༡༢. དྭཱ་ད་ས་མ་ཝ་གྒོ

(༡༢༣) ༨. ཛཱི་ཝི་ཏཱ ཝོ་རོ་པ་ན་ཀ་ཐཱ

༦༤༨. དི་ཊྛི་ས་མྤ་ནྣོ པུ་གྒ་ལོ ས་ཉྩི་ཙྩ པཱ་ཎཾ ཛཱི་ཝི་ཏཱ ཝོ་རོ་པེ་ཡྻཱ་ཏི? ཨཱ་མ་ནྟཱ. དི་ཊྛི་ས་མྤ་ནྣོ པུ་གྒ་ལོ ས་ཉྩི་ཙྩ མཱ་ཏ་རཾ ཛཱི་ཝི་ཏཱ ཝོ་རོ་པེ་ཡྻ…པེ… པི་ཏ་རཾ ཛཱི་ཝི་ཏཱ ཝོ་རོ་པེ་ཡྻ …པེ… ཨ་ར་ཧ་ནྟཾ ཛཱི་ཝི་ཏཱ ཝོ་རོ་པེ་ཡྻ…པེ… དུ་ཊྛེ་ན ཙི་ཏྟེ་ན ཏ་ཐཱ་ག་ཏ་སྶ ལོ་ཧི་ཏཾ ཨུ་པྤཱ་དེ་ཡྻ…པེ… ས་ངྒྷཾ བྷི་ནྡེ་ཡྻཱ་ཏི? ན ཧེ་ཝཾ ཝ་ཏྟ་བྦེ…པེ….

དི་ཊྛི་ས་མྤ་ནྣོ པུ་གྒ་ལོ ས་ཉྩི་ཙྩ པཱ་ཎཾ ཛཱི་ཝི་ཏཱ ཝོ་རོ་པེ་ཡྻཱ་ཏི? ཨཱ་མ་ནྟཱ. དི་ཊྛི་ས་མྤ་ནྣོ པུ་གྒ་ལོ ས་ཏྠ་རི ཨ་གཱ་ར་ཝོ་ཏི? ན ཧེ་ཝཾ ཝ་ཏྟ་བྦེ…པེ… དྷ་མྨེ…པེ… ས་ངྒྷེ…པེ… སི་ཀྑཱ་ཡ ཨ་གཱ་ར་ཝོ་ཏི? ན ཧེ་ཝཾ ཝ་ཏྟ་བྦེ…པེ….

ན་ནུ དི་ཊྛི་ས་མྤ་ནྣོ པུ་གྒ་ལོ ས་ཏྠ་རི ས་གཱ་ར་ཝོ་ཏི? ཨཱ་མ་ནྟཱ. ཧ་ཉྩི དི་ཊྛི་ས་མྤ་ནྣོ པུ་གྒ་ལོ ས་ཏྠ་རི ས་གཱ་ར་ཝོ, ནོ ཙ ཝ་ཏ རེ ཝ་ཏྟ་བྦེ – ‘‘དི་ཊྛི་ས་མྤ་ནྣོ པུ་གྒ་ལོ ས་ཉྩི་ཙྩ པཱ་ཎཾ ཛཱི་ཝི་ཏཱ ཝོ་རོ་པེ་ཡྻཱ’’ཏི. ན་ནུ དི་ཊྛི་ས་མྤ་ནྣོ པུ་གྒ་ལོ དྷ་མྨེ…པེ… ས་ངྒྷེ…པེ… སི་ཀྑཱ་ཡ ས་གཱ་ར་ཝོ་ཏི? ཨཱ་མ་ནྟཱ. ཧ་ཉྩི དི་ཊྛི་ས་མྤ་ནྣོ པུ་གྒ་ལོ སི་ཀྑཱ་ཡ ས་གཱ་ར་ཝོ, ནོ ཙ ཝ་ཏ རེ ཝ་ཏྟ་བྦེ – ‘‘དི་ཊྛི་ས་མྤ་ནྣོ པུ་གྒ་ལོ ས་ཉྩི་ཙྩ པཱ་ཎཾ ཛཱི་ཝི་ཏཱ ཝོ་རོ་པེ་ཡྻཱ’’ཏི.

༦༤༩. དི་ཊྛི་ས་མྤ་ནྣོ པུ་གྒ་ལོ ས་ཏྠ་རི ཨ་གཱ་ར་ཝོ་ཏི? ཨཱ་མ་ནྟཱ. དི་ཊྛི་ས་མྤ་ནྣོ པུ་གྒ་ལོ བུ་དྡྷ་ཐཱུ་པེ ཨོ་ཧ་དེ་ཡྻ ཨོ་མུ་ཏྟེ་ཡྻ ནི་ཊྛུ་བྷེ་ཡྻ བུ་དྡྷ་ཐཱུ་པེ ཨ་པ་བྱཱ་མ་ཏོ [ཨ་ས་བྱཱ་ཀ་ཏོ (སཱི. ཀ.)] ཀ་རེ་ཡྻཱ་ཏི? ན ཧེ་ཝཾ ཝ་ཏྟ་བྦེ…པེ….

དི་ཊྛི་ས་མྤ་ནྣོ པུ་གྒ་ལོ ས་ཉྩི་ཙྩ པཱ་ཎཾ ཛཱི་ཝི་ཏཱ ཝོ་རོ་པེ་ཡྻཱ་ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ – ‘‘སེ་ཡྻ་ཐཱ་པི, བྷི་ཀྑ་ཝེ, མ་ཧཱ་ས་མུ་དྡོ ཋི་ཏ་དྷ་མྨོ ཝེ་ལཾ ནཱ་ཏི་ཝ་ཏྟ་ཏི; ཨེ་ཝ་མེ་ཝ ཁོ, བྷི་ཀྑ་ཝེ, ཡཾ མ་ཡཱ སཱ་ཝ་ཀཱ་ནཾ སི་ཀྑཱ་པ་དཾ པ་ཉྙ་ཏྟཾ ཏཾ མ་མ སཱ་ཝ་ཀཱ ཛཱི་ཝི་ཏ་ཧེ་ཏུ་པི ནཱ་ཏི་ཀྐ་མ་ནྟཱི’’ཏི [ཙཱུ་ལ༹་ཝ. ༣༨༥; ཨ. ནི. ༨.༢༠; ཨུ་དཱ. ༤༥]! ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ན ཝ་ཏྟ་བྦཾ – ‘‘དི་ཊྛི་ས་མྤ་ནྣོ པུ་གྒ་ལོ ས་ཉྩི་ཙྩ པཱ་ཎཾ ཛཱི་ཝི་ཏཱ ཝོ་རོ་པེ་ཡྻཱ’’ཏི.

ཛཱི་ཝི་ཏཱ ཝོ་རོ་པ་ན་ཀ་ཐཱ ནི་ཊྛི་ཏཱ.