ནི་དཱ་ན་སཾ་ཡུ་ཏྟ

པ་ཊི་ཙྩ་ས་མུ་པྤཱ་ད་སུ་ཏྟ

པུ་ཙྪཱ – ཏེ་ནཱ་ཝུ་སོ བྷ་ག་ཝ་ཏཱ…པེ… ས་མྨཱ་ས་མྦུ་དྡྷེ་ན ནི་དཱ་ན་ཝ་གྒ་སཾ་ཡུ་ཏྟེ པ་ཋ་མཾ སཾ་གཱི་ཏཾ པ་ཊི་ཙྩ་ས་མུ་པྤཱ་ད་སུ་ཏྟཾ ཀ་ཏྠ ཏཾ ཨཱ་ར་བྦྷ ཀི་སྨིཾ ཝ་ཏྠུ་སྨིཾ ཀ་ཐ་ཉྩ བྷཱ་སི་ཏཾ.

ཝི་སྶ་ཛྫ་ནཱ – སཱ་ཝ་ཏྠི་ཡཾ བྷ་ནྟེ པ་ཉྩ་ས་ཏེ ཛ་ན་པ་ད་ཝཱ་སི་ནོ བྷི་ཀྑཱུ ཨཱ་ར་བྦྷ བྷཱ་སི་ཏཾ. པ་ཉྩ་ས་ཏཱ བྷ་ནྟེ ཛ་ན་པ་ད་ཝཱ་སི་ནོ བྷི་ཀྑཱུ ས་བྦེ ཨུ་གྒྷཱ་ཊི་ཏ་ཉྙུ་ནོ དྷུ་ཏ་ངྒ་དྷ་རཱ ཨཱ་ར་དྡྷ་ཝཱི་རི་ཡཱ ཡུ་ཏྟ་ཡོ་གཱ ཝི་པ་སྶ་ཀཱ ས་ཎྷཾ སུ་ཁུ་མཾ སུ་ཉྙ་ཏཾ པ་ཙྩ་ཡཱ་ཀཱ་ར་དྷ་མྨ་དེ་ས་ནཾ པ་ཏྠ་ཡ་མཱ་ནཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ བྷ་ག་ཝ་ནྟཾ པ་རི་ཝཱ་རེ་ཏྭཱ ནི་སཱི་དིཾ་སུ. ཏ་སྨིཾ ཝ་ཏྠུ་སྨིཾ ‘‘པ་ཊི་ཙྩ་ས་མུ་པྤཱ་དཾ ཝོ བྷི་ཀྑ་ཝེ དེ་སེ་སྶཱ་མི, ཏཾ སུ་ཎཱ་ཐ སཱ་དྷུ་ཀཾ མ་ན་སི ཀ་རོ་ཐ, བྷཱ་སི་སྶཱ་མཱི’’ཏི ཨེ་ཝ་མཱ་དི་ནཱ བྷ་ནྟེ བྷ་ག་ཝ་ཏཱ བྷཱ་སི་ཏཾ.

ཀ་ཏ་མོ ཙ བྷི་ཀྑ་ཝེ པ་ཊི་ཙྩ་ས་མུ་པྤཱ་དོ. ཨ་ཝི་ཛྫཱ་པ་ཙྩ་ཡཱ བྷི་ཀྑ་ཝེ ས་ངྑཱ་རཱ, ས་ངྑཱ་ར་པ་ཙྩ་ཡཱ ཝི་ཉྙཱ་ཎཾ (པེ་ཡྻཱ་ལ) ཛཱ་ཏི་པ་ཙྩ་ཡཱ ཛ་རཱ་མ་ར་ཎཾ སོ་ཀ་པ་རི་དེ་ཝ་དུ་ཀྑ་དོ་མ་ན་སྶུ་པཱ་སཱ ས་མྦྷ་ཝ་ནྟི, ཨེ་ཝ་མེ་ཏ་སྶ ཀེ་ཝ་ལ་སྶ དུ་ཀྑ་ནྡྷ་སྶ ས་མུ་ད་ཡོ ཧོ་ཏི. ཨ་ཡཾ ཝུ་ཙྩ་ཏི བྷི་ཀྑ་ཝེ པ་ཊི་ཙྩ་ས་མུ་པྤཱ་དོ.

