༥. ཨོ་ཀི་ལི་ནཱི་སུ་ཏྟ་ཝ་ཎྞ་ནཱ

༢༡༦. ཨོ་ཀི་ལི་ནཱི་ཝ་ཏྠུ་སྨིཾ ཨུ་པྤ་ཀྐཾ ཨོ་ཀི་ལི་ནིཾ ཨོ་ཀི་རི་ནིནྟི སཱ ཀི་ར ཨ་ངྒཱ་ར་ཙི་ཏ་ཀེ ནི་པ་ནྣཱ ཝི་པྥ་ནྡ་མཱ་ནཱ ཝི་པ་རི་ཝ་ཏྟ་མཱ་ནཱ པ་ཙྩ་ཏི, ཏ་སྨཱ ཨུ་པྤ་ཀྐཱ ཙེ་ཝ ཧོ་ཏི ཨུ་ཎྷེ་ན ཨ་གྒི་ནཱ པ་ཀྐ་ས་རཱི་རཱ, ཨོ་ཀི་ལི་ནཱི ཙ ཀི་ལི་ནྣ་ས་རཱི་རཱ, བི་ནྡཱུ་ནི་སྶཱ ས་རཱི་ར་ཏོ པ་གྒྷ་ར་ནྟི, ཨོ་ཀི་རི་ནཱི ཙ ཨ་ངྒཱ་ར་ས་མྤ་རི་ཀི་ཎྞཱ. ཏ་སྶཱ ཧི ཧེ་ཊྛ་ཏོ་པི ཀིཾ་སུ་ཀ་པུ་པྥ་ཝ་ཎྞཱ ཨ་ངྒཱ་རཱ, ཨུ་བྷ་ཡ་པ་སྶེ་སུ་པི, ཨཱ་ཀཱ་ས་ཏོ་པི་སྶཱ ཨུ་པ་རི པ་ཏ་ནྟི. ཏེ་ན ཝུ་ཏྟཾ – ‘‘ཨུ་པྤ་ཀྐཾ ཨོ་ཀི་ལི་ནིཾ ཨོ་ཀི་རི་ནི’’ནྟི. སཱ ཨི་སྶཱ་པ་ཀ་ཏཱ ས་པ་ཏྟིཾ ཨ་ངྒཱ་ར་ཀ་ཊཱ་ཧེ་ན ཨོ་ཀི་རཱིཏི ཏ་སྶ ཀི་ར ར་ཉྙོ ཨེ་ཀཱ ནཱ་ཊ་ཀི་ནཱི ཨ་ངྒཱ་ར་ཀ་ཊཱ་ཧཾ ས་མཱི་པེ ཋ་པེ་ཏྭཱ ག་ཏྟ་ཏོ ཨུ་ད་ཀཾ པུ་ཉྪ་ཏི, པཱ་ཎི་ནཱ ཙ སེ་དཾ ཀ་རོ་ཏི. རཱ་ཛཱ་པི ཏཱ་ཡ ས་དྡྷིཾ ཀ་ཐ་ཉྩ ཀ་རོ་ཏི, པ་རི་ཏུ་ཊྛཱ་ཀཱ་ར་ཉྩ ད་སྶེ་ཏི. ཨ་གྒ་མ་ཧེ་སཱི ཏཾ ཨ་ས་ཧ་མཱ་ནཱ ཨི་སྶཱ་པ་ཀ་ཏཱ ཧུ་ཏྭཱ ཨ་ཙི་ར་པ་ཀྐ་ནྟ་སྶ ར་ཉྙོ ཏཾ ཨ་ངྒཱ་ར་ཀ་ཊཱ་ཧཾ ག་ཧེ་ཏྭཱ ཏ་སྶཱ ཨུ་པ་རི ཨ་ངྒཱ་རེ ཨོ་ཀི་རི. སཱ ཏཾ ཀ་མྨཾ ཀ་ཏྭཱ ཏཱ་དི་སཾ་ཡེ་ཝ ཝི་པཱ་ཀཾ པ་ཙྩ་ནུ་བྷ་ཝི་ཏུཾ པེ་ཏ་ལོ་ཀེ ནི་བྦ་ཏྟཱ. པ་ཉྩ་མཾ.