(༢༦) ༦. ཨུ་པ་ས་མྤ་དཱ་ཝ་གྒོ
༡. ཨུ་པ་ས་མྤཱ་དེ་ཏ་བྦ་སུ་ཏྟཾ
༢༥༡. [མ་ཧཱ་ཝ. ༨༤] ‘‘པ་ཉྩ་ཧི, བྷི་ཀྑ་ཝེ, དྷ་མྨེ་ཧི ས་མ་ནྣཱ་ག་ཏེ་ན བྷི་ཀྑུ་ནཱ ཨུ་པ་ས་མྤཱ་དེ་ཏ་བྦཾ. ཀ་ཏ་མེ་ཧི པ་ཉྩ་ཧི? ཨི་དྷ, བྷི་ཀྑ་ཝེ, བྷི་ཀྑུ ཨ་སེ་ཁེ་ན སཱི་ལ་ཀྑ་ནྡྷེ་ན ས་མ་ནྣཱ་ག་ཏོ ཧོ་ཏི; ཨ་སེ་ཁེ་ན ས་མཱ་དྷི་ཀྑ་ནྡྷེ་ན ས་མ་ནྣཱ་ག་ཏོ ཧོ་ཏི; ཨ་སེ་ཁེ་ན པ་ཉྙཱ་ཀྑ་ནྡྷེ་ན ས་མ་ནྣཱ་ག་ཏོ ཧོ་ཏི; ཨ་སེ་ཁེ་ན ཝི་མུ་ཏྟི་ཀྑ་ནྡྷེ་ན ས་མ་ནྣཱ་ག་ཏོ ཧོ་ཏི; ཨ་སེ་ཁེ་ན ཝི་མུ་ཏྟི་ཉཱ་ཎ་ད་སྶ་ན་ཀྑ་ནྡྷེ་ན ས་མ་ནྣཱ་ག་ཏོ ཧོ་ཏི. ཨི་མེ་ཧི ཁོ, བྷི་ཀྑ་ཝེ, པ་ཉྩ་ཧི དྷ་མྨེ་ཧི ས་མ་ནྣཱ་ག་ཏེ་ན བྷི་ཀྑུ་ནཱ ཨུ་པ་ས་མྤཱ་དེ་ཏ་བྦ’’ནྟི. པ་ཋ་མཾ.
༢. ནི་སྶ་ཡ་སུ་ཏྟཾ
༢༥༢. [མ་ཧཱ་ཝ. ༨༤] ‘‘པ་ཉྩ་ཧི, བྷི་ཀྑ་ཝེ, དྷ་མྨེ་ཧི ས་མ་ནྣཱ་ག་ཏེ་ན བྷི་ཀྑུ་ནཱ ནི་སྶ་ཡོ དཱ་ཏ་བྦོ. ཀ་ཏ་མེ་ཧི པ་ཉྩ་ཧི? ཨི་དྷ, བྷི་ཀྑ་ཝེ, བྷི་ཀྑུ ཨ་སེ་ཁེ་ན སཱི་ལ་ཀྑ་ནྡྷེ་ན ས་མ་ནྣཱ་ག་ཏོ ཧོ་ཏི…པེ… ཨ་སེ་ཁེ་ན ཝི་མུ་ཏྟི་ཉཱ་ཎ་ད་སྶ་ན་ཀྑ་ནྡྷེ་ན ས་མ་ནྣཱ་ག་ཏོ ཧོ་ཏི. ཨི་མེ་ཧི…པེ… ནི་སྶ་ཡོ དཱ་ཏ་བྦོ’’ཏི. དུ་ཏི་ཡཾ.
