(༣༩) ༧. ལ་ཀྑ་ཎ་ཀ་ཐཱ
༤༠༠. ལ་ཀྑ་ཎ་ས་མ་ནྣཱ་ག་ཏོ བོ་དྷི་ས་ཏྟོ་ཏི? ཨཱ་མ་ནྟཱ. པ་དེ་ས་ལ་ཀྑ་ཎེ་ཧི ས་མ་ནྣཱ་ག་ཏོ པ་དེ་ས་བོ་དྷི་ས་ཏྟོ་ཏི? ན ཧེ་ཝཾ ཝ་ཏྟ་བྦེ…པེ….
ལ་ཀྑ་ཎ་ས་མ་ནྣཱ་ག་ཏོ བོ་དྷི་ས་ཏྟོ་ཏི? ཨཱ་མ་ནྟཱ. ཏི་བྷཱ་ག་ལ་ཀྑ་ཎེ་ཧི ས་མ་ནྣཱ་ག་ཏོ ཏི་བྷཱ་ག་བོ་དྷི་ས་ཏྟོ་ཏི? ན ཧེ་ཝཾ ཝ་ཏྟ་བྦེ…པེ….
ལ་ཀྑ་ཎ་ས་མ་ནྣཱ་ག་ཏོ བོ་དྷི་ས་ཏྟོ་ཏི? ཨཱ་མ་ནྟཱ. ཨུ་པ་ཌྜྷ་ལ་ཀྑ་ཎེ་ཧི ས་མ་ནྣཱ་ག་ཏོ ཨུ་པ་ཌྜྷ་བོ་དྷི་ས་ཏྟོ་ཏི? ན ཧེ་ཝཾ ཝ་ཏྟ་བྦེ…པེ….
ལ་ཀྑ་ཎ་ས་མ་ནྣཱ་ག་ཏོ བོ་དྷི་ས་ཏྟོ་ཏི? ཨཱ་མ་ནྟཱ. ཙ་ཀྐ་ཝ་ཏྟི་ས་ཏྟོ ལ་ཀྑ་ཎ་ས་མ་ནྣཱ་ག་ཏོ, ཙ་ཀྐ་ཝ་ཏྟི་ས་ཏྟོ བོ་དྷི་ས་ཏྟོ་ཏི? ན ཧེ་ཝཾ ཝ་ཏྟ་བྦེ…པེ….
ཙ་ཀྐ་ཝ་ཏྟི་ས་ཏྟོ ལ་ཀྑ་ཎ་ས་མ་ནྣཱ་ག་ཏོ, ཙ་ཀྐ་ཝ་ཏྟི་ས་ཏྟོ བོ་དྷི་ས་ཏྟོ་ཏི? ཨཱ་མ་ནྟཱ. ཡཱ་དི་སོ བོ་དྷི་ས་ཏྟ་སྶ པུ་བྦ་ཡོ་གོ པུ་བྦ་ཙ་རི་ཡཱ དྷ་མྨ་ཀྑཱ་ནཾ དྷ་མྨ་དེ་ས་ནཱ, ཏཱ་དི་སོ ཙ་ཀྐ་ཝ་ཏྟི་ས་ཏྟ་སྶ པུ་བྦ་ཡོ་གོ པུ་བྦ་ཙ་རི་ཡཱ དྷ་མྨ་ཀྑཱ་ནཾ དྷ་མྨ་དེ་ས་ནཱ་ཏི? ན ཧེ་ཝཾ ཝ་ཏྟ་བྦེ…པེ….
༤༠༡. ཡ་ཐཱ བོ་དྷི་ས་ཏྟ་སྶ ཛཱ་ཡ་མཱ་ན་སྶ དེ་ཝཱ པ་ཋ་མཾ པ་ཊི་གྒ་ཎྷ་ནྟི པ་ཙྪཱ མ་ནུ་སྶཱ [དཱི. ནི. ༢.༢༧; མ. ནི. ༣.༢༠༥ ཝུ་ཏྟཾ དི་སྶཱ་ཡ པུ་ཙྪ་ཏི], ཨེ་ཝ་མེ་ཝཾ ཙ་ཀྐ་ཝ་ཏྟི་ས་ཏྟ་སྶ ཛཱ་ཡ་མཱ་ན་སྶ དེ་ཝཱ པ་ཋ་མཾ པ་ཊི་གྒ་ཎྷ་ནྟི པ་ཙྪཱ མ་ནུ་སྶཱ་ཏི? ན ཧེ་ཝཾ ཝ་ཏྟ་བྦེ…པེ….
