༡༨. བྷཱུ་མི་ནཱ་ན་ཏྟ་ཉཱ་ཎ་ནི་དྡེ་སོ

༧༢. ཀ་ཐཾ ཙ་ཏུ་དྷ་མྨ་ཝ་ཝ་ཏྠཱ་ནེ པ་ཉྙཱ བྷཱུ་མི་ནཱ་ན་ཏྟེ ཉཱ་ཎཾ? ཙ་ཏ་སྶོ བྷཱུ་མི་ཡོ – ཀཱ་མཱ་ཝ་ཙ་རཱ བྷཱུ་མི, རཱུ་པཱ་ཝ་ཙ་རཱ བྷཱུ་མི, ཨ་རཱུ་པཱ་ཝ་ཙ་རཱ བྷཱུ་མི, ཨ་པ་རི་ཡཱ་པ་ནྣཱ བྷཱུ་མི. ཀ་ཏ་མཱ ཀཱ་མཱ་ཝ་ཙ་རཱ བྷཱུ་མི? ཧེ་ཊྛ་ཏོ ཨ་ཝཱི་ཙི་ནི་ར་ཡཾ པ་རི་ཡ་ནྟཾ ཀ་རི་ཏྭཱ ཨུ་པ་རི་ཏོ པ་ར་ནི་མྨི་ཏ་ཝ་ས་ཝ་ཏྟཱི དེ་ཝེ [པ་ར་ནི་མྨི་ཏ་ཝ་ས་ཝ་ཏྟི་དེ་ཝེ (ཀ.)] ཨ་ནྟོ་ཀ་རི་ཏྭཱ ཡཾ ཨེ་ཏ་སྨིཾ ཨ་ནྟ་རེ ཨེ་ཏྠཱ་ཝ་ཙ་རཱ ཨེ་ཏྠ པ་རི་ཡཱ་པ་ནྣཱ ཁ་ནྡྷ་དྷཱ་ཏུ་ཨཱ་ཡ་ཏ་ནཱ རཱུ་པཾ ཝེ་ད་ནཱ ས་ཉྙཱ ས་ངྑཱ་རཱ ཝི་ཉྙཱ་ཎཾ – ཨ་ཡཾ ཀཱ་མཱ་ཝ་ཙ་རཱ བྷཱུ་མི.

ཀ་ཏ་མཱ རཱུ་པཱ་ཝ་ཙ་རཱ བྷཱུ་མི? ཧེ་ཊྛ་ཏོ བྲ་ཧྨ་ལོ་ཀཾ པ་རི་ཡ་ནྟཾ ཀ་རི་ཏྭཱ ཨུ་པ་རི་ཏོ ཨ་ཀ་ནི་ཊྛེ དེ་ཝེ ཨ་ནྟོ་ཀ་རི་ཏྭཱ ཡཾ ཨེ་ཏ་སྨིཾ ཨ་ནྟ་རེ ཨེ་ཏྠཱ་ཝ་ཙ་རཱ ཨེ་ཏྠ པ་རི་ཡཱ་པ་ནྣཱ ས་མཱ་པ་ནྣ་སྶ ཝཱ ཨུ་པ་པ་ནྣ་སྶ ཝཱ དི་ཊྛ་དྷ་མྨ་སུ་ཁ་ཝི་ཧཱ་རི་སྶ ཝཱ ཙི་ཏྟ་ཙེ་ཏ་སི་ཀཱ དྷ་མྨཱ – ཨ་ཡཾ རཱུ་པཱ་ཝ་ཙ་རཱ བྷཱུ་མི.

