༡. དུ་ཀྑ་ཝི་ཧཱ་ར་སུ་ཏྟཾ

༢༨. (དྭེ དྷ་མྨེ ཨ་ནུ་ཀྐ་ཊི) [( ) སྱཱ་མ་པོ་ཏྠ་ཀེ ན་ཏྠི] ཝུ་ཏྟ་ཉྷེ་ཏཾ བྷ་ག་ཝ་ཏཱ, ཝུ་ཏྟ་མ་ར་ཧ་ཏཱ་ཏི མེ སུ་ཏཾ –

‘‘དྭཱི་ཧི, བྷི་ཀྑ་ཝེ, དྷ་མྨེ་ཧི ས་མ་ནྣཱ་ག་ཏོ བྷི་ཀྑུ དི་ཊྛེ་ཝ དྷ་མྨེ དུ་ཀྑཾ ཝི་ཧ་ར་ཏི ས་ཝི་གྷཱ་ཏཾ ས་ཨུ་པཱ་ཡཱ་སཾ ས་པ་རི་ལཱ༹་ཧཾ; ཀཱ་ཡ་སྶ བྷེ་དཱ པ་རཾ མ་ར་ཎཱ དུ་གྒ་ཏི པཱ་ཊི་ཀ་ངྑཱ. ཀ་ཏ་མེ་ཧི དྭཱི་ཧི? ཨི་ནྡྲི་ཡེ་སུ ཨ་གུ་ཏྟ་དྭཱ་ར་ཏཱ་ཡ [ཨ་གུ་ཏྟ་དྭཱ་རོ (ཨ་ཊྛ.)] ཙ, བྷོ་ཛ་ནེ ཨ་མ་ཏྟ་ཉྙུ་ཏཱ་ཡ [ཨ་མ་ཏྟ་ཉྙཱུ (ཨ་ཊྛ.)] ཙ. ཨི་མེ་ཧི ཁོ, བྷི་ཀྑ་ཝེ, དྭཱི་ཧི དྷ་མྨེ་ཧི ས་མ་ནྣཱ་ག་ཏོ བྷི་ཀྑུ དི་ཊྛེ་ཝ དྷ་མྨེ དུ་ཀྑཾ ཝི་ཧ་ར་ཏི ས་ཝི་དྷཱ་ཏཾ ས་ཨུ་པཱ་ཡཱ་སཾ ས་པ་རི་ལཱ༹་ཧཾ; ཀཱ་ཡ་སྶ བྷེ་དཱ པ་རཾ མ་ར་ཎཱ དུ་གྒ་ཏི པཱ་ཊི་ཀ་ངྑཱ’’ཏི. ཨེ་ཏ་མ་ཏྠཾ བྷ་ག་ཝཱ ཨ་ཝོ་ཙ. ཏ་ཏྠེ་ཏཾ ཨི་ཏི ཝུ་ཙྩ་ཏི –

‘‘ཙ་ཀྑུ སོ་ཏ་ཉྩ གྷཱ་ན་ཉྩ, ཛི་ཝ྄ཧཱ ཀཱ་ཡོ ཏ་ཐཱ མ་ནོ;

ཨེ་ཏཱ་ནི ཡ་སྶ དྭཱ་རཱ་ནི, ཨ་གུ་ཏྟཱ་ནི་དྷ [ཨ་གུ་ཏྟཱ་ནི ཙ (སྱཱ.)] བྷི་ཀྑུ་ནོ.

‘‘བྷོ་ཛ་ན་མྷི ཨ་མ་ཏྟ་ཉྙཱུ, ཨི་ནྡྲི་ཡེ་སུ ཨ་སཾ་ཝུ་ཏོ;

ཀཱ་ཡ་དུ་ཀྑཾ ཙེ་ཏོ་དུ་ཀྑཾ, དུ་ཀྑཾ སོ ཨ་དྷི་ག་ཙྪ་ཏི.

‘‘ཌ་ཡ྄ཧ་མཱ་ནེ་ན ཀཱ་ཡེ་ན, ཌ་ཡ྄ཧ་མཱ་ནེ་ན ཙེ་ཏ་སཱ;

དི་ཝཱ ཝཱ ཡ་དི ཝཱ ར་ཏྟིཾ, དུ་ཀྑཾ ཝི་ཧ་ར་ཏི ཏཱ་དི་སོ’’ཏི.

ཨ་ཡ་མྤི ཨ་ཏྠོ ཝུ་ཏྟོ བྷ་ག་ཝ་ཏཱ, ཨི་ཏི མེ སུ་ཏ་ནྟི. པ་ཋ་མཾ.