༣. སཱ་མ་ཎེ་ར་སུ་ཏྟཾ
༢༥༣. [མ་ཧཱ་ཝ. ༨༤] ‘‘པ་ཉྩ་ཧི, བྷི་ཀྑ་ཝེ, དྷ་མྨེ་ཧི ས་མ་ནྣཱ་ག་ཏེ་ན བྷི་ཀྑུ་ནཱ སཱ་མ་ཎེ་རོ ཨུ་པ་ཊྛཱ་པེ་ཏ་བྦོ. ཀ་ཏ་མེ་ཧི པ་ཉྩ་ཧི? ཨི་དྷ, བྷི་ཀྑ་ཝེ, བྷི་ཀྑུ ཨ་སེ་ཁེ་ན སཱི་ལ་ཀྑ་ནྡྷེ་ན ས་མ་ནྣཱ་ག་ཏོ ཧོ་ཏི; ཨ་སེ་ཁེ་ན ས་མཱ་དྷི་ཀྑ་ནྡྷེ་ན… ཨ་སེ་ཁེ་ན པ་ཉྙཱ་ཀྑ་ནྡྷེ་ན… ཨ་སེ་ཁེ་ན ཝི་མུ་ཏྟི་ཀྑ་ནྡྷེ་ན… ཨ་སེ་ཁེ་ན ཝི་མུ་ཏྟི་ཉཱ་ཎ་ད་སྶ་ན་ཀྑ་ནྡྷེ་ན ས་མ་ནྣཱ་ག་ཏོ ཧོ་ཏི. ཨི་མེ་ཧི ཁོ, བྷི་ཀྑ་ཝེ, པ་ཉྩ་ཧི དྷ་མྨེ་ཧི ས་མ་ནྣཱ་ག་ཏེ་ན བྷི་ཀྑུ་ནཱ སཱ་མ་ཎེ་རོ ཨུ་པ་ཊྛཱ་པེ་ཏ་བྦོ’’ཏི. ཏ་ཏི་ཡཾ.
༤. པ་ཉྩ་མ་ཙྪ་རི་ཡ་སུ་ཏྟཾ
༢༥༤. ‘‘པ་ཉྩི་མཱ་ནི, བྷི་ཀྑ་ཝེ, མ་ཙྪ་རི་ཡཱ་ནི. ཀ་ཏ་མཱ་ནི པ་ཉྩ? ཨཱ་ཝཱ་ས་མ་ཙྪ་རི་ཡཾ, ཀུ་ལ་མ་ཙྪ་རི་ཡཾ, ལཱ་བྷ་མ་ཙྪ་རི་ཡཾ, ཝ་ཎྞ་མ་ཙྪ་རི་ཡཾ, དྷ་མྨ་མ་ཙྪ་རི་ཡཾ – ཨི་མཱ་ནི ཁོ, བྷི་ཀྑ་ཝེ, པ་ཉྩ མ་ཙྪ་རི་ཡཱ་ནི. ཨི་མེ་སཾ ཁོ, བྷི་ཀྑ་ཝེ, པ་ཉྩ་ནྣཾ མ་ཙྪ་རི་ཡཱ་ནཾ ཨེ་ཏཾ པ་ཊི་ཀུ་ཊྛཾ [པ་ཏི་ཀི་ཊྛཾ (སཱི. པཱི.), པ་ཊི་ཀྐི་ཊྛཾ (སྱཱ. ཀཾ.), པ་ཊི་ཀི་ཊྛཾ (ཀ.)], ཡ་དི་དཾ དྷ་མྨ་མ་ཙྪ་རི་ཡ’’ནྟི. ཙ་ཏུ་ཏྠཾ.
༥. མ་ཙྪ་རི་ཡ་པྤ་ཧཱ་ན་སུ་ཏྟཾ
༢༥༥. ‘‘པ་ཉྩ་ནྣཾ, བྷི་ཀྑ་ཝེ, མ་ཙྪ་རི་ཡཱ་ནཾ པ་ཧཱ་ནཱ་ཡ ས་མུ་ཙྪེ་དཱ་ཡ བྲ་ཧྨ་ཙ་རི་ཡཾ ཝུ་སྶ་ཏི. ཀ་ཏ་མེ་སཾ པ་ཉྩ་ནྣཾ? ཨཱ་ཝཱ་ས་མ་ཙྪ་རི་ཡ་སྶ པ་ཧཱ་ནཱ་ཡ ས་མུ་ཙྪེ་དཱ་ཡ བྲ་ཧྨ་ཙ་རི་ཡཾ ཝུ་སྶ་ཏི; ཀུ་ལ་མ་ཙྪ་རི་ཡ་སྶ…པེ… ལཱ་བྷ་མ་ཙྪ་རི་ཡ་སྶ… ཝ་ཎྞ་མ་ཙྪ་རི་ཡ་སྶ… དྷ་མྨ་མ་ཙྪ་རི་ཡ་སྶ པ་ཧཱ་ནཱ་ཡ ས་མུ་ཙྪེ་དཱ་ཡ བྲ་ཧྨ་ཙ་རི་ཡཾ ཝུ་སྶ་ཏི. ཨི་མེ་སཾ ཁོ, བྷི་ཀྑ་ཝེ, པ་ཉྩ་ནྣཾ མ་ཙྪ་རི་ཡཱ་ནཾ པ་ཧཱ་ནཱ་ཡ ས་མུ་ཙྪེ་དཱ་ཡ བྲ་ཧྨ་ཙ་རི་ཡཾ ཝུ་སྶ་ཏཱི’’ཏི. པ་ཉྩ་མཾ.
