༡༢. ཙཱུ་ལ༹་ཝི་ཡཱུ་ཧ་སུ་ཏྟ་ནི་དྡེ་སོ
ཨ་ཐ ཙཱུ་ལ༹་ཝི་ཡཱུ་ཧ་སུ་ཏྟ་ནི་དྡེ་སཾ ཝ་ཀྑ་ཏི –
༡༡༣. ས་ཀཾ ས་ཀཾ དི་ཊྛི་པ་རི་བྦ་སཱ་ནཱ, ཝི་གྒ་ཡ྄ཧ ནཱ་ནཱ ཀུ་ས་ལཱ ཝ་ད་ནྟི;
ཡོ ཨེ་ཝཾ ཛཱ་ནཱ་ཏི [ཨེ་ཝཾ པ་ཛཱ་ནཱ་ཏི (སཱི.)] ས ཝེ་དི དྷ་མྨཾ, ཨི་དཾ པ་ཊི་ཀྐོ་ས་མ་ཀེ་ཝ་ལཱི སོ.
ས་ཀཾ ས་ཀཾ དི་ཊྛི་པ་རི་བྦ་སཱ་ནཱཏི. ས་ནྟེ་ཀེ ས་མ་ཎ་བྲཱ་ཧྨ་ཎཱ དི་ཊྛི་ག་ཏི་ཀཱ; ཏེ དྭཱ་ས་ཊྛི་ཡཱ དི་ཊྛི་ག་ཏཱ་ནཾ ཨ་ཉྙ་ཏ་ར་ཉྙ་ཏ་རཾ དི་ཊྛི་ག་ཏཾ ག་ཧེ་ཏྭཱ ཨུ་གྒ་ཧེ་ཏྭཱ ག་ཎྷི་ཏྭཱ པ་རཱ་མ་སི་ཏྭཱ ཨ་བྷི་ནི་ཝི་སི་ཏྭཱ ས་ཀཱ་ཡ ས་ཀཱ་ཡ དི་ཊྛི་ཡཱ ཝ་ས་ནྟི སཾ་ཝ་ས་ནྟི ཨཱ་ཝ་ས་ནྟི པ་རི་ཝ་ས་ནྟི. ཡ་ཐཱ ཨ་གཱ་རི་ཀཱ གྷ་རེ་སུ ཝ་ས་ནྟི, སཱ་པ་ཏྟི་ཀཱ ཝཱ ཨཱ་པ་ཏྟཱི་སུ ཝ་ས་ནྟི, ས་ཀི་ལེ་སཱ ཝཱ ཀི་ལེ་སེ་སུ ཝ་ས་ནྟི; ཨེ་ཝ་མེ་ཝ ས་ནྟེ་ཀེ ས་མ་ཎ་བྲཱ་ཧྨ་ཎཱ དི་ཊྛི་ག་ཏི་ཀཱ, ཏེ དྭཱ་ས་ཊྛི་ཡཱ དི་ཊྛི་ག་ཏཱ་ནཾ ཨ་ཉྙ་ཏ་ར་ཉྙ་ཏ་རཾ དི་ཊྛི་ག་ཏཾ ག་ཧེ་ཏྭཱ ཨུ་གྒ་ཧེ་ཏྭཱ ག་ཎྷི་ཏྭཱ པ་རཱ་མ་སི་ཏྭཱ ཨ་བྷི་ནི་ཝི་སི་ཏྭཱ ས་ཀཱ་ཡ ས་ཀཱ་ཡ དི་ཊྛི་ཡཱ ཝ་ས་ནྟི སཾ་ཝ་ས་ནྟི ཨཱ་ཝ་ས་ནྟི པ་རི་ཝ་ས་ནྟཱི་ཏི – ས་ཀཾ ས་ཀཾ དི་ཊྛི་པ་རི་བྦ་སཱ་ནཱ.
ཝི་གྒ་ཡ྄ཧ ནཱ་ནཱ ཀུ་ས་ལཱ ཝ་ད་ནྟཱིཏི. ཝི་གྒ་ཡ྄ཧཱཏི ག་ཧེ་ཏྭཱ ཨུ་གྒ་ཧེ་ཏྭཱ ག་ཎྷི་ཏྭཱ པ་རཱ་མ་སི་ཏྭཱ ཨ་བྷི་ནི་ཝི་སི་ཏྭཱ ནཱ་ནཱ ཝ་ད་ནྟི ཝི་ཝི་དྷཾ ཝ་ད་ནྟི ཨ་ཉྙོ་ཉྙཾ ཝ་ད་ནྟི པུ་ཐུ [པུ་ཐུཾ (སཱི.)] ཝ་ད་ནྟི, ན ཨེ་ཀཾ ཝ་ད་ནྟི ཀ་ཐེ་ནྟི བྷ་ཎ་ནྟི དཱི་པ་ཡ་ནྟི ཝོ་ཧ་ར་ནྟི. ཀུ་ས་ལཱཏི ཀུ་ས་ལ་ཝཱ་དཱ པ་ཎྜི་ཏ་ཝཱ་དཱ ཐི་ར་ཝཱ་དཱ ཉཱ་ཡ་ཝཱ་དཱ ཧེ་ཏུ་ཝཱ་དཱ ལ་ཀྑ་ཎ་ཝཱ་དཱ ཀཱ་ར་ཎ་ཝཱ་དཱ ཋཱ་ན་ཝཱ་དཱ ས་ཀཱ་ཡ ལ་དྡྷི་ཡཱ་ཏི – ཝི་གྒ་ཡ྄ཧ ནཱ་ནཱ ཀུ་ས་ལཱ ཝ་ད་ནྟི.
ཡོ ཨེ་ཝཾ ཛཱ་ནཱ་ཏི ས ཝེ་དི དྷ་མྨནྟི. ཡོ ཨི་མཾ [ཨི་དཾ (སཱི. ཀ.)] དྷ་མྨཾ དི་ཊྛིཾ པ་ཊི་པ་དཾ མ་གྒཾ ཛཱ་ནཱ་ཏི སོ དྷ་མྨཾ ཝེ་དི ཨ་ཉྙཱ་སི ཨ་པ་སྶི པ་ཊི་ཝི་ཛ྄ཛྷཱི་ཏི – ཡོ ཨེ་ཝཾ ཛཱ་ནཱ་ཏི ས ཝེ་དི དྷ་མྨཾ.
ཨི་དཾ པ་ཊི་ཀྐོ་ས་མ་ཀེ་ཝ་ལཱི སོཏི. ཡོ ཨི་མཾ དྷ་མྨཾ དི་ཊྛིཾ པ་ཊི་པ་དཾ མ་གྒཾ པ་ཊི་ཀྐོ་ས་ཏི, ཨ་ཀེ་ཝ་ལཱི སོ ཨ་ས་མ་ཏྟོ སོ ཨ་པ་རི་པུ་ཎྞོ སོ ཧཱི་ནོ ནི་ཧཱི་ནོ ཨོ་མ་ཀོ ལཱ་མ་ཀོ ཚ་ཏུ་ཀྐོ པ་རི་ཏྟོ་ཏི – ཨི་དཾ པ་ཊི་ཀྐོ་ས་མ་ཀེ་ཝ་ལཱི སོ.
ཏེ་ནཱ་ཧ སོ ནི་མྨི་ཏོ –
‘‘ས་ཀཾ ས་ཀཾ དི་ཊྛི་པ་རི་བྦ་སཱ་ནཱ, ཝི་གྒ་ཡ྄ཧ ནཱ་ནཱ ཀུ་ས་ལཱ ཝ་ད་ནྟི;
ཡོ ཨེ་ཝཾ ཛཱ་ནཱ་ཏི ས ཝེ་དི དྷ་མྨཾ, ཨི་དཾ པ་ཊི་ཀྐོ་ས་མ་ཀེ་ཝ་ལཱི སོ’’ཏི.
༡༡༤. ཨེ་ཝ་མྤི ཝི་གྒ་ཡ྄ཧ ཝི་ཝཱ་ད་ཡ་ནྟི, བཱ་ལོ པ་རོ ཨ་ཀྐུ་ས་ལོ་ཏི ཙཱ་ཧུ;
ས་ཙྩོ ནུ ཝཱ་དོ ཀ་ཏ་མོ ཨི་མེ་སཾ, ས་བྦེ་ཝ ཧཱི་མེ ཀུ་ས་ལཱ་ཝ་དཱ་ནཱ.
ཨེ་ཝ་མྤི ཝི་གྒ་ཡ྄ཧ ཝི་ཝཱ་ད་ཡ་ནྟཱིཏི. ཨེ་ཝཾ ག་ཧེ་ཏྭཱ ཨུ་གྒ་ཧེ་ཏྭཱ ག་ཎྷི་ཏྭཱ པ་རཱ་མ་སི་ཏྭཱ ཨ་བྷི་ནི་ཝི་སི་ཏྭཱ ཝི་ཝཱ་ད་ཡ་ནྟི, ཀ་ལ་ཧཾ ཀ་རོ་ནྟི, བྷ་ཎྜ་ནཾ ཀ་རོ་ནྟི, ཝི་གྒ་ཧཾ ཀ་རོ་ནྟི, ཝི་ཝཱ་དཾ ཀ་རོ་ནྟི, མེ་དྷ་གཾ ཀ་རོ་ནྟི – ‘‘ན ཏྭཾ ཨི་མཾ དྷ་མྨ་ཝི་ན་ཡཾ ཨཱ་ཛཱ་ནཱ་སི…པེ… ནི་བྦེ་ཋེ་ཧི ཝཱ ས་ཙེ པ་ཧོ་སཱི’’ཏི – ཨེ་ཝ་མྤི ཝི་གྒ་ཡ྄ཧ ཝི་ཝཱ་ད་ཡ་ནྟི.
བཱ་ལོ པ་རོ ཨ་ཀྐུ་ས་ལོ་ཏི ཙཱ་ཧཱུཏི. པ་རོ བཱ་ལོ ཧཱི་ནོ ནི་ཧཱི་ནོ ཨོ་མ་ཀོ ལཱ་མ་ཀོ ཚ་ཏུ་ཀྐོ པ་རི་ཏྟོ ཨ་ཀུ་ས་ལོ ཨ་ཝི་དྭཱ ཨ་ཝི་ཛྫཱ་ག་ཏོ ཨ་ཉྙཱ་ཎཱི ཨ་ཝི་བྷཱ་ཝཱི དུ་པྤ་ཉྙོ་ཏི, ཨེ་ཝ་མཱ་ཧཾ་སུ ཨེ་ཝཾ ཀ་ཐེ་ནྟི ཨེ་ཝཾ བྷ་ཎ་ནྟི ཨེ་ཝཾ དཱི་པ་ཡ་ནྟི ཨེ་ཝཾ ཝོ་ཧ་ར་ནྟཱི་ཏི – བཱ་ལོ པ་རོ ཨ་ཀྐུ་ས་ལོ་ཏི ཙཱ་ཧུ.
ས་ཙྩོ ནུ ཝཱ་དོ ཀ་ཏ་མོ ཨི་མེ་སནྟི. ཨི་མེ་སཾ ས་མ་ཎ་བྲཱ་ཧྨ་ཎཱ་ནཾ ཝཱ་དོ ཀ་ཏ་མོ ས་ཙྩོ ཏ་ཙྪོ ཏ་ཐོ བྷཱུ་ཏོ ཡཱ་ཐཱ་ཝོ ཨ་ཝི་པ་རཱི་ཏོ་ཏི – ས་ཙྩོ ནུ ཝཱ་དོ ཀ་ཏ་མོ ཨི་མེ་སཾ.
ས་བྦེ་ཝ ཧཱི་མེ ཀུ་ས་ལཱ་ཝ་དཱ་ནཱཏི. ས་བྦེ་ཝི་མེ ས་མ་ཎ་བྲཱ་ཧྨ་ཎཱ ཀུ་ས་ལ་ཝཱ་དཱ པ་ཎྜི་ཏ་ཝཱ་དཱ ཐི་ར་ཝཱ་དཱ ཉཱ་ཡ་ཝཱ་དཱ ཧེ་ཏུ་ཝཱ་དཱ ལ་ཀྑ་ཎ་ཝཱ་དཱ ཀཱ་ར་ཎ་ཝཱ་དཱ ཋཱ་ན་ཝཱ་དཱ ས་ཀཱ་ཡ ལ་དྡྷི་ཡཱ་ཏི – ས་བྦེ་ཝ ཧཱི་མེ ཀུ་ས་ལཱ་ཝ་དཱ་ནཱ.
ཏེ་ནཱ་ཧ སོ ནི་མྨི་ཏོ –
‘‘ཨེ་ཝ་མྤི ཝི་གྒ་ཡ྄ཧ ཝི་ཝཱ་ད་ཡ་ནྟི, བཱ་ལོ པ་རོ ཨ་ཀྐུ་ས་ལོ་ཏི ཙཱ་ཧུ;
ས་ཙྩོ ནུ ཝཱ་དོ ཀ་ཏ་མོ ཨི་མེ་སཾ, ས་བྦེ་ཝ ཧཱི་མེ ཀུ་ས་ལཱ་ཝ་དཱ་ནཱ’’ཏི.
༡༡༥. པ་ར་སྶ ཙེ དྷ་མྨ་མ་ནཱ་ནུ་ཛཱ་ནཾ, བཱ་ལོ་མ་ཀོ ཧོ་ཏི ནི་ཧཱི་ན་པ་ཉྙོ;
ས་བྦེ་ཝ བཱ་ལཱ སུ་ནི་ཧཱི་ན་པ་ཉྙཱ, ས་བྦེ་ཝི་མེ དི་ཊྛི་པ་རི་བྦ་སཱ་ནཱ.
