༡. ལ་ཀུ་ཎྜ་བྷ་དྡི་ཡ་ཏྠེ་ར་ཨ་པ་དཱ་ནཾ
༡. ‘‘པ་དུ་མུ་ཏྟ་རོ ནཱ་མ ཛི་ནོ, ས་བྦ་དྷ་མྨེ་སུ ཙ་ཀྑུ་མཱ;
ཨི་ཏོ ས་ཏ་ས་ཧ་སྶ་མྷི, ཀ་པྤེ ཨུ་པྤ་ཛྫི ནཱ་ཡ་ཀོ.
༢. ‘‘ཏ་དཱ་ཧཾ ཧཾ་ས་ཝ་ཏི་ཡཾ, སེ་ཊྛི་པུ་ཏྟོ མ་ཧ་དྡྷ་ནོ;
ཛ་ངྒྷཱ་ཝི་ཧཱ་རཾ ཝི་ཙ་རཾ, ས་ངྒྷཱ་རཱ་མཾ ཨ་ག་ཙྪ་ཧཾ.
༣. ‘‘ཏ་དཱ སོ ལོ་ཀ་པ་ཛྫོ་ཏོ, དྷ་མྨཾ དེ་སེ་སི ནཱ་ཡ་ཀོ;
མ་ཉྫུ་སྶ་རཱ་ནཾ པ་ཝ་རཾ, སཱ་ཝ་ཀཾ ཨ་བྷི་ཀི་ཏྟ་ཡི.
༤. ‘‘ཏཾ སུ་ཏྭཱ མུ་དི་ཏོ ཧུ་ཏྭཱ, ཀཱ་རཾ ཀ་ཏྭཱ མ་ཧེ་སི་ནོ;
ཝ་ནྡི་ཏྭཱ ས་ཏྠུ་ནོ པཱ་དེ, ཏཾ ཋཱ་ན་མ་བྷི་པ་ཏྠ་ཡིཾ.
༥. ‘‘ཏ་དཱ བུ་དྡྷོ ཝི་ཡཱ་ཀཱ་སི, ས་ངྒྷ་མ་ཛ྄ཛྷེ ཝི་ནཱ་ཡ་ཀོ;
‘ཨ་ནཱ་ག་ཏ་མྷི ཨ་དྡྷཱ་ནེ, ལ་ཙྪ་སེ ཏཾ མ་ནོ་ར་ཐཾ.
༦. ‘‘‘ས་ཏ་ས་ཧ་སྶི་ཏོ ཀ་པྤེ, ཨོ་ཀྐཱ་ཀ་ཀུ་ལ་ས་མྦྷ་ཝོ;
གོ་ཏ་མོ ནཱ་མ གོ་ཏྟེ་ན, ས་ཏྠཱ ལོ་ཀེ བྷ་ཝི་སྶ་ཏི.
༧. ‘‘‘ཏ་སྶ དྷ་མྨེ་སུ དཱ་ཡཱ་དོ, ཨོ་ར་སོ དྷ་མྨ་ནི་མྨི་ཏོ;
བྷ་དྡི་ཡོ ནཱ་མ ནཱ་མེ་ན, ཧེ་སྶ་ཏི ས་ཏྠུ སཱ་ཝ་ཀོ’.
༨. ‘‘ཏེ་ན ཀ་མྨེ་ན སུ་ཀ་ཏེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་ས་མ་ག་ཙྪ་ཧཾ.
༩. ‘‘དྭེ་ན་ཝུ་ཏེ ཨི་ཏོ ཀ་པྤེ, ཕུ་སྶོ ཨུ་པྤ་ཛྫི ནཱ་ཡ་ཀོ;
དུ་རཱ་ས་དོ དུ་པྤ་ས་ཧོ, ས་བྦ་ལོ་ཀུ་ཏྟ་མོ ཛི་ནོ.
༡༠. ‘‘ཙ་ར་ཎེ་ན ཙ ས་མྤ་ནྣོ, བྲ་ཧཱ ཨུ་ཛུ པ་ཏཱ་པ་ཝཱ;
ཧི་ཏེ་སཱི ས་བྦ་ས་ཏྟཱ་ནཾ [ས་བྦ་པཱ་ཎཱི་ནཾ (སཱི.)], བ་ཧུཾ མོ་ཙེ་སི བ་ནྡྷ་ནཱ.
༡༡. ‘‘ན་ནྡཱ་རཱ་མ་ཝ་ནེ ཏ་སྶ, ཨ་ཧོ་སིཾ ཕུ་སྶ་ཀོ་ཀི་ལོ [པུ་སྶ་ཀོ་ཀི་ལོ (སཱི. སྱཱ.)];
ག་ནྡྷ་ཀུ་ཊི་ས་མཱ་ས་ནྣེ, ཨ་མྦ་རུ་ཀྑེ ཝ་སཱ་མ་ཧཾ.
