༦. ས་ལླ་སུ་ཏྟ་ཝ་ཎྞ་ནཱ

༢༥༤. ཚ་ཊྛེ ཏ་ཏྲཱཏི ཏེ་སུ དྭཱི་སུ ཛ་ནེ་སུ. ཨ་ནུ་ཝེ་དྷཾ ཝི་ཛ྄ཛྷེ་ཡྻཱཏི ཏ་སྶེ་ཝ ཝ་ཎ་མུ་ཁ་སྶ ཨ་ངྒུ་ལ་ནྟ་རེ ཝཱ དྭ་ངྒུ་ལ་ནྟ་རེ ཝཱ ཨཱ་ས་ནྣ་པ་དེ་སེ ཨ་ནུ་ག་ཏ་ཝེ་དྷཾ. ཨེ་ཝཾ ཝི་དྡྷ་སྶ ཧི སཱ ཨ་ནུ་ཝེ་དྷཱ ཝེ་ད་ནཱ པ་ཋ་མ་ཝེ་ད་ནཱ་ཡ བ་ལ་ཝ་ཏ་རཱ ཧོ་ཏི, པ་ཙྪཱ ཨུ་པྤ་ཛྫ་མཱ་ནཱ དོ་མ་ན་སྶ་ཝེ་ད་ནཱ་པི ཨེ་ཝ་མེ་ཝ པུ་རི་མ་ཝེ་ད་ནཱ་ཡ བ་ལ་ཝ་ཏ་རཱ ཧོ་ཏི. དུ་ཀྑཱ་ཡ ཝེ་ད་ནཱ་ཡ ནི་སྶ་ར་ཎནྟི དུ་ཀྑཱ་ཡ ཝེ་ད་ནཱ་ཡ ཧི ས་མཱ་དྷི་མ་གྒ་ཕ་ལཱ་ནི ནི་སྶ་ར་ཎཾ, ཏཾ སོ ན ཛཱ་ནཱ་ཏི, ཀཱ་མ་སུ་ཁ་མེ་ཝ ནི་སྶ་ར་ཎ་ནྟི ཛཱ་ནཱ་ཏི. ཏཱ་སཾ ཝེ་ད་ནཱ་ནནྟི ཏཱ་སཾ སུ་ཁ་དུ་ཀྑ་ཝེ་ད་ནཱ་ནཾ. ས་ཉྙུ་ཏྟོ ནཾ ཝེ་ད་ཡ་ཏཱིཏི ཀི་ལེ་སེ་ཧི ས་མྤ་ཡུ་ཏྟོ་ཝ ཧུ་ཏྭཱ ཏཾ ཝེ་ད་ནཾ ཝེ་ད་ཡ་ཏི, ན ཝི་པྤ་ཡུ་ཏྟོ. ས་ཉྙུ་ཏྟོ དུ་ཀྑ་སྨཱཏི ཀ་ར་ཎ་ཏྠེ ནི་སྶ་ཀྐཾ, དུ་ཀྑེ་ན ས་མྤ་ཡུ་ཏྟོ་ཏི ཨ་ཏྠོ. ས་ངྑཱ་ཏ་དྷ་མྨ་སྶཱཏི ཝི་དི་ཏ་དྷ་མྨ་སྶ ཏུ་ལི་ཏ་དྷ་མྨ་སྶ. བ་ཧུ་སྶུ་ཏ་སྶཱཏི པ་རི་ཡ་ཏྟི་བ་ཧུ་སྶུ་ཏ་སྶ པ་ཊི་ཝེ་དྷ་བ་ཧུ་སྶུ་ཏ་སྶ ཙ. ས་མྨཱ པ་ཛཱ་ནཱ་ཏི བྷ་ཝ་སྶ པཱ་ར་གཱུཏི བྷ་ཝ་སྶ པཱ་རཾ ནི་བྦཱ་ནཾ ག་ཏོ, ཏ་དེ་ཝ ནི་བྦཱ་ནཾ ས་མྨཱ པ་ཛཱ་ནཱ་ཏི. ཨི་མ་སྨི་མྤི སུ་ཏྟེ ཨཱ་ར་མྨ་ཎཱ་ནུ་ས་ཡོ་ཝ ཀ་ཐི་ཏོ. ཨ་རི་ཡ་སཱ་ཝ་ཀེ་སུ ཙ ཁཱི་ཎཱ་ས་ཝོ ཨེ་ཏྠ དྷུ་རཾ, ཨ་ནཱ་གཱ་མཱི་པི ཝ་ཊྚ་ཏཱི་ཏི ཝ་ད་ནྟི.