(༡༦) ༧. ཙི་ཏྟ་ཊྛི་ཏི་ཀ་ཐཱ
༣༣༥. ཨེ་ཀཾ ཙི་ཏྟཾ དི་ཝ་སཾ ཏི་ཊྛ་ཏཱི་ཏི? ཨཱ་མ་ནྟཱ. ཨུ་པ་ཌྜྷ་དི་ཝ་སོ ཨུ་པྤཱ་ད་ཀྑ་ཎོ, ཨུ་པ་ཌྜྷ་དི་ཝ་སོ ཝ་ཡ་ཀྑ་ཎོ་ཏི? ན ཧེ་ཝཾ ཝ་ཏྟ་བྦེ.
ཨེ་ཀཾ ཙི་ཏྟཾ དྭེ དི་ཝ་སེ ཏི་ཊྛ་ཏཱི་ཏི? ཨཱ་མ་ནྟཱ. དི་ཝ་སོ ཨུ་པྤཱ་ད་ཀྑ་ཎོ, དི་ཝ་སོ ཝ་ཡ་ཀྑ་ཎོ་ཏི? ན ཧེ་ཝཾ ཝ་ཏྟ་བྦེ.
ཨེ་ཀཾ ཙི་ཏྟཾ ཙ་ཏྟཱ་རོ དི་ཝ་སེ ཏི་ཊྛ་ཏི… ཨ་ཊྛ དི་ཝ་སེ ཏི་ཊྛ་ཏི… ད་ས དི་ཝ་སེ ཏི་ཊྛ་ཏི… ཝཱི་ས་ཏི དི་ཝ་སེ ཏི་ཊྛ་ཏི… མཱ་སཾ ཏི་ཊྛ་ཏི… དྭེ མཱ་སེ ཏི་ཊྛ་ཏི… ཙ་ཏྟཱ་རོ མཱ་སེ ཏི་ཊྛ་ཏི… ཨ་ཊྛ མཱ་སེ ཏི་ཊྛ་ཏི… ད་ས མཱ་སེ ཏི་ཊྛ་ཏི… སཾ་ཝ་ཙྪ་རཾ ཏི་ཊྛ་ཏི… དྭེ ཝ་སྶཱ་ནི ཏི་ཊྛ་ཏི… ཙ་ཏྟཱ་རི ཝ་སྶཱ་ནི ཏི་ཊྛ་ཏི… ཨ་ཊྛ ཝ་སྶཱ་ནི ཏི་ཊྛ་ཏི… ད་ས ཝ་སྶཱ་ནི ཏི་ཊྛ་ཏི… ཝཱི་ས་ཏི ཝ་སྶཱ་ནི ཏི་ཊྛ་ཏི… ཏིཾ་ས ཝ་སྶཱ་ནི ཏི་ཊྛ་ཏི… ཙ་ཏྟཱ་རཱི་ས ཝ་སྶཱ་ནི ཏི་ཊྛ་ཏི… པ་ཉྙཱ་ས ཝ་སྶཱ་ནི ཏི་ཊྛ་ཏི… ཝ་སྶ་ས་ཏཾ ཏི་ཊྛ་ཏི… དྭེ ཝ་སྶ་ས་ཏཱ་ནི ཏི་ཊྛ་ཏི… ཙ་ཏྟཱ་རི ཝ་སྶ་ས་ཏཱ་ནི ཏི་ཊྛ་ཏི… པ་ཉྩ ཝ་སྶ་ས་ཏཱ་ནི ཏི་ཊྛ་ཏི… ཝ་སྶ་ས་ཧ་སྶཾ ཏི་ཊྛ་ཏི… དྭེ ཝ་སྶ་ས་ཧ་སྶཱ་ནི ཏི་ཊྛ་ཏི… ཙ་ཏྟཱ་རི