༡. སུ་ཏྟ་ནྟ་བྷཱ་ཛ་ནཱི་ཡཾ
༤༦༦. ས་ཏྟ བོ་ཛ྄ཛྷ་ངྒཱ – ས་ཏི་ས་མྦོ་ཛ྄ཛྷ་ངྒོ, དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒོ, ཝཱི་རི་ཡ་ས་མྦོ་ཛ྄ཛྷ་ངྒོ, པཱི་ཏི་ས་མྦོ་ཛ྄ཛྷ་ངྒོ, པ་སྶ་དྡྷི་ས་མྦོ་ཛ྄ཛྷ་ངྒོ, ས་མཱ་དྷི་ས་མྦོ་ཛ྄ཛྷ་ངྒོ, ཨུ་པེ་ཀྑཱ་ས་མྦོ་ཛ྄ཛྷ་ངྒོ.
༤༦༧. ཏ་ཏྠ ཀ་ཏ་མོ ས་ཏི་ས་མྦོ་ཛ྄ཛྷ་ངྒོ? ཨི་དྷ བྷི་ཀྑུ ས་ཏི་མཱ ཧོ་ཏི པ་ར་མེ་ན ས་ཏི་ནེ་པ་ཀྐེ་ན ས་མ་ནྣཱ་ག་ཏོ, ཙི་ར་ཀ་ཏ་མྤི ཙི་ར་བྷཱ་སི་ཏ་མྤི ས་རི་ཏཱ ཧོ་ཏི ཨ་ནུ་སྶ་རི་ཏཱ – ཨ་ཡཾ ཝུ་ཙྩ་ཏི ‘‘ས་ཏི་ས་མྦོ་ཛ྄ཛྷ་ངྒོ’’.
སོ ཏ་ཐཱ ས་ཏོ ཝི་ཧ་ར་ནྟོ ཏཾ དྷ་མྨཾ པ་ཉྙཱ་ཡ པ་ཝི་ཙི་ན་ཏི པ་ཝི་ཙ་ར་ཏི པ་རི་ཝཱི་མཾ་ས་མཱ་པ་ཛྫ་ཏི – ཨ་ཡཾ ཝུ་ཙྩ་ཏི ‘‘དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒོ’’.
ཏ་སྶ ཏཾ དྷ་མྨཾ པ་ཉྙཱ་ཡ པ་ཝི་ཙི་ན་ཏོ པ་ཝི་ཙ་ར་ཏོ པ་རི་ཝཱི་མཾ་ས་མཱ་པ་ཛྫ་ཏོ ཨཱ་ར་དྡྷཾ ཧོ་ཏི ཝཱི་རི་ཡཾ ཨ་ས་ལླཱི་ནཾ – ཨ་ཡཾ ཝུ་ཙྩ་ཏི ‘‘ཝཱི་རི་ཡ་ས་མྦོ་ཛ྄ཛྷ་ངྒོ’’.
ཨཱ་ར་དྡྷ་ཝཱི་རི་ཡ་སྶ ཨུ་པྤ་ཛྫ་ཏི པཱི་ཏི ནི་རཱ་མི་སཱ – ཨ་ཡཾ ཝུ་ཙྩ་ཏི ‘‘པཱི་ཏི་ས་མྦོ་ཛ྄ཛྷ་ངྒོ’’.
པཱི་ཏི་མ་ན་སྶ ཀཱ་ཡོ་པི པ་སྶ་མྦྷ་ཏི, ཙི་ཏྟ་མྤི པ་སྶ་མྦྷ་ཏི – ཨ་ཡཾ ཝུ་ཙྩ་ཏི ‘‘པ་སྶ་དྡྷི་ས་མྦོ་ཛ྄ཛྷ་ངྒོ’’.
པ་སྶ་དྡྷ་ཀཱ་ཡ་སྶ སུ་ཁི་ནོ ཙི་ཏྟཾ ས་མཱ་དྷི་ཡ་ཏི – ཨ་ཡཾ ཝུ་ཙྩ་ཏི ‘‘ས་མཱ་དྷི་ས་མྦོ་ཛ྄ཛྷ་ངྒོ’’.
སོ ཏ་ཐཱ ས་མཱ་ཧི་ཏཾ ཙི་ཏྟཾ སཱ་དྷུ་ཀཾ ཨ་ཛ྄ཛྷུ་པེ་ཀྑི་ཏཱ ཧོ་ཏི – ཨ་ཡཾ ཝུ་ཙྩ་ཏི ‘‘ཨུ་པེ་ཀྑཱ་ས་མྦོ་ཛ྄ཛྷ་ངྒོ’’.
