༥༦-༦༣. ས་ཙྩ་ཉཱ་ཎ་ཙ་ཏུ་ཀྐ་དྭ་ཡ་ནི་དྡེ་སོ

༡༠༨. ཀ་ཐཾ པ་རི་ཉྙ་ཊྛེ པ་ཉྙཱ དུ་ཀྑེ ཉཱ་ཎཾ, པ་ཧཱ་ན་ཊྛེ པ་ཉྙཱ ས་མུ་ད་ཡེ ཉཱ་ཎཾ, ས་ཙྪི་ཀི་རི་ཡ་ཊྛེ པ་ཉྙཱ ནི་རོ་དྷེ ཉཱ་ཎཾ, བྷཱ་ཝ་ན་ཊྛེ པ་ཉྙཱ མ་གྒེ ཉཱ་ཎཾ? དུ་ཀྑ་སྶ པཱི་ལ༹་ན་ཊྛོ ས་ངྑ་ཏ་ཊྛོ ས་ནྟཱ་པ་ཊྛོ ཝི་པ་རི་ཎཱ་མ་ཊྛོ པ་རི་ཉྙཱ་ཏ་ཊྛོ; ས་མུ་ད་ཡ་སྶ ཨཱ་ཡཱུ་ཧ་ན་ཊྛོ ནི་དཱ་ན་ཊྛོ ས་ཉྙོ་ག་ཊྛོ པ་ལི་བོ་དྷ་ཊྛོ པ་ཧཱ་ན་ཊྛོ; ནི་རོ་དྷ་སྶ ནི་སྶ་ར་ཎ་ཊྛོ ཝི་ཝེ་ཀ་ཊྛོ ཨ་ས་ངྑ་ཏ་ཊྛོ ཨ་མ་ཏ་ཊྛོ ས་ཙྪི་ཀི་རི་ཡ་ཊྛོ; མ་གྒ་སྶ ནི་ཡྻཱ་ན་ཊྛོ ཧེ་ཏུ་ཊྛོ ད་སྶ་ན་ཊྛོ ཨཱ་དྷི་པ་ཏེ་ཡྻ་ཊྛོ བྷཱ་ཝ་ན་ཊྛོ. ཏཾ ཉཱ་ཏ་ཊྛེ་ན ཉཱ་ཎཾ, པ་ཛཱ་ན་ན་ཊྛེ་ན པ་ཉྙཱ. ཏེ་ན ཝུ་ཙྩ་ཏི – ‘‘པ་རི་ཉྙ་ཊྛེ པ་ཉྙཱ དུ་ཀྑེ ཉཱ་ཎཾ, པ་ཧཱ་ན་ཊྛེ པ་ཉྙཱ ས་མུ་ད་ཡེ ཉཱ་ཎཾ, ས་ཙྪི་ཀི་རི་ཡ་ཊྛེ པ་ཉྙཱ ནི་རོ་དྷེ ཉཱ་ཎཾ, བྷཱ་ཝ་ན་ཊྛེ པ་ཉྙཱ མ་གྒེ ཉཱ་ཎཾ’’.

༡༠༩. ཀ་ཐཾ དུ་ཀྑེ ཉཱ་ཎཾ, དུ་ཀྑ་ས་མུ་ད་ཡེ ཉཱ་ཎཾ, དུ་ཀྑ་ནི་རོ་དྷེ ཉཱ་ཎཾ, དུ་ཀྑ་ནི་རོ་དྷ་གཱ་མི་ནི་ཡཱ པ་ཊི་པ་དཱ་ཡ ཉཱ་ཎཾ? མ་གྒ་ས་མ་ངྒི་སྶ ཉཱ་ཎཾ དུ་ཀྑེ པེ་ཏཾ ཉཱ་ཎཾ, དུ་ཀྑ་ས་མུ་ད་ཡེ པེ་ཏཾ ཉཱ་ཎཾ, དུ་ཀྑ་ནི་རོ་དྷེ པེ་ཏཾ ཉཱ་ཎཾ, དུ་ཀྑ་ནི་རོ་དྷ་གཱ་མི་ནི་ཡཱ པ་ཊི་པ་དཱ་ཡ པེ་ཏཾ ཉཱ་ཎཾ.

