༡༣. ཏེ་ར་ས་མ་ཝ་གྒོ
(༡༢༦) ༡. ཀ་པྤ་ཊྛ་ཀ་ཐཱ
༦༥༤. ཀ་པྤ་ཊྛོ ཀ་པྤཾ ཏི་ཊྛེ་ཡྻཱ་ཏི? ཨཱ་མ་ནྟཱ. ཀ་པྤོ ཙ ས་ཎྛཱ་ཏི བུ་དྡྷོ ཙ ལོ་ཀེ ཨུ་པྤ་ཛྫ་ཏཱི་ཏི? ན ཧེ་ཝཾ ཝ་ཏྟ་བྦེ…པེ…. ཀ་པྤ་ཊྛོ ཀ་པྤཾ ཏི་ཊྛེ་ཡྻཱ་ཏི? ཨཱ་མ་ནྟཱ. ཀ་པྤོ ཙ ས་ཎྛཱ་ཏི ས་ངྒྷོ ཙ བྷི་ཛྫ་ཏཱི་ཏི? ན ཧེ་ཝཾ ཝ་ཏྟ་བྦེ…པེ… ཀ་པྤ་ཊྛོ ཀ་པྤཾ ཏི་ཊྛེ་ཡྻཱ་ཏི? ཨཱ་མ་ནྟཱ. ཀ་པྤོ ཙ ས་ཎྛཱ་ཏི ཀ་པྤ་ཊྛོ ཙ ཀ་པྤ་ཊྛི་ཡཾ ཀ་མྨཾ ཀ་རོ་ཏཱི་ཏི? ན ཧེ་ཝཾ ཝ་ཏྟ་བྦེ…པེ… ཀ་པྤ་ཊྛོ ཀ་པྤཾ ཏི་ཊྛེ་ཡྻཱ་ཏི? ཨཱ་མ་ནྟཱ. ཀ་པྤོ ཙ ས་ཎྛཱ་ཏི ཀ་པྤ་ཊྛོ ཙ པུ་གྒ་ལོ ཀཱ་ལཾ ཀ་རོ་ཏཱི་ཏི? ན ཧེ་ཝཾ ཝ་ཏྟ་བྦེ…པེ….
༦༥༥. ཀ་པྤ་ཊྛོ ཀ་པྤཾ ཏི་ཊྛེ་ཡྻཱ་ཏི? ཨཱ་མ་ནྟཱ. ཨ་ཏཱི་ཏཾ ཀ་པྤཾ ཏི་ཊྛེ་ཡྻ, ཨ་ནཱ་ག་ཏཾ ཀ་པྤཾ ཏི་ཊྛེ་ཡྻཱ་ཏི? ན ཧེ་ཝཾ ཝ་ཏྟ་བྦེ…པེ… ཀ་པྤ་ཊྛོ ཀ་པྤཾ ཏི་ཊྛེ་ཡྻཱ་ཏི? ཨཱ་མ་ནྟཱ. དྭེ ཀ་པྤེ ཏི་ཊྛེ་ཡྻ… ཏ་ཡོ ཀ་པྤེ ཏི་ཊྛེ་ཡྻ… ཙ་ཏྟཱ་རོ ཀ་པྤེ ཏི་ཊྛེ་ཡྻཱ་ཏི? ན ཧེ་ཝཾ ཝ་ཏྟ་བྦེ…པེ….
༦༥༦. ཀ་པྤ་ཊྛོ ཀ་པྤཾ ཏི་ཊྛེ་ཡྻཱ་ཏི? ཨཱ་མ་ནྟཱ. ཀ་པྤ་ཊྛོ ཀ་པྤེ ཌ་ཡ྄ཧ་ནྟེ ཀ་ཏྠ ག་ཙྪ་ཏཱི་ཏི? ཨ་ཉྙཾ ལོ་ཀ་དྷཱ་ཏུཾ ག་ཙྪ་ཏཱི་ཏི. མ་ཏོ ག་ཙྪ་ཏི, ཝེ་ཧཱ་སཾ ག་ཙྪ་ཏཱི་ཏི? མ་ཏོ ག་ཙྪ་ཏཱི་ཏི. ཀ་པྤ་ཊྛི་ཡཾ ཀ་མྨཾ ཨ་པ་རཱ་པ་རི་ཡ་ཝེ་པ་ཀྐ་ནྟི? ན ཧེ་ཝཾ ཝ་ཏྟ་བྦེ…པེ… [ཝེ་ཧཱ་སཾ ག་ཙྪ་ཏཱི་ཏི (?) ཨ་ཡཾ ཧི པ་ར་ཝཱ་དི་སྶ པ་ཊི་ཉྙཱ་ཡེ་ཝ, ཀ་ཐཱ. ༦༢༡-༦༢༣ ན་ཝ་མ་པ་ནྟི་ཡཾ ཝི་ཡ] ཝེ་ཧཱ་སཾ ག་ཙྪ་ཏཱི་ཏི? ཨཱ་མ་ནྟཱ [ཝེ་ཧཱ་སཾ ག་ཙྪ་ཏཱི་ཏི (?) ཨ་ཡཾ ཧི པ་ར་ཝཱ་དི་སྶ པ་ཊི་ཉྙཱ་ཡེ་ཝ, ཀ་ཐཱ. ༦༢༡-༦༢༣ ན་ཝ་མ་པ་ནྟི་ཡཾ ཝི་ཡ]. ཀ་པྤ་ཊྛོ ཨི་དྡྷི་མཱ་ཏི? ན ཧེ་ཝཾ ཝ་ཏྟ་བྦེ…པེ… ཀ་པྤ་ཊྛོ ཨི་དྡྷི་མཱ་ཏི? ཨཱ་མ་ནྟཱ. ཀ་པྤ་ཊྛེ་ན ཚ་ནྡི་དྡྷི་པཱ་དོ བྷཱ་ཝི་ཏོ ཝཱི་རི་ཡི་དྡྷི་པཱ་དོ བྷཱ་ཝི་ཏོ ཙི་ཏྟི་དྡྷི་པཱ་དོ བྷཱ་ཝི་ཏོ ཝཱི་མཾ་སི་དྡྷི་པཱ་དོ བྷཱ་ཝི་ཏོ་ཏི? ན ཧེ་ཝཾ ཝ་ཏྟ་བྦེ…པེ….
༦༥༧. ན ཝ་ཏྟ་བྦཾ – ‘‘ཀ་པྤ་ཊྛོ ཀ་པྤཾ ཏི་ཊྛེ་ཡྻཱ’’ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ –
‘‘ཨཱ་པཱ་ཡི་ཀོ ནེ་ར་ཡི་ཀོ, ཀ་པྤ་ཊྛོ ས་ངྒྷ་བྷེ་ད་ཀོ;
ཝ་གྒ་ར་ཏོ ཨ་དྷ་མྨ་ཊྛོ, ཡོ་ག་ཀྑེ་མཱ པ་དྷཾ་ས་ཏི;
ས་ངྒྷཾ ས་མ་གྒཾ བྷེ་ཏྭཱ་ན [བྷི་ནྡི་ཏྭཱ (སཱི. ཀ.)], ཀ་པྤཾ ནི་ར་ཡ་མྷི པ་ཙྩ་ཏཱི’’ཏི [ཙཱུ་ལ༹་ཝ. ༣༥༤; ཨ. ནི. ༡༠.༣༩; ཨི་ཏི་ཝུ. ༡༨].
ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ཀ་པྤ་ཊྛོ ཀ་པྤཾ ཏི་ཊྛེ་ཡྻཱ་ཏི.
ཀ་པྤ་ཊྛ་ཀ་ཐཱ ནི་ཊྛི་ཏཱ.
༡༣. ཏེ་ར་ས་མ་ཝ་གྒོ
(༡༢༧) ༢. ཀུ་ས་ལ་པ་ཊི་ལཱ་བྷ་ཀ་ཐཱ
༦༥༨. ཀ་པྤ་ཊྛོ ཀུ་ས་ལཾ ཙི་ཏྟཾ ན པ་ཊི་ལ་བྷེ་ཡྻཱ་ཏི? ཨཱ་མ་ནྟཱ. ཀ་པྤ་ཊྛོ དཱ་ནཾ ད་དེ་ཡྻཱ་ཏི? ཨཱ་མ་ནྟཱ. ཧ་ཉྩི ཀ་པྤ་ཊྛོ དཱ་ནཾ ད་དེ་ཡྻ, ནོ ཙ ཝ་ཏ རེ ཝ་ཏྟ་བྦེ – ‘‘ཀ་པྤ་ཊྛོ ཀུ་ས་ལཾ ཙི་ཏྟཾ ན པ་ཊི་ལ་བྷེ་ཡྻཱ’’ཏི.
