༥. བྷི་ས་དཱ་ཡ་ཀ་ཏྠེ་ར་ཨ་པ་དཱ་ན་ཝ་ཎྞ་ནཱ

ཝེ་སྶ་བྷཱུ ནཱ་མ ནཱ་མེ་ནཱཏི་ཨཱ་དི་ཀཾ ཨཱ་ཡ་སྨ་ཏོ བྷི་ས་དཱ་ཡ་ཀ་ཏྠེ་ར་སྶ ཨ་པ་དཱ་ནཾ. ཨ་ཡ་མྤི པུ་རི་མ་བུ་དྡྷེ་སུ ཀ་ཏཱ་དྷི་ཀཱ་རོ ཏ་ཏྠ ཏ་ཏྠ བྷ་ཝེ ཝི་ཝ་ཊྚཱུ་པ་ནི་སྶ་ཡཱ་ནི པུ་ཉྙཱ་ནི ཨུ་པ་ཙི་ན་ནྟོ ཝེ་སྶ་བྷུ་སྶ བྷ་ག་ཝ་ཏོ ཀཱ་ལེ ཧི་མ་ཝ་ནྟ་སྨིཾ ཧ་ཏྠི་ཡོ་ནི་ཡཾ ནི་བྦ་ཏྟོ ཏ་སྨིཾ པ་ཊི་ཝ་ས་ཏི. ཏ་སྨིཾ ས་མ་ཡེ ཝེ་སྶ་བྷཱུ བྷ་ག་ཝཱ ཝི་ཝེ་ཀ་ཀཱ་མོ ཧི་མ་ཝ་ནྟ་མ་ག་མཱ་སི. ཏཾ དི་སྭཱ སོ ཧ་ཏྠི་ནཱ་གོ པ་ས་ནྣ་མཱ་ན་སོ བྷི་ས་མུ་ལཱ༹་ལཾ ག་ཧེ་ཏྭཱ བྷ་ག་ཝ་ནྟཾ བྷོ་ཛེ་སི. སོ ཏེ་ན པུ་ཉྙ་ཀ་མྨེ་ན ཧ་ཏྠི་ཡོ་ནི་ཏོ ཙུ་ཏོ དེ་ཝ་ལོ་ཀེ ཨུ་པྤ་ཛྫི་ཏྭཱ ཏ་ཏྠ ཚ ཀཱ་མཱ་ཝ་ཙ་ར་ས་མྤ་ཏྟི་ཡོ ཨ་ནུ་བྷ་ཝི་ཏྭཱ མ་ནུ་སྶ་ཏྟ་མཱ་ག་ཏོ མ་ནུ་སྶེ་སུ ཙ་ཀྐ་ཝ་ཏྟི་ས་མྤ་ཏྟི་ཨཱ་ད་ཡོ ཨ་ནུ་བྷ་ཝི་ཏྭཱ ཨི་མ་སྨིཾ བུ་དྡྷུ་པྤཱ་དེ མ་ཧཱ་བྷོ་གེ ཨ་ཉྙ་ཏ་ར་སྨིཾ ཀུ་ལེ ནི་བྦ་ཏྟོ པུ་བྦ་ཝཱ་ས་ནཱ་བ་ལེ་ན ས་ཏྠ་རི པ་ས་ནྣོ པ་བྦ་ཛི་ཏྭཱ ན་ཙི་ར་སྶེ་ཝ ཨ་ར་ཧཱ ཨ་ཧོ་སི, སོ པུ་བྦེ ཀ་ཏ་ཀུ་ས་ལ་ནཱ་མེ་ན བྷི་ས་དཱ་ཡ་ཀ་ཏྠེ་རོཏི པཱ་ཀ་ཊོ.

