༨. ཨ་ཉྙ་ཏ་ར་བྷི་ཀྑུ་ཝ་ཏྠུ

ཨ་པྤ་མཱ་ད་ར་ཏོ བྷི་ཀྑཱུཏི ཨི་མཾ དྷ་མྨ་དེ་ས་ནཾ ས་ཏྠཱ ཛེ་ཏ་ཝ་ནེ ཝི་ཧ་ར་ནྟོ ཨ་ཉྙ་ཏ་རཾ བྷི་ཀྑུཾ ཨཱ་ར་བྦྷ ཀ་ཐེ་སི.

སོ ཀི་ར ས་ཏྠུ ས་ནྟི་ཀེ ཡཱ་ཝ ཨ་ར་ཧ་ཏྟཱ ཀ་མྨ་ཊྛཱ་ནཾ ཀ་ཐཱ་པེ་ཏྭཱ ཨ་ར་ཉྙཾ པ་ཝི་སི་ཏྭཱ གྷ་ཊེ་ནྟོ ཝཱ་ཡ་མ་ནྟོ ཨ་ར་ཧ་ཏྟཾ པ་ཏྟུཾ ནཱ་ས་ཀྑི. སོ ‘‘ཝི་སེ་སེ་ཏྭཱ ཀ་མྨ་ཊྛཱ་ནཾ ཀ་ཐཱ་པེ་སྶཱ་མཱི’’ཏི ཏ་ཏོ ནི་ཀྑ་མི་ཏྭཱ ས་ཏྠུ ས་ནྟི་ཀཾ ཨཱ་ག་ཙྪ་ནྟོ ཨ་ནྟ་རཱ་མ་གྒེ མ་ཧ་ནྟཾ དཱ་ཝ་གྒིཾ ཨུ་ཊྛི་ཏཾ དི་སྭཱ ཝེ་གེ་ན ཨེ་ཀཾ མུ་ཎྜ་པ་བྦ་ཏ་མ་ཏྠ་ཀཾ ཨ་བྷི་རུ་ཡ྄ཧ ནི་སི་ནྣོ ཨ་ར་ཉྙཾ ཌ་ཡ྄ཧ་མཱ་ནཾ ཨ་གྒིཾ དི་སྭཱ ཨཱ་ར་མྨ་ཎཾ ག་ཎྷི – ‘‘ཡ་ཐཱ ཨ་ཡཾ ཨ་གྒི མ་ཧ་ནྟཱ་ནི ཙ ཁུ་དྡ་ཀཱ་ནི ཙ ཨུ་པཱ་དཱ་ནཱ་ནི ཌ་ཧ་ནྟོ ག་ཙྪ་ཏི, ཨེ་ཝཾ ཨ་རི་ཡ་མ་གྒ་ཉཱ་ཎ་གྒི་ནཱ་པི མ་ཧ་ནྟཱ་ནི ཙ ཁུ་དྡ་ཀཱ་ནི ཙ སཾ་ཡོ་ཛ་ནཱ་ནི ཌ་ཧ་ནྟེ་ན ག་ནྟ་བྦཾ བྷ་ཝི་སྶ་ཏཱི’’ཏི. ས་ཏྠཱ ག་ནྡྷ་ཀུ་ཊི་ཡཾ ནི་སི་ནྣོ་ཝ ཏ་སྶ ཙི་ཏྟཱ་ཙཱ་རཾ ཉ་ཏྭཱ, ‘‘ཨེ་ཝ་མེ་ཝ, བྷི་ཀྑུ, མ་ཧ་ནྟཱ་ནི་པི ཁུ་དྡ་ཀཱ་ནི་པི ཨུ་པཱ་དཱ་ནཱ་ནི ཝི་ཡ ཨི་མེ་སཾ ས་ཏྟཱ་ནཾ ཨ་བྦྷ་ནྟ་རེ ཨུ་པྤ་ཛྫ་མཱ་ནཱ་ནི ཨ་ཎུཾ་ཐཱུ་ལཱ་ནི སཾ་ཡོ་ཛ་ནཱ་ནི, ཏཱ་ནི ཉཱ་ཎ་གྒི་ནཱ ཛྷཱ་པེ་ཏྭཱ ཨ་བྷ་བྦུ་པྤ་ཏྟི་ཀཱ་ནི ཀཱ་ཏུཾ ཝ་ཊྚ་ཏཱི’’ཏི ཝ་ཏྭཱ ཨོ་བྷཱ་སཾ ཝི་སྶ་ཛྫེ་ཏྭཱ ཏ་སྶ བྷི་ཀྑུ་ནོ ཨ་བྷི་མུ་ཁེ ནི་སི་ནྣོ ཝི་ཡ པ་ཉྙཱ་ཡ་མཱ་ནོ ཨི་མཾ ཨོ་བྷཱ་ས་གཱ་ཐ་མཱ་ཧ –