ཀ་པྤ་ཊྛོ ཀུ་ས་ལཾ ཙི་ཏྟཾ ན པ་ཊི་ལ་བྷེ་ཡྻཱ་ཏི? ཨཱ་མ་ནྟཱ. ཀ་པྤ་ཊྛོ ཙཱི་ཝ་རཾ ད་དེ་ཡྻ…པེ… པི་ཎྜ་པཱ་ཏཾ ད་དེ་ཡྻ…པེ… སེ་ནཱ་ས་ནཾ ད་དེ་ཡྻ…པེ… གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རཾ ད་དེ་ཡྻ … ཁཱ་ད་ནཱི་ཡཾ ད་དེ་ཡྻ… བྷོ་ཛ་ནཱི་ཡཾ ད་དེ་ཡྻ… པཱ་ནཱི་ཡཾ ད་དེ་ཡྻ… ཙེ་ཏི་ཡཾ ཝ་ནྡེ་ཡྻ… ཙེ་ཏི་ཡེ མཱ་ལཾ ཨཱ་རོ་པེ་ཡྻ… ག་ནྡྷཾ ཨཱ་རོ་པེ་ཡྻ… ཝི་ལེ་པ་ནཾ ཨཱ་རོ་པེ་ཡྻ…པེ… ཙེ་ཏི་ཡཾ ཨ་བྷི་ད་ཀྑི་ཎཾ [པ་ད་ཀྑི་ཎཾ (པཱི.)] ཀ་རེ་ཡྻཱ་ཏི? ཨཱ་མ་ནྟཱ. ཧ་ཉྩི ཀ་པྤ་ཊྛོ ཙེ་ཏི་ཡཾ ཨ་བྷི་ད་ཀྑི་ཎཾ ཀ་རེ་ཡྻ, ནོ ཙ ཝ་ཏ རེ ཝ་ཏྟ་བྦེ – ‘‘ཀ་པྤ་ཊྛོ ཀུ་ས་ལཾ ཙི་ཏྟཾ ན པ་ཊི་ལ་བྷེ་ཡྻཱ’’ཏི…པེ….
༦༥༩. ཀ་པྤ་ཊྛོ ཀུ་ས་ལཾ ཙི་ཏྟཾ པ་ཊི་ལ་བྷེ་ཡྻཱ་ཏི? ཨཱ་མ་ནྟཱ. ཏ་ཏོ ཝུ་ཊྛཱ་ནཾ ཀུ་ས་ལཾ ཙི་ཏྟཾ པ་ཊི་ལ་བྷེ་ཡྻཱ་ཏི? ཨཱ་མ་ནྟཱ. རཱུ་པཱ་ཝ་ཙ་རཾ…པེ… ཨ་རཱུ་པཱ་ཝ་ཙ་རཾ…པེ… ལོ་ཀུ་ཏྟ་རཾ ཀུ་ས་ལཾ ཙི་ཏྟཾ པ་ཊི་ལ་བྷེ་ཡྻཱ་ཏི? ན ཧེ་ཝཾ ཝ་ཏྟ་བྦེ…པེ….
ཀུ་ས་ལ་པ་ཊི་ལཱ་བྷ་ཀ་ཐཱ ནི་ཊྛི་ཏཱ.
༡༣. ཏེ་ར་ས་མ་ཝ་གྒོ
(༡༢༨) ༣. ཨ་ན་ནྟ་རཱ་པ་ཡུ་ཏྟ་ཀ་ཐཱ
༦༦༠. ཨ་ན་ནྟ་རཱ་པ་ཡུ་ཏྟོ པུ་གྒ་ལོ ས་མྨ་ཏྟ་ནི་ཡཱ་མཾ ཨོ་ཀྐ་མེ་ཡྻཱ་ཏི? ཨཱ་མ་ནྟཱ. མི་ཙྪ་ཏྟ་ནི་ཡཱ་མ་ཉྩ ས་མྨ་ཏྟ་ནི་ཡཱ་མ་ཉྩ ཨུ་བྷོ ཨོ་ཀྐ་མེ་ཡྻཱ་ཏི? ན ཧེ་ཝཾ ཝ་ཏྟ་བྦེ…པེ… ཨ་ན་ནྟ་རཱ་པ་ཡུ་ཏྟོ པུ་གྒ་ལོ ས་མྨ་ཏྟ་ནི་ཡཱ་མཾ ཨོ་ཀྐ་མེ་ཡྻཱ་ཏི? ཨཱ་མ་ནྟཱ. ན་ནུ ཏཾ ཀ་མྨཾ པ་ཡུ་ཏྟཾ ཀུ་ཀྐུ་ཙྩཾ ཨུ་པྤཱ་དི་ཏཾ ཝི་པྤ་ཊི་སཱ་རི་ཡཾ ཛ་ནི་ཏ་ནྟི? ཨཱ་མ་ནྟཱ. ཧ་ཉྩི ཏཾ ཀ་མྨཾ པ་ཡུ་ཏྟཾ ཀུ་ཀྐུ་ཙྩཾ ཨུ་པྤཱ་དི་ཏཾ ཝི་པྤ་ཊི་སཱ་རི་ཡཾ ཛ་ནི་ཏཾ, ནོ ཙ ཝ་ཏ རེ ཝ་ཏྟ་བྦེ – ‘‘ཨ་ན་ནྟ་རཱ་པ་ཡུ་ཏྟོ པུ་གྒ་ལོ ས་མྨ་ཏྟ་ནི་ཡཱ་མཾ ཨོ་ཀྐ་མེ་ཡྻཱ’’ཏི.
༦༦༡. ཨ་ན་ནྟ་རཱ་པ་ཡུ་ཏྟོ པུ་གྒ་ལོ ཨ་བྷ་བྦོ ས་མྨ་ཏྟ་ནི་ཡཱ་མཾ ཨོ་ཀྐ་མི་ཏུ་ནྟི? ཨཱ་མ་ནྟཱ. མཱ་ཏཱ ཛཱི་ཝི་ཏཱ ཝོ་རོ་པི་ཏཱ… པི་ཏཱ ཛཱི་ཝི་ཏཱ ཝོ་རོ་པི་ཏོ… ཨ་ར་ཧཱ ཛཱི་ཝི་ཏཱ ཝོ་རོ་པི་ཏོ… དུ་ཊྛེ་ན ཙི་ཏྟེ་ན ཏ་ཐཱ་ག་ཏ་སྶ ལོ་ཧི་ཏཾ ཨུ་པྤཱ་དི་ཏཾ… ས་ངྒྷོ བྷི་ནྣོ་ཏི? ན ཧེ་ཝཾ ཝ་ཏྟ་བྦེ…པེ….
ཨ་ན་ནྟ་རཱ་པ་ཡུ་ཏྟོ པུ་གྒ་ལོ ཏཾ ཀ་མྨཾ པ་ཊི་སཾ་ཧ་རི་ཏྭཱ ཀུ་ཀྐུ་ཙྩཾ པ་ཊི་ཝི་ནོ་དེ་ཏྭཱ ཝི་པྤ་ཊི་སཱ་རི་ཡཾ པ་ཊི་ཝི་ནེ་ཏྭཱ [པ་ཊི་ཝི་ནོ་དེ་ཏྭཱ (སཱི. པཱི. ཀ.)] ཨ་བྷ་བྦོ ས་མྨ་ཏྟ་ནི་ཡཱ་མཾ ཨོ་ཀྐ་མི་ཏུ་ནྟི? ཨཱ་མ་ནྟཱ. མཱ་ཏཱ ཛཱི་ཝི་ཏཱ ཝོ་རོ་པི་ཏཱ… པི་ཏཱ ཛཱི་ཝི་ཏཱ ཝོ་རོ་པི་ཏོ…པེ… ས་ངྒྷོ བྷི་ནྣོ་ཏི? ན ཧེ་ཝཾ ཝ་ཏྟ་བྦེ…པེ….
