༡༠. སུ་ག་ནྡྷ་ཏྠེ་ར་ཨ་པ་དཱ་ནཾ
༨༡. ‘‘ཨི་མ་མྷི བྷ་དྡ་ཀེ ཀ་པྤེ, བྲ་ཧྨ་བ་ནྡྷུ མ་ཧཱ་ཡ་སོ;
ཀ་སྶ་པོ ནཱ་མ གོ་ཏྟེ་ན [ནཱ་མེ་ན (ས་བྦ་ཏྠ)], ཨུ་པྤ་ཛྫི ཝ་ད་ཏཾ ཝ་རོ.
༨༢. ‘‘ཨ་ནུ་བྱ་ཉྫ་ན་ས་མྤ་ནྣོ, བཱ་ཏྟིཾ་ས་ཝ་ར་ལ་ཀྑ་ཎོ;
བྱཱ་མ་པྤ་བྷཱ་པ་རི་ཝུ་ཏོ, རཾ་སི་ཛཱ་ལ་ས་མོ་ཏྠ་ཊོ [རཾ་སི་ཛཱ་ལ་ས་མོ་ས་ཊོ (སཱི. པཱི.)].
༨༣. ‘‘ཨ་སྶཱ་སེ་ཏཱ ཡ་ཐཱ ཙ་ནྡོ, སཱུ་རི་ཡོ་ཝ པ་བྷ་ངྐ་རོ;
ནི་བྦཱ་པེ་ཏཱ ཡ་ཐཱ མེ་གྷོ, སཱ་ག་རོ་ཝ གུ་ཎཱ་ཀ་རོ.
༨༤. ‘‘དྷ་ར་ཎཱི་རི་ཝ སཱི་ལེ་ན, ཧི་མ་ཝཱ་ཝ ས་མཱ་དྷི་ནཱ;
ཨཱ་ཀཱ་སོ ཝི་ཡ པ་ཉྙཱ་ཡ, ཨ་ས་ངྒོ ཨ་ནི་ལོ ཡ་ཐཱ.
༨༥. ‘‘ས ཀ་དཱ་ཙི མ་ཧཱ་ཝཱི་རོ, པ་རི་སཱ་སུ ཝི་སཱ་ར་དོ;
ས་ཙྩཱ་ནི ས་མྤ་ཀཱ་སེ་ཏི, ཨུ་དྡྷ་ར་ནྟོ མ་ཧཱ་ཛ་ནཾ.
༨༦. ‘‘ཏ་དཱ ཧི བཱ་རཱ་ཎ་སི་ཡཾ, སེ་ཊྛི་པུ་ཏྟོ མ་ཧཱ་ཡ་སོ;
ཨཱ་ས་ཧཾ དྷ་ན་དྷ་ཉྙ་སྶ [ཨ་ན་ནྟ་དྷ་ན་དྷ་ཉྙ་སྶ (ཀ.)], པ་ཧཱུ་ཏ་སྶ བ་ཧཱུ ཏ་དཱ.
༨༧. ‘‘ཛ་ངྒྷཱ་ཝི་ཧཱ་རཾ ཝི་ཙ་རཾ, མི་ག་དཱ་ཡ་མུ་པེ་ཙྩ་ཧཾ [མུ་པེ་ས་ཧཾ (ཀ.)];
ཨ་དྡ་སཾ ཝི་ར་ཛཾ བུ་དྡྷཾ, དེ་སེ་ནྟཾ ཨ་མ་ཏཾ པ་དཾ.
༨༨. ‘‘ཝི་ས་ཊྛ་ཀ་ནྟ་ཝ་ཙ་ནཾ, ཀ་ར་ཝཱི་ཀ་ས་མ་སྶ་རཾ;
ཧཾ་ས་རུ་ཏེ་ཧི [ཧཾ་ས་དུ་ནྡུ་བྷི (སྱཱ. པཱི.)] ནི་གྒྷོ་སཾ, ཝི་ཉྙཱ་པེ་ནྟཾ མ་ཧཱ་ཛ་ནཾ.
༨༩. ‘‘དི་སྭཱ དེ་ཝཱ་ཏི་དེ་ཝཾ ཏཾ, སུ་ཏྭཱ་ཝ མ་དྷུ་རཾ གི་རཾ;
པ་ཧཱ་ཡ་ན་པྤ་ཀེ བྷོ་གེ, པ་བྦ་ཛིཾ ཨ་ན་གཱ་རི་ཡཾ.