ཝ་སྶ་ས་ཧ་སྶཱ་ནི ཏི་ཊྛ་ཏི… ཨ་ཊྛ ཝ་སྶ་ས་ཧ་སྶཱ་ནི ཏི་ཊྛ་ཏི… སོ་ལ༹་ས ཝ་སྶ་ས་ཧ་སྶཱ་ནི ཏི་ཊྛ་ཏི… ཀ་པྤཾ ཏི་ཊྛ་ཏི… དྭེ ཀ་པྤེ ཏི་ཊྛ་ཏི… ཙ་ཏྟཱ་རོ ཀ་པྤེ ཏི་ཊྛ་ཏི… ཨ་ཊྛ ཀ་པྤེ ཏི་ཊྛ་ཏི… སོ་ལ༹་ས ཀ་པྤེ ཏི་ཊྛ་ཏི… བཱ་ཏྟིཾ་ས ཀ་པྤེ ཏི་ཊྛ་ཏི… ཙ་ཏུ་ས་ཊྛི ཀ་པྤེ ཏི་ཊྛ་ཏི… པ་ཉྩ ཀ་པྤ་ས་ཏཱ་ནི ཏི་ཊྛ་ཏི… ཀ་པྤ་ས་ཧ་སྶཱ་ནི ཏི་ཊྛ་ཏི… དྭེ ཀ་པྤ་ས་ཧ་སྶཱ་ནི ཏི་ཊྛ་ཏི… ཙ་ཏྟཱ་རི ཀ་པྤ་ས་ཧ་སྶཱ་ནི ཏི་ཊྛ་ཏི… ཨ་ཊྛ ཀ་པྤ་ས་ཧ་སྶཱ་ནི ཏི་ཊྛ་ཏི… སོ་ལ༹་ས ཀ་པྤ་ས་ཧ་སྶཱ་ནི ཏི་ཊྛ་ཏི… ཝཱི་ས་ཏི ཀ་པྤ་ས་ཧ་སྶཱ་ནི ཏི་ཊྛ་ཏི… ཙ་ཏྟཱ་རཱི་ས ཀ་པྤ་ས་ཧ་སྶཱ་ནི ཏི་ཊྛ་ཏི… ས་ཊྛི ཀ་པྤ་ས་ཧ་སྶཱ་ནི ཏི་ཊྛ་ཏི… ཙ་ཏུ་རཱ་སཱི་ཏི ཀ་པྤ་ས་ཧ་སྶཱ་ནི ཏི་ཊྛ་ཏཱི་ཏི? ཨཱ་མ་ནྟཱ. དྭེ་ཙ་ཏྟཱ་རཱི་ས ཀ་པྤ་ས་ཧ་སྶཱ་ནི ཨུ་པྤཱ་ད་ཀྑ་ཎོ, དྭེ་ཙ་ཏྟཱ་རཱི་ས ཀ་པྤ་ས་ཧ་སྶཱ་ནི ཝ་ཡ་ཀྑ་ཎོ་ཏི? ན ཧེ་ཝཾ ཝ་ཏྟ་བྦེ.
ཨེ་ཀཾ ཙི་ཏྟཾ དི་ཝ་སཾ ཏི་ཊྛ་ཏཱི་ཏི? ཨཱ་མ་ནྟཱ. ཨ་ཏྠ་ཉྙེ དྷ་མྨཱ ཨེ་ཀཱ་ཧཾ བ་ཧུ་མྤི ཨུ་པྤ་ཛྫི་ཏྭཱ ནི་རུ་ཛ྄ཛྷ་ནྟཱི་ཏི? ཨཱ་མ་ནྟཱ. ཏེ དྷ་མྨཱ ཙི་ཏྟེ་ན ལ་ཧུ་པ་རི་ཝ་ཏྟཱ་ཏི? ན ཧེ་ཝཾ ཝ་ཏྟ་བྦེ.
