༢. ཨེ་ཀ་དུ་སྶ་དཱ་ཡ་ཀ་ཏྠེ་ར་ཨ་པ་དཱ་ནཾ
༡༥. ‘‘ན་ག་རེ ཧཾ་ས་ཝ་ཏི་ཡཱ, ཨ་ཧོ་སིཾ ཏི་ཎ་ཧཱ་ར་ཀོ;
ཏི་ཎ་ཧཱ་རེ་ན ཛཱི་ཝཱ་མི, ཏེ་ན པོ་སེ་མི དཱ་ར་ཀེ.
༡༦. ‘‘པ་དུ་མུ་ཏྟ་རོ ནཱ་མ ཛི་ནོ, ས་བྦ་དྷ་མྨཱ་ན པཱ་ར་གཱུ;
ཏ་མ་ནྡྷ་ཀཱ་རཾ ནཱ་སེ་ཏྭཱ, ཨུ་པྤ་ཛྫི ལོ་ཀ་ནཱ་ཡ་ཀོ.
༡༧. ‘‘ས་ཀེ གྷ་རེ ནི་སཱི་དི་ཏྭཱ, ཨེ་ཝཾ ཙི་ནྟེ་སི ཏཱ་ཝ་དེ;
‘བུ་དྡྷོ ལོ་ཀེ ས་མུ་པྤ་ནྣོ, དེ་ཡྻ་དྷ་མྨོ ན ཝི་ཛྫ་ཏི.
༡༨. ‘‘‘ཨི་དཾ མེ སཱ་ཊ་ཀཾ ཨེ་ཀཾ, ན་ཏྠི མེ ཀོ་ཙི དཱ་ཡ་ཀོ;
དུ་ཀྑོ ནི་ར་ཡ་ས་མྥ་སྶོ, རོ་པ་ཡི་སྶཱ་མི ད་ཀྑི་ཎཾ’.
༡༩. ‘‘ཨེ་ཝཱ་ཧཾ ཙི་ནྟ་ཡི་ཏྭཱ་ན, ས་ཀཾ ཙི་ཏྟཾ པ་སཱ་ད་ཡིཾ;
ཨེ་ཀཾ དུ་སྶཾ ག་ཧེ་ཏྭཱ་ན, བུ་དྡྷ་སེ་ཊྛ་སྶ་དཱ་ས་ཧཾ.
༢༠. ‘‘ཨེ་ཀཾ དུ་སྶཾ ད་དི་ཏྭཱ་ན, ཨུ་ཀྐུ་ཊྛིཾ ས་མྤ་ཝ་ཏྟ་ཡིཾ;
‘ཡ་དི བུ་དྡྷོ ཏུ་ཝཾ ཝཱི་ར, ཏཱ་རེ་ཧི མཾ མ་ཧཱ་མུ་ནི’.
༢༡. ‘‘པ་དུ་མུ་ཏྟ་རོ ལོ་ཀ་ཝི་དཱུ, ཨཱ་ཧུ་ཏཱི་ནཾ པ་ཊི་གྒ་ཧོ;
མ་མ དཱ་ནཾ པ་ཀི་ཏྟེ་ནྟོ, ཨ་ཀཱ མེ ཨ་ནུ་མོ་ད་ནཾ.
༢༢. ‘‘‘ཨི་མི་ནཱ ཨེ་ཀ་དུ་སྶེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཀ་པྤ་ས་ཏ་ས་ཧ་སྶཱ་ནི, ཝི་ནི་པཱ་ཏཾ ན ག་ཙྪ་སི.
༢༣. ‘‘‘ཚ་ཏྟིཾ་ས་ཀྑ་ཏྟུཾ དེ་ཝི་ནྡོ, དེ་ཝ་ར་ཛྫཾ ཀ་རི་སྶ་སི;
ཏེ་ཏྟིཾ་ས་ཀྑ་ཏྟུཾ རཱ་ཛཱ ཙ, ཙ་ཀྐ་ཝ་ཏྟཱི [ཙ་ཀྐ་ཝ་ཏྟི (སྱཱ.)] བྷ་ཝི་སྶ་སི.