ཨ་ཝི་ཛྫཱ་ཡ ཏྭེ་ཝ ཨ་སེ་ས་ཝི་རཱ་ག་ནི་རོ་དྷོ ས་ངྑཱ་ར་ནི་རོ་དྷོ (པེ་ཡྻཱ་ལ) ཛཱ་ཏི་ནི་རོ་དྷཱ ཛ་རཱ་མ་ར་ཎཾ སོ་ཀ་པ་རི་དེ་ཝ་དུ་ཀྑ་དོ་མ་ན་སྶུ་པཱ་ཡཱ་སཱ ནི་རུ་ཛ྄ཛྷ་ནྟི, ཨེ་ཝ་མེ་ཏ་སྶ ཀེ་ཝ་ལ་སྶ དུ་ཀྑ་ཀྑ་ནྡྷ་སྶ ནི་རོ་དྷོ ཧོ་ཏི –

ཝི་བྷ་ངྒ་སུ་ཏྟ

པུ་ཙྪཱ – ཏ་ཏྠཱ་ཝུ་སོ དུ་ཏི་ཡཾ སཾ་གཱི་ཏཾ ཝི་བྷ་ངྒ་སུ་ཏྟཾ བྷ་ག་ཝ་ཏཱ ཀ་ཏྠ ཀཾ ཨཱ་ར་བྦྷ ཀི་སྨིཾ ཝ་ཏྠུ་སྨིཾ ཀ་ཐ་ཉྩ བྷཱ་སི་ཏཾ.

ཝི་སྶ་ཛྫ་ནཱ – སཱ་ཝ་ཏྠི་ཡཾ བྷ་ནྟེ པ་ཉྩ་ས་ཏེ ཛ་ན་པ་ད་ཝཱ་སི་ནོ ཝི་པ་ཉྩི་ཏ་ཉྙུ་ནོ བྷི་ཀྑཱུ ཨཱ་ར་བྦྷ བྷཱ་སི་ཏཾ. པ་ཉྩ་ས་ཏཱ བྷ་ནྟེ ཛ་ན་པ་ད་ཝཱ་སི་ཀཱ བྷི་ཀྑཱུ ཝི་པ་ཉྩི་ཏ་ཉྙུ་ནོ དྷུ་ཏ་ངྒ་དྷ་རཱ ཨཱ་ར་དྡྷ་ཝཱི་རི་ཡཱ ཡུ་ཏྟ་ཡོ་གཱ ཝི་སྶ་ཀཱ ས་ཎྷཾ སུ་ཁུ་མཾ སུ་ཉྙ་ཏ་པ་ཊི་སཾ་ཡུ་ཏྟཾ པ་ཙྩ་ཡཱ་ཀཱ་ར་དྷ་མྨ་དེ་ས་ནཾ པ་ཏྠ་ཡ་མཱ་ནཱ བྷ་ག་ཝ་ནྟཾ པ་རི་ཝཱ་རེ་ཏྭཱ ནི་སཱི་དིཾ་སུ. ཏ་སྨིཾ ཝ་ཏྠུ་སྨིཾ ‘‘པ་ཊི་ཙྩ ས་མུ་པྤཱ་དཾ ཝོ བྷི་ཀྑ་ཝེ དེ་དེ་སྶཱ་མི ཝི་བྷ་ཛི་སྶཱ་མི, ཏཾ སུ་ཎཱ་ཐ སཱ་དྷུ་ཀཾ མ་ན་སི་ཀ་རོ་ཐ, བྷཱ་སི་སྶཱ་མཱི’’ཏི ཨེ་ཝ་མཱ་དི་ནཱ བྷ་ནྟེ བྷ་ག་ཝ་ཏཱ བྷཱ་སི་ཏཾ.

པ་ཉྩ་ཝེ་ར་བྷ་ཡ་སུ་ཏྟ

པུ་ཙྪཱ – པ་ཉྩ་ཝེ་ར་བྷ་ཡ་སུ་ཏྟཾ པ་ནཱ་ཝུ་སོ བྷ་ག་ཝ་ཏཱ ཀ་ཏྠ ཀཾ ཨཱ་ར་བྦྷ ཀ་ཐ་ཉྩ བྷཱ་སི་ཏཾ.

ཝི་སྶ་ཛྫ་ནཱ – སཱ་ཝ་ཏྠི་ཡཾ བྷ་ནྟེ ཨ་ནཱ་ཐ་པི་ཎྜི་ཀཾ ག་ཧ་པ་ཏིཾ ཨཱ་ར་བྦྷ ‘‘ཡ་ཏོ ཁོ ག་ཧ་པ་ཏི ཨ་རི་ཡ་སཱ་ཝ་ཀ་སྶ པ་ཉྩ བྷ་ཡཱ་ནི ཝེ་རཱ་ནི ཝཱུ་པ་ས་ནྟཱ་ནི ཧོ་ནྟི, ཙ་ཏཱུ་ཧི ཙ སོ་ཏཱ་པ་ཏྟི་ཡ་ངྒེ་ཧི ས་མ་ནྣཱ་ག་ཏོ ཧོ་ཏི, ཨ་རི་ཡོ ཙ་སྶ ཉཱ་ཡོ པ་ཉྙཱ་ཡ སུ་དི་ཊྛོ ཧོ་ཏི སུ་པྤ་ཊི་ཝི་དྡྷོ, སོ ཨཱ་ཀ་ངྑ་མཱ་ནོ ཨ་ཏྟ་ནཱ་ཝ ཨ་ཏྟཱ་ནཾ བྱཱ་ཀ་རེ་ཡྻ ཁཱི་ཎ་ནི་ར་ཡོ་མི ཁཱི་ཎ་ཏི་ར་ཙྪཱ་ན་ཡོ་ནི ཁཱི་ཎ་པེ་ཏྟི་ཝི་ས་ཡོ ཁཱི་ཎཱ་པཱ་ཡ་དུ་གྒ་ཏི་ཝི་ནི་པཱ་ཏོ, སོ་ཏཱ་པ་ནྣོ་ཧ་མ་སྨི ཨ་ཝི་ནི་པཱ་ཏ་དྷ་མྨོ ནི་ཡ་ཏོ ས་མྦོ་དྷི་པ་རཱ་ཡ་ནོ’’ཏི ཨེ་ཝཾ ཁོ བྷ་ནྟེ བྷ་ག་ཝ་ཏཱ བྷཱ་སི་ཏཾ.

