(༤༠) ༨. ནི་ཡཱ་མོ་ཀྐ་ནྟི་ཀ་ཐཱ
༤༠༣. བོ་དྷི་ས་ཏྟོ ཀ་སྶ་པ་སྶ བྷ་ག་ཝ་ཏོ པཱ་ཝ་ཙ་ནེ ཨོ་ཀྐ་ནྟ་ནི་ཡཱ་མོ ཙ་རི་ཏ་བྲ་ཧྨ་ཙ་རི་ཡོ་ཏི [མ. ནི. ༢.༢༨༢ གྷ་ཊི་ཀཱ་ར་སུ་ཏྟཾ ནི་སྶཱ་ཡ པུ་ཙྪ་ཏི]? ཨཱ་མ་ནྟཱ. བོ་དྷི་ས་ཏྟོ ཀ་སྶ་པ་སྶ བྷ་ག་ཝ་ཏོ སཱ་ཝ་ཀོ་ཏི? ན ཧེ་ཝཾ ཝ་ཏྟ་བྦེ…པེ….
བོ་དྷི་ས་ཏྟོ ཀ་སྶ་པ་སྶ བྷ་ག་ཝ་ཏོ སཱ་ཝ་ཀོ་ཏི? ཨཱ་མ་ནྟཱ. སཱ་ཝ་ཀོ ཧུ་ཏྭཱ བུ་དྡྷོ ཧོ་ཏཱི་ཏི? ན ཧེ་ཝཾ ཝ་ཏྟ་བྦེ…པེ….
སཱ་ཝ་ཀོ ཧུ་ཏྭཱ བུ་དྡྷོ ཧོ་ཏཱི་ཏི? ཨཱ་མ་ནྟཱ. ཨ་ནུ་སྶ་ཝི་ཡོ་ཏི? ན ཧེ་ཝཾ ཝ་ཏྟ་བྦེ…པེ….
ཨ་ནུ་སྶ་ཝི་ཡོ་ཏི? ཨཱ་མ་ནྟཱ. ན་ནུ བྷ་ག་ཝཱ ས་ཡ་མྦྷཱུ་ཏི? ཨཱ་མ་ནྟཱ. ཧ་ཉྩི བྷ་ག་ཝཱ ས་ཡ་མྦྷཱུ, ནོ ཙ ཝ་ཏ རེ ཝ་ཏྟ་བྦེ – ‘‘ཨ་ནུ་སྶ་ཝི་ཡོ’’ཏི.
བོ་དྷི་ས་ཏྟོ ཀ་སྶ་པ་སྶ བྷ་ག་ཝ་ཏོ པཱ་ཝ་ཙ་ནེ ཨོ་ཀྐ་ནྟ་ནི་ཡཱ་མོ ཙ་རི་ཏ་བྲ་ཧྨ་ཙ་རི་ཡོ་ཏི? ཨཱ་མ་ནྟཱ. བྷ་ག་ཝ་ཏཱ བོ་དྷི་ཡཱ མཱུ་ལེ ཏཱི་ཎེ་ཝ སཱ་མ་ཉྙ་ཕ་ལཱ་ནི ཨ་བྷི་ས་མྦུ་དྡྷཱ་ནཱི་ཏི? ན ཧེ་ཝཾ ཝ་ཏྟ་བྦེ…པེ….
ན་ནུ བྷ་ག་ཝ་ཏཱ བོ་དྷི་ཡཱ མཱུ་ལེ ཙ་ཏྟཱ་རི སཱ་མ་ཉྙ་ཕ་ལཱ་ནི ཨ་བྷི་ས་མྦུ་དྡྷཱ་ནཱི་ཏི? ཨཱ་མ་ནྟཱ. ཧ་ཉྩི བྷ་ག་ཝ་ཏཱ བོ་དྷི་ཡཱ མཱུ་ལེ ཙ་ཏྟཱ་རི སཱ་མ་ཉྙ་ཕ་ལཱ་ནི ཨ་བྷི་ས་མྦུ་དྡྷཱ་ནི, ནོ ཙ ཝ་ཏ རེ ཝ་ཏྟ་བྦེ – ‘‘བོ་དྷི་ས་ཏྟོ ཀ་སྶ་པ་སྶ བྷ་ག་ཝ་ཏོ པཱ་ཝ་ཙ་ནེ ཨོ་ཀྐ་ནྟ་ནི་ཡཱ་མོ ཙ་རི་ཏ་བྲ་ཧྨ་ཙ་རི་ཡོ’’ཏི.