༡༢. ‘‘ཏ་དཱ པི་ཎྜཱ་ཡ ག་ཙྪ་ནྟཾ, ད་ཀྑི་ཎེ་ཡྻཾ ཛི་ནུ་ཏྟ་མཾ;
དི་སྭཱ ཙི་ཏྟཾ པ་སཱ་དེ་ཏྭཱ, མ་ཉྫུ་ནཱ་བྷི་ནི་ཀཱུ་ཛ་ཧཾ [མ་ཉྫུ་ནཱ་དེ་ན ཀཱུ་ཛ་ཧཾ (སཱི. པཱི.)].
༡༣. ‘‘རཱ་ཛུ་ཡྻཱ་ནཾ ཏ་དཱ ག་ནྟྭཱ, སུ་པ་ཀྐཾ ཀ་ན་ཀ་ཏྟ་ཙཾ;
ཨ་མྦ་པི་ཎྜཾ ག་ཧེ་ཏྭཱ་ན, ས་མྦུ་དྡྷ་སྶོ་པ་ནཱ་མ་ཡིཾ.
༡༤. ‘‘ཏ་དཱ མེ ཙི་ཏྟ་མ་ཉྙཱ་ཡ, མ་ཧཱ་ཀཱ་རུ་ཎི་ཀོ ཛི་ནོ;
ཨུ་པ་ཊྛཱ་ཀ་སྶ ཧ་ཏྠ་ཏོ, པ་ཏྟཾ པ་གྒ་ཎྷི ནཱ་ཡ་ཀོ.
༡༥. ‘‘ཨ་དཱ་སིཾ ཧ་ཊྛ་ཙི་ཏྟོ་ཧཾ [ཏུ་ཊྛ་ཙི་ཏྟོ་ཧཾ (སཱི.)], ཨ་མྦ་པི་ཎྜཾ མ་ཧཱ་མུ་ནེ;
པ་ཏྟེ པ་ཀྑི་པྤ པ་ཀྑེ་ཧི, པ་ཉྫ་ལིཾ [པ་ཀྑེ་ཧ་ཉྫ་ལིཾ (སཱི.)] ཀ་ཏྭཱ་ན མ་ཉྫུ་ནཱ.
༡༦. ‘‘ས་རེ་ན ར་ཛ་ནཱི་ཡེ་ན, ས་ཝ་ནཱི་ཡེ་ན ཝ་གྒུ་ནཱ;
ཝ་སྶ་ནྟོ བུ་དྡྷ་པཱུ་ཛ་ཏྠཾ, ནཱི་ལ༹ཾ [ནི་དྡཾ (སྱཱ. པཱི.)] ག་ནྟྭཱ ནི་པ་ཛྫ་ཧཾ.
༡༧. ‘‘ཏ་དཱ མུ་དི་ཏ་ཙི་ཏྟཾ མཾ, བུ་དྡྷ་པེ་མ་ག་ཏཱ་ས་ཡཾ;
ས་ཀུ་ཎ་གྒྷི ཨུ་པཱ་ག་ནྟྭཱ, གྷཱ་ཏ་ཡཱི དུ་ཊྛ་མཱ་ན་སོ.
༡༨. ‘‘ཏ་ཏོ ཙུ་ཏོ་ཧཾ ཏུ་སི་ཏེ, ཨ་ནུ་བྷོ་ཏྭཱ མ་ཧཱ་སུ་ཁཾ;
མ་ནུ་སྶ་ཡོ་ནི་མཱ་ག་ཙྪིཾ, ཏ་སྶ ཀ་མྨ་སྶ ཝཱ་ཧ་སཱ.
༡༩. ‘‘ཨི་མ་མྷི བྷ་དྡ་ཀེ ཀ་པྤེ, བྲ་ཧྨ་བ་ནྡྷུ མ་ཧཱ་ཡ་སོ;
ཀ་སྶ་པོ ནཱ་མ གོ་ཏྟེ་ན, ཨུ་པྤ་ཛྫི ཝ་ད་ཏཾ ཝ་རོ.
༢༠. ‘‘སཱ་ས་ནཾ ཛོ་ཏ་ཡི་ཏྭཱ སོ, ཨ་བྷི་བྷུ་ཡྻ ཀུ་ཏི་ཏྠི་ཡེ;
ཝི་ན་ཡི་ཏྭཱ་ན ཝེ་ནེ་ཡྻེ, ནི་བྦུ་ཏོ སོ ས་སཱ་ཝ་ཀོ.
༢༡. ‘‘ནི་བྦུ་ཏེ ཏ་མྷི ལོ་ཀ་གྒེ, པ་ས་ནྣཱ ཛ་ན་ཏཱ བ་ཧཱུ;
པཱུ་ཛ་ན་ཏྠཱ་ཡ བུ་དྡྷ་སྶ, ཐཱུ་པཾ ཀུ་བྦ་ནྟི ས་ཏྠུ་ནོ.
