༡༣. སོ་དྷ་ན་ཧཱ་ར་ཝི་བྷ་ངྒོ

༤༥. ཏ་ཏྠ ཀ་ཏ་མོ སོ་དྷ་ནོ ཧཱ་རོ? ‘‘ཝི་སྶ་ཛྫི་ཏ་མྷི པ་ཉྷེ’’ཏི་གཱ་ཐཱ. ཡ་ཐཱ ཨཱ་ཡ་སྨཱ ཨ་ཛི་ཏོ པཱ་རཱ་ཡ་ནེ བྷ་ག་ཝ་ནྟཾ པ་ཉྷཾ པུ་ཙྪ་ཏི –

‘‘ཀེ་ན་སྶུ ནི་ཝུ་ཏོ ལོ་ཀོ, ཀེ་ན་སྶུ ན་པྤ་ཀཱ་ས་ཏི;

ཀི་སྶཱ་བྷི་ལེ་པ་ནཾ བྲཱུ་སི, ཀིཾ་སུ ཏ་སྶ མ་ཧ་བྦྷ་ཡ’’ནྟི.

‘‘ཨ་ཝི་ཛྫཱ་ཡ ནི་ཝུ་ཏོ ལོ་ཀོ, [ཨ་ཛི་ཏཱ་ཏི བྷ་ག་ཝཱ]

ཝི་ཝི་ཙྪཱ པ་མཱ་དཱ ན་པྤ་ཀཱ་ས་ཏི;

ཛ་པྤཱ་བྷི་ལེ་པ་ནཾ བྲཱུ་མི, དུ་ཀྑ་མ་སྶ མ་ཧ་བྦྷ་ཡ’’ནྟི.

‘‘ཀེ་ན་སྶུ ནི་ཝུ་ཏོ ལོ་ཀོ’’ཏི པ་ཉྷེ ‘‘ཨ་ཝི་ཛྫཱ་ཡ ནི་ཝུ་ཏོ ལོ་ཀོ’’ཏི བྷ་ག་ཝཱ པ་དཾ སོ་དྷེ་ཏི, ནོ ཙ ཨཱ་ར་མྦྷཾ. ‘‘ཀེ་ན་སྶུ ན་པྤ་ཀཱ་ས་ཏཱི’’ཏི པ་ཉྷེ ‘‘ཝི་ཝི་ཙྪཱ པ་མཱ་དཱ ན་པྤ་ཀཱ་ས་ཏཱི’’ཏི བྷ་ག་ཝཱ པ་དཾ སོ་དྷེ་ཏི, ནོ ཙ ཨཱ་ར་མྦྷཾ. ‘‘ཀི་སྶཱ་བྷི་ལེ་པ་ནཾ བྲཱུ་སཱི’’ཏི པ་ཉྷེ ‘‘ཛ་པྤཱ་བྷི་ལེ་པ་ནཾ བྲཱུ་མཱི’’ཏི བྷ་ག་ཝཱ པ་དཾ སོ་དྷེ་ཏི, ནོ ཙ ཨཱ་ར་མྦྷཾ. ‘‘ཀིཾ་སུ ཏ་སྶ མ་ཧ་བྦྷ་ཡ’’ནྟི པ་ཉྷེ ‘‘དུ་ཀྑ་མ་སྶ མ་ཧ་བྦྷ་ཡ’’ནྟི སུ་དྡྷོ ཨཱ་ར་མྦྷོ. ཏེ་ནཱ་ཧ བྷ་ག་ཝཱ ‘‘ཨ་ཝི་ཛྫཱ་ཡ ནི་ཝུ་ཏོ ལོ་ཀོ’’ཏི.

‘‘ས་ཝ་ནྟི ས་བྦ་དྷི སོ་ཏཱ, [ཨི་ཙྩཱ་ཡ་སྨཱ ཨ་ཛི་ཏོ]

སོ་ཏཱ་ནཾ ཀིཾ ནི་ཝཱ་ར་ཎཾ;

སོ་ཏཱ་ནཾ སཾ་ཝ་རཾ བྲཱུ་ཧི, ཀེ་ན སོ་ཏཱ པི་དྷཱི་ཡ་རེ’’ཏི.