པུ་ཙྪཱ – ཀ་ཐ་ཉྩཱ་ཝུ་སོ་ཏ་ཏྠ བྷ་ག་ཝ་ཏཱ ཨ་རི་ཡ་སཱ་ཝ་ཀ་སྶ པ་ཉྩ་ནྣཾ བྷ་ཡཱ་ནཾ ཝེ་རཱ་ནཾ ཝཱུ་པ་ས་ནྟ་ཏཱ པ་ཀཱ་སི་ཏཱ.

ཝི་སྶ་ཛྫ་ནཱ – ‘‘ཀ་ཏ་མཱ་ནི པ་ཉྩ བྷ་ཡཱ་ནི ཝེ་རཱ་ནི ཝཱུ་པ་ས་ནྟཱ་ནི ཧོ་ནྟི. ཡཾ ག་ཧ་པ་ཏི པཱ་ཎཱ་ཏི་པཱ་ཏཱི པཱ་ཎཱ་ཏི་པཱ་ཏ་པ་ཙྩ་ཡཱ དི་ཊྛ་དྷ་མྨི་ཀ་མྤི བྷ་ཡཾ ཝེ་རཾ པ་ས་ཝ་ཏི, ས་མྤ་རཱ་ཡི་ཀ་མྤི བྷ་ཡཾ ཝེ་རཾ པ་ས་ཝ་ཏི, ཙེ་ཏ་སི་ཀ་མྤི དུ་ཀྑཾ དོ་མ་ན་སྶཾ པ་ཊི་སཾ་ཝེ་ད་ཡ་ཏི. པཱ་ཎཱ་ཏི་པཱ་ཏཱ ཊི་ཝི་ར་ཏ་སྶ ཨེ་ཝཾ ཏཾ བྷ་ཡཾ ཝེ་རཾ ཝཱུ་པ་ས་ནྟཾ ཧོ་ཏཱི’’ཏི ཨེ་ཝ་མཱ་དི་ནཱ བྷ་ནྟེ ཏ་ཏྠ བྷ་ག་ཝ་ཏཱ ཨ་རི་ཡ་སཱ་ཝ་ཀ་སྶ པ་ཉྩ་ནྣཾ བྷ་ཡཱ་ནཾ ཝེ་རཱ་ནཾ ཝཱུ་པ་ས་ནྟ་ཏཱ པ་ཀཱ་སི་ཏཱ.

པུ་ཙྪཱ – ཀ་ཐ་ཉྩཱ་ཝུ་སོ ཏ་ཏྠ བྷ་ག་ཝ་ཏཱ ཨ་རི་ཡ་སཱ་ཝ་ཀ་སྶ ཙ་ཏཱུ་ཧི སོ་ཏཱ་པ་ཏྟི་ཡ་ངྒེ་ཧི ས་མ་ནྣཱ་ག་ཏ་ཏཱ པ་ཀཱ་སི་ཏཱ.

ཝི་སྶ་ཛྫ་ནཱ – ཀ་ཏ་མེ་ཧི ཙ་ཏཱུ་ཧི སོ་ཏཱ་པ་ཏྟི་ཡ་ངྒེ་ཧི ས་མ་ནྣཱ་ག་ཏོ ཧོ་ཏི. ཨི་དྷ ག་ཧ་པ་ཏི ཨ་རི་ཡ་སཱ་ཝ་ཀོ བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏོ ཧོ་ཏི ‘‘ཨི་ཏི་པི་སོ བྷ་ག་ཝཱ ཨ་ར་ཧཾ ས་མྨཱ་ས་མྦུ་དྡྷོ ཝི་ཛྫཱ་ཙ་ར་ཎ་ས་མྤ་ནྣོ སུ་ག་ཏོ ལོ་ཀ་ཝི་དཱུ ཨ་ནུ་ཏྟ་རོ་པུ་རི་ས་ད་མྨ་སཱ་ར་ཐི ས་ཏྠཱ་དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ’’ཏི ཨེ་ཝ་མཱ་དི་ནཱ བྷ་ནྟེ ཏ་ཏྠ བྷ་ག་ཝ་ཏཱ ཨ་རི་ཡ་སཱ་ཝ་ཀ་སྶ ཙ་ཏཱུ་ཧི སོ་ཏཱ་པ་ཏྟི་ཡ་ངྒེ་ཧི ས་མ་ནྣཱ་ག་ཏ་ཏཱ པ་ཀཱ་སི་ཏཱ.

