༡༠. པ་དུ་མ་པཱུ་ཛ་ཀ་ཏྠེ་ར་ཨ་པ་དཱ་ན་ཝ་ཎྞ་ནཱ

ཧི་མ་ཝ་ནྟ་སྶཱ་ཝི་དཱུ་རེཏི་ཨཱ་དི་ཀཾ ཨཱ་ཡ་སྨ་ཏོ པ་དུ་མ་པཱུ་ཛ་ཀ་ཏྠེ་ར་སྶ ཨ་པ་དཱ་ནཾ. ཨ་ཡ་མྤི པུ་རི་མ་བུ་དྡྷེ་སུ ཀ་ཏཱ་དྷི་ཀཱ་རོ ཏ་ཏྠ ཏ་ཏྠ བྷ་ཝེ ཝི་ཝ་ཊྚཱུ་པ་ནི་སྶ་ཡཱ་ནི པུ་ཉྙཱ་ནི ཨུ་པ་ཙི་ན་ནྟོ པ་དུ་མུ་ཏྟ་ར་སྶ བྷ་ག་ཝ་ཏོ ཀཱ་ལེ བྲཱ་ཧྨ་ཎ་ཀུ་ལེ ནི་བྦ་ཏྟོ ཝི་ཉྙུ་ཏཾ པ་ཏྭཱ ས་ཀ་སི་པྤེ ནི་པྥ་ཏྟིཾ པ་ཏྭཱ ཏ་ཏྠ སཱ་རཾ ཨ་པ་སྶ་ནྟོ བུ་དྡྷུ་པྤ་ཏྟི་ཏོ པུ་རེ་ཏ་རཾ ཨུ་པྤ་ནྣ་ཏྟཱ ཨོ་ཝཱ་དཱ་ནུ་སཱ་ས་ནཾ ཨ་ལ་བྷི་ཏྭཱ གྷ་རཱ་ཝཱ་སཾ པ་ཧཱ་ཡ ཨི་སི་པ་བྦ་ཛྫཾ པ་བྦ་ཛི་ཏྭཱ ཧི་མ་ཝ་ནྟ་སྶ ཨ་ཝི་དཱུ་རེ གོ་ཏ་མ་ཀཾ ནཱ་མ པ་བྦ་ཏཾ ནི་སྶཱ་ཡ ཨ་སྶ་མཾ ཀཱ་རེ་ཏྭཱ པ་ཉྩཱ་བྷི་ཉྙཱ ཨ་ཊྛ ས་མཱ་པ་ཏྟི་ཡོ ནི་བྦ་ཏྟེ་ཏྭཱ ཛྷཱ་ན་སུ་ཁེ་ནེ་ཝ ཝི་ཧཱ་སི. ཏ་དཱ པ་དུ་མུ་ཏྟ་རོ བྷ་ག་ཝཱ བུ་དྡྷོ ཧུ་ཏྭཱ ས་ཏྟེ སཾ་སཱ་ར་ཏོ ཨུ་དྡྷ་ར་ནྟོ ཏ་སྶཱ་ནུ་ཀ་མྤཱ་ཡ ཧི་མ་ཝ་ནྟཾ ཨ་ག་མཱ་སི. ཏཱ་པ་སོ བྷ་ག་ཝ་ནྟཾ དི་སྭཱ པ་ས་ནྣ་མཱ་ན་སོ ས་ཀ་སི་སྶེ ས་མཱ་ནེ་ཏྭཱ ཏེ་ཧི པ་དུ་མ་པུ་པྥཱ་ནི ཨཱ་ཧ་རཱ་པེ་ཏྭཱ པཱུ་ཛེ་སི. སོ ཏེ་ན པུ་ཉྙེ་ན དེ་ཝ་མ་ནུ་སྶེ་སུ སཾ་ས་ར་ནྟོ ཨུ་བྷ་ཡ་ས་མྤ་ཏྟི་ཡོ ཨ་ནུ་བྷ་ཝི་ཏྭཱ ཨི་མ་སྨིཾ བུ་དྡྷུ་པྤཱ་དེ སཱ་ཝ་ཏྠི་ཡཾ ཀུ་ལ་གེ་ཧེ ནི་བྦ་ཏྟོ ས་དྡྷོ པ་ས་ནྣོ པ་བྦ་ཛི་ཏྭཱ ན་ཙི་ར་སྶེ་ཝ ཨ་ར་ཧཱ ཨ་ཧོ་སི.