པ་ར་སྶ ཙེ དྷ་མྨ་མ་ནཱ་ནུ་ཛཱ་ནནྟི. པ་ར་སྶ དྷ་མྨཾ དི་ཊྛིཾ པ་ཊི་པ་དཾ མ་གྒཾ ཨ་ནཱ་ནུ་ཛཱ་ན་ནྟོ ཨ་ནཱ་ནུ་པ་སྶ་ནྟོ ཨ་ནཱ་ནུ་མ་ན་ནྟོ ཨ་ནཱ་ནུ་མ་ཉྙ་ནྟོ ཨ་ནཱ་ནུ་མོ་ད་ནྟོ་ཏི – པ་ར་སྶ ཙེ དྷ་མྨ་མ་ནཱ་ནུ་ཛཱ་ནཾ.
བཱ་ལོ་མ་ཀོ ཧོ་ཏི ནི་ཧཱི་ན་པ་ཉྙོཏི. པ་རོ བཱ་ལོ ཧོ་ཏི ཧཱི་ནོ ནི་ཧཱི་ནོ ཨོ་མ་ཀོ ལཱ་མ་ཀོ ཚ་ཏུ་ཀྐོ པ་རི་ཏྟོ, ཧཱི་ན་པ་ཉྙོ ནི་ཧཱི་ན་པ་ཉྙོ ཨོ་མ་ཀ་པ་ཉྙོ ལཱ་མ་ཀ་པ་ཉྙོ ཚ་ཏུ་ཀྐ་པ་ཉྙོ པ་རི་ཏྟ་པ་ཉྙོ་ཏི – བཱ་ལོ་མ་ཀོ ཧོ་ཏི ནི་ཧཱི་ན་པ་ཉྙོ.
ས་བྦེ་ཝ བཱ་ལཱ སུ་ནི་ཧཱི་ན་པ་ཉྙཱཏི. ས་བྦེ་ཝི་མེ ས་མ་ཎ་བྲཱ་ཧྨ་ཎཱ བཱ་ལཱ ཧཱི་ནཱ ནི་ཧཱི་ནཱ ཨོ་མ་ཀཱ ལཱ་མ་ཀཱ ཚ་ཏུ་ཀྐཱ པ་རི་ཏྟཱ, ས་བྦེ་ཝ ཧཱི་ན་པ་ཉྙཱ ནི་ཧཱི་ན་པ་ཉྙཱ ཨོ་མ་ཀ་པ་ཉྙཱ ལཱ་མ་ཀ་པ་ཉྙཱ ཚ་ཏུ་ཀྐ་པ་ཉྙཱ པ་རི་ཏྟ་པ་ཉྙཱ་ཏི – ས་བྦེ་ཝ བཱ་ལཱ སུ་ནི་ཧཱི་ན་པ་ཉྙཱ.
ས་བྦེ་ཝི་མེ དི་ཊྛི་པ་རི་བྦ་སཱ་ནཱཏི. ས་བྦེ་ཝི་མེ ས་མ་ཎ་བྲཱ་ཧྨ་ཎཱ དི་ཊྛི་ག་ཏི་ཀཱ; ཏེ དྭཱ་ས་ཊྛི་ཡཱ དི་ཊྛི་ག་ཏཱ་ནཾ ཨ་ཉྙ་ཏ་ར་ཉྙ་ཏ་རཾ དི་ཊྛི་ག་ཏཾ ག་ཧེ་ཏྭཱ ཨུ་གྒ་ཧེ་ཏྭཱ ག་ཎྷི་ཏྭཱ པ་རཱ་མ་སི་ཏྭཱ ཨ་བྷི་ནི་ཝི་སི་ཏྭཱ ས་ཀཱ་ཡ ས་ཀཱ་ཡ དི་ཊྛི་ཡཱ ཝ་ས་ནྟི སཾ་ཝ་ས་ནྟི ཨཱ་ཝ་ས་ནྟི པ་རི་ཝ་ས་ནྟི. ཡ་ཐཱ ཨ་གཱ་རི་ཀཱ ཝཱ གྷ་རེ་སུ ཝ་ས་ནྟི, སཱ་པ་ཏྟི་ཀཱ ཝཱ ཨཱ་པ་ཏྟཱི་སུ ཝ་ས་ནྟི, ས་ཀི་ལེ་སཱ ཝཱ ཀི་ལེ་སེ་སུ ཝ་ས་ནྟི; ཨེ་ཝ་མེ་ཝ ས་བྦེ་ཝི་མེ ས་མ་ཎ་བྲཱ་ཧྨ་ཎཱ དི་ཊྛི་ག་ཏི་ཀཱ…པེ… པ་རི་ཝ་ས་ནྟཱི་ཏི – ས་བྦེ་ཝི་མེ དི་ཊྛི་པ་རི་བྦ་སཱ་ནཱ.
ཏེ་ནཱ་ཧ བྷ་ག་ཝཱ –
‘‘པ་ར་སྶ ཙེ དྷ་མྨ་མ་ནཱ་ནུ་ཛཱ་ནཾ, བཱ་ལོ་མ་ཀོ ཧོ་ཏི ནི་ཧཱི་ན་པ་ཉྙོ;
ས་བྦེ་ཝ བཱ་ལཱ སུ་ནི་ཧཱི་ན་པ་ཉྙཱ, ས་བྦེ་ཝི་མེ དི་ཊྛི་པ་རི་བྦ་སཱ་ནཱ’’ཏི.
༡༡༦. ས་ནྡི་ཊྛི་ཡཱ ཙེ་ཝ ན་ཝཱི་ཝ་དཱ་ཏཱ, [ཙེ་ཝ་ན་ཝེ་ཝ་དཱ་ཏཱ (སཱི.), ཙེ པ་ན ཝི་ཝ་དཱ་ཏཱ (སྱཱ.)] སཾ་སུ་དྡྷ་པ་ཉྙཱ ཀུ་ས་ལཱ མུ་ཏཱི་མཱ;
ན ཏེ་སཾ ཀོ་ཙི པ་རི་ཧཱི་ན་པ་ཉྙོ, དི་ཊྛཱི ཧི ཏེ་ས་མྤི ཏ་ཐཱ ས་མ་ཏྟཱ.
ས་ནྡི་ཊྛི་ཡཱ ཙེ་ཝ ན་ཝཱི་ཝ་དཱ་ཏཱཏི. ས་ཀཱ་ཡ དི་ཊྛི་ཡཱ ས་ཀཱ་ཡ ཁ་ནྟི་ཡཱ ས་ཀཱ་ཡ རུ་ཙི་ཡཱ ས་ཀཱ་ཡ ལ་དྡྷི་ཡཱ ཨ་ན་ཝཱི་ཝ་དཱ་ཏཱ ཨ་ཝོ་དཱ་ཏཱ ཨ་པ་རི་ཡོ་དཱ་ཏཱ སཾ་ཀི་ལི་ཊྛཱ སཾ་ཀི་ལེ་སི་ཀཱ་ཏི – ས་ནྡི་ཊྛི་ཡཱ ཙེ་ཝ ན་ཝཱི་ཝ་དཱ་ཏཱ.
སཾ་སུ་དྡྷ་པ་ཉྙཱ ཀུ་ས་ལཱ མུ་ཏཱི་མཱཏི. སུ་དྡྷ་པ་ཉྙཱ ཝི་སུ་དྡྷ་པ་ཉྙཱ པ་རི་སུ་དྡྷ་པ་ཉྙཱ ཝོ་དཱ་ཏ་པ་ཉྙཱ པ་རི་ཡོ་དཱ་ཏ་པ་ཉྙཱ. ཨ་ཐ ཝཱ སུ་དྡྷ་ད་སྶ་ནཱ ཝི་སུ་དྡྷ་ད་སྶ་ནཱ པ་རི་སུ་དྡྷ་ད་སྶ་ནཱ ཝོ་དཱ་ཏ་ད་སྶ་ནཱ པ་རི་ཡོ་དཱ་ཏ་ད་སྶ་ནཱ་ཏི – སཾ་སུ་དྡྷ་པ་ཉྙཱ. ཀུ་ས་ལཱཏི ཀུ་ས་ལཱ པ་ཎྜི་ཏཱ པ་ཉྙ་ཝ་ནྟོ ཨི་དྡྷི་མ་ནྟོ ཉཱ་ཎི་ནོ ཝི་བྷཱ་ཝི་ནོ མེ་དྷཱ་ཝི་ནོ་ཏི – སཾ་སུ་དྡྷ་པ་ཉྙཱ ཀུ་ས་ལཱ. མུ་ཏཱི་མཱཏི མུ་ཏི་མཱ པ་ཎྜི་ཏཱ པ་ཉྙ་ཝ་ནྟོ ཨི་དྡྷི་མ་ནྟོ ཉཱ་ཎི་ནོ ཝི་བྷཱ་ཝི་ནོ མེ་དྷཱ་ཝི་ནོ་ཏི – སཾ་སུ་དྡྷ་པ་ཉྙཱ ཀུ་ས་ལཱ མུ་ཏཱི་མཱ.
ཏེ་སཾ ན ཀོ་ཙི པ་རི་ཧཱི་ན་པ་ཉྙོཏི. ཏེ་སཾ ས་མ་ཎ་བྲཱ་ཧྨ་ཎཱ་ནཾ ན ཀོ་ཙི ཧཱི་ན་པ་ཉྙོ ནི་ཧཱི་ན་པ་ཉྙོ ཨོ་མ་ཀ་པ་ཉྙོ ལཱ་མ་ཀ་པ་ཉྙོ ཚ་ཏུ་ཀྐ་པ་ཉྙོ པ་རི་ཏྟ་པ་ཉྙོ ཨ་ཏྠི. ས་བྦེ་ཝ སེ་ཊྛ་པ་ཉྙཱ ཝི་སི་ཊྛ་པ་ཉྙཱ པཱ་མོ་ཀྑ་པ་ཉྙཱ ཨུ་ཏྟ་མ་པ་ཉྙཱ པ་ཝ་ར་པ་ཉྙཱ་ཏི – ཏེ་སཾ ན ཀོ་ཙི པ་རི་ཧཱི་ན་པ་ཉྙོ.
དི་ཊྛཱི ཧི ཏེ་ས་མྤི ཏ་ཐཱ ས་མ་ཏྟཱཏི. ཏེ་སཾ ས་མ་ཎ་བྲཱ་ཧྨ་ཎཱ་ནཾ དི་ཊྛི ཏ་ཐཱ ས་མ་ཏྟཱ ས་མཱ་དི་ནྣཱ ག་ཧི་ཏཱ པ་རཱ་མ་ཊྛཱ ཨ་བྷི་ནི་ཝི་ཊྛཱ ཨ་ཛ྄ཛྷོ་སི་ཏཱ ཨ་དྷི་མུ་ཏྟཱ་ཏི – དི་ཊྛཱི ཧི ཏེ་ས་མྤི ཏ་ཐཱ ས་མ་ཏྟཱ.
ཏེ་ནཱ་ཧ བྷ་ག་ཝཱ –
‘‘ས་ནྡི་ཊྛི་ཡཱ ཙེ་ཝ ན་ཝཱི་ཝ་དཱ་ཏཱ, སཾ་སུ་དྡྷ་པ་ཉྙཱ ཀུ་ས་ལཱ མུ་ཏཱི་མཱ;
ཏེ་སཾ ན ཀོ་ཙི པ་རི་ཧཱི་ན་པ་ཉྙོ, དི་ཊྛཱི ཧི ཏེ་ས་མྤི ཏ་ཐཱ ས་མ་ཏྟཱ’’ཏི.
༡༡༧. ན ཝཱ་ཧ་མེ་ཏཾ ཏ་ཐི་ཡ་ནྟི [ཏ་ཐི་ཝ་ནྟི (སྱཱ.)] བྲཱུ་མི, ཡ་མཱ་ཧུ བཱ་ལཱ མི་ཐུ ཨ་ཉྙ་མ་ཉྙཾ;
ས་ཀཾ ས་ཀཾ དི་ཊྛི་མ་ཀཾ་སུ ས་ཙྩཾ, ཏ་སྨཱ ཧི བཱ་ལོ་ཏི པ་རཾ ད་ཧ་ནྟི.
ན ཝཱ་ཧ་མེ་ཏཾ ཏ་ཐི་ཡ་ནྟི བྲཱུ་མཱིཏི. ནཱཏི པ་ཊི་ཀྑེ་པོ. ཨེ་ཏནྟི ‘‘དྭཱ་ས་ཊྛི་དི་ཊྛི་ག་ཏཱ་ནི ནཱ་ཧཾ ཨེ་ཏཾ ཏ་ཙྪཾ ཏ་ཐཾ བྷཱུ་ཏཾ ཡཱ་ཐཱ་ཝཾ ཨ་ཝི་པ་རཱི་ཏ’’ནྟི བྲཱུ་མི ཨཱ་ཙི་ཀྑཱ་མི དེ་སེ་མི པ་ཉྙ་པེ་མི པ་ཊྛ་པེ་མི ཝི་ཝ་རཱ་མི ཝི་བྷ་ཛཱ་མི ཨུ་ཏྟཱ་ནཱི་ཀ་རོ་མི པ་ཀཱ་སེ་མཱི་ཏི – ན ཝཱ་ཧ་མེ་ཏཾ ཏ་ཐི་ཡ་ནྟི བྲཱུ་མི.