༦. པ་ཋ་མ་ཛྷཱ་ན་སུ་ཏྟཾ
༢༥༦. ‘‘པ་ཉྩི་མེ, བྷི་ཀྑ་ཝེ, དྷ་མྨེ ཨ་པྤ་ཧཱ་ཡ ཨ་བྷ་བྦོ པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་རི་ཏུཾ. ཀ་ཏ་མེ པ་ཉྩ? ཨཱ་ཝཱ་ས་མ་ཙྪ་རི་ཡཾ, ཀུ་ལ་མ་ཙྪ་རི་ཡཾ, ལཱ་བྷ་མ་ཙྪ་རི་ཡཾ, ཝ་ཎྞ་མ་ཙྪ་རི་ཡཾ, དྷ་མྨ་མ་ཙྪ་རི་ཡཾ – ཨི་མེ ཁོ, བྷི་ཀྑ་ཝེ, པ་ཉྩ དྷ་མྨེ ཨ་པྤ་ཧཱ་ཡ ཨ་བྷ་བྦོ པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་རི་ཏུཾ.
‘‘པ་ཉྩི་མེ, བྷི་ཀྑ་ཝེ, དྷ་མྨེ པ་ཧཱ་ཡ བྷ་བྦོ པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་རི་ཏུཾ. ཀ་ཏ་མེ པ་ཉྩ? ཨཱ་ཝཱ་ས་མ་ཙྪ་རི་ཡཾ, ཀུ་ལ་མ་ཙྪ་རི་ཡཾ, ལཱ་བྷ་མ་ཙྪ་རི་ཡཾ, ཝ་ཎྞ་མ་ཙྪ་རི་ཡཾ, དྷ་མྨ་མ་ཙྪ་རི་ཡཾ – ཨི་མེ ཁོ, བྷི་ཀྑ་ཝེ, པ་ཉྩ དྷ་མྨེ པ་ཧཱ་ཡ བྷ་བྦོ པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་རི་ཏུ’’ནྟི. ཚ་ཊྛཾ.
༧-༡༣. དུ་ཏི་ཡ་ཛྷཱ་ན་སུ་ཏྟཱ་དི་ས་ཏྟ་ཀཾ
༢༥༧-༢༦༣. ‘‘པ་ཉྩི་མེ, བྷི་ཀྑ་ཝེ, དྷ་མྨེ ཨ་པྤ་ཧཱ་ཡ ཨ་བྷ་བྦོ དུ་ཏི་ཡཾ ཛྷཱ་ནཾ…པེ… ཨ་བྷ་བྦོ ཏ་ཏི་ཡཾ ཛྷཱ་ནཾ… ཨ་བྷ་བྦོ ཙ་ཏུ་ཏྠཾ ཛྷཱ་ནཾ… ཨ་བྷ་བྦོ སོ་ཏཱ་པ་ཏྟི་ཕ་ལཾ… ཨ་བྷ་བྦོ ས་ཀ་དཱ་གཱ་མི་ཕ་ལཾ… ཨ་བྷ་བྦོ ཨ་ནཱ་གཱ་མི་ཕ་ལཾ… ཨ་བྷ་བྦོ ཨ་ར་ཧ་ཏྟཾ [ཨ་ར་ཧ་ཏྟ་ཕ་ལཾ (སཱི.)] ས་ཙྪི་ཀཱ་ཏུཾ. ཀ་ཏ་མེ པ་ཉྩ? ཨཱ་ཝཱ་ས་མ་ཙྪ་རི་ཡཾ, ཀུ་ལ་མ་ཙྪ་རི་ཡཾ, ལཱ་བྷ་མ་ཙྪ་རི་ཡཾ, ཝ་ཎྞ་མ་ཙྪ་རི་ཡཾ, དྷ་མྨ་མ་ཙྪ་རི་ཡཾ – ཨི་མེ ཁོ, བྷི་ཀྑ་ཝེ, པ་ཉྩ དྷ་མྨེ ཨ་པྤ་ཧཱ་ཡ ཨ་བྷ་བྦོ ཨ་ར་ཧ་ཏྟཾ ས་ཙྪི་ཀཱ་ཏུཾ.
