ཨ་བྷི་དྷ་མྨ་པི་ཊ་ཀ
སཾ་གཱ་ཡ་ན་སྶ པུ་ཙྪཱ ཝི་སྶ་ཛྫ་ནཱ
པུ་ཙྪཱ – པ་ཋ་མ་མ་ཧཱ་སཾ་གཱི་ཏི་ཀཱ་ལེ ཨཱ་ཝུ་སོ དྷ་མྨ་སཾ་གཱ་ཧ་ཀཱ མ་ཧཱ་ཀ་སྶ་པཱ་ད་ཡོ མ་ཧཱ་ཐེ་ར་ཝ་རཱ པོ་རཱ་ཎ་སཾ་གཱི་ཏི་ཀཱ་རཱ པ་ཋ་མཾ ཝི་ན་ཡ་པི་ཊ་ཀཾ སཾ་གཱ་ཡི་ཏྭཱ སུ་ཏྟ་ནྟ་པི་ཊ་ཀེ ཙ དཱི་གྷ་མ་ཛ྄ཛྷི་མ་སཾ་ཡུ་ཏྟ་ཨ་ངྒུ་ཏྟ་ར་སཾ་ཁཱ་ཏེ ཙ་ཏྟཱ་རོ མ་ཧཱ་ནི་ཀཱ་ཡེ སཾ་གཱ་ཡི་ཏྭཱ ཏ་ད་ན་ནྟ་རཾ ཀིཾ ནཱ་མ པཱ་ཝ་ཙ་ནཾ སཾ་གཱ་ཡིཾ་སུ.
ཝི་སྶ་ཛྫ་ནཱ – པ་ཋ་མ་མ་ཧཱ་སཾ་གཱི་ཏི་ཀཱ་ལེ བྷ་ནྟེ དྷ་མྨ་སཾ་གཱ་ཧ་ཀཱ མ་ཧཱ་ཀ་སྶ་པཱ་ད་ཡོ མ་ཧཱ་ཐེ་ར་ཝ་རཱ པོ་རཱ་ཎ་སཾ་གཱི་ཏི་ཀཱ་རཱ པ་ཋ་མཾ ཝི་ན་ཡ་པི་ཊ་ཀཾ སཾ་གཱ་ཡི་ཏྭཱ སུ་ཏྟ་ནྟ་པི་ཊ་ཀེ ཙ དཱི་གྷ་མ་ཛ྄ཛྷི་མ་སཾ་ཡུ་ཏྟ་ཨ་ངྒུ་ཏྟ་ར་སཾ་ཁཱ་ཏེ ཙ་ཏྟཱ་རོ ནི་ཀཱ་ཡེ སཾ་གཱ་ཡི་ཏྭཱ ཏ་ད་ན་ནྟ་རཾ ཨ་བྷི་དྷ་མྨ་པི་ཊ་ཀཾ ནཱ་མ པཱ་ཝ་ཙ་ནཾ སཾ་གཱ་ཡིཾ་སུ.
པུ་ཙྪཱ – ཨི་མི་སྶ་མྤི ཨཱ་ཝུ་སོ ཚ་ཊྛ་སཾ་གཱི་ཏི་ཡཾ ས་ཀ་ལ་ཉྩེ་ཝ ཝི་ན་ཡ་པི་ཊ་ཀཾ སཾ་གཱི་ཏཾ, ཏེ ཙ ཙ་ཏྟཱ་རོ མ་ཧཱ་ནི་ཀཱ་ཡཱ. ཀཱ་ལོ དཱ་ནི ཨཱ་ཝུ་སོ ས་མྤ་ཏྟོ ཨ་བྷི་དྷ་མྨ་པི་ཊ་ཀཾ སཾ་གཱ་ཡི་ཏུཾ, ཏ་སྨཱ་ཧཾ ཏཾ ཏ་ཏྠ པུ་ཙྪི་ཏ་བྦཱ་ནི པུ་ཙྪི་སྶཱ་མི. ཨ་བྷི་དྷ་མྨོ ནཱ་མེ་ས ཨཱ་ཝུ་སོ ཀེ་ན་ཊྛེ་ན ཨ་བྷི་དྷ་མྨོ་ཏི ཝུ་ཙྩ་ཏི.
ཝི་སྶ་ཛྫ་ནཱ – དྷ་མྨཱ་ཏི་རེ་ཀ དྷ་མྨ་ཝི་སེ་ས་ཊྛེ་ན བྷ་ནྟེ ཨ་བྷི་དྷ་མྨོ་ཏི ཝུ་ཙྩ་ཏི.
པུ་ཙྪཱ – སོ པ་ནེ་ས ཨཱ་ཝུ་སོ ཨ་བྷི་དྷ་མྨོ ཀེ་ན ཀ་ཏྠ ཀ་དཱ ཙ ཨ་དྷི་ག་ཏོ.
ཝི་སྶ་ཛྫ་ནཱ – སོ ཁོ བྷ་ནྟེ ཨ་བྷི་དྷ་མྨོ ས་བྦ་ཉྙུ་བུ་དྡྷེ་ན མ་ཧཱ་བོ་དྷི་མ་ཎྜ་མཱུ་ལེ ཝེ་སཱ་ཁ་པུ་ཎྞ་མི་ཡཾ ཡ་ཐཱ་བྷཱུ་ཏཾ ཨ་དྷི་ག་ཏོ.
པུ་ཙྪཱ – ཀ་ཏྠ པ་ནེ་ས ཨཱ་ཝུ་སོ ཨ་བྷི་དྷ་མྨོ བྷ་ག་ཝ་ཏཱ ཀ་དཱ ཙ ཝི་ཙི་ཏོ.
ཝི་སྶ་ཛྫ་ནཱ – སོ ཁོ བྷ་ནྟེ ཨ་བྷི་དྷ་མྨོ བྷ་ག་ཝ་ཏཱ མ་ཧཱ་བོ་དྷི་མ་ཎྜེ ར་ཏ་ན་གྷ་ར་ས་ཏྟཱ་ཧེ ཝི་ཙི་ཏོ.
པུ་ཙྪཱ – ཀ་ཏྠ པ་ནེ་ས ཨཱ་ཝུ་སོ ཨ་བྷི་དྷ་མྨོ བྷ་ག་ཝ་ཏཱ ཀ་དཱ ཀ་སྶ་ཏྠཱ་ཡ ཙ དེ་སི་ཏོ.
ཝི་སྶ་ཛྫ་ནཱ – སོ ཁོ བྷ་ནྟེ ཨ་བྷི་དྷ་མྨོ བྷ་ག་ཝ་ཏཱ དེ་ཝེ་སུ ཏཱ་ཝ་ཏིཾ་སེ་སུ པཱ་རི་ཙྪ་ཏྟ་ཀ་མཱུ་ལ་མྷི པ་ཎྜུ་ཀ་མྦ་ལ་སི་ལཱ་ཡཾ ཨ་བྷི་ས་མྦོ་དྷི་ཏོ ས་ཏྟ་མེ ཝ་སྶེ མཱ་ཏ་རཾ པ་མུ་ཁཾ ཀ་ཏྭཱ ད་ས་ཧི ཙ་ཀྐ་ཝཱ་ལ༹་ས་ཧ་སྶེ་ཧི ཨཱ་ག་མྨ ས་ནྣི་སི་ནྣཱ་ནཾ དེ་ཝ་ཏཱ་ནཾ ཙ་ཏུ་རོ་གྷ་ནི་ཏྠ་ར་ཎ་ཏྠཱ་ཡ ཨ་ནྟོ ཝ་སྶཾ དེ་སི་ཏོ.
པུ་ཙྪཱ – ཀེ་ནེ་ས ཨཱ་ཝུ་སོ ཨ་བྷི་དྷ་མྨོ པ་ཋ་མཾ མ་ནུ་སྶ་ལོ་ཀེ པ་ཏི་གྒ་ཧི་ཏོ, ཀ་སྶ ཙ པུ་ན ཏེ་ན དེ་སི་ཏོ.
ཝི་སྶ་ཛྫ་ནཱ – ཨཱ་ཡ་སྨ་ཏཱ བྷ་ནྟེ སཱ་རི་པུ་ཏྟ་ཏྠེ་རེ་ན དྷ་མྨ་སེ་ནཱ་པ་ཏི་ནཱ ཨེ་ས ཨ་བྷི་དྷ་མྨོ པ་ཋ་མཾ མ་ནུ་སྶ་ལོ་ཀེ པ་ཏི་གྒ་ཧི་ཏོ, ཏེ་ནེ་ཝ བྷ་ནྟེ ཨཱ་ཡ་སྨ་ཏཱ སཱ་རི་པུ་ཏྟ་ཏྠེ་རེ་ན ཨ་ཏྟ་ནོ ས་དྡྷི་ཝི་ཧཱ་རི་ཀཱ་ནཾ པ་ཉྩ་ནྣཾ བྷི་ཀྑུ་ས་ཏཱ་ནཾ དེ་སི་ཏོ.
པུ་ཙྪཱ – ཀེ ཨཱ་ཝུ་སོ སི་ཀྑ་ནྟི.
ཝི་སྶ་ཛྫ་ནཱ – སེ་ཁཱ ཙ བྷ་ནྟེ པུ་ཐུ་ཛྫ་ནཱ ཀ་ལྱཱ་ཎ་ཀཱ ཙ སི་ཀྑ་ནྟི.
པུ་ཙྪཱ – ཀེ ཨཱ་ཝུ་སོ སི་ཀྑི་ཏ་སི་ཀྑཱ.
ཝི་སྶ་ཛྫ་ནཱ – ཨ་ར་ཧ་ནྟོ བྷ་ནྟེ སི་ཀྑི་ཏ་སི་ཀྑཱ.
པུ་ཙྪཱ – ཀེ ཨཱ་ཝུ་སོ དྷཱ་རེ་ནྟི.
ཝི་སྶ་ཛྫ་ནཱ – ཡེ་སཾ བྷ་ནྟེ ཝ་ཏྟ་ཏི, ཏེ དྷཱ་རེ་ནྟི.
པུ་ཙྪཱ – ཀ་སྶ ཨཱ་ཝུ་སོ ཝ་ཙ་ནཾ.
ཝི་སྶ་ཛྫ་ནཱ – བྷ་ག་ཝ་ཏོ བྷ་ནྟེ ཝ་ཙ་ནཾ ཨ་ར་ཧ་ཏོ ས་མྨཱ་ས་མྦུ་དྡྷ་སྶ.
པུ་ཙྪཱ – ཀེ་ནཱ་ཝུ་སོ ཨཱ་བྷ་ཏཾ.
ཝི་སྶ་ཛྫ་ནཱ – པ་རཾ་པ་རཱ་ཡ བྷ་ནྟེ ཨཱ་བྷ་ཏཾ.
དྷ་མྨ་ས་ངྒ་ཎཱི
པུ་ཙྪཱ – སོ པ་ནེ་ས ཨཱ་ཝུ་སོ ཨ་བྷི་དྷ་མྨོ དྷ་མྨ་ས་ངྒ་ཎི་ཝི་བྷ་ངྒཱ་དི་པ་ཀ་ར་ཎ་པ་རི་ཙྪེ་ད་ཝ་སེ་ན ས་ཏྟ་ཝི་དྷོ. ཏེ་སུ པ་ཋ་མཾ བྷ་ག་ཝ་ཏཱ ཀ་ཏ་རཾ པ་ཀ་ར་ཎཾ དེ་སི་ཏཾ.
ཝི་སྶ་ཛྫ་ནཱ – པ་ཋ་མཾ བྷ་ནྟེ དྷ་མྨ་ས་ངྒ་ཎི་པ་ཀ་ར་ཎཾ བྷ་ག་ཝ་ཏཱ དེ་སི་ཏཾ.
པུ་ཙྪཱ – དྷ་མྨ་ས་ངྒ་ཎི་ཡཾ ཨཱ་ཝུ་སོ ཨ་ཏྠི མཱ་ཏི་ཀཱ, ཨ་ཏྠི པ་ད་བྷཱ་ཛ་ནཱི་ཡཾ. ཏེ་སུ མཱ་ཏི་ཀཾ ནི་ཀྑི་པ་ནྟེ་ན བྷ་ག་ཝ་ཏཱ ཀ་ཏཾ ནི་ཀྑི་ཏྟཱ.
ཝི་སྶ་ཛྫ་ནཱ – མཱ་ཏི་ཀཾ བྷ་ནྟེ ནི་ཀྑི་པ་ནྟེ་ན བྷ་ག་ཝ་ཏཱ ‘‘ཀུ་ས་ལཱ དྷ་མྨཱ ཨ་ཀུ་ས་ལཱ དྷ་མྨཱ ཨ་བྱཱ་ཀ་ཏཱ དྷ་མྨཱ. སུ་ཁཱ་ཡ ཝེ་ད་ནཱ་ཡ ས་མྤ་ཡུ་ཏྟཱ དྷ་མྨཱ དུ་ཀྑཱ་ཡ ཝེ་ད་ནཱ་ཡ ས་མྤ་ཡུ་ཏྟཱ དྷ་མྨཱ ཨ་དུ་ཀྑ་མ་སུ་ཁཱ་ཡ ཝེ་ད་ནཱ་ཡ ས་མྤ་ཡུ་ཏྟཱ དྷ་མྨཱ. ཝི་པཱ་ཀཱ དྷ་མྨཱ ཝི་པཱ་ཀ་དྷ་མྨ་དྷ་མྨཱ ནེ་ཝ་ཝི་པཱ་ཀ་ན་ཝི་པཱ་ཀ་དྷ་མྨ་དྷ་མྨཱ’’ཏི ཨེ་ཝ་མཱ་དི་ནཱ དྭཱ་ཝཱི་ས་ཏི་ཡཱ ཏི་ཀཱ་ནཾ ཝ་སེ་ན. ‘‘ཧེ་ཏཱུ དྷ་མྨཱ ན ཧེ་ཏཱུ དྷ་མྨཱ. ས་ཧེ་ཏུ་ཀཱ དྷ་མྨཱ ཨ་ཧེ་ཏུ་ཀཱ དྷ་མྨཱ.
