སུ་མ་ནོ བུ་དྡྷོ

ཨེ་ཝཾ ད་ས་ས་ཧ་སྶི་ལོ་ཀ་དྷཱ་ཏུཾ ཨ་ནྡྷ་ཀཱ་རཾ ཀ་ཏྭཱ པ་རི་ནི་བྦུ་ཏ་སྶ ཏ་སྶ བྷ་ག་ཝ་ཏོ ཨ་པ་ར་བྷཱ་གེ སུ་མ་ནོ ནཱ་མ ས་ཏྠཱ ལོ་ཀེ ཨུ་ད་པཱ་དི. ཏ་སྶཱ་པི ཏ་ཡོ སཱ་ཝ་ཀ་ས་ནྣི་པཱ་ཏཱ. པ་ཋ་མ་ས་ནྣི་པཱ་ཏེ ཀོ་ཊི་ས་ཏ་ས་ཧ་སྶ་བྷི་ཀྑཱུ ཨ་ཧེ་སུཾ. དུ་ཏི་ཡེ ཀ་ཉྩ་ན་པ་བྦ་ཏ་མྷི ན་ཝུ་ཏི་ཀོ་ཊི་ས་ཧ་སྶཱ་ནི, ཏ་ཏི་ཡེ ཨ་སཱི་ཏི་ཀོ་ཊི་ས་ཧ་སྶཱ་ནི. ཏ་དཱ མ་ཧཱ་ས་ཏྟོ ཨ་ཏུ་ལོ ནཱ་མ ནཱ་ག་རཱ་ཛཱ ཨ་ཧོ་སི མ་ཧི་དྡྷི་ཀོ མ་ཧཱ་ནུ་བྷཱ་ཝོ. སོ ‘‘བུ་དྡྷོ ཨུ་པྤ་ནྣོ’’ཏི སུ་ཏྭཱ ཉཱ་ཏི་ས་ངྒྷ་པ་རི་ཝུ་ཏོ ནཱ་ག་བྷ་ཝ་ནཱ ནི་ཀྑ་མི་ཏྭཱ ཀོ་ཊི་ས་ཏ་ས་ཧ་སྶ་བྷི་ཀྑུ་པ་རི་ཝཱ་ར་སྶ ཏ་སྶ བྷ་ག་ཝ་ཏོ དི་བྦ་ཏཱུ་རི་ཡེ་ཧི ཨུ་པ་ཧཱ་རཾ ཀཱ་རེ་ཏྭཱ མ་ཧཱ་དཱ་ནཾ པ་ཝ་ཏྟེ་ཏྭཱ པ་ཙྩེ་ཀཾ དུ་སྶ་ཡུ་གཱ་ནི ད་ཏྭཱ ས་ར་ཎེ་སུ པ་ཏི་ཊྛཱ་སི. སོ་པི ནཾ ས་ཏྠཱ ‘‘ཨ་ནཱ་ག་ཏེ བུ་དྡྷོ བྷ་ཝི་སྶ་ཏཱི’’ཏི བྱཱ་ཀཱ་སི. ཏ་སྶ བྷ་ག་ཝ་ཏོ ན་ག་རཾ མེ་ཁ་ལཾ ནཱ་མ ཨ་ཧོ་སི, སུ་ད་ཏྟོ ནཱ་མ རཱ་ཛཱ པི་ཏཱ, སི་རི་མཱ ནཱ་མ མཱ་ཏཱ དེ་ཝཱི, ས་ར་ཎོ ཙ བྷཱ་ཝི་ཏ་ཏྟོ ཙ དྭེ ཨ་གྒ་སཱ་ཝ་ཀཱ, ཨུ་དེ་ནོ ནཱ་མུ་པ་ཊྛཱ་ཀོ, སོ་ཎཱ ཙ ཨུ་པ་སོ་ཎཱ ཙ དྭེ ཨ་གྒ་སཱ་ཝི་ཀཱ, ནཱ་ག་རུ་ཀྑོ བོ་དྷི, ན་ཝུ་ཏི་ཧ་ཏྠུ་བྦེ་དྷཾ ས་རཱི་རཾ ཨ་ཧོ་སི, ན་ཝུ་ཏི་ཡེ་ཝ ཝ་སྶ་ས་ཧ་སྶཱ་ནི ཨཱ་ཡུ་པྤ་མཱ་ཎཾ ཨ་ཧོ་སི.

‘‘མ་ངྒ་ལ་སྶ ཨ་པ་རེ་ན, སུ་མ་ནོ ནཱ་མ ནཱ་ཡ་ཀོ;

ས་བྦ་དྷ་མྨེ་ཧི ཨ་ས་མོ, ས་བྦ་ས་ཏྟཱ་ན་མུ་ཏྟ་མོ’’ཏི. (བུ. ཝཾ. ༦.༡);