༣. ཨུ་ཀྐཱ་ས་ཏི་ཀ་ཏྠེ་ར་ཨ་པ་དཱ་ནཾ
༣༠. ‘‘ཀོ་སི་ཀོ ནཱ་མ བྷ་ག་ཝཱ, ཙི་ཏྟ་ཀཱུ་ཊེ ཝ་སཱི ཏ་དཱ;
ཛྷཱ་ཡཱི ཛྷཱ་ན་ར་ཏོ བུ་དྡྷོ, ཝི་ཝེ་ཀཱ་བྷི་ར་ཏོ མུ་ནི.
༣༡. ‘‘ཨ་ཛ྄ཛྷོ་གཱ་ཧེ་ཏྭཱ [ཨ་ཛ྄ཛྷོ་ག་ཧེ་ཏྭཱ (སཱི. སྱཱ. པཱི.)] ཧི་མ་ཝ་ནྟཾ, ནཱ་རཱི་ག་ཎ་པུ་ར་ཀྑ་ཏོ;
ཨ་དྡ་སཾ ཀོ་སི་ཀཾ བུ་དྡྷཾ, པུ་ཎྞ་མཱ་ཡེ་ཝ ཙ་ནྡི་མཾ.
༣༢. ‘‘ཨུ་ཀྐཱ་ས་ཏེ ག་ཧེ་ཏྭཱ་ན, པ་རི་ཝཱ་རེ་ས་ཧཾ ཏ་དཱ;
ས་ཏྟ་ར་ཏྟི་ནྡི་ཝཾ ཋ་ཏྭཱ [བུ་དྡྷོ (སྱཱ. ཀ.)], ཨ་ཊྛ་མེ་ན ཨ་ག་ཙྪ་ཧཾ.
༣༣. ‘‘ཝུ་ཊྛི་ཏཾ ཀོ་སི་ཀཾ བུ་དྡྷཾ, ས་ཡ་མྦྷུཾ ཨ་པ་རཱ་ཛི་ཏཾ;
པ་ས་ནྣ་ཙི་ཏྟོ ཝ་ནྡི་ཏྭཱ, ཨེ་ཀཾ བྷི་ཀྑཾ ཨ་དཱ་ས་ཧཾ.
༣༤. ‘‘ཏེ་ན ཀ་མྨེ་ན དྭི་པ་དི་ནྡ, ལོ་ཀ་ཛེ་ཊྛ ན་རཱ་ས་བྷ;
ཨུ་པྤ་ཛྫིཾ ཏུ་སི་ཏེ ཀཱ་ཡེ, ཨེ་ཀ་བྷི་ཀྑཱ་ཡི་དཾ ཕ་ལཾ.
༣༥. ‘‘དི་ཝ་ས་ཉྩེ་ཝ ར་ཏྟི་ཉྩ, ཨཱ་ལོ་ཀོ ཧོ་ཏི མེ ས་དཱ;
ས་མ་ནྟཱ ཡོ་ཛ་ན་ས་ཏཾ, ཨོ་བྷཱ་སེ་ན ཕ་རཱ་མ་ཧཾ.
༣༦. ‘‘པ་ཉྩ་པ་ཉྙཱ་ས་ཀ་པྤ་མྷི, ཙ་ཀྐ་ཝ་ཏྟཱི ཨ་ཧོ་ས་ཧཾ;
ཙཱ་ཏུ་ར་ནྟོ ཝི་ཛི་ཏཱ་ཝཱི, ཛ་མྦུ་མ་ཎྜ་སྶ [ཛ་མྦུ་ས་ཎྜ་སྶ (པཱི.)] ཨི་སྶ་རོ.
༣༧. ‘‘ཏ་དཱ མེ ན་ག་རཾ ཨཱ་སི, ཨི་དྡྷཾ ཕཱི་ཏཾ སུ་ནི་མྨི་ཏཾ;
ཏིཾ་ས་ཡོ་ཛ་ན་མཱ་ཡཱ་མཾ, ཝི་ཏྠཱ་རེ་ན ཙ ཝཱི་ས་ཏི.
༣༨. ‘‘སོ་བྷ་ཎཾ ནཱ་མ ན་ག་རཾ, ཝི་སྶ་ཀ་མྨེ་ན མཱ་པི་ཏཾ;
ད་ས་ས་དྡཱ་ཝི་ཝི་ཏྟཾ ཏཾ, ས་མྨ་ཏཱ་ལ༹་ས་མཱ་ཧི་ཏཾ.
༣༩. ‘‘ན ཏ་མྷི ན་ག་རེ ཨ་ཏྠི, ཝ་ལླི་ཀ་ཊྛ་ཉྩ མ་ཏྟི་ཀཱ;
ས་བྦ་སོ་ཎྞ་མ་ཡཾ་ཡེ་ཝ, ཛོ་ཏ་ཏེ ནི་ཙྩ་ཀཱ་ལི་ཀཾ.
༤༠. ‘‘ཙ་ཏུ་པཱ་ཀཱ་ར་པ་རི་ཀྑི་ཏྟཾ, ཏ་ཡོ ཨཱ་སུཾ མ་ཎི་མ་ཡཱ;
ཝེ་མ་ཛ྄ཛྷེ ཏཱ་ལ་པ་ནྟཱི ཙ, ཝི་སྶ་ཀ་མྨེ་ན མཱ་པི་ཏཱ.
༤༡. ‘‘ད་ས་ས་ཧ་སྶ་པོ་ཀྑ་ར་ཉྙོ, པ་དུ་མུ་པྤ་ལ་ཚཱ་དི་ཏཱ;
པུ་ཎྜ་རཱི་ཀེ་ཧི [པུ་ཎྜ་རཱི་ཀཱ་དི (སྱཱ.)] ས་ཉྪ་ནྣཱ, ནཱ་ནཱ་ག་ནྡྷ་ས་མཱི་རི་ཏཱ.
༤༢. ‘‘ཙ་ཏུ་ནྣ་ཝུ་ཏི་ཏོ ཀ་པྤེ, ཡཾ ཨུ་ཀྐཾ དྷཱ་ར་ཡིཾ ཨ་ཧཾ;
དུ་གྒ་ཏིཾ ནཱ་བྷི་ཛཱ་ནཱ་མི, ཨུ་ཀྐ་དྷཱ་ར་སྶི་དཾ ཕ་ལཾ.
༤༣. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༤༤. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༤༥. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཨུ་ཀྐཱ་ས་ཏི་ཀོ ཐེ་རོ ཨི་མཱ གཱ་ཐཱ་ཡོ
ཨ་བྷཱ་སི་ཏྠཱ་ཏི.
ཨུ་ཀྐཱ་ས་ཏི་ཀ་ཏྠེ་ར་སྶཱ་པ་དཱ་ནཾ ཏ་ཏི་ཡཾ.