ཧེ་ཏུ་ས་མྤ་ཡུ་ཏྟཱ དྷ་མྨཱ ཧེ་ཏུ་ཝི་པྤ་ཡུ་ཏྟཱ དྷ་མྨཱ. ཧེ་ཏཱུ ཙེ་ཝ དྷ་མྨཱ ས་ཧེ་ཏུ་ཀཱ ཙ ས་ཧེ་ཏུ་ཀཱ ཙེ་ཝ དྷ་མྨཱ ན ཙ ཧེ་ཏཱུ. ཧེ་ཏཱུ ཙེ་ཝ དྷ་མྨཱ ཧེ་ཏུ་ས་མྤ་ཡུ་ཏྟཱ ཙ ཧེ་ཏུ་ས་མྤ་ཡུ་ཏྟཱ ཙེ་ཝ དྷ་མྨཱ ན ཙ ཧེ་ཏཱུ. ན ཧེ་ཏཱུ ཁོ པ་ན དྷ་མྨཱ ས་ཧེ་ཏུ་ཀཱ་པི ཨ་ཧེ་ཏུ་ཀཱ་པཱི’’ཏི ཨེ་ཝ་མཱ་དི་ནཱ དུ་ཀ་ས་ཏཱ་ན་ཉྩ ཝ་སེ་ན མཱ་ཏི་ཀཱ ནི་ཀྑི་ཏྟཱ.
ཀཱ་མཱ་ཝ་ཙ་ར་ཀུ་ས་ལ
པུ་ཙྪཱ – ཨ་བྷི་དྷ་མྨ་པི་ཊ་ཀེ ཨཱ་ཝུ་སོ དྷ་མྨ་ས་ངྒ་ཎི་ཡཾ པ་ད་བྷཱ་ཛ་ནཱི་ཡེ ཙི་ཏྟུ་པྤཱ་ད་ཀ་ཎྜེ ཀུ་ས་ལཱ དྷ་མྨཱ་ཏི་པ་ད་སྶ ཨ་ཏྠཾ ཝི་བྷ་ཛ་ནྟེ་ན བྷ་ག་ཝ་ཏཱ ཀ་ཐཾ ཀཱ་མཱ་ཝ་ཙ་ར་ཀུ་ས་ལཾ ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཾ.
ཝི་སྶ་ཛྫ་ནཱ – ཨ་བྷི་དྷ་མྨ་པི་ཊ་ཀེ བྷ་ནྟེ དྷ་མྨ་ས་ངྒ་ཎི་པ་ཀ་ར་ཎེ ཙི་ཏྟུ་པྤཱ་ད་ཀ་ཎྜེ ཀུ་ས་ལཱ དྷ་མྨཱ་ཏི པ་ད་སྶ ཨ་ཏྠཾ ཝི་བྷ་ཛ་ནྟེ་ན བྷ་ག་ཝ་ཏཱ ‘‘ཀ་ཏ་མེ དྷ་མྨཱ ཀུ་ས་ལཱ. ཡ་སྨིཾ ས་མ་ཡེ ཀཱ་མཱ་ཝ་ཙ་རཾ ཀུ་ས་ལཾ ཙི་ཏྟཾ ཨུ་པྤ་ནྣཾ ཧོ་ཏི སོ་མ་ན་སྶ་ས་ཧ་ག་ཏཾ ཉཱ་ཎ་ས་མྤ་ཡུ་ཏྟཾ རཱུ་པཱ་ར་མྨ་ཎཾ ཝཱ ས་དྡཱ་ར་མྨ་ཎཾ ཝཱ ག་ནྡྷཱ་ར་མྨ་ཎཾ ཝཱ ར་སཱ་ར་མྨ་ཎཾ ཝཱ ཕོ་ཊྛ་བྦཱ་ར་མྨ་ཎཾ ཝཱ དྷ་མྨཱ་ར་མྨ་ཎཾ ཝཱ ཡཾ ཡཾ ཝཱ པ་ནཱ་ར་བྦྷ. ཏ་སྨིཾ ས་མ་ཡེ ཕ་སྶོ ཧོ་ཏི ཝེ་ད་ནཱ ཧོ་ཏི ས་ཉྙཱ ཧོ་ཏི ཙེ་ཏ་ནཱ ཧོ་ཏི ཙི་ཏྟཾ ཧོ་ཏི ཝི་ཏ་ཀྐོ ཧོ་ཏི ཝི་ཙཱ་རོ ཧོ་ཏི པཱི་ཏི ཧོ་ཏི སུ་ཁཾ ཧོ་ཏི ཙི་ཏྟ་སྶེ་ཀ་གྒ་ཏཱ ཧོ་ཏཱི’’ཏི ཨེ་ཝ་མཱ་དི་ནཱ ཀཱ་མཱ་ཝ་ཙ་ར་ཀུ་ས་ལཾ ཏཱི་ཧི མ་ཧཱ་ཝཱ་རེ་ཧི ཝི་བྷ་ཛི་ཏྭཱ དེ་སི་ཏཾ.
རཱུ་པཱ་ཝ་ཙ་ར་ཀུ་ས་ལ
པུ་ཙྪཱ – ཨ་བྷི་དྷ་མྨ་པི་ཊ་ཀེ ཨཱ་ཝུ་སོ དྷ་མྨ་ས་ངྒ་ཎཱི་པཱ་ལི༹་ཡཾ ཙི་ཏྟུ་པྤཱ་ད་ཀ་ཎྜེ ཀུ་ས་ལཱ དྷ་མྨཱ་ཏི པ་ད་སྶ ཨ་ཏྠཾ ཝི་བྷ་ཛ་ནྟེ་ན བྷ་ག་ཝ་ཏཱ ཀ་ཐཾ རཱུ་པཱ་ཝ་ཙ་ར་ཀུ་ས་ལ་ཉྩ ཨ་རཱུ་པཱ་ཝ་ཙ་ར་ཀུ་ས་ལ་ཉྩ ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཾ.
ཝི་སྶ་ཛྫ་ནཱ – རཱུ་པཱ་ཝ་ཙ་ར་ཀུ་ས་ལ་ཉྩ ཨ་རཱུ་པཱ་ཝ་ཙ་ར་ཀུ་ས་ལ་ཉྩ བྷ་ནྟེ ‘‘ཀ་ཏ་མེ དྷ་མྨཱ ཀུ་ས་ལཱ. ཡ་སྨིཾ ས་མ་ཡེ རཱུ་པཱུ་པ་པ་ཏྟི་ཡཱ མ་གྒཾ བྷཱ་ཝེ་ཏི ཝི་ཝི་ཙྩེ་ཝ ཀཱ་མེ་ཧི ཝི་ཝི་ཙྩ ཨ་ཀུ་ས་ལེ་ཧི དྷ་མྨེ་ཧི ས་ཝི་ཏ་ཀྐཾ ས་ཝི་ཏ་ཀྐཾ ཝི་ཝེ་ཀ་ཛཾ པཱི་ཏི་སུ་ཁཾ པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏི པ་ཐ་ཝཱི་ཀ་སི་ཎ’’ནྟི ཨེ་ཝ་མཱ་དི་ནཱ བྷ་ག་ཝ་ཏཱ ཝི་ཏྠཱ་ར་ཏོ དེ་སི་ཏཾ.
ལོ་ཀུ་ཏྟ་རཱ་ཀུ་ས་ལ
པུ་ཙྪཱ – ཨ་བྷི་དྷ་མྨ་པི་ཊ་ཀེ ཨཱ་ཝུ་སོ དྷ་མྨ་ས་ངྒ་ཎཱི་པཱ་ལི༹་ཡཾ ཙི་ཏྟུ་པྤཱ་ད་ཀ་ཎྜེ ཀུ་ས་ལཱ དྷ་མྨཱ་ཏི པ་ད་སྶ ཨ་ཏྠཾ ཝི་བྷ་ཛ་ནྟེ་ན བྷ་ག་ཝ་ཏཱ ཀ་ཐཾ ལོ་ཀུ་ཏྟ་ར་ཀུ་ས་ལཾ ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཾ.
ཝི་སྶ་ཛྫ་ནཱ – ཨ་བྷི་དྷ་མྨ་པི་ཊ་ཀེ བྷ་ནྟེ དྷ་མྨ་ས་ངྒ་ཎི་ཡཾ ཙི་ཏྟུ་པྤཱ་ད་ཀ་ཎྜེ ཀུ་ས་ལཱ དྷ་མྨཱ་ཏི པ་ད་སྶ ཨ་ཏྠཾ ཝི་བྷ་ཛ་ནྟེ་ན བྷ་ག་ཝ་ཏཱ ‘‘ཀ་ཏ་མེ དྷ་མྨཱ ཀུ་ས་ལཱ. ཡ་སྨིཾ ས་མ་ཡེ ལོ་ཀུ་ཏྟ་རཾ ཛྷཱ་ནཾ བྷཱ་ཝེ་ཏི ནི་ཡྻཱ་ནི་ཀཾ ཨ་པ་ཙ་ཡ་གཱ་མིཾ དི་ཊྛི་ག་ཏཱ་ནཾ པ་ཧཱ་ནཱ་ཡ པ་ཋ་མཱ་ཡ བྷཱུ་མི་ཡཱ པ་ཏྟི་ཡཱ ཝི་ཝི་ཙྩེ་ཝ ཀཱ་མེ་ཧི…པེ… པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏི དུ་ཀྑ་པ་ཊི་པ་དཾ ད་ནྡྷཱ་བྷི་ཉྙ’’ནྟི ཨེ་ཝ་མཱ་དི་ནཱ བྷ་ག་ཝ་ཏཱ ལོ་ཀུ་ཏྟ་ར་ཀུ་ས་ལཾ ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཾ.
ཨ་ཀུ་ས་ལ
པུ་ཙྪཱ – ཏ་ཏྠེ་ཝ ཨཱ་ཝུ་སོ ཨ་ཀུ་ས་ལཱ དྷ་མྨཱ་ཏི མཱ་ཏི་ཀཱ་པ་ད་སྶ ཨ་ཏྠཾ ཝི་བྷ་ཛ་ནྟེ་ན བྷ་ག་ཝ་ཏཱ ཀ་ཐཾ ཨ་ཀུ་ས་ལཾ ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཾ.
ཝི་སྶ་ཛྫ་ནཱ – ཏ་ཏྠེ་ཝ བྷ་ནྟེ ཨ་ཀུ་ས་ལཱ དྷ་མྨཱ་ཏི མཱ་ཏི་ཀཱ་པ་ད་སྶ ཨ་ཏྠཾ ཝི་བྷ་ཛ་ནྟེ་ན བྷ་ག་ཝ་ཏཱ ‘‘ཀ་ཏ་མེ དྷ་མྨཱ ཨ་ཀུ་ས་ལཱ. ཡ་སྨིཾ ས་མ་ཡེ ཨ་ཀུ་ས་ལཾ ཙི་ཏྟཾ ཨུ་པྤ་ནྣཾ ཧོ་ཏི སོ་མ་ན་སྶ་ས་ཧ་ག་ཏཾ དི་ཊྛི་ག་ཏ་ས་མྤ་ཡུ་ཏྟཾ རཱུ་པཱ་ར་མྨ་ཎཾ ཝཱ ས་དྡྷཱ་ར་མྨ་ཎཾ ཝཱ ག་ནྡྷཱ་ར་མྨ་ཎཾ ཝཱ ར་སཱ་ར་མྨ་ཎཾ ཝཱ ཕོ་ཊྛ་བྦཱ་ར་མྨ་ཎཾ ཝཱ དྷ་མྨཱ་ར་མྨ་ཎཾ ཝཱ ཡཾ ཡཾ ཝཱ པ་ནཱ་ར་བྦྷ. ཏ་སྨིཾ ས་མ་ཡེ ཕ་སྶོ ཧོ་ཏི ཝེ་ད་ནཱ ཧོ་ཏི ས་ཉྙཱ ཧོ་ཏི ཙེ་ཏ་ནཱ ཧོ་ཏི ཙི་ཏྟཾ ཧོ་ཏཱི’’ཏི ཨེ་ཝ་མཱ་དི་ནཱ ཨ་ཀུ་ས་ལཾ ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཾ.
ཨ་བྱཱ་ཀ་ཏ
པུ་ཙྪཱ – ཨ་བྷི་དྷ་མྨ་པི་ཊ་ཀེ ཨཱ་ཝུ་སོ དྷ་མྨ་ས་ངྒ་ཎཱི་པཱ་ལི༹་ཡཾ ཙི་ཏྟུ་པྤཱ་ད་ཀ་ཎྜ་རཱུ་པ་ཀ་ཎྜེ་སུ ཨ་བྱཱ་ཀ་ཏཱ དྷ་མྨཱ་ཏི མཱ་ཏི་ཀཱ་པ་ད་སྶ ཨ་ཏྠཾ ཝི་བྷ་ཛ་ནྟེ་ན བྷ་ག་ཝ་ཏཱ ཀ་ཐཾ ཨ་བྱཱ་ཀ་ཏཱ དྷ་མྨཱ ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཱ.