༩༠. ‘‘ཨེ་ཝཾ པ་བྦ་ཛི་ཏོ ཙཱ་ཧཾ, ན ཙི་རེ་ན བ་ཧུ་སྶུ་ཏོ;
ཨ་ཧོ་སིཾ དྷ་མྨ་ཀ་ཐི་ཀོ, ཝི་ཙི་ཏྟ་པ་ཊི་བྷཱ་ཎ་ཝཱ.
༩༡. ‘‘མ་ཧཱ་པ་རི་ས་མ་ཛ྄ཛྷེ་ཧཾ, ཧ་ཊྛ་ཙི་ཏྟོ པུ་ན་པྤུ་ནཾ;
ཝ་ཎྞ་ཡིཾ ཧེ་མ་ཝ་ཎྞ་སྶ, ཝ་ཎྞཾ ཝ་ཎྞ་ཝི་སཱ་ར་དོ.
༩༢. ‘‘ཨེ་ས ཁཱི་ཎཱ་ས་ཝོ བུ་དྡྷོ, ཨ་ནཱི་གྷོ ཚི་ནྣ་སཾ་ས་ཡོ;
ས་བྦ་ཀ་མྨ་ཀྑ་ཡཾ པ་ཏྟོ, ཝི་མུ་ཏྟོ་པ་དྷི་ས་ངྑ་ཡེ.
༩༣. ‘‘ཨེ་ས སོ བྷ་ག་ཝཱ བུ་དྡྷོ, ཨེ་ས སཱི་ཧོ ཨ་ནུ་ཏྟ་རོ;
ས་དེ་ཝ་ཀ་སྶ ལོ་ཀ་སྶ, བྲ་ཧྨ་ཙ་ཀྐ་པྤ་ཝ་ཏྟ་ཀོ.
༩༤. ‘‘ད་ནྟོ ད་མེ་ཏཱ ས་ནྟོ ཙ, ས་མེ་ཏཱ ནི་བྦུ་ཏོ ཨི་སི;
ནི་བྦཱ་པེ་ཏཱ ཙ ཨ་སྶ་ཏྠོ, ཨ་སྶཱ་སེ་ཏཱ མ་ཧཱ་ཛ་ནཾ.
༩༥. ‘‘ཝཱི་རོ སཱུ་རོ ཙ ཝི་ཀྐ་ནྟོ [དྷཱི་རོ ཙ (སཱི. པཱི.)], པ་ཉྙོ ཀཱ་རུ་ཎི་ཀོ ཝ་སཱི;
ཝི་ཛི་ཏཱ་ཝཱི ཙ ས ཛི་ནོ, ཨ་པྤ་ག་བྦོ ཨ་ནཱ་ལ་ཡོ.
༩༦. ‘‘ཨ་ནེ་ཉྫོ ཨ་ཙ་ལོ དྷཱི་མཱ, ཨ་མོ་ཧོ ཨ་ས་མོ མུ་ནི;
དྷོ་ར་ཡ྄ཧོ ཨུ་ས་བྷོ ནཱ་གོ, སཱི་ཧོ ས་ཀྐོ ག་རཱུ་སུ་པི.
༩༧. ‘‘ཝི་རཱ་གོ ཝི་མ་ལོ བྲ་ཧྨཱ, ཝཱ་དཱི སཱུ་རོ ར་ཎ་ཉྫ་ཧོ;
ཨ་ཁི་ལོ ཙ ཝི་ས་ལློ ཙ, ཨ་ས་མོ སཾ་ཡ་ཏོ [ཝུ་ས་བྷོ (སྱཱ.), པ་ཡ་ཏོ (པཱི.)] སུ་ཙི.
༩༨. ‘‘བྲཱ་ཧྨ་ཎོ ས་མ་ཎོ ནཱ་ཐོ, བྷི་ས་ཀྐོ ས་ལླ་ཀ་ཏྟ་ཀོ;
ཡོ་དྷོ བུ་དྡྷོ སུ་ཏཱ་སུ་ཏོ [སུ་ཏོ སུ་ཏོ (སཱི. པཱི.)], ཨ་ཙ་ལོ མུ་དི་ཏོ སི་ཏོ [དི་ཏོ (སཱི.)].
༩༩. ‘‘དྷཱ་ཏཱ དྷ་ཏཱ ཙ ས་ནྟི ཙ, ཀ་ཏྟཱ ནེ་ཏཱ པ་ཀཱ་སི་ཏཱ;
ས་མྤ་ཧཾ་སི་ཏཱ བྷེ་ཏྟཱ ཙ, ཚེ་ཏྟཱ སོ་ཏཱ པ་སཾ་སི་ཏཱ.