པུ་ཙྪཱ – ཀ་ཐ་ཉྩཱ་ཝུ་སོ ཏ་ཏྠ བྷ་ག་ཝ་ཏཱ ཨ་རི་ཡ་སཱ་ཝ་ཀེ་ན ཨ་རི་ཡ་སྶ ཉཱ་ཡ་སྶ པ་ཉྙཱ་ཡ སུ་དི་ཊྛ་ཏཱ སུ་པྤ་ཊི་ཝི་དྡྷ་ཏཱ པ་ཀཱ་སི་ཏཱ.

ཝི་སྶ་ཛྫ་ནཱ – ཀ་ཏ་མོ ཙ་སྶ ཨ་རི་ཡོ ཉཱ་ཡོ པ་ཉྙཱ་ཡ སུ་དི་ཊྛོ ཧོ་ཏི སུ་པྤ་ཊི་ཝི་དྡྷོ. ཨི་དྷ ག་ཧ་པ་ཏི ཨ་རི་ཡ་སཱ་ཝ་ཀོ པ་ཊི་ཙྩ་ས་མུ་པྤཱ་ད་ཉྙེ་ཝ སཱ་དྷུ་ཀཾ ཡོ་ནི་སོ མ་ན་སི ཀ་རོ་ཏི ‘‘ཨི་ཏི ཨི་མ་སྨིཾ ས་ཏི ཨི་དཾ ཧོ་ཏི, ཨི་མ་སྨིཾ ཨ་ས་ཏི ཨི་དཾ ན ཧོ་ཏི, ཨི་མ་སྶུ་པྤཱ་དཱ ཨི་དཾ ཨུ་པྤ་ཛྫ་ཏི, ཨི་མ་སྶ ནི་རོ་དྷཱ ཨི་དཾ ནི་རུ་ཛ྄ཛྷ་ཏི, ཡ་དི་དཾ ཨ་ཝི་ཛྫཱ་པ་ཙྩ་ཡཱ (པེ་ཡྻཱ་ལ) ཨེ་ཝ་མེ་ཏ་སྶ ཀེ་ཝ་ལ་སྶ དུ་ཀྑ་ཀྑ་ནྡྷ་སྶ ནི་རོ་དྷོ ཧོ་ཏཱི’’ཏི, ཨེ་ཝཾ ཁོ བྷ་ནྟེ བྷ་ག་ཝ་ཏཱ ཏ་ཏྠ ཨ་རི་ཡ་སཱ་ཝ་ཀེ་ན ཨ་རི་ཡ་སྶ ཉཱ་ཡ་སྶ པ་ཉྙཱ་ཡ སུ་དི་ཊྛ་ཏཱ སུ་པྤ་ཊི་ཝི་དྡྷ་ཏཱ པ་ཀཱ་སི་ཏཱ.

ཡ་ཏོ ཁོ ག་ཧ་པ་ཏི ཨ་རི་ཡ་སཱ་ཝ་ཀ་སྶ ཨི་མཱ་ནི པ་ཉྩ བྷ་ཡཱ་ནི ཝེ་རཱ་ནི ཝཱུ་པ་ས་ནྟཱ་ནི ཧོ་ནྟི. ཨི་མེ་ཧི ཙ་ཏཱུ་ཧི སོ་ཏཱ་པ་ཏྟི་ཡ་ངྒེ་ཧི ས་མ་ནྣཱ་ག་ཏོ ཧོ་ཏི. ཨ་ཡ་ཉྩ་སྶ ཨ་རི་ཡོ ཉཱ་ཡོ པ་ཉྙཱ་ཡ སུ་དི་ཊྛོ ཧོ་ཏི སུ་པྤ་ཊི་ཝི་དྡྷོ–

དུ་ཀྑ་སུ་ཏྟ

པུ་ཙྪཱ – དུ་ཀྑ་སུ་ཏྟཾ པ་ནཱ་ཝུ་སོ བྷ་ག་ཝ་ཏཱ ཀ་ཏྠ ཀཾ ཨཱ་ར་བྦྷ ཀ་ཐ་ཉྩ བྷཱ་སི་ཏཾ.

ཝི་སྶ་ཛྫ་ནཱ – སཱ་ཝ་ཏྠི་ཡཾ བྷ་ནྟེ ས་མྦ་ཧུ་ལེ བྷི་ཀྑཱུ ཨཱ་ར་བྦྷ ‘‘དུ་ཀྑ་སྶ བྷི་ཀྑ་ཝེ ས་མུ་ད་ཡ་ཉྩ ཨ་ཏྠ་ངྒ་མ་ཉྩ དེ་སེ་སྶཱ་མཱི’’ཏི ཨེ་ཝ་མཱ་དི་ནཱ བྷ་ག་ཝ་ཏཱ བྷཱ་སི་ཏཾ.