ཨ་ན་ནྟ་རཱ་པ་ཡུ་ཏྟོ པུ་གྒ་ལོ ཏཾ ཀ་མྨཾ པ་ཊི་སཾ་ཧ་རི་ཏྭཱ ཀུ་ཀྐུ་ཙྩཾ པ་ཊི་ཝི་ནོ་དེ་ཏྭཱ ཝི་པྤ་ཊི་སཱ་རི་ཡཾ པ་ཊི་ཝི་ནེ་ཏྭཱ ཨ་བྷ་བྦོ ས་མྨ་ཏྟ་ནི་ཡཱ་མཾ ཨོ་ཀྐ་མི་ཏུ་ནྟི? ཨཱ་མ་ནྟཱ. ན་ནུ ཏཾ ཀ་མྨཾ པ་ཊི་སཾ་ཧ་ཊཾ ཀུ་ཀྐུ་ཙྩཾ པ་ཊི་ཝི་ནོ་དི་ཏཾ ཝི་པྤ་ཊི་སཱ་རི་ཡཾ པ་ཊི་ཝི་ནཱི་ཏ་ནྟི? ཨཱ་མ་ནྟཱ. ཧ་ཉྩི ཏཾ ཀ་མྨཾ པ་ཊི་སཾ་ཧ་ཊཾ ཀུ་ཀྐུ་ཙྩཾ པ་ཊི་ཝི་ནོ་དི་ཏཾ ཝི་པྤ་ཊི་སཱ་རི་ཡཾ པ་ཊི་ཝི་ནཱི་ཏཾ, ནོ ཙ ཝ་ཏ རེ ཝ་ཏྟ་བྦེ – ‘‘ཨ་ན་ནྟ་རཱ་པ་ཡུ་ཏྟོ པུ་གྒ་ལོ ཏཾ ཀ་མྨཾ པ་ཊི་སཾ་ཧ་རི་ཏྭཱ ཀུ་ཀྐུ་ཙྩཾ པ་ཊི་ཝི་ནོ་དེ་ཏྭཱ ཝི་པྤ་ཊི་སཱ་རི་ཡཾ པ་ཊི་ཝི་ནེ་ཏྭཱ ཨ་བྷ་བྦོ ས་མྨ་ཏྟ་ནི་ཡཱ་མཾ ཨོ་ཀྐ་མི་ཏུ’’ནྟི.
༦༦༢. ཨ་ན་ནྟ་རཱ་པ་ཡུ་ཏྟོ པུ་གྒ་ལོ ས་མྨ་ཏྟ་ནི་ཡཱ་མཾ ཨོ་ཀྐ་མེ་ཡྻཱ་ཏི? ཨཱ་མ་ནྟཱ. ན་ནུ ཏཾ ཀ་མྨཾ པ་ཡུ་ཏྟོ ཨཱ་སཱི་ཏི? ཨཱ་མ་ནྟཱ. ཧ་ཉྩི ཏཾ ཀ་མྨཾ པ་ཡུ་ཏྟོ ཨཱ་སི, ནོ ཙ ཝ་ཏ རེ ཝ་ཏྟ་བྦེ – ‘‘ཨ་ན་ནྟ་རཱ་པ་ཡུ་ཏྟོ པུ་གྒ་ལོ ས་མྨ་ཏྟ་ནི་ཡཱ་མཾ ཨོ་ཀྐ་མེ་ཡྻཱ’’ཏི.
ཨ་ན་ནྟ་རཱ་པ་ཡུ་ཏྟ་ཀ་ཐཱ ནི་ཊྛི་ཏཱ.
༡༣. ཏེ་ར་ས་མ་ཝ་གྒོ
(༡༢༩) ༤. ནི་ཡ་ཏ་སྶ ནི་ཡཱ་མ་ཀ་ཐཱ
༦༦༣. ནི་ཡ་ཏོ ནི་ཡཱ་མཾ ཨོ་ཀྐ་མ་ཏཱི་ཏི? ཨཱ་མ་ནྟཱ. མི་ཙྪ་ཏྟ་ནི་ཡ་ཏོ ས་མྨ་ཏྟ་ནི་ཡཱ་མཾ ཨོ་ཀྐ་མ་ཏི, ས་མྨ་ཏྟ་ནི་ཡ་ཏོ མི་ཙྪ་ཏྟ་ནི་ཡཱ་མཾ ཨོ་ཀྐ་མ་ཏཱི་ཏི? ན ཧེ་ཝཾ ཝ་ཏྟ་བྦེ…པེ….
ནི་ཡ་ཏོ ནི་ཡཱ་མཾ ཨོ་ཀྐ་མ་ཏཱི་ཏི? ཨཱ་མ་ནྟཱ. པུ་བྦེ མ་གྒཾ བྷཱ་ཝེ་ཏྭཱ པ་ཙྪཱ ནི་ཡཱ་མཾ ཨོ་ཀྐ་མ་ཏཱི་ཏི? ན ཧེ་ཝཾ ཝ་ཏྟ་བྦེ…པེ… པུ་བྦེ སོ་ཏཱ་པ་ཏྟི་མ་གྒཾ བྷཱ་ཝེ་ཏྭཱ པ་ཙྪཱ སོ་ཏཱ་པ་ཏྟི་ནི་ཡཱ་མཾ ཨོ་ཀྐ་མ་ཏཱི་ཏི? ན ཧེ་ཝཾ ཝ་ཏྟ་བྦེ…པེ… པུ་བྦེ ས་ཀ་དཱ་གཱ་མི…པེ… ཨ་ནཱ་གཱ་མི…པེ… ཨ་ར་ཧ་ཏྟ་མ་གྒཾ བྷཱ་ཝེ་ཏྭཱ པ་ཙྪཱ ཨ་ར་ཧ་ཏྟ་ནི་ཡཱ་མཾ ཨོ་ཀྐ་མ་ཏཱི་ཏི? ན ཧེ་ཝཾ ཝ་ཏྟ་བྦེ…པེ….
པུ་བྦེ ས་ཏི་པ་ཊྛཱ་ནཾ…པེ… ས་མྨ་པྤ་དྷཱ་ནཾ… ཨི་དྡྷི་པཱ་དཾ… ཨི་ནྡྲི་ཡཾ… བ་ལཾ… བོ་ཛ྄ཛྷ་ངྒཾ བྷཱ་ཝེ་ཏྭཱ པ་ཙྪཱ ནི་ཡཱ་མཾ ཨོ་ཀྐ་མ་ཏཱི་ཏི? ན ཧེ་ཝཾ ཝ་ཏྟ་བྦེ…པེ….
༦༦༤. ན ཝ་ཏྟ་བྦཾ – ‘‘ནི་ཡ་ཏོ ནི་ཡཱ་མཾ ཨོ་ཀྐ་མ་ཏཱི’’ཏི? ཨཱ་མ་ནྟཱ. བྷ་བྦོ བོ་དྷི་ས་ཏྟོ ཏཱ་ཡ ཛཱ་ཏི་ཡཱ དྷ་མྨཾ ནཱ་བྷི་ས་མེ་ཏུ་ནྟི? ན ཧེ་ཝཾ ཝ་ཏྟ་བྦེ. ཏེ་ན ཧི ནི་ཡ་ཏོ ནི་ཡཱ་མཾ ཨོ་ཀྐ་མ་ཏཱི་ཏི.
ནི་ཡ་ཏ་སྶ ནི་ཡཱ་མ་ཀ་ཐཱ ནི་ཊྛི་ཏཱ.
༡༣. ཏེ་ར་ས་མ་ཝ་གྒོ
(༡༣༠) ༥. ནི་ཝུ་ཏ་ཀ་ཐཱ
༦༦༥. ནི་ཝུ་ཏོ ནཱི་ཝ་ར་ཎཾ ཛ་ཧ་ཏཱི་ཏི? ཨཱ་མ་ནྟཱ. ར་ཏྟོ རཱ་གཾ ཛ་ཧ་ཏི, དུ་ཊྛོ དོ་སཾ ཛ་ཧ་ཏི, མཱུ་ལ༹ྷོ མོ་ཧཾ ཛ་ཧ་ཏི, ཀི་ལི་ཊྛོ ཀི་ལེ་སེ ཛ་ཧ་ཏཱི་ཏི? ན ཧེ་ཝཾ ཝ་ཏྟ་བྦེ…པེ… རཱ་གེ་ན རཱ་གཾ ཛ་ཧ་ཏི, དོ་སེ་ན དོ་སཾ ཛ་ཧ་ཏི, མོ་ཧེ་ན མོ་ཧཾ ཛ་ཧ་ཏི, ཀི་ལེ་སེ་ཧི ཀི་ལེ་སེ ཛ་ཧ་ཏཱི་ཏི? ན ཧེ་ཝཾ ཝ་ཏྟ་བྦེ…པེ….