༤༦༨. ས་ཏྟ བོ་ཛ྄ཛྷ་ངྒཱ – ས་ཏི་ས་མྦོ་ཛ྄ཛྷ་ངྒོ, དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒོ, ཝཱི་རི་ཡ་ས་མྦོ་ཛ྄ཛྷ་ངྒོ, པཱི་ཏི་ས་མྦོ་ཛ྄ཛྷ་ངྒོ, པ་སྶ་དྡྷི་ས་མྦོ་ཛ྄ཛྷ་ངྒོ, ས་མཱ་དྷི་ས་མྦོ་ཛ྄ཛྷ་ངྒོ, ཨུ་པེ་ཀྑཱ་ས་མྦོ་ཛ྄ཛྷ་ངྒོ.
༤༦༩. ཏ་ཏྠ ཀ་ཏ་མོ ས་ཏི་ས་མྦོ་ཛ྄ཛྷ་ངྒོ? ཨ་ཏྠི ཨ་ཛ྄ཛྷ་ཏྟཾ དྷ་མྨེ་སུ ས་ཏི, ཨ་ཏྠི བ་ཧི་དྡྷཱ དྷ་མྨེ་སུ ས་ཏི. ཡ་ད་པི ཨ་ཛ྄ཛྷ་ཏྟཾ དྷ་མྨེ་སུ ས་ཏི ཏ་ད་པི ས་ཏི་ས་མྦོ་ཛ྄ཛྷ་ངྒོ ཨ་བྷི་ཉྙཱ་ཡ ས་མྦོ་དྷཱ་ཡ ནི་བྦཱ་ནཱ་ཡ སཾ་ཝ་ཏྟ་ཏི. ཡ་ད་པི བ་ཧི་དྡྷཱ དྷ་མྨེ་སུ ས་ཏི ཏ་ད་པི ས་ཏི་ས་མྦོ་ཛ྄ཛྷ་ངྒོ ཨ་བྷི་ཉྙཱ་ཡ ས་མྦོ་དྷཱ་ཡ ནི་བྦཱ་ནཱ་ཡ སཾ་ཝ་ཏྟ་ཏི.
ཏ་ཏྠ ཀ་ཏ་མོ དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒོ? ཨ་ཏྠི ཨ་ཛ྄ཛྷ་ཏྟཾ དྷ་མྨེ་སུ པ་ཝི་ཙ་ཡོ, ཨ་ཏྠི བ་ཧི་དྡྷཱ དྷ་མྨེ་སུ པ་ཝི་ཙ་ཡོ. ཡ་ད་པི ཨ་ཛ྄ཛྷ་ཏྟཾ དྷ་མྨེ་སུ པ་ཝི་ཙ་ཡོ ཏ་ད་པི དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒོ ཨ་བྷི་ཉྙཱ་ཡ ས་མྦོ་དྷཱ་ཡ ནི་བྦཱ་ནཱ་ཡ སཾ་ཝ་ཏྟ་ཏི. ཡ་ད་པི བ་ཧི་དྡྷཱ དྷ་མྨེ་སུ པ་ཝི་ཙ་ཡོ ཏ་ད་པི དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒོ ཨ་བྷི་ཉྙཱ་ཡ ས་མྦོ་དྷཱ་ཡ ནི་བྦཱ་ནཱ་ཡ སཾ་ཝ་ཏྟ་ཏི.
ཏ་ཏྠ ཀ་ཏ་མོ ཝཱི་རི་ཡ་ས་མྦོ་ཛ྄ཛྷ་ངྒོ? ཨ་ཏྠི ཀཱ་ཡི་ཀཾ ཝཱི་རི་ཡཾ, ཨ་ཏྠི ཙེ་ཏ་སི་ཀཾ ཝཱི་རི་ཡཾ. ཡ་ད་པི ཀཱ་ཡི་ཀཾ ཝཱི་རི་ཡཾ ཏ་ད་པི ཝཱི་རི་ཡ་ས་མྦོ་ཛ྄ཛྷ་ངྒོ ཨ་བྷི་ཉྙཱ་ཡ ས་མྦོ་དྷཱ་ཡ ནི་བྦཱ་ནཱ་ཡ སཾ་ཝ་ཏྟ་ཏི. ཡ་ད་པི ཙེ་ཏ་སི་ཀཾ ཝཱི་རི་ཡཾ ཏ་ད་པི ཝཱི་རི་ཡ་ས་མྦོ་ཛ྄ཛྷ་ངྒོ ཨ་བྷི་ཉྙཱ་ཡ ས་མྦོ་དྷཱ་ཡ ནི་བྦཱ་ནཱ་ཡ སཾ་ཝ་ཏྟ་ཏི.