༤༠༤. བོ་དྷི་ས་ཏྟོ ཀ་སྶ་པ་སྶ བྷ་ག་ཝ་ཏོ པཱ་ཝ་ཙ་ནེ ཨོ་ཀྐ་ནྟ་ནི་ཡཱ་མོ ཙ་རི་ཏ་བྲ་ཧྨ་ཙ་རི་ཡོ་ཏི? ཨཱ་མ་ནྟཱ. བོ་དྷི་ས་ཏྟོ དུ་ཀྐ་ར་ཀཱ་རི་ཡཾ ཨ་ཀཱ་སཱི་ཏི? ཨཱ་མ་ནྟཱ. ད་སྶ་ན་ས་མྤ་ནྣོ པུ་གྒ་ལོ དུ་ཀྐ་ར་ཀཱ་རི་ཡཾ ཀ་རེ་ཡྻཱ་ཏི? ན ཧེ་ཝཾ ཝ་ཏྟ་བྦེ…པེ….
བོ་དྷི་ས་ཏྟོ ཨ་པ་ར་ནྟ་པཾ [ཨ་མ་རཾ ཏ་པཾ (སཾ. ནི. ༡.༡༣༧)] ཨ་ཀཱ་སི, ཨ་ཉྙཾ ས་ཏྠཱ་རཾ ཨུ་དྡི་སཱི་ཏི? ཨཱ་མ་ནྟཱ. ད་སྶ་ན་ས་མྤ་ནྣོ པུ་གྒ་ལོ ཨ་ཉྙཾ ས་ཏྠཱ་རཾ ཨུ་དྡི་སེ་ཡྻཱ་ཏི? ན ཧེ་ཝཾ ཝ་ཏྟ་བྦེ…པེ….
ཨཱ་ཡ་སྨཱ ཨཱ་ན་ནྡོ བྷ་ག་ཝ་ཏོ པཱ་ཝ་ཙ་ནེ ཨོ་ཀྐ་ནྟ་ནི་ཡཱ་མོ ཙ་རི་ཏ་བྲ་ཧྨ་ཙ་རི་ཡོ, ཨཱ་ཡ་སྨཱ ཨཱ་ན་ནྡོ བྷ་ག་ཝ་ཏོ སཱ་ཝ་ཀོ་ཏི? ཨཱ་མ་ནྟཱ. བོ་དྷི་ས་ཏྟོ ཀ་སྶ་པ་སྶ བྷ་ག་ཝ་ཏོ པཱ་ཝ་ཙ་ནེ ཨོ་ཀྐ་ནྟ་ནི་ཡཱ་མོ ཙ་རི་ཏ་བྲ་ཧྨ་ཙ་རི་ཡོ, བོ་དྷི་ས་ཏྟོ ཀ་སྶ་པ་སྶ བྷ་ག་ཝ་ཏོ སཱ་ཝ་ཀོ་ཏི? ན ཧེ་ཝཾ ཝ་ཏྟ་བྦེ…པེ….
ཙི་ཏྟོ ག་ཧ་པ་ཏི ཧ་ཏྠ་ཀོ ཨཱ་ལ༹་ཝ་ཀོ བྷ་ག་ཝ་ཏོ པཱ་ཝ་ཙ་ནེ ཨོ་ཀྐ་ནྟ་ནི་ཡཱ་མོ ཙ་རི་ཏ་བྲ་ཧྨ་ཙ་རི་ཡོ, ཙི་ཏྟོ ག་ཧ་པ་ཏི ཧ་ཏྠ་ཀོ ཨཱ་ལ༹་ཝ་ཀོ བྷ་ག་ཝ་ཏོ སཱ་ཝ་ཀོ་ཏི? ཨཱ་མ་ནྟཱ. བོ་དྷི་ས་ཏྟོ ཀ་སྶ་པ་སྶ བྷ་ག་ཝ་ཏོ པཱ་ཝ་ཙ་ནེ ཨོ་ཀྐ་ནྟ་ནི་ཡཱ་མོ ཙ་རི་ཏ་བྲ་ཧྨ་ཙ་རི་ཡོ, བོ་དྷི་ས་ཏྟོ ཀ་སྶ་པ་སྶ བྷ་ག་ཝ་ཏོ སཱ་ཝ་ཀོ་ཏི? ན ཧེ་ཝཾ ཝ་ཏྟ་བྦེ…པེ….