ཏེ དྷ་མྨཱ ཙི་ཏྟེ་ན ལ་ཧུ་པ་རི་ཝ་ཏྟཱ་ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ – ‘‘ནཱ་ཧཾ, བྷི་ཀྑ་ཝེ, ཨ་ཉྙཾ ཨེ་ཀ་དྷ་མྨ་མྤི ས་མ་ནུ་པ་སྶཱ་མི ཨེ་ཝཾ ལ་ཧུ་པ་རི་ཝ་ཏྟཾ ཡ་ཐ་ཡི་དཾ ཙི་ཏྟཾ. ཡཱ་ཝ་ཉྩི་དཾ, བྷི་ཀྑ་ཝེ, ཨུ་པ་མཱ་པི ན སུ་ཀ་རཱ ཡཱ་ཝ ལ་ཧུ་པ་རི་ཝ་ཏྟཾ ཙི་ཏྟ’’ནྟི [ཨ. ནི. ༡.༤༨]. ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ན ཝ་ཏྟ་བྦཾ – ‘‘ཏེ དྷ་མྨཱ ཙི་ཏྟེ་ན ལ་ཧུ་པ་རི་ཝ་ཏྟཱ’’ཏི.
ཏེ དྷ་མྨཱ ཙི་ཏྟེ་ན ལ་ཧུ་པ་རི་ཝ་ཏྟཱ་ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ – ‘‘སེ་ཡྻ་ཐཱ་པི, བྷི་ཀྑ་ཝེ, མ་ཀྐ་ཊོ ཨ་ར་ཉྙེ པ་ཝ་ནེ ཙ་ར་མཱ་ནོ སཱ་ཁཾ ག་ཎྷ་ཏི, ཏཾ མུ་ཉྩི་ཏྭཱ ཨ་ཉྙཾ ག་ཎྷ་ཏི, ཏཾ མུ་ཉྩི་ཏྭཱ ཨ་ཉྙཾ ག་ཎྷ་ཏི; ཨེ་ཝ་མེ་ཝ ཁོ, བྷི་ཀྑ་ཝེ, ཡ་མི་དཾ [ཡ་དི་དཾ (བ་ཧཱུ་སུ)] ཝུ་ཙྩ་ཏི ཙི་ཏྟཾ ཨི་ཏི་པི མ་ནོ ཨི་ཏི་པི ཝི་ཉྙཱ་ཎཾ ཨི་ཏི་པི ཏཾ ར་ཏྟི་ཡཱ ཙ དི་ཝ་ས་སྶ ཙ ཨ་ཉྙ་དེ་ཝ ཨུ་པྤ་ཛྫ་ཏི ཨ་ཉྙཾ ནི་རུ་ཛ྄ཛྷ་ཏཱི’’ཏི [སཾ. ནི. ༢.༦༡]. ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ན ཝ་ཏྟ་བྦཾ – ‘‘ཏེ དྷ་མྨཱ ཙི་ཏྟེ་ན ལ་ཧུ་པ་རི་ཝ་ཏྟཱ’’ཏི.
༣༣༦. ཨེ་ཀཾ ཙི་ཏྟཾ དི་ཝ་སཾ ཏི་ཊྛ་ཏཱི་ཏི? ཨཱ་མ་ནྟཱ. ཙ་ཀྑུ་ཝི་ཉྙཱ་ཎཾ དི་ཝ་སཾ ཏི་ཊྛ་ཏཱི་ཏི? ན ཧེ་ཝཾ ཝ་ཏྟ་བྦེ. སོ་ཏ་ཝི་ཉྙཱ་ཎཾ…པེ… གྷཱ་ན་ཝི་ཉྙཱ་ཎཾ… ཛི་ཝ྄ཧཱ་ཝི་ཉྙཱ་ཎཾ… ཀཱ་ཡ་ཝི་ཉྙཱ་ཎཾ… ཨ་ཀུ་ས་ལཾ ཙི་ཏྟཾ… རཱ་ག་ས་ཧ་ག་ཏཾ… དོ་ས་ས་ཧ་ག་ཏཾ… མོ་ཧ་ས་ཧ་ག་ཏཾ… མཱ་ན་ས་ཧ་ག་ཏཾ… དི་ཊྛི་ས་ཧ་ག་ཏཾ… ཝི་ཙི་ཀི་ཙྪཱ་ས་ཧ་ག་ཏཾ… ཐི་ན་ས་ཧ་ག་ཏཾ… ཨུ་དྡྷ་ཙྩ་ས་ཧ་ག་ཏཾ… ཨ་ཧི་རི་ཀ་ས་ཧ་ག་ཏཾ… ཨ་ནོ་ཏྟ་པྤ་ས་ཧ་ག་ཏཾ ཙི་ཏྟཾ དི་ཝ་སཾ ཏི་ཊྛ་ཏཱི་ཏི? ན ཧེ་ཝཾ ཝ་ཏྟ་བྦེ…པེ….