ཏ་ཏྠ ཀ་ཏ་མོ པཱི་ཏི་ས་མྦོ་ཛ྄ཛྷ་ངྒོ? ཨ་ཏྠི ས་ཝི་ཏ་ཀྐ་ས་ཝི་ཙཱ་རཱ པཱི་ཏི, ཨ་ཏྠི ཨ་ཝི་ཏ་ཀྐ་ཨ་ཝི་ཙཱ་རཱ པཱི་ཏི. ཡ་ད་པི ས་ཝི་ཏ་ཀྐ་ས་ཝི་ཙཱ་རཱ པཱི་ཏི ཏ་ད་པི པཱི་ཏི་ས་མྦོ་ཛ྄ཛྷ་ངྒོ ཨ་བྷི་ཉྙཱ་ཡ ས་མྦོ་དྷཱ་ཡ ནི་བྦཱ་ནཱ་ཡ སཾ་ཝ་ཏྟ་ཏི. ཡ་ད་པི ཨ་ཝི་ཏ་ཀྐ་ཨ་ཝི་ཙཱ་རཱ པཱི་ཏི ཏ་ད་པི པཱི་ཏི་ས་མྦོ་ཛ྄ཛྷ་ངྒོ ཨ་བྷི་ཉྙཱ་ཡ ས་མྦོ་དྷཱ་ཡ ནི་བྦཱ་ནཱ་ཡ སཾ་ཝ་ཏྟ་ཏི.
ཏ་ཏྠ ཀ་ཏ་མོ པ་སྶ་དྡྷི་ས་མྦོ་ཛ྄ཛྷ་ངྒོ? ཨ་ཏྠི ཀཱ་ཡ་པ་སྶ་དྡྷི [ཀཱ་ཡ་པྤ་སྶ་དྡྷི (སྱཱ. ཀ.)], ཨ་ཏྠི ཙི་ཏྟ་པ་སྶ་དྡྷི [ཙི་ཏྟ་པྤ་སྶ་དྡྷི (སྱཱ. ཀ.)]. ཡ་ད་པི ཀཱ་ཡ་པ་སྶ་དྡྷི ཏ་ད་པི པ་སྶ་དྡྷི་ས་མྦོ་ཛ྄ཛྷ་ངྒོ ཨ་བྷི་ཉྙཱ་ཡ ས་མྦོ་དྷཱ་ཡ ནི་བྦཱ་ནཱ་ཡ སཾ་ཝ་ཏྟ་ཏི. ཡ་ད་པི ཙི་ཏྟ་པ་སྶ་དྡྷི ཏ་ད་པི པ་སྶ་དྡྷི་ས་མྦོ་ཛ྄ཛྷ་ངྒོ ཨ་བྷི་ཉྙཱ་ཡ ས་མྦོ་དྷཱ་ཡ ནི་བྦཱ་ནཱ་ཡ སཾ་ཝ་ཏྟ་ཏི.
ཏ་ཏྠ ཀ་ཏ་མོ ས་མཱ་དྷི་ས་མྦོ་ཛ྄ཛྷ་ངྒོ? ཨ་ཏྠི ས་ཝི་ཏ་ཀྐོ ས་ཝི་ཙཱ་རོ ས་མཱ་དྷི, ཨ་ཏྠི ཨ་ཝི་ཏ་ཀྐོ ཨ་ཝི་ཙཱ་རོ ས་མཱ་དྷི. ཡ་ད་པི ས་ཝི་ཏ་ཀྐོ ས་ཝི་ཙཱ་རོ ས་མཱ་དྷི ཏ་ད་པི ས་མཱ་དྷི་ས་མྦོ་ཛ྄ཛྷ་ངྒོ ཨ་བྷི་ཉྙཱ་ཡ ས་མྦོ་དྷཱ་ཡ ནི་བྦཱ་ནཱ་ཡ སཾ་ཝ་ཏྟ་ཏི. ཡ་ད་པི ཨ་ཝི་ཏ་ཀྐོ ཨ་ཝི་ཙཱ་རོ ས་མཱ་དྷི ཏ་ད་པི ས་མཱ་དྷི་ས་མྦོ་ཛ྄ཛྷ་ངྒོ ཨ་བྷི་ཉྙཱ་ཡ ས་མྦོ་དྷཱ་ཡ ནི་བྦཱ་ནཱ་ཡ སཾ་ཝ་ཏྟ་ཏི.