༣༡. ‘‘ཨ་པྤ་མཱ་ད་ར་ཏོ བྷི་ཀྑུ, པ་མཱ་དེ བྷ་ཡ་ད་སྶི ཝཱ;

སཾ་ཡོ་ཛ་ནཾ ཨ་ཎུཾ ཐཱུ་ལཾ, ཌ་ཧཾ ཨ་གྒཱི་ཝ ག་ཙྪ་ཏཱི’’ཏི.

ཏ་ཏྠ ཨ་པྤ་མཱ་ད་ར་ཏོཏི ཨ་པྤ་མཱ་དེ ར་ཏོ ཨ་བྷི་ར་ཏོ, ཨ་པྤ་མཱ་དེ་ན ཝཱི་ཏི་ནཱ་མེ་ནྟོ་ཏི ཨ་ཏྠོ. པ་མཱ་དེ བྷ་ཡ་ད་སྶི ཝཱཏི ནི་ར་ཡུ་པྤ་ཏྟི་ཨཱ་དི་ཀཾ པ་མཱ་དེ བྷ་ཡཾ བྷ་ཡ་ཏོ པ་སྶ་ནྟོ, ཏཱ་སཾ ཝཱ ཨུ་པྤ་ཏྟཱི་ནཾ མཱུ་ལ་ཏྟཱ པ་མཱ་དཾ བྷ་ཡ་ཏོ པ་སྶ་ནྟོ. སཾ་ཡོ་ཛ་ནནྟི ཝ་ཊྚ་དུ་ཀྑེ་ན ས་དྡྷིཾ ཡོ་ཛ་ནཾ བ་ནྡྷ་ནཾ པ་ཛཱ་ནཾ ཝ་ཊྚེ ཨོ་སཱི་དཱ་པ་ན་ས་མ་ཏྠཾ ད་ས་ཝི་དྷཾ སཾ་ཡོ་ཛ་ནཾ. ཨ་ཎུཾ ཐཱུ་ལནྟི མ་ཧ་ནྟ་ཉྩ ཁུ་དྡ་ཀ་ཉྩ. ཌ་ཧཾ ཨ་གྒཱི་ཝ ག་ཙྪ་ཏཱིཏི ཡ་ཐཱ ཨ་ཡཾ ཨ་གྒཱི ཨེ་ཏཾ མ་ཧ་ནྟ་ཉྩ ཁུ་དྡ་ཀ་ཉྩ ཨུ་པཱ་དཱ་ནཾ ཌ་ཧ་ནྟོ་ཝ ག་ཙྪ་ཏི. ཨེ་ཝ་མེ་སོ ཨ་པྤ་མཱ་ད་ར་ཏོ བྷི་ཀྑུ ཨ་པྤ་མཱ་དཱ་དྷི་ག་ཏེ་ན ཉཱ་ཎ་གྒི་ནཱ ཨེ་ཏཾ སཾ་ཡོ་ཛ་ནཾ ཌ་ཧ་ནྟོ ཨ་བྷ་བྦུ་པྤ་ཏྟི་ཀཾ ཀ་རོ་ནྟོ ག་ཙྪ་ཏཱི་ཏི ཨ་ཏྠོ.

གཱ་ཐཱ་པ་རི་ཡོ་སཱ་ནེ སོ བྷི་ཀྑུ ཡ་ཐཱ་ནི་སི་ནྣོ་ཝ ས་བྦ་སཾ་ཡོ་ཛ་ནཱ་ནི ཛྷཱ་པེ་ཏྭཱ ས་ཧ པ་ཊི་ས་མྦྷི་དཱ་ཧི ཨ་ར་ཧ་ཏྟཾ པ་ཏྭཱ ཨཱ་ཀཱ་སེ་ནཱ་ག་ནྟྭཱ ཏ་ཐཱ་ག་ཏ་སྶ སུ་ཝ་ཎྞ་ཝ་ཎྞཾ ས་རཱི་རཾ ཐོ་མེ་ཏྭཱ ཝ་ཎྞེ་ཏྭཱ ཝ་ནྡ་མཱ་ནོ་ཝ པ་ཀྐཱ་མཱི་ཏི.

ཨ་ཉྙ་ཏ་ར་བྷི་ཀྑུ་ཝ་ཏྠུ ཨ་ཊྛ་མཾ.