ཝི་སྶ་ཛྫ་ནཱ – ཨ་བྷི་དྷ་མྨ་པི་ཊ་ཀེ བྷ་ནྟེ དྷ་མྨ་ས་ངྒ་ཎི་ཡཾ ཨ་བྱཱ་ཀ་ཏཱ དྷ་མྨཱ་ཏི པ་ད་སྶ ཨ་ཏྠཾ ཝི་བྷ་ཛ་ནྟེ་ན བྷ་ག་ཝ་ཏཱ ‘‘ཀ་ཏ་མེ དྷ་མྨཱ ཨ་བྱཱ་ཀ་ཏཱ. ཡ་སྨིཾ ས་མ་ཡེ ཀཱ་མཱ་ཝ་ཙ་ར་སྶ ཀུ་ས་ལ་སྶ ཀ་མྨ་སྶ ཀ་ཏ་ཏྟཱ ཨུ་པ་ཙི་ཏ་ཏྟཱ ཝི་པཱ་ཀཾ ཙ་ཀྑུ་ཝི་ཉྙཱ་ཎཾ ཨུ་པྤ་ནྣཾ ཧོ་ཏི ཨུ་པེ་ཀྑཱ་ས་ཧ་ག་ཏཾ རཱུ་པཱ་ར་མྨ་ཎཾ. ཏ་སྨིཾ ས་མ་ཡེ ཕ་སྶོ ཧོ་ཏི ཝེ་ད་ནཱ ཧོ་ཏི ས་ཉྙཱ ཧོ་ཏི ཙེ་ཏ་ནཱ ཧོ་ཏི ཙི་ཏྟཾ ཧོ་ཏཱི’’ཏི ཨེ་ཝ་མཱ་དི་ནཱ ཙ ཙི་ཏྟུ་པྤཱ་ད་ཀ་ཎྜེ, རཱུ་པ་ཀ་ཎྜེ ཙ ‘‘ཀ་ཏ་མེ དྷ་མྨཱ ཨ་བྱཱ་ཀ་ཏཱ. ཀུ་ས་ལཱ་ཀུ་ས་ལཱ་ནཾ དྷ་མྨཱ་ནཾ ཝི་པཱ་ཀཱ ཀཱ་མཱ་ཝ་ཙ་རཱ རཱུ་པཱ་ཝ་ཙ་རཱ ཨ་རཱུ་པཱ་ཝ་ཙ་རཱ ཨ་པ་རི་ཡཱ་པ་ནྣཱ ཝེ་ད་ནཱ་ཀྑ་ནྡྷོ ས་ཉྙཱ་ཀྑ་ནྡྷོ ས་ངྑཱ་ར་ཀྑ་ནྡྷོ ཝི་ཉྙཱ་ཎ་ཀྑ་ནྡྷོ. ཡེ ཙ དྷ་མྨཱ ཀི་རི་ཡཱ ནེ་ཝ ཀུ་ས་ལཱ ནཱ་ཀུ་ས་ལཱ ན ཙ ཀ་མྨ་ཝི་པཱ་ཀཱ. ས་བྦ་ཉྩ རཱུ་པཾ ཨ་ས་ངྑ་ཏཱ ཙ དྷཱ་ཏུ. ཨི་མེ དྷ་མྨཱ ཨ་བྱཱ་ཀ་ཏཱ’’ཏི ཨེ་ཝ་མཱ་དི་ནཱ ཙ ཨ་བྱཱ་ཀ་ཏཱ དྷ་མྨཱ ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཱ.
ཝི་བྷ་ངྒ
པུ་ཙྪཱ – ས་ཏྟ་སུ ཨཱ་ཝུ་སོ ཨ་བྷི་དྷ་མྨ་པྤ་ཀ་ར་ཎེ་སུ ཝི་བྷ་ངྒ་པྤ་ཀ་ར་ཎེ བྷ་ག་ཝ་ཏཱ ཀ་ཏི ཝི་བྷ་ངྒཱ དེ་སི་ཏཱ.
ཝི་སྶ་ཛྫ་ནཱ – ཨ་བྷི་དྷ་མྨ་པི་ཊ་ཀེ བྷ་ནྟེ ས་ཏྟ་སུ པ་ཀ་ར་ཎེ་སུ དུ་ཏི་ཡེ ཝི་བྷ་ངྒ་པྤ་ཀ་ར་ཎེ ཁ་ནྡྷ་ཝི་བྷ་ངྒོ ཨཱ་ཡ་ཏ་ན་ཝི་བྷ་ངྒོ དྷཱ་ཏུ་ཝི་བྷ་ངྒོ ས་ཙྩ་ཝི་བྷ་ངྒོ ཨི་ནྡྲི་ཡ་ཝི་བྷ་ངྒོ པ་ཊི་ཙྩ་ས་མུ་པྤཱ་ད་ཝི་བྷ་ངྒོ ས་ཏི་པ་ཊྛཱ་ན་ཝི་བྷ་ངྒོ ས་མྨ་པྤ་དྷཱ་ན་ཝི་བྷ་ངྒོ ཨི་དྡྷི་པཱ་ད་ཝི་བྷ་ངྒོ བོ་ཛ྄ཛྷ་ངྒ་ཝི་བྷ་ངྒོ མ་གྒ་ངྒ་ཝི་བྷ་ངྒོ ཛྷཱ་ན་ཝི་བྷ་ངྒོ ཨ་པྤ་མ་ཉྙཱ་ཝི་བྷ་ངྒོ སི་ཀྑཱ་པ་ད་ཝི་བྷ་ངྒོ པ་ཊི་ས་མྦྷི་དཱ་ཝི་བྷ་ངྒོ ཉཱ་ཎ་ཝི་བྷ་ངྒོ ཁུ་དྡ་ཀ་ཝ་ཏྠུ་ཝི་བྷ་ངྒོ དྷ་མྨ་ཧ་ད་ཡ་ཝི་བྷ་ངྒོ་ཏི བྷ་ག་ཝ་ཏཱ ཨ་ཊྛཱ་ར་ས ཝི་བྷ་ངྒཱ དེ་སི་ཏཱ.
ཁ་ནྡྷ་ཝི་བྷ་ངྒ
པུ་ཙྪཱ – ཏེ་སུ ཨཱ་ཝུ་སོ ཨ་ཊྛཱ་ར་ས་སུ ཝི་བྷ་ངྒེ་སུ པ་ཋ་མེ ཁ་ནྡྷ་ཝི་བྷ་ངྒེ བྷ་ག་ཝ་ཏཱ ཀ་ཐཾ ཁ་ནྡྷཱ ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཱ.
ཝི་སྶ་ཛྫ་ནཱ – ཏེ་སུ བྷ་ནྟེ ཨ་ཊྛཱ་ར་ས་སུ ཝི་བྷ་ངྒེ་སུ པ་ཋ་མེ ཁ་ནྡྷ་ཝི་བྷ་ངྒེ ‘‘པ་ཉྩ་ཀྑ་ནྡྷཱ རཱུ་པ་ཀྑ་ནྡྷོ ཝེ་ད་ནཱ་ཀྑ་ནྡྷོ ས་ཉྙཱ་ཀྑ་ནྡྷོ ས་ངྑཱ་ར་ཀྑ་ནྡྷོ ཝི་ཉྙཱ་ཎ་ཀྑ་ནྡྷོ. ཏ་ཏྠ ཀ་ཏ་མོ རཱུ་པ་ཀྑ་ནྡྷོ, ཡཾ་ཀི་ཉྩི རཱུ་པཾ ཨ་ཏཱི་ཏཱ་ནཱ་ག་ཏ་པ་ཙྩུ་པྤ་ནྣཾ ཨ་ཛ྄ཛྷ་ཏྟཾ ཝཱ བ་ཧི་དྡྷཱ ཝཱ ཨོ་ལཱ༹་རི་ཀཾ ཝཱ སུ་ཁུ་མཾ ཝཱ ཧཱི་ནཾ ཝཱ པ་ཎཱི་ཏཾ ཝཱ ཡཾ དཱུ་རེ ས་ནྟི་ཀེ ཝཱ, ཏ་དེ་ཀ་ཛ྄ཛྷཾ ཨ་བྷི་ས་ཉྙཱུ་ཧི་ཏྭཱ ཨ་བྷི་ས་ངྑི་པི་ཏྭཱ ཨ་ཡཾ ཝུ་ཙྩ་ཏི རཱུ་པ་ཀྑ་ནྡྷོ’’ཏི ཨེ་ཝ་མཱ་དི་ནཱ སུ་ཏྟ་ནྟ་བྷཱ་ཛ་ནཱི་ཡ་ཨ་བྷི་དྷ་མྨ་བྷཱ་ཛ་ནཱི་ཡ་པ་ཉྷཱ་པུ་ཙྪ་ཀ་ས་ངྑཱ་ཏེ་ཧི ཏཱི་ཧི མ་ཧཱ་ན་ཡེ་ཧི བྷ་ག་ཝ་ཏཱ ཁ་ནྡྷཱ ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཱ.
ཨཱ་ཡ་ཏ་ན་ཝི་བྷ་ངྒ
པུ་ཙྪཱ – དུ་ཏི་ཡེ པ་ན ཨཱ་ཝུ་སོ ཨཱ་ཡ་ཏ་ན་ཝི་བྷ་ངྒེ བྷ་ག་ཝ་ཏཱ ཀ་ཐཾ ཨཱ་ཡ་ཏ་ནཱ་ནི ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཱ་ནི.
ཝི་སྶ་ཛྫ་ནཱ – དུ་ཏི་ཡེ བྷ་ནྟེ ཨཱ་ཡ་ཏ་ན་ཝི་བྷ་ངྒེ ‘‘དྭཱ་ད་སཱ་ཡ་ཏ་ནཱ་ནི ཙ་ཀྑཱ་ཡ་ཏ་ནཾ རཱུ་པཱ་ཡ་ཏ་ནཾ སོ་ཏཱ་ཡ་ཏ་ནཾ ས་དྡཱ་ཡ་ཏ་ནཾ གྷཱ་ནཱ་ཡ་ཏ་ནཾ ག་ནྡྷཱ་ཡ་ཏ་ནཾ ཛི་ཝ྄ཧཱ་ཡ་ཏ་ནཾ ར་སཱ་ཡ་ཏ་ནཾ ཀཱ་ཡཱ་ཡ་ཏ་ནཾ ཕོ་ཊྛ་བྦཱ་ཡ་ཏ་ནཾ མ་ནཱ་ཡ་ཏ་ནཾ དྷ་མྨཱ་ཡ་ཏ་ནཾ. ཙ་ཀྑུཾ ཨ་ནི་ཙྩཾ དུ་ཀྑཾ ཨ་ན་ཏྟཱ ཝི་པ་རི་ཎཱ་མ་དྷ་མྨཾ, རཱུ་པཱ ཨ་ནི་ཙྩཱ དུ་ཀྑཱ ཨ་ན་ཏྟཱ ཝི་པ་རི་ཎཱ་མ་དྷ་མྨཱ’’ཏི ཨེ་ཝ་མཱ་དི་ནཱ བྷ་ག་ཝ་ཏཱ སུ་ཏྟ་ནྟ་བྷཱ་ཛ་ནཱི་ཡ་ཨ་བྷི་དྷ་མྨ་བྷཱ་ཛ་ནཱི་ཡ་པ་ཉྷཱ་པུ་ཙྪ་ཀ་ས་ངྑཱ་ཏེ་ཧི ཏཱི་ཧེ་ཝ ཨཱ་ཡ་ཏ་ནཱ་ནི ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཱ་ནི.
དྷཱ་ཏུ་ཝི་བྷ་ངྒ
པུ་ཙྪཱ – ཨ་བྷི་དྷ་མྨ་པི་ཊ་ཀེ ཨཱ་ཝུ་སོ ཝི་བྷ་ངྒ་པྤ་ཀ་ར་ཎེ ཏ་ཏི་ཡེ དྷཱ་ཏུ་ཝི་བྷ་ངྒེ བྷ་ག་ཝ་ཏཱ ཀ་ཐཾ དྷཱ་ཏུ་ཡོ ཝི་ཏྠཱ་རེ་ན ཝི་བྷ་ཛི་ཏྭཱ དེ་སི་ཏཱ.
ཝི་སྶ་ཛྫ་ནཱ – ཏ་ཏི་ཡེ བྷ་ནྟེ དྷཱ་ཏུ་ཝི་བྷ་ངྒེ ‘‘ཚ དྷཱ་ཏུ་ཡོ པ་ཐ་ཝཱི་དྷཱ་ཏུ ཨཱ་པོ་དྷཱ་ཏུ ཏེ་ཛོ་དྷཱ་ཏུ ཝཱ་ཡོ་དྷཱ་ཏུ ཨཱ་ཀཱ་ས་དྷཱ་ཏུ ཝི་ཉྙཱ་ཎ་དྷཱ་ཏཱུ’’ཏི བྷ་ནྟེ སུ་ཏྟ་ནྟ་བྷཱ་ཛ་ནཱི་ཡ་ཨ་བྷི་དྷ་མྨ་བྷཱ་ཛ་ནཱི་ཡ་པ་ཉྷཱ་པུ་ཙྪ་ཀ་ས་ངྑཱ་ཏེ་ཧི ཏཱི་ཧི མ་ཧཱ་ན་ཡེ་ཧི བྷ་ག་ཝ་ཏཱ དྷཱ་ཏུ་ཡོ ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཱ.
ས་ཙྩ་ཝི་བྷ་ངྒ
པུ་ཙྪཱ – ཙ་ཏུ་ཏྠེ པ་ན ཨཱ་ཝུ་སོ ས་ཙྩ་ཝི་བྷ་ངྒེ བྷ་ག་ཝ་ཏཱ ཀ་ཐཾ ས་ཙྩཱ་ནི ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཱ་ནི.
ཝི་སྶ་ཛྫ་ནཱ – ཙ་ཏུ་ཏྠེ བྷ་ནྟེ ས་ཙྩ་ཝི་བྷ་ངྒེ ‘‘ཙ་ཏྟཱ་རི ཨ་རི་ཡ་ས་ཙྩཱ་ནི དུ་ཀྑཾ ཨ་རི་ཡ་ས་ཙྩཾ, དུ་ཀྑ་ས་མུ་ད་ཡཾ ཨ་རི་ཡ་ས་ཙྩཾ, དུ་ཀྑ་ནི་རོ་དྷཾ ཨ་རི་ཡ་ས་ཙྩཾ, དུ་ཀྑ་ནི་རོ་དྷ་གཱ་མི་ནཱི པ་ཊི་པ་དཱ ཨ་རི་ཡ་ས་ཙྩཾ. ཏ་ཏྠ ཀ་ཏ་མཾ དུ་ཀྑཾ ཨ་རི་ཡ་ས་ཙྩཾ, ཛཱ་ཏི་པི དུ་ཀྑཱ, ཛ་རཱ་པི དུ་ཀྑཱ, མ་ར་ཎ་མྤི དུ་ཀྑཾ, སོ་ཀ་པ་རི་དེ་ཝ་དུ་ཀྑ་དོ་མ་ན་སྶུ་པཱ་ཡཱ་སཱ་པི དུ་ཀྑཱ, ཨ་པྤི་ཡེ་ཧི ས་མྤ་ཡོ་གོ དུ་ཀྑོ, པི་ཡེ་ཧི ཝི་པྤ་ཡོ་གོ དུ་ཀྑོ, ཡ་མྤི་ཙྪཾ ན ལ་བྷ་ཏི, ཏ་མྤི དུ་ཀྑཾ, སཾ་ཁི་ཏྟེ་ན པ་ཉྩུ་པཱ་དཱ་ན་ཀྑ་ནྡྷཱ དུ་ཀྑཱ’’ཏི ཨེ་ཝ་མཱ་དི་ནཱ སུ་ཏྟ་ནྟ་བྷཱ་ཛ་ནཱི་ཡ་ཨ་བྷི་དྷ་མྨ་བྷཱ་ཛ་ནཱི་ཡ་པ་ཉྷཱ་པུ་ཙྪ་ཀ་ས་ངྑཱ་ཏེ་ཧི ཏཱི་ཧི མ་ཧཱ་ན་ཡེ་ཧི བྷ་ག་ཝ་ཏཱ ས་ཙྩཱ་ནི ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཱ་ནི.