རཱ་གོ ཙི་ཏྟ་ས་མྤ་ཡུ་ཏྟོ, མ་གྒོ ཙི་ཏྟ་ས་མྤ་ཡུ་ཏྟོ་ཏི? ཨཱ་མ་ནྟཱ. དྭི་ནྣཾ ཕ་སྶཱ་ནཾ…པེ… དྭི་ནྣཾ ཙི་ཏྟཱ་ནཾ ས་མོ་དྷཱ་ནཾ ཧོ་ཏཱི་ཏི? ན ཧེ་ཝཾ ཝ་ཏྟ་བྦེ…པེ… རཱ་གོ ཨ་ཀུ་ས་ལོ, མ་གྒོ ཀུ་ས་ལོ་ཏི? ཨཱ་མ་ནྟཱ. ཀུ་ས་ལཱ་ཀུ་ས་ལཱ སཱ་ཝ་ཛྫཱ་ན་ཝ་ཛྫཱ ཧཱི་ན་པ་ཎཱི་ཏཱ ཀ་ཎྷ་སུ་ཀྐ་ས་པྤ་ཊི་བྷཱ་གཱ དྷ་མྨཱ ས་མྨུ་ཁཱི་བྷཱ་ཝཾ ཨཱ་ག་ཙྪ་ནྟཱི་ཏི? ན ཧེ་ཝཾ ཝ་ཏྟ་བྦེ…པེ….
༦༦༦. ཀུ་ས་ལཱ་ཀུ་ས་ལཱ སཱ་ཝ་ཛྫཱ་ན་ཝ་ཛྫཱ ཧཱི་ན་པ་ཎཱི་ཏཱ ཀ་ཎྷ་སུ་ཀྐ་ས་པྤ་ཊི་བྷཱ་གཱ དྷ་མྨཱ ས་མྨུ་ཁཱི་བྷཱ་ཝཾ ཨཱ་ག་ཙྪ་ནྟཱི་ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ – ‘‘ཙ་ཏྟཱ་རི་མཱ་ནི, བྷི་ཀྑ་ཝེ, སུ་ཝི་དཱུ་ར་ཝི་དཱུ་རཱ་ནི! ཀ་ཏ་མཱ་ནི ཙ་ཏྟཱ་རི? ན་བྷ་ཉྩ, བྷི་ཀྑ་ཝེ, པ་ཐ་ཝཱི ཙ – ཨི་དཾ པ་ཋ་མཾ སུ་ཝི་དཱུ་ར་ཝི་དཱུ་རཾ…པེ… ཏ་སྨཱ ས་ཏཾ དྷ་མྨོ ཨ་ས་བྦྷི ཨཱ་ར་ཀཱ’’ཏི. ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ན ཝ་ཏྟ་བྦཾ – ‘‘ཀུ་ས་ལཱ་ཀུ་ས་ལཱ…པེ… ས་མྨུ་ཁཱི་བྷཱ་ཝཾ ཨཱ་ག་ཙྪ་ནྟཱི’’ཏི.
ནི་ཝུ་ཏོ ནཱི་ཝ་ར་ཎཾ ཛ་ཧ་ཏཱི་ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ – ‘‘སོ ཨེ་ཝཾ ས་མཱ་ཧི་ཏེ ཙི་ཏྟེ པ་རི་སུ་དྡྷེ པ་རི་ཡོ་དཱ་ཏེ ཨ་ན་ངྒ་ཎེ ཝི་ག་ཏཱུ་པ་ཀྐི་ལེ་སེ མུ་དུ་བྷཱུ་ཏེ ཀ་མྨ་ནི་ཡེ ཋི་ཏེ ཨཱ་ནེ་ཉྫ་པྤ་ཏྟེ ཨཱ་ས་ཝཱ་ནཾ ཁ་ཡ་ཉཱ་ཎཱ་ཡ ཙི་ཏྟཾ ཨ་བྷི་ནི་ནྣཱ་མེ་ཏཱི’’ཏི! ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ན ཝ་ཏྟ་བྦཾ – ‘‘ནི་ཝུ་ཏོ ནཱི་ཝ་ར་ཎཾ ཛ་ཧ་ཏཱི’’ཏི…པེ….
༦༦༧. ན ཝ་ཏྟ་བྦཾ – ‘‘ནི་ཝུ་ཏོ ནཱི་ཝ་ར་ཎཾ ཛ་ཧ་ཏཱི’’ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ – ‘‘ཏ་སྶ ཨེ་ཝཾ ཛཱ་ན་ཏོ ཨེ་ཝཾ པ་སྶ་ཏོ ཀཱ་མཱ་ས་ཝཱ་པི ཙི་ཏྟཾ ཝི་མུ་ཙྩ་ཏི…པེ… ཨ་ཝི་ཛྫཱ་ས་ཝཱ་པི ཙི་ཏྟཾ ཝི་མུ་ཙྩ་ཏཱི’’ཏི! ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ནི་ཝུ་ཏོ ནཱི་ཝ་ར་ཎཾ ཛ་ཧ་ཏཱི་ཏི.
ནི་ཝུ་ཏ་ཀ་ཐཱ ནི་ཊྛི་ཏཱ.
༡༣. ཏེ་ར་ས་མ་ཝ་གྒོ
(༡༣༡) ༦. ས་མྨུ་ཁཱི་བྷཱུ་ཏ་ཀ་ཐཱ
༦༦༨. ས་མྨུ་ཁཱི་བྷཱུ་ཏོ སཾ་ཡོ་ཛ་ནཾ ཛ་ཧ་ཏཱི་ཏི? ཨཱ་མ་ནྟཱ. ར་ཏྟོ རཱ་གཾ ཛ་ཧ་ཏི, དུ་ཊྛོ དོ་སཾ ཛ་ཧ་ཏི, མཱུ་ལ༹ྷོ མོ་ཧཾ ཛ་ཧ་ཏི, ཀི་ལི་ཊྛོ ཀི་ལེ་སེ ཛ་ཧ་ཏཱི་ཏི? ན ཧེ་ཝཾ ཝ་ཏྟ་བྦེ…པེ… རཱ་གེ་ན རཱ་གཾ ཛ་ཧ་ཏི, དོ་སེ་ན དོ་སཾ ཛ་ཧ་ཏི, མོ་ཧེ་ན མོ་ཧཾ ཛ་ཧ་ཏི, ཀི་ལེ་སེ་ཧི ཀི་ལེ་སེ ཛ་ཧ་ཏཱི་ཏི? ན ཧེ་ཝཾ ཝ་ཏྟ་བྦེ…པེ….
རཱ་གོ ཙི་ཏྟ་ས་མྤ་ཡུ་ཏྟོ, མ་གྒོ ཙི་ཏྟ་ས་མྤ་ཡུ་ཏྟོ་ཏི? ཨཱ་མ་ནྟཱ. དྭི་ནྣཾ ཕ་སྶཱ་ནཾ…པེ… དྭི་ནྣཾ ཙི་ཏྟཱ་ནཾ ས་མོ་དྷཱ་ནཾ ཧོ་ཏཱི་ཏི? ན ཧེ་ཝཾ ཝ་ཏྟ་བྦེ…པེ… རཱ་གོ ཨ་ཀུ་ས་ལོ, མ་གྒོ ཀུ་ས་ལོ་ཏི? ཨཱ་མ་ནྟཱ. ཀུ་ས་ལཱ་ཀུ་ས་ལཱ སཱ་ཝ་ཛྫཱ་ན་ཝ་ཛྫཱ ཧཱི་ན་པ་ཎཱི་ཏཱ ཀ་ཎྷ་སུ་ཀྐ་ས་པྤ་ཊི་བྷཱ་གཱ དྷ་མྨཱ ས་མྨུ་ཁཱི་བྷཱ་ཝཾ ཨཱ་ག་ཙྪ་ནྟཱི་ཏི? ན ཧེ་ཝཾ ཝ་ཏྟ་བྦེ…པེ….
༦༦༩. ཀུ་ས་ལཱ་ཀུ་ས་ལཱ…པེ… ས་མྨུ་ཁཱི་བྷཱ་ཝཾ ཨཱ་ག་ཙྪ་ནྟཱི་ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ – ‘‘ཙ་ཏྟཱ་རི་མཱ་ནི, བྷི་ཀྑ་ཝེ, སུ་ཝི་དཱུ་ར་ཝི་དཱུ་རཱ་ནི! ཀ་ཏ་མཱ་ནི ཙ་ཏྟཱ་རི? ན་བྷ་ཉྩ, བྷི་ཀྑ་ཝེ, པ་ཐ་ཝཱི ཙ – ཨི་དཾ པ་ཋ་མཾ སུ་ཝི་དཱུ་ར་ཝི་དཱུ་རཾ…པེ… ཏ་སྨཱ ས་ཏཾ དྷ་མྨོ ཨ་ས་བྦྷི ཨཱ་ར་ཀཱ’’ཏི. ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ན ཝ་ཏྟ་བྦཾ – ‘‘ཀུ་ས་ལཱ་ཀུ་ས་ལཱ…པེ… ས་མྨུ་ཁཱི་བྷཱ་ཝཾ ཨཱ་ག་ཙྪ་ནྟཱི’’ཏི.