པུ་ཙྪཱ – ཀ་ཐ་ཉྩཱ་ཝུ་སོ ཏ་ཏྠ བྷ་ག་ཝ་ཏཱ དུ་ཀྑ་ས་མུ་ད་ཡོ པ་ཀཱ་སི་ཏོ.

ཝི་སྶ་ཛྫ་ནཱ – ཀ་ཏ་མོ ཙ བྷི་ཀྑ་ཝེ དུ་ཀྑ་སྶ ས་མུ་ད་ཡོ. ཙ་ཀྑུ་ཉྩ པ་ཊི་ཙྩ རཱུ་པེ ཙ ཨུ་པྤ་ཛྫ་ཏི ཙ་ཀྑུ་ཝི་ཉྙཱ་ཎཾ, ཏི་ཎྞཾ ས་ངྒ་ཏི ཕ་སྶོ, ཕ་སྶ་པ་ཙྩ་ཡཱ ཝེ་ད་ནཱ, ཝེ་ད་ནཱ་པ་ཙྩ་ཡཱ ཏ་ཎྷཱ. ཨ་ཡཾ ཁོ བྷི་ཀྑ་ཝེ དུ་ཀྑ་སྶ ས་མུ་ད་ཡོ. སོ་ཏ་ཉྩ པ་ཊི་ཙྩ ས་དྡེ ཙ ཨུ་པྤ་ཛྫ་ཏི སོ་ཏ་ཝི་ཉྙཱ་ཎཾ…པེ… གྷཱ་ན་ཉྩ པ་ཊི་ཙྩ ག་ནྡྷེ ཙ…པེ… ཛི་ཝ྄ཧ་ཉྩ པ་ཊི་ཙྩ ར་སེ ཙ…པེ… ཀཱ་ཡ་ཉྩ པ་ཊི་ཙྩ ཕོ་ཊྛ་བྦེ ཙ…པེ… མ་ན་ཉྩ པ་ཊི་ཙྩ དྷ་མྨེ ཙ ཨུ་པྤ་ཛྫ་ཏི མ་ནོ་ཝི་ཉྙཱ་ཎཾ, ཏི་ཎྞཾ ས་ངྒ་ཏི ཕ་སྶོ, ཕ་སྶ་པ་ཙྩ་ཡཱ ཝེ་ད་ནཱ, ཝེ་ད་ནཱ་པ་ཙྩ་ཡཱ ཏ་ཎྷཱ. ཨ་ཡཾ ཁོ བྷི་ཀྑ་ཝེ དུ་ཀྑ་སྶ ས་མུ་ད་ཡོ་ཏི ཨེ་ཝཾ་ཁོ བྷ་ནྟེ ཏ་ཏྠ བྷ་ག་ཝ་ཏཱ དུ་ཀྑ་སྶ ས་མུ་ད་ཡོ པ་ཀཱ་སི་ཏོ.

པུ་ཙྪཱ – ཀ་ཐ་ཉྩཱ་ཝུ་སོ ཏ་ཏྠ བྷ་ག་ཝ་ཏཱ དུ་ཀྑ་སྶ ཨ་ཏྠ་ངྒ་མོ པ་ཀཱ་སི་ཏོ.

ཝི་སྶ་ཛྫ་ནཱ – ཀ་ཏ་མོ ཙ བྷི་ཀྑ་ཝེ དུ་ཀྑ་སྶ ཨ་ཏྠ་ངྒ་མོ. ཙ་ཀྑུ་ཉྩ པ་ཊི་ཙྩ རཱུ་པེ ཙ ཨུ་པྤ་ཛྫ་ཏི ཙ་ཀྑུ་ཝི་ཉྙཱ་ཎཾ, ཏི་ཎྞཾ ས་ངྒ་ཏི ཕ་སྶོ, ཕ་སྶ་པ་ཙྩ་ཡཱ ཝེ་ད་ནཱ, ཝེ་ད་ནཱ་པ་ཙྩ་ཡཱ ཏ་ཎྷཱ, ཏ་སྶཱ་ཡེ་ཝ ཏ་ཎྷཱ་ཡ ཨ་སེ་ས་ཝི་རཱ་ག་ནི་རོ་དྷཱ ཨུ་པཱ་དཱ་ན་ནི་རོ་དྷོ ཨུ་པཱ་དཱ་ན་ནི་རོ་དྷཱ བྷ་ཝ་ནི་རོ་དྷོ, བྷ་ཝ་ནི་རོ་དྷཱ ཛཱ་ཏི་ནི་རོ་དྷོ, ཛཱ་ཏི་ནི་རོ་དྷཱ ཛ་རཱ་མ་ར་ཎཾ སོ་ཀ་པ་རི་དེ་ཝ་དུ་ཀྑ་དོ་མ་ན་སྶུ་པཱ་ཡཱ་སཱ ནི་རུ་ཛ྄ཛྷ་ནྟི. ཨེ་ཝ་མེ་ཏ་སྶ ཀེ་ཝ་ལ་སྶ དུ་ཀྑ་ཀྑ་ནྡྷ་སྶ ནི་རོ་དྷོ ཧོ་ཏཱི་ཏི ཨེ་ཝ་མཱ་དི་ནཱ བྷ་ནྟེ ཏ་ཏྠ བྷ་ག་ཝ་ཏཱ དུ་ཀྑ་སྶ ཨ་ཏྠ་ངྒ་མོ པ་ཀཱ་སི་ཏོ.