ཨི་ནྡྲི་ཡ་ཝི་བྷ་ངྒ
པུ་ཙྪཱ – པ་ཉྩ་མེ པ་ན ཨཱ་ཝུ་སོ ཨི་ནྡྲི་ཡ་ཝི་བྷ་ངྒེ བྷ་ག་ཝ་ཏཱ ཀ་ཐཾ ཨི་ནྡྲི་ཡཱ་ནི ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཱ་ནི.
ཝི་སྶ་ཛྫ་ནཱ – པ་ཉྩ་མེ པ་ན བྷ་ནྟེ ཨི་ནྡྲི་ཡ་ཝི་བྷ་ངྒེ ‘‘བཱ་ཝཱི་ས་ཏི་ནྡྲི་ཡཱ་ནི ཙ་ཀྑུ་ནྡྲི་ཡཾ སོ་ཏི་ནྡྲི་ཡཾ གྷཱ་ནི་ནྡྲི་ཡཾ ཛི་ཝ྄ཧི་ནྡྲི་ཡཾ ཀཱ་ཡི་ནྡྲི་ཡཾ མ་ནི་ནྡྲི་ཡཾ…པེ… ཨ་ཉྙཱ་ཏཱ་ཝི་ནྡྲི་ཡ’’ནྟི ཨེ་ཝ་མཱ་དི་ནཱ ཨ་བྷི་དྷ་མྨ་བྷཱ་ཛ་ནཱི་ཡ་པ་ཉྷཱ་པུ་ཙྪ་ཀ་ས་ངྑཱ་ཏེ་ཧི དྭཱི་ཧི མ་ཧཱ་ན་ཡེ་ཧི བྷ་ག་ཝ་ཏཱ ཨི་ནྡྲི་ཡཱ་ནི ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཱ་ནི.
པ་ཊི་ཙྩ་ས་མུ་པྤཱ་ད ཝི་བྷ་ངྒ
པུ་ཙྪཱ – ཨ་བྷི་དྷ་མྨ་པི་ཊ་ཀེ ཨཱ་ཝུ་སོ ཝི་བྷ་ངྒ་པྤ་ཀ་ར་ཎེ ཚ་ཊྛེ པ་ཊི་ཙྩ་ས་མུ་པྤཱ་ད་ཝི་བྷ་ངྒེ བྷ་ག་ཝ་ཏཱ ཀ་ཐཾ པ་ཊི་ཙྩ་ས་མུ་པྤཱ་དོ ཝི་ཏྠཱ་རེ་ན ཝི་བྷ་ཛི་ཏྭཱ དེ་སི་ཏོ.
ཝི་སྶ་ཛྫ་ནཱ – ཚ་ཊྛེ བྷ་ནྟེ པ་ཊི་ཙྩ་ས་མུ་པྤཱ་ད་ཝི་བྷ་ངྒེ ‘‘ཨ་ཝི་ཛྫཱ་པ་ཙྩ་ཡཱ ས་ངྑཱ་རཱ…པེ… ས་མུ་ད་ཡོ ཧོ་ཏཱི’’ཏི ཨེ་ཝ་མཱ་དི་ནཱ བྷ་ག་ཝ་ཏཱ པ་ཊི་ཙྩ་ས་མུ་པྤཱ་དོ སུ་ཏྟ་ནྟ་བྷཱ་ཛ་ནཱི་ཡ་ཨ་བྷི་དྷ་མྨ་བྷཱ་ཛ་ནཱི་ཡ་ས་ངྑཱ་ཏེ་ཧི དྭཱི་ཧི མ་ཧཱ་ན་ཡེ་ཧི ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏོ.
ས་ཏི་པ་ཊྛཱ་ན་ཝི་བྷ་ངྒ
པུ་ཙྪཱ – ས་ཏྟ་མེ པ་ན ཨཱ་ཝུ་སོ ས་ཏི་པ་ཊྛཱ་ན་ཝི་བྷ་ངྒེ བྷ་ག་ཝ་ཏཱ ཀ་ཐཾ ས་ཏི་པ་ཊྛཱ་ནཱ ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཱ.
ཝི་སྶ་ཛྫ་ནཱ – ས་ཏྟ་མེ བྷ་ནྟེ ས་ཏི་པ་ཊྛཱ་ན་ཝི་བྷ་ངྒེ ‘‘ཙ་ཏྟཱ་རོ ས་ཏི་པ་ཊྛཱ་ནཱ ཨི་དྷ བྷི་ཀྑུ ཨ་ཛ྄ཛྷ་ཏྟཾ ཀཱ་ཡེ ཀཱ་ཡཱ་ནུ་པ་སྶཱི ཝི་ཧ་ར་ཏི, བ་ཧི་དྡྷཱ ཀཱ་ཡེ ཀཱ་ཡཱ་ནུ་པ་སྶཱི ཝི་ཧ་ར་ཏི, ཨ་ཛ྄ཛྷ་ཏྟ་བ་ཧི་དྡྷཱ ཀཱ་ཡེ ཀཱ་ཡཱ་ནུ་པ་སྶཱི ཝི་ཧ་ར་ཏི ཨཱ་ཏཱ་པཱི ས་མྤ་ཛཱ་ནོ ས་ཏི་མཱ ཝི་ནེ་ཡྻ ལོ་ཀེ ཨ་བྷི་ཛ྄ཛྷཱ་དོ་མ་ན་སྶ’’ནྟི ཨེ་ཝ་མཱ་དི་ནཱ སུ་ཏྟ་ནྟ་བྷཱ་ཛ་ནཱི་ཡ་ཨ་བྷི་དྷ་མྨ་བྷཱ་ཛ་ནཱི་ཡ་པ་ཉྷཱ་པུ་ཙྪ་ཀ་ས་ངྑཱ་ཏེ་ཧི ཏཱི་ཧི མ་ཧཱ་ན་ཡེ་ཧི བྷ་ག་ཝ་ཏཱ ས་ཏི་པ་ཊྛཱ་ནཱ ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཱ.
ས་མྨ་པྤ་དྷཱ་ན་ཝི་བྷ་ངྒ
པུ་ཙྪཱ – ཨ་ཊྛ་མེ པ་ན ཨཱ་ཝུ་སོ ས་མྨ་པྤ་དྷཱ་ན་ཝི་བྷ་ངྒེ བྷ་ག་ཝ་ཏཱ ཀ་ཐཾ ས་མྨ་པྤ་དྷཱ་ནཱ ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཱ.
ཝི་སྶ་ཛྫ་ནཱ – ཨ་ཊྛ་མེ བྷ་ནྟེ ས་མྨ་པྤ་དྷཱ་ན་ཝི་བྷ་ངྒེ ‘‘ཙ་ཏྟཱ་རོ ས་མྨ་པྤ་དྷཱ་ནཱ ཨི་དྷ བྷི་ཀྑུ ཨ་ནུ་པྤ་ནྣཱ་ནཾ པཱ་པ་ཀཱ་ནཾ ཨ་ཀུ་ས་ལཱ་ནཾ དྷ་མྨཱ་ནཾ ཨ་ནུ་པྤཱ་དཱ་ཡ ཚ་ནྡཾ ཛ་ནེ་ཏི ཝཱ་ཡ་མ་ཏི ཝཱི་རི་ཡཾ ཨཱ་ར་བྷ་ཏི ཙི་ཏྟཾ པ་གྒ་ཎྷཱ་ཏི པ་ད་ཧ་ཏི, ཨུ་པྤ་ནྣཱ་ནཾ པཱ་པ་ཀཱ་ནཾ ཨ་ཀུ་ས་ལཱ་ནཾ དྷ་མྨཱ་ནཾ པ་ཧཱ་ནཱ་ཡ ཚ་ནྡཾ ཛ་ནེ་ཏི ཝཱ་ཡ་མ་ཏི ཝཱི་རི་ཡཾ ཨཱ་ར་བྷ་ཏི ཙི་ཏྟཾ པ་གྒ་ཎྷཱ་ཏི པ་ད་ཧ་ཏི, ཨ་ནུ་པྤ་ནྣཱ་ནཾ ཀུ་ས་ལཱ་ནཾ དྷ་མྨཱ་ནཾ ཨུ་པྤཱ་དཱ་ཡ ཚ་ནྡཾ ཛ་ནེ་ཏི ཝཱ་ཡ་མ་ཏི ཝཱི་རི་ཡཾ ཨཱ་ར་བྷ་ཏི ཙི་ཏྟཾ པ་གྒ་ཎྷཱ་ཏི པ་ད་ཧ་ཏི, ཨུ་པྤ་ནྣཱ་ནཾ ཀུ་ས་ལཱ་ནཾ དྷ་མྨཱ་ནཾ ཋི་ཏི་ཡཱ ཨ་ས་མྨོ་སཱ་ཡ བྷི་ཡྻོ་བྷཱ་ཝཱ་ཡ ཝེ་པུ་ལླཱ་ཡ བྷཱ་ཝ་ནཱ་ཡ པཱ་རི་པཱུ་རི་ཡཱ ཚ་ནྡཾ ཛ་ནེ་ཏི ཝཱ་ཡ་མ་ཏི ཝཱི་རི་ཡཾ ཨཱ་ར་བྷ་ཏི ཙི་ཏྟཾ པ་གྒ་ཎྷཱ་ཏི པ་ད་ཧ་ཏཱི’’ཏི ཨེ་ཝ་མཱ་དི་ནཱ བྷ་ག་ཝ་ཏཱ ས་མྨ་པྤ་དྷཱ་ནཱ ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཱ.
ཨི་དྡྷི་པཱ་ད་ཝི་བྷ་ངྒ
པུ་ཙྪཱ – ན་ཝ་མེ པ་ན ཨཱ་ཝུ་སོ ཨི་དྡྷི་པཱ་ད་ཝི་བྷ་ངྒེ བྷ་ག་ཝ་ཏཱ ཀ་ཐཾ ཨི་དྡྷི་པཱ་དཱ ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཱ.
ཝི་སྶ་ཛྫ་ནཱ – ན་ཝ་མེ བྷ་ནྟེ ཨི་དྡྷི་པཱ་ད་ཝི་བྷ་ངྒེ ‘‘ཙ་ཏྟཱ་རོ ཨི་དྡྷི་པཱ་དཱ ཨི་དྷ བྷི་ཀྑུ ཚ་ནྡ་ས་མཱ་དྷི་པ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི…པེ… ཝཱི་མཾ་སཱ་ས་མཱ་དྷི་པ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏཱི’’ཏི ཨེ་ཝ་མཱ་དི་ནཱ ཏཱི་ཧི མ་ཧཱ་ན་ཡེ་ཧི བྷ་ག་ཝ་ཏཱ ཨི་དྡྷི་པཱ་དཱ ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཱ.
བོ་ཛ྄ཛྷ་ངྒ་ཝི་བྷ་ངྒ
པུ་ཙྪཱ – ཨ་བྷི་དྷ་མྨ་པི་ཊ་ཀེ ཨཱ་ཝུ་སོ ཝི་བྷ་ངྒ་པྤ་ཀ་ར་ཎེ ད་ས་མེ བོ་ཛ྄ཛྷ་ངྒ་ཝི་བྷ་ངྒེ བྷ་ག་ཝ་ཏཱ ཀ་ཐཾ བོ་ཛ྄ཛྷ་ངྒཱ ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཱ.
ཝི་སྶ་ཛྫ་ནཱ – ད་ས་མེ བྷ་ནྟེ བོ་ཛ྄ཛྷ་ངྒ་ཝི་བྷ་ངྒེ ‘‘ས་ཏྟ བོ་ཛ྄ཛྷ་ངྒཱ ས་ཏི་ས་མྦོ་ཛ྄ཛྷ་ངྒོ དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒོ ཝཱི་རི་ཡ་ས་མྦོ་ཛ྄ཛྷ་ངྒོ པཱི་ཏི་ས་མྦོ་ཛ྄ཛྷ་ངྒོ པ་སྶ་དྡྷི་ས་མྦོ་ཛ྄ཛྷ་ངྒོ ས་མཱ་དྷི་ས་མྦོ་ཛ྄ཛྷ་ངྒོ ཨུ་པེ་ཀྑཱ་ས་མྦོ་ཛ྄ཛྷ་ངྒོ. ཏ་ཏྠ ཀ་ཏ་མོ ས་ཏི་ས་མྦོ་ཛ྄ཛྷ་ངྒོ, ཨི་དྷ བྷི་ཀྑུ ས་ཏི་མཱ ཧོ་ཏི པ་ར་མེ་ན ས་ཏི་ནེ་པ་ཀྐེ་ན ས་མ་ནྣཱ་ག་ཏོ ཙི་ར་ཀ་ཏ་མྤི ཙི་ར་བྷཱ་སི་ཏ་མྤི ས་རི་ཏཱ ཧོ་ཏི ཨ་ནུ་སྶ་རི་ཏཱ, ཨ་ཡཾ ཝུ་ཙྩ་ཏི ས་ཏི་ས་མྦོ་ཛ྄ཛྷ་ངྒོ’’ཏི ཨེ་ཝ་མཱ་དི་ནཱ བྷ་ག་ཝ་ཏཱ སུ་ཏྟ་ནྟ་བྷཱ་ཛ་ནཱི་ཡ་ཨ་བྷི་དྷ་མྨ་བྷཱ་ཛ་ནཱི་ཡ་པ་ཉྷཱ་པུ་ཙྪ་ཀ་ས་ངྑཱ་ཏེ་ཧི ཏཱི་ཧི ན་ཡེ་ཧི བོ་ཛ྄ཛྷ་ངྒཱ ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཱ.