ཡ་མཱ་ཧུ བཱ་ལཱ མི་ཐུ ཨ་ཉྙ་མ་ཉྙནྟི. མི་ཐཱུཏི དྭེ ཛ་ནཱ, དྭེ ཀ་ལ་ཧ་ཀཱ་ར་ཀཱ, དྭེ བྷ་ཎྜ་ན་ཀཱ་ར་ཀཱ, དྭེ བྷ་སྶ་ཀཱ་ར་ཀཱ, དྭེ ཝི་ཝཱ་ད་ཀཱ་ར་ཀཱ, དྭེ ཨ་དྷི་ཀ་ར་ཎ་ཀཱ་ར་ཀཱ, དྭེ ཝཱ་དི་ནོ, དྭེ ས་ལླ་པ་ཀཱ; ཏེ ཨ་ཉྙ་མ་ཉྙཾ བཱ་ལོ [བཱ་ལ་ཏོ (སཱི. ཀ.) ཨེ་ཝ་མ་ཉྙེ་སུ ཚ་པྤ་དེ་སུ་པི ཏོ་པ་ཙྩ་ཡ་ནྟ་ཝ་སེ་ན] ཧཱི་ནོ ནི་ཧཱི་ནོ ཨོ་མ་ཀོ ལཱ་མ་ཀོ ཚ་ཏུ་ཀྐོ པ་རི་ཏྟོ་ཏི, ཨེ་ཝ་མཱ་ཧཾ་སུ ཨེ་ཝཾ ཀ་ཐེ་ནྟི ཨེ་ཝཾ བྷ་ཎ་ནྟི ཨེ་ཝཾ དཱི་པ་ཡ་ནྟི ཨེ་ཝཾ ཝོ་ཧ་ར་ནྟཱི་ཏི – ཡ་མཱ་ཧུ བཱ་ལཱ མི་ཐུ ཨ་ཉྙ་མ་ཉྙཾ.
ས་ཀཾ ས་ཀཾ དི་ཊྛི་མ་ཀཾ་སུ ས་ཙྩནྟི. ‘‘ས་སྶ་ཏོ ལོ་ཀོ, ཨི་ད་མེ་ཝ ས་ཙྩཾ མོ་གྷ་མ་ཉྙ’’ནྟི – ས་ཀཾ ས་ཀཾ དི་ཊྛི་མ་ཀཾ་སུ ས་ཙྩཾ. ‘‘ཨ་ས་སྶ་ཏོ ལོ་ཀོ, ཨི་ད་མེ་ཝ ས་ཙྩཾ མོ་གྷ་མ་ཉྙ’’ནྟི…པེ… ‘‘ནེ་ཝ ཧོ་ཏི ན ན ཧོ་ཏི ཏ་ཐཱ་ག་ཏོ པ་རཾ མ་ར་ཎཱ, ཨི་ད་མེ་ཝ ས་ཙྩཾ མོ་གྷ་མ་ཉྙ’’ནྟི – ས་ཀཾ ས་ཀཾ དི་ཊྛི་མ་ཀཾ་སུ ས་ཙྩཾ.
ཏ་སྨཱ ཧི བཱ་ལོ་ཏི པ་རཾ ད་ཧ་ནྟཱིཏི. ཏ་སྨཱཏི ཏ་སྨཱ ཏཾ་ཀཱ་ར་ཎཱ ཏཾ་ཧེ་ཏུ ཏ་པྤ་ཙྩ་ཡཱ ཏཾ་ནི་དཱ་ནཱ པ་རཾ བཱ་ལོ ཧཱི་ནོ ནི་ཧཱི་ནོ ཨོ་མ་ཀོ ལཱ་མ་ཀོ ཚ་ཏུ་ཀྐོ པ་རི་ཏྟོ་ཏི ད་ཧ་ནྟི པ་སྶ་ནྟི ད་ཀྑ་ནྟི ཨོ་ལོ་ཀེ་ནྟི ནི་ཛ྄ཛྷཱ་ཡ་ནྟི ཨུ་པ་པ་རི་ཀྑ་ནྟཱི་ཏི – ཏ་སྨཱ ཧི བཱ་ལོ་ཏི པ་རཾ ད་ཧ་ནྟི.
ཏེ་ནཱ་ཧ བྷ་ག་ཝཱ –
‘‘ན ཝཱ་ཧ་མེ་ཏཾ ཏ་ཐི་ཡ་ནྟི བྲཱུ་མི, ཡ་མཱ་ཧུ བཱ་ལཱ མི་ཐུ ཨ་ཉྙ་མ་ཉྙཾ;
ས་ཀཾ ས་ཀཾ དི་ཊྛི་མ་ཀཾ་སུ ས་ཙྩཾ, ཏ་སྨཱ ཧི བཱ་ལོ་ཏི པ་རཾ ད་ཧ་ནྟཱི’’ཏི.
༡༡༨. ཡ་མཱ་ཧུ ས་ཙྩཾ ཏ་ཐི་ཡ་ནྟི ཨེ་ཀེ, ཏ་མཱ་ཧུ ཨ་ཉྙེ་པི [ཨ་ཉྙེ (སཱི. ཀ.)] ཏུ་ཙྪཾ མུ་སཱ་ཏི;
ཨེ་ཝ་མྤི ཝི་གྒ་ཡ྄ཧ ཝི་ཝཱ་ད་ཡ་ནྟི, ཀ་སྨཱ ན ཨེ་ཀཾ ས་མ་ཎཱ ཝ་ད་ནྟི.
ཡ་མཱ་ཧུ ས་ཙྩཾ ཏ་ཐི་ཡ་ནྟི ཨེ་ཀེཏི. ཡཾ དྷ་མྨཾ དི་ཊྛིཾ པ་ཊི་པ་དཾ མ་གྒཾ ཨེ་ཀེ ས་མ་ཎ་བྲཱ་ཧྨ་ཎཱ ‘‘ཨི་དཾ ས་ཙྩཾ ཏ་ཙྪཾ ཏ་ཐཾ བྷཱུ་ཏཾ ཡཱ་ཐཱ་ཝཾ ཨ་ཝི་པ་རཱི་ཏ’’ནྟི, ཨེ་ཝ་མཱ་ཧཾ་སུ ཨེ་ཝཾ ཀ་ཐེ་ནྟི ཨེ་ཝཾ བྷ་ཎ་ནྟི ཨེ་ཝཾ དཱི་པ་ཡ་ནྟི ཨེ་ཝཾ ཝོ་ཧ་ར་ནྟཱི་ཏི – ཡ་མཱ་ཧུ ས་ཙྩཾ ཏ་ཐི་ཡ་ནྟི ཨེ་ཀེ.
ཏ་མཱ་ཧུ ཨ་ཉྙེ་པི ཏུ་ཙྪཾ མུ་སཱ་ཏཱིཏི. ཏ་མེ་ཝ དྷ་མྨཾ དི་ཊྛིཾ པ་ཊི་པ་དཾ མ་གྒཾ ཨེ་ཀེ ས་མ་ཎ་བྲཱ་ཧྨ་ཎཱ ‘‘ཏུ་ཙྪཾ ཨེ་ཏཾ, མུ་སཱ ཨེ་ཏཾ, ཨ་བྷཱུ་ཏཾ ཨེ་ཏཾ, ཨ་ལི་ཀཾ ཨེ་ཏཾ, ཨ་ཡཱ་ཐཱ་ཝཾ ཨེ་ཏ’’ནྟི, ཨེ་ཝ་མཱ་ཧཾ་སུ ཨེ་ཝཾ ཀ་ཐེ་ནྟི ཨེ་ཝཾ བྷ་ཎ་ནྟི ཨེ་ཝཾ དཱི་པ་ཡ་ནྟི ཨེ་ཝཾ ཝོ་ཧ་ར་ནྟཱི་ཏི – ཏ་མཱ་ཧུ ཨ་ཉྙེ་པི ཏུ་ཙྪཾ མུ་སཱ་ཏི.
ཨེ་ཝ་མྤི ཝི་གྒ་ཡ྄ཧ ཝི་ཝཱ་ད་ཡ་ནྟཱིཏི. ཨེ་ཝཾ ག་ཧེ་ཏྭཱ ཨུ་གྒ་ཧེ་ཏྭཱ ག་ཎྷི་ཏྭཱ པ་རཱ་མ་སི་ཏྭཱ ཨ་བྷི་ནི་ཝི་སི་ཏྭཱ ཝི་ཝཱ་ད་ཡ་ནྟི, ཀ་ལ་ཧཾ ཀ་རོ་ནྟི, བྷ་ཎྜ་ནཾ ཀ་རོ་ནྟི, ཝི་གྒ་ཧཾ ཀ་རོ་ནྟི, ཝི་ཝཱ་དཾ ཀ་རོ་ནྟི, མེ་དྷ་གཾ ཀ་རོ་ནྟི – ‘‘ན ཏྭཾ ཨི་མཾ དྷ་མྨ་ཝི་ན་ཡཾ ཨཱ་ཛཱ་ནཱ་སི…པེ… ནི་བྦེ་ཋེ་ཧི ཝཱ ས་ཙེ པ་ཧོ་སཱི’’ཏི – ཨེ་ཝ་མྤི ཝི་གྒ་ཡ྄ཧ ཝི་ཝཱ་ད་ཡ་ནྟི.
ཀ་སྨཱ ན ཨེ་ཀཾ ས་མ་ཎཱ ཝ་ད་ནྟཱིཏི. ཀ་སྨཱཏི ཀ་སྨཱ ཀིཾ་ཀཱ་ར་ཎཱ ཀིཾ་ཧེ་ཏུ ཀིཾ་པ་ཙྩ་ཡཱ ཀིཾ་ནི་དཱ་ནཱ ཀིཾ་ས་མུ་ད་ཡཱ ཀིཾ་ཛཱ་ཏི་ཀཱ ཀིཾ་པ་བྷ་ཝཱ ན ཨེ་ཀཾ ཝ་ད་ནྟི ནཱ་ནཱ ཝ་ད་ནྟི ཝི་ཝི་དྷཾ ཝ་ད་ནྟི ཨ་ཉྙོ་ཉྙཾ [ཨ་ཉྙོ་ཉྙེ (ཀ.)] ཝ་ད་ནྟི པུ་ཐུ ཝ་ད་ནྟི ཀ་ཐེ་ནྟི བྷ་ཎ་ནྟི དཱི་པ་ཡ་ནྟི ཝོ་ཧ་ར་ནྟཱི་ཏི – ཀ་སྨཱ ན ཨེ་ཀཾ ས་མ་ཎཱ ཝ་ད་ནྟི.
ཏེ་ནཱ་ཧ སོ ནི་མྨི་ཏོ –
‘‘ཡ་མཱ་ཧུ ས་ཙྩཾ ཏ་ཐི་ཡ་ནྟི ཨེ་ཀེ, ཏ་མཱ་ཧུ ཨ་ཉྙེ་པི ཏུ་ཙྪཾ མུ་སཱ་ཏི;
ཨེ་ཝ་མྤི ཝི་གྒ་ཡ྄ཧ ཝི་ཝཱ་ད་ཡ་ནྟི, ཀ་སྨཱ ན ཨེ་ཀཾ ས་མ་ཎཱ ཝ་ད་ནྟཱི’’ཏི.
༡༡༩. ཨེ་ཀ་ཉྷི ས་ཙྩཾ ན དུ་ཏཱི་ཡ་མ་ཏྠི, ཡ་སྨིཾ པ་ཛཱ ནོ ཝི་ཝ་དེ པ་ཛཱ་ནཾ;
ནཱ་ནཱ ཏེ ས་ཙྩཱ་ནི ས་ཡཾ ཐུ་ན་ནྟི, ཏ་སྨཱ ན ཨེ་ཀཾ ས་མ་ཎཱ ཝ་ད་ནྟི.
ཨེ་ཀ་ཉྷི ས་ཙྩཾ ན དུ་ཏཱི་ཡ་མ་ཏྠཱིཏི. ཨེ་ཀཾ ས་ཙྩཾ ཝུ་ཙྩ་ཏི དུ་ཀྑ་ནི་རོ་དྷོ ནི་བྦཱ་ནཾ. ཡོ སོ ས་བྦ་ས་ངྑཱ་ར་ས་མ་ཐོ ས་བྦཱུ་པ་དྷི་པ་ཊི་ནི་སྶ་གྒོ ཏ་ཎྷ་ཀྑ་ཡོ ཝི་རཱ་གོ ནི་རོ་དྷོ ནི་བྦཱ་ནཾ. ཨ་ཐ ཝཱ ཨེ་ཀཾ ས་ཙྩཾ ཝུ་ཙྩ་ཏི – མ་གྒ་ས་ཙྩཾ, ནི་ཡྻཱ་ན་ས་ཙྩཾ, དུ་ཀྑ་ནི་རོ་དྷ་གཱ་མི་ནཱི པ་ཊི་པ་དཱ, ཨ་རི་ཡོ ཨ་ཊྛ་ངྒི་ཀོ མ་གྒོ, སེ་ཡྻ་ཐི་དཾ – ས་མྨཱ་དི་ཊྛི, ས་མྨཱ་ས་ངྐ་པྤོ, ས་མྨཱ་ཝཱ་ཙཱ, ས་མྨཱ་ཀ་མྨ་ནྟོ, ས་མྨཱ་ཨཱ་ཛཱི་ཝོ, ས་མྨཱ་ཝཱ་ཡཱ་མོ, ས་མྨཱ་ས་ཏི, ས་མྨཱ་ས་མཱ་དྷཱི་ཏི – ཨེ་ཀ་ཉྷི ས་ཙྩཾ ན དུ་ཏཱི་ཡ་མ་ཏྠི.