༩༧. སོ ཨ་ཏྟ་ནོ པུ་ཉྙ་ཀ་མྨཾ ས་རི་ཏྭཱ སོ་མ་ན་སྶ་ཛཱ་ཏོ པུ་བྦ་ཙ་རི་ཏཱ་པ་དཱ་ནཾ པ་ཀཱ་སེ་ནྟོ ཧི་མ་ཝ་ནྟ་སྶཱ་ཝི་དཱུ་རེཏི་ཨཱ་དི་མཱ་ཧ. གོ་ཏ་མོ ནཱ་མ པ་བྦ་ཏོཏི ཨ་ནེ་ཀེ་སཾ ཡ་ཀྑ་དེ་ཝ་ཏཱ་ནཾ ཨཱ་ཝཱ་ས་བྷཱ་ཝེ་ན ཨ་དྷི་ཊྛཱ་ན་ཝ་སེ་ན གོ་ཏ་མ་སྶ བྷ་ཝ་ན་ཏྟཱ གོ་ཏ་མོ་ཏི པཱ་ཀ་ཊོ ཨ་ཧོ་སི. པ་ཝ་ཏྟ་ཏི ཏི་ཊྛ་ཏཱི་ཏི པ་བྦ་ཏོ. ནཱ་ག་རུ་ཀྑེ་ཧི ས་ཉྪ་ནྣོཏི རུ་ཧ་ཏི ཏི་ཊྛ་ཏཱི་ཏི རུ་ཀྑོ. ཨ་ཐ ཝཱ པ་ཐ་ཝིཾ ཁ་ན་ནྟོ ཨུ་དྡྷཾ རུ་ཧ་ཏཱི་ཏི རུ་ཀྑོ, ནཱ་ནཱ ཨ་ནེ་ཀ་པྤ་ཀཱ་རཱ ཙ་མྤ་ཀ་ཀ་པྤཱུ་ར་ནཱ་ག་ཨ་ག་རུ་ཙ་ནྡ་ནཱ་ད་ཡོ རུ་ཀྑཱ་ཏི ནཱ་ནཱ་རུ་ཀྑཱ, ཏེ་ཧི ནཱ་ནཱ་རུ་ཀྑེ་ཧི ས་ཉྪ་ནྣོ པ་རི་ཀི་ཎྞོ གོ་ཏ་མོ པ་བྦ་ཏོ་ཏི ས་མྦ་ནྡྷོ. མ་ཧཱ་བྷཱུ་ཏ་ག་ཎཱ་ལ་ཡོཏི བྷ་ཝ་ནྟི ཛཱ་ཡ་ནྟི ཨུ་པྤ་ཛྫ་ནྟི ཝ་ཌྜྷ་ནྟི ཙཱ་ཏི བྷཱུ་ཏཱ, མ་ཧ་ནྟཱ ཙ ཏེ བྷཱུ་ཏཱ ཙཱ་ཏི མ་ཧཱ་བྷཱུ་ཏཱ, མ་ཧཱ་བྷཱུ་ཏཱ་ནཾ ག་ཎོ ས་མཱུ་ཧོ་ཏི མ་ཧཱ་བྷཱུ་ཏ་ག་ཎོ, མ་ཧཱ་བྷཱུ་ཏ་ག་ཎ་སྶ ཨཱ་ལ་ཡོ པ་ཏི་ཊྛཱ་ཏི མ་ཧཱ་བྷཱུ་ཏ་ག་ཎཱ་ལ་ཡོ.

༩༨. ཝེ་མ་ཛ྄ཛྷ་མྷི ཙ ཏ་སྶཱ་སཱིཏི ཏ་སྶ གོ་ཏ་མ་སྶ པ་བྦ་ཏ་སྶ ཝེ་མ་ཛ྄ཛྷེ ཨ་བྦྷ་ནྟ་རེ ཨ་སྶ་མོ ཨ་བྷི་ནི་མྨི་ཏོ ནི་པྥཱ་དི་ཏོ ཀ་ཏོ་ཏི ཨ་ཏྠོ. སེ་སཾ ཨུ་ཏྟཱ་ན་མེ་ཝཱ་ཏི.

པ་དུ་མ་པཱུ་ཛ་ཀ་ཏྠེ་ར་ཨ་པ་དཱ་ན་ཝ་ཎྞ་ནཱ ས་མ་ཏྟཱ.

ཏེ་ར་ས་མ་ཝ་གྒ་ཝ་ཎྞ་ནཱ ས་མ་ཏྟཱ.