ཨེ་ཀཾ ཙི་ཏྟཾ དི་ཝ་སཾ ཏི་ཊྛ་ཏཱི་ཏི? ཨཱ་མ་ནྟཱ. ཡེ་ནེ་ཝ ཙི་ཏྟེ་ན ཙ་ཀྑུ་ནཱ རཱུ་པཾ པ་སྶ་ཏི, ཏེ་ནེ་ཝ ཙི་ཏྟེ་ན སོ་ཏེ་ན ས་དྡཾ སུ་ཎཱ་ཏི…པེ… གྷཱ་ནེ་ན ག་ནྡྷཾ གྷཱ་ཡ་ཏི… ཛི་ཝ྄ཧཱ་ཡ ར་སཾ སཱ་ཡ་ཏི… ཀཱ་ཡེ་ན ཕོ་ཊྛ་བྦཾ ཕུ་ས་ཏི… མ་ན་སཱ དྷ་མྨཾ ཝི་ཛཱ་ནཱ་ཏི…པེ… ཡེ་ནེ་ཝ ཙི་ཏྟེ་ན མ་ན་སཱ དྷ་མྨཾ ཝི་ཛཱ་ནཱ་ཏི, ཏེ་ནེ་ཝ ཙི་ཏྟེ་ན ཙ་ཀྑུ་ནཱ རཱུ་པཾ པ་སྶ་ཏི…པེ… སོ་ཏེ་ན ས་དྡཾ སུ་ཎཱ་ཏི… གྷཱ་ནེ་ན ག་ནྡྷཾ གྷཱ་ཡ་ཏི… ཛི་ཝ྄ཧཱ་ཡ ར་སཾ སཱ་ཡ་ཏི…པེ… ཀཱ་ཡེ་ན ཕོ་ཊྛ་བྦཾ ཕུ་ས་ཏཱི་ཏི? ན ཧེ་ཝཾ ཝ་ཏྟ་བྦེ…པེ….
ཨེ་ཀཾ ཙི་ཏྟཾ དི་ཝ་སཾ ཏི་ཊྛ་ཏཱི་ཏི? ཨཱ་མ་ནྟཱ. ཡེ་ནེ་ཝ ཙི་ཏྟེ་ན ཨ་བྷི་ཀྐ་མ་ཏི, ཏེ་ནེ་ཝ ཙི་ཏྟེ་ན པ་ཊི་ཀྐ་མ་ཏི; ཡེ་ནེ་ཝ ཙི་ཏྟེ་ན པ་ཊི་ཀྐ་མ་ཏི, ཏེ་ནེ་ཝ ཙི་ཏྟེ་ན ཨ་བྷི་ཀྐ་མ་ཏི; ཡེ་ནེ་ཝ ཙི་ཏྟེ་ན ཨཱ་ལོ་ཀེ་ཏི, ཏེ་ནེ་ཝ ཙི་ཏྟེ་ན ཝི་ལོ་ཀེ་ཏི; ཡེ་ནེ་ཝ ཙི་ཏྟེ་ན ཝི་ལོ་ཀེ་ཏི, ཏེ་ནེ་ཝ ཙི་ཏྟེ་ན ཨཱ་ལོ་ཀེ་ཏི; ཡེ་ནེ་ཝ ཙི་ཏྟེ་ན ས་མི་ཉྫེ་ཏི, ཏེ་ནེ་ཝ ཙི་ཏྟེ་ན པ་སཱ་རེ་ཏི; ཡེ་ནེ་ཝ ཙི་ཏྟེ་ན པ་སཱ་རེ་ཏི, ཏེ་ནེ་ཝ ཙི་ཏྟེ་ན ས་མི་ཉྫེ་ཏཱི་ཏི? ན ཧེ་ཝཾ ཝ་ཏྟ་བྦེ…པེ….
