(༦༧) ༥. པ་རི་བྷོ་ག་མ་ཡ་པུ་ཉྙ་ཀ་ཐཱ
༤༨༣. པ་རི་བྷོ་ག་མ་ཡཾ པུ་ཉྙཾ ཝ་ཌྜྷ་ཏཱི་ཏི? ཨཱ་མ་ནྟཱ. པ་རི་བྷོ་ག་མ་ཡོ ཕ་སྶོ ཝ་ཌྜྷ་ཏི, ཝེ་ད་ནཱ ཝ་ཌྜྷ་ཏི, ས་ཉྙཱ ཝ་ཌྜྷ་ཏི, ཙེ་ཏ་ནཱ ཝ་ཌྜྷ་ཏི, ཙི་ཏྟཾ ཝ་ཌྜྷ་ཏི, ས་དྡྷཱ ཝ་ཌྜྷ་ཏི, ཝཱི་རི་ཡཾ ཝ་ཌྜྷ་ཏི, ས་ཏི ཝ་ཌྜྷ་ཏི, ས་མཱ་དྷི ཝ་ཌྜྷ་ཏི, པ་ཉྙཱ ཝ་ཌྜྷ་ཏཱི་ཏི? ན ཧེ་ཝཾ ཝ་ཏྟ་བྦེ…པེ….
པ་རི་བྷོ་ག་མ་ཡཾ པུ་ཉྙཾ ཝ་ཌྜྷ་ཏཱི་ཏི? ཨཱ་མ་ནྟཱ. ལ་ཏཱ ཝི་ཡ ཝ་ཌྜྷ་ཏི, མཱ་ལུ་ཝཱ ཝི་ཡ ཝ་ཌྜྷ་ཏི, རུ་ཀྑོ ཝི་ཡ ཝ་ཌྜྷ་ཏི, ཏི་ཎཾ ཝི་ཡ ཝ་ཌྜྷ་ཏི, མུ་ཉྫ་པུ་ཉྫོ ཝི་ཡ ཝ་ཌྜྷ་ཏཱི་ཏི? ན ཧེ་ཝཾ ཝ་ཏྟ་བྦེ…པེ….
༤༨༤. པ་རི་བྷོ་ག་མ་ཡཾ པུ་ཉྙཾ ཝ་ཌྜྷ་ཏཱི་ཏི? ཨཱ་མ་ནྟཱ. དཱ་ཡ་ཀོ དཱ་ནཾ ད་ཏྭཱ ན ས་མ་ནྣཱ་ཧ་ར་ཏི, ཧོ་ཏི པུ་ཉྙ་ནྟི? ཨཱ་མ་ནྟཱ. ཨ་ནཱ་ཝ་ཊྚེ་ནྟ་སྶ [ཨ་ནཱ་ཝ་ཊྚ་ནྟ་སྶ (སཱི. པཱི. ཀ.), ཨ་ནཱ་ཝ་ཛ྄ཛྷ་ནྟ་སྶ (སྱཱ.)] ཧོ་ཏི… ཨ་ནཱ་བྷོ་ག་སྶ ཧོ་ཏི… ཨ་ས་མ་ནྣཱ་ཧ་ར་ནྟ་སྶ ཧོ་ཏི… ཨ་མ་ན་སི་ཀ་རོ་ནྟ་སྶ ཧོ་ཏི… ཨ་ཙེ་ཏ་ཡ་ནྟ་སྶ ཧོ་ཏི… ཨ་པ་ཏྠ་ཡ་ནྟ་སྶ ཧོ་ཏི… ཨ་པྤ་ཎི་ད་ཧ་ནྟ་སྶ ཧོ་ཏཱི་ཏི? ན ཧེ་ཝཾ ཝ་ཏྟ་བྦེ…པེ… ན་ནུ ཨཱ་ཝ་ཊྚེ་ནྟ་སྶ ཧོ་ཏི… ཨཱ་བྷོ་ག་སྶ ཧོ་ཏི… ས་མ་ནྣཱ་ཧ་ར་ནྟ་སྶ ཧོ་ཏི… མ་ན་སི་ཀ་རོ་ནྟ་སྶ ཧོ་ཏི… ཙེ་ཏ་ཡ་ནྟ་སྶ ཧོ་ཏི… པ་ཏྠ་ཡ་ནྟ་སྶ ཧོ་ཏི… པ་ཎི་ད་ཧ་ནྟ་སྶ ཧོ་ཏཱི་ཏི? ཨཱ་མ་ནྟཱ. ཧ་ཉྩི ཨཱ་ཝ་ཊྚེ་ནྟ་སྶ ཧོ་ཏི… ཨཱ་བྷོ་ག་སྶ ཧོ་ཏི… ས་མ་ནྣཱ་ཧ་ར་ནྟ་སྶ ཧོ་ཏི… མ་ན་སི་ཀ་རོ་ནྟ་སྶ ཧོ་ཏི… ཙེ་ཏ་ཡ་ནྟ་སྶ ཧོ་ཏི… པ་ཏྠ་ཡ་ནྟ་སྶ ཧོ་ཏི… པ་ཎི་ད་ཧ་ནྟ་སྶ ཧོ་ཏི, ནོ ཙ ཝ་ཏ རེ ཝ་ཏྟ་བྦེ – ‘‘པ་རི་བྷོ་ག་མ་ཡཾ པུ་ཉྙཾ ཝ་ཌྜྷ་ཏཱི’’ཏི.