ས་མྨུ་ཁཱི་བྷཱུ་ཏོ སཾ་ཡོ་ཛ་ནཾ ཛ་ཧ་ཏཱི་ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ – ‘‘སོ ཨེ་ཝཾ ས་མཱ་ཧི་ཏེ ཙི་ཏྟེ…པེ… ཨཱ་ས་ཝཱ་ནཾ ཁ་ཡ་ཉཱ་ཎཱ་ཡ ཙི་ཏྟཾ ཨ་བྷི་ནི་ནྣཱ་མེ་ཏཱི’’ཏི! ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ན ཝ་ཏྟ་བྦཾ – ‘‘ས་མྨུ་ཁཱི་བྷཱུ་ཏོ སཾ་ཡོ་ཛ་ནཾ ཛ་ཧ་ཏཱི’’ཏི.
༦༧༠. ན ཝ་ཏྟ་བྦཾ – ‘‘ས་མྨུ་ཁཱི་བྷཱུ་ཏོ སཾ་ཡོ་ཛ་ནཾ ཛ་ཧ་ཏཱི’’ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ – ‘‘ཏ་སྶ ཨེ་ཝཾ ཛཱ་ན་ཏོ ཨེ་ཝཾ པ་སྶ་ཏོ ཀཱ་མཱ་ས་ཝཱ་པི ཙི་ཏྟཾ ཝི་མུ་ཙྩ་ཏི…པེ… ཨ་ཝི་ཛྫཱ་ས་ཝཱ་པི ཙི་ཏྟཾ ཝི་མུ་ཙྩ་ཏཱི’’ཏི! ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ས་མྨུ་ཁཱི་བྷཱུ་ཏོ སཾ་ཡོ་ཛ་ནཾ ཛ་ཧ་ཏཱི་ཏི.
ས་མྨུ་ཁཱི་བྷཱུ་ཏ་ཀ་ཐཱ ནི་ཊྛི་ཏཱ.
༡༣. ཏེ་ར་ས་མ་ཝ་གྒོ
(༡༣༢) ༧. ས་མཱ་པ་ནྣོ ཨ་སྶཱ་དེ་ཏི་ཀ་ཐཱ
༦༧༡. ས་མཱ་པ་ནྣོ ཨ་སྶཱ་དེ་ཏི, ཛྷཱ་ན་ནི་ཀ་ནྟི ཛྷཱ་ནཱ་ར་མྨ་ཎཱ་ཏི? ཨཱ་མ་ནྟཱ. ཏཾ ཛྷཱ་ནཾ ཏ་སྶ ཛྷཱ་ན་སྶ ཨཱ་ར་མྨ་ཎ་ནྟི? ན ཧེ་ཝཾ ཝ་ཏྟ་བྦེ…པེ… ཏཾ ཛྷཱ་ནཾ ཏ་སྶ ཛྷཱ་ན་སྶ ཨཱ་ར་མྨ་ཎ་ནྟི? ཨཱ་མ་ནྟཱ. ཏེ་ན ཕ་སྶེ་ན ཏཾ ཕ་སྶཾ ཕུ་ས་ཏི, ཏཱ་ཡ ཝེ་ད་ནཱ་ཡ ཏཾ ཝེ་ད་ནཾ ཝེ་དེ་ཏི, ཏཱ་ཡ ས་ཉྙཱ་ཡ ཏཾ ས་ཉྙཾ ས་ཉྫཱ་ནཱ་ཏི, ཏཱ་ཡ ཙེ་ཏ་ནཱ་ཡ ཏཾ ཙེ་ཏ་ནཾ ཙེ་ཏེ་ཏི, ཏེ་ན ཙི་ཏྟེ་ན ཏཾ ཙི་ཏྟཾ ཙི་ནྟེ་ཏི, ཏེ་ན ཝི་ཏ་ཀྐེ་ན ཏཾ ཝི་ཏ་ཀྐཾ ཝི་ཏ་ཀྐེ་ཏི, ཏེ་ན ཝི་ཙཱ་རེ་ན ཏཾ ཝི་ཙཱ་རཾ ཝི་ཙཱ་རེ་ཏི, ཏཱ་ཡ པཱི་ཏི་ཡཱ ཏཾ པཱི་ཏི པི་ཡཱ་ཡ་ཏི, ཏཱ་ཡ ས་ཏི་ཡཱ ཏཾ ས་ཏིཾ ས་ར་ཏི, ཏཱ་ཡ པ་ཉྙཱ་ཡ ཏཾ པ་ཉྙཾ པ་ཛཱ་ནཱ་ཏཱི་ཏི? ན ཧེ་ཝཾ ཝ་ཏྟ་བྦེ…པེ….
ཛྷཱ་ན་ནི་ཀ་ནྟི ཙི་ཏྟ་ས་མྤ་ཡུ་ཏྟཱ, ཛྷཱ་ནཾ ཙི་ཏྟ་ས་མྤ་ཡུ་ཏྟ་ནྟི? ཨཱ་མ་ནྟཱ. དྭི་ནྣཾ ཕ་སྶཱ་ནཾ…པེ… དྭི་ནྣཾ ཙི་ཏྟཱ་ནཾ ས་མོ་དྷཱ་ནཾ ཧོ་ཏཱི་ཏི? ན ཧེ་ཝཾ ཝ་ཏྟ་བྦེ…པེ….
ཛྷཱ་ན་ནི་ཀ་ནྟི ཨ་ཀུ་ས་ལཾ, ཛྷཱ་ནཾ ཀུ་ས་ལ་ནྟི? ཨཱ་མ་ནྟཱ. ཀུ་ས་ལཱ་ཀུ་ས་ལཱ སཱ་ཝ་ཛྫཱ་ན་ཝ་ཛྫཱ ཧཱི་ན་པ་ཎཱི་ཏཱ ཀ་ཎྷ་སུ་ཀྐ་ས་པྤ་ཊི་བྷཱ་གཱ དྷ་མྨཱ ས་མྨུ་ཁཱི་བྷཱ་ཝཾ ཨཱ་ག་ཙྪ་ནྟཱི་ཏི? ན ཧེ་ཝཾ ཝ་ཏྟ་བྦེ…པེ….
༦༧༢. ཀུ་ས་ལཱ་ཀུ་ས་ལཱ སཱ་ཝ་ཛྫཱ་ན་ཝ་ཛྫཱ ཧཱི་ན་པ་ཎཱི་ཏཱ ཀ་ཎྷ་སུ་ཀྐ་ས་པྤ་ཊི་བྷཱ་གཱ དྷ་མྨཱ ས་མྨུ་ཁཱི་བྷཱ་ཝཾ ཨཱ་ག་ཙྪ་ནྟཱི་ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ – ‘‘ཙ་ཏྟཱ་རི་མཱ་ནི, བྷི་ཀྑ་ཝེ, སུ་ཝི་དཱུ་ར་ཝི་དཱུ་རཱ་ནི! ཀ་ཏ་མཱ་ནི ཙ་ཏྟཱ་རི? ན་བྷ་ཉྩ, བྷི་ཀྑ་ཝེ, པ་ཐ་ཝཱི ཙ – ཨི་དཾ པ་ཋ་མཾ སུ་ཝི་དཱུ་ར་ཝི་དཱུ་རཾ…པེ… ཏ་སྨཱ ས་ཏཾ དྷ་མྨོ ཨ་ས་བྦྷི ཨཱ་ར་ཀཱ’’ཏི. ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ན ཝ་ཏྟ་བྦཾ – ‘‘ཀུ་ས་ལཱ་ཀུ་ས་ལཱ སཱ་ཝ་ཛྫཱ་ན་ཝ་ཛྫཱ ཧཱི་ན་པ་ཎཱི་ཏཱ ཀ་ཎྷ་སུ་ཀྐ་ས་པྤ་ཊི་བྷཱ་གཱ དྷ་མྨཱ ས་མྨུ་ཁཱི་བྷཱ་ཝཾ ཨཱ་ག་ཙྪ་ནྟཱི’’ཏི.