༣༣༧. ཨཱ་ཀཱ་སཱ་ན་ཉྩཱ་ཡ་ཏ་ནཱུ་པ་གཱ་ནཾ དེ་ཝཱ་ནཾ ཨེ་ཀཾ ཙི་ཏྟཾ ཡཱ་ཝ་ཏཱ་ཡུ་ཀཾ ཏི་ཊྛ་ཏཱི་ཏི? ཨཱ་མ་ནྟཱ. མ་ནུ་སྶཱ་ནཾ ཨེ་ཀཾ ཙི་ཏྟཾ ཡཱ་ཝ་ཏཱ་ཡུ་ཀཾ ཏི་ཊྛ་ཏཱི་ཏི? ན ཧེ་ཝཾ ཝ་ཏྟ་བྦེ.
ཨཱ་ཀཱ་སཱ་ན་ཉྩཱ་ཡ་ཏ་ནཱུ་པ་གཱ་ནཾ དེ་ཝཱ་ནཾ ཨེ་ཀཾ ཙི་ཏྟཾ ཡཱ་ཝ་ཏཱ་ཡུ་ཀཾ ཏི་ཊྛ་ཏཱི་ཏི? ཨཱ་མ་ནྟཱ. ཙཱ་ཏུ་མ་ཧཱ་རཱ་ཛི་ཀཱ་ནཾ དེ་ཝཱ་ནཾ…པེ… ཏཱ་ཝ་ཏིཾ་སཱ་ནཾ དེ་ཝཱ་ནཾ… ཡཱ་མཱ་ནཾ དེ་ཝཱ་ནཾ… ཏུ་སི་ཏཱ་ནཾ དེ་ཝཱ་ནཾ… ནི་མྨཱ་ན་ར་ཏཱི་ནཾ དེ་ཝཱ་ནཾ… པ་ར་ནི་མྨི་ཏ་ཝ་ས་ཝ་ཏྟཱི་ནཾ དེ་ཝཱ་ནཾ… བྲ་ཧྨ་པཱ་རི་ས་ཛྫཱ་ནཾ དེ་ཝཱ་ནཾ… བྲ་ཧྨ་པུ་རོ་ཧི་ཏཱ་ནཾ དེ་ཝཱ་ནཾ… མ་ཧཱ་བྲ་ཧྨཱ་ནཾ དེ་ཝཱ་ནཾ… པ་རི་ཏྟཱ་བྷཱ་ནཾ དེ་ཝཱ་ནཾ… ཨ་པྤ་མཱ་ཎཱ་བྷཱ་ནཾ དེ་ཝཱ་ནཾ… ཨཱ་བྷ་སྶ་རཱ་ནཾ དེ་ཝཱ་ནཾ… པ་རི་ཏྟ་སུ་བྷཱ་ནཾ དེ་ཝཱ་ནཾ… ཨ་པྤ་མཱ་ཎ་སུ་བྷཱ་ནཾ དེ་ཝཱ་ནཾ… སུ་བྷ་ཀི་ཎྷཱ་ནཾ དེ་ཝཱ་ནཾ … ཝེ་ཧ་པྥ་ལཱ་ནཾ དེ་ཝཱ་ནཾ… ཨ་ཝི་ཧཱ་ནཾ དེ་ཝཱ་ནཾ… ཨ་ཏ་པྤཱ་ནཾ དེ་ཝཱ་ནཾ… སུ་ད་སྶཱ་ནཾ དེ་ཝཱ་ནཾ… སུ་ད་སྶཱི་ནཾ དེ་ཝཱ་ནཾ… ཨ་ཀ་ནི་ཊྛཱ་ནཾ དེ་ཝཱ་ནཾ ཨེ་ཀཾ ཙི་ཏྟཾ ཡཱ་ཝ་ཏཱ་ཡུ་ཀཾ ཏི་ཊྛ་ཏཱི་ཏི? ན ཧེ་ཝཾ ཝ་ཏྟ་བྦེ.