༤༨༥. པ་རི་བྷོ་ག་མ་ཡཾ པུ་ཉྙཾ ཝ་ཌྜྷ་ཏཱི་ཏི? ཨཱ་མ་ནྟཱ. དཱ་ཡ་ཀོ དཱ་ནཾ ད་ཏྭཱ ཀཱ་མ་ཝི་ཏ་ཀྐཾ ཝི་ཏ་ཀྐེ་ཏི, བྱཱ་པཱ་ད་ཝི་ཏ་ཀྐཾ ཝི་ཏ་ཀྐེ་ཏི, ཝི་ཧིཾ་སཱ་ཝི་ཏ་ཀྐཾ ཝི་ཏ་ཀྐེ་ཏི, ཧོ་ཏི པུ་ཉྙ་ནྟི? ཨཱ་མ་ནྟཱ. དྭི་ནྣཾ ཕ་སྶཱ་ནཾ…པེ… དྭི་ནྣཾ ཙི་ཏྟཱ་ནཾ ས་མོ་དྷཱ་ནཾ ཧོ་ཏཱི་ཏི? ན ཧེ་ཝཾ ཝ་ཏྟ་བྦེ…པེ… དྭི་ནྣཾ ཕ་སྶཱ་ནཾ…པེ… དྭི་ནྣཾ ཙི་ཏྟཱ་ནཾ ས་མོ་དྷཱ་ནཾ ཧོ་ཏཱི་ཏི? ཨཱ་མ་ནྟཱ. ཀུ་ས་ལཱ་ཀུ་ས་ལཱ སཱ་ཝ་ཛྫཱ་ན་ཝ་ཛྫཱ ཧཱི་ན་པ་ཎཱི་ཏཱ ཀ་ཎྷ་སུ་ཀྐ་ས་པྤ་ཊི་བྷཱ་གཱ དྷ་མྨཱ ས་མྨུ་ཁཱི་བྷཱ་ཝཾ ཨཱ་ག་ཙྪ་ནྟཱི་ཏི? ན ཧེ་ཝཾ ཝ་ཏྟ་བྦེ…པེ… ཀུ་ས་ལཱ་ཀུ་ས་ལཱ སཱ་ཝ་ཛྫཱ་ན་ཝ་ཛྫཱ ཧཱི་ན་པ་ཎཱི་ཏཱ ཀ་ཎྷ་སུ་ཀྐ་ས་པྤ་ཊི་བྷཱ་གཱ དྷ་མྨཱ ས་མྨུ་ཁཱི་བྷཱ་ཝཾ ཨཱ་ག་ཙྪ་ནྟཱི་ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ – ‘‘ཙ་ཏྟཱ་རི་མཱ་ནི, བྷི་ཀྑ་ཝེ, སུ་ཝི་དཱུ་ར་ཝི་དཱུ་རཱ་ནི! ཀ་ཏ་མཱ་ནི ཙ་ཏྟཱ་རི? ན་བྷ་ཉྩ, བྷི་ཀྑ་ཝེ, པ་ཐ་ཝཱི ཙ – ཨི་དཾ པ་ཋ་མཾ སུ་ཝི་དཱུ་ར་ཝི་དཱུ་རཾ. ཨོ་རི་མ་ཉྩ, བྷི་ཀྑ་ཝེ, ཏཱི་རཾ ས་མུ་དྡ་སྶ པཱ་རི་མ་ཉྩ ཏཱི་རཾ – ཨི་དཾ དུ་ཏི་ཡཾ སུ་ཝི་དཱུ་ར་ཝི་དཱུ་རཾ. ཡ་ཏོ ཙ, བྷི་ཀྑ་ཝེ, ཝེ་རོ་ཙ་ནོ ཨ་བྦྷུ་དེ་ཏི ཡ་ཏྠ ཙ ཨ་ཏྠ་མེ་ཏི – ཨི་དཾ ཏ་ཏི་ཡཾ སུ་ཝི་དཱུ་ར་ཝི་དཱུ་རཾ. ས་ཏ་ཉྩ, བྷི་ཀྑ་ཝེ, དྷ་མྨོ ཨ་ས་ཏ་ཉྩ དྷ་མྨོ – ཨི་དཾ ཙ་ཏུ་ཏྠཾ སུ་ཝི་དཱུ་ར་ཝི་དཱུ་རཾ. ཨི་མཱ་ནི ཁོ, བྷི་ཀྑ་ཝེ, ཙ་ཏྟཱ་རི སུ་ཝི་དཱུ་ར་ཝི་དཱུ་རཱ་ནཱི་ཏི.