པུ་ཏྟ་མཾ་སཱུ་པ་མ་སུ་ཏྟ

པུ་ཙྪཱ – པུ་ཏྟ་མཾ་སཱུ་པ་མ་སུ་ཏྟཾ པ་ནཱ་ཝུ་སོ བྷ་ག་ཝ་ཏཱ ཀ་ཏྠ ཀཾ ཨཱ་ར་བྦྷ ཀི་སྨིཾ ཝ་ཏྠུ་སྨིཾ ཀ་ཐ་ཉྩ བྷཱ་སི་ཏཾ.

ཝི་སྶ་ཛྫ་ནཱ – སཱ་ཝ་ཏྠི་ཡཾ བྷ་ནྟེ ས་མྦ་ཧུ་ལེ ཨ་དྷུ་ནཱ པ་བྦ་ཛི་ཏེ བྷི་ཀྑཱུ ཨཱ་ར་བྦྷ བྷཱ་སི་ཏཾ. བྷ་ག་ཝ་ཏོ ཙ བྷ་ནྟེ བྷི་ཀྑུ་ས་ངྒྷ་སྶ ཙ མ་ཧཱ་ལཱ་བྷ་ས་ཀྐཱ་རོ ཨུ་ད་པཱ་དི, ཨེ་ཀ་ཙྩེ ཙ བྷ་ནྟེ བྷི་ཀྑཱུ ན་ཝཱ ཨ་ཙི་ར་པ་བྦ་ཛི་ཏཱ ཀུ་ལ་པུ་ཏྟཱ ཨཱ་ཧཱ་རཾ ཨ་པ་ཙྩ་ཝེ་ཀྑི་ཏྭཱ པ་རི་བྷུ་ཉྫིཾ་སུ. ཏ་སྨིཾ བྷ་ནྟེ ཝ་ཏྠུ་སྨིཾ ‘‘ཙ་ཏྟཱ་རོ་མེ བྷི་ཀྑ་ཝེ ཨཱ་ཧཱ་རཱ བྷཱུ་ཏཱ་ནཾ ཝཱ ས་ཏྟཱ་ནཾ ཋི་ཏི་ཡཱ ས་མྦྷ་ཝེ་སཱི་ནཾ ཝཱ ཨ་ནུ་གྒ་ཧཱ་ཡ. ཀ་ཏ་མེ ཙ་ཏྟཱ་རོ ཀ་བ་ལཱི༹་ཀཱ་རོ ཨཱ་ཧཱ་རོ ཨོ་ལཱ༹་རི་ཀོ ཝཱ སུ་ཁུ་མོ ཝཱ ཕ་སྶོ དུ་ཏི་ཡོ མ་ནོ་ས་ཉྩེ་ཏ་ནཱ ཏ་ཏི་ཡཱ ཝི་ཉྙཱ་ཎཾ ཙ་ཏུ་ཏྠ’’ནྟི ཨེ་ཝཾ ཁོ བྷ་ནྟེ བྷ་ག་ཝ་ཏཱ བྷཱ་སི་ཏཾ.

པུ་ཙྪཱ – ཀ་ཐ་ཉྩཱ་ཝུ་སོ ཏ་ཏྠ ཀ་བ་ལཱི༹་ཀཱ་ར་སྶ ཨཱ་ཧཱ་ར་སྶ ད་ཊྛ་བྦཱ་ཀཱ་རོ བྷ་ག་ཝ་ཏཱ པ་ཀཱ་སི་ཏོ.

ཝི་སྶ་ཛྫ་ནཱ – སེ་ཡྻ་ཐཱ་པི བྷི་ཀྑ་ཝེ དྭེ ཛཱ་ཡ་མྤ་ཏི་ཀཱ པ་རི་ཏྟཾ ས་མྦ་ལཾ ཨཱ་དཱ་ཡ ཀ་ནྟཱ་ར་མ་གྒཾ པ་ཊི་པ་ཛྫེ་ཡྻུཾ. ཏེ་ས་མ་སྶ ཨེ་ཀ་པུ་ཏྟ་ཀོ པི་ཡོ མ་ནཱ་པོ་ཏི ཨེ་ཝ་མཱ་དི་ནཱ བྷ་ནྟེ ཏ་ཏྠ བྷ་ག་ཝ་ཏཱ ཀ་བ་ལཱི༹་ཀཱ་ར་སྶ ཨཱ་ཧཱ་ར་སྶ ད་ཊྛ་བྦཱ་ཀཱ་རོ པ་ཀཱ་སི་ཏོ.