ཨཱ་ཀཱ་སཱ་ན་ཉྩཱ་ཡ་ཏ་ནཱུ་པ་གཱ་ནཾ དེ་ཝཱ་ནཾ ཝཱི་ས་ཏི ཀ་པྤ་ས་ཧ་སྶཱ་ནི ཨཱ་ཡུ་པྤ་མཱ་ཎཾ, ཨཱ་ཀཱ་སཱ་ན་ཉྩཱ་ཡ་ཏ་ནཱུ་པ་གཱ་ནཾ དེ་ཝཱ་ནཾ ཨེ་ཀཾ ཙི་ཏྟཾ ཝཱི་ས་ཏི ཀ་པྤ་ས་ཧ་སྶཱ་ནི ཏི་ཊྛ་ཏཱི་ཏི? ཨཱ་མ་ནྟཱ. མ་ནུ་སྶཱ་ནཾ ཝ་སྶ་ས་ཏཾ ཨཱ་ཡུ་པྤ་མཱ་ཎཾ, མ་ནུ་སྶཱ་ནཾ ཨེ་ཀཾ ཙི་ཏྟཾ ཝ་སྶ་ས་ཏཾ ཏི་ཊྛ་ཏཱི་ཏི? ན ཧེ་ཝཾ ཝ་ཏྟ་བྦེ.
ཨཱ་ཀཱ་སཱ་ན་ཉྩཱ་ཡ་ཏ་ནཱུ་པ་གཱ་ནཾ དེ་ཝཱ་ནཾ ཝཱི་ས་ཏི ཀ་པྤ་ས་ཧ་སྶཱ་ནི ཨཱ་ཡུ་པྤ་མཱ་ཎཾ, ཨཱ་ཀཱ་སཱ་ན་ཉྩཱ་ཡ་ཏ་ནཱུ་པ་གཱ་ནཾ དེ་ཝཱ་ནཾ ཨེ་ཀཾ ཙི་ཏྟཾ ཝཱི་ས་ཏི ཀ་པྤ་ས་ཧ་སྶཱ་ནི ཏི་ཊྛ་ཏཱི་ཏི? ཨཱ་མ་ནྟཱ. ཙཱ་ཏུ་མ་ཧཱ་རཱ་ཛི་ཀཱ་ནཾ དེ་ཝཱ་ནཾ པ་ཉྩ ཝ་སྶ་ས་ཏཱ་ནི ཨཱ་ཡུ་པྤ་མཱ་ཎཾ, ཙཱ་ཏུ་མ་ཧཱ་རཱ་ཛི་ཀཱ་ནཾ དེ་ཝཱ་ནཾ ཨེ་ཀཾ ཙི་ཏྟཾ པ་ཉྩ ཝ་སྶ་ས་ཏཱ་ནི ཏི་ཊྛ་ཏི… ཝ་སྶ་ས་ཧ་སྶཾ ཏི་ཊྛ་ཏི… དྭེ ཝ་སྶ་ས་ཧ་སྶཱ་ནི ཏི་ཊྛ་ཏི… ཙ་ཏྟཱ་རི ཝ་སྶ་ས་ཧ་སྶཱ་ནི ཏི་ཊྛ་ཏི… ཨ་ཊྛ ཝ་སྶ་ས་ཧ་སྶཱ་ནི ཏི་ཊྛ་ཏི… སོ་ལ༹་ས ཝ་སྶ་ས་ཧ་སྶཱ་ནི ཏི་ཊྛ་ཏི… ཀ་པྤ་སྶ ཏ་ཏི་ཡ་བྷཱ་གཾ ཏི་ཊྛ་ཏི… ཨུ་པ་ཌྜྷ་ཀ་པྤཾ ཏི་ཊྛ་ཏི… ཨེ་ཀཾ ཀ་པྤཾ ཏི་ཊྛ་ཏི… དྭེ ཀ་པྤེ ཏི་ཊྛ་ཏི… ཙ་ཏྟཱ་རོ ཀ་པྤེ ཏི་ཊྛ་ཏི… ཨ་ཊྛ ཀ་པྤེ ཏི་ཊྛ་ཏི… སོ་ལ༹་ས ཀ་པྤེ ཏི་ཊྛ་ཏི… བཱ་ཏྟིཾ་ས ཀ་པྤེ ཏི་ཊྛ་ཏི… ཙ་ཏུ་ས་ཊྛི ཀ་པྤེ ཏི་ཊྛ་ཏི… པ་ཉྩ ཀ་པྤ་ས་ཏཱ་ནི ཏི་ཊྛ་ཏི… ཀ་པྤ་ས་ཧ་སྶཾ ཏི་ཊྛ་ཏི… དྭེ ཀ་པྤ་ས་ཧ་སྶཱ་ནི ཏི་ཊྛ་ཏི… ཙ་ཏྟཱ་རི ཀ་པྤ་ས་ཧ་སྶཱ་ནི ཏི་ཊྛ་ཏི… ཨ་ཊྛ ཀ་པྤ་ས་ཧ་སྶཱ་ནི ཏི་ཊྛ་ཏི… ཨ་ཀ་ནི་ཊྛཱ་ནཾ དེ་ཝཱ་ནཾ སོ་ལ༹་ས ཀ་པྤ་ས་ཧ་སྶཱ་ནི ཨཱ་ཡུ་པྤ་མཱ་ཎཾ, ཨ་ཀ་ནི་ཊྛཱ་ནཾ དེ་ཝཱ་ནཾ ཨེ་ཀཾ ཙི་ཏྟཾ སོ་ལ༹་ས ཀ་པྤ་ས་ཧ་སྶཱ་ནི ཏི་ཊྛ་ཏཱི་ཏི? ན ཧེ་ཝཾ ཝ་ཏྟ་བྦེ.
ཨཱ་ཀཱ་སཱ་ན་ཉྩཱ་ཡ་ཏ་ནཱུ་པ་གཱ་ནཾ དེ་ཝཱ་ནཾ ཙི་ཏྟཾ མུ་ཧུ་ཏྟཾ མུ་ཧུ་ཏྟཾ ཨུ་པྤ་ཛྫ་ཏི མུ་ཧུ་ཏྟཾ མུ་ཧུ་ཏྟཾ ནི་རུ་ཛ྄ཛྷ་ཏཱི་ཏི? ཨཱ་མ་ནྟཱ. ཨཱ་ཀཱ་སཱ་ན་ཉྩཱ་ཡ་ཏ་ནཱུ་པ་གཱ དེ་ཝཱ མུ་ཧུ་ཏྟཾ མུ་ཧུ་ཏྟཾ ཙ་ཝ་ནྟི མུ་ཧུ་ཏྟཾ མུ་ཧུ་ཏྟཾ ཨུ་པྤ་ཛྫ་ནྟཱི་ཏི? ན ཧེ་ཝཾ ཝ་ཏྟ་བྦེ.
ཨཱ་ཀཱ་སཱ་ན་ཉྩཱ་ཡ་ཏ་ནཱུ་པ་གཱ་ནཾ དེ་ཝཱ་ནཾ ཨེ་ཀཾ ཙི་ཏྟཾ ཡཱ་ཝ་ཏཱ་ཡུ་ཀཾ ཏི་ཊྛ་ཏཱི་ཏི? ཨཱ་མ་ནྟཱ. ཨཱ་ཀཱ་སཱ་ན་ཉྩཱ་ཡ་ཏ་ནཱུ་པ་གཱ དེ་ཝཱ ཡེ་ནེ་ཝ ཙི་ཏྟེ་ན ཨུ་པྤ་ཛྫ་ནྟི, ཏེ་ནེ་ཝ ཙི་ཏྟེ་ན ཙ་ཝ་ནྟཱི་ཏི? ན ཧེ་ཝཾ ཝ་ཏྟ་བྦེ…པེ….
ཙི་ཏྟ་ཊྛི་ཏི་ཀ་ཐཱ ནི་ཊྛི་ཏཱ.