༩. པཱ་ན་དྷི་དཱ་ཡ་ཀ་ཏྠེ་ར་ཨ་པ་དཱ་ནཾ
༧༡. ‘‘ཨ་ནོ་མ་ད་སྶཱི བྷ་ག་ཝཱ, ལོ་ཀ་ཛེ་ཊྛོ ན་རཱ་ས་བྷོ;
དི་ཝཱ་ཝི་ཧཱ་རཱ ནི་ཀྑ་མྨ, པ་ཐ་མཱ་རུ་ཧི [པཱི་ཏི་མཱ་རུ་ཡ྄ཧི (སྱཱ.)] ཙ་ཀྑུ་མཱ.
༧༢. ‘‘པཱ་ན་དྷིཾ སུ་ཀ་ཏཾ ག་ཡ྄ཧ, ཨ་དྡྷཱ་ནཾ པ་ཊི་པ་ཛྫ་ཧཾ;
ཏ་ཏྠ་དྡ་སཱ་སིཾ ས་མྦུ་དྡྷཾ, པ་ཏྟི་ཀཾ ཙཱ་རུ་ད་སྶ་ནཾ.
༧༣. ‘‘ས་ཀཾ ཙི་ཏྟཾ པ་སཱ་དེ་ཏྭཱ, ནཱི་ཧ་རི་ཏྭཱ་ན པཱ་ན་དྷིཾ;
པཱ་ད་མཱུ་ལེ ཋ་པེ་ཏྭཱ་ན, ཨི་དཾ ཝ་ཙ་ན་མ་བྲ་ཝིཾ.
༧༤. ‘‘‘ཨ་བྷི་རཱུ་ཧ མ་ཧཱ་ཝཱི་ར, སུ་ག་ཏི་ནྡ ཝི་ནཱ་ཡ་ཀ;
ཨི་ཏོ ཕ་ལཾ ལ་བྷི་སྶཱ་མི, སོ མེ ཨ་ཏྠོ ས་མི་ཛ྄ཛྷ་ཏུ’.
༧༥. ‘‘ཨ་ནོ་མ་ད་སྶཱི བྷ་ག་ཝཱ, ལོ་ཀ་ཛེ་ཊྛོ ན་རཱ་ས་བྷོ;
པཱ་ན་དྷིཾ ཨ་བྷི་རཱུ་ཧི་ཏྭཱ, ཨི་དཾ ཝ་ཙ་ན་མ་བྲ་ཝི.
༧༦. ‘‘‘ཡོ པཱ་ན་དྷིཾ མེ ཨ་དཱ་སི, པ་ས་ནྣོ སེ་ཧི པཱ་ཎི་བྷི;
ཏ་མ་ཧཾ ཀི་ཏྟ་ཡི་སྶཱ་མི, སུ་ཎཱ་ཐ མ་མ བྷཱ་ས་ཏོ’.
༧༧. ‘‘བུ་དྡྷ་སྶ གི་ར་མ་ཉྙཱ་ཡ, ས་བྦེ དེ་ཝཱ ས་མཱ་ག་ཏཱ;
ཨུ་ད་གྒ་ཙི་ཏྟཱ སུ་མ་ནཱ, ཝེ་ད་ཛཱ་ཏཱ ཀ་ཏ་ཉྫ་ལཱི.
༧༨. ‘‘པཱ་ན་དྷཱི་ནཾ པ་དཱ་ནེ་ན, སུ་ཁི་ཏོ་ཡཾ བྷ་ཝི་སྶ་ཏི;
པ་ཉྩ་པ་ཉྙཱ་ས་ཀྑ་ཏྟུ་ཉྩ, དེ་ཝ་ར་ཛྫཾ ཀ་རི་སྶ་ཏི.