‘‘ཡཱ་ནི སོ་ཏཱ་ནི ལོ་ཀ་སྨིཾ, [ཨ་ཛི་ཏཱ་ཏི བྷ་ག་ཝཱ]

ས་ཏི ཏེ་སཾ ནི་ཝཱ་ར་ཎཾ;

སོ་ཏཱ་ནཾ སཾ་ཝ་རཾ བྲཱུ་མི, པ་ཉྙཱ་ཡེ་ཏེ པི་དྷཱི་ཡ་རེ’’ཏི.

‘‘ས་ཝ་ནྟི ས་བྦ་དྷི སོ་ཏཱ, སོ་ཏཱ་ནཾ ཀིཾ ནི་ཝཱ་ར་ཎ’’ནྟི པ་ཉྷེ ‘‘ཡཱ་ནི སོ་ཏཱ་ནི ལོ་ཀ་སྨིཾ, ས་ཏི ཏེ་སཾ ནི་ཝཱ་ར་ཎ’’ནྟི བྷ་ག་ཝཱ པ་དཾ སོ་དྷེ་ཏི, ནོ ཙ ཨཱ་ར་མྦྷཾ. ‘‘སོ་ཏཱ་ནཾ སཾ་ཝ་རཾ བྲཱུ་ཧི, ཀེ་ན སོ་ཏཱ པི་དྷཱི་ཡ་རེ’’ཏི པ་ཉྷེ ‘‘སོ་ཏཱ་ནཾ སཾ་ཝ་རཾ བྲཱུ་མི, པ་ཉྙཱ་ཡེ་ཏེ པི་དྷཱི་ཡ་རེ’’ཏི སུ་དྡྷོ ཨཱ་ར་མྦྷོ. ཏེ་ནཱ་ཧ བྷ་ག་ཝཱ ‘‘ཡཱ་ནི སོ་ཏཱ་ནི ལོ་ཀ་སྨི’’ནྟི.

‘‘པ་ཉྙཱ ཙེ་ཝ ས་ཏི ཙ, [ཨི་ཙྩཱ་ཡ་སྨཱ ཨ་ཛི་ཏོ]

ནཱ་མ་རཱུ་པ་ཉྩ [ནཱ་མཾ རཱུ་པ་ཉྩ (ཀ.) པ་སྶ སུ. ནི. ༡༠༤༢] མཱ་རི་ས;

ཨེ་ཏཾ མེ པུ་ཊྛོ པ་བྲཱུ་ཧི, ཀ་ཏྠེ་ཏཾ ཨུ་པ་རུ་ཛ྄ཛྷ་ཏཱི’’ཏི.

པ་ཉྷེ –

‘‘ཡ་མེ་ཏཾ པ་ཉྷཾ ཨ་པུ་ཙྪི, ཨ་ཛི་ཏ ཏཾ ཝ་དཱ་མི ཏེ;

ཡ་ཏྠ ནཱ་མ་ཉྩ རཱུ་པ་ཉྩ, ཨ་སེ་སཾ ཨུ་པ་རུ་ཛ྄ཛྷ་ཏི;

ཝི་ཉྙཱ་ཎ་སྶ ནི་རོ་དྷེ་ན, ཨེ་ཏྠེ་ཏཾ ཨུ་པ་རུ་ཛ྄ཛྷ་ཏཱི’’ཏི.

སུ་དྡྷོ ཨཱ་ར་མྦྷོ. ཏེ་ནཱ་ཧ བྷ་ག་ཝཱ ‘‘ཡ་མེ་ཏཾ པ་ཉྷཾ ཨ་པུ་ཙྪཱི’’ཏི. ཡ་ཏྠ ཨེ་ཝཾ སུ་དྡྷོ ཨཱ་ར་མྦྷོ, སོ པ་ཉྷོ ཝི་ས་ཛྫི་ཏོ བྷ་ཝ་ཏི. ཡ་ཏྠ པ་ན ཨཱ་ར་མྦྷོ ཨ་སུ་དྡྷོ, ན ཏཱ་ཝ སོ པ་ཉྷོ ཝི་ས་ཛྫི་ཏོ བྷ་ཝ་ཏི. ཏེ་ནཱ་ཧ ཨཱ་ཡ་སྨཱ མ་ཧཱ་ཀ་ཙྩཱ་ཡ་ནོ ‘‘ཝི་སྶ་ཛྫི་ཏ་མྷི པ་ཉྷེ’’ཏི.

ནི་ཡུ་ཏྟོ སོ་དྷ་ནོ ཧཱ་རོ.