‘‘པ་ཉྩི་མེ, བྷི་ཀྑ་ཝེ, དྷ་མྨེ པ་ཧཱ་ཡ བྷ་བྦོ དུ་ཏི་ཡཾ ཛྷཱ་ནཾ…པེ… བྷ་བྦོ ཏ་ཏི་ཡཾ ཛྷཱ་ནཾ… བྷ་བྦོ ཙ་ཏུ་ཏྠཾ ཛྷཱ་ནཾ… བྷ་བྦོ སོ་ཏཱ་པ་ཏྟི་ཕ་ལཾ… བྷ་བྦོ ས་ཀ་དཱ་གཱ་མི་ཕ་ལཾ… བྷ་བྦོ ཨ་ནཱ་གཱ་མི་ཕ་ལཾ… བྷ་བྦོ ཨ་ར་ཧ་ཏྟཾ ས་ཙྪི་ཀཱ་ཏུཾ. ཀ་ཏ་མེ པ་ཉྩ? ཨཱ་ཝཱ་ས་མ་ཙྪ་རི་ཡཾ, ཀུ་ལ་མ་ཙྪ་རི་ཡཾ, ལཱ་བྷ་མ་ཙྪ་རི་ཡཾ, ཝ་ཎྞ་མ་ཙྪ་རི་ཡཾ, དྷ་མྨ་མ་ཙྪ་རི་ཡཾ – ཨི་མེ ཁོ, བྷི་ཀྑ་ཝེ, པ་ཉྩ དྷ་མྨེ པ་ཧཱ་ཡ བྷ་བྦོ ཨ་ར་ཧ་ཏྟཾ ས་ཙྪི་ཀཱ་ཏུ’’ནྟི. ཏེ་ར་ས་མཾ.
༡༤. ཨ་པ་ར་པ་ཋ་མ་ཛྷཱ་ན་སུ་ཏྟཾ
༢༦༤. ‘‘པ་ཉྩི་མེ, བྷི་ཀྑ་ཝེ, དྷ་མྨེ ཨ་པྤ་ཧཱ་ཡ ཨ་བྷ་བྦོ པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་རི་ཏུཾ. ཀ་ཏ་མེ པ་ཉྩ? ཨཱ་ཝཱ་ས་མ་ཙྪ་རི་ཡཾ, ཀུ་ལ་མ་ཙྪ་རི་ཡཾ, ལཱ་བྷ་མ་ཙྪ་རི་ཡཾ, ཝ་ཎྞ་མ་ཙྪ་རི་ཡཾ, ཨ་ཀ་ཏ་ཉྙུ་ཏཾ ཨ་ཀ་ཏ་ཝེ་དི་ཏཾ – ཨི་མེ ཁོ, བྷི་ཀྑ་ཝེ, པ་ཉྩ དྷ་མྨེ ཨ་པྤ་ཧཱ་ཡ ཨ་བྷ་བྦོ པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་རི་ཏུཾ.
‘‘པ་ཉྩི་མེ, བྷི་ཀྑ་ཝེ, དྷ་མྨེ པ་ཧཱ་ཡ བྷ་བྦོ པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་རི་ཏུཾ. ཀ་ཏ་མེ པ་ཉྩ? ཨཱ་ཝཱ་ས་མ་ཙྪ་རི་ཡཾ, ཀུ་ལ་མ་ཙྪ་རི་ཡཾ, ལཱ་བྷ་མ་ཙྪ་རི་ཡཾ, ཝ་ཎྞ་མ་ཙྪ་རི་ཡཾ, ཨ་ཀ་ཏ་ཉྙུ་ཏཾ ཨ་ཀ་ཏ་ཝེ་དི་ཏཾ – ཨི་མེ ཁོ, བྷི་ཀྑ་ཝེ, པ་ཉྩ དྷ་མྨེ པ་ཧཱ་ཡ བྷ་བྦོ པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་རི་ཏུ’’ནྟི. ཙུ་དྡ་ས་མཾ.
