༩. ས་བྦ་ཕ་ལ་དཱ་ཡ་ཀ་ཏྠེ་ར་ཨ་པ་དཱ་ནཾ
༥༡. ‘‘ཝ་རུ་ཎོ ནཱ་མ ནཱ་མེ་ན, བྲཱ་ཧྨ་ཎོ མ་ནྟ་པཱ་ར་གཱུ;
ཚ་ཌྜེ་ཏྭཱ ད་ས་པུ་ཏྟཱ་ནི, ཝ་ན་མ་ཛ྄ཛྷོ་ག་ཧིཾ ཏ་དཱ.
༥༢. ‘‘ཨ་སྶ་མཾ སུ་ཀ་ཏཾ ཀ་ཏྭཱ, སུ་ཝི་བྷ་ཏྟཾ མ་ནོ་ར་མཾ;
པ་ཎྞ་སཱ་ལཾ ཀ་རི་ཏྭཱ་ན, ཝ་སཱ་མི ཝི་པི་ནེ ཨ་ཧཾ.
༥༣. ‘‘པ་དུ་མུ་ཏྟ་རོ ལོ་ཀ་ཝི་དཱུ, ཨཱ་ཧུ་ཏཱི་ནཾ པ་ཊི་གྒ་ཧོ;
མ་མུ་དྡྷ་རི་ཏུ་ཀཱ་མོ སོ, ཨཱ་ག་ཙྪི མ་མ ཨ་སྶ་མཾ.
༥༤. ‘‘ཡཱ་ཝ་ཏཱ ཝ་ན་ས་ཎྜ་མྷི, ཨོ་བྷཱ་སོ ཝི་པུ་ལོ ཨ་ཧུ;
བུ་དྡྷ་སྶ ཨཱ་ནུ་བྷཱ་ཝེ་ན, པ་ཛྫ་ལཱི ཝི་པི་ནཾ ཏ་དཱ.
༥༥. ‘‘དི་སྭཱ་ན ཏཾ པཱ་ཊི་ཧཱི་རཾ, བུ་དྡྷ་སེ་ཊྛ་སྶ ཏཱ་དི་ནོ;
པ་ཏྟ་པུ་ཊཾ ག་ཧེ་ཏྭཱ་ན, ཕ་ལེ་ན པཱུ་ཛ་ཡིཾ ཨ་ཧཾ.
༥༦. ‘‘ཨུ་པ་ག་ནྟྭཱ་ན ས་མྦུ་དྡྷཾ, ས་ཧ་ཁཱ་རི་མ་དཱ་ས་ཧཾ;
ཨ་ནུ་ཀ་མྤཱ་ཡ མེ བུ་དྡྷོ, ཨི་དཾ ཝ་ཙ་ན་མ་བྲ་ཝི.
༥༧. ‘ཁཱ་རི་བྷཱ་རཾ ག་ཧེ་ཏྭཱ་ན, པ་ཙྪ་ཏོ ཨེ་ཧི མེ ཏུ་ཝཾ;
པ་རི་བྷུ་ཏྟེ ཙ ས་ངྒྷ་མྷི, པུ་ཉྙཾ ཏ་ཝ བྷ་ཝི་སྶ་ཏི’.
༥༨. ‘‘པུ་ཊ་ཀ་ནྟཾ ག་ཧེ་ཏྭཱ་ན, བྷི་ཀྑུ་ས་ངྒྷ་སྶ་དཱ་ས་ཧཾ;
ཏ་ཏྠ ཙི་ཏྟཾ པ་སཱ་དེ་ཏྭཱ, ཏུ་སི་ཏཾ ཨུ་པ་པ་ཛྫ་ཧཾ.
༥༩. ‘‘ཏ་ཏྠ དི་བྦེ་ཧི ན་ཙྩེ་ཧི, གཱི་ཏེ་ཧི ཝཱ་དི་ཏེ་ཧི ཙ;
པུ་ཉྙ་ཀ་མྨེ་ན སཾ་ཡུ་ཏྟཾ, ཨ་ནུ་བྷོ་མི ས་དཱ སུ་ཁཾ.
༦༠. ‘‘ཡཾ ཡཾ ཡོ་ནུ་པ་པ་ཛྫཱ་མི, དེ་ཝ་ཏྟཾ ཨ་ཐ མཱ་ནུ་སཾ;
བྷོ་གེ མེ ཨཱུ་ན་ཏཱ ན་ཏྠི, ཕ་ལ་དཱ་ན་སྶི་དཾ ཕ་ལཾ.
༦༡. ‘‘ཡཱ་ཝ་ཏཱ ཙ་ཏུ་རོ དཱི་པཱ, ས་ས་མུ་དྡཱ ས་པ་བྦ་ཏཱ;
ཕ་ལཾ བུ་དྡྷ་སྶ ད་ཏྭཱ་ན, ཨི་སྶ་རཾ ཀཱ་ར་ཡཱ་མ་ཧཾ.
༦༢. ‘‘ཡཱ་ཝ་ཏཱ མེ པ་ཀྑི་ག་ཎཱ, ཨཱ་ཀཱ་སེ ཨུ་པྤ་ཏ་ནྟི ཙེ;
ཏེ་པི མཾ ཝ་ས་མ་ནྭེ་ནྟི, ཕ་ལ་དཱ་ན་སྶི་དཾ ཕ་ལཾ.
