༨. ཧ་རཱི་ཏ་ཀ་དཱ་ཡ་ཀ་ཏྠེ་ར་ཨ་པ་དཱ་ནཾ
༦༠. ‘‘ཧ་རཱི་ཏ་ཀཾ ཨཱ་མ་ལ་ཀཾ, ཨ་མྦ་ཛ་མྦུ་ཝི་བྷཱི་ཏ་ཀཾ;
ཀོ་ལཾ བྷ་ལླཱ་ཏ་ཀཾ བི་ལླཾ, ས་ཡ་མེ་ཝ ཧ་རཱ་མ་ཧཾ.
༦༡. ‘‘དི་སྭཱ་ན པ་བྦྷཱ་ར་ག་ཏཾ, ཛྷཱ་ཡིཾ ཛྷཱ་ན་ར་ཏཾ མུ་ནིཾ;
ཨཱ་བཱ་དྷེ་ན ཨཱ་པཱི་ལེ༹་ནྟཾ, ཨ་དུ་ཏཱི་ཡཾ མ་ཧཱ་མུ་ནིཾ.
༦༢. ‘‘ཧ་རཱི་ཏ་ཀཾ ག་ཧེ་ཏྭཱ་ན, ས་ཡ་མྦྷུ་སྶ ཨ་དཱ་ས་ཧཾ;
ཁཱ་ད་མ་ཏྟ་མྷི བྷེ་ས་ཛྫེ, བྱཱ་དྷི པ་སྶ་མྦྷི [པ་སྶ་དྡྷི (ཀ.)] ཏཱ་ཝ་དེ.
༦༣. ‘‘པ་ཧཱི་ན་ད་ར་ཐོ བུ་དྡྷོ, ཨ་ནུ་མོ་ད་མ་ཀཱ་སི མེ;
‘བྷེ་ས་ཛྫ་དཱ་ནེ་ནི་མི་ནཱ, བྱཱ་དྷི་ཝཱུ་པ་ས་མེ་ན ཙ.
༦༤. ‘‘‘དེ་ཝ་བྷཱུ་ཏོ མ་ནུ་སྶོ ཝཱ, ཛཱ་ཏོ ཝཱ ཨ་ཉྙ་ཛཱ་ཏི་ཡཱ;
ས་བྦ་ཏྠ སུ་ཁི་ཏོ ཧོ་ཏུ, མཱ ཙ ཏེ བྱཱ་དྷི་མཱ་ག་མཱ’.
༦༥. ‘‘ཨི་དཾ ཝ་ཏྭཱ་ན ས་མྦུ་དྡྷོ, ས་ཡ་མྦྷཱུ ཨ་པ་རཱ་ཛི་ཏོ;
ན་བྷཾ ཨ་བྦྷུ་གྒ་མཱི དྷཱི་རོ, ཧཾ་ས་རཱ་ཛཱ་ཝ ཨ་མྦ་རེ.
༦༦. ‘‘ཡ་ཏོ ཧ་རཱི་ཏ་ཀཾ དི་ནྣཾ, ས་ཡ་མྦྷུ་སྶ མ་ཧེ་སི་ནོ;
ཨི་མཾ ཛཱ་ཏིཾ ཨུ་པཱ་དཱ་ཡ, བྱཱ་དྷི མེ ནུ་པ་པ་ཛྫ་ཐ.
༦༧. ‘‘ཨ་ཡཾ པ་ཙྪི་མ་ཀོ མ་ཡ྄ཧཾ, ཙ་རི་མོ ཝ་ཏྟ་ཏེ བྷ་ཝོ;
ཏི་སྶོ ཝི་ཛྫཱ ས་ཙྪི་ཀ་ཏཱ, ཀ་ཏཾ བུ་དྡྷ་སྶ སཱ་ས་ནཾ.
༦༨. ‘‘ཙ་ཏུ་ནྣ་ཝུ་ཏི་ཏོ ཀ་པྤེ, བྷེ་ས་ཛྫ་མ་ད་དིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, བྷེ་ས་ཛྫ་སྶ ཨི་དཾ ཕ་ལཾ.
༦༩. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༧༠. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༧༡. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཧ་རཱི་ཏ་ཀ་དཱ་ཡ་ཀོ ཐེ་རོ ཨི་མཱ གཱ་ཐཱ་ཡོ
ཨ་བྷཱ་སི་ཏྠཱ་ཏི.
ཧ་རཱི་ཏ་ཀ་དཱ་ཡ་ཀ་ཏྠེ་ར་སྶཱ་པ་དཱ་ནཾ ཨ་ཊྛ་མཾ.