ཡ་སྨིཾ པ་ཛཱ ནོ ཝི་ཝ་དེ པ་ཛཱ་ནནྟི. ཡ་སྨིནྟི ཡ་སྨིཾ ས་ཙྩེ. པ་ཛཱཏི ས་ཏྟཱ་དྷི་ཝ་ཙ་ནཾ. པ་ཛཱ་ནནྟི [པ་ཛཱ་ནཾ (སཱི. ཀ.), པ་ཛཱ (སྱཱ.)] ཡཾ ས་ཙྩཾ པ་ཛཱ་ན་ནྟཱ ཨཱ་ཛཱ་ན་ནྟཱ ཝི་ཛཱ་ན་ནྟཱ པ་ཊི་ཝི་ཛཱ་ན་ནྟཱ པ་ཊི་ཝི་ཛ྄ཛྷ་ནྟཱ ན ཀ་ལ་ཧཾ ཀ་རེ་ཡྻུཾ, ན བྷ་ཎྜ་ནཾ ཀ་རེ་ཡྻུཾ, ན ཝི་གྒ་ཧཾ ཀ་རེ་ཡྻུཾ, ན ཝི་ཝཱ་དཾ ཀ་རེ་ཡྻུཾ, ན མེ་དྷ་གཾ ཀ་རེ་ཡྻུཾ, ཀ་ལ་ཧཾ བྷ་ཎྜ་ནཾ ཝི་གྒ་ཧཾ ཝི་ཝཱ་དཾ མེ་དྷ་གཾ པ་ཛ་ཧེ་ཡྻུཾ, ཝི་ནོ་དེ་ཡྻུཾ, བྱ་ནྟིཾ ཀ་རེ་ཡྻུཾ [བྱ་ནྟཱི་ཀ་རེ་ཡྻུཾ (སཱི. སྱཱ.)], ཨ་ན་བྷཱ་ཝཾ ག་མེ་ཡྻུ་ནྟི – ཡ་སྨིཾ པ་ཛཱ ནོ ཝི་ཝ་དེ པ་ཛཱ་ནཾ.
ནཱ་ནཱ ཏེ ས་ཙྩཱ་ནི ས་ཡཾ ཐུ་ན་ནྟཱིཏི. ནཱ་ནཱ ཏེ ས་ཙྩཱ་ནི ས་ཡཾ ཐུ་ན་ནྟི ཝ་ད་ནྟི ཀ་ཐེ་ནྟི བྷ་ཎ་ནྟི དཱི་པ་ཡ་ནྟི ཝོ་ཧ་ར་ནྟི. ‘‘ས་སྶ་ཏོ ལོ་ཀོ, ཨི་ད་མེ་ཝ ས་ཙྩཾ མོ་གྷ་མ་ཉྙ’’ནྟི ས་ཡཾ ཐུ་ན་ནྟི ཝ་ད་ནྟི ཀ་ཐེ་ནྟི བྷ་ཎ་ནྟི དཱི་པ་ཡ་ནྟི ཝོ་ཧ་ར་ནྟི. ‘‘ཨ་ས་སྶ་ཏོ ལོ་ཀོ…པེ… ནེ་ཝ ཧོ་ཏི ན ན ཧོ་ཏི ཏ་ཐཱ་ག་ཏོ པ་རཾ མ་ར་ཎཱ, ཨི་ད་མེ་ཝ ས་ཙྩཾ མོ་གྷ་མ་ཉྙ’’ནྟི ས་ཡཾ ཐུ་ན་ནྟི ཝ་ད་ནྟི ཀ་ཐེ་ནྟི བྷ་ཎ་ནྟི དཱི་པ་ཡ་ནྟི ཝོ་ཧ་ར་ནྟཱི་ཏི – ནཱ་ནཱ ཏེ ས་ཙྩཱ་ནི ས་ཡཾ ཐུ་ན་ནྟི.
ཏ་སྨཱ ན ཨེ་ཀཾ ས་མ་ཎཱ ཝ་ད་ནྟཱིཏི. ཏ་སྨཱཏི ཏ་སྨཱ ཏཾ་ཀཱ་ར་ཎཱ ཏཾ་ཧེ་ཏུ ཏ་པྤ་ཙྩ་ཡཱ ཏཾ་ནི་དཱ་ནཱ ན ཨེ་ཀཾ ཝ་ད་ནྟི ནཱ་ནཱ ཝ་ད་ནྟི ཝི་ཝི་དྷཾ ཝ་ད་ནྟི ཨ་ཉྙོ་ཉྙཾ ཝ་ད་ནྟི པུ་ཐུ ཝ་ད་ནྟི ཀ་ཐེ་ནྟི བྷ་ཎ་ནྟི དཱི་པ་ཡ་ནྟི ཝོ་ཧ་ར་ནྟཱི་ཏི – ཏ་སྨཱ ན ཨེ་ཀཾ ས་མ་ཎཱ ཝ་ད་ནྟི.
ཏེ་ནཱ་ཧ བྷ་ག་ཝཱ –
‘‘ཨེ་ཀ་ཉྷི ས་ཙྩཾ ན དུ་ཏཱི་ཡ་མ་ཏྠི, ཡ་སྨིཾ པ་ཛཱ ནོ ཝི་ཝ་དེ པ་ཛཱ་ནཾ;
ནཱ་ནཱ ཏེ ས་ཙྩཱ་ནི ས་ཡཾ ཐུ་ན་ནྟི, ཏ་སྨཱ ན ཨེ་ཀཾ ས་མ་ཎཱ ཝ་ད་ནྟཱི’’ཏི.
༡༢༠. ཀ་སྨཱ ནུ ས་ཙྩཱ་ནི ཝ་ད་ནྟི ནཱ་ནཱ, པ་ཝཱ་དི་ཡཱ་སེ ཀུ་ས་ལཱ་ཝ་དཱ་ནཱ;
ས་ཙྩཱ་ནི སུ་ཏཱ་ནི བ་ཧཱུ་ནི ནཱ་ནཱ, ཨུ་དཱ་ཧུ ཏེ ཏ་ཀྐ་མ་ནུ་སྶ་ར་ནྟི.
ཀ་སྨཱ ནུ ས་ཙྩཱ་ནི ཝ་ད་ནྟི ནཱ་ནཱཏི. ཀ་སྨཱཏི ཀ་སྨཱ ཀིཾ་ཀཱ་ར་ཎཱ ཀིཾ་ཧེ་ཏུ ཀིཾ་པ་ཙྩ་ཡཱ ཀིཾ་ནི་དཱ་ནཱ ས་ཙྩཱ་ནི ནཱ་ནཱ [ནཱ་ནཱ་ནི (ཀ.)] ཝ་ད་ནྟི, ཝི་ཝི་དྷཱ་ནི ཝ་ད་ནྟི, ཨ་ཉྙོ་ཉྙཱ་ནི ཝ་ད་ནྟི, པུ་ཐཱུ་ནི ཝ་ད་ནྟི ཀ་ཐེ་ནྟི བྷ་ཎ་ནྟི དཱི་པ་ཡ་ནྟི ཝོ་ཧ་ར་ནྟཱི་ཏི – ཀ་སྨཱ ནུ ས་ཙྩཱ་ནི ཝ་ད་ནྟི ནཱ་ནཱ.
པ་ཝཱ་དི་ཡཱ་སེ ཀུ་ས་ལཱ་ཝ་དཱ་ནཱཏི. པ་ཝཱ་དི་ཡཱ་སེཏི ཝི་པྤ་ཝ་ད་ནྟཱི་ཏི་པི པ་ཝཱ་དི་ཡཱ་སེ. ཨ་ཐ ཝཱ ས་ཀཾ ས་ཀཾ དི་ཊྛི་ག་ཏཾ པ་ཝ་ད་ནྟི ཀ་ཐེ་ནྟི བྷ་ཎ་ནྟི དཱི་པ་ཡ་ནྟི ཝོ་ཧ་ར་ནྟི. ‘‘ས་སྶ་ཏོ ལོ་ཀོ, ཨི་ད་མེ་ཝ ས་ཙྩཾ མོ་གྷ་མ་ཉྙ’’ནྟི པ་ཝ་ད་ནྟི ཀ་ཐེ་ནྟི བྷ་ཎ་ནྟི དཱི་པ་ཡ་ནྟི ཝོ་ཧ་ར་ནྟི. ‘‘ཨ་ས་སྶ་ཏོ ལོ་ཀོ…པེ… ནེ་ཝ ཧོ་ཏི ན ན ཧོ་ཏི ཏ་ཐཱ་ག་ཏོ པ་རཾ མ་ར་ཎཱ, ཨི་ད་མེ་ཝ ས་ཙྩཾ མོ་གྷ་མ་ཉྙ’’ནྟི པ་ཝ་ད་ནྟི ཀ་ཐེ་ནྟི བྷ་ཎ་ནྟི དཱི་པ་ཡ་ནྟི ཝོ་ཧ་ར་ནྟི. ཀུ་ས་ལཱ་ཝ་དཱ་ནཱཏི ཀུ་ས་ལ་ཝཱ་དཱ པ་ཎྜི་ཏ་ཝཱ་དཱ ཐི་ར་ཝཱ་དཱ ཉཱ་ཡ་ཝཱ་དཱ ཧེ་ཏུ་ཝཱ་དཱ ལ་ཀྑ་ཎ་ཝཱ་དཱ ཀཱ་ར་ཎ་ཝཱ་དཱ ཋཱ་ན་ཝཱ་དཱ ས་ཀཱ་ཡ ལ་དྡྷི་ཡཱ་ཏི – པ་ཝཱ་དི་ཡཱ་སེ ཀུ་ས་ལཱ་ཝ་དཱ་ནཱ.
ས་ཙྩཱ་ནི སུ་ཏཱ་ནི བ་ཧཱུ་ནི ནཱ་ནཱཏི ས་ཙྩཱ་ནི སུ་ཏཱ་ནི བ་ཧུ་ཀཱ་ནི ནཱ་ནཱ་ནི ཝི་ཝི་དྷཱ་ནི ཨ་ཉྙོ་ཉྙཱ་ནི པུ་ཐཱུ་ནཱི་ཏི – ས་ཙྩཱ་ནི སུ་ཏཱ་ནི བ་ཧཱུ་ནི ནཱ་ནཱ.
ཨུ་དཱ་ཧུ ཏེ ཏ་ཀྐ་མ་ནུ་སྶ་ར་ནྟཱིཏི ཨུ་དཱ་ཧུ ཏ་ཀྐེ་ན ས་ངྐ་པྤེ་ན ཡཱ་ཡ་ནྟི ནཱི་ཡ་ནྟི ཝུ་ཡ྄ཧ་ནྟི སཾ་ཧ་རཱི་ཡ་ནྟཱི་ཏི. ཨེ་ཝ་མྤི ཨུ་དཱ་ཧུ ཏེ ཏ་ཀྐ་མ་ནུ་སྶ་ར་ནྟི. ཨ་ཐ ཝཱ ཏ་ཀྐ་པ་རི་ཡཱ་ཧ་ཏཾ ཝཱི་མཾ་སཱ་ནུ་ཙ་རི་ཏཾ ས་ཡཾ པ་ཊི་བྷཱ་ནཾ ཝ་ད་ནྟི ཀ་ཐེ་ནྟི བྷ་ཎ་ནྟི དཱི་པ་ཡ་ནྟི ཝོ་ཧ་ར་ནྟཱི་ཏི. ཨེ་ཝ་མྤི ཨུ་དཱ་ཧུ ཏེ ཏ་ཀྐ་མ་ནུ་སྶ་ར་ནྟི.
ཏེ་ནཱ་ཧ སོ ནི་མྨི་ཏོ –
‘‘ཀ་སྨཱ ནུ ས་ཙྩཱ་ནི ཝ་ད་ནྟི ནཱ་ནཱ, པ་ཝཱ་དི་ཡཱ་སེ ཀུ་ས་ལཱ་ཝ་དཱ་ནཱ;
ས་ཙྩཱ་ནི སུ་ཏཱ་ནི བ་ཧཱུ་ནི ནཱ་ནཱ, ཨུ་དཱ་ཧུ ཏེ ཏ་ཀྐ་མ་ནུ་སྶ་ར་ནྟཱི’’ཏི.
༡༢༡. ན ཧེ་ཝ ས་ཙྩཱ་ནི བ་ཧཱུ་ནི ནཱ་ནཱ, ཨ་ཉྙ་ཏྲ ས་ཉྙཱ་ཡ ནི་ཙྩཱ་ནི ལོ་ཀེ;
ཏ་ཀྐ་ཉྩ དི་ཊྛཱི་སུ པ་ཀ་པྤ་ཡི་ཏྭཱ, ས་ཙྩཾ མུ་སཱ་ཏི དྭ་ཡ་དྷ་མྨ་མཱ་ཧུ.
ན ཧེ་ཝ ས་ཙྩཱ་ནི བ་ཧཱུ་ནི ནཱ་ནཱཏི ན ཧེ་ཝ ས་ཙྩཱ་ནི བ་ཧུ་ཀཱ་ནི ནཱ་ནཱ་ནི ཝི་ཝི་དྷཱ་ནི ཨ་ཉྙོ་ཉྙཱ་ནི པུ་ཐཱུ་ནཱི་ཏི – ན ཧེ་ཝ ས་ཙྩཱ་ནི བ་ཧཱུ་ནི ནཱ་ནཱ.
