(༣༣) ༡. གི་ཧི་སྶ ཨ་ར་ཧཱ་ཏི་ཀ་ཐཱ

༣༨༧. གི་ཧི་སྶ ཨ་ར་ཧཱ་ཏི? ཨཱ་མ་ནྟཱ. ཨ་ཏྠི ཨ་ར་ཧ་ཏོ གི་ཧི་སཾ་ཡོ་ཛ་ན་ནྟི? ན ཧེ་ཝཾ ཝ་ཏྟ་བྦེ…པེ… ན་ཏྠི ཨ་ར་ཧ་ཏོ གི་ཧི་སཾ་ཡོ་ཛ་ན་ནྟི? ཨཱ་མ་ནྟཱ. ཧ་ཉྩི ན་ཏྠི ཨ་ར་ཧ་ཏོ གི་ཧི་སཾ་ཡོ་ཛ་ནཾ, ནོ ཙ ཝ་ཏ རེ ཝ་ཏྟ་བྦེ – ‘‘གི་ཧི་སྶ ཨ་ར་ཧཱ’’ཏི.

གི་ཧི་སྶ ཨ་ར་ཧཱ་ཏི? ཨཱ་མ་ནྟཱ. ན་ནུ ཨ་ར་ཧ་ཏོ གི་ཧི་སཾ་ཡོ་ཛ་ནཾ པ་ཧཱི་ནཾ ཨུ་ཙྪི་ནྣ་མཱུ་ལཾ ཏཱ་ལཱ་ཝ་ཏྠུ་ཀ་ཏཾ ཨ་ན་བྷཱ་ཝ་ངྐ་ཏཾ ཨཱ་ཡ་ཏིཾ ཨ་ནུ་པྤཱ་ད་དྷ་མྨ་ནྟི? ཨཱ་མ་ནྟཱ. ཧ་ཉྩི ཨ་ར་ཧ་ཏོ གི་ཧི་སཾ་ཡོ་ཛ་ནཾ པ་ཧཱི་ནཾ ཨུ་ཙྪི་ནྣ་མཱུ་ལཾ ཏཱ་ལཱ་ཝ་ཏྠུ་ཀ་ཏཾ ཨ་ན་བྷཱ་ཝ་ངྐ་ཏཾ ཨཱ་ཡ་ཏིཾ ཨ་ནུ་པྤཱ་ད་དྷ་མྨཾ, ནོ ཙ ཝ་ཏ རེ ཝ་ཏྟ་བྦེ – ‘‘གི་ཧི་སྶ ཨ་ར་ཧཱ’’ཏི.

གི་ཧི་སྶ ཨ་ར་ཧཱ་ཏི? ཨཱ་མ་ནྟཱ. ཨ་ཏྠི ཀོ་ཙི གི་ཧཱི གི་ཧི་སཾ་ཡོ་ཛ་ནཾ ཨ་པྤ་ཧཱ་ཡ དི་ཊྛེ་ཝ དྷ་མྨེ དུ་ཀྑ་སྶ་ནྟ་ཀ་རོ་ཏི [མ. ནི. ༢.༡༨༦]? ན་ཏྠི. ཧ་ཉྩི ན་ཏྠི ཀོ་ཙི གི་ཧཱི གི་ཧི་སཾ་ཡོ་ཛ་ནཾ ཨ་པྤ་ཧཱ་ཡ དི་ཊྛེ་ཝ དྷ་མྨེ དུ་ཀྑ་སྶ་ནྟ་ཀ་རོ, ནོ ཙ ཝ་ཏ རེ ཝ་ཏྟ་བྦེ – ‘‘གི་ཧི་སྶ ཨ་ར་ཧཱ’’ཏི.

གི་ཧི་སྶ ཨ་ར་ཧཱ་ཏི? ཨཱ་མ་ནྟཱ. ན་ནུ ཝ་ཙྪ་གོ་ཏྟོ པ་རི་བྦཱ་ཛ་ཀོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨ་ཏྠི ནུ ཁོ, བྷོ གོ་ཏ་མ, ཀོ་ཙི གི་ཧཱི གི་ཧི་སཾ་ཡོ་ཛ་ནཾ ཨ་པྤ་ཧཱ་ཡ ཀཱ་ཡ་སྶ བྷེ་དཱ དུ་ཀྑ་སྶ་ནྟ་ཀ་རོ’’ཏི? ‘‘ན་ཏྠི ཁོ, ཝ་ཙྪ, ཀོ་ཙི གི་ཧཱི གི་ཧི་སཾ་ཡོ་ཛ་ནཾ ཨ་པྤ་ཧཱ་ཡ ཀཱ་ཡ་སྶ བྷེ་དཱ དུ་ཀྑ་སྶ་ནྟ་ཀ་རོ’’ཏི. ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ན ཝ་ཏྟ་བྦཾ – ‘‘གི་ཧི་སྶ ཨ་ར་ཧཱ’’ཏི.