༢༢. ‘‘‘ས་ཏྟ་ཡོ་ཛ་ནི་ཀཾ ཐཱུ་པཾ, ས་ཏྟ་ར་ཏ་ན་བྷཱུ་སི་ཏཾ;
ཀ་རི་སྶཱ་མ མ་ཧེ་སི་སྶ’, ཨི་ཙྩེ་ཝཾ མ་ནྟ་ཡ་ནྟི ཏེ.
༢༣. ‘‘ཀི་ཀི་ནོ ཀཱ་སི་རཱ་ཛ་སྶ, ཏ་དཱ སེ་ནཱ་ཡ ནཱ་ཡ་ཀོ;
ཧུ་ཏྭཱ་ཧཾ ཨ་པྤ་མཱ་ཎ་སྶ, པ་མཱ་ཎཾ ཙེ་ཏི་ཡེ ཝ་དིཾ.
༢༤. ‘‘ཏ་དཱ ཏེ མ་མ ཝཱ་ཀྱེ་ན, ཙེ་ཏི་ཡཾ ཡོ་ཛ་ནུ་གྒ་ཏཾ;
ཨ་ཀཾ་སུ ན་ར་ཝཱི་ར་སྶ, ནཱ་ནཱ་ར་ཏ་ན་བྷཱུ་སི་ཏཾ.
༢༥. ‘‘ཏེ་ན ཀ་མྨེ་ན སུ་ཀ་ཏེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་ས་མ་ག་ཙྪ་ཧཾ.
༢༦. ‘‘པ་ཙྪི་མེ ཙ བྷ་ཝེ དཱ་ནི, ཛཱ་ཏོ སེ་ཊྛི་ཀུ་ལེ ཨ་ཧཾ;
སཱ་ཝ་ཏྠི་ཡཾ པུ་ར་ཝ་རེ, ཨི་དྡྷེ ཕཱི་ཏེ མ་ཧ་དྡྷ་ནེ.
༢༧. ‘‘པུ་ར་པྤ་ཝེ་སེ སུ་ག་ཏཾ, དི་སྭཱ ཝི་མྷི་ཏ་མཱ་ན་སོ;
པ་བྦ་ཛི་ཏྭཱ་ན ན ཙི་རཾ, ཨ་ར་ཧ་ཏྟ་མ་པཱ་པུ་ཎིཾ.
༢༨. ‘‘ཙེ་ཏི་ཡ་སྶ པ་མཱ་ཎཾ ཡཾ, ཨ་ཀ་རིཾ ཏེ་ན ཀ་མྨུ་ནཱ;
ལ་ཀུ་ཎྜ་ཀ་ས་རཱི་རོ་ཧཾ, ཛཱ་ཏོ པ་རི་བྷ་ཝཱ་ར་ཧོ.
༢༩. ‘‘ས་རེ་ན མ་དྷུ་རེ་ནཱ་ཧཾ, པཱུ་ཛི་ཏྭཱ ཨི་སི་ས་ཏྟ་མཾ;
མ་ཉྫུ་སྶ་རཱ་ནཾ བྷི་ཀྑཱུ་ནཾ, ཨ་གྒ་ཏྟ་མ་ནུ་པཱ་པུ་ཎིཾ.
༣༠. ‘‘ཕ་ལ་དཱ་ནེ་ན བུ་དྡྷ་སྶ, གུ་ཎཱ་ནུ་སྶ་ར་ཎེ་ན ཙ;
སཱ་མ་ཉྙ་ཕ་ལ་ས་མྤ་ནྣོ, ཝི་ཧ་རཱ་མི ཨ་ནཱ་ས་ཝོ.
༣༡. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ, བྷ་ཝཱ ས་བྦེ ས་མཱུ་ཧ་ཏཱ;
ནཱ་གོ་ཝ བ་ནྡྷ་ནཾ ཚེ་ཏྭཱ, ཝི་ཧ་རཱ་མི ཨ་ནཱ་ས་ཝོ.
༣༢. ‘‘སྭཱ་ག་ཏཾ ཝ་ཏ མེ ཨཱ་སི, བུ་དྡྷ་སེ་ཊྛ་སྶ ས་ནྟི་ཀེ;
ཏི་སྶོ ཝི་ཛྫཱ ཨ་ནུ་པྤ་ཏྟཱ, ཀ་ཏཾ བུ་དྡྷ་སྶ སཱ་ས་ནཾ.
༣༣. ‘‘པ་ཊི་ས་མྦྷི་དཱ ཙ་ཏ་སྶོ, ཝི་མོ་ཀྑཱ་པི ཙ ཨ་ཊྛི་མེ;
ཚ་ལ༹་བྷི་ཉྙཱ ས་ཙྪི་ཀ་ཏཱ, ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ལ་ཀུ་ཎྜ་བྷ་དྡི་ཡོ ཐེ་རོ ཨི་མཱ གཱ་ཐཱ་ཡོ
ཨ་བྷཱ་སི་ཏྠཱ་ཏི.
ལ་ཀུ་ཎྜ་བྷ་དྡི་ཡ་ཏྠེ་ར་སྶཱ་པ་དཱ་ནཾ པ་ཋ་མཾ.