༧༩. ‘‘ས་ཧ་སྶ་ཀྑ་ཏྟུཾ རཱ་ཛཱ ཙ, ཙ་ཀྐ་ཝ་ཏྟཱི བྷ་ཝི་སྶ་ཏི;
པ་དེ་ས་ར་ཛྫཾ ཝི་པུ་ལཾ, ག་ཎ་ནཱ་ཏོ ཨ་ས་ངྑི་ཡཾ.
༨༠. ‘‘ཨ་པ་རི་མེ་ཡྻེ ཨི་ཏོ ཀ་པྤེ, ཨོ་ཀྐཱ་ཀ་ཀུ་ལ་ས་མྦྷ་ཝོ;
གོ་ཏ་མོ ནཱ་མ གོ་ཏྟེ་ན [ནཱ་མེ་ན (ས་བྦ་ཏྠ)], ས་ཏྠཱ ལོ་ཀེ བྷ་ཝི་སྶ་ཏི.
༨༡. ‘‘ཏ་སྶ དྷ་མྨེ་སུ དཱ་ཡཱ་དོ, ཨོ་ར་སོ དྷ་མྨ་ནི་མྨི་ཏོ;
ས་བྦཱ་ས་ཝེ པ་རི་ཉྙཱ་ཡ, ནི་བྦཱ་ཡི་སྶ་ཏི་ནཱ་ས་ཝོ.
༨༢. ‘‘དེ་ཝ་ལོ་ཀེ མ་ནུ་སྶེ ཝཱ, ནི་བྦ་ཏྟི་སྶ་ཏི པུ་ཉྙ་ཝཱ;
དེ་ཝ་ཡཱ་ན་པ་ཊི་བྷཱ་གཾ, ཡཱ་ནཾ པ་ཊི་ལ་བྷི་སྶ་ཏི.
༨༣. ‘‘པཱ་སཱ་དཱ སི་ཝི་ཀཱ ཝ་ཡ྄ཧཾ, ཧ་ཏྠི་ནོ ས་མ་ལ་ངྐ་ཏཱ;
ར་ཐཱ ཝཱ་ཛ་ཉྙ་སཾ་ཡུ་ཏྟཱ, ས་དཱ པཱ་ཏུ་བྷ་ཝ་ནྟི མེ.
༨༤. ‘‘ཨ་གཱ་རཱ ནི་ཀྑ་མ་ནྟོ་པི, ར་ཐེ་ན ནི་ཀྑ་མིཾ ཨ་ཧཾ;
ཀེ་སེ་སུ ཚི་ཛྫ་མཱ་ནེ་སུ, ཨ་ར་ཧ་ཏྟ་མ་པཱ་པུ་ཎིཾ.
༨༥. ‘‘ལཱ་བྷཱ མ་ཡ྄ཧཾ སུ་ལ་དྡྷཾ མེ, ཝཱ་ཎི་ཛྫཾ སུ་པྤ་ཡོ་ཛི་ཏཾ;
ད་ཏྭཱ་ན པཱ་ན་དྷིཾ ཨེ་ཀཾ, པ་ཏྟོ་མྷི ཨ་ཙ་ལཾ པ་དཾ.
༨༦. ‘‘ཨ་པ་རི་མེ་ཡྻེ ཨི་ཏོ ཀ་པྤེ, ཡཾ པཱ་ན་དྷི་མ་དཱ་ས་ཧཾ;
དུ་གྒ་ཏིཾ ནཱ་བྷི་ཛཱ་ནཱ་མི, པཱ་ན་དྷི་སྶ ཨི་དཾ ཕ་ལཾ.
༨༧. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༨༨. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༨༩. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ པཱ་ན་དྷི་དཱ་ཡ་ཀོ ཐེ་རོ ཨི་མཱ གཱ་ཐཱ་ཡོ
ཨ་བྷཱ་སི་ཏྠཱ་ཏི.
པཱ་ན་དྷི་དཱ་ཡ་ཀ་ཏྠེ་ར་སྶཱ་པ་དཱ་ནཾ ན་ཝ་མཾ.