བོ་དྷི་ས་ཏྟོ ཀ་སྶ་པ་སྶ བྷ་ག་ཝ་ཏོ པཱ་ཝ་ཙ་ནེ ཨོ་ཀྐ་ནྟ་ནི་ཡཱ་མོ ཙ་རི་ཏ་བྲ་ཧྨ་ཙ་རི་ཡོ, ན ཙ ཀ་སྶ་པ་སྶ བྷ་ག་ཝ་ཏོ སཱ་ཝ་ཀོ་ཏི? ཨཱ་མ་ནྟཱ. ཨཱ་ཡ་སྨཱ ཨཱ་ན་ནྡོ བྷ་ག་ཝ་ཏོ པཱ་ཝ་ཙ་ནེ ཨོ་ཀྐ་ནྟ་ནི་ཡཱ་མོ ཙ་རི་ཏ་བྲ་ཧྨ་ཙ་རི་ཡོ, ན ཙ བྷ་ག་ཝ་ཏོ སཱ་ཝ་ཀོ་ཏི? ན ཧེ་ཝཾ ཝ་ཏྟ་བྦེ…པེ….
བོ་དྷི་ས་ཏྟོ ཀ་སྶ་པ་སྶ བྷ་ག་ཝ་ཏོ པཱ་ཝ་ཙ་ནེ ཨོ་ཀྐ་ནྟ་ནི་ཡཱ་མོ ཙ་རི་ཏ་བྲ་ཧྨ་ཙ་རི་ཡོ, ན ཙ ཀ་སྶ་པ་སྶ བྷ་ག་ཝ་ཏོ སཱ་ཝ་ཀོ་ཏི? ཨཱ་མ་ནྟཱ. ཙི་ཏྟོ ག་ཧ་པ་ཏི ཧ་ཏྠ་ཀོ ཨཱ་ལ༹་ཝ་ཀོ བྷ་ག་ཝ་ཏོ པཱ་ཝ་ཙ་ནེ ཨོ་ཀྐ་ནྟ་ནི་ཡཱ་མོ ཙ་རི་ཏ་བྲ་ཧྨ་ཙ་རི་ཡོ, ན ཙ བྷ་ག་ཝ་ཏོ སཱ་ཝ་ཀོ་ཏི? ན ཧེ་ཝཾ ཝ་ཏྟ་བྦེ…པེ….
བོ་དྷི་ས་ཏྟོ ཀ་སྶ་པ་སྶ བྷ་ག་ཝ་ཏོ པཱ་ཝ་ཙ་ནེ ཨོ་ཀྐ་ནྟ་ནི་ཡཱ་མོ ཙ་རི་ཏ་བྲ་ཧྨ་ཙ་རི་ཡོ, ན ཙ ཀ་སྶ་པ་སྶ བྷ་ག་ཝ་ཏོ སཱ་ཝ་ཀོ་ཏི? ཨཱ་མ་ནྟཱ. སཱ་ཝ་ཀོ ཛཱ་ཏིཾ ཝཱི་ཏི་ཝ་ཏྟོ ཨ་སཱ་ཝ་ཀོ ཧོ་ཏཱི་ཏི? ན ཧེ་ཝཾ ཝ་ཏྟ་བྦེ…པེ….
༤༠༥. ན ཝ་ཏྟ་བྦཾ – ‘‘བོ་དྷི་ས་ཏྟོ ཀ་སྶ་པ་སྶ བྷ་ག་ཝ་ཏོ པཱ་ཝ་ཙ་ནེ ཨོ་ཀྐ་ནྟ་ནི་ཡཱ་མོ ཙ་རི་ཏ་བྲ་ཧྨ་ཙ་རི་ཡོ’’ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ – ‘‘ཀ་སྶ་པེ ཨ་ཧཾ, ཨཱ་ན་ནྡ, བྷ་ག་ཝ་ཏི བྲ་ཧྨ་ཙ་རི་ཡཾ ཨ་ཙ་རིཾ ཨཱ་ཡ་ཏིཾ ས་མྦོ་དྷཱ་ཡཱ’’ཏི! ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ན ཝ་ཏྟ་བྦཾ – ‘‘བོ་དྷི་ས་ཏྟོ ཀ་སྶ་པ་སྶ བྷ་ག་ཝ་ཏོ པཱ་ཝ་ཙ་ནེ ཨོ་ཀྐ་ནྟ་ནི་ཡཱ་མོ ཙ་རི་ཏ་བྲ་ཧྨ་ཙ་རི་ཡོ’’ཏི.