ཨ་ཉྙ་ཏྲ ས་ཉྙཱ་ཡ ནི་ཙྩཱ་ནི ལོ་ཀེཏི ཨ་ཉྙ་ཏྲ ས་ཉྙཱ་ཡ ནི་ཙྩ་གྒཱ་ཧཱ ཨེ་ཀ་ཉྙེ་ཝ ས་ཙྩཾ ལོ་ཀེ ཀ་ཐཱི་ཡ་ཏི བྷ་ཎཱི་ཡ་ཏི དཱི་པཱི་ཡ་ཏི ཝོ་ཧ་རཱི་ཡ་ཏི – དུ་ཀྑ་ནི་རོ་དྷོ ནི་བྦཱ་ནཾ. ཡོ སོ ས་བྦ་ས་ངྑཱ་ར་ས་མ་ཐོ ས་བྦཱུ་པ་དྷི་པ་ཊི་ནི་སྶ་གྒོ ཏ་ཎྷ་ཀྑ་ཡོ ཝི་རཱ་གོ ནི་རོ་དྷོ ནི་བྦཱ་ནཾ. ཨ་ཐ ཝཱ ཨེ་ཀཾ ས་ཙྩཾ ཝུ་ཙྩ་ཏི མ་གྒ་ས་ཙྩཾ, ནི་ཡྻཱ་ན་ས་ཙྩཾ, དུ་ཀྑ་ནི་རོ་དྷ་གཱ་མི་ནཱི པ་ཊི་པ་དཱ, ཨ་རི་ཡོ ཨ་ཊྛ་ངྒི་ཀོ མ་གྒོ, སེ་ཡྻ་ཐི་དཾ – ས་མྨཱ་དི་ཊྛི …པེ… ས་མྨཱ་ས་མཱ་དྷཱི་ཏི – ཨ་ཉྙ་ཏྲ ས་ཉྙཱ་ཡ ནི་ཙྩཱ་ནི ལོ་ཀེ.
ཏ་ཀྐ་ཉྩ དི་ཊྛཱི་སུ པ་ཀ་པྤ་ཡི་ཏྭཱ, ས་ཙྩཾ མུ་སཱ་ཏི དྭ་ཡ་དྷ་མྨ་མཱ་ཧཱུཏི. ཏ་ཀྐཾ ཝི་ཏ་ཀྐཾ ས་ངྐ་པྤཾ ཏ་ཀྐ་ཡི་ཏྭཱ ཝི་ཏ་ཀྐ་ཡི་ཏྭཱ ས་ངྐ་པྤ་ཡི་ཏྭཱ དི་ཊྛི་ག་ཏཱ་ནི ཛ་ནེ་ནྟི ས་ཉྫ་ནེ་ནྟི ནི་བྦ་ཏྟེ་ནྟི ཨ་བྷི་ནི་བྦ་ཏྟེ་ནྟི. དི་ཊྛི་ག་ཏཱ་ནི ཛ་ནེ་ཏྭཱ ས་ཉྫ་ནེ་ཏྭཱ ནི་བྦ་ཏྟེ་ཏྭཱ ཨ་བྷི་ནི་བྦ་ཏྟེ་ཏྭཱ ‘‘མ་ཡ྄ཧཾ ས་ཙྩཾ ཏུ་ཡ྄ཧཾ མུ་སཱ’’ཏི, ཨེ་ཝ་མཱ་ཧཾ་སུ ཨེ་ཝཾ ཀ་ཐེ་ནྟི ཨེ་ཝཾ བྷ་ཎ་ནྟི ཨེ་ཝཾ དཱི་པ་ཡ་ནྟི ཨེ་ཝཾ ཝོ་ཧ་ར་ནྟཱི་ཏི – ཏ་ཀྐ་ཉྩ དི་ཊྛཱི་སུ པ་ཀ་པྤ་ཡི་ཏྭཱ ས་ཙྩཾ མུ་སཱ་ཏི དྭ་ཡ་དྷ་མྨ་མཱ་ཧུ.
ཏེ་ནཱ་ཧ བྷ་ག་ཝཱ –
‘‘ན ཧེ་ཝ ས་ཙྩཱ་ནི བ་ཧཱུ་ནི ནཱ་ནཱ, ཨ་ཉྙ་ཏྲ ས་ཉྙཱ་ཡ ནི་ཙྩཱ་ནི ལོ་ཀེ;
ཏ་ཀྐ་ཉྩ དི་ཊྛཱི་སུ པ་ཀ་པྤ་ཡི་ཏྭཱ, ས་ཙྩཾ མུ་སཱ་ཏི དྭ་ཡ་དྷ་མྨ་མཱ་ཧཱུ’’ཏི.
༡༢༢. དི་ཊྛེ སུ་ཏེ སཱི་ལ་ཝ་ཏེ མུ་ཏེ ཝཱ, ཨེ་ཏེ ཙ [ཨེ་ཏེ་སུ (སཱི.)] ནི་སྶཱ་ཡ ཝི་མཱ་ན་ད་སྶཱི;
ཝི་ནི་ཙྪ་ཡེ ཋ་ཏྭཱ པ་ཧ་སྶ་མཱ་ནོ, བཱ་ལོ པ་རོ ཨ་ཀྐུ་ས་ལོ་ཏི ཙཱ་ཧ.
དི་ཊྛེ སུ་ཏེ སཱི་ལ་ཝ་ཏེ མུ་ཏེ ཝཱ, ཨེ་ཏེ ཙ ནི་སྶཱ་ཡ ཝི་མཱ་ན་ད་སྶཱིཏི. དི་ཊྛཾ ཝཱ དི་ཊྛ་སུ་དྡྷིཾ ཝཱ, སུ་ཏཾ ཝཱ སུ་ཏ་སུ་དྡྷིཾ ཝཱ, སཱི་ལཾ ཝཱ སཱི་ལ་སུ་དྡྷིཾ ཝཱ, ཝ་ཏཾ ཝཱ ཝ་ཏ་སུ་དྡྷིཾ ཝཱ, མུ་ཏཾ ཝཱ མུ་ཏ་སུ་དྡྷིཾ ཝཱ ནི་སྶཱ་ཡ ཨུ་པ་ནི་སྶཱ་ཡ ག་ཎྷི་ཏྭཱ པ་རཱ་མ་སི་ཏྭཱ ཨ་བྷི་ནི་ཝི་སི་ཏྭཱ་ཏི – དི་ཊྛེ སུ་ཏེ སཱི་ལ་ཝ་ཏེ མུ་ཏེ ཝཱ. ཨེ་ཏེ ཙ ནི་སྶཱ་ཡ ཝི་མཱ་ན་ད་སྶཱིཏི. ན ས་མྨཱ་ནེ་ཏཱི་ཏི་པི ཝི་མཱ་ན་ད་སྶཱི. ཨ་ཐ ཝཱ དོ་མ་ན་སྶཾ ཛ་ནེ་ཏཱི་ཏི་པི ཝི་མཱ་ན་ད་སྶཱི་ཏི – དི་ཊྛེ སུ་ཏེ སཱི་ལ་ཝ་ཏེ མུ་ཏེ ཝཱ ཨེ་ཏེ ཙ ནི་སྶཱ་ཡ ཝི་མཱ་ན་ད་སྶཱི.
ཝི་ནི་ཙྪ་ཡེ ཋ་ཏྭཱ པ་ཧ་སྶ་མཱ་ནོཏི. ཝི་ནི་ཙྪ་ཡཱ ཝུ་ཙྩ་ནྟི དྭཱ་ས་ཊྛི དི་ཊྛི་ག་ཏཱ་ནི. དི་ཊྛི་ཝི་ནི་ཙྪ་ཡེ ཝི་ནི་ཙྪ་ཡ་དི་ཊྛི་ཡཱ ཋ་ཏྭཱ པ་ཏི་ཊྛ་ཧི་ཏྭཱ ག་ཎྷི་ཏྭཱ པ་རཱ་མ་སི་ཏྭཱ ཨ་བྷི་ནི་ཝི་སི་ཏྭཱ་ཏི – ཝི་ནི་ཙྪ་ཡེ ཋ་ཏྭཱ. པ་ཧ་སྶ་མཱ་ནོཏི ཏུ་ཊྛོ ཧོ་ཏི ཧ་ཊྛོ པ་ཧ་ཊྛོ ཨ་ཏྟ་མ་ནོ པ་རི་པུ་ཎྞ་ས་ངྐ་པྤོ. ཨ་ཐ ཝཱ ད་ནྟ་ཝི་དཾ་ས་ཀཾ པ་ཧ་སྶ་མཱ་ནོ་ཏི – ཝི་ནི་ཙྪ་ཡེ ཋ་ཏྭཱ པ་ཧ་སྶ་མཱ་ནོ.
བཱ་ལོ པ་རོ ཨ་ཀྐུ་ས་ལོ་ཏི ཙཱ་ཧཱཏི. པ་རོ བཱ་ལོ ཧཱི་ནོ ནི་ཧཱི་ནོ ཨོ་མ་ཀོ ལཱ་མ་ཀོ ཚ་ཏུ་ཀྐོ པ་རི་ཏྟོ ཨ་ཀུ་ས་ལོ ཨ་ཝི་དྭཱ ཨ་ཝི་ཛྫཱ་ག་ཏོ ཨ་ཉྙཱ་ཎཱི ཨ་ཝི་བྷཱ་ཝཱི ཨ་མེ་དྷཱ་ཝཱི དུ་པྤ་ཉྙོ་ཏི, ཨེ་ཝ་མཱ་ཧ ཨེ་ཝཾ ཀ་ཐེ་ཏི ཨེ་ཝཾ བྷ་ཎ་ཏི ཨེ་ཝཾ དཱི་པ་ཡ་ཏི ཨེ་ཝཾ ཝོ་ཧ་ར་ཏཱི་ཏི – བཱ་ལོ པ་རོ ཨ་ཀྐུ་ས་ལོ་ཏི ཙཱ་ཧ.
ཏེ་ནཱ་ཧ བྷ་ག་ཝཱ –
‘‘དི་ཊྛེ སུ་ཏེ སཱི་ལ་ཝ་ཏེ མུ་ཏེ ཝཱ, ཨེ་ཏེ ཙ ནི་སྶཱ་ཡ ཝི་མཱ་ན་ད་སྶཱི;
ཝི་ནི་ཙྪ་ཡེ ཋ་ཏྭཱ པ་ཧ་སྶ་མཱ་ནོ, བཱ་ལོ པ་རོ ཨ་ཀྐུ་ས་ལོ་ཏི ཙཱ་ཧཱ’’ཏི.
༡༢༣. ཡེ་ནེ་ཝ བཱ་ལོ་ཏི པ་རཾ ད་ཧཱ་ཏི, ཏེ་ནཱ་ཏུ་མཱ་ནཾ ཀུ་ས་ལོ་ཏི ཙཱ་ཧ;
ས་ཡ་མ་ཏྟ་ནཱ སོ ཀུ་ས་ལཱ་ཝ་དཱ་ནོ, ཨ་ཉྙཾ ཝི་མཱ་ནེ་ཏི ཏ་དེ་ཝ པཱ་ཝ.
ཡེ་ནེ་ཝ བཱ་ལོ་ཏི པ་རཾ ད་ཧཱ་ཏཱིཏི. ཡེ་ནེ་ཝ ཧེ་ཏུ་ནཱ ཡེ་ན པ་ཙྩ་ཡེ་ན ཡེ་ན ཀཱ་ར་ཎེ་ན ཡེ་ན པ་བྷ་ཝེ་ན པ་རཾ བཱ་ལ་ཏོ ཧཱི་ན་ཏོ ནི་ཧཱི་ན་ཏོ ཨོ་མ་ཀ་ཏོ ལཱ་མ་ཀ་ཏོ ཚ་ཏུ་ཀྐ་ཏོ པ་རི་ཏྟ་ཏོ ད་ཧ་ཏི པ་སྶ་ཏི ད་ཀྑ་ཏི ཨོ་ལོ་ཀེ་ཏི ནི་ཛ྄ཛྷཱ་ཡ་ཏི ཨུ་པ་པ་རི་ཀྑ་ཏཱི་ཏི – ཡེ་ནེ་ཝ བཱ་ལོ་ཏི པ་རཾ ད་ཧཱ་ཏི.
ཏེ་ནཱ་ཏུ་མཱ་ནཾ ཀུ་ས་ལོ་ཏི ཙཱ་ཧཱཏི. ཨཱ་ཏུ་མཱ་ནོ ཝུ་ཙྩ་ཏི ཨ་ཏྟཱ. སོ་པི ཏེ་ནེ་ཝ ཧེ་ཏུ་ནཱ ཏེ་ན པ་ཙྩ་ཡེ་ན ཏེ་ན ཀཱ་ར་ཎེ་ན ཏེ་ན པ་བྷ་ཝེ་ན ཨ་ཏྟཱ་ནཾ ཨ་ཧ་མ་སྨི ཀུ་ས་ལོ པ་ཎྜི་ཏོ པ་ཉྙ་ཝཱ བུ་དྡྷི་མཱ ཉཱ་ཎཱི ཝི་བྷཱ་ཝཱི མེ་དྷཱ་ཝཱི་ཏི – ཏེ་ནཱ་ཏུ་མཱ་ནཾ ཀུ་ས་ལོ་ཏི ཙཱ་ཧ.
ས་ཡ་མ་ཏྟ་ནཱ སོ ཀུ་ས་ལཱ་ཝ་དཱ་ནོཏི. ས་ཡ་མེ་ཝ ཨ་ཏྟཱ་ནཾ ཀུ་ས་ལ་ཝཱ་དོ པ་ཎྜི་ཏ་ཝཱ་དོ ཐི་ར་ཝཱ་དོ ཉཱ་ཡ་ཝཱ་དོ ཧེ་ཏུ་ཝཱ་དོ ལ་ཀྑ་ཎ་ཝཱ་དོ ཀཱ་ར་ཎ་ཝཱ་དོ ཋཱ་ན་ཝཱ་དོ ས་ཀཱ་ཡ ལ་དྡྷི་ཡཱ་ཏི – ས་ཡ་མ་ཏྟ་ནཱ སོ ཀུ་ས་ལཱ་ཝ་དཱ་ནོ.