‘‘ན་བྷ་ཉྩ དཱུ་རེ པ་ཐ་ཝཱི ཙ དཱུ་རེ,
པཱ་རཾ ས་མུ་དྡ་སྶ ཏ་དཱ་ཧུ དཱུ་རེ;
ཡ་ཏོ ཙ ཝེ་རོ་ཙ་ནོ ཨ་བྦྷུ་དེ་ཏི,
པ་བྷ་ངྐ་རོ ཡ་ཏྠ ཙ ཨ་ཏྠ་མེ་ཏི.
‘‘ཏ་ཏོ ཧ་ཝེ དཱུ་ར་ཏ་རཾ ཝ་ད་ནྟི,
ས་ཏ་ཉྩ དྷ་མྨཾ ཨ་ས་ཏ་ཉྩ དྷ་མྨཾ;
ཨ་བྱཱ་ཡི་ཀོ ཧོ་ཏི ས་ཏཾ ས་མཱ་ག་མོ,
ཡཱ་ཝ་མྤི ཏི་ཊྛེ་ཡྻ ཏ་ཐེ་ཝ ཧོ་ཏི.
‘‘ཁི་པྤ་ཉྷི ཝེ་ཏི [ཁི་པྤཾ་ཧ་ཝེ་ཏི (བ་ཧཱུ་སུ)] ཨ་ས་ཏཾ ས་མཱ་ག་མོ;
ཏ་སྨཱ ས་ཏཾ དྷ་མྨོ ཨ་ས་བྦྷི ཨཱ་ར་ཀཱ’’ཏི [ཨ. ནི. ༤.༤༧].
ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ན ཝ་ཏྟ་བྦཾ – ‘‘ཀུ་ས་ལཱ་ཀུ་ས་ལཱ སཱ་ཝ་ཛྫཱ་ན་ཝ་ཛྫཱ ཧཱི་ན་པ་ཎཱི་ཏཱ ཀ་ཎྷ་སུ་ཀྐ་ས་པྤ་ཊི་བྷཱ་གཱ དྷ་མྨཱ ས་མྨུ་ཁཱི་བྷཱ་ཝཾ ཨཱ་ག་ཙྪ་ནྟཱི’’ཏི.
༤༨༦. ན ཝ་ཏྟ་བྦཾ – ‘‘པ་རི་བྷོ་ག་མ་ཡཾ པུ་ཉྙཾ ཝ་ཌྜྷ་ཏཱི’’ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ –
‘‘ཨཱ་རཱ་མ་རོ་པཱ ཝ་ན་རོ་པཱ, ཡེ ཛ་ནཱ སེ་ཏུ་ཀཱ་ར་ཀཱ;
པ་པ་ཉྩ ཨུ་ད་པཱ་ན་ཉྩ, ཡེ ད་ད་ནྟི ཨུ་པ་སྶ་ཡཾ.
