཝཱ སེ་ཡྻཾ ཝཱ ཀ་པྤེ་ཏི. བྷ་ག་ཝཱ ནི་སཱི་ད་ཏི, ནི་མྨི་ཏོ ཙ་ངྐ་མ་ཏི ཝཱ ཏི་ཊྛ་ཏི ཝཱ སེ་ཡྻཾ ཝཱ ཀ་པྤེ་ཏི. བྷ་ག་ཝཱ སེ་ཡྻཾ ཀ་པྤེ་ཏི, ནི་མྨི་ཏོ ཙ་ངྐ་མ་ཏི ཝཱ ཏི་ཊྛ་ཏི ཝཱ ནི་སཱི་ད་ཏི ཝཱ. ནི་མྨི་ཏོ ཙ་ངྐ་མ་ཏི, བྷ་ག་ཝཱ ཏི་ཊྛ་ཏི ཝཱ ནི་སཱི་ད་ཏི ཝཱ སེ་ཡྻཾ ཝཱ ཀ་པྤེ་ཏི. ནི་མྨི་ཏོ ཏི་ཊྛ་ཏི, བྷ་ག་ཝཱ ཙ་ངྐ་མ་ཏི ཝཱ ནི་སཱི་ད་ཏི ཝཱ སེ་ཡྻཾ ཝཱ ཀ་པྤེ་ཏི. ནི་མྨི་ཏོ ནི་སཱི་ད་ཏི, བྷ་ག་ཝཱ ཙ་ངྐ་མ་ཏི ཝཱ ཏི་ཊྛ་ཏི ཝཱ སེ་ཡྻཾ ཝཱ ཀ་པྤེ་ཏི. ནི་མྨི་ཏོ སེ་ཡྻཾ ཀ་པྤེ་ཏི, བྷ་ག་ཝཱ ཙ་ངྐ་མ་ཏི ཝཱ ཏི་ཊྛ་ཏི ཝཱ ནི་སཱི་ད་ཏི ཝཱ. ཨི་དཾ ཏ་ཐཱ་ག་ཏ་སྶ ཡ་མ་ཀ་པཱ་ཊི་ཧཱི་རེ ཉཱ་ཎཾ.
ཡ་མ་ཀ་པཱ་ཊི་ཧཱི་ར་ཉཱ་ཎ་ནི་དྡེ་སོ ས་ཏྟ་ཏི་མོ.