ཡ་ཐཱ བོ་དྷི་ས་ཏྟ་སྶ ཛཱ་ཡ་མཱ་ན་སྶ ཙ་ཏྟཱ་རོ ནཾ དེ་ཝ་པུ་ཏྟཱ པ་ཊི་གྒ་ཧེ་ཏྭཱ མཱ་ཏུ པུ་ར་ཏོ ཋ་པེ་ནྟི – ‘‘ཨ་ཏྟ་མ་ནཱ, དེ་ཝི, ཧོ་ཧི! མ་ཧེ་ས་ཀྑོ ཏེ པུ་ཏྟོ ཨུ་པྤ་ནྣོ’’ཏི, ཨེ་ཝ་མེ་ཝཾ ཙ་ཀྐ་ཝ་ཏྟི་ས་ཏྟ་སྶ ཛཱ་ཡ་མཱ་ན་སྶ ཙ་ཏྟཱ་རོ ནཾ དེ་ཝ་པུ་ཏྟཱ པ་ཊི་གྒ་ཧེ་ཏྭཱ མཱ་ཏུ པུ་ར་ཏོ ཋ་པེ་ནྟི – ‘‘ཨ་ཏྟ་མ་ནཱ, དེ་ཝི, ཧོ་ཧི! མ་ཧེ་ས་ཀྑོ ཏེ པུ་ཏྟོ ཨུ་པྤ་ནྣོ’’ཏི? ན ཧེ་ཝཾ ཝ་ཏྟ་བྦེ…པེ….
ཡ་ཐཱ བོ་དྷི་ས་ཏྟ་སྶ ཛཱ་ཡ་མཱ་ན་སྶ དྭེ ཨུ་ད་ཀ་སྶ དྷཱ་རཱ ཨ་ནྟ་ལི་ཀྑཱ པཱ་ཏུ་བྷ་ཝ་ནྟི – ཨེ་ཀཱ སཱི་ཏ་སྶ, ཨེ་ཀཱ ཨུ་ཎྷ་སྶ – ཡེ་ན བོ་དྷི་ས་ཏྟ་སྶ ཨུ་ད་ཀ་ཀི་ཙྩཾ ཀ་རོ་ནྟི མཱ་ཏུ ཙ, ཨེ་ཝ་མེ་ཝཾ ཙ་ཀྐ་ཝ་ཏྟི་ས་ཏྟ་སྶ ཛཱ་ཡ་མཱ་ན་སྶ དྭེ ཨུ་ད་ཀ་སྶ དྷཱ་རཱ ཨ་ནྟ་ལི་ཀྑཱ པཱ་ཏུ་བྷ་ཝ་ནྟི – ཨེ་ཀཱ སཱི་ཏ་སྶ, ཨེ་ཀཱ ཨུ་ཎྷ་སྶ – ཡེ་ན ཙ་ཀྐ་ཝ་ཏྟི་ས་ཏྟ་སྶ ཨུ་ད་ཀ་ཀི་ཙྩཾ ཀ་རོ་ནྟི མཱ་ཏུ ཙཱ་ཏི? ན ཧེ་ཝཾ ཝ་ཏྟ་བྦེ…པེ….