‘‘ཏེ་སཾ དི་ཝཱ ཙ ར་ཏྟོ ཙ, ས་དཱ པུ་ཉྙཾ པ་ཝ་ཌྜྷ་ཏི;
དྷ་མྨ་ཊྛཱ སཱི་ལ་ས་མྤ་ནྣཱ, ཏེ ཛ་ནཱ ས་གྒ་གཱ་མི་ནོ’’ཏི [སཾ. ནི. ༡.༤༧].
ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི པ་རི་བྷོ་ག་མ་ཡཾ པུ་ཉྙཾ ཝ་ཌྜྷ་ཏཱི་ཏི.
ན ཝ་ཏྟ་བྦཾ – ‘‘པ་རི་བྷོ་ག་མ་ཡཾ པུ་ཉྙཾ ཝ་ཌྜྷ་ཏཱི’’ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ – ‘‘ཙ་ཏྟཱ་རོ་མེ, བྷི་ཀྑ་ཝེ, པུ་ཉྙཱ་བྷི་ས་ནྡཱ ཀུ་ས་ལཱ་བྷི་ས་ནྡཱ སུ་ཁ་སྶཱ་ཧཱ་རཱ སོ་ཝ་གྒི་ཀཱ སུ་ཁ་ཝི་པཱ་ཀཱ ས་གྒ་སཾ་ཝ་ཏྟ་ནི་ཀཱ ཨི་ཊྛཱ་ཡ ཀ་ནྟཱ་ཡ མ་ནཱ་པཱ་ཡ ཧི་ཏཱ་ཡ སུ་ཁཱ་ཡ སཾ་ཝ་ཏྟ་ནྟི! ཀ་ཏ་མེ ཙ་ཏྟཱ་རོ? ཡ་སྶ, བྷི་ཀྑ་ཝེ, བྷི་ཀྑུ ཙཱི་ཝ་རཾ པ་རི་བྷུ་ཉྫ་མཱ་ནོ ཨ་པྤ་མཱ་ཎཾ ཙེ་ཏོ་ས་མཱ་དྷིཾ ཨུ་པ་ས་མྤ་ཛྫ ཝི་ཧ་ར་ཏི, ཨ་པྤ་མཱ་ཎོ ཏ་སྶ པུ་ཉྙཱ་བྷི་ས་ནྡོ ཀུ་ས་ལཱ་བྷི་ས་ནྡོ སུ་ཁ་སྶཱ་ཧཱ་རོ སོ་ཝ་གྒི་ཀོ སུ་ཁ་ཝི་པཱ་ཀོ ས་གྒ་སཾ་ཝ་ཏྟ་ནི་ཀོ ཨི་ཊྛཱ་ཡ ཀ་ནྟཱ་ཡ མ་ནཱ་པཱ་ཡ ཧི་ཏཱ་ཡ སུ་ཁཱ་ཡ སཾ་ཝ་ཏྟ་ཏི. ཡ་སྶ, བྷི་ཀྑ་ཝེ, བྷི་ཀྑུ པི་ཎྜ་པཱ་ཏཾ པ་རི་བྷུ་ཉྫ་མཱ་ནོ…པེ… སེ་ནཱ་ས་ནཾ པ་རི་བྷུ་ཉྫ་མཱ་ནོ…པེ… གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རཾ པ་རི་བྷུ་ཉྫ་མཱ་ནོ ཨ་པྤ་མཱ་ཎཾ ཙེ་ཏོ་ས་མཱ་དྷིཾ ཨུ་པ་ས་མྤ་ཛྫ ཝི་ཧ་ར་ཏི, ཨ་པྤ་མཱ་ཎོ ཏ་སྶ པུ་ཉྙཱ་བྷི་ས་ནྡོ ཀུ་ས་ལཱ་བྷི་ས་ནྡོ སུ་ཁ་སྶཱ་ཧཱ་རོ སོ་ཝ་གྒི་ཀོ སུ་ཁ་ཝི་པཱ་ཀོ ས་གྒ་སཾ་ཝ་ཏྟ་ནི་ཀོ ཨི་ཊྛཱ་ཡ ཀ་ནྟཱ་ཡ མ་ནཱ་པཱ་ཡ ཧི་ཏཱ་ཡ སུ་ཁཱ་ཡ སཾ་ཝ་ཏྟ་ཏི. ཨི་མེ ཁོ, བྷི་ཀྑ་ཝེ, ཙ་ཏྟཱ་རོ པུ་ཉྙཱ་བྷི་ས་ནྡཱ ཀུ་ས་ལཱ་བྷི་ས་ནྡཱ སུ་ཁ་སྶཱ་ཧཱ་རཱ སོ་ཝ་གྒི་ཀཱ སུ་ཁ་ཝི་པཱ་ཀཱ ས་གྒ་སཾ་ཝ་ཏྟ་ནི་ཀཱ ཨི་ཊྛཱ་ཡ ཀ་ནྟཱ་ཡ མ་ནཱ་པཱ་ཡ ཧི་ཏཱ་ཡ སུ་ཁཱ་ཡ སཾ་ཝ་ཏྟ་ནྟཱི’’ཏི [ཨ. ནི. ༤.༥༡]. ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི པ་རི་བྷོ་ག་མ་ཡཾ པུ་ཉྙཾ ཝ་ཌྜྷ་ཏཱི་ཏི.