༢༤. ‘‘‘པ་དེ་ས་ར་ཛྫཾ ཝི་པུ་ལཾ, ག་ཎ་ནཱ་ཏོ ཨ་ས་ངྑི་ཡཾ [ཨ་ས་ངྐ་ཡཾ (སྱཱ. ཀ.) ཨེ་ཝ་མུ་པ་རི་པི];
དེ་ཝ་ལོ་ཀེ མ་ནུ་སྶེ ཝཱ, སཾ་ས་ར་ནྟོ ཏུ་ཝཾ བྷ་ཝེ.
༢༥. ‘‘‘རཱུ་པ་ཝཱ གུ་ཎ་ས་མྤ་ནྣོ, ཨ་ན་ཝ་ཀྐ་ནྟ་དེ་ཧ་ཝཱ [ཨ་ནུ་ཝ་ཏྟ་ནྟ… (སྱཱ)];
ཨ་ཀྑོ་བྷཾ ཨ་མི་ཏཾ དུ་སྶཾ, ལ་བྷི་སྶ་སི ཡ་དི་ཙྪ་ཀཾ’.
༢༦. ‘‘ཨི་དཾ ཝ་ཏྭཱ་ན ས་མྦུ་དྡྷོ, ཛ་ལ་ཛུ་ཏྟ་མ་ནཱ་མ་ཀོ;
ན་བྷཾ ཨ་བྦྷུ་གྒ་མཱི ཝཱི་རོ [དྷཱི་རོ (སཱི. སྱཱ.)], ཧཾ་ས་རཱ་ཛཱ་ཝ ཨ་མྦ་རེ.
༢༧. ‘‘ཡཾ ཡཾ ཡོ་ནུ་པ་པ་ཛྫཱ་མི, དེ་ཝ་ཏྟཾ ཨ་ཐ མཱ་ནུ་སཾ;
བྷོ་གེ མེ ཨཱུ་ན་ཏཱ ན་ཏྠི, ཨེ་ཀ་དུ་སྶ་སྶི་དཾ ཕ་ལཾ.
༢༨. ‘‘པ་དུ་དྡྷཱ་རེ པ་དུ་དྡྷཱ་རེ, དུ་སྶཾ ནི་བྦ་ཏྟ་ཏེ མ་མཾ;
ཧེ་ཊྛཱ དུ་སྶ་མྷི ཏི་ཊྛཱ་མི, ཨུ་པ་རི་ཙྪ་ད་ནཾ མ་མ.
༢༩. ‘‘ཙ་ཀྐ་ཝཱ་ལ༹ཾ ཨུ་པཱ་དཱ་ཡ, ས་ཀཱ་ན་ནཾ ས་པ་བྦ་ཏཾ;
ཨི་ཙྪ་མཱ་ནོ ཙ་ཧཾ ཨ་ཛྫ, དུ་སྶེ་ཧ་ཙྪཱ་ད་ཡེ་ཡྻ ཏཾ.
༣༠. ‘‘ཏེ་ནེ་ཝ ཨེ་ཀ་དུ་སྶེ་ན, སཾ་ས་ར་ནྟོ བྷ་ཝཱ་བྷ་ཝེ;
སུ་ཝ་ཎྞ་ཝ་ཎྞོ ཧུ་ཏྭཱ་ན, སཾ་ས་རཱ་མི བྷ་ཝཱ་བྷ་ཝེ.
༣༡. ‘‘ཝི་པཱ་ཀཾ ཝི་ཨེ་ཀ་དུ་སྶ་སྶ, ནཱ་ཛ྄ཛྷ་གཾ ཀ་ཏྠ་ཙི་ཀྑ་ཡཾ;
ཨ་ཡཾ མེ ཨ་ནྟི་མཱ ཛཱ་ཏི, ཝི་པ་ཙྩ་ཏི ཨི་དྷཱ་པི མེ.
༣༢. ‘‘ས་ཏ་ས་ཧ་སྶི་ཏོ ཀ་པྤེ, ཡཾ དུ་སྶ་མ་ད་དིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, ཨེ་ཀ་དུ་སྶ་སྶི་དཾ ཕ་ལཾ.
༣༣. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.
༣༤. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༣༥. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཨེ་ཀ་དུ་སྶ་དཱ་ཡ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི;
ཨེ་ཀ་དུ་སྶ་དཱ་ཡ་ཀ་ཏྠེ་ར་སྶཱ་པ་དཱ་ནཾ དུ་ཏི་ཡཾ.