༦༣. ‘‘ཡཱ་ཝ་ཏཱ ཝ་ན་ས་ཎྜ་མྷི, ཡ་ཀྑཱ བྷཱུ་ཏཱ ཙ ར་ཀྑ་སཱ;
ཀུ་མྦྷ་ཎྜཱ ག་རུ་ལཱ༹ ཙཱ་པི, པཱ་རི་ཙ་རི་ཡཾ ཨུ་པེ་ནྟི མེ.
༦༤. ‘‘ཀུ་མྦྷཱ སོ་ཎཱ མ་དྷུ་ཀཱ་རཱ, ཌཾ་སཱ ཙ མ་ཀ་སཱ ཨུ་བྷོ;
ཏེ་པི མཾ ཝ་ས་མ་ནྭེ་ནྟི, ཕ་ལ་དཱ་ན་སྶི་དཾ ཕ་ལཾ.
༦༥. ‘‘སུ་པ་ཎྞཱ ནཱ་མ ས་ཀུ་ཎཱ, པ་ཀྑི་ཛཱ་ཏཱ མ་ཧ་བྦ་ལཱ;
ཏེ་པི མཾ ས་ར་ཎཾ ཡ་ནྟི, ཕ་ལ་དཱ་ན་སྶི་དཾ ཕ་ལཾ.
༦༦. ‘‘ཡེ་པི དཱི་གྷཱ་ཡུ་ཀཱ ནཱ་གཱ, ཨི་དྡྷི་མ་ནྟོ མ་ཧཱ་ཡ་སཱ;
ཏེ་པི མཾ ཝ་ས་མ་ནྭེ་ནྟི, ཕ་ལ་དཱ་ན་སྶི་དཾ ཕ་ལཾ.
༦༧. ‘‘སཱི་ཧཱ བྱ་གྒྷཱ ཙ དཱི་པཱི ཙ, ཨ་ཙྪ་ཀོ་ཀ་ཏ་ར་ཙྪ་ཀཱ;
ཏེ་པི མཾ ཝ་ས་མ་ནྭེ་ནྟི, ཕ་ལ་དཱ་ན་སྶི་དཾ ཕ་ལཾ.
༦༨. ‘‘ཨོ་ས་དྷཱི་ཏི་ཎ་ཝཱ་སཱི ཙ, ཡེ ཙ ཨཱ་ཀཱ་ས་ཝཱ་སི་ནོ;
ས་བྦེ མཾ ས་ར་ཎཾ ཡ་ནྟི, ཕ་ལ་དཱ་ན་སྶི་དཾ ཕ་ལཾ.
༦༩. ‘‘སུ་དུ་དྡ་སཾ སུ་ནི་པུ་ཎཾ, ག་མྦྷཱི་རཾ སུ་པྤ་ཀཱ་སི་ཏཾ;
ཕ་སྶ་ཡི་ཏྭཱ [ཕུ་ས་ཡི་ཏྭཱ (ཀ.)] ཝི་ཧ་རཱ་མི, ཕ་ལ་དཱ་ན་སྶི་དཾ ཕ་ལཾ.
༧༠. ‘‘ཝི་མོ་ཀྑེ ཨ་ཊྛ ཕུ་སི་ཏྭཱ, ཝི་ཧ་རཱ་མི ཨ་ནཱ་ས་ཝོ;
ཨཱ་ཏཱ་པཱི ནི་པ་ཀོ ཙཱ་ཧཾ, ཕ་ལ་དཱ་ན་སྶི་དཾ ཕ་ལཾ.
༧༡. ‘‘ཡེ ཕ་ལ་ཊྛཱ བུ་དྡྷ་པུ་ཏྟཱ, ཁཱི་ཎ་དོ་སཱ མ་ཧཱ་ཡ་སཱ;
ཨ་ཧ་མ་ཉྙ་ཏ་རོ ཏེ་སཾ, ཕ་ལ་དཱ་ན་སྶི་དཾ ཕ་ལཾ.
༧༢. ‘‘ཨ་བྷི་ཉྙཱ་པཱ་ར་མིཾ ག་ནྟྭཱ, སུ་ཀྐ་མཱུ་ལེ་ན ཙོ་དི་ཏོ;
ས་བྦཱ་ས་ཝེ པ་རི་ཉྙཱ་ཡ, ཝི་ཧ་རཱ་མི ཨ་ནཱ་ས་ཝོ.
༧༣. ‘‘ཏེ་ཝི་ཛྫཱ ཨི་དྡྷི་པ་ཏྟཱ ཙ, བུ་དྡྷ་པུ་ཏྟཱ མ་ཧཱ་ཡ་སཱ;
དི་བྦ་སོ་ཏ་ས་མཱ་པ་ནྣཱ, ཏེ་སཾ ཨ་ཉྙ་ཏ་རོ ཨ་ཧཾ.
༧༤. ‘‘ས་ཏ་ས་ཧ་སྶི་ཏོ ཀ་པྤེ, ཡཾ ཕ་ལཾ ཨ་ད་དིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, ཕ་ལ་དཱ་ན་སྶི་དཾ ཕ་ལཾ.
༧༥. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༧༦. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༧༧. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ས་བྦ་ཕ་ལ་དཱ་ཡ་ཀོ ཐེ་རོ ཨི་མཱ གཱ་ཐཱ་ཡོ
ཨ་བྷཱ་སི་ཏྠཱ་ཏི.
ས་བྦ་ཕ་ལ་དཱ་ཡ་ཀ་ཏྠེ་ར་སྶཱ་པ་དཱ་ནཾ ན་ཝ་མཾ.