༡. ནཱ་ག་ས་མཱ་ལ་ཏྠེ་ར་ཨ་པ་དཱ་ན་ཝ་ཎྞ་ནཱ

ཨཱ་པཱ་ཊ་ལིཾ ཨ་ཧཾ པུ་པྥནྟི་ཨཱ་དི་ཀཾ ཨཱ་ཡ་སྨ་ཏོ ནཱ་ག་ས་མཱ་ལ་ཏྠེ་ར་སྶ ཨ་པ་དཱ་ནཾ. ཨ་ཡ་མྤི པུ་རི་མ་བུ་དྡྷེ་སུ ཀ་ཏཱ་དྷི་ཀཱ་རོ ཏ་ཏྠ ཏ་ཏྠ བྷ་ཝེ ཝི་ཝ་ཊྚཱུ་པ་ནི་སྶ་ཡཱ་ནི པུ་ཉྙཱ་ནི ཨུ་པ་ཙི་ན་ནྟོ སི་ཁི་སྶ བྷ་ག་ཝ་ཏོ ཀཱ་ལེ ཨེ་ཀ་སྨིཾ ཀུ་ལ་གེ་ཧེ ནི་བྦ་ཏྟོ ཝི་ཉྙུ་ཏཾ པ་ཏྟོ གྷ་རཱ་ཝཱ་སཾ ས་ཎྛ་པེ་ཏྭཱ ཏ་ཐཱ་རཱུ་པ་ས་ཛྫ་ན་སཾ་ས་གྒ་སྶ ཨ་ལཱ་བྷེ་ན ས་ཏྠ་རི དྷ་ར་མཱ་ན་ཀཱ་ལེ ད་སྶ་ན་ས་ཝ་ན་པཱུ་ཛཱ་ཀ་མྨ་མ་ཀ་རི་ཏྭཱ པ་རི་ནི་བྦུ་ཏ་ཀཱ་ལེ ཏ་སྶ བྷ་ག་ཝ་ཏོ སཱ་རཱི་རི་ཀ་དྷཱ་ཏུཾ ནི་ད་ཧི་ཏྭཱ ཀ་ཏ་ཙེ་ཏི་ཡ་མྷི ཙི་ཏྟཾ པ་སཱ་དེ་ཏྭཱ པཱ་ཊ་ལི་པུ་པྥཾ པཱུ་ཛེ་ཏྭཱ སོ་མ་ན་སྶཾ ཨུ་པྤཱ་དེ་ཏྭཱ ཡཱ་ཝ་ཏཱ་ཡུ་ཀཾ ཋ་ཏྭཱ ཏེ་ནེ་ཝ སོ་མ་ན་སྶེ་ན ཏ་ཏོ ཀཱ་ལཾ ཀ་ཏོ ཏུ་སི་ཏཱ་དཱི་སུ ཚ་སུ དེ་ཝ་ལོ་ཀེ་སུ སུ་ཁ་མ་ནུ་བྷ་ཝི་ཏྭཱ ཨ་པ་ར་བྷཱ་གེ མ་ནུ་སྶེ་སུ མ་ནུ་སྶ་ས་མྤ་ཏྟིཾ ཨ་ནུ་བྷ་ཝི་ཏྭཱ ཨི་མ་སྨིཾ བུ་དྡྷུ་པྤཱ་དེ ཀུ་ལ་གེ་ཧེ ནི་བྦ་ཏྟོ ཝི་ཉྙུ་ཏཾ པ་ཏྟོ ནཱ་ག་རུ་ཀྑ་པ་ལླ་ཝ་ཀོ་མ་ལ༹་ས་དི་ས་ས་རཱི་ར་ཏྟཱ ནཱ་ག་ས་མཱ་ལོཏི མཱ་ཏཱ་པི་ཏཱུ་ཧི ཀ་ཏ་ནཱ་མ་དྷེ་ཡྻོ བྷ་ག་ཝ་ཏི པ་ས་ནྣོ པ་བྦ་ཛི་ཏྭཱ ན་ཙི་ར་སྶེ་ཝ ཨ་ར་ཧཱ ཨ་ཧོ་སི.

༡. སོ པ་ཙྪཱ ཨ་ཏྟ་ནོ པུ་བྦ་ཀ་མྨཾ ས་རི་ཏྭཱ སོ་མ་ན་སྶ་ཛཱ་ཏོ པུ་བྦ་ཙ་རི་ཏཱ་པ་དཱ་ནཾ པ་ཀཱ་སེ་ནྟོ ཨཱ་པཱ་ཊ་ལིཾ ཨ་ཧཾ པུ་པྥནྟི་ཨཱ་དི་མཱ་ཧ. ཏ་ཏྠ ཨཱ་པཱ་ཊ་ལིནྟི ཨཱ ས་མ་ནྟ་ཏོ, ཨཱ་ད་རེ་ན ཝཱ པཱ་ཊ་ལི་པུ་པྥཾ ག་ཧེ་ཏྭཱ ཨ་ཧཾ ཐཱུ་པ་མྷི ཨ་བྷི་རོ་པེ་སིཾ པཱུ་ཛེ་སི་ནྟི ཨ་ཏྠོ. ཨུ་ཛ྄ཛྷི་ཏཾ སུ་མ་ཧཱ་པ་ཐེཏི ས་བྦ་ན་ག་ར་ཝཱ་སཱི་ནཾ ཝ་ནྡ་ན་པཱུ་ཛ་ན་ཏྠཱ་ཡ མ་ཧཱ་པ་ཐེ ན་ག་ར་མ་ཛ྄ཛྷེ ཝཱི་ཐི་ཡཾ ཨུ་ཛ྄ཛྷི་ཏཾ ཨུ་ཊྛཱ་པི་ཏཾ, ཨི་ཊྛ་ཀ་ཀ་མྨ་སུ་དྷཱ་ཀ་མྨཱ་དཱི་ཧི ནི་པྥཱ་དི་ཏ་ནྟི ཨ་ཏྠོ. སེ་སཾ ཧེ་ཊྛཱ ཝུ་ཏྟ་ན་ཡ་ཏྟཱ ཨུ་ཏྟཱ་ན་ཏྠ་ཏྟཱ ཙ སུ་ཝི་ཉྙེ་ཡྻ་མེ་ཝཱ་ཏི.

ནཱ་ག་ས་མཱ་ལ་ཏྠེ་ར་ཨ་པ་དཱ་ན་ཝ་ཎྞ་ནཱ ས་མ་ཏྟཱ.