མ་གྒ་ངྒ་ཝི་བྷ་ངྒ
པུ་ཙྪཱ – ཨེ་ཀཱ་ད་ས་མེ པ་ན ཨཱ་ཝུ་སོ མ་གྒ་ངྒ་ཝི་བྷ་ངྒེ བྷ་ག་ཝ་ཏཱ ཀ་ཐཾ མ་གྒ་ངྒཱ ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཱ.
ཝི་སྶ་ཛྫ་ནཱ – ཨེ་ཀཱ་ད་ས་མེ བྷ་ནྟེ མ་གྒ་ངྒ་ཝི་བྷ་ངྒེ ‘‘ཨ་རི་ཡོ ཨ་ཊྛ་ངྒི་ཀོ མ་གྒོ. སེ་ཡྻ་ཐི་དཾ, ས་མྨཱ་དི་ཊྛི ས་མྨཱ་ས་ངྐ་པྤོ ས་མྨཱ་ཝཱ་ཙཱ ས་མྨཱ་ཀ་མྨ་ནྟོ ས་མྨཱ་ཨཱ་ཛཱི་ཝོ ས་མྨཱ་ཝཱ་ཡཱ་མོ ས་མྨཱ་ས་ཏི ས་མྨཱ་ས་མཱ་དྷཱི’’ཏི ཨེ་ཝ་མཱ་དི་ནཱ བྷ་ག་ཝ་ཏཱ སུ་ཏྟ་ནྟ་བྷཱ་ཛ་ནཱི་ཡ་ཨ་བྷི་དྷ་མྨ་བྷཱ་ཛ་ནཱི་ཡ་པ་ཉྷཱ་པུ་ཙྪ་ཀ་ས་ངྑཱ་ཏེ་ཧི ཏཱི་ཧི མ་ཧཱ་ན་ཡེ་ཧི མ་གྒ་ངྒཱ ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཱ.
ཛྷཱ་ན་ཝི་བྷ་ངྒ
པུ་ཙྪཱ – དྭཱ་ད་ས་མོ པ་ན ཨཱ་ཝུ་སོ ཛྷཱ་ན་ཝི་བྷ་ངྒོ བྷ་ག་ཝ་ཏཱ ཀ་ཐཾ ཝི་ཏྠཱ་རེ་ན ཝི་བྷ་ཛི་ཏྭཱ དེ་སི་ཏོ.
ཝི་སྶ་ཛྫ་ནཱ – དྭཱ་ད་ས་མོ བྷ་ནྟེ ཛྷཱ་ན་ཝི་བྷ་ངྒོ ‘‘ཨི་དྷ བྷི་ཀྑུ པཱ་ཏི་མོ་ཀྑ་སཾ་ཝ་ར་སཾ་ཝུ་ཏོ ཝི་ཧ་ར་ཏི ཨཱ་ཙཱ་ར་གོ་ཙ་ར་ས་མྤ་ནྣོ ཨ་ཎུ་མ་ཏྟེ་སུ ཝ་ཛྫེ་སུ བྷ་ཡ་ད་སྶཱ་ཝཱི ས་མཱ་དཱ་ཡ སི་ཀྑ་ཏི སི་ཀྑཱ་པ་དེ་སུ ཨི་ནྡྲི་ཡེ་སུ གུ་ཏྟ་དྭཱ་རོ བྷོ་ཛ་ནེ མ་ཏྟ་ཉྙཱུ པུ་བྦ་ར་ཏྟཱ་པ་ར་ར་ཏྟཾ ཛཱ་ག་རི་ཡཱ་ནུ་ཡོ་ག་མ་ནུ་ཡུ་ཏྟོ’’ཏི ཨེ་ཝ་མཱ་དི་ནཱ བྷ་ག་ཝ་ཏཱ ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏོ.
ཨ་པྤ་མ་ཉྙཱ་ཝི་བྷ་ངྒ
པུ་ཙྪཱ – ཏེ་ར་ས་མེ པ་ན ཨཱ་ཝུ་སོ ཨ་པྤ་མ་ཉྙཱ་ཝི་བྷ་ངྒེ བྷ་ག་ཝ་ཏཱ ཀ་ཐཾ ཨ་པྤ་མ་ཉྙཱ་ཡོ ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཱ.
ཝི་སྶ་ཛྫ་ནཱ – ཏེ་ར་ས་མེ བྷ་ནྟེ ཨ་པྤ་མ་ཉྙཱ་ཝི་བྷ་ངྒེ ‘‘ཙ་ཏ་སྶོ ཨ་པྤ་མ་ཉྙཱ་ཡོ ཨི་དྷ བྷི་ཀྑུ མེ་ཏྟཱ་ས་ཧ་ག་ཏེ་ན ཙེ་ཏ་སཱ ཨེ་ཀཾ དི་སཾ ཕ་རི་ཏྭཱ ཝི་ཧ་ར་ཏི, ཏ་ཐཱ དུ་ཏི་ཡཾ. ཏ་ཐཱ ཏ་ཏི་ཡཾ. ཏ་ཐཱ ཙ་ཏུ་ཏྠཾ. ཨི་ཏི ཨུ་དྡྷ་མ་དྷོ ཏི་རི་ཡཾ ས་བྦ་དྷི ས་བྦ་ཏྟ་ཏཱ་ཡ ས་བྦཱ་ཝ་ནྟཾ ལོ་ཀཾ མེ་ཏྟཱ་ས་ཧ་ག་ཏེ་ན ཙེ་ཏ་སཱ ཝི་པུ་ལེ་ན མ་ཧ་གྒ་ཏེ་ན ཨ་པྤ་མཱ་ཎེ་ན ཨ་ཝེ་རེ་ན ཨ་བྱཱ་པ་ཛྫེ་ན ཕ་རི་ཏྭཱ ཝི་ཧ་ར་ཏཱི’’ཏི ཨེ་ཝ་མཱ་དི་ནཱ བྷ་ག་ཝ་ཏཱ སུ་ཏྟ་ནྟ་བྷཱ་ཛ་ནཱི་ཡ་ཨ་བྷི་དྷ་མྨ་བྷཱ་ཛ་ནཱི་ཡ་པ་ཉྷཱ་པུ་ཙྪ་ཀ་ས་ངྑཱ་ཏེ་ཧི ཏཱི་ཧི མ་ཧཱ་ན་ཡེ་ཧི ཨ་པྤ་མ་ཉྙཱ་ཡོ ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཱ.
སི་ཀྑཱ་པ་ད་ཝི་བྷ་ངྒ
པུ་ཙྪཱ – ཨ་བྷི་དྷ་མྨ་པི་ཊ་ཀེ ཨཱ་ཝུ་སོ ཝི་བྷ་ངྒ་པྤ་ཀ་ར་ཎེ ཙུ་དྡ་ས་མེ སི་ཀྑཱ་པ་ད་ཝི་བྷ་ངྒེ བྷ་ག་ཝ་ཏཱ ཀ་ཐཾ སི་ཀྑཱ་པ་དཱ་ནི ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཱ་ནི.
ཝི་སྶ་ཛྫ་ནཱ – ཙུ་དྡ་ས་མེ བྷ་ནྟེ སི་ཀྑཱ་པ་ད་ཝི་བྷ་ངྒེ ‘‘པ་ཉྩ སི་ཀྑཱ་པ་དཱ་ནི པཱ་ཎཱ་ཏི་པཱ་ཏཱ ཝེ་ར་མ་ཎཱི སི་ཀྑཱ་པ་དཾ, ཨ་དི་ནྣཱ་དཱ་ནཱ ཝེ་ར་མ་ཎཱི སི་ཀྑཱ་པ་དཾ, ཀཱ་མེ་སུ་མི་ཙྪཱ་ཙཱ་རཱ ཝེ་ར་མ་ཎཱི སི་ཀྑཱ་པ་དཾ, མུ་སཱ་ཝཱ་དཱ ཝེ་ར་མ་ཎཱི སི་ཀྑཱ་པ་དཾ, སུ་རཱ་མེ་ར་ཡ་མ་ཛྫ་པ་མཱ་ད་ཊྛཱ་ནཱ ཝེ་ར་མ་ཎཱི སི་ཀྑཱ་པ་དཾ. ཏ་ཏྠ ཀ་ཏ་མཾ པཱ་ཎཱ་ཏི་པཱ་ཏཱ ཝེ་ར་མ་ཎཱི སི་ཀྑཱ་པ་དཾ, ཡ་སྨིཾ ས་མ་ཡེ ཀཱ་མཱ་ཝ་ཙ་རཾ ཀུ་ས་ལཾ ཙི་ཏྟཾ ཨུ་པྤ་ནྣཾ ཧོ་ཏི སོ་མ་ན་སྶ་ས་ཧ་ག་ཏཾ ཉཱ་ཎ་ས་མྤ་ཡུ་ཏྟཾ པཱ་ཎཱ་ཏི་པཱ་ཏཱ ཝི་ར་མ་ནྟ་སྶཱ’’ཏི ཨེ་ཝ་མཱ་དི་ནཱ ཨ་བྷི་དྷ་མྨ་བྷཱ་ཛ་ནཱི་ཡ་པ་ཉྷཱ་པུ་ཙྪ་ཀ་ས་ངྑཱ་ཏེ་ཧི དྭཱི་ཧི མ་ཧཱ་ན་ཡེ་ཧི བྷ་ག་ཝ་ཏཱ སི་ཀྑཱ་པ་དཱ་ནི ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཱ་ནི.
པ་ཊི་ས་མྦྷི་དཱ་ཝི་བྷ་ངྒ
པུ་ཙྪཱ – པ་ནྣ་ར་ས་མེ པ་ན ཨཱ་ཝུ་སོ པ་ཊི་ས་མྦྷི་དཱ་ཝི་བྷ་ངྒེ བྷ་ག་ཝ་ཏཱ ཀ་ཐཾ པ་ཊི་ས་མྦྷི་དཱ་ཡོ ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཱ.
ཝི་སྶ་ཛྫ་ནཱ – པ་ནྣ་ར་ས་མེ བྷ་ནྟེ པ་ཊི་ས་མྦྷི་དཱ་ཝི་བྷ་ངྒེ ‘‘ཙ་ཏ་སྶོ པ་ཊི་ས་མྦྷི་དཱ ཨ་ཏྠ་པ་ཊི་ས་མྦྷི་དཱ དྷ་མྨ་པ་ཊི་ས་མྦྷི་དཱ ནི་རུ་ཏྟི་པ་ཊི་ས་མྦྷི་དཱ པ་ཊི་བྷཱ་ན་པ་ཊི་ས་མྦྷི་དཱ. ཨ་ཏྠེ ཉཱ་ཎཾ ཨ་ཏྠ་པ་ཊི་ས་མྦྷི་དཱ, དྷ་མྨེ ཉཱ་ཎཾ དྷ་མྨ་པ་ཊི་ས་མྦྷི་དཱ, ཏ་ཏྲ དྷ་མྨ་ནི་རུ་ཏྟཱ་བྷི་ལཱ་པེ ཉཱ་ཎཾ ནི་རུ་ཏྟི་པ་ཊི་ས་མྦྷི་དཱ, ཉཱ་ཎེ་སུ ཉཱ་ཎཾ པ་ཊི་བྷཱ་ན་པ་ཊི་ས་མྦྷི་དཱ’’ཏི ཨེ་ཝ་མཱ་དི་ནཱ བྷ་ག་ཝ་ཏཱ ཙ་ཏ་སྶོ པ་ཊི་ས་མྦྷི་དཱ་ཡོ སུ་ཏྟ་ནྟ་བྷཱ་ཛ་ནཱི་ཡ་ཨ་བྷི་དྷ་མྨ་བྷཱ་ཛ་ནཱི་ཡ་པ་ཉྷཱ་པུ་ཙྪ་ཀ་ས་ངྑཱ་ཏེ་ཧི ཏཱི་ཧི མ་ཧཱ་ན་ཡེ་ཧི ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཱ.
ཉཱ་ཎ་ཝི་བྷ་ངྒ
པུ་ཙྪཱ – སོ་ལ༹་ས་མེ པ་ན ཨཱ་ཝུ་སོ ཉཱ་ཎ་ཝི་བྷ་ངྒེ བྷ་ག་ཝ་ཏཱ ཀ་ཐཾ ཉཱ་ཎཱ་ནི ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཱ་ནི.
ཝི་སྶ་ཛྫ་ནཱ – སོ་ལ༹་ས་མེ བྷ་ནྟེ ཉཱ་ཎ་ཝི་བྷ་ངྒེ ‘‘ཨེ་ཀ་ཝི་དྷེ་ན ཉཱ་ཎ་ཝ་ཏྠུ པ་ཉྩ་ཝི་ཉྙཱ་ཎཱ ན ཧེ་ཏཱུ, ཨ་ཧེ་ཏུ་ཀཱ, ཧེ་ཏུ་ཝི་པྤ་ཡུ་ཏྟཱ, ས་པྤ་ཙྩ་ཡཱ, ས་ངྑ་ཏཱ, ཨ་རཱུ་པཱ, ལོ་ཀི་ཡཱ, སཱ་ས་ཝཱ’’ཏི ཨེ་ཝ་མཱ་དི་ནཱ ཨེ་ཀ་ཀ་ཏོ པ་ཊྛཱ་ཡ ཡཱ་ཝ ད་ས་ཀཱ བྷ་ག་ཝ་ཏཱ ཉཱ་ཎཱ་ནི ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཱ་ནི.