བོ་དྷི་ས་ཏྟོ ཀ་སྶ་པ་སྶ བྷ་ག་ཝ་ཏོ པཱ་ཝ་ཙ་ནེ ཨོ་ཀྐ་ནྟ་ནི་ཡཱ་མོ ཙ་རི་ཏ་བྲ་ཧྨ་ཙ་རི་ཡོ་ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ –
‘‘ས་བྦཱ་བྷི་བྷཱུ ས་བྦ་ཝི་དཱུ་ཧ་མ་སྨི,
ས་བྦེ་སུ དྷ་མྨེ་སུ ཨ་ནུ་པ་ལི་ཏྟོ;
ས་བྦ་ཉྫ་ཧོ ཏ་ཎྷ་ཀྑ་ཡེ ཝི་མུ་ཏྟོ,
ས་ཡཾ ཨ་བྷི་ཉྙཱ་ཡ ཀ་མུ་དྡི་སེ་ཡྻཾ.
‘‘ན མེ ཨཱ་ཙ་རི་ཡོ ཨ་ཏྠི, ས་དི་སོ མེ ན ཝི་ཛྫ་ཏི;
ས་དེ་ཝ་ཀ་སྨིཾ ལོ་ཀ་སྨིཾ, ན་ཏྠི མེ པ་ཊི་པུ་གྒ་ལོ.
‘‘ཨ་ཧ་ཉྷི ཨ་ར་ཧཱ ལོ་ཀེ, ཨ་ཧཾ ས་ཏྠཱ ཨ་ནུ་ཏྟ་རོ;
ཨེ་ཀོ་མྷི ས་མྨཱ་ས་མྦུ་དྡྷོ, སཱི་ཏི་བྷཱུ་ཏོ་སྨི ནི་བྦུ་ཏོ.
‘‘དྷ་མྨ་ཙ་ཀྐཾ པ་ཝ་ཏྟེ་ཏུཾ, ག་ཙྪཱ་མི ཀཱ་སི་ནཾ པུ་རཾ;
ཨ་ནྡྷཱི་བྷཱུ་ཏ་སྨིཾ [ཨ་ནྡྷ་བྷཱུ་ཏ་སྨིཾ (སཱི. སྱཱ. ཀཾ. པཱི.)] ལོ་ཀ་སྨིཾ, ཨཱ་ཧ་ཉྪཾ [ཨཱ་ཧ་ཉྙིཾ (ཀ.)] ཨ་མ་ཏ་དུ་ནྡུ་བྷི’’ནྟི [དུ་དྲ་བྷི་ནྟི (ཀ.)].
‘‘ཡ་ཐཱ ཁོ ཏྭཾ, ཨཱ་ཝུ་སོ, པ་ཊི་ཛཱ་ནཱ་སི, ཨ་ར་ཧ་སི ཨ་ན་ནྟ་ཛི་ནོ’’ཏི?
‘‘མཱ་དི་སཱ ཝེ ཛི་ནཱ ཧོ་ནྟི, ཡེ པ་ཏྟཱ ཨཱ་ས་ཝ་ཀྑ་ཡཾ;
ཛི་ཏཱ མེ པཱ་པ་ཀཱ དྷ་མྨཱ, ཏ་སྨཱ་ཧཾ ཨུ་པ་ཀ ཛི་ནོ’’ཏི [མ་ཧཱ་ཝ. ༡༡; མ. ནི. ༡.༢༨༥; ༢.༣༤༡].
ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ན ཝ་ཏྟ་བྦཾ – ‘‘བོ་དྷི་ས་ཏྟོ ཀ་སྶ་པ་སྶ བྷ་ག་ཝ་ཏོ པཱ་ཝ་ཙ་ནེ ཨོ་ཀྐ་ནྟ་ནི་ཡཱ་མོ ཙ་རི་ཏ་བྲ་ཧྨ་ཙ་རི་ཡོ’’ཏི.