པུ་ཙྪཱ – ཀ་ཐ་ཉྩཱ་ཝུ་སོ ཏ་ཏྠ བྷ་ག་ཝ་ཏཱ ཕ་སྶཱ་ཧཱ་ར་སྶ ད་ཊྛ་བྦཱ་ཀཱ་རོ པ་ཀཱ་སི་ཏོ.

ཝི་སྶ་ཛྫ་ནཱ – སེ་ཡྻ་ཐཱ་པི བྷི་ཀྑ་ཝེ གཱ་ཝཱི ནི་ཙྩ་མྨཱ ཀུ་ཊྚཾ ཙེ ནི་སྶཱ་ཡ ཏི་ཊྛེ་ཡྻ, ཡེ ཀུ་ཊྚ་ནི་སྶི་ཏཱ པཱ་ཎཱ, ཏེ ནཾ ཁཱ་དེ་ཡྻུཾ. རུ་ཀྑཾ ཙེ ནི་སྶཱ་ཡ ཏི་ཊྛེ་ཡྻ. ཨུ་ད་ཀཾ ཙེ ནི་སྶཱ་ཡ ཏི་ཊྛེ་ཡྻ. ཨཱ་ཀཱ་སཾ ཙེ ནི་སྶཱ་ཡ ཏི་ཊྛེ་ཡྻ, ཡེ ཨཱ་ཀཱ་ས་ནི་སྶི་ཏཱ པཱ་ཎཱ, ཏེ ནཾ ཁཱ་དེ་ཡྻུ་ནྟི ཨེ་ཝ་མཱ་དི་ནཱ བྷ་ནྟེ ཏ་ཏྠ བྷ་ག་ཝ་ཏཱ ཕ་སྶ་སྶ ཨཱ་ཧཱ་ར་སྶ ད་ཊྛ་བྦཱ་ཀཱ་རོ ཝི་ཏྠཱ་རེ་ཏྭཱ པ་ཀཱ་སི་ཏོ.

ཨེ་ཝ་མེ་ཝ ཁྭཱ་ཧཾ བྷི་ཀྑ་ཝེ ཕ་སྶཱ་ཧཱ་རོ ད་ཊྛ་བྦོ་ཏི ཝ་དཱ་མི.

པུ་ཙྪཱ – ཀ་ཐ་ཉྩཱ་ཝུ་སོ ཏ་ཏྠ བྷ་ག་ཝ་ཏཱ མ་ནོ་ས་ཉྩེ་ཏ་ནཱ་ཧཱ་ར་སྶ ད་ཊྛ་བྦཱ་ཀཱ་རོ པ་ཀཱ་སི་ཏོ.

ཝི་སྶ་ཛྫ་ནཱ – སེ་ཡྻ་ཐཱ་པི བྷི་ཀྑ་ཝེ ཨ་ངྒཱ་ར་ཀཱ་སུ སཱ་དྷི་ཀ་པོ་རི་སཱ པུ་ཎྞཱ ཨ་ངྒཱ་རཱ་ནཾ ཝཱི་ཏ་ཙྩི་ཀཱ་ནཾ ཝཱི་ཏ་དྷཱུ་མཱ་ནཾ. ཨ་ཐ པུ་རི་སོ ཨཱ་ག་ཙྪེ་ཡྻ ཛཱི་ཝི་ཏུ་ཀཱ་མོ ཨ་མ་རི་ཏུ་ཀཱ་མོ སུ་ཁ ཀཱ་མོ དུ་ཀྑ་པྤ་ཊི་ཀཱུ་ལོ་ཏི ཨེ་ཝ་མཱ་དི་ནཱ བྷ་ནྟེ ཏ་ཏྠ བྷ་ག་ཝ་ཏཱ མ་ནོ་ས་ཉྩེ་ཏ་ནཱ་ཧཱ་ར་སྶ ད་ཊྛ་བྦཱ་ཀཱ་རོ ཝི་ཏྠཱ་རེ་ན པ་ཀཱ་སི་ཏོ.

པུ་ཙྪཱ – ཀ་ཐ་ཉྩཱ་ཝུ་སོ ཏ་ཏྠ བྷ་ག་ཝ་ཏཱ ཝི་ཉྙཱ་ཎཱ་ཧཱ་ར་སྶ ད་ཊྛ་བྦཱ་ཀཱ་རོ པ་ཀཱ་སི་ཏོ.

