༨. ཨུ་ཏྟི་ཡ་ཏྠེ་ར་ཨ་པ་དཱ་ནཾ
༡༦༩. ‘‘ཙ་ནྡ་བྷཱ་གཱ་ན་དཱི་ཏཱི་རེ, སུ་སུ་མཱ་རོ ཨ་ཧཾ ཏ་དཱ;
ས་གོ་ཙ་ར་པྤ་སུ་ཏོ་ཧཾ [ས་བྷོ་ཛ་ན་པ་སུ་ཏཱ་ཧཾ (སྱཱ. ཀ.)], ན་དཱི་ཏི་ཏྠཾ ཨ་ག་ཙྪ་ཧཾ.
༡༧༠. ‘‘སི་དྡྷ་ཏྠོ ཏ་མྷི ས་མ་ཡེ, ས་ཡ་མྦྷཱུ ཨ་གྒ་པུ་གྒ་ལོ;
ན་དིཾ ཏ་རི་ཏུ་ཀཱ་མོ སོ, ན་དཱི་ཏི་ཏྠཾ ཨུ་པཱ་ག་མི.
༡༧༡. ‘‘ཨུ་པཱ་ག་ཏེ ཙ [ཨུ་པཱ་ག་ཏ་མྷི (སྱཱ. ཀ.)] ས་མྦུ་དྡྷེ, ཨ་ཧ་མྤི ཏ་ཏྠུ་པཱ་ག་མིཾ;
ཨུ་པ་ག་ནྟྭཱ་ན ས་མྦུ་དྡྷཾ, ཨི་མཾ ཝཱ་ཙཾ ཨུ་དཱི་ར་ཡིཾ.
༡༧༢. ‘‘‘ཨ་བྷི་རཱུ་ཧ མ་ཧཱ་ཝཱི་ར, ཏཱ་རེ་སྶཱ་མི ཨ་ཧཾ ཏུ་ཝཾ;
པེ་ཏྟི་ཀཾ ཝི་ས་ཡཾ མ་ཡ྄ཧཾ, ཨ་ནུ་ཀ་མྤ མ་ཧཱ་མུ་ནི’.
༡༧༣. ‘‘མ་མ ཨུ་གྒ་ཛྫ་ནཾ སུ་ཏྭཱ, ཨ་བྷི་རཱུ་ཧི མ་ཧཱ་མུ་ནི;
ཧ་ཊྛོ ཧ་ཊྛེ་ན ཙི་ཏྟེ་ན, ཏཱ་རེ་སིཾ ལོ་ཀ་ནཱ་ཡ་ཀཾ.
༡༧༤. ‘‘ན་དི་ཡཱ པཱ་རི་མེ ཏཱི་རེ, སི་དྡྷ་ཏྠོ ལོ་ཀ་ནཱ་ཡ་ཀོ;
ཨ་སྶཱ་སེ་སི མ་མཾ ཏ་ཏྠ, ཨ་མ་ཏཾ པཱ་པུ་ཎི་སྶ་སི.
༡༧༥. ‘‘ཏ་མྷཱ ཀཱ་ཡཱ ཙ་ཝི་ཏྭཱ་ན, དེ་ཝ་ལོ་ཀཾ ཨཱ་ག་ཙྪ་ཧཾ;
དི་བྦ་སུ་ཁཾ ཨ་ནུ་བྷ་ཝིཾ, ཨ་ཙྪ་རཱ་ཧི པུ་ར་ཀྑ་ཏོ.
༡༧༦. ‘‘ས་ཏྟ་ཀྑ་ཏྟུ་ཉྩ དེ་ཝི་ནྡོ, དེ་ཝ་ར་ཛྫ་མ་ཀཱ་ས་ཧཾ;
ཏཱི་ཎི་ཀྑ་ཏྟུཾ ཙ་ཀྐ་ཝ་ཏྟཱི, མ་ཧི་ཡཱ ཨི་སྶ་རོ ཨ་ཧུཾ.
༡༧༧. ‘‘ཝི་ཝེ་ཀ་མ་ནུ་ཡུ་ཏྟོ་ཧཾ, ནི་པ་ཀོ ཙ སུ་སཾ་ཝུ་ཏོ;
དྷཱ་རེ་མི ཨ་ནྟི་མཾ དེ་ཧཾ, ས་མྨཱ་ས་མྦུ་དྡྷ་སཱ་ས་ནེ.
༡༧༨. ‘‘ཙ་ཏུ་ནྣ་ཝུ་ཏི་ཏོ ཀ་པྤེ, ཏཱ་རེ་སིཾ ཡཾ ན་རཱ་ས་བྷཾ;
དུ་གྒ་ཏིཾ ནཱ་བྷི་ཛཱ་ནཱ་མི, ཏ་ར་ཎཱ་ཡ ཨི་དཾ ཕ་ལཾ.
༡༧༩. ‘‘པ་ཊི་ས་མྦྷི་དཱ ཙ་ཏ་སྶོ, ཝི་མོ་ཀྑཱ་པི ཙ ཨ་ཊྛི་མེ;
ཚ་ལ༹་བྷི་ཉྙཱ ས་ཙྪི་ཀ་ཏཱ, ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཨུ་ཏྟི་ཡོ [ཨུ་ཏྟི་རི་ཡོ (སཱི.)] ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཨུ་ཏྟི་ཡ་ཏྠེ་ར་སྶཱ་པ་དཱ་ནཾ ཨ་ཊྛ་མཾ.