བོ་དྷི་ས་ཏྟོ ཀ་སྶ་པ་སྶ བྷ་ག་ཝ་ཏོ པཱ་ཝ་ཙ་ནེ ཨོ་ཀྐ་ནྟ་ནི་ཡཱ་མོ ཙ་རི་ཏ་བྲ་ཧྨ་ཙ་རི་ཡོ་ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ – ‘‘‘ཨི་དཾ དུ་ཀྑཾ ཨ་རི་ཡ་ས་ཙྩ’ནྟི མེ, བྷི་ཀྑ་ཝེ, པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི, ཉཱ་ཎཾ ཨུ་ད་པཱ་དི, པ་ཉྙཱ ཨུ་ད་པཱ་དི, ཝི་ཛྫཱ ཨུ་ད་པཱ་དི, ཨཱ་ལོ་ཀོ ཨུ་ད་པཱ་དི. ‘ཏཾ ཁོ པ་ནི་དཾ དུ་ཀྑཾ ཨ་རི་ཡ་ས་ཙྩཾ པ་རི་ཉྙེ་ཡྻ’ནྟི མེ, བྷི་ཀྑ་ཝེ…པེ… པ་རི་ཉྙཱ་ཏ་ནྟི མེ, བྷི་ཀྑ་ཝེ, པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི…པེ… ཨཱ་ལོ་ཀོ ཨུ་ད་པཱ་དི. ‘ཨི་དཾ དུ་ཀྑ་ས་མུ་ད་ཡཾ ཨ་རི་ཡ་ས་ཙྩ’ནྟི མེ, བྷི་ཀྑ་ཝེ…པེ… ‘ཏཾ ཁོ པ་ནི་དཾ དུ་ཀྑ་ས་མུ་ད་ཡཾ [དུ་ཀྑ་ས་མུ་ད་ཡོ (སྱཱ. ཀཾ.)] ཨ་རི་ཡ་ས་ཙྩཾ པ་ཧཱ་ཏ་བྦ’ནྟི མེ, བྷི་ཀྑ་ཝེ…པེ… པ་ཧཱི་ན་ནྟི མེ, བྷི་ཀྑ་ཝེ…པེ… ‘ཨི་དཾ དུ་ཀྑ་ནི་རོ་དྷཾ [དུ་ཀྑ་ནི་རོ་དྷོ (སྱཱ. ཀཾ.)] ཨ་རི་ཡ་ས་ཙྩ’ནྟི མེ, བྷི་ཀྑ་ཝེ…པེ… ‘ཏཾ ཁོ པ་ནི་དཾ དུ་ཀྑ་ནི་རོ་དྷཾ ཨ་རི་ཡ་ས་ཙྩཾ ས་ཙྪི་ཀཱ་ཏ་བྦ’ནྟི མེ, བྷི་ཀྑ་ཝེ…པེ… ས་ཙྪི་ཀ་ཏ་ནྟི མེ, བྷི་ཀྑ་ཝེ…པེ… ‘ཨི་དཾ དུ་ཀྑ་ནི་རོ་དྷ་གཱ་མི་ནཱི པ་ཊི་པ་དཱ ཨ་རི་ཡ་ས་ཙྩ’ནྟི མེ, བྷི་ཀྑ་ཝེ…པེ… ‘ཏཾ ཁོ པ་ནི་དཾ དུ་ཀྑ་ནི་རོ་དྷ་གཱ་མི་ནཱི པ་ཊི་པ་དཱ ཨ་རི་ཡ་ས་ཙྩཾ བྷཱ་ཝེ་ཏ་བྦ’ནྟི མེ, བྷི་ཀྑ་ཝེ…པེ… བྷཱ་ཝི་ཏ་ནྟི མེ, བྷི་ཀྑ་ཝེ, པུ་བྦེ ཨ་ན་ནུ་སྶུ་ཏེ་སུ དྷ་མྨེ་སུ ཙ་ཀྑུཾ ཨུ་ད་པཱ་དི, ཉཱ་ཎཾ ཨུ་ད་པཱ་དི, པ་ཉྙཱ ཨུ་ད་པཱ་དི, ཝི་ཛྫཱ ཨུ་ད་པཱ་དི, ཨཱ་ལོ་ཀོ ཨུ་ད་པཱ་དཱི’’ཏི [མ་ཧཱ་ཝ. ༡༥; སཾ. ནི. ༥.༡༠༨༡; པ་ཊི. མ. ༢.༣༠]. ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ན ཝ་ཏྟ་བྦཾ – ‘‘བོ་དྷི་ས་ཏྟོ ཀ་སྶ་པ་སྶ བྷ་ག་ཝ་ཏོ པཱ་ཝ་ཙ་ནེ ཨོ་ཀྐ་ནྟ་ནི་ཡཱ་མོ ཙ་རི་ཏ་བྲ་ཧྨ་ཙ་རི་ཡོ’’ཏི.
ནི་ཡཱ་མོ་ཀྐ་ནྟི་ཀ་ཐཱ ནི་ཊྛི་ཏཱ.