ཡ་ཐཱ ས་མྤ་ཏི་ཛཱ་ཏོ བོ་དྷི་ས་ཏྟོ ས་མེ་ཧི པཱ་དེ་ཧི པ་ཏི་ཊྛ་ཧི་ཏྭཱ ཨུ་ཏྟ་རེ་ན ཨ་བྷི་མུ་ཁོ ས་ཏྟ་པ་ད་ཝཱི་ཏི་ཧཱ་རེ་ན ག་ཙྪ་ཏི སེ་ཏ་མྷི ཚ་ཏྟེ ཨ་ནུ་དྷཱ་རི་ཡ་མཱ་ནེ, ས་བྦཱ ཙ དི་སཱ ཝི་ལོ་ཀེ་ཏི, ཨཱ་ས་བྷི་ཉྩ ཝཱ་ཙཾ བྷཱ་ས་ཏི – ‘‘ཨ་གྒོ་ཧ་མ་སྨི ལོ་ཀ་སྶ, ཛེ་ཊྛོ་ཧ་མ་སྨི ལོ་ཀ་སྶ, སེ་ཊྛོ་ཧ་མ་སྨི ལོ་ཀ་སྶ, ཨ་ཡ་མ་ནྟི་མཱ ཛཱ་ཏི, ན་ཏྠི དཱ་ནི པུ་ན་བྦྷ་ཝོ’’ཏི, ཨེ་ཝ་མེ་ཝཾ ས་མྤ་ཏི་ཛཱ་ཏོ ཙ་ཀྐ་ཝ་ཏྟི་ས་ཏྟོ ས་མེ་ཧི པཱ་དེ་ཧི པ་ཏི་ཊྛ་ཧི་ཏྭཱ ཨུ་ཏྟ་རེ་ན ཨ་བྷི་མུ་ཁོ ས་ཏྟ་པ་ད་ཝཱི་ཏི་ཧཱ་རེ་ན ག་ཙྪ་ཏི སེ་ཏ་མྷི ཚ་ཏྟེ ཨ་ནུ་དྷཱ་རི་ཡ་མཱ་ནེ, ས་བྦཱ ཙ དི་སཱ ཝི་ལོ་ཀེ་ཏི, ཨཱ་ས་བྷི་ཉྩ ཝཱ་ཙཾ བྷཱ་ས་ཏི – ‘‘ཨ་གྒོ་ཧ་མ་སྨི ལོ་ཀ་སྶ, ཛེ་ཊྛོ་ཧ་མ་སྨི ལོ་ཀ་སྶ, སེ་ཊྛོ་ཧ་མ་སྨི ལོ་ཀ་སྶ, ཨ་ཡ་མ་ནྟི་མཱ ཛཱ་ཏི, ན་ཏྠི དཱ་ནི པུ་ན་བྦྷ་ཝོ’’ཏི? ན ཧེ་ཝཾ ཝ་ཏྟ་བྦེ…པེ….
ཡ་ཐཱ བོ་དྷི་ས་ཏྟ་སྶ ཛཱ་ཡ་མཱ་ན་སྶ མ་ཧ་ཏོ ཨཱ་ལོ་ཀ་སྶ མ་ཧ་ཏོ ཨོ་བྷཱ་ས་སྶ མ་ཧ་ཏོ བྷཱུ་མི་ཙཱ་ལ་སྶ པཱ་ཏུ་བྷཱ་ཝོ ཧོ་ཏི, ཨེ་ཝ་མེ་ཝཾ ཙ་ཀྐ་ཝ་ཏྟི་ས་ཏྟ་སྶ ཛཱ་ཡ་མཱ་ན་སྶ མ་ཧ་ཏོ ཨཱ་ལོ་ཀ་སྶ མ་ཧ་ཏོ ཨོ་བྷཱ་ས་སྶ མ་ཧ་ཏོ བྷཱུ་མི་ཙཱ་ལ་སྶ པཱ་ཏུ་བྷཱ་ཝོ ཧོ་ཏཱི་ཏི? ན ཧེ་ཝཾ ཝ་ཏྟ་བྦེ…པེ….
ཡ་ཐཱ བོ་དྷི་ས་ཏྟ་སྶ པ་ཀ་ཏི་ཀཱ་ཡོ ས་མ་ནྟཱ བྱཱ་མཾ ཨོ་བྷཱ་ས་ཏི, ཨེ་ཝ་མེ་ཝཾ ཙ་ཀྐ་ཝ་ཏྟི་ས་ཏྟ་སྶ པ་ཀ་ཏི་ཀཱ་ཡོ ས་མ་ནྟཱ བྱཱ་མཾ ཨོ་བྷཱ་ས་ཏཱི་ཏི? ན ཧེ་ཝཾ ཝ་ཏྟ་བྦེ…པེ….