༡༥-༢༡. ཨ་པ་ར་དུ་ཏི་ཡ་ཛྷཱ་ན་སུ་ཏྟཱ་དི་ས་ཏྟ་ཀཾ
༢༦༥-༢༧༡. ‘‘པ་ཉྩི་མེ, བྷི་ཀྑ་ཝེ, དྷ་མྨེ ཨ་པྤ་ཧཱ་ཡ ཨ་བྷ་བྦོ དུ་ཏི་ཡཾ ཛྷཱ་ནཾ…པེ… ཏ་ཏི་ཡཾ ཛྷཱ་ནཾ… ཙ་ཏུ་ཏྠཾ ཛྷཱ་ནཾ… སོ་ཏཱ་པ་ཏྟི་ཕ་ལཾ… ས་ཀ་དཱ་གཱ་མི་ཕ་ལཾ… ཨ་ནཱ་གཱ་མི་ཕ་ལཾ… ཨ་ར་ཧ་ཏྟཾ ས་ཙྪི་ཀཱ་ཏུཾ. ཀ་ཏ་མེ པ་ཉྩ? ཨཱ་ཝཱ་ས་མ་ཙྪ་རི་ཡཾ, ཀུ་ལ་མ་ཙྪ་རི་ཡཾ, ལཱ་བྷ་མ་ཙྪ་རི་ཡཾ, ཝ་ཎྞ་མ་ཙྪ་རི་ཡཾ, ཨ་ཀ་ཏ་ཉྙུ་ཏཾ ཨ་ཀ་ཏ་ཝེ་དི་ཏཾ – ཨི་མེ ཁོ, བྷི་ཀྑ་ཝེ, པ་ཉྩ དྷ་མྨེ ཨ་པྤ་ཧཱ་ཡ ཨ་བྷ་བྦོ ཨ་ར་ཧ་ཏྟཾ ས་ཙྪི་ཀཱ་ཏུཾ.
‘‘པ་ཉྩི་མེ, བྷི་ཀྑ་ཝེ, དྷ་མྨེ པ་ཧཱ་ཡ བྷ་བྦོ དུ་ཏི་ཡཾ ཛྷཱ་ནཾ…པེ… ཏ་ཏི་ཡཾ ཛྷཱ་ནཾ… ཙ་ཏུ་ཏྠཾ ཛྷཱ་ནཾ… སོ་ཏཱ་པ་ཏྟི་ཕ་ལཾ… ས་ཀ་དཱ་གཱ་མི་ཕ་ལཾ… ཨ་ནཱ་གཱ་མི་ཕ་ལཾ… ཨ་ར་ཧ་ཏྟཾ ས་ཙྪི་ཀཱ་ཏུཾ. ཀ་ཏ་མེ པ་ཉྩ? ཨཱ་ཝཱ་ས་མ་ཙྪ་རི་ཡཾ, ཀུ་ལ་མ་ཙྪ་རི་ཡཾ, ལཱ་བྷ་མ་ཙྪ་རི་ཡཾ, ཝ་ཎྞ་མ་ཙྪ་རི་ཡཾ, ཨ་ཀ་ཏ་ཉྙུ་ཏཾ ཨ་ཀ་ཏ་ཝེ་དི་ཏཾ – ཨི་མེ ཁོ, བྷི་ཀྑ་ཝེ, པ་ཉྩ དྷ་མྨེ པ་ཧཱ་ཡ བྷ་བྦོ ཨ་ར་ཧ་ཏྟཾ ས་ཙྪི་ཀཱ་ཏུ’’ནྟི. ཨེ་ཀ་ཝཱི་ས་ཏི་མཾ.
ཨུ་པ་ས་མྤ་དཱ་ཝ་གྒོ ཚ་ཊྛོ.