ཝི་སྶ་ཛྫ་ནཱ – སེ་ཡྻ་ཐཱ་པི བྷི་ཀྑ་ཝེ ཙོ་རཾ ཨཱ་གུ་ཙཱ་རིཾ ག་ཧེ་ཏྭཱ ར་ཉྙོ ད་སྶེ་ཡྻུཾ ‘‘ཨ་ཡཾ ཏེ དེ་ཝ་ཙོ་རོ ཨཱ་གུ་ཙཱ་རཱི, ཨི་མ་སྶ ཡཾ ཨི་ཙྪ་སི, ཏཾ ད་ཎྜཾ པ་ཎེ་ཧཱི’’ཏི ཨེ་ཝ་མཱ་དི་ནཱ བྷ་ནྟེ ཏ་ཏྠ བྷ་ག་ཝ་ཏཱ ཝི་ཉྙཱ་ཎཱ་ཧཱ་ར་སྶ ད་ཊྛ་བྦཱ་ཀཱ་རོ པ་ཀཱ་སི་ཏོ.

སུ་སི་མ་པ་རི་བྦཱ་ཛ་ཀ་སུ་ཏྟ

པུ་ཙྪཱ – ཏེ་ནཱ་ཝུ་སོ བྷ་ག་ཝ་ཏཱ…པེ… ས་མྨཱ་ས་མྦུ་དྡྷེ་ན སུ་སི་མ་པ་རི་བྦཱ་ཛ་ཀ སུ་ཏྟཾ ཀ་ཏྠ ཀཾ ཨཱ་ར་བྦྷ ཀི་སྨིཾ ཝ་ཏྠུ་སྨིཾ ཀ་ཐ་ཉྩ བྷཱ་སི་ཏཾ.

ཝི་སྶ་ཛྫ་ནཱ – རཱ་ཛ་ག་ཧེ བྷ་ནྟེ ཨཱ་ཡ་སྨ་ནྟཾ སུ་སི་མཾ ཨཱ་ར་བྦྷ བྷཱ་སི་ཏཾ. ཨཱ་ཡ་སྨཱ བྷ་ནྟེ སུ་སི་མོ ཡཱ་ཝ་ཏ་ཀོ བྷི་ཀྑཱུ་ཧི ས་དྡྷིཾ ཨ་ཧོ་སི ཀ་ཐཱ་ས་ལླཱ་པོ, ཏཾ ས་བྦཾ བྷ་ག་ཝ་ཏོ ཨཱ་རོ་ཙེ་སི. ཏ་སྨིཾ ཝ་ཏྠུ་སྨིཾ ‘‘པུ་བྦེ ཁོ སུ་སི་མ དྷ་མྨ་ཊྛི་ཏི་ཉཱ་ཎཾ, པ་ཙྪཱ ནི་བྦཱ་ནེ ཉཱ་ཎ’’ནྟི ཨེ་ཝ་མཱ་དི་ནཱ བྷ་ནྟེ བྷ་ག་ཝ་ཏཱ བྷཱ་སི་ཏཾ.

པུ་ཙྪཱ – ཀ་ཐ་ཉྩཱ་ཝུ་སོ ཏ་ཏྠ བྷ་ག་ཝཱ ཨཱ་ཡ་སྨ་ཏོ སུ་སི་མ་ཏྠེ་ར་སྶ ས་མྤ་ཏི་ཨ་ར་ཧ་ཏྟ་པ་ཏྟ་སྶ ཨ་ནུ་ཡོ་ག་ཝ་སེ་ན པ་ཊི་པུ་ཙྪི་ཏྭཱ པ་ཊི་པུ་ཙྪི་ཏྭཱ ཨུ་ཏྟ་རི དྷ་མྨ་དེ་ས་ནཾ ཝི་ཏྠཱ་རེ་ཏྭཱ དེ་སེ་སི.

ཝི་སྶ་ཛྫ་ནཱ – ཛཱ་ཏི་པ་ཙྩ་ཡཱ ཛ་རཱ་མ་ར་ཎ་ནྟི སུ་སི་མ པ་སྶ་སཱི་ཏི. ཨེ་ཝཾ བྷ་ནྟེ. བྷ་ཝ་པ་ཙྩ་ཡཱ ཛཱ་ཏཱི་ཏི སུ་སི་མ པ་སྶ་སཱི་ཏི. ཨེ་ཝཾ བྷ་ནྟེ་ཏི ཨེ་ཝ་མཱ་དི་ནཱ བྷ་ནྟེ བྷ་ག་ཝཱ ཏ་ཏྠ ཨཱ་ཡ་སྨ་ཏོ སུ་སི་མ་སྶ ས་མྤ་ཏི་ཨ་ར་ཧ་ཏྟ་པ་ཏྟ་སྶ ཨུ་ཏྟ་རི་པི ཨ་ནུ་ཡོ་ག་ཝ་སེ་ན པ་ཊི་པུ་ཙྪི་ཏྭཱ པ་ཊི་པུ་ཙྪི་ཏྭཱ ཝི་ཏྠཱ་ར་ཏོ དྷ་མྨཾ དེ་སེ་སི.

ཏ་སྶ མེ བྷ་ནྟེ བྷ་ག་ཝཱ ཨ་ཙྩ་ཡཾ ཨ་ཙྩ་ཡ་ཏོ པ་ཊི་གྒ་ཎྷཱ་ཏུ ཨཱ་ཡ་ཏིཾ་སཾ་ཝ་རཱ་ཡ–