ཨ་ཉྙཾ ཝི་མཱ་ནེ་ཏི ཏ་དེ་ཝ པཱ་ཝཱཏི. ན ས་མྨཱ་ནེ་ཏཱི་ཏི་པི ཨ་ཉྙཾ ཝི་མཱ་ནེ་ཏི. ཨ་ཐ ཝཱ དོ་མ་ན་སྶཾ ཛ་ནེ་ཏཱི་ཏི་པི ཨ་ཉྙཾ ཝི་མཱ་ནེ་ཏི. ཏ་དེ་ཝ པཱ་ཝཱཏི ཏ་དེ་ཝ ཏཾ དི་ཊྛི་ག་ཏཾ པཱ་ཝ་ད་ཏི ‘‘ཨི་ཏི་པཱ་ཡཾ པུ་གྒ་ལོ མི་ཙྪཱ་དི་ཊྛི་ཀོ ཝི་པ་རཱི་ཏ་ད་སྶ་ནོ’’ཏི – ཨ་ཉྙཾ ཝི་མཱ་ནེ་ཏི ཏ་དེ་ཝ པཱ་ཝ་ད.
ཏེ་ནཱ་ཧ བྷ་ག་ཝཱ –
‘‘ཡེ་ནེ་ཝ བཱ་ལོ་ཏི པ་རཾ ད་ཧཱ་ཏི, ཏེ་ནཱ་ཏུ་མཱ་ནཾ ཀུ་ས་ལོ་ཏི ཙཱ་ཧ;
ས་ཡ་མ་ཏྟ་ནཱ སོ ཀུ་ས་ལཱ་ཝ་དཱ་ནོ, ཨ་ཉྙཾ ཝི་མཱ་ནེ་ཏི ཏ་དེ་ཝ པཱ་ཝཱ’’ཏི.
༡༢༤. ཨ་ཏི་སཱ་ར་དི་ཊྛི་ཡཱ སོ ས་མ་ཏྟོ, མཱ་ནེ་ན མ་ཏྟོ པ་རི་པུ་ཎྞ་མཱ་ནཱི;
ས་ཡ་མེ་ཝ སཱ་མཾ མ་ན་སཱ་བྷི་སི་ཏྟོ, དི་ཊྛཱི ཧི སཱ ཏ་སྶ ཏ་ཐཱ ས་མ་ཏྟཱ.
ཨ་ཏི་སཱ་ར་དི་ཊྛི་ཡཱ སོ ས་མ་ཏྟོཏི. ཨ་ཏི་སཱ་ར་དི་ཊྛི་ཡོ ཝུ་ཙྩ་ནྟི དྭཱ་ས་ཊྛི དི་ཊྛི་ག་ཏཱ་ནི. ཀིཾ་ཀཱ་ར་ཎཱ ཨ་ཏི་སཱ་ར་དི་ཊྛི་ཡོ ཝུ་ཙྩ་ནྟི དྭཱ་ས་ཊྛི དི་ཊྛི་ག་ཏཱ་ནི? ས་བྦཱ ཏཱ དི་ཊྛི་ཡོ ཀཱ་ར་ཎཱ་ཏི་ཀྐ་ནྟཱ ལ་ཀྑ་ཎཱ་ཏི་ཀྐ་ནྟཱ ཋཱ་ནཱ་ཏི་ཀྐ་ནྟཱ, ཏཾ་ཀཱ་ར་ཎཱ ཨ་ཏི་སཱ་ར་དི་ཊྛི་ཡོ ཝུ་ཙྩ་ནྟི དྭཱ་ས་ཊྛི དི་ཊྛི་ག་ཏཱ་ནི. ས་བྦཱ་པི དི་ཊྛི་ཡོ ཨ་ཏི་སཱ་ར་དི་ཊྛི་ཡོ [ས་བྦེ་པི ཏི་ཏྠི་ཡཱ ཨ་ཏི་སཱ་ར་དི་ཊྛི་ཡཱ (སྱཱ.)]. ཀིཾ་ཀཱ་ར་ཎཱ ས་བྦཱ་པི དི་ཊྛི་ཡོ ཝུ་ཙྩ་ནྟི ཨ་ཏི་སཱ་ར་དི་ཊྛི་ཡོ? ཏེ [ཏཱ (ཀ.)] ཨ་ཉྙ་མ་ཉྙཾ ཨ་ཏི་ཀྐ་མི་ཏྭཱ ས་མ་ཏི་ཀྐ་མི་ཏྭཱ ཝཱི་ཏི་ཝ་ཏྟི་ཏྭཱ དི་ཊྛི་ག་ཏཱ་ནི ཛ་ནེ་ནྟི ས་ཉྫ་ནེ་ནྟི ནི་བྦ་ཏྟེ་ནྟི ཨ་བྷི་ནི་བྦ་ཏྟེ་ནྟི, ཏཾ་ཀཱ་ར་ཎཱ ས་བྦཱ་པི དི་ཊྛི་ཡོ ཝུ་ཙྩ་ནྟི ཨ་ཏི་སཱ་ར་དི་ཊྛི་ཡོ. ཨ་ཏི་སཱ་ར་དི་ཊྛི་ཡཱ སོ ས་མ་ཏྟོཏི. ཨ་ཏི་སཱ་ར་དི་ཊྛི་ཡཱ ས་མ་ཏྟོ པ་རི་པུ་ཎྞོ ཨ་ནོ་མོ་ཏི – ཨ་ཏི་སཱ་ར་དི་ཊྛི་ཡཱ སོ ས་མ་ཏྟོ.
མཱ་ནེ་ན མ་ཏྟོ པ་རི་པུ་ཎྞ་མཱ་ནཱིཏི. ས་ཀཱ་ཡ དི་ཊྛི་ཡཱ དི་ཊྛི་མཱ་ནེ་ན མ་ཏྟོ པ་མ་ཏྟོ ཨུ་མྨ་ཏྟོ ཨ་ཏི་མ་ཏྟོ་ཏི – མཱ་ནེ་ན མ་ཏྟོ. པ་རི་པུ་ཎྞ་མཱ་ནཱིཏི པ་རི་པུ་ཎྞ་མཱ་ནཱི ས་མ་ཏྟ་མཱ་ནཱི ཨ་ནོ་མ་མཱ་ནཱི་ཏི – མཱ་ནེ་ན མ་ཏྟོ པ་རི་པུ་ཎྞ་མཱ་ནཱི.
ས་ཡ་མེ་ཝ སཱ་མཾ མ་ན་སཱ་བྷི་སི་ཏྟོཏི. ས་ཡ་མེ་ཝ ཨ་ཏྟཱ་ནཾ ཙི་ཏྟེ་ན ཨ་བྷི་སི་ཉྩ་ཏི ‘‘ཨ་ཧ་མ་སྨི ཀུ་ས་ལོ པ་ཎྜི་ཏོ པ་ཉྙ་ཝཱ བུ་དྡྷི་མཱ ཉཱ་ཎཱི ཝི་བྷཱ་ཝཱི མེ་དྷཱ་ཝཱི’’ཏི – ས་ཡ་མེ་ཝ སཱ་མཾ མ་ན་སཱ་བྷི་སི་ཏྟོ.
དི་ཊྛཱི ཧི སཱ ཏ་སྶ ཏ་ཐཱ ས་མ་ཏྟཱཏི. ཏ་སྶ སཱ དི་ཊྛི ཏ་ཐཱ ས་མ་ཏྟཱ ས་མཱ་དི་ནྣཱ ག་ཧི་ཏཱ པ་རཱ་མ་ཊྛཱ ཨ་བྷི་ནི་ཝི་ཊྛཱ ཨ་ཛ྄ཛྷོ་སི་ཏཱ ཨ་དྷི་མུ་ཏྟཱ་ཏི – དི་ཊྛཱི ཧི སཱ ཏ་སྶ ཏ་ཐཱ ས་མ་ཏྟཱ.
ཏེ་ནཱ་ཧ བྷ་ག་ཝཱ –
‘‘ཨ་ཏི་སཱ་ར་དི་ཊྛི་ཡཱ སོ ས་མ་ཏྟོ, མཱ་ནེ་ན མ་ཏྟོ པ་རི་པུ་ཎྞ་མཱ་ནཱི;
ས་ཡ་མེ་ཝ སཱ་མཾ མ་ན་སཱ་བྷི་སི་ཏྟོ, དི་ཊྛཱི ཧི སཱ ཏ་སྶ ཏ་ཐཱ ས་མ་ཏྟཱ’’ཏི.
༡༢༥. པ་ར་སྶ ཙེ ཧི ཝ་ཙ་སཱ ནི་ཧཱི་ནོ, ཏུ་མོ ས་ཧཱ ཧོ་ཏི ནི་ཧཱི་ན་པ་ཉྙོ;
ཨ་ཐ ཙེ ས་ཡཾ ཝེ་ད་གཱུ ཧོ་ཏི དྷཱི་རོ, ན ཀོ་ཙི བཱ་ལོ ས་མ་ཎེ་སུ ཨ་ཏྠི.
པ་ར་སྶ ཙེ ཧི ཝ་ཙ་སཱ ནི་ཧཱི་ནོཏི པ་ར་སྶ ཙེ ཝཱ་ཙཱ་ཡ ཝ་ཙ་ནེ་ན ནི་ནྡི་ཏ་ཀཱ་ར་ཎཱ ག་ར་ཧི་ཏ་ཀཱ་ར་ཎཱ ཨུ་པ་ཝ་དི་ཏ་ཀཱ་ར་ཎཱ པ་རོ བཱ་ལོ ཧོ་ཏི ཧཱི་ནོ ནི་ཧཱི་ནོ ཨོ་མ་ཀོ ལཱ་མ་ཀོ ཚ་ཏུ་ཀྐོ པ་རི་ཏྟོ་ཏི – པ་ར་སྶ ཙེ ཧི ཝ་ཙ་སཱ ནི་ཧཱི་ནོ. ཏུ་མོ ས་ཧཱ ཧོ་ཏི ནི་ཧཱི་ན་པ་ཉྙོཏི. སོ་པི ཏེ་ནེ་ཝ ས་ཧཱ ཧོ་ཏི ཧཱི་ན་པ་ཉྙོ ནི་ཧཱི་ན་པ་ཉྙོ ཨོ་མ་ཀ་པ་ཉྙོ ལཱ་མ་ཀ་པ་ཉྙོ ཚ་ཏུ་ཀྐ་པ་ཉྙོ པ་རི་ཏྟ་པ་ཉྙོ་ཏི – ཏུ་མོ ས་ཧཱ ཧོ་ཏི ནི་ཧཱི་ན་པ་ཉྙོ.
ཨ་ཐ ཙེ ས་ཡཾ ཝེ་ད་གཱུ ཧོ་ཏི དྷཱི་རོཏི ཨ་ཐ ཙེ ས་ཡཾ ཝེ་ད་གཱུ ཧོ་ཏི དྷཱི་རོ པ་ཎྜི་ཏོ པ་ཉྙ་ཝཱ བུ་དྡྷི་མཱ ཉཱ་ཎཱི ཝི་བྷཱ་ཝཱི མེ་དྷཱ་ཝཱི་ཏི – ཨ་ཐ ཙེ ས་ཡཾ ཝེ་ད་གཱུ ཧོ་ཏི དྷཱི་རོ.
ན ཀོ་ཙི བཱ་ལོ ས་མ་ཎེ་སུ ཨ་ཏྠཱིཏི. ས་མ་ཎེ་སུ ན ཀོ་ཙི བཱ་ལོ ཧཱི་ནོ ནི་ཧཱི་ནོ ཨོ་མ་ཀོ ལཱ་མ་ཀོ ཚ་ཏུ་ཀྐོ པ་རི་ཏྟོ ཨ་ཏྠི, ས་བྦེ་ཝ སེ་ཊྛ་པ་ཉྙཱ [ཨ་གྒ་པ་ཉྙཱ སེ་ཊྛ་པ་ཉྙཱ (སྱཱ.)] ཝི་སི་ཊྛ་པ་ཉྙཱ པཱ་མོ་ཀྑ་པ་ཉྙཱ ཨུ་ཏྟ་མ་པ་ཉྙཱ པ་ཝ་ར་པ་ཉྙཱ་ཏི – ན ཀོ་ཙི བཱ་ལོ ས་མ་ཎེ་སུ ཨ་ཏྠི.
ཏེ་ནཱ་ཧ བྷ་ག་ཝཱ –
‘‘པ་ར་སྶ ཙེ ཧི ཝ་ཙ་སཱ ནི་ཧཱི་ནོ, ཏུ་མོ ས་ཧཱ ཧོ་ཏི ནི་ཧཱི་ན་པ་ཉྙོ;
ཨ་ཐ ཙེ ས་ཡཾ ཝེ་ད་གཱུ ཧོ་ཏི དྷཱི་རོ, ན ཀོ་ཙི བཱ་ལོ ས་མ་ཎེ་སུ ཨ་ཏྠཱི’’ཏི.