༦༧༣. ན ཝ་ཏྟ་བྦཾ – ‘‘ས་མཱ་པ་ནྣོ ཨ་སྶཱ་དེ་ཏི, ཛྷཱ་ན་ནི་ཀ་ནྟི ཛྷཱ་ནཱ་ར་མྨ་ཎཱ’’ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ – ‘‘ཨི་དྷ, བྷི་ཀྑ་ཝེ, བྷི་ཀྑུ ཝི་ཝི་ཙྩེ་ཝ ཀཱ་མེ་ཧི ཝི་ཝི་ཙྩ ཨ་ཀུ་ས་ལེ་ཧི དྷ་མྨེ་ཧི པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏི, སོ ཏཾ ཨ་སྶཱ་དེ་ཏི ཏཾ ནི་ཀཱ་མེ་ཏི ཏེ་ན ཙ ཝི་ཏྟིཾ ཨཱ་པ་ཛྫ་ཏི; ཝི་ཏ་ཀྐ་ཝི་ཙཱ་རཱ་ནཾ ཝཱུ་པ་ས་མཱ…པེ… དུ་ཏི་ཡཾ ཛྷཱ་ནཾ…པེ… ཏ་ཏི་ཡཾ ཛྷཱ་ནཾ…པེ… ཙ་ཏུ་ཏྠཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏི, སོ ཏཾ ཨ་སྶཱ་དེ་ཏི ཏཾ ནི་ཀཱ་མེ་ཏི ཏེ་ན ཙ ཝི་ཏྟིཾ ཨཱ་པ་ཛྫ་ཏཱི’’ཏི [ཨ. ནི. ༤.༡༢༣]! ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ས་མཱ་པ་ནྣོ ཨ་སྶཱ་དེ་ཏི, ཛྷཱ་ན་ནི་ཀ་ནྟི ཛྷཱ་ནཱ་ར་མྨ་ཎཱ་ཏི.
ས་མཱ་པ་ནྣོ ཨ་སྶཱ་དེ་ཏི་ཀ་ཐཱ ནི་ཊྛི་ཏཱ.
༡༣. ཏེ་ར་ས་མ་ཝ་གྒོ
(༡༣༣) ༨. ཨ་སཱ་ཏ་རཱ་ག་ཀ་ཐཱ
༦༧༤. ཨ་ཏྠི ཨ་སཱ་ཏ་རཱ་གོ་ཏི? ཨཱ་མ་ནྟཱ. དུ་ཀྑཱ་བྷི་ན་ནྡི་ནོ ས་ཏྟཱ, ཨ་ཏྠི ཀེ་ཙི དུ་ཀྑཾ པ་ཏྠེ་ནྟི པི་ཧེ་ནྟི ཨེ་ས་ནྟི ག་ཝེ་ས་ནྟི པ་རི་ཡེ་ས་ནྟི, དུ་ཀྑཾ ཨ་ཛ྄ཛྷོ་སཱ་ཡ ཏི་ཊྛ་ནྟཱི་ཏི? ན ཧེ་ཝཾ ཝ་ཏྟ་བྦེ…པེ… ན་ནུ སུ་ཁཱ་བྷི་ན་ནྡི་ནོ ས་ཏྟཱ, ཨ་ཏྠི ཀེ་ཙི སུ་ཁཾ པ་ཏྠེ་ནྟི པི་ཧེ་ནྟི ཨེ་ས་ནྟི ག་ཝེ་ས་ནྟི པ་རི་ཡེ་ས་ནྟི, སུ་ཁཾ ཨ་ཛ྄ཛྷོ་སཱ་ཡ ཏི་ཊྛ་ནྟཱི་ཏི? ཨཱ་མ་ནྟཱ. ཧ་ཉྩི སུ་ཁཱ་བྷི་ན་ནྡི་ནོ ས་ཏྟཱ, ཨ་ཏྠི ཀེ་ཙི སུ་ཁཾ པ་ཏྠེ་ནྟི པི་ཧེ་ནྟི ཨེ་ས་ནྟི ག་ཝེ་ས་ནྟི པ་རི་ཡེ་ས་ནྟི, སུ་ཁཾ ཨ་ཛ྄ཛྷོ་སཱ་ཡ ཏི་ཊྛ་ནྟི, ནོ ཙ ཝ་ཏ རེ ཝ་ཏྟ་བྦེ – ‘‘ཨ་ཏྠི ཨ་སཱ་ཏ་རཱ་གོ’’ཏི.
ཨ་ཏྠི ཨ་སཱ་ཏ་རཱ་གོ་ཏི? ཨཱ་མ་ནྟཱ. དུ་ཀྑཱ་ཡ ཝེ་ད་ནཱ་ཡ རཱ་གཱ་ནུ་ས་ཡོ ཨ་ནུ་སེ་ཏི, སུ་ཁཱ་ཡ ཝེ་ད་ནཱ་ཡ པ་ཊི་གྷཱ་ནུ་ས་ཡོ ཨ་ནུ་སེ་ཏཱི་ཏི? ན ཧེ་ཝཾ ཝ་ཏྟ་བྦེ…པེ… ན་ནུ སུ་ཁཱ་ཡ ཝེ་ད་ནཱ་ཡ རཱ་གཱ་ནུ་ས་ཡོ ཨ་ནུ་སེ་ཏི, དུ་ཀྑཱ་ཡ ཝེ་ད་ནཱ་ཡ པ་ཊི་གྷཱ་ནུ་ས་ཡོ ཨ་ནུ་སེ་ཏཱི་ཏི? ཨཱ་མ་ནྟཱ. ཧ་ཉྩི སུ་ཁཱ་ཡ ཝེ་ད་ནཱ་ཡ རཱ་གཱ་ནུ་ས་ཡོ ཨ་ནུ་སེ་ཏི, དུ་ཀྑཱ་ཡ ཝེ་ད་ནཱ་ཡ པ་ཊི་གྷཱ་ནུ་ས་ཡོ ཨ་ནུ་སེ་ཏི, ནོ ཙ ཝ་ཏ རེ ཝ་ཏྟ་བྦེ – ‘‘ཨ་ཏྠི ཨ་སཱ་ཏ་རཱ་གོ’’ཏི.
༦༧༥. ན ཝ་ཏྟ་བྦཾ – ‘‘ཨ་ཏྠི ཨ་སཱ་ཏ་རཱ་གོ’’ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ – ‘‘སོ ཨེ་ཝཾ ཨ་ནུ་རོ་དྷ་ཝི་རོ་དྷཾ ས་མཱ་པ་ནྣོ ཡཾ ཀི་ཉྩི ཝེ་ད་ནཾ ཝེ་ད་ཡ་ཏི སུ་ཁཾ ཝཱ དུ་ཀྑཾ ཝཱ ཨ་དུ་ཀྑ་མ་སུ་ཁཾ ཝཱ, སོ ཏཾ ཝེ་ད་ནཾ ཨ་བྷི་ན་ནྡ་ཏི ཨ་བྷི་ཝ་ད་ཏི ཨ་ཛ྄ཛྷོ་སཱ་ཡ ཏི་ཊྛ་ཏཱི’’ཏི [མ. ནི. ༣.༤༠༩ མ་ཧཱ་ཏ་ཎྷཱ་ས་ངྑ་ཡེ]! ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ཨ་ཏྠི ཨ་སཱ་ཏ་རཱ་གོ་ཏི.
ཨ་སཱ་ཏ་རཱ་ག་ཀ་ཐཱ ནི་ཊྛི་ཏཱ.
༡༣. ཏེ་ར་ས་མ་ཝ་གྒོ
(༡༣༤) ༩. དྷ་མྨ་ཏ་ཎྷཱ ཨ་བྱཱ་ཀ་ཏཱ་ཏི་ཀ་ཐཱ
༦༧༦. དྷ་མྨ་ཏ་ཎྷཱ ཨ་བྱཱ་ཀ་ཏཱ་ཏི? ཨཱ་མ་ནྟཱ. ཝི་པཱ་ཀཱ་བྱཱ་ཀ་ཏཱ ཀི་རི་ཡཱ་བྱཱ་ཀ་ཏཱ རཱུ་པཾ ནི་བྦཱ་ནཾ ཙ་ཀྑཱ་ཡ་ཏ་ནཾ…པེ… ཕོ་ཊྛ་བྦཱ་ཡ་ཏ་ན་ནྟི? ན ཧེ་ཝཾ ཝ་ཏྟ་བྦེ…པེ….
