ཨ་ནོ་མ་ད་སྶཱི བུ་དྡྷོ

ཏ་སྶ ཨ་པ་ར་བྷཱ་གེ ཨེ་ཀཾ ཨ་ས་ངྑ་ཡེ་ཡྻཾ ཨ་ཏི་ཀྐ་མི་ཏྭཱ ཨེ་ཀ་སྨིཾ ཀ་པྤེ ཏ་ཡོ བུ་དྡྷཱ ནི་བྦ་ཏྟིཾ་སུ ཨ་ནོ་མ་ད་སྶཱི, པ་དུ་མོ, ནཱ་ར་དོཏི. ཨ་ནོ་མ་ད་སྶི་སྶ བྷ་ག་ཝ་ཏོ ཏ་ཡོ སཱ་ཝ་ཀ་ས་ནྣི་པཱ་ཏཱ. པ་ཋ་མེ ཨ་ཊྛ བྷི་ཀྑུ་ས་ཏ་ས་ཧ་སྶཱ་ནི ཨ་ཧེ་སུཾ, དུ་ཏི་ཡེ ས་ཏྟ, ཏ་ཏི་ཡེ ཚ. ཏ་དཱ བོ་དྷི་ས་ཏྟོ ཨེ་ཀོ ཡ་ཀྑ་སེ་ནཱ་པ་ཏི ཨ་ཧོ་སི མ་ཧི་དྡྷི་ཀོ མ་ཧཱ་ནུ་བྷཱ་ཝོ, ཨ་ནེ་ཀ་ཀོ་ཊི་ས་ཏ་ས་ཧ་སྶཱ་ནཾ ཡ་ཀྑཱ་ནཾ ཨ་དྷི་པ་ཏི. སོ ‘‘བུ་དྡྷོ ཨུ་པྤ་ནྣོ’’ཏི སུ་ཏྭཱ ཨཱ་ག་ནྟྭཱ བུ་དྡྷ་པྤ་མུ་ཁ་སྶ བྷི་ཀྑུ་ས་ངྒྷ་སྶ མ་ཧཱ་དཱ་ནཾ ཨ་དཱ་སི. སོ་པི ནཾ ས་ཏྠཱ ‘‘ཨ་ནཱ་ག་ཏེ བུ་དྡྷོ བྷ་ཝི་སྶ་ཏཱི’’ཏི བྱཱ་ཀཱ་སི. ཨ་ནོ་མ་ད་སྶི་སྶ པ་ན བྷ་ག་ཝ་ཏོ ཙ་ནྡ་ཝ་ཏཱི ནཱ་མ ན་ག་རཾ ཨ་ཧོ་སི, ཡ་ས་ཝཱ ནཱ་མ རཱ་ཛཱ པི་ཏཱ, ཡ་སོ་དྷ་རཱ ནཱ་མ མཱ་ཏཱ དེ་ཝཱི, ནི་ས་བྷོ ཙ ཨ་ནོ་མོ ཙ དྭེ ཨ་གྒ་སཱ་ཝ་ཀཱ, ཝ་རུ་ཎོ ནཱ་མུ་པ་ཊྛཱ་ཀོ, སུ་ནྡ་རཱི ཙ སུ་མ་ནཱ ཙ དྭེ ཨ་གྒ་སཱ་ཝི་ཀཱ, ཨ་ཛྫུ་ན་རུ་ཀྑོ བོ་དྷི, ཨ་ཊྛ་པ་ཉྙཱ་ས་ཧ་ཏྠུ་བྦེ་དྷཾ ས་རཱི་རཾ ཨ་ཧོ་སི, ཝ་སྶ་ས་ཏ་ས་ཧ་སྶཾ ཨཱ་ཡུ་པྤ་མཱ་ཎ་ནྟི.

‘‘སོ་བྷི་ཏ་སྶ ཨ་པ་རེ་ན, ས་མྦུ་དྡྷོ དྭི་པ་དུ་ཏྟ་མོ;

ཨ་ནོ་མ་ད་སྶཱི ཨ་མི་ཏ་ཡ་སོ, ཏེ་ཛ་སྶཱི དུ་ར་ཏི་ཀྐ་མོ’’ཏི. (བུ. ཝཾ. ༩.༡);