ཝེ་ད་ནཱ་སཾ་ཡུ་ཏྟ

ད་ཊྛ་བྦ་སུ་ཏྟ

པུ་ཙྪཱ – ཏེ་ནཱ་ཝུ་སོ བྷ་ག་ཝ་ཏཱ…པེ… ས་མྨཱ་ས་མྦུ་དྡྷེ་ན ཝེ་ད་ནཱ་སཾ་ཡུ་ཏྟེ པ་ཉྩ་མཾ ད་ཊྛ་བྦ་སུ་ཏྟཾ ཀ་ཏྠ ཀཾ ཨཱ་ར་བྦྷ ཀ་ཐ་ཉྩ བྷཱ་སི་ཏཾ.

ཝི་སྶ་ཛྫ་ནཱ – ས་ཀྐེ་སུ བྷ་ནྟེ ཀ་པི་ལ་ཝ་ཏྠུ་སྨིཾ ནི་གྲོ་དྷཱ་རཱ་མེ ས་མྦ་ཧུ་ལེ བྷི་ཀྑཱུ ཨཱ་ར་བྦྷ ‘‘ཏི་སྶོ ཨི་མཱ བྷི་ཀྑ་ཝེ ཝེ་ད་ནཱ. ཀ་ཏ་མཱ ཏི་སྶོ, སུ་ཁཱ ཝེ་ད་ནཱ དུ་ཀྑཱ་ཝེ་ད་ནཱ ཨ་དུ་ཀྑ་མ་སུ་ཁཱ ཝེ་ད་ནཱ. སུ་ཁཱ བྷི་ཀྑ་ཝེ ཝེ་ད་ནཱ དུ་ཀྑ་ཏོ ད་ཊྛ་བྦཱ, དུ་ཀྑཱ ཝེ་ད་ནཱ ས་ལླ་ཏོ ད་ཊྛ་བྦཱ, ཨ་དུ་ཀྑ་མ་སུ་ཁཱ ཝེ་ད་ནཱ ཨ་ནི་ཙྩ་ཏོ ད་ཊྛ་བྦཱ’’ཏི ཨེ་ཝ་མཱ་དི་ནཱ བྷ་ག་ཝ་ཏཱ བྷཱ་སི་ཏཾ.

སུ་ཁཱ བྷི་ཀྑ་ཝེ ཝེ་ད་ནཱ དུ་ཀྑ་ཏོ ད་ཊྛ་བྦཱ.

ཡོ སུ་ཁཾ དུ་ཀྑ་ཏོ ཨ་དྡ་ས, དུ་ཀྑ་མ་དྡ་ཀྑི ས་ལླ་ཏོ;

ཨ་དུ་ཀྑ་མ་སུ་ཁཾ ས་ནྟཾ, ཨ་དྡ་ཀྑི་ནཾ ཨ་ནི་ཙྩ་ཏོ.

ས ཝེ ས་མྨ་དྡ་སོ བྷི་ཀྑུ, པ་རི་ཛཱ་ནཱ་ཏི ཝེ་ད་ནཱ;

སོ ཝེ་ད་ནཱ པ་རི་ཉྙཱ་ཡ, དི་ཊྛེ དྷ་མྨེ ཨ་ནཱ་ས་ཝོ;

ཀཱ་ཡ་སྶ བྷེ་དཱ དྷ་མྨ་ཊྛོ, ས་ངྑྱཾ ནོ་པེ་ཏི ཝེ་ད་གཱུ.

ས་ལླ་སུ་ཏྟ

པུ་ཙྪཱ – ཏ་ཏྠེ་ཝ ཨཱ་ཝུ་སོ ཚ་ཊྛཾ ས་ལླ་སུ་ཏྟཾ བྷ་ག་ཝ་ཏཱ ཀ་ཏྠ ཀཾ ཨཱ་ར་བྦྷ ཀ་ཐ་ཉྩ བྷཱ་སི་ཏཾ.

ཝི་སྶ་ཛྫ་ནཱ – ས་ཀྐེ་སུ བྷ་ནྟེ ཀ་པི་ལ་ཝ་ཏྠུ་སྨིཾ ནི་གྲོ་དྷཱ་རཱ་མེ ས་མྦ་ཧུ་ལེ བྷི་ཀྑཱུ ཨཱ་ར་བྦྷ ‘‘ཨ་སྶུ་ཏ་ཝཱ བྷི་ཀྑ་ཝེ པུ་ཐུ་ཛྫ་ནོ སུ་ཁ་མྤི ཝེ་ད་ནཾ ཝེ་ད་ཡ་ཏི, དུ་ཀྑ་མྤི ཝེ་ད་ནཾ ཝེ་ད་ཡ་ཏི, ཨ་དུ་ཀྑ་མ་སུ་ཁ་མྤི ཝེ་ད་ནཾ ཝེ་ད་ཡ་ཏི. སུ་ཏ་ཝཱ བྷི་ཀྑ་ཝེ ཨ་རི་ཡ་སཱ་ཝ་ཀོ སུ་ཁ་མྤི ཝེ་ད་ནཾ ཝེ་ད་ཡ་ཏི, དུ་ཀྑ་མྤི ཝེ་ད་ནཾ ཝེ་ད་ཡ་ཏི, ཨ་དུ་ཀྑ་མ་སུ་ཁ་མྤི ཝེ་ད་ནཾ ཝེ་ད་ཡ་ཏི. ཏ་ཏྲ བྷི་ཀྑ་ཝེ ཀོ ཝི་སེ་སོ, ཀོ ཨ་དྷི་པྤ་ཡཱ་སོ, ཀིཾ ནཱ་ནཱ་ཀ་ར་ཎཾ སུ་ཏ་ཝ་ཏོ ཨ་རི་ཡ་བྷཱ་ཝ་ཀ་སྶ ཨ་སྶུ་ཏ་ཝ་ཏཱ པུ་ཐུ་ཛྫ་ནེ་ནཱ’’ཏི ཨེ་ཝ་མཱ་དི་ནཱ བྷ་ག་ཝ་ཏཱ བྷཱ་སི་ཏཾ.