དྷ་མྨ་ཏ་ཎྷཱ ཨ་བྱཱ་ཀ་ཏཱ་ཏི? ཨཱ་མ་ནྟཱ. རཱུ་པ་ཏ་ཎྷཱ ཨ་བྱཱ་ཀ་ཏཱ་ཏི? ན ཧེ་ཝཾ ཝ་ཏྟ་བྦེ …པེ… དྷ་མྨ་ཏ་ཎྷཱ ཨ་བྱཱ་ཀ་ཏཱ་ཏི? ཨཱ་མ་ནྟཱ. ས་དྡ་ཏ་ཎྷཱ…པེ… ག་ནྡྷ་ཏ་ཎྷཱ…པེ… ར་ས་ཏ་ཎྷཱ…པེ… ཕོ་ཊྛ་བྦ་ཏ་ཎྷཱ ཨ་བྱཱ་ཀ་ཏཱ་ཏི? ན ཧེ་ཝཾ ཝ་ཏྟ་བྦེ…པེ….
རཱུ་པ་ཏ་ཎྷཱ ཨ་ཀུ་ས་ལཱ་ཏི? ཨཱ་མ་ནྟཱ. དྷ་མྨ་ཏ་ཎྷཱ ཨ་ཀུ་ས་ལཱ་ཏི? ན ཧེ་ཝཾ ཝ་ཏྟ་བྦེ…པེ… ས་དྡ་ཏ་ཎྷཱ…པེ… ཕོ་ཊྛ་བྦ་ཏ་ཎྷཱ ཨ་ཀུ་ས་ལཱ་ཏི? ཨཱ་མ་ནྟཱ. དྷ་མྨ་ཏ་ཎྷཱ ཨ་ཀུ་ས་ལཱ་ཏི? ན ཧེ་ཝཾ ཝ་ཏྟ་བྦེ…པེ….
༦༧༧. དྷ་མྨ་ཏ་ཎྷཱ ཨ་བྱཱ་ཀ་ཏཱ་ཏི? ཨཱ་མ་ནྟཱ. ན་ནུ ཏ་ཎྷཱ ཨ་ཀུ་ས་ལཱ ཝུ་ཏྟཱ བྷ་ག་ཝ་ཏཱ་ཏི? ཨཱ་མ་ནྟཱ. ཧ་ཉྩི ཏ་ཎྷཱ ཨ་ཀུ་ས་ལཱ ཝུ་ཏྟཱ བྷ་ག་ཝ་ཏཱ, ནོ ཙ ཝ་ཏ རེ ཝ་ཏྟ་བྦེ – ‘‘དྷ་མྨ་ཏ་ཎྷཱ ཨ་བྱཱ་ཀ་ཏཱ’’ཏི.
དྷ་མྨ་ཏ་ཎྷཱ ཨ་བྱཱ་ཀ་ཏཱ་ཏི? ཨཱ་མ་ནྟཱ. ན་ནུ ལོ་བྷོ ཨ་ཀུ་ས་ལོ ཝུ་ཏྟོ བྷ་ག་ཝ་ཏཱ, དྷ་མྨ་ཏ་ཎྷཱ ལོ་བྷོ་ཏི? ཨཱ་མ་ནྟཱ. ཧ་ཉྩི ལོ་བྷོ ཨ་ཀུ་ས་ལོ ཝུ་ཏྟོ བྷ་ག་ཝ་ཏཱ, དྷ་མྨ་ཏ་ཎྷཱ ལོ་བྷོ, ནོ ཙ ཝ་ཏ རེ ཝ་ཏྟ་བྦེ – ‘‘དྷ་མྨ་ཏ་ཎྷཱ ཨ་བྱཱ་ཀ་ཏཱ’’ཏི.
༦༧༨. དྷ་མྨ་ཏ་ཎྷཱ ལོ་བྷོ ཨ་བྱཱ་ཀ་ཏོ་ཏི? ཨཱ་མ་ནྟཱ. རཱུ་པ་ཏ་ཎྷཱ ལོ་བྷོ ཨ་བྱཱ་ཀ་ཏོ་ཏི? ན ཧེ་ཝཾ ཝ་ཏྟ་བྦེ…པེ… དྷ་མྨ་ཏ་ཎྷཱ ལོ་བྷོ ཨ་བྱཱ་ཀ་ཏོ་ཏི? ཨཱ་མ་ནྟཱ. ས་དྡ་ཏ་ཎྷཱ…པེ… ཕོ་ཊྛ་བྦ་ཏ་ཎྷཱ ལོ་བྷོ ཨ་བྱཱ་ཀ་ཏོ་ཏི? ན ཧེ་ཝཾ ཝ་ཏྟ་བྦེ…པེ….
རཱུ་པ་ཏ་ཎྷཱ ལོ་བྷོ ཨ་ཀུ་ས་ལོ་ཏི? ཨཱ་མ་ནྟཱ. དྷ་མྨ་ཏ་ཎྷཱ ལོ་བྷོ ཨ་ཀུ་ས་ལོ་ཏི? ན ཧེ་ཝཾ ཝ་ཏྟ་བྦེ…པེ… ས་དྡ་ཏ་ཎྷཱ…པེ… ཕོ་ཊྛ་བྦ་ཏ་ཎྷཱ ལོ་བྷོ ཨ་ཀུ་ས་ལོ་ཏི? ཨཱ་མ་ནྟཱ. དྷ་མྨ་ཏ་ཎྷཱ ལོ་བྷོ ཨ་ཀུ་ས་ལོ་ཏི? ན ཧེ་ཝཾ ཝ་ཏྟ་བྦེ…པེ….
༦༧༩. དྷ་མྨ་ཏ་ཎྷཱ ཨ་བྱཱ་ཀ་ཏཱ་ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ – ‘‘ཡཱ་ཡཾ ཏ་ཎྷཱ པོ་ནོ་བྦྷ་ཝི་ཀཱ ན་ནྡཱི་རཱ་ག་ས་ཧ་ག་ཏཱ ཏ་ཏྲ་ཏ་ཏྲཱ་བྷི་ན་ནྡི་ནཱི, སེ་ཡྻ་ཐི་དཾ – ཀཱ་མ་ཏ་ཎྷཱ, བྷ་ཝ་ཏ་ཎྷཱ, ཝི་བྷ་ཝ་ཏ་ཎྷཱ’’ཏི [མ་ཧཱ་ཝ. ༡༤; དཱི. ནི. ༢.༤༠༠]! ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ན ཝ་ཏྟ་བྦཾ – ‘‘དྷ་མྨ་ཏ་ཎྷཱ ཨ་བྱཱ་ཀ་ཏཱ’’ཏི.
༦༨༠. ན ཝ་ཏྟ་བྦཾ – ‘‘དྷ་མྨ་ཏ་ཎྷཱ ཨ་བྱཱ་ཀ་ཏཱ’’ཏི? ཨཱ་མ་ནྟཱ. ན་ནུ སཱ དྷ་མྨ་ཏ་ཎྷཱ་ཏི? ཨཱ་མ་ནྟཱ. ཧ་ཉྩི སཱ དྷ་མྨ་ཏ་ཎྷཱ, ཏེ་ན ཝ་ཏ རེ ཝ་ཏྟ་བྦེ – ‘‘དྷ་མྨ་ཏ་ཎྷཱ ཨ་བྱཱ་ཀ་ཏཱ’’ཏི.
དྷ་མྨ་ཏ་ཎྷཱ ཨ་བྱཱ་ཀ་ཏཱ་ཏི་ཀ་ཐཱ ནི་ཊྛི་ཏཱ.
༡༣. ཏེ་ར་ས་མ་ཝ་གྒོ
(༡༣༥) ༡༠. དྷ་མྨ་ཏ་ཎྷཱ ན དུ་ཀྑ་ས་མུ་ད་ཡོ་ཏི་ཀ་ཐཱ
༦༨༡. དྷ་མྨ་ཏ་ཎྷཱ ན དུ་ཀྑ་ས་མུ་ད་ཡོ་ཏི? ཨཱ་མ་ནྟཱ. རཱུ་པ་ཏ་ཎྷཱ ན དུ་ཀྑ་ས་མུ་ད་ཡོ་ཏི? ན ཧེ་ཝཾ ཝ་ཏྟ་བྦེ…པེ… དྷ་མྨ་ཏ་ཎྷཱ ན དུ་ཀྑ་ས་མུ་ད་ཡོ་ཏི? ཨཱ་མ་ནྟཱ. ས་དྡ་ཏ་ཎྷཱ…པེ… ག་ནྡྷ་ཏ་ཎྷཱ…པེ… ར་ས་ཏ་ཎྷཱ…པེ… ཕོ་ཊྛ་བྦ་ཏ་ཎྷཱ ན དུ་ཀྑ་ས་མུ་ད་ཡོ་ཏི? ན ཧེ་ཝཾ ཝ་ཏྟ་བྦེ…པེ….