༡༠༠. ‘‘ཨ་ཁི་ལོ ཙ ཝི་ས་ལློ ཙ, ཨ་ནཱི་གྷོ ཨ་ཀ་ཐཾ་ཀ་ཐཱི;
ཨ་ནེ་ཛོ ཝི་ར་ཛོ ཀ་ཏྟཱ, ག་ནྡྷཱ ཝ་ཏྟཱ པ་སཾ་སི་ཏཱ.
༡༠༡. ‘‘ཏཱ་རེ་ཏཱ ཨ་ཏྠ་ཀཱ་རེ་ཏཱ, ཀཱ་རེ་ཏཱ ས་མྤ་དཱ་རི་ཏཱ;
པཱ་པེ་ཏཱ ས་ཧི་ཏཱ ཀ་ནྟཱ, ཧ་ནྟཱ ཨཱ་ཏཱ་པཱི ཏཱ་པ་སོ [ཧ་ནྟཱ, ཏཱ་པི་ཏཱ ཙ ཝི་སོ་སི་ཏཱ (སྱཱ.)].
༡༠༢. ‘‘ས་མ་ཙི་ཏྟོ [ས་ཙྩ་ཊྛི་ཏོ (སྱཱ.)] ས་མ་ས་མོ, ཨ་ས་ཧཱ་ཡོ ད་ཡཱ་ལ་ཡོ [ད་ཡཱ་ས་ཡོ (སཱི.)];
ཨ་ཙྪེ་ར་ས་ཏྟོ [ཨ་ཙྪེ་ར་མ་ནྟོ (སྱཱ.)] ཨ་ཀུ་ཧོ, ཀ་ཏཱ་ཝཱི ཨི་སི་ས་ཏྟ་མོ.
༡༠༣. ‘‘ནི་ཏྟི་ཎྞ་ཀ་ངྑོ ནི་མྨཱ་ནོ, ཨ་པྤ་མེ་ཡྻོ ཨ་ནཱུ་པ་མོ;
ས་བྦ་ཝཱ་ཀྱ་པ་ཐཱ་ཏཱི་ཏོ, ས་ཙྩ ནེ་ཡྻ་ནྟ་གཱུ [ས་བྦ་ནེ་ཡྻ་ནྟི་ཀོ (སྱཱ.)] ཛི་ནོ.
༡༠༤. ‘‘ས་ཏྟ་སཱ་ར་ཝ་རེ [ས་ཏ་རཾ་སཱི་ཝ་རེ (སྱཱ.)] ཏ་སྨིཾ, པ་སཱ་དོ ཨ་མ་ཏཱ་ཝ་ཧོ;
ཏ་སྨཱ བུ་དྡྷེ ཙ དྷ་མྨེ ཙ, ས་ངྒྷེ ས་དྡྷཱ མ་ཧ་ཏྠི་ཀཱ [མ་ཧི་དྡྷི་ཀཱ (སཱི. ཀ.)].
༡༠༥. ‘‘གུ་ཎེ་ཧི ཨེ་ཝ་མཱ་དཱི་ཧི, ཏི་ལོ་ཀ་ས་ར་ཎུ་ཏྟ་མཾ;
ཝ་ཎྞེ་ནྟོ པ་རི་སཱ་མ་ཛ྄ཛྷེ, ཨ་ཀཾ [ཀ་ཐིཾ (སྱཱ.)] དྷ་མྨ་ཀ་ཐཾ ཨ་ཧཾ.
༡༠༦. ‘‘ཏ་ཏོ ཙུ་ཏཱ་ཧཾ ཏུ་སི་ཏེ, ཨ་ནུ་བྷོ་ཏྭཱ མ་ཧཱ་སུ་ཁཾ;
ཏ་ཏོ ཙུ་ཏོ མ་ནུ་སྶེ་སུ, ཛཱ་ཏོ ཧོ་མི སུ་ག་ནྡྷི་ཀོ.
༡༠༧. ‘‘ནི་སྶཱ་སོ མུ་ཁ་ག་ནྡྷོ ཙ, དེ་ཧ་ག་ནྡྷོ ཏ་ཐེ་ཝ མེ;
སེ་ད་ག་ནྡྷོ ཙ ས་ཏ་ཏཾ, ས་བྦ་ག་ནྡྷོ་ཝ ཧོ་ཏི མེ [ས་བྦ་ག་ནྡྷོ་ཏི་སེ་ཏི མེ (སཱི. པཱི.)].
