༨-༩. ཨ་ནུ་ཏྟ་རི་ཡ་སུ་ཏྟཱ་དི་ཝ་ཎྞ་ནཱ

༨-༩. ཨ་ཊྛ་མེ ཨ་ནུ་ཏྟ་རི་ཡཱ་ནཱིཏི ཨ་ཉྙེ་ན ཨུ་ཏྟ་རི་ཏ་རེ་ན ར་ཧི་ཏཱ་ནི ནི་རུ་ཏྟ་རཱ་ནི. ད་སྶ་ནཱ་ནུ་ཏྟ་རི་ཡནྟི རཱུ་པ་ད་སྶ་ནེ་སུ ཨ་ནུ་ཏྟ་རཾ. ཨེ་ས ན་ཡོ ས་བྦ་པ་དེ་སུ. ཧ་ཏྠི་ར་ཏ་ནཱ་དཱི་ན་ཉྷི ད་སྶ་ནཾ ན ད་སྶ་ནཱ་ནུ་ཏྟ་རི་ཡཾ, ནི་ཝི་ཊྛ་ས་དྡྷ་སྶ པ་ན ནི་ཝི་ཊྛ་པེ་མ་ཝ་སེ་ན ད་ས་བ་ལ་སྶ ཝཱ བྷི་ཀྑུ་ས་ངྒྷ་སྶ ཝཱ ཀ་སི་ཎ་ཨ་སུ་བྷ་ནི་མི་ཏྟཱ་དཱི་ནཾ ཝཱ ཨ་ཉྙ་ཏ་ར་སྶ ད་སྶ་ནཾ ད་སྶ་ནཱ་ནུ་ཏྟ་རི་ཡཾ ནཱ་མ. ཁ་ཏྟི་ཡཱ་དཱི་ནཾ གུ་ཎ་ཀ་ཐཱ་ས་ཝ་ནཾ ན ས་ཝ་ནཱ་ནུ་ཏྟ་རི་ཡཾ, ནི་ཝི་ཊྛ་ས་དྡྷ་སྶ པ་ན ནི་ཝི་ཊྛ་པེ་མ་ཝ་སེ་ན ཏི་ཎྞཾ ཝཱ ར་ཏ་ནཱ་ནཾ གུ་ཎ་ཀ་ཐཱ་ས་ཝ་ནཾ ཏེ་པི་ཊ་ཀ་བུ་དྡྷ་ཝ་ཙ་ན་ས་ཝ་ནཾ ཝཱ ས་ཝ་ནཱ་ནུ་ཏྟ་རི་ཡཾ ནཱ་མ. མ་ཎི་ར་ཏ་ནཱ་དཱི་ནཾ ལཱ་བྷོ ན ལཱ་བྷཱ་ནུ་ཏྟ་རི་ཡཾ, ས་ཏྟ་ཝི་དྷ་ཨ་རི་ཡ་དྷ་ན་ལཱ་བྷོ པ་ན ལཱ་བྷཱ་ནུ་ཏྟ་རི་ཡཾ ནཱ་མ. ཧ་ཏྠི་སི་པྤཱ་དི་སི་ཀྑ་ནཾ ན སི་ཀྑཱ་ནུ་ཏྟ་རི་ཡཾ, སི་ཀྑཱ་ཏྟ་ཡ་སྶ པཱུ་ར་ཎཾ པ་ན སི་ཀྑཱ་ནུ་ཏྟ་རི་ཡཾ ནཱ་མ. ཁ་ཏྟི་ཡཱ་དཱི་ནཾ པཱ་རི་ཙ་རི་ཡཱ ན པཱ་རི་ཙ་རི་ཡཱ་ནུ་ཏྟ་རི་ཡཾ, ཏི་ཎྞཾ པ་ན ར་ཏ་ནཱ་ནཾ པཱ་རི་ཙ་རི་ཡཱ པཱ་རི་ཙ་རི་ཡཱ་ནུ་ཏྟ་རི་ཡཾ ནཱ་མ. ཁ་ཏྟི་ཡཱ་དཱི་ནཾ གུ་ཎཱ་ནུ་སྶ་ར་ཎཾ ན ཨ་ནུ་སྶ་ཏཱ་ནུ་ཏྟ་རི་ཡཾ, ཏི་ཎྞཾ པ་ན ར་ཏ་ནཱ་ནཾ གུ་ཎཱ་ནུ་སྶ་ར་ཎཾ ཨ་ནུ་སྶ་ཏཱ་ནུ་ཏྟ་རི་ཡཾ ནཱ་མ. ཨི་ཏི ཨི་མཱ་ནི ཚ ཨ་ནུ་ཏྟ་རི་ཡཱ་ནི ལོ་ཀི་ཡ་ལོ་ཀུ་ཏྟ་རཱ་ནི ཀ་ཐི་ཏཱ་ནི. ན་ཝ་མེ བུ་དྡྷཱ་ནུ་སྶ་ཏཱིཏི བུ་དྡྷ་གུ་ཎཱ་ར་མྨ་ཎཱ ས་ཏི. སེ་ས་པ་དེ་སུ་པི ཨེ་སེ་ཝ ན་ཡོ.