ཏ་ཏྠ ཀ་ཏ་མོ ཨུ་པེ་ཀྑཱ་ས་མྦོ་ཛ྄ཛྷ་ངྒོ? ཨ་ཏྠི ཨ་ཛ྄ཛྷ་ཏྟཾ དྷ་མྨེ་སུ ཨུ་པེ་ཀྑཱ, ཨ་ཏྠི བ་ཧི་དྡྷཱ དྷ་མྨེ་སུ ཨུ་པེ་ཀྑཱ. ཡ་ད་པི ཨ་ཛ྄ཛྷ་ཏྟཾ དྷ་མྨེ་སུ ཨུ་པེ་ཀྑཱ ཏ་ད་པི ཨུ་པེ་ཀྑཱ་ས་མྦོ་ཛ྄ཛྷ་ངྒོ ཨ་བྷི་ཉྙཱ་ཡ ས་མྦོ་དྷཱ་ཡ ནི་བྦཱ་ནཱ་ཡ སཾ་ཝ་ཏྟ་ཏི. ཡ་ད་པི བ་ཧི་དྡྷཱ དྷ་མྨེ་སུ ཨུ་པེ་ཀྑཱ ཏ་ད་པི ཨུ་པེ་ཀྑཱ་ས་མྦོ་ཛ྄ཛྷ་ངྒོ ཨ་བྷི་ཉྙཱ་ཡ ས་མྦོ་དྷཱ་ཡ ནི་བྦཱ་ནཱ་ཡ སཾ་ཝ་ཏྟ་ཏི.
༤༧༠. ས་ཏྟ བོ་ཛ྄ཛྷ་ངྒཱ – ས་ཏི་ས་མྦོ་ཛ྄ཛྷ་ངྒོ, དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒོ, ཝཱི་རི་ཡ་ས་མྦོ་ཛ྄ཛྷ་ངྒོ, པཱི་ཏི་ས་མྦོ་ཛ྄ཛྷ་ངྒོ, པ་སྶ་དྡྷི་ས་མྦོ་ཛ྄ཛྷ་ངྒོ, ས་མཱ་དྷི་ས་མྦོ་ཛ྄ཛྷ་ངྒོ, ཨུ་པེ་ཀྑཱ་ས་མྦོ་ཛ྄ཛྷ་ངྒོ.
༤༧༡. ཏ་ཏྠ ཀ་ཏ་མོ ས་ཏི་ས་མྦོ་ཛ྄ཛྷ་ངྒོ? ཨི་དྷ བྷི་ཀྑུ ས་ཏི་ས་མྦོ་ཛ྄ཛྷ་ངྒཾ བྷཱ་ཝེ་ཏི ཝི་ཝེ་ཀ་ནི་སྶི་ཏཾ ཝི་རཱ་ག་ནི་སྶི་ཏཾ ནི་རོ་དྷ་ནི་སྶི་ཏཾ ཝོ་སྶ་གྒ་པ་རི་ཎཱ་མིཾ, དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒཾ བྷཱ་ཝེ་ཏི…པེ… ཝཱི་རི་ཡ་ས་མྦོ་ཛ྄ཛྷ་ངྒཾ བྷཱ་ཝེ་ཏི… པཱི་ཏི་ས་མྦོ་ཛ྄ཛྷ་ངྒཾ བྷཱ་ཝེ་ཏི… པ་སྶ་དྡྷི་ས་མྦོ་ཛ྄ཛྷ་ངྒཾ བྷཱ་ཝེ་ཏི… ས་མཱ་དྷི་ས་མྦོ་ཛ྄ཛྷ་ངྒཾ བྷཱ་ཝེ་ཏི… ཨུ་པེ་ཀྑཱ་ས་མྦོ་ཛ྄ཛྷ་ངྒཾ བྷཱ་ཝེ་ཏི ཝི་ཝེ་ཀ་ནི་སྶི་ཏཾ ཝི་རཱ་ག་ནི་སྶི་ཏཾ ནི་རོ་དྷ་ནི་སྶི་ཏཾ ཝོ་སྶ་གྒ་པ་རི་ཎཱ་མིཾ.
སུ་ཏྟ་ནྟ་བྷཱ་ཛ་ནཱི་ཡཾ.