༡༠༨. ‘‘མུ་ཁ་ག་ནྡྷོ ས་དཱ མ་ཡ྄ཧཾ, པ་དུ་མུ་པྤ་ལ་ཙ་མྤ་ཀོ;
པ་རི་ས་ནྟོ [ཨཱ་དི་ས་ནྟོ (སཱི.), ཨ་ཏི་ཀ་ནྟོ (སྱཱ.), ཨ་ཏི་ས་ནྟོ (པཱི.)] ས་དཱ ཝཱ་ཏི, ས་རཱི་རོ ཙ ཏ་ཐེ་ཝ མེ.
༡༠༩. ‘‘གུ་ཎ་ཏྠ་ཝ་སྶ ས་བྦ་ནྟཾ, ཕ་ལཾ ཏུ [ཕ་ལ་ནྟཾ (སྱཱ.)] པ་ར་མ་བྦྷུ་ཏཾ;
ཨེ་ཀ་གྒ་མ་ན་སཱ ས་བྦེ, ཝ་ཎྞ་ཡི་སྶཾ [བྷཱ་སི་ཏ་སྶ (སྱཱ.)] སུ་ཎཱ་ཐ མེ.
༡༡༠. ‘‘གུ་ཎཾ བུ་དྡྷ་སྶ ཝ་ཏྭཱ་ན, ཧི་ཏཱ་ཡ ཙ ན ས་དི་སཾ [ཧི་ཏཱ་ཡ ཛ་ན་ས་ནྡྷི་སུ (སཱི. པཱི.), ཧི་ཏཱ་ཡ ནཾ སུ་ཁཱ་ཝ་ཧཾ (སྱཱ.)];
སུ་ཁི་ཏོ [སུ་ཙི་ཏྟོ (སྱཱ.)] ཧོ་མི ས་བྦ་ཏྠ, ས་ངྒྷོ ཝཱི་ར་ས་མཱ་ཡུ་ཏོ [ས་ར་དྡྷ་ནི་ས་མཱ་ཡུ་ཏོ (སཱི.)].
༡༡༡. ‘‘ཡ་ས་སྶཱི སུ་ཁི་ཏོ ཀ་ནྟོ, ཛུ་ཏི་མཱ པི་ཡ་ད་སྶ་ནོ;
ཝ་ཏྟཱ ཨ་པ་རི་བྷཱུ་ཏོ ཙ, ནི་དྡོ་སོ པ་ཉྙ་ཝཱ ཏ་ཐཱ.
༡༡༢. ‘‘ཁཱི་ཎེ ཨཱ་ཡུ་སི [པཱ་སུ་སི (སྱཱ.)] ནི་བྦཱ་ནཾ, སུ་ལ་བྷཾ བུ་དྡྷ་བྷ་ཏྟི་ནོ;
ཏེ་སཾ ཧེ་ཏུཾ པ་ཝ་ཀྑཱ་མི, ཏཾ སུ་ཎཱ་ཐ ཡ་ཐཱ་ཏ་ཐཾ.
༡༡༣. ‘‘ས་ནྟཾ ཡ་སཾ བྷ་ག་ཝ་ཏོ, ཝི་དྷི་ནཱ ཨ་བྷི་ཝཱ་ད་ཡཾ;
ཏ་ཏྠ ཏ་ཏྠཱུ་པ་པ་ནྣོ་པི [ཡ་ཏྠ ཏ་ཏྠཱུ་པ་པ་ནྣོ་པི (སཱི. པཱི.)], ཡ་ས་སྶཱི ཏེ་ན ཧོ་མ་ཧཾ.
༡༡༤. ‘‘དུ་ཀྑ་སྶ་ནྟ་ཀ་རཾ བུ་དྡྷཾ, དྷ་མྨཾ ས་ནྟ་མ་ས་ངྑ་ཏཾ;
ཝ་ཎྞ་ཡཾ སུ་ཁ་དོ ཨཱ་སིཾ, ས་ཏྟཱ་ནཾ སུ་ཁི་ཏོ ཏ་ཏོ.
༡༡༥. ‘‘གུ་ཎཾ ཝ་ད་ནྟོ བུ་དྡྷ་སྶ, བུ་དྡྷ་པཱི་ཏི་ས་མཱ་ཡུ་ཏོ;
ས་ཀ་ནྟིཾ པ་ར་ཀ་ནྟི་ཉྩ, ཛ་ན་ཡིཾ ཏེ་ན ཀ་ནྟི་མཱ.