རཱུ་པ་ཏ་ཎྷཱ དུ་ཀྑ་ས་མུ་ད་ཡོ་ཏི? ཨཱ་མ་ནྟཱ. དྷ་མྨ་ཏ་ཎྷཱ དུ་ཀྑ་ས་མུ་ད་ཡོ་ཏི? ན ཧེ་ཝཾ ཝ་ཏྟ་བྦེ…པེ… ས་དྡ་ཏ་ཎྷཱ…པེ… ག་ནྡྷ་ཏ་ཎྷཱ…པེ… ར་ས་ཏ་ཎྷཱ…པེ… ཕོ་ཊྛ་བྦ་ཏ་ཎྷཱ དུ་ཀྑ་ས་མུ་ད་ཡོ་ཏི? ཨཱ་མ་ནྟཱ. དྷ་མྨ་ཏ་ཎྷཱ དུ་ཀྑ་ས་མུ་ད་ཡོ་ཏི? ན ཧེ་ཝཾ ཝ་ཏྟ་བྦེ…པེ….
༦༨༢. དྷ་མྨ་ཏ་ཎྷཱ ན དུ་ཀྑ་ས་མུ་ད་ཡོ་ཏི? ཨཱ་མ་ནྟཱ. ན་ནུ ཏ་ཎྷཱ དུ་ཀྑ་ས་མུ་ད་ཡོ ཝུ་ཏྟོ བྷ་ག་ཝ་ཏཱ་ཏི? ཨཱ་མ་ནྟཱ. ཧ་ཉྩི ཏ་ཎྷཱ དུ་ཀྑ་ས་མུ་ད་ཡོ ཝུ་ཏྟོ བྷ་ག་ཝ་ཏཱ, ནོ ཙ ཝ་ཏ རེ ཝ་ཏྟ་བྦེ – ‘‘དྷ་མྨ་ཏ་ཎྷཱ ན དུ་ཀྑ་ས་མུ་ད་ཡོ’’ཏི. དྷ་མྨ་ཏ་ཎྷཱ ན དུ་ཀྑ་ས་མུ་ད་ཡོ་ཏི? ཨཱ་མ་ནྟཱ. ན་ནུ ལོ་བྷོ དུ་ཀྑ་ས་མུ་ད་ཡོ ཝུ་ཏྟོ བྷ་ག་ཝ་ཏཱ, དྷ་མྨ་ཏ་ཎྷཱ ལོ་བྷོ་ཏི? ཨཱ་མ་ནྟཱ. ཧ་ཉྩི ལོ་བྷོ དུ་ཀྑ་ས་མུ་ད་ཡོ ཝུ་ཏྟོ བྷ་ག་ཝ་ཏཱ, དྷ་མྨ་ཏ་ཎྷཱ ལོ་བྷོ, ནོ ཙ ཝ་ཏ རེ ཝ་ཏྟ་བྦེ – ‘‘དྷ་མྨ་ཏ་ཎྷཱ ན དུ་ཀྑ་ས་མུ་ད་ཡོ’’ཏི.
༦༨༣. དྷ་མྨ་ཏ་ཎྷཱ ལོ་བྷོ, ན དུ་ཀྑ་ས་མུ་ད་ཡོ་ཏི? ཨཱ་མ་ནྟཱ. རཱུ་པ་ཏ་ཎྷཱ ལོ་བྷོ, ན དུ་ཀྑ་ས་མུ་ད་ཡོ་ཏི? ན ཧེ་ཝཾ ཝ་ཏྟ་བྦེ…པེ… དྷ་མྨ་ཏ་ཎྷཱ ལོ་བྷོ, ན དུ་ཀྑ་ས་མུ་ད་ཡོ་ཏི? ཨཱ་མ་ནྟཱ. ས་དྡ་ཏ་ཎྷཱ…པེ… ག་ནྡྷ་ཏ་ཎྷཱ…པེ… ར་ས་ཏ་ཎྷཱ…པེ… ཕོ་ཊྛ་བྦ་ཏ་ཎྷཱ ལོ་བྷོ, ན དུ་ཀྑ་ས་མུ་ད་ཡོ་ཏི? ན ཧེ་ཝཾ ཝ་ཏྟ་བྦེ…པེ….
རཱུ་པ་ཏ་ཎྷཱ ལོ་བྷོ དུ་ཀྑ་ས་མུ་ད་ཡོ་ཏི? ཨཱ་མ་ནྟཱ. དྷ་མྨ་ཏ་ཎྷཱ ལོ་བྷོ དུ་ཀྑ་ས་མུ་ད་ཡོ་ཏི? ན ཧེ་ཝཾ ཝ་ཏྟ་བྦེ…པེ… ས་དྡ་ཏ་ཎྷཱ…པེ… ཕོ་ཊྛ་བྦ་ཏ་ཎྷཱ ལོ་བྷོ དུ་ཀྑ་ས་མུ་ད་ཡོ་ཏི? ཨཱ་མ་ནྟཱ. དྷ་མྨ་ཏ་ཎྷཱ ལོ་བྷོ དུ་ཀྑ་ས་མུ་ད་ཡོ་ཏི? ན ཧེ་ཝཾ ཝ་ཏྟ་བྦེ…པེ….
༦༨༤. དྷ་མྨ་ཏ་ཎྷཱ ན དུ་ཀྑ་ས་མུ་ད་ཡོ་ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ – ‘‘ཡཱ་ཡཾ ཏ་ཎྷཱ པོ་ནོ་བྦྷ་ཝི་ཀཱ ན་ནྡཱི་རཱ་ག་ས་ཧ་ག་ཏཱ ཏ་ཏྲ་ཏ་ཏྲཱ་བྷི་ན་ནྡི་ནཱི, སེ་ཡྻ་ཐི་དཾ – ཀཱ་མ་ཏ་ཎྷཱ, བྷ་ཝ་ཏ་ཎྷཱ, ཝི་བྷ་ཝ་ཏ་ཎྷཱ’’ཏི! ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ན ཝ་ཏྟ་བྦཾ – ‘‘དྷ་མྨ་ཏ་ཎྷཱ ན དུ་ཀྑ་ས་མུ་ད་ཡོ’’ཏི.
༦༨༥. ན ཝ་ཏྟ་བྦཾ – ‘‘དྷ་མྨ་ཏ་ཎྷཱ ན དུ་ཀྑ་ས་མུ་ད་ཡོ’’ཏི? ཨཱ་མ་ནྟཱ. ན་ནུ སཱ དྷ་མྨ་ཏ་ཎྷཱ་ཏི? ཨཱ་མ་ནྟཱ. ཧ་ཉྩི སཱ དྷ་མྨ་ཏ་ཎྷཱ, ཏེ་ན ཝ་ཏ རེ ཝ་ཏྟ་བྦེ – ‘‘དྷ་མྨ་ཏ་ཎྷཱ ན དུ་ཀྑ་ས་མུ་ད་ཡོ’’ཏི.
དྷ་མྨ་ཏ་ཎྷཱ ན དུ་ཀྑ་ས་མུ་ད་ཡོ་ཏི་ཀ་ཐཱ ནི་ཊྛི་ཏཱ.
ཏེ་ར་ས་མ་ཝ་གྒོ.
ཏ་སྶུ་དྡཱ་ནཾ –
ཀ་པྤ་ཊྛོ ཀ་པྤཾ ཏི་ཊྛེ་ཡྻ, ཀ་པྤ་ཊྛོ ཀུ་ས་ལཾ ཙི་ཏྟཾ ན པ་ཊི་ལ་བྷེ་ཡྻ, ཨ་ན་ནྟ་རཱ་པ་ཡུ་ཏྟོ པུ་གྒ་ལོ ས་མྨ་ཏྟ་ནི་ཡཱ་མཾ ཨོ་ཀྐ་མེ་ཡྻ, ནི་ཡ་ཏོ ནི་ཡཱ་མཾ ཨོ་ཀྐ་མ་ཏི, ནི་ཝུ་ཏོ ནཱི་ཝ་ར་ཎཾ ཛ་ཧ་ཏི, ས་མྨུ་ཁཱི་བྷཱུ་ཏོ སཾ་ཡོ་ཛ་ནཾ ཛ་ཧ་ཏི, ཛྷཱ་ན་ནི་ཀ་ནྟི, ཨ་སཱ་ཏ་རཱ་གོ, དྷ་མྨ་ཏ་ཎྷཱ ཨ་བྱཱ་ཀ་ཏཱ, དྷ་མྨ་ཏ་ཎྷཱ ན དུ་ཀྑ་ས་མུ་ད་ཡོ་ཏི.