༢༩. སོ ཨ་ཏྟ་ནོ པུ་བྦ་ཀ་མྨཾ ས་རི་ཏྭཱ པུ་བྦ་ཙ་རི་ཏཱ་པ་དཱ་ནཾ ད་སྶེ་ནྟོ ཝེ་སྶ་བྷཱུ ནཱ་མ ནཱ་མེ་ནཱཏི་ཨཱ་དི་མཱ་ཧ. ཏ་ཏྠ ཝེ་སྶ་བྷཱུཏི ཝེ་སྶཾ བྷུ་ནཱ་ཏི ཨ་ཏི་ཀྐ་མ་ཏཱི་ཏི ཝེ་སྶ་བྷཱུ. ཨ་ཐ ཝཱ ཝེ་སྶེ ཝཱ་ཎི་ཛ་ཀ་མྨེ ཝཱ ཀཱ་མ་རཱ་གཱ་དི་ཀེ ཝཱ ཀུ་ས་ལཱ་དི་ཀ་མྨེ ཝཱ ཝ་ཏྠུ་ཀཱ་མ་ཀི་ལེ་ས་ཀཱ་མེ ཝཱ བྷུ་ནཱ་ཏི ཨ་བྷི་བྷ་ཝ་ཏཱི་ཏི ཝེ་སྶ་བྷཱུ, སོ ནཱ་མེ་ན ཝེ་སྶ་བྷཱུ ནཱ་མ བྷ་ག་ཝཱ. ཨི་སཱི་ནཾ ཏ་ཏི་ཡོ ཨ་ཧཱུཏི ཀུ་ས་ལ་དྷ་མྨེ ཨེ་ས་ཏི ག་ཝེ་ས་ཏཱི་ཏི ཨི་སི, ‘‘ཝི་པ་སྶཱི, སི་ཁཱི, ཝེ་སྶ་བྷཱུ’’ཏི ཝུ་ཏྟ་ཏྟཱ ཏ་ཏི་ཡོ ཨི་སི ཏ་ཏི་ཡོ བྷ་ག་ཝཱ ཨ་ཧུ ཨ་ཧོ་སཱི་ཏི ཨ་ཏྠོ. ཀཱ་ན་ནཾ ཝ་ན་མོ་གྒ་ཡ྄ཧཱཏི ཀཱ་ན་ན་ས་ངྑཱ་ཏཾ ཝ་ནཾ ཨོ་ག་ཡ྄ཧ ཨོ་ག་ཧེ་ཏྭཱ པཱ་ཝི་སཱི་ཏི ཨ་ཏྠོ.

༣༠. བྷི་ས་མུ་ལཱ༹་ལཾ ག་ཎྷི་ཏྭཱཏི དྭི་པ་ད་ཙ་ཏུ་པྤ་དཱ་ནཾ ཚཱ་ཏ་ཀཾ བྷི་ས་ཏི ཧིཾ་ས་ཏི ཝི་ནཱ་སེ་ཏཱི་ཏི བྷི་སཾ, ཀོ སོ? པ་དུ་མ་ཀ་ནྡོ, བྷི་ས་ཉྩ མུ་ལཱ༹་ལ་ཉྩ བྷི་ས་མུ་ལཱ༹་ལཾ, ཏཾ བྷི་ས་མུ་ལཱ༹་ལཾ ག་ཧེ་ཏྭཱ་ཏི ཨ་ཏྠོ.

༣༡. ཀ་རེ་ན ཙ པ་རཱ་མ་ཊྛོཏི ཏཾ མ་ཡཱ དི་ནྣ་དཱ་ནཾ, ཝེ་སྶ་བྷཱུ་ཝ་ར་བུ་དྡྷི་ནཱ ཨུ་ཏྟ་མ་བུ་དྡྷི་ནཱ ཝེ་སྶ་བྷུ་ནཱ ཀ་རེ་ན ཧ་ཏྠ་ཏ་ལེ་ན པ་རཱ་མ་ཊྛོ ཀ་ཏ་ས་མྥ་སྶོ ཨ་ཧོ་སི. སུ་ཁཱ་ཧཾ ནཱ་བྷི་ཛཱ་ནཱ་མི, ས་མཾ ཏེ་ན ཀུ་ཏོ་ཏྟ་རིནྟི ཏེ་ན སུ་ཁེ་ན ས་མཾ སུ་ཁཾ ནཱ་བྷི་ཛཱ་ནཱ་མི, ཏ་ཏོ ཨུ་ཏྟ་རིཾ ཏ་ཏོ པ་རཾ ཏ་ཏོ ཨ་དྷི་ཀཾ སུ་ཁཾ ཀུ་ཏོ་ཏི ཨ་ཏྠོ. སེ་སཾ ན་ཡཱ་ནུ་སཱ་རེ་ན སུ་ཝི་ཉྙེ་ཡྻ་ནྟི.

བྷི་ས་དཱ་ཡ་ཀ་ཏྠེ་ར་ཨ་པ་དཱ་ན་ཝ་ཎྞ་ནཱ ས་མ་ཏྟཱ.