ཁུ་དྡ་ཀ་ཝ་ཏྠུ་ཝི་བྷ་ངྒ
པུ་ཙྪཱ – ཨ་བྷི་དྷ་མྨ་པི་ཊ་ཀེ ཨཱ་ཝུ་སོ ཝི་བྷ་ངྒ་པྤ་ཀ་ར་ཎེ ས་ཏྟ་ར་ས་མོ ཁུ་དྡ་ཀ་ཝ་ཏྠུ་ཝི་བྷ་ངྒོ བྷ་ག་ཝ་ཏཱ ཀ་ཐཾ དེ་སི་ཏོ.
ཝི་སྶ་ཛྫ་ནཱ – ཨ་བྷི་དྷ་མྨ་པི་ཊ་ཀེ བྷ་ནྟེ དུ་ཏི་ཡེ ཝི་བྷ་ངྒ་པྤ་ཀ་ར་ཎེ ས་ཏྟ་ར་ས་མོ ཁུ་དྡ་ཀ་ཝ་ཏྠུ་ཝི་བྷ་ངྒོ ‘‘ཛཱ་ཏི་མ་དོ, གོ་ཏྟ་མ་དོ, ཨཱ་རོ་གྱ་མ་དོ, ཡོ་བྦ་ན་མ་དོ, ཛཱི་ཝི་ཏ་མ་དོ’’ཏི ཨེ་ཝ་མཱ་དི་ནཱ ཨེ་ཀ་ཀ་ཏོ པ་ཊྛཱ་ཡ ཡཱ་ཝ ཨ་ཊྛ་ས་ཏ་ཏ་ཎྷཱ་ཝི་ཙ་རི་ཏཾ བྷ་ག་ཝ་ཏཱ ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏོ.
དྷ་མྨ་ཧ་ད་ཡ་ཝི་བྷ་ངྒ
པུ་ཙྪཱ – ཏ་ཏྠ ཨཱ་ཝུ་སོ ཨ་ཊྛཱ་ར་ས་མོ དྷ་མྨ་ཧ་ད་ཡ་ཝི་བྷ་ངྒོ བྷ་ག་ཝ་ཏཱ ཀ་ཐཾ ཝི་བྷ་ཛི་ཏྭཱ དེ་སི་ཏོ.
ཝི་སྶ་ཛྫ་ནཱ – ཨ་ཊྛཱ་ར་ས་མོ བྷ་ནྟེ དྷ་མྨ་ཧ་ད་ཡ་ཝི་བྷ་ངྒོ ‘‘ཀ་ཏི ཁ་ནྡྷཱ, ཀ་ཏི ཨཱ་ཡ་ཏ་ནཱ་ནི, ཀ་ཏི དྷཱ་ཏུ་ཡོ, ཀ་ཏི ས་ཙྩཱ་ནི, ཀ་ཏི ཨི་ནྡྲི་ཡཱ་ནི, ཀ་ཏི ཧེ་ཏཱུ, ཀ་ཏི ཨཱ་ཧཱ་རཱ, ཀ་ཏི ཕ་སྶཱ, ཀ་ཏི ཝེ་ད་ནཱ, ཀ་ཏི ས་ཉྙཱ, ཀ་ཏི ཙེ་ཏ་ནཱ, ཀ་ཏི ཙི་ཏྟཱ་ནི. པ་ཉྩ་ཀྑ་ནྡྷཱ, དྭཱ་ད་སཱ་ཡ་ཏ་ནཱ་ནི, ཨ་ཊྛཱ་ར་ས དྷཱ་ཏུ་ཡོ, ཙ་ཏྟཱ་རི ས་ཙྩཱ་ནི, བཱ་ཝཱི་ས་ཏི་ནྡྲི་ཡཱ་ནི, ན་ཝ ཧེ་ཏཱུ, ཙ་ཏྟཱ་རོ ཨཱ་ཧཱ་རཱ, ས་ཏྟ ཕ་སྶཱ, ས་ཏྟ ཝེ་ད་ནཱ, ས་ཏྟ ས་ཉྙཱ, ས་ཏྟ ཙེ་ཏ་ནཱ, ས་ཏྟ ཙི་ཏྟཱ་ནཱི’’ཏི ཨེ་ཝ་མཱ་དི་ནཱ ས་བྦ་ས་ངྒཱ་ཧ་ཀཱ་དཱི་ཧི ད་ས་ཧི ཝཱ་རེ་ཧི བྷ་ག་ཝ་ཏཱ ཝི་ཏྠཱ་རེ་ན ཝི་བྷ་ཛི་ཏྭཱ དེ་སི་ཏོ.
པུ་ཙྪཱ – ཀ་ཐ་ཉྩཱ་ཝུ་སོ ཏ་ཏྠ བྷ་ག་ཝ་ཏཱ ཨུ་པྤཱ་ད་ཀ་ཀ་མྨ་ཨཱ་ཡུ་པྤ་མཱ་ཎ་ཝཱ་རོ ཝི་ཏྠཱ་རེ་ན ཝི་བྷ་ཛི་ཏྭཱ དེ་སི་ཏོ.
ཝི་སྶ་ཛྫ་ནཱ – དཱ་ནཾ ད་ཏྭཱ སཱི་ལཾ ས་མཱ་དི་ཡི་ཏྭཱ ཨུ་པོ་ས་ཐ་ཀ་མྨཾ ཀ་ཏྭཱ ཀ་ཏྠ ཨུ་པ་པ་ཛྫ་ནྟི. དཱ་ནཾ ད་ཏྭཱ, སཱི་ལཾ ས་མཱ་དི་ཡི་ཏྭཱ ཨུ་པོ་ས་ཐ་ཀ་མྨཾ ཀ་ཏྭཱ ཨ་པྤེ་ཀ་ཙྩེ ཁ་ཏྟི་ཡ་མ་ཧཱ་སཱ་ལཱ་ནཾ ས་ཧ་བྱ་ཏཾ ཨུ་པ་པ་ཛྫ་ནྟི, ཨ་པྤེ་ཀ་ཙྩེ བྲཱ་ཧྨ་ཎ་མ་ཧཱ་སཱ་ལཱ་ནཾ, ཨ་པྤེ་ཀ་ཙྩེ ག་ཧ་པ་ཏི་མ་ཧཱ་སཱ་ལཱ་ནཾ, ཨ་པྤེ་ཀ་ཙྩེ ཙཱ་ཏུ་མ་ཧཱ་རཱ་ཛི་ཀཱ་ནཾ དེ་ཝཱ་ནཾ, ཨ་པྤེ་ཀ་ཙྩེ ཏཱ་ཝ་ཏིཾ་སཱ་ནཾ དེ་ཝཱ་ནཾ, ཨ་པྤེ་ཀ་ཙྩེ ཡཱ་མཱ་ནཾ དེ་ཝཱ་ནཾ, ཨ་པྤེ་ཀ་ཙྩེ ཏུ་སི་ཏཱ་ནཾ དེ་ཝཱ་ནཾ ས་ཧ་བྱ་ཏཾ ཨུ་པ་པ་ཛྫ་ནྟཱི་ཏི ཨེ་ཝ་མཱ་དི་ནཱ བྷ་ནྟེ ཏ་ཏྠ བྷ་ག་ཝ་ཏཱ ཨུ་པྤཱ་ད་ཀ་ཀ་མྨ་ཨཱ་ཡུ་པྤ་མཱ་ཎ་ཝཱ་རོ ཝི་ཏྠཱ་རེ་ན ཝི་བྷ་ཛི་ཏྭཱ དེ་སི་ཏོ.
ཨུ་ཀྑི་ཏྟཱ པུ་ཉྙ་ཏེ་ཛེ་ན, ཀཱ་མ་རཱུ་པ་ག་ཏིཾ ག་ཏཱ;
བྷ་ཝ་གྒ་ཏ་མྤི ས་མྤ་ཏྟཱ, པུ་ནཱ་ག་ཙྪ་ནྟི དུ་གྒ་ཏིཾ –
དྷཱ་ཏུ་ཀ་ཐཱ
པུ་ཙྪཱ – ཏེ་ནཱ་ཝུ་སོ བྷ་ག་ཝ་ཏཱ ཨ་ཊྛཱ་ར་ས་ཧི བུ་དྡྷ་དྷ་མྨེ་ཧི ས་མ་ནྣཱ་ག་ཏེ་ན ཨ་བྷི་དྷ་མྨེ ཨ་ཊྛཱ་ར་ས་ཧི ཝི་བྷ་ངྒེ་ཧི པ་ཊི་མ་ཎྜི་ཏཾ དུ་ཏི་ཡཾ ཝི་བྷ་ངྒ་པྤ་ཀ་ར་ཎཾ དེ་སེ་ཏྭཱ ཏ་ད་ན་ནྟ་རཾ དྷཱ་ཏུ་ཀ་ཐཾ ནཱ་མ ཏ་ཏི་ཡཾ པ་ཀ་ར་ཎཾ ཀ་ཐཾ ཝི་བྷ་ཛི་ཏྭཱ དེ་སི་ཏཾ.
ཝི་སྶ་ཛྫ་ནཱ – ཏ་ཏི་ཡཾ བྷ་ནྟེ དྷཱ་ཏུ་ཀ་ཐཾ ནཱ་མ ཨ་བྷི་དྷ་མྨ་པི་ཊ་ཀཾ ‘‘ས་ངྒ་ཧོ ཨ་ས་ངྒ་ཧོ, ས་ངྒ་ཧི་ཏེ་ན ཨ་ས་ངྒ་ཧི་ཏཾ, ཨ་ས་ངྒ་ཧི་ཏེ་ན ས་ངྒ་ཧི་ཏཾ, ས་ངྒ་ཧི་ཏེ་ན ས་ངྒ་ཧི་ཏཾ, ཨ་ས་ངྒ་ཧི་ཏེ་ན ཨ་ས་ངྒ་ཧི་ཏཾ. ས་མྤ་ཡོ་གོ ཝི་པྤ་ཡོ་གོ, ས་མྤ་ཡུ་ཏྟེ་ན ཝི་པྤ་ཡུ་ཏྟཾ, ཝི་པྤ་ཡུ་ཏྟེ་ན ས་མྤ་ཡུ་ཏྟཾ, ས་མྤ་ཡུ་ཏྟེ་ན ས་མྤ་ཡུ་ཏྟཾ, ཝི་པྤ་ཡུ་ཏྟེ་ན ཝི་པྤ་ཡུ་ཏྟཾ. ས་ངྒ་ཧི་ཏེ་ན ས་མྤ་ཡུ་ཏྟཾ ཝི་པྤ་ཡུ་ཏྟཾ, ས་མྤ་ཡུ་ཏྟེ་ན ས་ངྒ་ཧི་ཏཾ ཨ་ས་ངྒ་ཧི་ཏཾ, ཨ་ས་ངྒ་ཧི་ཏེ་ན ས་མྤ་ཡུ་ཏྟཾ ཝི་པྤ་ཡུ་ཏྟཾ, ཝི་པྤ་ཡུ་ཏྟེ་ན ས་ངྒ་ཧི་ཏཾ ཨ་ས་ངྒ་ཧི་ཏ’’ནྟི ཨེ་ཝ་མཱ་དི་ནཱ པ་ཉྩ མཱ་ཏི་ཀཱ་ཡོ པ་ཋ་མཾ ནི་ཀྑི་པི་ཏྭཱ ས་ངྒ་ཧཱ་ས་ངྒ་ཧཱ་དཱི་ཧི ཙུ་དྡ་ས་ཧི ན་ཡེ་ཧི བྷ་ག་ཝ་ཏཱ ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཾ.
པུ་གྒ་ལ་པ་ཉྙ་ཏྟི
པུ་ཙྪཱ – ཏེ་ནཱ་ཝུ་སོ བྷ་ག་ཝ་ཏཱ ས་བྦ་དྷཱ་ཏུ་ཀུ་ས་ལེ་ན ཨ་བྷི་དྷ་མྨ་པི་ཊ་ཀེ ཏ་ཏི་ཡཾ དྷཱ་ཏུ་ཀ་ཐཱ་པ་ཀ་ར་ཎཾ དེ་སེ་ཏྭཱ ཏ་ད་ན་ནྟ་རཾ ཙ་ཏུ་ཏྠཾ པུ་གྒ་ལ་པ་ཉྙ་ཏྟི་པྤ་ཀ་ར་ཎཾ ཀ་ཐཾ ཝི་བྷ་ཛི་ཏྭཱ དེ་སི་ཏཾ.
ཝི་སྶ་ཛྫ་ནཱ – ཨ་བྷི་དྷ་མྨ་པི་ཊ་ཀེ བྷ་ནྟེ ཙ་ཏུ་ཏྠཾ པུ་གྒ་ལ་པ་ཉྙ་ཏྟི་པྤ་ཀ་ར་ཎཾ ‘‘ཚ པ་ཉྙ་ཏྟི་ཡོ ཁ་ནྡྷ་པ་ཉྙ་ཏྟི ཨཱ་ཡ་ཏ་ན་པ་ཉྙ་ཏྟི དྷཱ་ཏུ་པ་ཉྙ་ཏྟི ས་ཙྩ་པ་ཉྙ་ཏྟི ཨི་ནྡྲི་ཡ་པ་ཉྙ་ཏྟི པུ་གྒ་ལ་པ་ཉྙ་ཏྟི. ཀི་ཏྟཱ་ཝ་ཏཱ ཁ་ནྡྷཱ་ནཾ ཁ་ནྡྷ་པ་ཉྙ་ཏྟི, ཡཱ་ཝ་ཏཱ པ་ཉྩ་ཀྑ་ནྡྷཱ, རཱུ་པ་ཀྑ་ནྡྷོ ཝེ་ད་ནཱ་ཀྑ་ནྡྷོ ས་ཉྙཱ་ཀྑ་ནྡྷོ ས་ངྑཱ་ར་ཀྑ་ནྡྷོ ཝི་ཉྙཱ་ཎ་ཀྑ་ནྡྷོ. ཨེ་ཏྟཱ་ཝ་ཏཱ ཁ་ནྡྷཱ་ནཾ ཁ་ནྡྷ་པ་ཉྙ་ཏྟཱི’’ཏི ཨེ་ཝ་མཱ་དི་ནཱ ཁ་ནྡྷཱ་ཡ་ཏ་ན་དྷཱ་ཏུ་ས་ཙྩ་ཨི་ནྡྲི་ཡ་པ་ཉྙ་ཏྟི་ཡོ སཾ་ཁི་ཏྟེ་ན ཨུ་དྡི་སི་ཏྭཱ པུ་གྒ་ལ་པ་ཉྙ་ཏྟིཾ ཙ ཨེ་ཀ་ཀ་དུ་ཀ་ཏི་ཀ་ཙ་ཏུ་ཀྐ་པ་ཉྩ་ཀ་ཚ་ཀྐ་ས་ཏྟ་ཀ་ཨ་ཊྛ་ཀ་ན་ཝ་ཀ་ད་ས་ཀ་ཝ་སེ་ན ཝི་ཏྠཱ་ར་ཏོ ཝི་བྷ་ཛི་ཏྭཱ བྷ་ག་ཝ་ཏཱ དེ་སི་ཏཱ.