གི་ཧི་སྶ ཨ་ར་ཧཱ་ཏི? ཨཱ་མ་ནྟཱ. ཨ་ར་ཧཱ མེ་ཐུ་ནཾ དྷ་མྨཾ པ་ཊི་སེ་ཝེ་ཡྻ, མེ་ཐུ་ནཾ ཨུ་པྤཱ་དེ་ཡྻ, པུ་ཏྟ་ས་མྦཱ་དྷ་ས་ཡ་ནཾ ཨ་ཛ྄ཛྷཱ་ཝ་སེ་ཡྻ, ཀཱ་སི་ཀ་ཙ་ནྡ་ནཾ པ་ཙྩ་ནུ་བྷ་ཝེ་ཡྻ, མཱ་ལཱ་ག་ནྡྷ་ཝི་ལེ་པ་ནཾ དྷཱ་རེ་ཡྻ, ཛཱ་ཏ་རཱུ་པ་ར་ཛ་ཏཾ སཱ་དི་ཡེ་ཡྻ, ཨ་ཛེ་ལ༹་ཀཾ པ་ཊི་གྒ་ཎྷེ་ཡྻ, ཀུ་ཀྐུ་ཊ་སཱུ་ཀ་རཾ པ་ཊི་གྒ་ཎྷེ་ཡྻ, ཧ་ཏྠི་ག་ཝ་སྶ་ཝ་ལ༹་ཝཾ པ་ཊི་གྒ་ཎྷེ་ཡྻ, ཏི་ཏྟི་ར་ཝ་ཊྚ་ཀ་མོ་ར་ཀ་པི་ཉྫ་རཾ [… ཀ་པི་ཉྫ་ལཾ (སྱཱ. ཀཾ. པཱི.)] པ་ཊི་གྒ་ཎྷེ་ཡྻ, ཙི་ཏྟ་ཝ་ཎྜ་ཝཱ་ལ་མོ་ལི༹ཾ [པཱི་ཏ་ཝ་ཎྚ་ཝཱ་ལ་མོ་ལི༹་ཀཾ (སྱཱ. ཀཾ. པཱི.)] དྷཱ་རེ་ཡྻ, ཨོ་དཱ་ཏཱ་ནི ཝ་ཏྠཱ་ནི དཱི་གྷ་ད་སཱ་ནི དྷཱ་རེ་ཡྻ, ཡཱ་ཝ་ཛཱི་ཝཾ ཨ་གཱ་རི་ཡ་བྷཱུ་ཏོ ཨ་སྶཱ་ཏི? ན ཧེ་ཝཾ ཝ་ཏྟ་བྦེ…པེ….

ན ཝ་ཏྟ་བྦཾ – ‘‘གི་ཧི་སྶ ཨ་ར་ཧཱ’’ཏི? ཨཱ་མ་ནྟཱ. ན་ནུ ཡ་སོ ཀུ་ལ་པུ་ཏྟོ, ཨུ་ཏྟི་ཡོ ག་ཧ་པ་ཏི, སེ་ཏུ མཱ་ཎ་ཝོ, གི་ཧི་བྱ་ཉྫ་ནེ་ན ཨ་ར་ཧ་ཏྟཾ པ་ཏྟོ་ཏི? ཨཱ་མ་ནྟཱ. ཧ་ཉྩི ཡ་སོ ཀུ་ལ་པུ་ཏྟོ, ཨུ་ཏྟི་ཡོ ག་ཧ་པ་ཏི, སེ་ཏུ མཱ་ཎ་ཝོ, གི་ཧི་བྱ་ཉྫ་ནེ་ན ཨ་ར་ཧ་ཏྟཾ པ་ཏྟོ, ཏེ་ན ཝ་ཏ རེ ཝ་ཏྟ་བྦེ – ‘‘གི་ཧི་སྶ ཨ་ར་ཧཱ’’ཏི.

གི་ཧི་སྶ ཨ་ར་ཧཱ་ཏི་ཀ་ཐཱ ནི་ཊྛི་ཏཱ.