༨. པ་ཊི་ས་ལླཱ་ན་སུ་ཏྟཾ

༤༥. ཝུ་ཏྟ་ཉྷེ་ཏཾ བྷ་ག་ཝ་ཏཱ, ཝུ་ཏྟ་མ་ར་ཧ་ཏཱ་ཏི མེ སུ་ཏཾ –

‘‘པ་ཊི་ས་ལླཱ་ནཱ་རཱ་མཱ [པ་ཊི་ས་ལླཱ་ནཱ་རཱ་མཱ (ཀ.)], བྷི་ཀྑ་ཝེ, ཝི་ཧ་ར་ཐ པ་ཊི་ས་ལླཱ་ན་ར་ཏཱ, ཨ་ཛ྄ཛྷ་ཏྟཾ ཙེ་ཏོ་ས་མ་ཐ་མ་ནུ་ཡུ་ཏྟཱ, ཨ་ནི་རཱ་ཀ་ཏ་ཛ྄ཛྷཱ་ནཱ, ཝི་པ་སྶ་ནཱ་ཡ ས་མ་ནྣཱ་ག་ཏཱ, བྲཱུ་ཧེ་ཏཱ སུ་ཉྙཱ་གཱ་རཱ་ནཾ. པ་ཊི་ས་ལླཱ་ནཱ་རཱ་མཱ་ནཾ, བྷི་ཀྑ་ཝེ, ཝི་ཧ་ར་ཏཾ པ་ཊི་ས་ལླཱ་ན་ར་ཏཱ་ནཾ ཨ་ཛ྄ཛྷ་ཏྟཾ ཙེ་ཏོ་ས་མ་ཐ་མ་ནུ་ཡུ་ཏྟཱ་ནཾ ཨ་ནི་རཱ་ཀ་ཏ་མ་ཛ྄ཛྷཱ་ནཱ་ནཾ ཝི་པ་སྶ་ནཱ་ཡ ས་མ་ནྣཱ་ག་ཏཱ་ནཾ བྲཱུ་ཧེ་ཏཱ་ནཾ སུ་ཉྙཱ་གཱ་རཱ་ནཾ དྭི་ནྣཾ ཕ་ལཱ་ནཾ ཨ་ཉྙ་ཏ་རཾ ཕ་ལཾ པཱ་ཊི་ཀ་ངྑཾ – དི་ཊྛེ་ཝ དྷ་མྨེ ཨ་ཉྙཱ, ས་ཏི ཝཱ ཨུ་པཱ་དི་སེ་སེ ཨ་ནཱ་གཱ་མི་ཏཱ’’ཏི. ཨེ་ཏ་མ་ཏྠཾ བྷ་ག་ཝཱ ཨ་ཝོ་ཙ. ཏ་ཏྠེ་ཏཾ ཨི་ཏི ཝུ་ཙྩ་ཏི –

‘‘ཡེ ས་ནྟ་ཙི་ཏྟཱ ནི་པ་ཀཱ, ས་ཏི་མ་ནྟོ ཙ [ས་ཏི་མ་ནྟོ་ཝ (སཱི. ཀ.)] ཛྷཱ་ཡི་ནོ;

ས་མྨཱ དྷ་མྨཾ ཝི་པ་སྶ་ནྟི, ཀཱ་མེ་སུ ཨ་ན་པེ་ཀྑི་ནོ.

‘‘ཨ་པྤ་མཱ་ད་ར་ཏཱ ས་ནྟཱ, པ་མཱ་དེ བྷ་ཡ་ད་སྶི་ནོ;

ཨ་བྷ་བྦཱ པ་རི་ཧཱ་ནཱ་ཡ, ནི་བྦཱ་ན་སྶེ་ཝ ས་ནྟི་ཀེ’’ཏི.

ཨ་ཡ་མྤི ཨ་ཏྠོ ཝུ་ཏྟོ བྷ་ག་ཝ་ཏཱ, ཨི་ཏི མེ སུ་ཏ་ནྟི. ཨ་ཊྛ་མཾ.