༡༡༦. ‘‘ཛི་ནོ ཏེ ཏི་ཏྠི་ཀཱ་ཀི་ཎྞེ [ཛ་ནོ་གྷེ ཏི་ཏྠ་ཀཱ་ཀི་ཎྞེ (སཱི. པཱི.), ཛི་ནོ ཡོ ཏི་ཏྠི་ཀཱ་ཏི་ཎྞོ (སྱཱ.)], ཨ་བྷི་བྷུ་ཡྻ ཀུ་ཏི་ཏྠི་ཡེ;
གུ་ཎཾ ཝ་ད་ནྟོ ཛོ་ཏེ་སིཾ [ཐོ་མེ་སིཾ (སྱཱ.)], ནཱ་ཡ་ཀཾ ཛུ་ཏི་མཱ ཏ་ཏོ.
༡༡༧. ‘‘པི་ཡ་ཀཱ་རཱི ཛ་ན་སྶཱ་པི, ས་མྦུ་དྡྷ་སྶ གུ་ཎཾ ཝ་དཾ;
ས་ར་དོ་ཝ ས་ས་ངྐོ་ཧཾ, ཏེ་ནཱ་སིཾ པི་ཡ་ད་སྶ་ནོ.
༡༡༨. ‘‘ཡ་ཐཱ་ས་ཏྟི་ཝ་སེ་ནཱ་ཧཾ, ས་བྦ་ཝཱ་ཙཱ་ཧི ས་ནྠ་ཝིཾ;
སུ་ག་ཏཾ ཏེ་ན ཝཱ་གི་སོ, ཝི་ཙི་ཏྟ་པ་ཊི་བྷཱ་ན་ཝཱ.
༡༡༩. ‘‘ཡེ བཱ་ལཱ ཝི་མ་ཏིཾ པ་ཏྟཱ, པ་རི་བྷོ་ནྟི མ་ཧཱ་མུ་ནིཾ;
ནི་གྒ་ཧིཾ ཏེ ས་དྡྷ་མྨེ་ན, པ་རི་བྷཱུ་ཏོ ན ཏེ་ན་ཧཾ [པ་རི་བྷཱུ་ཏེ་ན ཏེ་ན་ཧཾ (སྱཱ.)].
༡༢༠. ‘‘བུ་དྡྷ་ཝ་ཎྞེ་ན ས་ཏྟཱ་ནཾ, ཀི་ལེ་སེ ཨ་པ་ནེ་ས་ཧཾ;
ནི་ཀྐི་ལེ་ས་མ་ནོ ཧོ་མི, ཏ་སྶ ཀ་མྨ་སྶ ཝཱ་ཧ་སཱ.
༡༢༡. ‘‘སོ་ཏཱུ་ནཾ ཝུ་དྡྷི་མ་ཛ་ནིཾ [བུ་དྡྷི་མ་ཛ་ནིཾ (སཱི. པཱི.)], བུ་དྡྷཱ་ནུ་སྶ་ཏི་དེ་ས་ཀོ;
ཏེ་ནཱ་ཧ་མཱ་སིཾ [ཏེ་ནཱ་པི ཙཱ་སིཾ (སྱཱ.)] ས་པྤ་ཉྙོ, ནི་པུ་ཎ་ཏྠ་ཝི་པ་སྶ་ཀོ.
༡༢༢. ‘‘ས་བྦཱ་ས་ཝ་པ་རི་ཀྑཱི་ཎོ, ཏི་ཎྞ་སཾ་སཱ་ར་སཱ་ག་རོ;
སི་ཁཱི་ཝ ཨ་ནུ་པཱ་དཱ་ནོ, པཱ་པུ་ཎི་སྶཱ་མི ནི་བྦུ་ཏིཾ.
༡༢༣. ‘‘ཨི་མ་སྨིཾ་ཡེ་ཝ ཀ་པྤ་སྨིཾ, ཡ་མ་ཧཾ ས་ནྠ་ཝིཾ ཛི་ནཾ;
དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་ཝ་ཎྞ་སྶི་དཾ ཕ་ལཾ.
༡༢༤. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༡༢༥. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༡༢༦. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ སུ་ག་ནྡྷོ ཐེ་རོ ཨི་མཱ གཱ་ཐཱ་ཡོ
ཨ་བྷཱ་སི་ཏྠཱ་ཏི.
སུ་ག་ནྡྷ་ཏྠེ་ར་སྶཱ་པ་དཱ་ནཾ ད་ས་མཾ.
ཏི་ཎ་དཱ་ཡ་ཀ་ཝ་གྒོ ཏེ་པ་ཉྙཱ་ས་མོ.