ཏ་ཏྠ ཀ་ཏ་མཾ དུ་ཀྑེ ཉཱ་ཎཾ? དུ་ཀྑཾ ཨཱ་ར་བྦྷ ཡཱ ཨུ་པྤ་ཛྫ་ཏི པ་ཉྙཱ པ་ཛཱ་ན་ནཱ ཝི་ཙ་ཡོ པ་ཝི་ཙ་ཡོ དྷ་མྨ་ཝི་ཙ་ཡོ ས་ལླ་ཀྑ་ཎཱ ཨུ་པ་ལ་ཀྑ་ཎཱ པ་ཙྩུ་པ་ལ་ཀྑ་ཎཱ པ་ཎྜི་ཙྩཾ ཀོ་ས་ལླཾ ནེ་པུ་ཉྙཾ ཝེ་བྷ་བྱཱ ཙི་ནྟཱ ཨུ་པ་པ་རི་ཀྑཱ བྷཱུ་རི མེ་དྷཱ པ་རི་ཎཱ་ཡི་ཀཱ ཝི་པ་སྶ་ནཱ ས་མྤ་ཛ་ཉྙཾ པ་ཏོ་དོ པ་ཉྙཱ པ་ཉྙི་ནྡྲི་ཡཾ པ་ཉྙཱ་བ་ལཾ པ་ཉྙཱ་ས་ཏྠཾ པ་ཉྙཱ་པཱ་སཱ་དོ པ་ཉྙཱ་ཨཱ་ལོ་ཀོ པ་ཉྙཱ་ཨོ་བྷཱ་སོ པ་ཉྙཱ་པ་ཛྫོ་ཏོ པ་ཉྙཱ་ར་ཏ་ནཾ ཨ་མོ་ཧོ དྷ་མྨ་ཝི་ཙ་ཡོ ས་མྨཱ་དི་ཊྛི – ཨི་དཾ ཝུ་ཙྩ་ཏི དུ་ཀྑེ ཉཱ་ཎཾ. དུ་ཀྑ་ས་མུ་ད་ཡཾ ཨཱ་ར་བྦྷ…པེ… དུ་ཀྑ་ནི་རོ་དྷཾ ཨཱ་ར་བྦྷ…པེ… དུ་ཀྑ་ནི་རོ་དྷ་གཱ་མི་ནིཾ པ་ཊི་པ་དཾ ཨཱ་ར་བྦྷ ཡཱ ཨུ་པྤ་ཛྫ་ཏི པ་ཉྙཱ པ་ཛཱ་ན་ནཱ…པེ… ཨ་མོ་ཧོ དྷ་མྨ་ཝི་ཙ་ཡོ ས་མྨཱ་དི་ཊྛི – ཨི་དཾ ཝུ་ཙྩ་ཏི དུ་ཀྑ་ནི་རོ་དྷ་གཱ་མི་ནི་ཡཱ པ་ཊི་པ་དཱ་ཡ ཉཱ་ཎཾ. ཏཾ ཉཱ་ཏ་ཊྛེ་ན ཉཱ་ཎཾ, པ་ཛཱ་ན་ན་ཊྛེ་ན པ་ཉྙཱ. ཏེ་ན ཝུ་ཙྩ་ཏི – ‘‘དུ་ཀྑེ ཉཱ་ཎཾ, དུ་ཀྑ་ས་མུ་ད་ཡེ ཉཱ་ཎཾ, དུ་ཀྑ་ནི་རོ་དྷེ ཉཱ་ཎཾ, དུ་ཀྑ་ནི་རོ་དྷ་གཱ་མི་ནི་ཡཱ པ་ཊི་པ་དཱ་ཡ ཉཱ་ཎཾ’’.

ས་ཙྩ་ཉཱ་ཎ་ཙ་ཏུ་ཀྐ་དྭ་ཡ་ནི་དྡེ་སོ ཏེ་ས་ཊྛི་མོ.