༣. ས་བྷོ་ཛ་ན་སི་ཀྑཱ་པ་ད་ཝ་ཎྞ་ནཱ

༢༧༩. ཏ་ཏི་ཡ་སི་ཀྑཱ་པ་དེ – ས་ཡ་ནི་གྷ་རེཏི ས་ཡ་ནི་ཡ་གྷ་རེ. ཡ་ཏོ ཨ་ཡྻ་སྶ བྷི་ཀྑཱ དི་ནྣཱཏི ཡ་སྨཱ བྷི་ཀྑཱ དི་ནྣཱ, ཡཾ ཨཱ་ག་ཏེ་ན ལ་དྡྷ་བྦཾ ཏཾ ཝོ ལ་དྡྷཾ; ག་ཙྪ་ཐཱ་ཏི ཨ་དྷི་པྤཱ་ཡོ. པ་རི་ཡུ་ཊྛི་ཏོཏི རཱ་ག་པ་རི་ཡུ་ཊྛི་ཏོ; མེ་ཐུ་ནཱ་དྷི་པྤཱ་ཡོ་ཏི ཨ་ཏྠོ.

༢༨༠. ས་ཧ ཨུ་བྷོ་ཧི ཛ་ནེ་ཧཱི་ཏི ས་བྷོ་ཛ་ནཾ; ཏ་སྨིཾ ས་བྷོ་ཛ་ནེ. ཨ་ཐ ཝཱ ས་བྷོ་ཛ་ནེཏི ས་བྷོ་གེ. རཱ་ག་པ་རི་ཡུ་ཊྛི་ཏ་སྶ ཧི པུ་རི་ས་སྶ ཨི་ཏྠཱི བྷོ་གོ ཨི་ཏྠི་ཡཱ ཙ པུ་རི་སོ. ཏེ་ནེ་ཝ་སྶ པ་ད་བྷཱ་ཛ་ནེ – ‘‘ཨི་ཏྠཱི ཙེ་ཝ ཧོ་ཏི པུ་རི་སོ ཙཱ’’ཏི་ཨཱ་དི ཝུ་ཏྟཾ. མ་ཧ་ལླ་ཀེ གྷ་རེཏི མ་ཧ་ལླ་ཀེ ས་ཡ་ནི་གྷ་རེ. པི་ཊྛ་ས་ངྒྷཱ་ཊ་སྶ ཧ་ཏྠ་པཱ་སཾ ཝི་ཛ་ཧི་ཏྭཱཏི ཏ་སྶ ས་ཡ་ནི་གྷ་རེ ག་བྦྷ་སྶ ཡོ པི་ཊྛ་ས་ངྒྷཱ་ཊོ, ཏ་སྶ ཧ་ཏྠ་པཱ་སཾ ཝི་ཛ་ཧི་ཏྭཱ; ཨ་ནྟོ་ས་ཡ་ན་སྶ ཨཱ་ས་ནྣེ ཋཱ་ནེ ནི་སཱི་ད་ཏཱི་ཏི ཨ་ཏྠོ. ཨཱི་དི་ས་ཉྩ ས་ཡ་ནི་གྷ་རཾ མ་ཧཱ་ཙ་ཏུ་སྶཱ་ལཱ་དཱི་སུ ཧོ་ཏི. པི་ཊྛི་ཝཾ་སཾ ཨ་ཏི་ཀྐ་མི་ཏྭཱཏི ཨི་མི་ནཱ མ་ཛ྄ཛྷཱ་ཏི་ཀྐ་མཾ ད་སྶེ་ཏི. ཏ་སྨཱ ཡ་ཐཱ ཝཱ ཏ་ཐཱ ཝཱ ཀ་ཏ་སྶ ཁུ་དྡ་ཀ་སྶ ས་ཡ་ནི་གྷ་ར་སྶ མ་ཛ྄ཛྷཱ་ཏི་ཀྐ་མེ ཨཱ་པ་ཏྟི ཝེ་དི་ཏ་བྦཱ. སེ་ས་མེ་ཏྠ ཨུ་ཏྟཱ་ན་མེ་ཝ.

པ་ཋ་མ་པཱ་རཱ་ཛི་ཀ་ས་མུ་ཊྛཱ་ནཾ – ཀི་རི་ཡཾ, ས་ཉྙཱ་ཝི་མོ་ཀྑཾ, ས་ཙི་ཏྟ་ཀཾ, ལོ་ཀ་ཝ་ཛྫཾ, ཀཱ་ཡ་ཀ་མྨཾ, ཨ་ཀུ་ས་ལ་ཙི་ཏྟཾ, དྭི་ཝེ་ད་ན་ནྟི.

ས་བྷོ་ཛ་ན་སི་ཀྑཱ་པ་དཾ ཏ་ཏི་ཡཾ.

༢༨༤. ཙ་ཏུ་ཏྠ་པ་ཉྩ་མ་སི་ཀྑཱ་པ་དེ་སུ ཡཾ ཝ་ཏྟ་བྦཾ སི་ཡཱ, ཏཾ ས་བྦཾ ཨ་ནི་ཡ་ཏ་དྭ་ཡེ ཝུ་ཏྟ་ན་ཡ་མེ་ཝ. ཡ་ཐཱ ཙ ས་བྷོ་ཛ་ན་སི་ཀྑཱ་པ་དཾ, ཨེ་ཝ་མེ་ཏཱ་ནི་པི པ་ཋ་མ་པཱ་རཱ་ཛི་ཀ་ས་མུ་ཊྛཱ་ནཱ་ནེ་ཝཱ་ཏི.

ར་ཧོ་པ་ཊི་ཙྪ་ནྣ་སི་ཀྑཱ་པ་དཾ ཙ་ཏུ་ཏྠཾ, ར་ཧོ་ནི་ས་ཛྫ་སི་ཀྑཱ་པ་དཾ པ་ཉྩ་མཾ.