༡༠. མ་ཉྩ་དཱ་ཡ་ཀ་ཏྠེ་ར་ཨ་པ་དཱ་ནཾ

༡༨༤. ‘‘པ་རི་ནི་བྦུ་ཏེ ཀཱ་རུ་ཎི་ཀེ, སི་དྡྷ་ཏྠེ ལོ་ཀ་ནཱ་ཡ་ཀེ;

ཝི་ཏྠཱ་རི་ཀེ པཱ་ཝ་ཙ་ནེ, དེ་ཝ་མཱ་ནུ་ས་ས་ཀྐ་ཏེ.

༡༨༥. ‘‘ཙ་ཎྜཱ་ལོ ཨཱ་ས་ཧཾ ཏ་ཏྠ, ཨཱ་ས་ནྡི་པཱི་ཋ་ཀཱ་ར་ཀོ;

ཏེ་ན ཀ་མྨེ་ན ཛཱི་ཝཱ་མི, ཏེ་ན པོ་སེ་མི དཱ་ར་ཀེ.

༡༨༦. ‘‘ཨཱ་ས་ནྡིཾ སུ་ཀ་ཏཾ ཀ་ཏྭཱ, པ་ས་ནྣོ སེ་ཧི པཱ་ཎི་བྷི;

ས་ཡ་མེ་ཝུ་པ་ག་ནྟྭཱ་ན, བྷི་ཀྑུ་ས་ངྒྷ་སྶ་དཱ་ས་ཧཾ.

༡༨༧. ‘‘ཏེ་ན ཀ་མྨེ་ན སུ་ཀ་ཏེ་ན, ཙེ་ཏ་ནཱ་པ་ཎི་དྷཱི་ཧི ཙ;

ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་ས་མ་ག་ཙྪ་ཧཾ.

༡༨༨. ‘‘དེ་ཝ་ལོ་ཀ་ག་ཏོ ས་ནྟོ, མོ་དཱ་མི ཏི་ད་སེ ག་ཎེ;

ས་ཡ་ནཱ་ནི མ་ཧ་གྒྷཱ་ནི, ནི་བྦ་ཏྟ་ནྟི ཡ་དི་ཙྪ་ཀཾ.

༡༨༩. ‘‘པ་ཉྙཱ་ས་ཀྑ་ཏྟུཾ དེ་ཝི་ནྡོ, དེ་ཝ་ར་ཛྫ་མ་ཀཱ་ར་ཡིཾ;

ཨ་སཱི་ཏི་ཀྑ་ཏྟུཾ རཱ་ཛཱ ཙ, ཙ་ཀྐ་ཝ་ཏྟཱི ཨ་ཧོ་ས་ཧཾ.

༡༩༠. ‘‘པ་དེ་ས་ར་ཛྫཾ ཝི་པུ་ལཾ, ག་ཎ་ནཱ་ཏོ ཨ་ས་ངྑི་ཡཾ;

སུ་ཁི་ཏོ ཡ་ས་ཝཱ ཧོ་མི, མ་ཉྩ་དཱ་ན་སྶི་དཾ ཕ་ལཾ.

༡༩༡. ‘‘དེ་ཝ་ལོ་ཀཱ ཙ་ཝི་ཏྭཱ་ན, ཨེ་མི ཙེ མཱ་ནུ་སཾ བྷ་ཝཾ;

མ་ཧཱ་ར་ཧཱ སུ་ས་ཡ་ནཱ, ས་ཡ་མེ་ཝ བྷ་ཝ་ནྟི མེ.

༡༩༢. ‘‘ཨ་ཡཾ པ་ཙྪི་མ་ཀོ མ་ཡ྄ཧཾ, ཙ་རི་མོ ཝ་ཏྟ་ཏེ བྷ་ཝོ;

ཨ་ཛྫཱ་པི ས་ཡ་ནེ ཀཱ་ལེ [ས་ཡ་ན་ཀཱ་ལེ (སྱཱ.)], ས་ཡ་ནཾ ཨུ་པ་ཏི་ཊྛ་ཏི.

༡༩༣. ‘‘ཙ་ཏུ་ནྣ་ཝུ་ཏི་ཏོ ཀ་པྤེ, ཡཾ དཱ་ན་མ་ད་དིཾ ཏ་དཱ;

དུ་གྒ་ཏིཾ ནཱ་བྷི་ཛཱ་ནཱ་མི, མ་ཉྩ་དཱ་ན་སྶི་དཾ ཕ་ལཾ.

༡༩༤. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝོ.

༡༩༥. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.

༡༩༦. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.

ཨི་ཏྠཾ སུ་དཾ ཨཱ་ཡ་སྨཱ མ་ཉྩ་དཱ་ཡ་ཀོ ཐེ་རོ ཨི་མཱ གཱ་ཐཱ་ཡོ

ཨ་བྷཱ་སི་ཏྠཱ་ཏི.

མ་ཉྩ་དཱ་ཡ་ཀ་ཏྠེ་ར་སྶཱ་པ་དཱ་ནཾ ད་ས་མཾ.

བྷ་དྡཱ་ལི་ཝ་གྒོ བཱ་ཙ་ཏྟཱ་ལཱི་ས་མོ.