༡༢༦. ཨ་ཉྙཾ ཨི་ཏོ ཡཱ་བྷི་ཝ་ད་ནྟི དྷ་མྨཾ, ཨ་པ་ར་དྡྷཱ སུ་དྡྷི་མ་ཀེ་ཝ་ལཱི ཏེ;
ཨེ་ཝ་མྤི ཏི་ཏྠྱཱ པུ་ཐུ་སོ ཝ་ད་ནྟི, ས་ནྡི་ཊྛི་རཱ་གེ་ན ཧི ཏེ་བྷི་ར་ཏྟཱ.
ཨ་ཉྙཾ ཨི་ཏོ ཡཱ་བྷི་ཝ་ད་ནྟི དྷ་མྨཾ, ཨ་པ་ར་དྡྷཱ སུ་དྡྷི་མ་ཀེ་ཝ་ལཱི ཏེཏི. ཨི་ཏོ ཨ་ཉྙཾ དྷ་མྨཾ དི་ཊྛིཾ པ་ཊི་པ་དཾ མ་གྒཾ ཡེ ཨ་བྷི་ཝ་ད་ནྟི, ཏེ སུ་དྡྷི་མ་གྒཾ ཝི་སུ་དྡྷི་མ་གྒཾ པ་རི་སུ་དྡྷི་མ་གྒཾ ཝོ་དཱ་ཏ་མ་གྒཾ པ་རི་ཡོ་དཱ་ཏ་མ་གྒཾ ཝི་ར་དྡྷཱ ཨ་པ་ར་དྡྷཱ ཁ་ལི་ཏཱ ག་ལི་ཏཱ ཨ་ཉྙཱ་ཡ ཨ་པ་ར་དྡྷཱ ཨ་ཀེ་ཝ་ལཱི ཏེ, ཨ་ས་མ་ཏྟཱ ཏེ, ཨ་པ་རི་པུ་ཎྞཱ ཏེ, ཧཱི་ནཱ ནི་ཧཱི་ནཱ ཨོ་མ་ཀཱ ལཱ་མ་ཀཱ ཚ་ཏུ་ཀྐཱ པ་རི་ཏྟཱ་ཏི – ཨ་ཉྙཾ ཨི་ཏོ ཡཱ་བྷི་ཝ་ད་ནྟི དྷ་མྨཾ, ཨ་པ་ར་དྡྷཱ སུ་དྡྷི་མ་ཀེ་ཝ་ལཱི ཏེ.
ཨེ་ཝ་མྤི ཏི་ཏྠྱཱ པུ་ཐུ་སོ ཝ་ད་ནྟཱིཏི. ཏི་ཏྠཾ ཝུ་ཙྩ་ཏི དི་ཊྛི་ག་ཏཾ. ཏི་ཏྠི་ཡཱ ཝུ་ཙྩ་ནྟི དི་ཊྛི་ག་ཏི་ཀཱ. པུ་ཐུ་དི་ཊྛི་ཡཱ པུ་ཐུ་དི་ཊྛི་ག་ཏཱ་ནི ཝ་ད་ནྟི ཀ་ཐེ་ནྟི བྷ་ཎ་ནྟི དཱི་པ་ཡ་ནྟི ཝོ་ཧ་ར་ནྟཱི་ཏི – ཨེ་ཝ་མྤི ཏི་ཏྠྱཱ པུ་ཐུ་སོ ཝ་ད་ནྟི.
ས་ནྡི་ཊྛི་རཱ་གེ་ན ཧི ཏེ་བྷི་ར་ཏྟཱཏི. ས་ཀཱ་ཡ དི་ཊྛི་ཡཱ དི་ཊྛི་རཱ་གེ་ན ར་ཏྟཱ ཨ་བྷི་ར་ཏྟཱ་ཏི – ས་ནྡི་ཊྛི་རཱ་གེ་ན ཧི ཏེ་བྷི་ར་ཏྟཱ.
ཏེ་ནཱ་ཧ བྷ་ག་ཝཱ –
‘‘ཨ་ཉྙཾ ཨི་ཏོ ཡཱ་བྷི་ཝ་ད་ནྟི དྷ་མྨཾ, ཨ་པ་ར་དྡྷཱ སུ་དྡྷི་མ་ཀེ་ཝ་ལཱི ཏེ;
ཨེ་ཝ་མྤི ཏི་ཏྠྱཱ པུ་ཐུ་སོ ཝ་ད་ནྟི, ས་ནྡི་ཊྛི་རཱ་གེ་ན ཧི ཏེ་བྷི་ར་ཏྟཱ’’ཏི.
༡༢༧. ཨི་དྷེ་ཝ སུ་དྡྷིཾ ཨི་ཏི ཝཱ་ད་ཡ་ནྟི, ནཱ་ཉྙེ་སུ དྷ་མྨེ་སུ ཝི་སུ་དྡྷི་མཱ་ཧུ;
ཨེ་ཝ་མྤི ཏི་ཏྠྱཱ པུ་ཐུ་སོ ནི་ཝི་ཊྛཱ, ས་ཀཱ་ཡ་ནེ ཏ་ཏྠ ད་ལ༹ྷཾ ཝ་དཱ་ནཱ.
ཨི་དྷེ་ཝ སུ་དྡྷིཾ ཨི་ཏི ཝཱ་ད་ཡ་ནྟཱིཏི. ཨི་དྷ སུ་དྡྷིཾ ཝི་སུ་དྡྷིཾ པ་རི་སུ་དྡྷིཾ, མུ་ཏྟིཾ ཝི་མུ་ཏྟིཾ པ་རི་མུ་ཏྟིཾ ཝ་ད་ནྟི ཀ་ཐེ་ནྟི བྷ་ཎ་ནྟི དཱི་པ་ཡ་ནྟི ཝོ་ཧ་ར་ནྟི. ‘‘ས་སྶ་ཏོ ལོ་ཀོ, ཨི་ད་མེ་ཝ ས་ཙྩཾ མོ་གྷ་མ་ཉྙ’’ནྟི ཨི་དྷ སུ་དྡྷིཾ ཝི་སུ་དྡྷིཾ པ་རི་སུ་དྡྷིཾ, མུ་ཏྟིཾ ཝི་མུ་ཏྟིཾ པ་རི་མུ་ཏྟིཾ ཝ་ད་ནྟི ཀ་ཐེ་ནྟི བྷ་ཎ་ནྟི དཱི་པ་ཡ་ནྟི ཝོ་ཧ་ར་ནྟི. ‘‘ཨ་ས་སྶ་ཏོ ལོ་ཀོ…པེ… ནེ་ཝ ཧོ་ཏི ན ན ཧོ་ཏི ཏ་ཐཱ་ག་ཏོ པ་རཾ མ་ར་ཎཱ, ཨི་ད་མེ་ཝ ས་ཙྩཾ མོ་གྷ་མ་ཉྙ’’ནྟི ཨི་དྷ སུ་དྡྷིཾ ཝི་སུ་དྡྷིཾ པ་རི་སུ་དྡྷིཾ མུ་ཏྟིཾ ཝི་མུ་ཏྟིཾ པ་རི་མུ་ཏྟིཾ ཝ་ད་ནྟི ཀ་ཐེ་ནྟི བྷ་ཎ་ནྟི དཱི་པ་ཡ་ནྟི ཝོ་ཧ་ར་ནྟཱི་ཏི – ཨི་དྷེ་ཝ སུ་དྡྷིཾ ཨི་ཏི ཝཱ་ད་ཡ་ནྟི.
ནཱ་ཉྙེ་སུ དྷ་མྨེ་སུ ཝི་སུ་དྡྷི་མཱ་ཧཱུཏི. ཨ་ཏྟ་ནོ ས་ཏྠཱ་རཾ དྷ་མྨ་ཀྑཱ་ནཾ ག་ཎཾ དི་ཊྛིཾ པ་ཊི་པ་དཾ མ་གྒཾ ཋ་པེ་ཏྭཱ ས་བྦེ པ་ར་ཝཱ་དེ ཁི་པ་ནྟི ཨུ་ཀྑི་པ་ནྟི པ་རི་ཀྑི་པ་ནྟི. ‘‘སོ ས་ཏྠཱ ན ས་བྦ་ཉྙཱུ, དྷ་མྨོ ན སྭཱ་ཀྑཱ་ཏོ, ག་ཎོ ན སུ་པྤ་ཊི་པ་ནྣོ, དི་ཊྛི ན བྷ་དྡི་ཀཱ, པ་ཊི་པ་དཱ ན སུ་པ་ཉྙ་ཏྟཱ, མ་གྒོ ན ནི་ཡྻཱ་ནི་ཀོ, ན་ཏྠེ་ཏྠ སུ་དྡྷི ཝཱ ཝི་སུ་དྡྷི ཝཱ པ་རི་སུ་དྡྷི ཝཱ, མུ་ཏྟི ཝཱ ཝི་མུ་ཏྟི ཝཱ པ་རི་མུ་ཏྟི ཝཱ, ན་ཏྠེ་ཏྠ སུ་ཛ྄ཛྷ་ནྟི ཝཱ ཝི་སུ་ཛ྄ཛྷ་ནྟི ཝཱ པ་རི་སུ་ཛ྄ཛྷ་ནྟི ཝཱ, མུ་ཙྩ་ནྟི ཝཱ ཝི་མུ་ཙྩ་ནྟི ཝཱ པ་རི་མུ་ཙྩ་ནྟི ཝཱ ཧཱི་ནཱ ནི་ཧཱི་ནཱ ཨོ་མ་ཀཱ ལཱ་མ་ཀཱ ཚ་ཏུ་ཀྐཱ པ་རི་ཏྟཱ’’ཏི, ཨེ་ཝ་མཱ་ཧཾ་སུ ཨེ་ཝཾ ཀ་ཐེ་ནྟི ཨེ་ཝཾ བྷ་ཎ་ནྟི ཨེ་ཝཾ དཱི་པ་ཡ་ནྟི ཨེ་ཝཾ ཝོ་ཧ་ར་ནྟཱི་ཏི – ནཱ་ཉྙེ་སུ དྷ་མྨེ་སུ ཝི་སུ་དྡྷི་མཱ་ཧུ.
ཨེ་ཝ་མྤི ཏི་ཏྠྱཱ པུ་ཐུ་སོ ནི་ཝི་ཊྛཱཏི. ཏི་ཏྠཾ ཝུ་ཙྩ་ཏི དི་ཊྛི་ག་ཏཾ. ཏི་ཏྠི་ཡཱ ཝུ་ཙྩ་ནྟི དི་ཊྛི་ག་ཏི་ཀཱ. པུ་ཐུ་དི་ཊྛི་ཡཱ [པུ་ཐུ་ཏི་ཏྠི་ཡཱ (སཱི. ཀ.) པུ་རི་མ་གཱ་ཐཱ་ཡ པཱ་ཋ་བྷེ་དོ ན་ཏྠི] པུ་ཐུ་དི་ཊྛི་ག་ཏེ་སུ ནི་ཝི་ཊྛཱ པ་ཏི་ཊྛི་ཏཱ ཨ་ལླཱི་ནཱ ཨུ་པ་ག་ཏཱ ཨ་ཛ྄ཛྷོ་སི་ཏཱ ཨ་དྷི་མུ་ཏྟཱ་ཏི – ཨེ་ཝ་མྤི ཏི་ཏྠྱཱ པུ་ཐུ་སོ ནི་ཝི་ཊྛཱ.
ས་ཀཱ་ཡ་ནེ ཏ་ཏྠ ད་ལ༹ྷཾ ཝ་དཱ་ནཱཏི. དྷ་མྨོ ས་ཀཱ་ཡ་ནཾ, དི་ཊྛི ས་ཀཱ་ཡ་ནཾ, པ་ཊི་པ་དཱ ས་ཀཱ་ཡ་ནཾ, མ་གྒོ ས་ཀཱ་ཡ་ནཾ, ས་ཀཱ་ཡ་ནེ ད་ལ༹ྷ་ཝཱ་དཱ ཐི་ར་ཝཱ་དཱ བ་ལི་ཀ་ཝཱ་དཱ ཨ་ཝ་ཊྛི་ཏ་ཝཱ་དཱ་ཏི – ས་ཀཱ་ཡ་ནེ ཏ་ཏྠ ད་ལ༹ྷཾ ཝ་དཱ་ནཱ.
ཏེ་ནཱ་ཧ བྷ་ག་ཝཱ –
‘‘ཨི་དྷེ་ཝ སུ་དྡྷིཾ ཨི་ཏི ཝཱ་ད་ཡ་ནྟི, ནཱ་ཉྙེ་སུ དྷ་མྨེ་སུ ཝི་སུ་དྡྷི་མཱ་ཧུ;
ཨེ་ཝ་མྤི ཏི་ཏྠྱཱ པུ་ཐུ་སོ ནི་ཝི་ཊྛཱ, ས་ཀཱ་ཡ་ནེ ཏ་ཏྠ ད་ལ༹ྷཾ ཝ་དཱ་ནཱ’’ཏི.
༡༢༨. ས་ཀཱ་ཡ་ནེ ཝཱ་པི ད་ལ༹ྷཾ ཝ་དཱ་ནོ, ཀ་མེ་ཏྠ [ཀཾ ཏ་ཏྠ (སཱི. ཀ.)] བཱ་ལོ་ཏི པ་རཾ ད་ཧེ་ཡྻ;
ས་ཡཾ་ཝ [ས་ཡ་མེ་ཝ (སྱཱ.)] སོ མེ་དྷ་ག་མཱ་ཝ་ཧེ་ཡྻ, པ་རཾ ཝ་དཾ བཱ་ལ་མ་སུ་དྡྷི་དྷ་མྨཾ.
