༡. ན་ལ༹་མཱ་ལི་ཡ་ཏྠེ་ར་ཨ་པ་དཱ་ནཾ

༡. ‘‘སུ་ཝ་ཎྞ་ཝ་ཎྞཾ ས་མྦུ་དྡྷཾ, ཨཱ་ཧུ་ཏཱི་ནཾ པ་ཊི་གྒ་ཧཾ;

ཝི་པི་ན་གྒེ་ན ག་ཙྪ་ནྟཾ, ཨ་དྡ་སཾ ལོ་ཀ་ནཱ་ཡ་ཀཾ.

༢. ‘‘ན་ལ༹་མཱ་ལཾ ག་ཧེ་ཏྭཱ་ན, ནི་ཀྑ་མ་ནྟོ ཙ ཏཱ་ཝ་དེ;

ཏ་ཏྠ་དྡ་སཱ་སིཾ ས་མྦུ་དྡྷཾ, ཨོ་གྷ་ཏི་ཎྞ་མ་ནཱ་ས་ཝཾ.

༣. ‘‘པ་ས་ནྣ་ཙི་ཏྟོ སུ་མ་ནོ, ན་ལ༹་མཱ་ལ་མ་པཱུ་ཛ་ཡིཾ;

ད་ཀྑི་ཎེ་ཡྻཾ མ་ཧཱ་ཝཱི་རཾ, ས་བྦ་ལོ་ཀཱ་ནུ་ཀ་མྤ་ཀཾ.

༤. ‘‘ཨེ་ཀ་ཏིཾ་སེ ཨི་ཏོ ཀ་པྤེ, ཡཾ མཱ་ལ་མ་བྷི་རོ་པ་ཡིཾ [པུ་པྥ་མ་བྷི་རོ་པ་ཡིཾ (སཱི. སྱཱ. པཱི.)];

དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་པཱུ་ཛཱ་ཡི་དཾ ཕ་ལཾ.

༥. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ, བྷ་ཝཱ ས་བྦེ ས་མཱུ་ཧ་ཏཱ;

ནཱ་གོ་ཝ བ་ནྡྷ་ནཾ ཚེ་ཏྭཱ, ཝི་ཧ་རཱ་མི ཨ་ནཱ་ས་ཝོ.

༦. ‘‘སྭཱ་ག་ཏཾ ཝ་ཏ མེ ཨཱ་སི, མ་མ བུ་དྡྷ་སྶ ས་ནྟི་ཀེ;

ཏི་སྶོ ཝི་ཛྫཱ ཨ་ནུ་པྤ་ཏྟཱ, ཀ་ཏཾ བུ་དྡྷ་སྶ སཱ་ས་ནཾ.

༧. ‘‘པ་ཊི་ས་མྦྷི་དཱ ཙ་ཏ་སྶོ, ཝི་མོ་ཀྑཱ་པི ཙ ཨ་ཊྛི་མེ;

ཚ་ལ༹་བྷི་ཉྙཱ ས་ཙྪི་ཀ་ཏཱ, ཀ་ཏཾ བུ་དྡྷ་སྶ སཱ་ས་ནཾ’’.

ཨི་ཏྠཾ སུ་དཾ ཨཱ་ཡ་སྨཱ ན་ལ༹་མཱ་ལི་ཡོ ཐེ་རོ ཨི་མཱ གཱ་ཐཱ་ཡོ

ཨ་བྷཱ་སི་ཏྠཱ་ཏི.

ན་ལ༹་མཱ་ལི་ཡ་ཏྠེ་ར་སྶཱ་པ་དཱ་ནཾ པ་ཋ་མཾ.