ཀ་ཏ་མཱ ཨ་རཱུ་པཱ་ཝ་ཙ་རཱ བྷཱུ་མི? ཧེ་ཊྛ་ཏོ ཨཱ་ཀཱ་སཱ་ན་ཉྩཱ་ཡ་ཏ་ནཱུ་པ་གེ དེ་ཝེ པ་རི་ཡ་ནྟཾ ཀ་རི་ཏྭཱ ཨུ་པ་རི་ཏོ ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ནཱུ་པ་གེ དེ་ཝེ ཨ་ནྟོ་ཀ་རི་ཏྭཱ ཡཾ ཨེ་ཏ་སྨིཾ ཨ་ནྟ་རེ ཨེ་ཏྠཱ་ཝ་ཙ་རཱ ཨེ་ཏྠ པ་རི་ཡཱ་པ་ནྣཱ ས་མཱ་པ་ནྣ་སྶ ཝཱ ཨུ་པ་པ་ནྣ་སྶ ཝཱ དི་ཊྛ་དྷ་མྨ་སུ་ཁ་ཝི་ཧཱ་རི་སྶ ཝཱ ཙི་ཏྟ་ཙེ་ཏ་སི་ཀཱ དྷ་མྨཱ – ཨ་ཡཾ ཨ་རཱུ་པཱ་ཝ་ཙ་རཱ བྷཱུ་མི.

ཀ་ཏ་མཱ ཨ་པ་རི་ཡཱ་པ་ནྣཱ བྷཱུ་མི? ཨ་པ་རི་ཡཱ་པ་ནྣཱ མ་གྒཱ ཙ མ་གྒ་ཕ་ལཱ་ནི ཙ ཨ་ས་ངྑ་ཏཱ ཙ དྷཱ་ཏུ – ཨ་ཡཾ ཨ་པ་རི་ཡཱ་པ་ནྣཱ བྷཱུ་མི. ཨི་མཱ ཙ་ཏ་སྶོ བྷཱུ་མི་ཡོ.

ཨ་པ་རཱ་པི ཙ་ཏ་སྶོ བྷཱུ་མི་ཡོ ཙ་ཏྟཱ་རོ ས་ཏི་པ་ཊྛཱ་ནཱ ཙ་ཏྟཱ་རོ ས་མྨ་པྤ་དྷཱ་ནཱ, ཙ་ཏྟཱ་རོ ཨི་དྡྷི་པཱ་དཱ, ཙ་ཏྟཱ་རི ཛྷཱ་ནཱ་ནི, ཙ་ཏ་སྶོ ཨ་པྤ་མ་ཉྙཱ་ཡོ, ཙ་ཏ་སྶོ ཨ་རཱུ་པ་ས་མཱ་པ་ཏྟི་ཡོ, ཙ་ཏ་སྶོ པ་ཊི་ས་མྦྷི་དཱ, ཙ་ཏ་སྶོ པ་ཊི་པ་དཱ, ཙ་ཏྟཱ་རི ཨཱ་ར་མྨ་ཎཱ་ནི, ཙ་ཏྟཱ་རོ ཨ་རི་ཡ་ཝཾ་སཱ, ཙ་ཏྟཱ་རི ས་ངྒ་ཧ་ཝ་ཏྠཱུ་ནི, ཙ་ཏྟཱ་རི ཙ་ཀྐཱ་ནི, ཙ་ཏྟཱ་རི དྷ་མྨ་པ་དཱ་ནི – ཨི་མཱ ཙ་ཏ་སྶོ བྷཱུ་མི་ཡོ. ཏཾ ཉཱ་ཏ་ཊྛེ་ན ཉཱ་ཎཾ, པ་ཛཱ་ན་ན་ཊྛེ་ན པ་ཉྙཱ. ཏེ་ན ཝུ་ཙྩ་ཏི – ‘‘ཙ་ཏུ་དྷ་མྨ་ཝ་ཝ་ཏྠཱ་ནེ པ་ཉྙཱ བྷཱུ་མི་ནཱ་ན་ཏྟེ ཉཱ་ཎཾ’’.

བྷཱུ་མི་ནཱ་ན་ཏྟ་ཉཱ་ཎ་ནི་དྡེ་སོ ཨ་ཊྛཱ་ར་ས་མོ.