༩. ས་ཏྠུ་སཱ་ས་ན་སུ་ཏྟཾ

༨༣. ཨ་ཐ ཁོ ཨཱ་ཡ་སྨཱ ཨུ་པཱ་ལི ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཨཱ་ཡ་སྨཱ ཨུ་པཱ་ལི བྷ་ག་ཝ་ནྟཾ ཨེ་ཏ་ད་ཝོ་ཙ –

‘‘སཱ་དྷུ མེ, བྷ་ནྟེ, བྷ་ག་ཝཱ སཾ་ཁི་ཏྟེ་ན དྷ་མྨཾ དེ་སེ་ཏུ, ཡ་མ་ཧཾ བྷ་ག་ཝ་ཏོ དྷ་མྨཾ སུ་ཏྭཱ ཨེ་ཀོ ཝཱུ་པ་ཀ་ཊྛོ ཨ་པྤ་མ་ཏྟོ ཨཱ་ཏཱ་པཱི པ་ཧི་ཏ་ཏྟོ ཝི་ཧ་རེ་ཡྻ’’ནྟི. ‘‘ཡེ ཁོ ཏྭཾ, ཨུ་པཱ་ལི, དྷ་མྨེ ཛཱ་ནེ་ཡྻཱ་སི – ‘ཨི་མེ དྷ་མྨཱ ན ཨེ་ཀ་ནྟ་ནི་བྦི་དཱ་ཡ ཝི་རཱ་གཱ་ཡ ནི་རོ་དྷཱ་ཡ ཨུ་པ་ས་མཱ་ཡ ཨ་བྷི་ཉྙཱ་ཡ ས་མྦོ་དྷཱ་ཡ ནི་བྦཱ་ནཱ་ཡ སཾ་ཝ་ཏྟ་ནྟཱི’ཏི; ཨེ་ཀཾ་སེ་ན, ཨུ་པཱ་ལི, དྷཱ་རེ་ཡྻཱ་སི – ‘ནེ་སོ དྷ་མྨོ ནེ་སོ ཝི་ན་ཡོ ནེ་ཏཾ ས་ཏྠུ་སཱ་ས་ན’ནྟི. ཡེ ཙ ཁོ ཏྭཾ, ཨུ་པཱ་ལི, དྷ་མྨེ ཛཱ་ནེ་ཡྻཱ་སི – ‘ཨི་མེ དྷ་མྨཱ ཨེ་ཀ་ནྟ་ནི་བྦི་དཱ་ཡ ཝི་རཱ་གཱ་ཡ ནི་རོ་དྷཱ་ཡ ཨུ་པ་ས་མཱ་ཡ ཨ་བྷི་ཉྙཱ་ཡ ས་མྦོ་དྷཱ་ཡ ནི་བྦཱ་ནཱ་ཡ སཾ་ཝ་ཏྟ་ནྟཱི’ཏི; ཨེ་ཀཾ་སེ་ན, ཨུ་པཱ་ལི, དྷཱ་རེ་ཡྻཱ་སི – ‘ཨེ་སོ དྷ་མྨོ ཨེ་སོ ཝི་ན་ཡོ ཨེ་ཏཾ ས་ཏྠུ་སཱ་ས་ན’’’ནྟི. ན་ཝ་མཾ.