༤༨༧. པ་རི་བྷོ་ག་མ་ཡཾ པུ་ཉྙཾ ཝ་ཌྜྷ་ཏཱི་ཏི? ཨཱ་མ་ནྟཱ. དཱ་ཡ་ཀོ དཱ་ནཾ དེ་ཏི, པ་ཊི་གྒཱ་ཧ་ཀོ པ་ཊི་གྒ་ཧེ་ཏྭཱ ན པ་རི་བྷུ་ཉྫ་ཏི ཚ་ཌྜེ་ཏི ཝི་སྶ་ཛྫེ་ཏི, ཧོ་ཏི པུ་ཉྙ་ནྟི? ཨཱ་མ་ནྟཱ. ཧ་ཉྩི དཱ་ཡ་ཀོ དཱ་ནཾ དེ་ཏི, པ་ཊི་གྒཱ་ཧ་ཀོ པ་ཊི་གྒ་ཧེ་ཏྭཱ ན པ་རི་བྷུ་ཉྫ་ཏི ཚ་ཌྜེ་ཏི ཝི་སྶ་ཛྫེ་ཏི, ཧོ་ཏི པུ་ཉྙཾ; ནོ ཙ ཝ་ཏ རེ ཝ་ཏྟ་བྦེ – ‘‘པ་རི་བྷོ་ག་མ་ཡཾ པུ་ཉྙཾ ཝ་ཌྜྷ་ཏཱི’’ཏི.
པ་རི་བྷོ་ག་མ་ཡཾ པུ་ཉྙཾ ཝ་ཌྜྷ་ཏཱི་ཏི? ཨཱ་མ་ནྟཱ. དཱ་ཡ་ཀོ དཱ་ནཾ དེ་ཏི, པ་ཊི་གྒཱ་ཧ་ཀེ པ་ཊི་གྒ་ཧི་ཏེ རཱ་ཛཱ་ནོ ཝཱ ཧ་ར་ནྟི, ཙོ་རཱ ཝཱ ཧ་ར་ནྟི, ཨ་གྒི ཝཱ ད་ཧ་ཏི, ཨུ་ད་ཀཾ ཝཱ ཝ་ཧ་ཏི, ཨ་པྤི་ཡཱ ཝཱ དཱ་ཡཱ་དཱ ཧ་ར་ནྟི, ཧོ་ཏི པུ་ཉྙ་ནྟི? ཨཱ་མ་ནྟཱ. ཧ་ཉྩི དཱ་ཡ་ཀོ དཱ་ནཾ དེ་ཏི, པ་ཊི་གྒཱ་ཧ་ཀེ པ་ཊི་གྒ་ཧི་ཏེ རཱ་ཛཱ་ནོ ཝཱ ཧ་ར་ནྟི, ཙོ་རཱ ཝཱ ཧ་ར་ནྟི, ཨ་གྒི ཝཱ ད་ཧ་ཏི, ཨུ་ད་ཀཾ ཝཱ ཝ་ཧ་ཏི, ཨ་པྤི་ཡཱ ཝཱ དཱ་ཡཱ་དཱ ཧ་ར་ནྟི, ཧོ་ཏི པུ་ཉྙཾ; ནོ ཙ ཝ་ཏ རེ ཝ་ཏྟ་བྦེ – ‘‘པ་རི་བྷོ་ག་མ་ཡཾ པུ་ཉྙཾ ཝ་ཌྜྷ་ཏཱི’’ཏི.
པ་རི་བྷོ་ག་མ་ཡ་པུ་ཉྙ་ཀ་ཐཱ ནི་ཊྛི་ཏཱ.