ས་ཀཱ་ཡ་ནེ ཝཱ་པི ད་ལ༹ྷཾ ཝ་དཱ་ནོཏི. དྷ་མྨོ ས་ཀཱ་ཡ་ནཾ, དི་ཊྛི ས་ཀཱ་ཡ་ནཾ, པ་ཊི་པ་དཱ ས་ཀཱ་ཡ་ནཾ, མ་གྒོ ས་ཀཱ་ཡ་ནཾ, ས་ཀཱ་ཡ་ནེ ད་ལ༹ྷ་ཝཱ་དོ ཐི་ར་ཝཱ་དོ བ་ལི་ཀ་ཝཱ་དོ ཨ་ཝ་ཊྛི་ཏ་ཝཱ་དོ་ཏི – ས་ཀཱ་ཡ་ནེ ཝཱ་པི ད་ལ༹ྷཾ ཝ་དཱ་ནོ.
ཀ་མེ་ཏྠ བཱ་ལོ་ཏི པ་རཾ ད་ཧེ་ཡྻཱཏི. ཨེ་ཏྠཱཏི ས་ཀཱ་ཡ དི་ཊྛི་ཡཱ ས་ཀཱ་ཡ ཁ་ནྟི་ཡཱ ས་ཀཱ་ཡ རུ་ཙི་ཡཱ ས་ཀཱ་ཡ ལ་དྡྷི་ཡཱ པ་རཾ བཱ་ལ་ཏོ ཧཱི་ན་ཏོ ནི་ཧཱི་ན་ཏོ ཨོ་མ་ཀ་ཏོ ལཱ་མ་ཀ་ཏོ ཚ་ཏུ་ཀྐ་ཏོ པ་རི་ཏྟ་ཏོ ཀཾ ད་ཧེ་ཡྻ ཀཾ པ་སྶེ་ཡྻ ཀཾ ད་ཀྑེ་ཡྻ ཀཾ ཨོ་ལོ་ཀེ་ཡྻ ཀཾ ནི་ཛ྄ཛྷཱ་ཡེ་ཡྻ ཀཾ ཨུ་པ་པ་རི་ཀྑེ་ཡྻཱ་ཏི – ཀ་མེ་ཏྠ བཱ་ལོ་ཏི པ་རཾ ད་ཧེ་ཡྻ.
ས་ཡཾ་ཝ སོ མེ་དྷ་ག་མཱ་ཝ་ཧེ་ཡྻ, པ་རཾ ཝ་དཾ བཱ་ལ་མ་སུ་དྡྷི་དྷ་མྨནྟི. པ་རོ བཱ་ལོ ཧཱི་ནོ ནི་ཧཱི་ནོ ཨོ་མ་ཀོ ལཱ་མ་ཀོ ཚ་ཏུ་ཀྐོ པ་རི་ཏྟོ ཨ་སུ་དྡྷི་དྷ་མྨོ ཨ་ཝི་སུ་དྡྷི་དྷ་མྨོ ཨ་པ་རི་སུ་དྡྷི་དྷ་མྨོ ཨ་ཝོ་དཱ་ཏ་དྷ་མྨོ་ཏི – ཨེ་ཝཾ ཝ་ད་ནྟོ ཨེ་ཝཾ ཀ་ཐེ་ནྟོ ཨེ་ཝཾ བྷ་ཎ་ནྟོ ཨེ་ཝཾ དཱི་པ་ཡ་ནྟོ ཨེ་ཝཾ ཝོ་ཧ་ར་ནྟོ ས་ཡ་མེ་ཝ ཀ་ལ་ཧཾ བྷ་ཎྜ་ནཾ ཝི་གྒ་ཧཾ ཝི་ཝཱ་དཾ མེ་དྷ་གཾ ཨཱ་ཝ་ཧེ་ཡྻ ས་མཱ་ཝ་ཧེ་ཡྻ ཨཱ་ཧ་རེ་ཡྻ ས་མཱ་ཧ་རེ་ཡྻ ཨཱ་ཀ་ཌྜྷེ་ཡྻ ས་མཱ་ཀ་ཌྜྷེ་ཡྻ ག་ཎྷེ་ཡྻ པ་རཱ་མ་སེ་ཡྻ ཨ་བྷི་ནི་ཝི་སེ་ཡྻཱ་ཏི – ས་ཡཾ་ཝ སོ མེ་དྷ་ག་མཱ་ཝ་ཧེ་ཡྻ པ་རཾ ཝ་དཾ བཱ་ལ་མ་སུ་དྡྷི་དྷ་མྨཾ.
ཏེ་ནཱ་ཧ བྷ་ག་ཝཱ –
‘‘ས་ཀཱ་ཡ་ནེ ཝཱ་པི ད་ལ༹ྷཾ ཝ་དཱ་ནོ, ཀ་མེ་ཏྠ བཱ་ལོ་ཏི པ་རཾ ད་ཧེ་ཡྻ;
ས་ཡཾ་ཝ སོ མེ་དྷ་ག་མཱ་ཝ་ཧེ་ཡྻ, པ་རཾ ཝ་དཾ བཱ་ལ་མ་སུ་དྡྷི་དྷ་མྨ’’ནྟི.
༡༢༩. ཝི་ནི་ཙྪ་ཡེ ཋ་ཏྭཱ ས་ཡཾ པ་མཱ་ཡ, ཨུ་དྡྷཾ་ས [ཨུ་དྡྷཾ སོ (སྱཱ.)] ལོ་ཀ་སྨིཾ ཝི་ཝཱ་ད་མེ་ཏི;
ཧི་ཏྭཱ་ན ས་བྦཱ་ནི ཝི་ནི་ཙྪ་ཡཱ་ནི, ན མེ་དྷ་གཾ ཀུ་བྦ་ཏི ཛ་ནྟུ ལོ་ཀེ.
ཝི་ནི་ཙྪ་ཡེ ཋ་ཏྭཱ ས་ཡཾ པ་མཱ་ཡཱཏི. ཝི་ནི་ཙྪ་ཡཱ ཝུ་ཙྩ་ནྟི དྭཱ་ས་ཊྛི དི་ཊྛི་ག་ཏཱ་ནི. ཝི་ནི་ཙྪ་ཡ་དི་ཊྛི་ཡཱ ཋ་ཏྭཱ པ་ཏི་ཊྛ་ཧི་ཏྭཱ ག་ཎྷི་ཏྭཱ པ་རཱ་མ་སི་ཏྭཱ ཨ་བྷི་ནི་ཝི་སི་ཏྭཱ ཝི་ནི་ཙྪ་ཡེ ཋ་ཏྭཱ. ས་ཡཾ པ་མཱ་ཡཱཏི ས་ཡཾ པ་མཱ་ཡ པ་མི་ནི་ཏྭཱ. ‘‘ཨ་ཡཾ ས་ཏྠཱ ས་བྦ་ཉྙཱུ’’ཏི ས་ཡཾ པ་མཱ་ཡ པ་མི་ནི་ཏྭཱ, ‘‘ཨ་ཡཾ དྷ་མྨོ སྭཱ་ཀྑཱ་ཏོ… ཨ་ཡཾ ག་ཎོ སུ་པྤ་ཊི་པ་ནྣོ… ཨ་ཡཾ དི་ཊྛི བྷ་དྡི་ཀཱ… ཨ་ཡཾ པ་ཊི་པ་དཱ སུ་པ་ཉྙ་ཏྟཱ… ཨ་ཡཾ མ་གྒོ ནི་ཡྻཱ་ནི་ཀོ’’ཏི ས་ཡཾ པ་མཱ་ཡ པ་མི་ནི་ཏྭཱ་ཏི – ཝི་ནི་ཙྪ་ཡེ ཋ་ཏྭཱ ས་ཡཾ པ་མཱ་ཡ.
ཨུ་དྡྷཾ་ས ལོ་ཀ་སྨིཾ ཝི་ཝཱ་ད་མེ་ཏཱིཏི. ཨུ་དྡྷཾ་སོ ཝུ་ཙྩ་ཏི ཨ་ནཱ་ག་ཏཾ. ཨ་ཏྟ་ནོ ཝཱ་དཾ ཨུ་དྡྷཾ ཋ་པེ་ཏྭཱ ས་ཡ་མེ་ཝ ཀ་ལ་ཧཾ བྷ་ཎྜ་ནཾ ཝི་གྒ་ཧཾ ཝི་ཝཱ་དཾ མེ་དྷ་གཾ ཨེ་ཏི ཨུ་པེ་ཏི ཨུ་པ་ག་ཙྪ་ཏི ག་ཎྷཱ་ཏི པ་རཱ་མ་ས་ཏི ཨ་བྷི་ནི་ཝི་ས་ཏཱི་ཏི. ཨེ་ཝ་མྤི ཨུ་དྡྷཾ་ས ལོ་ཀ་སྨིཾ ཝི་ཝཱ་ད་མེ་ཏི. ཨ་ཐ ཝཱ ཨ་ཉྙེ་ན ཨུ་དྡྷཾ ཝཱ་དེ་ན ས་དྡྷིཾ ཀ་ལ་ཧཾ ཀ་རོ་ཏི བྷ་ཎྜ་ནཾ ཀ་རོ་ཏི ཝི་གྒ་ཧཾ ཀ་རོ་ཏི ཝི་ཝཱ་དཾ ཀ་རོ་ཏི མེ་དྷ་གཾ ཀ་རོ་ཏི – ‘‘ན ཏྭཾ ཨི་མཾ དྷ་མྨ་ཝི་ན་ཡཾ ཨཱ་ཛཱ་ནཱ་སི…པེ… ནི་བྦེ་ཋེ་ཧི ཝཱ ས་ཙེ པ་ཧོ་སཱི’’ཏི. ཨེ་ཝ་མྤི ཨུ་དྡྷཾ་ས ལོ་ཀ་སྨིཾ ཝི་ཝཱ་ད་མེ་ཏི.
ཧི་ཏྭཱ་ན ས་བྦཱ་ནི ཝི་ནི་ཙྪ་ཡཱ་ནཱིཏི. ཝི་ནི་ཙྪ་ཡཱ ཝུ་ཙྩ་ནྟི དྭཱ་ས་ཊྛི དི་ཊྛི་ག་ཏཱ་ནི. དི་ཊྛི་ཝི་ནི་ཙྪ་ཡཱ ས་བྦེ ཝི་ནི་ཙྪ་ཡེ [ས་བྦཱ ཝི་ནི་ཙྪི་ཏ་དི་ཊྛི་ཡོ (སྱཱ.), ས་བྦཱ ཝི་ནི་ཙྪ་ཡ་དི་ཊྛི་ཡོ (ཀ.)] ཧི་ཏྭཱ ཙ་ཛི་ཏྭཱ པ་རི་ཙྩ་ཛི་ཏྭཱ ཛ་ཧི་ཏྭཱ པ་ཛ་ཧི་ཏྭཱ ཝི་ནོ་དེ་ཏྭཱ བྱ་ནྟིཾ ཀ་རི་ཏྭཱ ཨ་ན་བྷཱ་ཝཾ ག་མེ་ཏྭཱ་ཏི – ཧི་ཏྭཱ་ན ས་བྦཱ་ནི ཝི་ནི་ཙྪ་ཡཱ་ནི.
ན མེ་དྷ་གཾ ཀུ་བྦ་ཏི ཛ་ནྟུ ལོ་ཀེཏི. ན ཀ་ལ་ཧཾ ཀ་རོ་ཏི, ན བྷ་ཎྜ་ནཾ ཀ་རོ་ཏི, ན ཝི་གྒ་ཧཾ ཀ་རོ་ཏི, ན ཝི་ཝཱ་དཾ ཀ་རོ་ཏི, ན མེ་དྷ་གཾ ཀ་རོ་ཏི. ཝུ་ཏྟ་ཉྷེ་ཏཾ བྷ་ག་ཝ་ཏཱ – ‘‘ཨེ་ཝཾ ཝི་མུ་ཏྟ་ཙི་ཏྟོ ཁོ, ཨ་གྒི་ཝེ་སྶ་ན, བྷི་ཀྑུ ན ཀེ་ན་ཙི སཾ་ཝ་ད་ཏི, ན ཀེ་ན་ཙི ཝི་ཝ་ད་ཏི, ཡ་ཉྩ ལོ་ཀེ ཝུ་ཏྟཾ ཏེ་ན ཙ ཝོ་ཧ་ར་ཏི ཨ་པ་རཱ་མ་ས’’ནྟི. ཛ་ནྟཱུཏི ས་ཏྟོ ན་རོ མཱ་ན་ཝོ པོ་སོ པུ་གྒ་ལོ ཛཱི་ཝོ ཛཱ་གུ ཛ་ནྟུ ཨི་ནྡ་གུ མ་ནུ་ཛོ. ལོ་ཀེཏི ཨ་པཱ་ཡ་ལོ་ཀེ…པེ… ཨཱ་ཡ་ཏ་ན་ལོ་ཀེ་ཏི – ན མེ་དྷ་གཾ ཀུ་བྦ་ཏི ཛ་ནྟུ ལོ་ཀེ་ཏི.
ཏེ་ནཱ་ཧ བྷ་ག་ཝཱ –
‘‘ཝི་ནི་ཙྪ་ཡེ ཋ་ཏྭཱ ས་ཡཾ པ་མཱ་ཡ, ཨུ་དྡྷཾ་ས ལོ་ཀ་སྨིཾ ཝི་ཝཱ་ད་མེ་ཏི;
ཧི་ཏྭཱ་ན ས་བྦཱ་ནི ཝི་ནི་ཙྪ་ཡཱ་ནི, ན མེ་དྷ་གཾ ཀུ་བྦ་ཏི ཛ་ནྟུ ལོ་ཀེ’’ཏི.