ཡ་ཐཱ བོ་དྷི་ས་ཏྟོ མ་ཧཱ་སུ་པི་ནཾ པ་སྶ་ཏི, ཨེ་ཝ་མེ་ཝཾ ཙ་ཀྐ་ཝ་ཏྟི་ས་ཏྟོ མ་ཧཱ་སུ་པི་ནཾ པ་སྶ་ཏཱི་ཏི? ན ཧེ་ཝཾ ཝ་ཏྟ་བྦེ…པེ….
༤༠༢. ན ཝ་ཏྟ་བྦཾ – ‘‘ལ་ཀྑ་ཎ་ས་མ་ནྣཱ་ག་ཏོ བོ་དྷི་ས་ཏྟོ’’ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ – ‘‘དྭ་ཏྟིཾ་སི་མཱ་ནི, བྷི་ཀྑ་ཝེ, མ་ཧཱ་པུ་རི་ས་སྶ མ་ཧཱ་པུ་རི་ས་ལ་ཀྑ་ཎཱ་ནི, ཡེ་ཧི ས་མ་ནྣཱ་ག་ཏ་སྶ མ་ཧཱ་པུ་རི་ས་སྶ དྭེ་ཝ ག་ཏི་ཡོ བྷ་ཝ་ནྟི ཨ་ན་ཉྙཱ [ན ཨ་ཉྙཱ (ཀ.)]! ས་ཙེ ཨ་གཱ་རཾ ཨ་ཛ྄ཛྷཱ་ཝ་ས་ཏི, རཱ་ཛཱ ཧོ་ཏི ཙ་ཀྐ་ཝ་ཏྟཱི དྷ་མྨི་ཀོ དྷ་མྨ་རཱ་ཛཱ ཙཱ་ཏུ་ར་ནྟོ ཝི་ཛི་ཏཱ་ཝཱི ཛ་ན་པ་ད་ཏྠཱ་ཝ་རི་ཡ་པྤ་ཏྟོ ས་ཏྟ་ར་ཏ་ན་ས་མ་ནྣཱ་ག་ཏོ. ཏ་སྶི་མཱ་ནི ས་ཏྟ ར་ཏ་ནཱ་ནི བྷ་ཝ་ནྟི, སེ་ཡྻ་ཐི་དཾ – ཙ་ཀྐ་ར་ཏ་ནཾ, ཧ་ཏྠི་ར་ཏ་ནཾ, ཨ་སྶ་ར་ཏ་ནཾ, མ་ཎི་ར་ཏ་ནཾ, ཨི་ཏྠི་ར་ཏ་ནཾ, ག་ཧ་པ་ཏི་ར་ཏ་ནཾ, པ་རི་ཎཱ་ཡ་ཀ་ར་ཏ་ན་མེ་ཝ ས་ཏྟ་མཾ. པ་རོ་ས་ཧ་སྶཾ ཁོ པ་ན་སྶ པུ་ཏྟཱ བྷ་ཝ་ནྟི སཱུ་རཱ ཝཱི་ར་ངྒ་རཱུ་པཱ པ་ར་སེ་ན་པྤ་མ་དྡ་ནཱ. སོ ཨི་མཾ པ་ཐ་ཝིཾ སཱ་ག་ར་པ་རི་ཡ་ནྟཾ ཨ་ད་ཎྜེ་ན ཨ་ས་ཏྠེ་ན དྷ་མྨེ་ན ཨ་བྷི་ཝི་ཛི་ཡ ཨ་ཛ྄ཛྷཱ་ཝ་ས་ཏི. ས་ཙེ ཁོ པ་ན ཨ་གཱ་ར་སྨཱ ཨ་ན་གཱ་རི་ཡཾ པ་བྦ་ཛ་ཏི, ཨ་ར་ཧཾ ཧོ་ཏི ས་མྨཱ་ས་མྦུ་དྡྷོ ལོ་ཀེ ཝི་ཝ་ཊྚ་ཙྪ་དོ’’ཏི [དཱི. ནི. ༣.༢༠༠]. ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ལ་ཀྑ་ཎ་ས་མ་ནྣཱ་ག་ཏོ བོ་དྷི་ས་ཏྟོ་ཏི.
ལ་ཀྑ་ཎ་ཀ་ཐཱ ནི་ཊྛི་ཏཱ.