ཀ་ཐཱ་ཝ་ཏྠུ
པུ་ཙྪཱ – ཏེ་ནཱ་ཝུ་སོ བྷ་ག་ཝ་ཏཱ ས་བྦ་པ་ར་མ་ཏྠ་པ་ཉྙ་ཏྟི་དྷ་མྨ་ཀུ་ས་ལེ་ན ཨ་བྷི་དྷ་མྨ་པི་ཊ་ཀེ ཙ་ཏུ་ཏྠཾ པུ་གྒ་ལ་པ་ཉྙ་ཏྟི་པྤ་ཀ་ར་ཎཾ དེ་སེ་ཏྭཱ ཏ་ད་ན་ནྟ་རཾ པ་ཉྩ་མཾ ཀ་ཐཱ་ཝ་ཏྠུ་པྤ་ཀ་ར་ཎཾ ཀ་ཐཾ དེ་སི་ཏཾ.
ཝི་སྶ་ཛྫ་ནཱ – ས་བྦ་པ་ར་མ་ཏྠ་པ་ཉྙ་ཏྟི་དྷ་མྨ་ཀུ་ས་ལེ་ན བྷ་ནྟེ བྷ་ག་ཝ་ཏཱ ལོ་ཀེ ཨ་གྒ་པུ་གྒ་ལེ་ན ཨ་བྷི་དྷ་མྨ་པི་ཊ་ཀེ ཙ་ཏུ་ཏྠཾ པུ་གྒ་ལ་པ་ཉྙ་ཏྟི་པྤ་ཀ་ར་ཎཾ དེ་སེ་ཏྭཱ ཏ་ད་ན་ནྟ་རཾ ཀ་ཐཱ་ཝ་ཏྠུ་དེ་ས་ནཱ་ཡ ཝཱ་རེ ས་མྤ་ཏྟེ ‘‘ཨ་ནཱ་ག་ཏེ མ་མ སཱ་ཝ་ཀོ མོ་གྒ་ལི་པུ་ཏྟ་ཏི་སྶ་ཏྠེ་རོ ནཱ་མ ཨུ་པྤ་ནྣཾ སཱ་ས་ན་མ་ལཾ སོ་དྷེ་ཏྭཱ ཏ་ཏི་ཡ་ས་ངྒཱི་ཏིཾ ཀ་རོ་ནྟོ བྷི་ཀྑུ་ས་ངྒྷ་སྶ མ་ཛ྄ཛྷེ ནི་སི་ནྣོ ས་ཀ་ཝཱ་དེ པ་ཉྩ སུ་ཏྟ་ས་ཏཱ་ནི པ་ར་ཝཱ་དེ པ་ཉྩཱ་ཏི སུ་ཏྟ་ས་ཧ་སྶཾ ས་མོ་དྷཱ་ནེ་ཏྭཱ, ཨི་མཾ པ་ཀ་ར་ཎཾ བྷཱ་ཛེ་སྶ་ཏཱི’’ཏི ཏ་སྶོ་ཀཱ་སཾ ཀ་རོ་ནྟེ་ན པུ་གྒ་ལ་ཝཱ་རེ ཨ་ཊྛ་མུ་ཁཱ ཝཱ་ད་ཡུ་ཏྟིཾ ཨཱ་དིཾ ཀ་ཏྭཱ ས་བྦ་ཀ་ཐཱ་མ་གྒེ་སུ ཨ་ས་མྤུ་ཎྞ་བྷཱ་ཎ་ཝཱ་ར་ཏྠཱ་ཡ ཏ་ནྟི་ཡཱ མཱ་ཏི་ཀཱ ནི་ཀྑེ་པ་མ་ཏྟེ་ན པ་ཉྩ་མཾ ཀ་ཐཱ་ཝ་ཏྠུ་པྤ་ཀ་ར་ཎཾ སཾ་ཁེ་པ་ཏོ དེ་སི་ཏཾ.
པུ་ཙྪཱ – ཨ་དྷུ་ནཱ པཱ་ཀ་ཊཾ པ་ནཱ་ཝུ་སོ ཝི་ཏྠཱ་རཾ ཀ་ཐཱ་ཝ་ཏྠུ་པྤ་ཀ་ར་ཎཾ ཀ་དཱ ཀེ་ན ཀ་ཏྠ ཀ་ཐ་ཉྩ ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཾ.
ཝི་སྶ་ཛྫ་ནཱ – ཏཾ ཁོ བྷ་ནྟེ བྷ་ག་ཝ་ཏོ ན་ཡ་མུ་ཁཾ ནི་སྶཱ་ཡ ཨཱ་ཡ་སྨ་ཏཱ མ་ཧཱ་མོ་གྒ་ལི་པུ་ཏྟ་ཏི་སྶ་ཏྠེ་རེ་ན ཏ་ཏི་ཡ་སཾ་གཱི་ཏི་ཀཱ་ལེ པཱ་ཊ་ལི་པུ་ཏྟེ ཨ་སོ་ཀཱ་རཱ་མེ ས་ཊྛི་བྷི་ཀྑུ་ས་ཏ་ས་ཧ་སྶཱ་ནཾ ས་མཱ་ག་མེ བྷ་ག་ཝ་ཏཱ དི་ནྣ་ན་ཡ་ཝ་སེ་ན ཏ་ཐཱ་ག་ཏེ་ན ཋ་པི་ཏ་མཱ་ཏི་ཀཾ ཝི་བྷ་ཛ་ནྟེ་ན ས་ཀ་ཝཱ་དེ པ་ཉྩ་སུ་ཏྟ་ས་ཏཱ་ནི པ་ར་ཝཱ་དེ པ་ཉྩཱ་ཏི སུ་ཏྟ་ས་ཧ་སྶཾ ཨཱ་ཧ་རི་ཏྭཱ ཨི་དཾ པ་ར་ཝཱ་ད་མ་ཐ་ནཾ ཨ་དྷུ་ནཱ པཱ་ཀ་ཊཾ ཀ་ཐཱ་ཝ་ཏྠུ་པྤ་ཀ་ར་ཎཾ ཝི་ཏྠཱ་ར་ཏོ ཝི་བྷ་ཛི་ཏྭཱ དེ་སི་ཏཾ.
པུ་ཙྪཱ – ཀ་ཏི ཨཱ་ཝུ་སོ ཏ་ཏྠ ཀ་ཐཱ་ཡོ ཏེ་ན ཨཱ་ཡ་སྨ་ཏཱ མ་ཧཱ་མོ་གྒ་ལི་པུ་ཏྟ་ཏི་སྶ་ཏྠེ་རེ་ན ཝི་ཏྠཱ་ར་ཏོ ཝི་བྷ་ཛི་ཏྭཱ ཀ་ཐི་ཏཱ.
ཝི་སྶ་ཛྫ་ནཱ – ཏ་ཏྠ བྷ་ནྟེ ཝཱ་ཙ་ནཱ་མ་གྒ་ཏོ དྭེ ཙ ས་ཏཱ་ནི ས་ཏྟ་ཝཱི་ས་ཏི ཙ ཀ་ཐཱ་ཡོ ཨཱ་ཡ་སྨ་ཏཱ མ་ཧཱ་མོ་གྒ་ལི་པུ་ཏྟ་ཏི་སྶ་ཏྠེ་རེ་ན ཝི་ཏྠཱ་ར་ཏོ ཝི་བྷ་ཛི་ཏྭཱ ཀ་ཐི་ཏཱ.
པུ་གྒ་ལ་ཀ་ཐཱ
པུ་ཙྪཱ – ཀ་ཐ་ཉྩཱ་ཝུ་སོ ཏ་ཏྠ པ་ཋ་མཱ པུ་གྒ་ལ་ཀ་ཐཱ ཨཱ་ཡ་སྨ་ཏཱ མ་ཧཱ་མོ་གྒ་ལི་པུ་ཏྟ་ཏི་སྶ་ཏྠེ་རེ་ན ཝི་ཏྠཱ་ར་ཏོ ཝི་བྷ་ཛི་ཏྭཱ ཀ་ཐི་ཏཱ.
ཝི་སྶ་ཛྫ་ནཱ – པུ་གྒ་ལོ ཨུ་པ་ལ་བྦྷ་ཏི ས་ཙྩི་ཀ་ཊྛ་པ་ར་མ་ཏྠེ་ནཱ་ཏི, ཨཱ་མ་ནྟཱ. ཡོ ས་ཙྩི་ཀ་ཊྛོ པ་ར་མ་ཏྠོ, ཏ་ཏོ སོ པུ་གྒ་ལོ ཨུ་པ་ལ་བྦྷ་ཏི ས་ཙྩི་ཀ་ཊྛ་པ་ར་མ་ཏྠེ་ནཱ་ཏི, ན ཧེ་ཝཾ ཝ་ཏྟ་བྦེ. ཨཱ་ཛཱ་ནཱ་ཧི ནི་གྒ་ཧཾ ཧ་ཉྩི པུ་གྒ་ལོ ཨུ་པ་ལ་བྦྷ་ཏི ས་ཙྩི་ཀ་ཊྛ་པ་ར་མ་ཏྠེ་ན, ཏེ་ན ཝ་ཏ རེ ཝ་ཏྟ་བྦེ ‘‘ཡོ ས་ཙྩི་ཀ་ཊྛོ པ་ར་མ་ཏྠོ, ཏ་ཏོ སོ པུ་གྒ་ལོ ཨུ་པ་ལ་བྦྷ་ཏི ས་ཙྩི་ཀ་ཊྛ་པ་ར་མ་ཏྠེ་ནཱ’’ཏི. ཡཾ ཏ་ཏྠ ཝ་དེ་སི ‘‘ཝ་ཏྟ་བྦེ ཁོ ‘པུ་གྒ་ལོ ཨུ་པ་ལ་བྦྷ་ཏི ས་ཙྩི་ཀ་ཊྛ་པ་ར་མ་ཏྠེ་ན’, ནོ ཙ ཝ་ཏྟ་བྦེ ‘ཡོ ས་ཙྩི་ཀ་ཊྛོ པ་ར་མ་ཏྠོ, ཏ་ཏོ སོ པུ་གྒ་ལོ ཨུ་པ་ལ་བྦྷ་ཏི ས་ཙྩི་ཀ་ཊྛ་པ་ར་མ་ཏྠེ་ནཱ’’ཏི, མི་ཙྪཱ་ཏི ཨེ་ཝ་མཱ་དི་ནཱ བྷ་ནྟེ ཏ་ཏྠ པ་ཋ་མཱ པུ་གྒ་ལ་ཀ་ཐཱ པ་ཉྩ བྷཱ་ཎ་ཝཱ་ར་མ་ཏྟཱ་ཡ ཏ་ནྟི་ཡཱ ཨཱ་ཡ་སྨ་ཏཱ མ་ཧཱ་མོ་གྒ་ལི་པུ་ཏྟ་ཏི་སྶ་ཏྠེ་རེ་ན ཝི་ཏྠཱ་ར་ཏོ ཝི་བྷ་ཛི་ཏྭཱ ཀ་ཐི་ཏཱ.
ཨ་ཉྙཱ་ཎ་ཀ་ཐཱ
པུ་ཙྪཱ – ཨ་བྷི་དྷ་མྨ་པི་ཊ་ཀེ ཨཱ་ཝུ་སོ ཀ་ཐཱ་ཝ་ཏྠུ་པྤ་ཀ་ར་ཎེ དུ་ཏི་ཡ་ཝ་གྒེ དུ་ཏི་ཡཱ ཨ་ཉྙཱ་ཎ་ཀ་ཐཱ ཨཱ་ཡ་སྨ་ཏཱ མ་ཧཱ་མོ་གྒ་ལི་པུ་ཏྟ་ཏི་སྶ་ཏྠེ་རེ་ན ཀ་ཐཾ ཝི་ཏྠཱ་ར་ཏོ ཝི་བྷ་ཛི་ཏྭཱ ཀ་ཐི་ཏཱ.
ཝི་སྶ་ཛྫ་ནཱ – ཨ་བྷི་དྷ་མྨ་པི་ཊ་ཀེ བྷ་ནྟེ པ་ཉྩ་མེ ཀ་ཐཱ་ཝ་ཏྠུ་པྤ་ཀ་ར་ཎེ དུ་ཏི་ཡ་ཝ་གྒེ དུ་ཏི་ཡཱ ཨ་ཉྙཱ་ཎ་ཀ་ཐཱ ‘‘ཨ་ཏྠི ཨ་ར་ཧ་ཏོ ཨ་ཉྙཱ་ཎ་ནྟི, ཨཱ་མ་ནྟཱ. ཨ་ཏྠི ཨ་ར་ཧ་ཏོ ཨ་ཝི་ཛྫཱ ཨ་ཝི་ཛྫོ་གྷོ ཨ་ཝི་ཛྫཱ་ཡོ་གོ ཨ་ཝི་ཛྫཱ་ནུ་ས་ཡོ ཨ་ཝི་ཛྫཱ་པ་རི་ཡུ་ཊྛཱ་ནཾ ཨ་ཝི་ཛྫཱ་སཾ་ཡོ་ཛ་ནཾ ཨ་ཝི་ཛྫཱ་ནཱི་ཝ་ར་ཎ་ནྟི, ན ཧེ་ཝཾ ཝ་ཏྟ་བྦེ. ན་ཏྠི ཨ་ར་ཧ་ཏོ ཨ་ཝི་ཛྫཱ ཨ་ཝི་ཛྫོ་གྷོ ཨ་ཝི་ཛྫཱ་ཡོ་གོ ཨ་ཝི་ཛྫཱ་ནུ་ས་ཡོ ཨ་ཝི་ཛྫཱ་པ་རི་ཡུ་ཊྛཱ་ནཾ ཨ་ཝི་ཛྫཱ་སཾ་ཡོ་ཛ་ནཾ ཨ་ཝི་ཛྫཱ་ནི་ཝ་ར་ཎ་ནྟི, ཨཱ་མ་ནྟཱ. ཧ་ཉྩི ན་ཏྠི ཨ་ར་ཧ་ཏོ ཨ་ཝི་ཛྫཱ ཨ་ཝི་ཛྫོ་གྷོ ཨ་ཝི་ཛྫཱ་ཡོ་གོ ཨ་ཝི་ཛྫཱ་ནུ་ས་ཡོ ཨ་ཝི་ཛྫཱ་པ་རི་ཡུ་ཊྛཱ་ནཾ ཨ་ཝི་ཛྫཱ་སཾ་ཡོ་ཛ་ནཾ ཨ་ཝི་ཛྫཱ་ནཱི་ཝ་ར་ཎཾ, ནོ ཙ ཝ་ཏ རེ ཝ་ཏྟ་བྦེ ‘‘ཨ་ཏྠི ཨ་ར་ཧ་ཏོ ཨ་ཉྙཱ་ཎ’’ནྟི ཨེ་ཝ་མཱ་དི་ནཱ ཨཱ་ཡ་སྨ་ཏཱ མ་ཧཱ་མོ་གྒ་ལི་པུ་ཏྟ་ཏི་སྶ་ཏྠེ་རེ་ན ཝི་ཏྠཱ་ར་ཏོ ཝི་བྷ་ཛི་ཏྭཱ བྷཱ་སི་ཏཱ.
ཨ་ས་ཉྙ་ཀ་ཐཱ
པུ་ཙྪཱ – ཨ་བྷི་དྷ་མྨ་པི་ཊ་ཀེ ཨཱ་ཝུ་སོ པ་ཉྩ་མེ ཀ་ཐཱ་ཝ་ཏྠུ་པྤ་ཀ་ར་ཎེ ཏ་ཏི་ཡ་ཝ་གྒེ ཨེ་ཀཱ་ད་ས་མཱ ཨ་ས་ཉྙ་ཀ་ཐཱ ཨཱ་ཡ་སྨ་ཏཱ མ་ཧཱ་མོ་གྒ་ལི་པུ་ཏྟ་ཏི་སྶ་ཏྠེ་རེ་ན ཀ་ཐཾ ཝི་ཏྠཱ་ར་ཏོ ཝི་བྷ་ཛི་ཏྭཱ ཀ་ཐི་ཏཱ.
ཝི་སྶ་ཛྫ་ནཱ – ཨ་བྷི་དྷ་མྨ་པི་ཊ་ཀེ བྷ་ནྟེ པ་ཉྩ་མེ ཀ་ཐཱ་ཝ་ཏྠུ་པྤ་ཀ་ར་ཎེ ཏ་ཏི་ཡ་ཝ་གྒེ ཨེ་ཀཱ་ད་ས་མཱ ཨ་ས་ཉྙ་ཀ་ཐཱ ‘‘ཨ་ས་ཉྙ་ས་ཏྟེ་སུ ས་ཉྙཱ ཨ་ཏྠཱི་ཏི, ཨཱ་མ་ནྟཱ. ས་ཉྙཱ་བྷ་ཝོ ས་ཉྙཱ་ག་ཏི ས་ཉྙཱ་ས་ཏྟཱ་ཝཱ་སོ ས་ཉྙཱ་སཾ་སཱ་རོ ས་ཉྙཱ་ཡོ་ནི ས་ཉྙ་ཏྟ་བྷཱ་ཝ་པ་ཊི་ལཱ་བྷོ་ཏི, ན ཧེ་ཝཾ ཝ་ཏྟ་བྦེ’’ཏི ཨེ་ཝ་མཱ་དི་ནཱ ཨཱ་ཡ་སྨ་ཏཱ མ་ཧཱ་མོ་གྒ་ལི་པུ་ཏྟ་ཏི་སྶ་ཏྠེ་རེ་ན ཝི་ཏྠཱ་ར་ཏོ ཝི་བྷ་ཛི་ཏྭཱ ཀ་ཐི་ཏཱ.
ཨ་ས་ཉྙ་ས་ཏྟེ་སུ ས་ཉྙཱ ཨ་ཏྠི.
ས་ཉྙཱ་བྷ་ཝོ ས་ཉྙཱ་ག་ཏི ས་ཉྙཱ་ས་ཏྟཱ་ཝཱ་སོ ས་ཉྙཱ་སཾ་སཱ་རོ ས་ཉྙཱ་ཡོ་ནི ས་ཉྙ་ཏྟ་བྷཱ་ཝ་པ་ཊི་ལཱ་བྷོ.
ན ཧེ་ཝཾ ཝ་ཏྟ་བྦེ.
ན་ནུ ཨ་ས་ཉྙ་བྷ་ཝོ ཨ་ས་ཉྙ་ག་ཏི ཨ་ས་ཉྙ་ས་ཏྟཱ་ཝཱ་སོ ཨ་ས་ཉྙ་སཾ་སཱ་རོ ཨ་ས་ཉྙ་ཡོ་ནི ཨ་ས་ཉྙ་ཏྟ་བྷཱ་ཝ་པ་ཊི་ལཱ་བྷོ.
ཧ་ཉྩི ཨ་ས་ཉྙ་བྷ་ཝོ ཨ་ས་ཉྙ་ག་ཏི ཨ་ས་ཉྙ་ས་ཏྟཱ་ཝཱ་སོ ཨ་ས་ཉྙ་སཾ་སཱ་རོ ཨ་ས་ཉྙ་ཡོ་ནི ཨ་ས་ཉྙ་ཏྟ་བྷཱ་ཝ་པ་ཊི་ལཱ་བྷོ, ནོ ཙ ཝ་ཏ རེ ཝ་ཏྟ་བྦེ ཨ་ས་ཉྙ་ས་ཏྟེ་སུ ས་ཉྙཱ ཨ་ཏྠི.
ཨ་ས་ཉྙ་ས་ཏྟེ་སུ ས་ཉྙཱ ཨ་ཏྠི.
པ་ཉྩ་ཝོ་ཀཱ་ར་བྷ་ཝོ ག་ཏི ས་ཏྟཱ་ཝཱ་སོ སཾ་སཱ་རོ ཡོ་ནི ཨ་ཏྟ་བྷཱ་ཝ་པ་ཊི་ལཱ་བྷོ.
ན་ནུ ཨེ་ཀ་ཝོ་ཀཱ་ར་བྷ་ཝོ ག་ཏི ས་ཏྟཱ་ཝཱ་སོ སཾ་སཱ་རོ ཡོ་ནི ཨ་ཏྟ་བྷཱ་ཝ་པ་ཊི་ལཱ་བྷོ.
ཧ་ཉྩི ཨེ་ཀ་ཝོ་ཀཱ་ར་བྷ་ཝོ ག་ཏི ས་ཏྟཱ་ཝཱ་སོ སཾ་སཱ་རོ ཡོ་ནི ཨ་ཏྟ་བྷཱ་ཝ་པ་ཊི་ལཱ་བྷོ, ནོ ཙ ཝ་ཏ རེ ཝ་ཏྟ་བྦེ ཨ་ས་ཉྙ་ས་ཏྟེ་སུ ས་ཉྙཱ ཨ་ཏྠི.
ཚ་ཊྛ་ཝ་གྒ
པ་ཐ་ཝཱི་དྷཱ་ཏུ་ས་ནི་ད་སྶ་ནཱ་ཏི་ཨཱ་དི་ཀ་ཐཱ
པུ་ཙྪཱ – ཚ་ཊྛ་ཝ་གྒེ པ་ན ཨཱ་ཝུ་སོ ཨ་ཊྛ་མཱ པ་ཐ་ཝཱི་དྷཱ་ཏུ ས་ནི་ད་སྶ་ནཱ་ཏི་ཨཱ་དི་ཀ་ཐཱ ཨཱ་ཡ་སྨ་ཏཱ མ་ཧཱ་མོ་གྒ་ལི་པུ་ཏྟ་ཏི་སྶ་ཏྠེ་རེ་ན ཀ་ཐཾ ཝི་ཏྠཱ་ར་ཏོ ཝི་བྷ་ཛི་ཏྭཱ ཀ་ཐི་ཏཱ.
ཝི་སྶ་ཛྫ་ནཱ – ཚ་ཊྛ་ཝ་གྒེ བྷ་ནྟེ ཨ་ཊྛ་མཱ པ་ཐ་ཝཱི་དྷཱ་ཏུ ས་ནི་ད་སྶ་ནཱ་ཏི་ཨཱ་དི་ཀ་ཐཱ ‘‘པ་ཐ་ཝཱི་དྷཱ་ཏུ ས་ནི་ད་སྶ་ནཱ་ཏི ཨཱ་མ་ནྟཱ. རཱུ་པཾ རཱུ་པཱ་ཡ་ཏ་ནཾ རཱུ་པ་དྷཱ་ཏུ ནཱི་ལཾ པཱི་ཏ་ཀཾ ལོ་ཧི་ཏ་ཀཾ ཨོ་དཱ་ཏཾ ཙ་ཀྑུ་ཝི་ཉྙེ་ཡྻཾ ཙ་ཀྑུ་སྨིཾ པ་ཊི་ཧ་ཉྙ་ཏི ཙ་ཀྑུ་སྶ ཨཱ་པཱ་ཐཾ ཨཱ་ག་ཙྪ་ཏཱི་ཏི, ན ཧེ་ཝཾ ཝ་ཏྟ་བྦེ’’ཏི ཨེ་ཝ་མཱ་དི་ནཱ ཨཱ་ཡ་སྨ་ཏཱ མ་ཧཱ་མོ་གྒ་ལི པུ་ཏྟ་ཏི་སྶ་ཏྠེ་རེ་ན ཝི་ཏྠཱ་ར་ཏོ ཝི་བྷ་ཛི་ཏྭཱ ཀ་ཐི་ཏཱ.
པ་ཐ་ཝཱི་དྷཱ་ཏུ ས་ནི་ད་སྶ་ནཱ.
ཙ་ཀྑུ་ཉྩ པ་ཊི་ཙྩ པ་ཐ་ཝཱི་དྷཱ་ཏུ་ཉྩ ཨུ་པྤ་ཛྫ་ཏི ཙ་ཀྑུ་ཝི་ཉྙཱ་ཎཾ.
ཏེ་ན ཧི ན ཝ་ཏྟ་བྦཾ ཙ་ཀྑུ་ཉྩ པ་ཊི་ཙྩ པ་ཐ་ཝཱི་དྷཱ་ཏུ་ཉྩ ཨུ་པྤ་ཛྫ་ཏི ཙ་ཀྑུ་ཝི་ཉྙཱ་ཎཾ.
ཨ་ནྟ་རཱ་བྷ་ཝ་ཀ་ཐཱ
པུ་ཙྪཱ – ཨ་བྷི་དྷ་མྨ་པི་ཊ་ཀེ ཨཱ་ཝུ་སོ པ་ཉྩ་མེ ཀ་ཐཱ་ཝ་ཏྠུ་པྤ་ཀ་ར་ཎེ ཨ་ཊྛ་མ་ཝ་གྒེ དུ་ཏི་ཡཱ ཨ་ནྟ་རཱ་བྷ་ཝ་ཀ་ཐཱ ཨཱ་ཡ་སྨ་ཏཱ མ་ཧཱ་མོ་གྒ་ལི་པུ་ཏྟ་ཏི་སྶ་ཏྠེ་རེ་ན ཀ་ཐཾ ཝི་ཏྠཱ་ར་ཏོ ཝི་བྷ་ཛི་ཏྭཱ ཀ་ཐི་ཏཱ.
ཝི་སྶ་ཛྫ་ནཱ – ཨ་བྷི་དྷ་མྨ་པི་ཊ་ཀེ བྷ་ནྟེ པ་ཉྩ་མེ ཀ་ཐཱ་ཝ་ཏྠུ་པྤ་ཀ་ར་ཎེ ཨ་ཊྛ་མ་ཝ་གྒེ དུ་ཏི་ཡཱ ཨ་ནྟ་རཱ་བྷ་ཝ་ཀ་ཐཱ ‘‘ཨ་ཏྠི ཨ་ནྟ་རཱ་བྷ་ཝོ་ཏི, ཨཱ་མ་ནྟཱ. ཀཱ་མ་བྷ་ཝོ་ཏི, ན ཧེ་ཝཾ ཝ་ཏྟ་བྦེ…པེ… ཨ་ཏྠི ཨ་ནྟ་རཱ་བྷ་ཝོ་ཏི, ཨཱ་མ་ནྟཱ. རཱུ་པ་བྷ་ཝོ་ཏི, ན ཧེ་ཝཾ ཝ་ཏྟ་བྦེ…པེ… ཨ་ཏྠི ཨ་ནྟ་རཱ་བྷ་ཝོ་ཏི, ཨཱ་མ་ནྟཱ. ཨ་རཱུ་པ་བྷ་ཝོ་ཏི, ན ཧེ་ཝཾ ཝ་ཏྟ་བྦེ’’ཏི ཨེ་ཝ་མཱ་དི་ནཱ ཨཱ་ཡ་སྨ་ཏཱ མ་ཧཱ་མོ་གྒ་ལི་པུ་ཏྟ་ཏི་སྶ་ཏྠེ་རེ་ན ཝི་ཏྠཱ་ར་ཏོ ཝི་བྷ་ཛི་ཏྭཱ ཀ་ཐི་ཏཱ.
ཨ་ཏྠི ཨ་ནྟ་རཱ་བྷ་ཝོ.
ན ཧེ་ཝཾ ཝ་ཏྟ་བྦེ.
ཨ་ཏྠི ཨ་ནྟ་རཱ་བྷ་ཝོ.